ཨ་དྲི་རིན་པོ་ཆེ་དང་ཁོང་གི་སྲས་ཟླ་ཤེར་ལ་ཁྲིམས་ཐག་བཅད་པ།
ཤམ་བྷ་ལའི་ཕོ་ཉ། ཕྱི་ལོ་༢༠༡༠ཟླ་༣ཚེས་༡༥ཉིན། བོད་ཀྱི་རྒྱལ་ཡོངས་མང་གཙོ་ཚོགས་པར་ཁུངས་ལྡན་གྱི་གནས་ཚུལ་མཁོ་སྤྲོད་བྱེད་པར་ལྟར་ན། ཨ་དྲི་རིན་པོ་ཆེ་མདོ་ཁམས་ཛ་ཆུ་ཁར་སྐུ་འཁྲུངས། དབོན་པོ་དགོན་པའི་བླ་མ་ཡིན་ལ། སྤྱི་ལོ་༢༠༠༨ ཟླ་བ་༣ ཚེས་༡༥ ཉིན་རྒྱ་གཞུང་གིས་ཁོ་རང་གི་དགོན་པ་ནས་འཇུ་བཟུང་བྱས་ཡོད། འཇུ་བཟུང་བྱེད་དོན་ནི་སྤྱི་ལོ་༢༠༠༨ ཟླ་བ་༣ ཚེས་༡༠ ཡི་ཞི་རྒོལ་སྐབས་རིན་པོ་ཆེ་དགོན་པའི་གྲྭ་པ་བརྒྱད་ལས་འགུལ་ནང་བཞུགས་ཡོད་པ་དང༌། དེ་འབྲེལ་རིན་པོ་ཆེ་ཡང་ལས་འགུལ་དེའི་སྐབས་འབྲེལ་བ་ཡོད་སྐོར་བརྗོད་ནས་ཁོང་བཙོན་འཇུག་བྱས་ཡོད། ལོ་གཅིག་རིང་སྟོད་ལུང་བཙོན་ཁང་དུ་བཀག་ཉར་བྱས་པ་དང༌། སྤྱི་ལོ་༢༠༠༩ ཟླ་བ་༡༢ ཚེས་༡༥ ཉིན་རིན་པོ་ཆེ་ཡི་རྒྱ་རིགས་སློབ་མ་ལྷ་སར་སླེབས་ཏེ་རིན་པོ་ཆེ་དགུང་ལོ་བགྲེས་པོ་ཡིན་པ་དང༌། སྐུ་གཟུགས་བདེ་ཐང་མེད་པ་བཅས་ཀྱིས་ཞུ་གཏུགས་བྱས་ཡོད་ཀྱང་རྒྱ་གཞུང་གིས་ཁས་ལེན་བྱས་མེད། ཁོང་རིག་གསར་སྐབས་བཙོན་འཇུག་བྱས་པ་དང༌། དེ་ནས་བཙོན་གྲོལ་ཐོབ་མཚམས་རྒྱ་གཞུང་གིས་མཚན་གནས་ཞིག་ཀྱང་སྤྲད་ཡོད། སློབ་མ་ཚོའི་ཞུ་གཏུགས་ལ་རྒྱ་གཞུང་གིས་ལོ་གསར་རྗེས་ནས་མ་གཏོགས་སྐད་ཆ་ཤོད་ཀྱི་མིན་ཟེར། གོང་གསལ་ཉེས་མིང་འོག་སྤྱི་ལོ་༢༠༡༠ ཟླ་བ་༢ པའི་ནང་རིན་པོ་ཆེར་དངོས་སུ་ལོ་ངོ་ལྔ་ཡི་ཁྲིམས་ཐག་བཅད་ཡོད།
སྤྱི་ལོ་༢༠༠༨ ལོའི་ཞི་རྒོལ་ཆེན་མོའི་སྐབས་དབོན་པོ་དགོན་པའི་གྲྭ་པ་ཚོ་ལས་འགུལ་དུ་ཡོད་པ་ཤེས་འཕྲལ། རིན་པོ་ཆེ་ཡིས་བལ་ཡུལ་དུ་ཡོད་པའི་ཁོ་རང་གི་རིགས་སྲས་ཟླ་ཤེར་ལ་ཁ་པར་བཏང་སྟེ། གང་མགྱོགས་བོད་དུ་ལོག་ཡོང་དགོས་སྐོར་རྣམས་ཞིབ་པར་གསུངས་ཡོད། རིན་པོ་ཆེའི་སྲས་ཟླ་ཤེར་གྱིས་དེ་མ་ཉིད་དུ་རྒྱ་གར་དུ་ཡོད་པའི་ཁོ་རང་གི་གྲོགས་པོ་དང་སྐུ་ཞབས་ཚོར། ལན་བསྐུར་ཏེ་གནས་ཚུལ་འདི་དང་འབྲེལ་བའི་སྐོར་ལ་དེ་ཕྱོགས་ནས་དྲིལ་བསྒྲགས་དང༌། རྒྱབ་སྐྱོར་གང་ཐུབ་བྱེད་རོགས་ཞེས་གསུངས། རིན་པོ་ཆེའི་སྲས་ཟླ་ཤེར་གྱིས་ཁ་པར་བཏང་བའི་གནས་ཚུལ་རྣམས་མགྲོན་ཁང་གི་བདག་པོས་རྒྱ་གཞུང་གི་གནས་ཡོད་མི་སྣར་རྩིས་སྤྲད་ཡོད། སྤྱི་ལོ་༢༠༠༨ ཟླ་བ་༣ པའི་ཚེས་༡༣ ཉིན་ཁོང་ལྷ་སར་སླེབས་མཚམས་ནས་རྒྱ་མིའི་དམག་མིས་བཀག་སྟེ། རིན་པོ་ཆེའི་ཐུགས་སྲས་དང་དེ་མིན་རོགས་པ་བཞི་སྐབས་དེར་འཇུ་བཟུང་བྱས་ཡོད། དེ་རྗེས་རོགས་པ་བཞི་རྒྱལ་སྤྱིའི་ལུས་རྩལ་འགྲན་ཚོགས་མཇུག་སྒྲིལ་ནས་གློད་ཐོབ་ཡོད། འོན་ཀྱང་རྒྱལ་ཁབ་ཀྱི་གསང་བ་ཕྱིར་གྱར་གྱི་ཉེས་མིང་འོག རིན་པོ་ཆེའི་སྲས་ཟླ་ཤེར་ཡང་རིན་པོ་ཆེ་དང་མཉམ་གཅིག་ཏུ་ཉེ་ཆར་ཟླ་བ་༢ པའི་ནང་ལོ་ངོ་བཅུ་ཡི་ཁྲིམས་ཐག་བཅད་ཡོད། ད་ལྟ་རིན་པོ་ཆེ་དང་ཁོང་གི་སྲས་གཉིས་ཀ་ལྷ་ས་ཆུ་ཤུར་བཙོན་ཁང་དུ་སྡུག་སྦྱོར་མྱོང་བཞིན་ཡོད།།
བོད་ཀྱི་རྒྱལ་ཡོངས་མང་གཙོ་ཚོགས་པས་གནས་ཚུལ་མཁོ་སྤྲོད་བྱས།།