རྒྱ་རྒོལ་གྱི་བོད་མིའི་ཞི་བའི་ལས་འགུལ་རུ་དཔུང་།
མཐའ་མའི་བསྐྱར་བཅོས། (༠༡༢༠༠༩༠༩༤༦)
ཤམ་བྷ་ལའི་ཕོ་ཉ་དྲ་བས་ཟླ་༦ཚེས་༢༦ཉིན་སྤེལ། བལ་པོའི་གཞུང་གི་སྐོར་སྲུང་བས་བོད་དོན་ཆེད་ཞི་རྒོལ་ལ་ཞུགས་པའི་བོད་མི་སེར་སྐྱ་ཕོ་མོ་མི་གྲངས་སོ་ལྔ་འཛིན་བཟུང་བྱས་ཡོད་ཅིང༌། བོད་མི་དེ་དག་བོད་དང་བལ་པོའི་མཚམས་བརྒྱུད་བོད་ཕྱོགས་སུ་ཞི་བའི་ཐོག་ནས་སྒེར་ལངས་བྱས་ཏེ་གོམ་བགྲོད་གནང་བཞིན་པའི་སྐབས་འཛིན་བཟུང་ཡོད་པའི་སྐོར་གསར་ལམ་ཁག་ཏུ་སྤེལ་ཡོད་པ་རེད།བོད་རང་དབང་འཐབ་རྩོད་ཆེད་ཞི་བའི་ལས་འགུལ་སྤེལ་མཁན་གྱི་བོད་མིའི་རུ་དཔུང་ཞིག་བལ་བོད་ས་མཚམས་དང་ཀི་ལོ་མི་ཊར་༣༠ལྷག་ལས་མེད་སའི་ཨན་དྷི་ཧེ་རི་གྲོང་རྡལ་ནང་འབྱོར་དུས། བལ་ཡུལ་སྐོར་སྲུང་དམག་མིས་འཛིན་བཟུང་བྱས་ཡོད་ཅིང༌། ཐེངས་འདིའི་ཞི་བའི་ལས་འགུལ་གྱི་དམིགས་ཡུལ་གཙོ་བོ་ནི། རྒྱའི་བཙན་དབང་འོག་གི་བོད་ནང་དུ་ཞི་བདེ་དང་བརྟན་ལྷིང་མེད་སྟབས། བོད་མི་ལས་འགུལ་བ་རྣམས་བོད་ནང་ལ་ཞི་བའི་གོམ་བགྲོད་དུ་བསྐྱོད་ཏེ་ཛ་དྲག་པའི་བོད་ཀྱི་གནས་བབས་འཛམ་གླིང་ཡོངས་ལ་གསལ་སྟོན་བྱེད་སླད་ཡིན་མོད། བལ་ཡུལ་གྱི་སྐོར་སྲུང་དམག་མིས་ཁོ་ཚོ་བཀག་འགོག་འཇུ་བཟུང་བྱས་ཡོད་འདུག་ལ། ཞི་བའི་ལས་འགུལ་བ་ཁ་ཤས་ཤིག་གིས་བལ་ཡུལ་གྱི་མི་སེར་ལག་འཁྱེར་རམ་ངོས་འཛིན་ལག་འཁྱེར་ཐོགས་ཡོད་འདུག
བལ་ཡུལ་གཞུང་གི་ཉེན་རྟོག་དམག་མིས་བརྗོད་པ་ལྟར་ན། བོད་མིའི་ཞི་བའི་ལས་འགུལ་རུ་དཔུང་དེ་བལ་ཡུལ་གྱི་རྒྱལ་ས་ཀ་ཐི་མན་ཌུ་རུ་ཁྲིད་སྟེ་འོས་བབ་ཀྱི་ཁྲིམས་ཆད་གཅོད་རྒྱུ་རེད་འདུག ཞི་བའི་ལས་འགུལ་འདི་ནི་བལ་ཡུལ་གྱི་མའོ་ཚོགས་པར་སྔར་ལོར་བལ་ཡུལ་གཞུང་གི་སྲིད་དབང་ཐོབ་ཅིང༌། བལ་ཡུལ་གྱི་ས་ཐོག་ཏུ་རྒྱ་རྒོལ་གྱི་ལས་འགུལ་སྤེལ་དུ་མི་འཇུག་རྒྱུའི་ཁས་ལེན་དམ་བཅའ་བྱས་རྗེས་བྱུང་བའི་ལས་འགུལ་ཐོག་མ་དེ་ཆགས་ཡོད་འདུག
བལ་ཡུལ་གྱི་གཞུང་འཛིན་མའོ་ཚོགས་པ་ཕྱི་ཟླ༥པའི་ནང་ཉམས་རྒུད་དུ་ཕྱིན་ཞིང༌། གཞུང་འཛིན་ཕྱོགས་སྒྲིལ་ཚོགས་པ་གསར་བས་རང་ཉིད་ཀྱི་སྲིད་དབང་སྲ་བརྟན་དང་རྐང་འཛུགས་སླད་པའི་དུས་འདིར། བོད་མིའི་རྒྱ་རྒོལ་གྱི་ལས་འགུལ་སླར་ཡང་སྤེལ་འགོ་ཚུགས་ཡོད་འདུག བལ་ཡུལ་གྱི་རྒྱལ་ས་ཀ་ཐི་མན་ཌུ་རུ་གནས་སྡོད་བྱས་ཡོད་པའི་མིང་བརྗོད་འདོད་མེད་པའི་བོད་མི་ཞིག་གིས་ཨེ་ཤི་ཡ་རྒྱ་གར་གསར་ཁང་གི་གསར་འགོད་པར་བརྗོད་ཡོད་དོན། བལ་ཡུལ་གྱི་མའོ་ཚོགས་པའི་གཞུང་འཛིན་སྲིད་བྱུས་འོག ཆབ་སྲིད་ཀྱི་ལས་འགུལ་དང་མར་མེ་ཁྲོམ་སྐོར་སོགས་སྤེལ་བར་བཀག་སྡོམ་དམ་དྲག་ཆེ་མོད། ད་ལྟའི་བལ་ཡུལ་གཞུང་གིས་སྔར་གྱི་སྲིད་བྱུས་བསྐྱར་ཞིབ་བྱེད་པའི་ཐག་གཅོད་བྱས་ཡོད་པ་རེད། ཅེས་འགྲེལ་བརྗོད་གནང་ཡོད་འདུག
སྔར་ལོར་རྒྱ་ནག་ནང་ཨོ་ལིམ་པིག་རྩེད་འགྲན་འཚོགས་དུས། བལ་ཡུལ་ནང་གི་བོད་མི་ཚོས་རྒྱ་རྒོལ་གྱི་ལས་འགུལ་རྒྱ་ཆེ་བ་རིམ་པ་བསྟར་ཆགས་སུ་སྤེལ་ཏེ། རྒྱའི་དབང་བསྒྱུར་འོག་གི་བོད་ནང་དུ་འགྲོ་བ་མིའི་ཐོབ་ཐང་རྩ་བ་ནས་མེད་པའི་དངོས་དོན་འཛམ་གླིང་ཡུལ་གྲུ་གང་སར་བསྒྲགས་ཡོད་པ་རེད།
བལ་ཡལ་གཞུང་གི་སྲིད་དབང་རྒྱུད་འཛིན་པ་དག་གིས་བལ་ཡུལ་ནང་རྒྱ་རྒོལ་གྱི་ལས་འགུལ་བཀག་བསྡོམས་བྱེད་པའི་ཁས་ལེན་བྱས་ཡོད་རྐྱེན། ཕྱི་ཚེས༢༦ཉིན་གྱི་ཞི་བའི་རྒྱ་རྒོལ་ལས་འགུལ་དེས་བལ་ཡུལ་གཞུང་གི་སྲིད་བློན་མ་ཌི་ཧ་བི་ཁྭོལ་མར་མཆོག་ལ་དཀའ་ངལ་འཕར་མ་ཞིག་སྤྲད་ཡོད་ཅིང༌། རྒྱ་ནག་གཞུང་གིས་རྒྱ་བལ་གཉིས་ནང་གི་བོད་མི་སྐྱབས་བཅོལ་བ་རྣམས་ལ་ངོས་འཛིན་དང་ཁག་ཁུར་གང་ཡང་མེད་པར། ཁོ་ཚོ་ཁྲིམས་མཐུན་མིན་པའི་ཡུལ་སྤོ་མཁན་གྱི་ནག་ཉེས་འོག་ཉེས་ཆད་གཅོད་དགོས་ཚུལ་དང༌། གཞན་ཡང་རྒྱ་གར་དང་བལ་པོའི་ས་མཚམས་ཁག་བཀག་བསྡོམས་དམ་དྲག་གིས་རྒྱ་རྒོལ་གྱི་ལས་འགུལ་སྤེལ་མཁན་བོད་མི་རྣམས་ཕར་འགྲོ་ཚུར་འོངས་བྱེད་པར་བཀག་འགོག་བྱེད་དགོས་ཚུལ་གྱི་འབོད་སྐུལ་ཞུ་བཞིན་ཡོད་འདུག