བོད་མི་ཆབ་སྲིད་བཙོན་པ་སླར་ཡང་བཛིན་བཟུང་བྱས་ཡོད་འདུག

 པར་འདེབས།

༢༠༡༦ལོའི་ཟླ་༩ཚེས་༢༥ཉིན་སྤེལ། འདི་ག་གསར་ཁང་དུ་ཁུངས་ལྡན་འབྱོར་བའི་གནས་ཚུལ་ལྟར་ན། ཉེ་ཆར་གློད་གྲོལ་བཏང་བའི་བོད་མི་ཆབ་སྲིད་བཙོན་པ་གཉིས་སླར་ཡང་འཛིན་བཟུང་བྱས་ཡོད་པའི་གནས་ཚུལ་ཡོད་འདུག

དེ་ཡང་རྒྱ་ནག་གཞུང་གིས་ཉེ་ཆར་ཟླ་ ༨ ཚེས་ ༡༣ དང་ཟླ་ ༩ ཚེས་ ༡༦ ཉིན་སོ་སོར་བཙོན་གྲོལ་བཏང་བའི་བོད་མི་ཆབ་སྲིད་བཙོན་པ་བསམ་གྲུབ་ལགས་དང་རྩོམ་པ་པོ་གངས་སྐྱེས་སྒྲུབ་པ་སྐྱབས་གཉིས་སླར་འཛིན་བཟུང་བྱས་འདུག ཅེས་གནས་ཚུལ་མཁོ་སྤྲོད་པས་འགྲེལ་བརྗོད་གནང་སོང༌།

དེ་རིང་ཟླ་ ༩ ཚེས་ ༢༤ བོད་ནང་ནས་གནས་ཚུལ་འབྱོར་བར་གཞིགས་ན། ཉེ་ཆར་ཟླ་འདིའི་ཚེས་ ༡༦ ཉིན་རྒྱ་གཞུང་གི་བཙོན་ཁང་ནང་ལོ་ལྔ་དང་ཕྱེད་ཀའི་བཙོན་འཇུག་མྱངས་པའི་བོད་མི་ཆབ་སྲིད་བཙོན་པ་གངས་སྐྱེས་སྒྲུབ་པ་སྐྱབས་ལགས་བཙོན་གྲོལ་བཏང་ཡོད་ཀྱང། ཕྱི་ཉིན་ཚེས་ ༡༧ ཉིན་སྔ་དྲོ་ཚོུད་ ༡༠ ཐོག་སླར་འཛིན་བཟུང་བྱས་འདུག ཅེས་མུ་མཐུད་འགྲེལ་བརྗོད་གནང་སོང༌།

དེ་བཞིན་ལོ་ལྔའི་རིང་བཙོན་འཇུག་ཁྲིམས་ཆད་མྱངས་པའི་བོད་མི་བསམ་གྲུབ་ལགས་ཉེ་སྔོན་ཟླ་ ༨ ཚེས་ ༡༣ ཉིན་བཙོན་གྲོལ་བཏང་ནས་ཟླ་བ་གཅིག་ཙམ་ལས་ཕྱིན་མེད་ཀྱང༌། ཁོང་ཡང་ཚེས་ ༡༨ ཉིན་གུང་ཚོུད་ ༢།༠༠ སྟེང་སླར་འཛིན་བཟུང་བྱས་ཡོད་འདུག ད་ལྟའི་ཆར་ཁོང་གཉིས་སླར་འཛིན་བཟུང་བྱེད་དོན་གང་ཡིན་གསལ་ཁ་ཐོབ་མེད་པ་དང་ཁོང་གཉིས་ཉེ་སྔོན་གློད་གྲོལ་བཏང་སྐབས་ས་གནས་སོ་སོའི་བོད་མི་མང་ཚོགས་ཀྱིས་ཕེབས་བསུ་ཟབ་རྒྱས་ཞུས་ཡོད་འདུག་པ་བཅས།

གསར་འགོད་པ་བསྟན་འཛིན་ནོར་རྒྱས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།



བརྗོད་གཞི་གཞན་ཁག་ལ་གཟིགས།