དྲག་གནོན་དང་བཅར་རྡུང་འོག་གི་ཞི་རྒོལ།
མཐའ་མའི་བསྐྱར་བཅོས། (༡༦༢༠༠༩༠༢༤༥)
ཤམ་བྷ་ལའི་ཕོ་ཉའི་དྲ་བས་ཟླ་༡༠ཚེས་༡༥ཉིན་སྤེལ། བོད་ཀྱི་རྒྱལ་ས་ལྷ་སར་ ༢༠༠༨ ཕྱི་ཟླ་ ༡༡ ཚེས་ ༢༠ དགོང་དྲོའི་ཆུ་ཚོད་ ༥ ཡས་མས་སུ་རང་ལོ་ ༢༠ ཙམ་ཡིན་པའི་ཕོ་གསར་ཞིག་ནས་བར་སྐོར་ནང་བོད་ལ་རང་དབང་དགོས་ ཞེས་པའི་སྐད་འབོད་བྱས་སྟབས་འབྲེལ་ཡོད་སྤྱི་བདེ་མི་སྣས་ཉེས་རྡུང་ཚབས་ཆེ་གཏོང་བཞིན་འཛིན་བཟུང་བྱས་པའི་ཛ་དྲག་གི་གནས་ཚུལ་ཐོན་འདུགབོད་ཀྱི་རྒྱལ་ས་ལྷ་སའི་ནང་འགྲོ་བ་མིའི་ཐོབ་ཐང་གི་ཉིན་མོར་རྒྱ་ནག་གཞུང་ནས་དམ་བསྒྲགས་ཤུགས་ཆེ་བྱས་པ།
༄༅། །འདི་ལས་སུ་ཁུངས་ལྡན་གྱི་གནས་ཚུལ་འབྱོར་བ་གཞིགས་ན། བོད་ཀྱི་རྒྱལ་ས་ལྷ་སའི་བར་སྐོར་ནང་འགྲོ་བ་མིའི་ཐོབ་ཐང་གི་ཉིན་མོ་སྟེ་ཕྱི་ལོ་ ༢༠༠༨ ཕྱི་ཟླ་ ༡༢ ཚེས་ ༡༠ ཉིན་རྒྱ་ནག་གཞུང་ཕྱོགས་ནས་དམག་མི་ཁྱོན་ཆེ་བཀྲམ་ཡོད་པ་མ་ཟད། ལྷ་སའི་བར་སྐོར་དང༌། ལྷ་ཁང༌། དེབཞིན་རྟེན་གནས་ཁག་བཅས་ལ་རྒྱ་དམག་གིས་བཀག་འགོག་བྱས་ཏེ་བོད་མི་བསྐོར་བ་རྒྱག་ཏུ་མི་བཅུག་པ་དང༌། དེ་མཚུངས་ལྷ་སའི་ནུབ་ངོས་ཆུ་ཤུར་དང༌། སྟོད་ལུང་གདོང་དཀར་གསུམ་མདོ་སོགས་ལ་རྒྱ་ནག་གཞུང་ནས་དྲག་ཆས་དམག་མི་ཁྱོན་ཆེ་སྤོ་བཞུགས་བྱས་འབྲས་སུ་གཡས་གཡོན་ནས་ལྷ་སར་ཡོང་མཁན་འགྲུལ་པའི་ཅ་དངོས་རྒྱ་དམག་གིས་སྔོག་བཤེར་བྱེད་པ་དང༌། ཕོ་བྲང་པོ་ཏཱ་ལའི་མདུན་ཐང་གི་ལམ་ཆེན་སོགས་སུ་བྱེ་མ་བླུགས་པའི་རྩ་རས་ཀྱི་འཛིང་རག་བཟོས་ཏེ་དམག་ས་དང་གཉིས་སུ་མེད་པའི་འཇིགས་སྣང་སྐྱེས་གཞིའི་དམ་བསྒྲགས་ཤུགས་ཆེ་བྱེད་བཞིན་ཡོད་ལ། ལྷ་སའི་བར་སྐོར་གྱི་གཡས་གཡོན་གང་སར་དྲག་ཆས་སྤྲས་པའི་དམག་མི་དང༌། མི་སེར་དཀྱུས་མའི་ཆས་གོས་སྤྲས་པའི་རྒྱ་དམག་གིས་བོད་མི་རྣམས་ལ་བསུན་གཙེར་ཟོ་བཞིན་པ་མ་ཟད། སོ་སོའི་ནང་དུ་གང་མགྱོགས་ལོག་དགོས་པ་ལས་ཕྱིར་གང་བྱུང་འགྲོ་འོང་མི་ཆོག་པའི་སྔོན་བརྡ་ཡང་གཏོང་བཞིན་ཡོད་འདུག དེ་ཙམ་མ་ཡིན་པར་ཉེ་དུས་གྲོང་ཁྱེར་ལྷ་སའི་སྤྱི་བདེ་དྲག་ཆས་ཉེན་རྟོག་པ་ཁག་ཅིག་ལ་བོད་མིའི་ཐོག་དྲག་ལས་བྱ་ཆེད་གོ་མཚོན་འཕར་མ་མཁོ་སྤྲོད་དང༌། རྒྱ་ནག་གཞུང་ནས་དྲག་ཆས་ཉེན་རྟོག་པ་ཁག་ཅིག་ལ་སྐབས་རེ་གྲྭ་ཆས་གྱོན་ཏུ་བཅུག་པ་དང༌། སྐབས་རེ་ས་གནས་ཀྱི་གད་བདར་བྱེད་མཁན་སོགས་ཀྱི་གོས་གྱོན་བཅུག་པ་སོགས་བྱས་ཏེ་བོད་མིའི་ཐོག་ཉིན་རེ་ལས་མ་བསྡད་པར་དམ་བསྒྲགས་ཤུགས་ཆེ་གཏོང་བཞིན་ཡོད་འདུག །
ཞི་རྒོལ་ཁྲོད་ཀྱི་མི་སྣ་འདས་གྲོངས།
འདི་ལོའི་ཕྱི་ཟླ་ ༣ ཚེས་ ༡༤ ཉིན་ལྷ་སའི་ཞི་རྒོལ་ཁྲོད་ཀྱི་མི་སྣ་འདས་གྲོངས་སུ་གྱུར་བའི་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༡༽ བསོད་ནམས་ཕུན་ཚོགས་ལགས་ནི་སྐྱེས་ཡུལ་སྨར་ཁམས་རྫོང་སྨད་པ་སྡེ་ལྕགས་སོ་སྟེང་པ་ནས་ཡིན་ཞིང༌། ཕྱི་ལོ་ ༢༠༠༨ ཟླ་ ༣ ཚེས་ ༡༤ ཉིན་བོད་ནང་ཞི་བའི་སྒེར་ལངས་ནང་བཞུགས་རྐྱེན་ཕྱི་ཟླ་ ༣ ཚེས་ ༡༦ དགོང་དྲོ་སྤྱི་བདེ་ཉེན་རྟོག་དམག་མིས་སྡོད་ཁང་དུ་ཡོང་སྟེ་ཉེས་རྡུང་ཚད་མེད་གཏོང་བཞིན་འཛིན་བཟུང་བྱས་ཡོད་འདུག ཁོང་འཛིན་བཟུང་སྐབས་རྒྱ་དམག་ནས་ཉེས་རྡུང་ཚད་མེད་གཏོང་སྐབས་བཟའ་ཟླ་ལོང་བ་ཞིག་ཡོད་པ་དེས་མ་རྡུང་ ཞེས་ངུ་འབོད་ཀྱི་ཐོག་ནས་ཞུ་བ་བྱས་ཀྱང་དེ་ལས་ལྡོག་སྟེ་རྒྱ་དམག་ཉེན་རྟོག་པས་བཟའ་ཟླའི་མགོ་ལ་དབྱུག་པ་བཞུས་ཏེ་དྲན་མེད་དུ་འགྱེལ་བའི་གནས་ཚུལ་བྱུང་འདུག ཁྱོ་ག་བསོད་ནམས་ཕུན་ཚོགས་བཙོན་འཇུག་དང་ཉེས་རྡུང་བཏང་བའི་སྡུག་བསྔལ་གྱིས་བཟའ་ཟླ་ལོང་བ་དེ་ཡང་འདས་གྲོངས་སུ་གྱུར་བའི་གནས་ཚུལ་ཐོན་འདུག ཁོང་བཟའ་ཟླ་གཉིས་མི་ལོ་ཉི་ཤུ་ལྷག་རིང་ལྷ་ས་རྭ་མོ་ཆེ་གཙུག་ལག་ཁང་གི་སྒོ་འགྲམ་དུ་སློང་མོ་བརྒྱབ་སྟེ་འཚོ་བ་སྐྱེལ་བཞིན་པ་ཀུན་གྱིས་ཤེས་གསལ་ཡིན་ཞིང༌། ཕྲུ་གུ་བུ་གཉིས་ཡོད་པ་ཆེ་བ་ལོ་ ༩ དང་ཆུང་བ་ལོ་ ༧ སོན་པ་གཉིས་ད་ལྟ་བདག་མེད་དུ་ལུས་པའི་གནས་ཚུལ་ཐོན་འདུག ༢༽ བྱམས་པ་ལྷ་མོ། རང་ལོ་ ༤༥ སྐྱེས་ཡུལ་ཁྱུང་པོ་སྟེང་ཆེན་རྫོང་ཁོངས་ནས་ཡིན་ཅིང༌། ལྷ་ས་རྭ་མོ་ཆེ་ཁུལ་གཏན་སྡོད་བྱེད་མུས་ཡིན། ཕྱི་ལོ་ ༢༠༠༨ ཕྱི་ཟླ་ ༣ ཚེས་ ༢༩ ཉིན་ལྷ་ས་ནས་འཛིན་བཟུང་གིས་བཀག་ཉར་བྱེད་རིང་ཉེས་རྡུང་ཚད་མེད་ཕོག་སྟེ་ གློད་བཀྲོལ་སྐབས་གཟུགས་པོ་གཅོང་ཅན་ཏུ་གྱུར་ཏེ་སྨན་བཅོས་བྱས་ཀྱང་ཕན་འབྲས་མ་བྱུང་བར་ཕྱི་ཟླ་ ༡༡ ནང་ལྷ་སར་ཁོང་གི་ཁྱིམ་དུ་འདས་གྲོངས་སོང་བའི་གནས་ཚུལ་ཐོན་འདུག ༣༽ བསྟན་འཛིན་ནོར་བུ། སྐྱེས་ཡུལ་མལ་དྲོ་གུང་དཀར་རྫོང་ཁོངས་ནས་ཡིན་ཅིང༌། འདི་ལོར་ལྷ་ས་དང་འཕན་པོ་ཁུལ་སོགས་ནང་ཕྱི་ཟླ་ ༣ པའི་ཞི་རྒོལ་དང་འབྲེལ་བའི་ཐོག་འཛིན་བཟུང་བྱས་ཏེ་འཕན་པོ་ཁུལ་གནས་ལྟ་སྲུང་ཁང་དུ་བཀག་ཉར་བྱེད་རིང་ཉེས་རྡུང་ཚད་མེད་ཕོག་པ་སོགས་ལ་བརྟེན། མཐར་འཕན་པོ་ལྷུན་གྲུབ་རྫོང་འབྲེལ་ཡོད་ཚན་པས་ཕུང་པོ་ནང་མིར་རྩིས་སྤྲོད་བྱས་ཡོད་འདུག་པ་ལས། ཞིབ་ཕྲའི་འཛིན་བཟུང་བྱ་ཡུལ་དང་བཀག་ཉར་བྱེད་ཡུལ་ས་གནས་ཁ་གསལ་ཤེས་རྟོགས་མེད་པའི་གནས་ཚུལ་ཐོན་འདུག ཁོང་ལ་བཟའ་ཟླ་དང་རང་ལོ་ ༧ ནས་ ༡ བར་ཅན་གྱི་ཕྲུ་གུ་གསུམ་ཡང་ཤུལ་དུ་ལུས་ཡོད་འདུག །