choemeeshambalachoemeeshambalachoemeeshambalachoemeeshambalachoemeeshambala

choemeeshambalachoemeeshambalachoemeeshambalachoemeeshambalachoemeeshambala

choemeeshambalachoemeeshambalachoemeeshambalachoemeeshambalachoemeeshambala

choemeeshambalachoemeeshambalachoemeeshambalachoemeeshambalachoemeeshambala

choemeeshambalachoemeeshambalachoemeeshambalachoemeeshambalachoemeeshambala


མདོ་སྨད་རྔ་བར་བོད་མི་༡༠ཙམ་ལ་བཙོན་འཇུག་ཁྲིམས་ཐག་བཅད་པ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༦ལོའི་ཟླ་༡༢ཚེས་༦ཉིན་སྤེལ། འདི་གར་འབྱོར་བའི་གནས་ཚུལ་ལྟར་ན། ཕྱི་ལོ་༢༠༡༦ཟླ་༡༢ཚེས་༦ཉིན་བོད་ནས་གནས་ཚུལ་འབྱོར་གསལ་ལ། བོད་མདོ་སྨད་རྔ་བ་རང་སྐྱོང་ཁུལ་གྱི་ལྟེ་གནས་འབར་ཁམས་འབྲིང་རིམ་མི་མང་ཁྲིམས་ཁང་ཟེར་བས་བོད་མདོ་སྨད་རྔ་བའི་སྐྱ་སེར་ཕོ་མོ་བཅུ་ཙམ་ལ་ལོ་ལྔ་ནས་བཅུ་བཞིའི་བར་གྱི་བཙོན་འཇུག་ཁྲིམས་ཐག་འདྲ་མིན་བཅད་ཡོད་འདུག

Tibet-Tibetans-Barkham-Ngaba-2016དེ་ཡང་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་ཕྱི་ལོ་༢༠༡༦ ཟླ་༡༢ ཚེས་༦ཉིན་འདི་ག་གསར་ཁང་དུ་གནས་ཚུལ་གནང་བར་གཞིགས་ན། ༡༽ དེ་ཡང་རྔ་བ་ཀིརྟི་དགོན་པའི་གྲྭ་འབྲུག་སྒྲ། རང་ལོ་༥༠ ཡིན་པ་ཁོང་ལ་ལོ་༡༤ བཙོན་འཇུག་ཁྲིམས་ཐག་བཅད་ཡོད་འདུག་ལ། ཁོང་ནི་ལོ་སྔོན་མའི་ཕྱི་ཟླ་༡༡ ཟླ་མཇུག་ཙམ་གྱི་མཚན་མོ་ཞིག་ལ་དགོན་པའི་ནང་གི་རང་ཤག་ནས་འཛིན་བཟུང་བཙན་ཁྲིད་བྱས་ཡོད་ཀྱང་འབྲེལ་ཡོད་ནས་ད་བར་གང་དུ་བཀག་ཉར་བྱས་ཡོད་མེད་སོགས་ཀྱི་ཞིབ་ཕྲའི་གནས་ཚུལ་ཤེས་རྟོགས་བྱུང་མེད། འདི་ནས་ཤེས་རྟོགས་བྱུང་བར་ྋགོང་ས་མཆོག་གི་གྱ་སྟོན་སྐབས་ཨ་མདོ་རྔ་བར་མི་མང་གི་སྤྲོ་སྐྱིད་སོགས་གོ་སྒྲིག་བྱས་པའི་དོགས་གཞིའི་འོག་འཛིན་བཟུང་བྱས་ཡོད་འདུག དེ་མིན་ཕྱི་ལོ་༢༠༠༨ ལོར་ཁོང་འཛིན་བཟུང་གིས་ལོ་༡ དང་ཟླ་བ་༤ ལ་བཙོན་འཇུག་ཁྲིམས་ཐག་བཅད་པའི་ཆབ་སྲིད་བཙོན་ཟུར་ཞིག་ཡིན་པ་དང། ཁོང་གི་ཕ་ཡུལ་རྔ་བ་རྫོང་སོ་རུ་མ་ནས་ཡིན།

༢༽ རྔ་བ་ཀིརྟི་དགོན་པའི་གྲྭ་བློ་བཟང་མཁས་གྲུབ། རང་ལོ་༤༤ ཡིན་པ་ཁོང་ལ་ལོ་༡༣ གྱི་བཙོན་འཇུག་ཁྲིམས་ཐག་བཅད་ཡོ་འདུག ཁོང་ནི་ལོ་སྔོན་མའི་ལོ་མཇུག་ཙམ་ལ་འཛིན་བཟུང་བཀག་ཉར་བྱས་ཡོད་ཀྱང་ད་བར་གར་ཡོད་ཅི་བྱུང་གི་གནས་ཚུལ་གསལ་པོ་གང་ཡང་མ་ཤེས་པར་ལྷག་ཡོད་ལ། འདི་ནས་ཤེས་རྟོགས་བྱུང་བར་ྋགོང་ས་མཆོག་གི་གྱ་སྟོན་སྐབས་སྐད་འཕྲིན་ནང་ ྋགོང་ས་མཆོག་ལ་ཞབས་བརྟན་བསྒྲུབས་ཐོ་ལེན་སའི་ཚོགས་པ་བཙུགས་པའི་དོགས་གཞིའི་འོག་འཛིན་བཟུང་བྱས་ཡོད་འདུག ཁོང་དེ་སྔོན་ཕྱི་ལོ་༢༠༡༡ ལོར་འཛིན་བཟུང་གིས་ལོ་༣ གྱི་བཙོན་འཇུག་ཁྲིམས་ཐག་བཅད་ནའང༌། བཙོན་ཁང་ནང་དུ་ནད་མནར་དྲག་པོས་རང་མགོ་མི་ཐོན་པར་གྱུར་པས་ལོ་དུས་མ་ཚང་གོང་གློད་གྲོལ་བྱས་འདུག་ལ། ནང་མི་དང་འབྲེལ་ཡོད་སོགས་ཀྱིས་འགྲོ་གྲོན་བཏང་སྟེ་ཡུན་རིང་སྨན་བཅོས་བྱས་མཐར་ཅུང་ཙམ་དྲག་བསྐྱེད་བྱུང་ཡོད་འདུག  ཁོང་གི་ཕ་ཡུལ་ནི་རྔ་པ་རྫོང་ཕྱུགས་ལས་འགབ་མའི་ཡིན་པ་དང༌། ཕ་མིང་ལ་ཐོས་ལི་ཟེར།  ཆུང་དུས་ནས་རྔ་པ་ཀིརྟི་དགོན་པར་ཆོས་ཞུགས་ཀྱིས་བསྡུས་རྟགས་ནས་བཟུང་སྟེ་གཞུང་ཆེན་བཀའ་པོད་ལྔ་ལ་སློབ་གཉེར་མཐར་ཕྱིན་པ་གནང་ནས་དགེ་བཤེས་གྲྭ་སྐོར་བྱེད་ལ་ཉེ་བར་ཡོད་འདུག

 ༣༽ རྔ་བ་ཀིརྟི་དགོན་པའི་གྲྭ་བློ་བཟང་དགེ་འཕེལ། རང་ལོ་༢༩ ཡིན་པ་ཁོང་ལ་ལོ་༡༢ ཀྱི་བཙོན་འཇུག་ཁྲིམས་ཐག་བཅད་ཡོད་འདུག་ལ། ཁོང་ནི་ལོ་སྔོན་མའི་ཕྱི་ཟླ་༡༡ ཚེས་༣༠ མཚན་མོ་དགོན་པའི་ནང་གི་རང་ཤག་ནས་འཛིན་བཟུང་བཙན་ཁྲིད་བྱས་ཡོད་ཀྱང་ཉེ་ཆར་གྱི་ཟླ་བ་གཅིག་ཙམ་གྱི་སྔོན་བར་གར་ཡོད་ཅི་བྱུང་གི་གནས་ཚུལ་ཅུང་ཙམ་ཡང་ཤེས་རྟོགས་མ་ཐུབ་པར་ལྷག་ཡོད་ལ། ཁོང་དེ་སྔོན་ཕྱི་ལོ་༢༠༡༡ ཟླ་༥ ནང་འཛིན་བཟུང་གིས་ཡུན་རིང་བཀག་ཉར་བྱས་མཐར་ལོ་གསུམ་གྱི་བཙོན་འཇུག་ཁྲིམས་ཐག་བཅད་དེ་༢༠༡༣ ལོའི་ལོ་མཇུག་ཟླ་བ་ཁ་ཤས་སྔ་སྣུར་གྱིས་གློད་གྲོལ་བྱས་པའི་ཆབ་སྲིད་བཙོན་ཟུར་ཞིག་ཡིན་འདུག ཁོང་གི་ཕ་ཡུལ་རྔ་པ་རྫོང་རྨེའུ་རུ་མའི་རུ་ཆེན་གཉིས་པ་ནས་ཡིན་ཞིང༌། ཕ་ཨུ་རྒྱན་ཚེ་རིང་དང༌། མ་ལྷ་མོ་སྐྱིད་གཉིས་ལ་བུ་བུ་མོ་དགུ་ཡོད་པའི་ནང་གི་ཆེ་ཤོས་ཡིན་པ་དང༌། ཆུང་ཆུང་སྐབས་ནས་རྔ་བ་ཀིརྟི་དགོན་པར་གྲྭ་པ་བྱས་ཤིང༌། འཛིན་བཟུང་མ་བྱས་གོང་སྨན་པ་གྲྭ་ཚང་གི་གཉེར་པ་ཡིན་འདུག

༤༽ རྔ་བ་ཀིརྟི་དགོན་པའི་གྲྭ་བློ་གྲོས། རང་ལོ་༤༡ ཡིན་པ་ཁོང་ལ་ལོ་༩ ཡི་བཙོན་འཇུག་ཁྲིམས་ཐག་བཅད་ཡོད་འདུག་ལ། ཁོང་ནི་ལོ་སྔོན་མའི་ལོ་མཇུག་ཙམ་ལ་དགོན་པའི་ནང་ནས་འཛིན་བཟུང་བཙན་ཁྲིད་བྱས་ཡོད་ཀྱང་ད་བར་གར་ཡོད་ཅི་བྱུང་གི་གནས་ཚུལ་གསལ་པོ་གང་ཡང་ཤེས་རྟོགས་མ་བྱུང་བར་ལྷག་ཡོད་འདུག ཁོང་དེ་སྔོན་ཕྱི་ལོ་༢༠༡༡ ལོར་འཛིན་བཟུང་གིས་ལོ་༢ ཀྱི་བཙོན་འཇུག་ཁྲིམས་ཐག་བཅད་པའི་ཆབ་སྲིད་བཙོན་ཟུར་ཞིག་ཡིན་ཞིང༌། ཁོང་གི་ཕ་ཡུལ་རྔ་པ་རྫོང་ཨ་འདུས་གཤོང་བ་སྡེ་བ་ཡིན་པ་དང༌། ཕ་མིང་ལ་གདུགས་ཁོ་ཟེར་ཞིང༌། གནའ་དེང་གི་རི་མོའི་སྒྱུ་རྩལ་ལ་མོས་པ་ཆེ་བའི་རི་མོ་པ་ཞིག་ཡིན།

༥༽ ལྷ་སྡེ་འགབ་མའི་བོན་ཁོ་སྐྱིད། རང་ལོ་༤༨ ཡིན་པ་ཁོང་མོར་ལོ་༧ གྱི་བཙོན་འཇུག་ཁྲིམས་ཐག་བཅད་ཡོད་འདུག་ལ། ཁོང་མོ་ལོ་སྔོན་མའི་ཕྱི་ཟླ་༡༡ ཚེས་༢༠ ཡས་མས་ཤིག་ལ་འཛིན་བཟུང་བཙན་ཁྲིད་བྱས་ཡོད་ཀྱང་གར་ཡོད་ཅི་བྱུང་གི་གནས་ཚུལ་ཤེས་རྟོགས་མ་ཐུབ་པར་ལྷག་ཡོད་འདུག འདི་ནས་ཤེས་རྟོགས་བྱུང་བར་ྋགོང་ས་མཆོག་གི་གྱ་སྟོན་སྐབས་ཨ་མདོ་རྔ་བར་མི་མང་གི་སྤྲོ་སྐྱིད་སོགས་གོ་སྒྲིག་བྱས་པའི་དོགས་གཞིའི་འོག་འཛིན་བཟུང་བྱས་ཡོད་འདུག ཁོང་མོ་དེ་སྔོན་ཕྱི་ལོ་༢༠༡༡ དང་༢༠༡༢ ལོ་སོ་སོར་འཛིན་བཟུང་གིས་ཟླ་བ་ཁ་ཤས་རེ་བཀག་ཉར་བྱས་པ་དང༌། འབྲེལ་ཡོད་ནས་ཐབས་ཤེས་སྣ་ཚོགས་བྱས་ཏེ་གློད་གྲོལ་ཐུབ་ཙམ་བྱུང་ཡོད་ཅིང༌། རྒྱུན་དུ་ལྟ་སྲུང་འོག་གནས་དགོས་གྱུར་ཡོད། ཕ་མིང་ལ་ཡར་འཕེལ་ཡིན་འདུག

༦༽ སྤྲོ་ཚིགས་ཡུལ་ཚོའི་རྡོ་བ་སྡེ་བའི་ཚུལ་ཁྲིམས་ལ་ལོ་༦ བཙོན་འཇུག་ཁྲིམས་ཐག་བཅད་ཡོད་ཀྱང༌། ཁོང་དེ་སྔོན་སྤྲོ་ཚིགས་དགོན་པའི་གྲྭ་པ་བྱེད་མྱོང་ཡོད་པ་ཞིག་ཡིན་པ་ལས་གཞན་པའི་ཞིབ་ཕྲའི་གནས་ཚུལ་ཤེས་རྟོགས་མ་བྱུང༌།

༧༽ ཨ་ཀྱ་ཀྱ། རང་ལོ་༣༥ ཡིན་པ་ཁོང་ལ་ལོ་༥ བཙོན་འཇུག་ཁྲིམས་ཐག་བཅད་ཡོད་ཀྱང༌། ཁོང་ག་དུས་འཛིན་བཟུང་བྱས་པའི་གནས་ཚུལ་ཤེས་རྟོགས་མ་བྱུང༌། དེ་སྔོན་ཡང་ཕྱི་ལོ་༢༠༡༡ ལོར་རྒྱལ་གཅེས་དཔའ་བོ་བློ་བཟང་ཕུན་ཚོགས་ལགས་ཀྱིས་སྐུ་ལུར་མེར་སྲེག་གནང་སྐབས་ངོ་རྒོལ་སྐད་འབོད་བྱས་པའི་རྐྱེན་གྱིས་འཛིན་བཟུང་གིས་ཁོང་ལ་ལོ་༣ ལྷག་བཙོན་འཇུག་ཁྲིམས་ཐག་བཅད་པའི་ཆབ་སྲིད་བཙོན་ཟུར་ཞིག་ཡིན་འདུག ཁོང་གི་ཕ་ཡུལ་རྔ་བ་རྨེའུ་རུ་མ་ཡུལ་ཚོའི་རུ་ཆེན་དང་པོ་ཡིན་ཞིང༌། མ་མིང་ལ་དུང་མོ་ཟེར། སྔོན་ཆད་རྔ་བ་ཀིརྟི་དགོན་དུ་གྲྭ་པ་བྱས་མྱོང་ཡོད་འདུག

དེ་བཞིན་ཏཱ་རེ་ལ་ལོ་༨  དང༌། ཙན་དྲ་ལ་ལོ་༨ ། ཚུལ་ཁྲིམས་ལ་ལོ་༦ བཅས་ཀྱི་ཁྲིམས་ཐག་བཅད་ཡོད་པའི་གནས་ཚུལ་འདུག་ནའང་། ཁོ་ཚོའི་སྐོར་གནས་ཚུལ་གཞན་གསལ་པོ་ཤེས་རྟོགས་མ་བྱུང་བ་བཅས་གནས་ཚུལ་དུ་བཀོད་གནང་འདུག

གསར་འགོད་པ་བསྟན་འཛིན་ནོར་རྒྱས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།