དགོངས་ཚུལ།

བདེ་སྐྱིད་ཀྱི་འཛམ་གླིང་ཞིག་བསྐྲུན་རྒྱུར་གོ་སྐབས་བཟང་པོ་འདུག

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༧།༠༦།༡༩ཉིན་སྤེལ། ནང་གི་བསམ་བློ་དེ་བྱམས་བརྩེས་ཟིན་པའི་ཐོག་ནས་ཆོད་སེམས་དང་བཟང་ཕྱོགས་ཀྱི་རེ་བར་གཞི་བཅོལ་ནས་རང་གིས་རང་ལ་གདེང་ཚོད་དགོས།   གཞན་གྱི་བདེ་སྡུག་ལ་སེམས་ཁུར་བྱ་རྒྱུའི་བྱམས་བརྩེའི་ཚོར་བ་དེས་རང་ལ་སྙིང་སྟོབས་སྤེལ་བཞིན་པ་ངོས་ཀྱིས་ཉམས་མྱོང་ཐོག་ནས་བརྗོད་ཐུབ། ཅེས་སྐུ་མདུན་གྱིས་བཀའ་སྩལ་འདུག

ཟླའི་ཕྱི་ཚེས་༡༧ཉིན། ༧གོང་ས་ཆོག་༢༠༡༧ལོའི་ཁེ་ལི་ཧྥོར་ཎི་ཡའི་གཙུག་ལག་སློབ་ཆེན་གྱི་བསླབ་པ་མཐར་སོན་སྟོང་ཕྲག་བརྒལ་བའི་མཛད་སྒོའི་ལས་རིམ་གྱི་སྐུ་མགྲིན་གཙོ་བོར་བཀའ་དྲིན་བསྐྱངས་ཤིང་། སློབ་ཆེན་དེ་གའི་གཟེངས་རྟགས་མཐོ་ཤོས་དེ་བོད་མིའི་བླ་ན་མེད་པའི་དབུ་ཁྲིད་མཆོག་ལ་འབུལ་ལམ་བཞེས་གནང་འདུག


དེ་ཡང་འདི་གོང་ཚེས་ཉིན། ༧གོང་ས་མཆོག་གིས་བཀའ་སློབ་སྩལ་དོན། "བཀུར་འོས་སྤུན་མཆེད་ཕོ་མོ་རྒན་གཞོན་རྣམ་པ། དེ་རིང་མཐོ་སློབ་ཀྱི་བསླབ་པ་མཐར་སོན་མཛད་སྒོའི་ཐོག་མཉམ་ཞུགས་བྱ་རྒྱུའི་གོ་སྐབས་ཐོབ་པར་ཧ་ཅང་དགའ་ཚོར་བྱུང་། ངོས་ཀྱིས་ཨིན་སྐད་སློབ་སྦྱོང་བྱ་རྒྱུ་ཐོག་མར་ཕྱི་ལོ་ ༡༩༤༠ ནང་འགོ་བཙུགས་ཡོད་ཀྱང་ད་ལྟའང་ཨིན་སྐད་ཆག་པོ་ཞིག་ལས་མི་ཤེས།  ནང་པའི་དགེ་འདུན་པ་ཞིག་ཡིན་པའི་ངོས་ནས་ཐར་པའི་གོ་འཕང་ཐོབ་པར་ངེས་པར་དུ་ཨིན་སྐད་ཤེས་དགོས་པ་མ་མཐོང་། ༼ཞལ་ཤོབ་མཛད།༽ ངོས་རང་ཕྲུ་གུ་ཆུང་དུས་སྐབས་ནས་སྒྱིད་ངན་ཞིག་ཡིན།  གཞོན་སྐྱེས་ཁྱེད་རང་ཚོ་འགྲོ་བ་མི་སྡེའི་སྤྱི་ཚོགས་ཀྱི་ཕུགས་འདུན་ཡིན།  ད་ལྟ་དུས་རབས་ ༢༡ འགོ་སྟོད་སྐབས་འདིར་ཁྱེད་ཚོར་འཛམ་གླིང་ནང་དབུལ་ཕྱུག་བར་ཁྱད་ཉུང་དུ་གཏོང་རྒྱུ་དང་།  དམག་ཁྲུག་གི་འཇིགས་སྣང་སོགས་དཀའ་ངལ་དེ་དག་སེལ་ནས་བདེ་ཞིང་སྐྱིད་པའི་འཛམ་གླིང་ཞིག་བསྐྲུན་རྒྱུའི་གོ་སྐབས་བཟང་པོ་ཞིག་ཡོད།" ཅེས་དང་།


ཡང་། "ང་ཚོ་རྒན་པ་ཚོ་དེའི་བར་གསོན་ཐུབ་རྒྱུ་ཁག་པོ་རེད། འགྲོ་བ་མི་ནི་སྤྱི་ཚོགས་ལ་ཧ་ཅང་བརྟེན་ནས་འཚོ་དགོས་པའི་སེམས་ཅན་ཡིན།  དེང་སྐབས་གོ་ལའི་གནམ་གཤིས་ཀྱི་འཇིགས་པ་དེ་ང་ཚོ་ཐུན་མོང་གི་དཀའ་ངལ་ཞིག་ཆགས་ཡོད།  རང་བཞིན་འབྱུང་བའི་འཇིགས་པ་དེ་རིགས་ཀྱིས་ང་ཚོར་མཉམ་རུབ་ཀྱི་འབད་བརྩོན་ཐོག་ནས་ཐུན་མོང་གི་དམིགས་ཡུལ་སྒྲུབ་དགོས་པའི་སློབ་གསོ་གཏོང་བཞིན་ཡོད། གལ་ཏེ་དུས་རབས་འདིའི་ནང་འཛམ་གླིང་བདེ་ཞིང་སྐྱིད་པ་ཞིག་དགོས་ན། མིའི་བསམ་བློའི་ནང་ཞི་བདེ་གོང་སྤེལ་བཏང་བ་བརྒྱུད་ནས་བསྐྲུན་ཐུབ་རྒྱུ་ལས་གོ་མཚོན་ཡར་རྒྱས་བཏང་ནས་བདེ་སྐྱིད་བསྒྲུབ་ཐབས་མེད།" ཅེས་དང་།


དེ་ཡང་། "ཁྱེད་ཚོས་བརྩོན་པ་ཆེན་པོས་སློབ་སྦྱོང་བྱས་ཤིང་འབྲས་སུ་དེ་རིང་འདིར་བསླབ་པ་མཐར་སོན་གྱི་ལག་འཁྱེར་ཐོབ་པ་རེད།  དེར་བརྟེན་ངོས་ཀྱིས་ཁྱེད་ཚོར་འཚམས་འདྲི་ཞུ་རྒྱུ་ཡིན།  ད་ཆ་ཤེས་ཡོན་གང་སྦྱངས་པ་དེ་དག་གཞན་ལ་རྙོག་གྲ་བཟོ་གཞི་ཞིག་ཏུ་མ་སོང་བར་ཞི་བདེ་བསྐྲུན་རྒྱུར་ཞབས་འདེགས་བསྒྲུབ་ཐུབ་པ་ཞིག་དགོས།  དེ་ནི་གཙོ་བོ་ནང་གི་བསམ་བློ་དེ་བྱམས་བརྩེས་ཟིན་པའི་ཐོག་ནས་ཆོད་སེམས་དང་བཟང་ཕྱོགས་ཀྱི་རེ་བར་གཞི་བཅོལ་ནས་རང་གིས་རང་ལ་གདེང་ཚོད་དགོས།   གཞན་གྱི་བདེ་སྡུག་ལ་སེམས་ཁུར་བྱ་རྒྱུའི་བྱམས་བརྩེའི་ཚོར་བ་དེས་རང་ལ་སྙིང་སྟོབས་སྤེལ་བཞིན་པ་ངོས་ཀྱིས་ཉམས་མྱོང་ཐོག་ནས་བརྗོད་ཐུབ། ཕྱོགས་མཚུངས་དེ་རིང་ཁྱེད་ཚོ་བསླབ་པ་མཐར་སོན་པ་འདི་ཕྱོགས་གཅིག་ནས་དགེ་རྒན་རྣམ་པའི་སྐུ་ལས་སྐྱོན་པ་ལ་བརྟེན་ནས་བྱུང་བ་ཞིག་ཡིན།" ཞེས་དང་།

དེ་མིན་བཀའ་སློབ་སྩལ་བ་དང་འབྲེལ་ཚོགས་བཅར་བའི་ཁྲོད་རྒྱ་གར་བ་ཡོད་མེད་བཀའ་རྩད་མཛད་དེ། "མགོན་པོ་གང་ཉིད་མཆོག་གིས་སྐུ་ཚེ་ཧྲིལ་པོའི་རིང་རྒྱ་གར་སྲོལ་རྒྱུན་གྱི་དཔལ་ནཱ་ལེནྡྲའི་བཞེད་སྲོལ་དྲི་མ་མེད་པ་དེ་དག་ལ་སྦྱངས་བརྩོན་མཛད་སྐོར་དང་།  ད་ཆ་རྒྱ་གར་རང་ཉིད་ཀྱི་དཔལ་ནཱ་ལེནྡྲ་ནས་བརྒྱུད་པའི་གནའ་བོའི་ལེགས་བཤད་དེ་དག་ཉམས་ཆག་ཕྱིན་ཡོད་སྟབས། ལེགས་བཤད་དེ་དག་རྒྱ་གར་ནང་ངེས་པར་དུ་སླར་གསོ་བྱེད་དགོས་པར་བརྟེན་རྒྱ་གར་བ་ཚོས་དེར་ངེས་པར་དུ་གལ་ཆེར་རྩི་དགོས།" ཞེས་པའི་སྐོར་བཀའ་སློབ་སྩལ།


དེ་མིན། "ཕྱོགས་མཚུངས་རྒྱ་ནག་ལ་མཚོན་ནའང་སྲོལ་རྒྱུན་ཐོག་ནས་ཡུལ་དེར་ནང་ཆོས་ཤུགས་ཆེ་དར་ཡོད་པ་མ་ཟད། ཉེ་ལམ་རྒྱ་ནག་གི་མཐོ་སློབ་ཅིག་ནས་རྒྱ་རིགས་ཉམས་ཞིབ་པ་ཞིག་གིས་གྲངས་ཐོ་ལྟར་ན། དེང་སྐབས་རྒྱ་ནག་ཏུ་རྒྱ་རིགས་ནང་པ་ས་ཡ་ ༣༠༠ ལྷག་ཡོད་པ་བརྗོད་ཡོད། དེར་བརྟེན་རྒྱ་རིགས་ཚོས་ཀྱང་རང་གི་ཕ་མེས་ནས་བརྒྱུད་པའི་རིག་གནས་དེ་དག་ལ་ངེས་པར་དུ་གཅེས་འཛིན་བྱེད་དགོས་པ་དང་།  རྒྱ་དཀར་ནག་གཉིས་ནང་དུ་ནང་གི་བསམ་བློའི་རིན་ཐང་བྱམས་བརྩེ་དང་བཟོད་བསྲན་སོགས་གོང་མཐོར་གཏོང་རྒྱུའི་སྲོལ་རྒྱུན་གྱི་ལེགས་བཤད་དེ་དག་རྒྱུན་འཛིན་ལག་བསྟར་བྱེད་ཐུབ་ཚེ་ལྐོག་ཟ་རུལ་སུངས་ཀྱི་དཀའ་ངལ་སེལ་ཐུབ་རྒྱུ་ཙམ་མ་ཟད། དབུལ་ཕྱུག་བར་ཁྱད་ཇེ་ཉུང་དུ་གཏོང་ཐུབ་རྒྱུ་ཡིན་སྐོར་བཀའ་སློབ་སྩལ།  དེ་བཞིན་༧གོང་ས་མཆོག་གིས་བློའི་རྣམ་གཞག་དང་བྱེད་ལས། ཚད་མ་རིག་པའི་རྣམ་གཞག་སོགས་ནི་ནང་ཆོས་གཅིག་པོའི་རྣམ་གཞག་རེད་ཅེས་བརྗོད་རྒྱུ་གང་ཡང་མེད། རིག་གནས་དེ་དག་སྤྱི་ཡོངས་ཀྱི་ཤེས་ཡོན་སྡེ་ཚན་ནང་འཇོག་ཐུབ།  མཐོ་སློབ་འདིར་ཡང་སློབ་ཚན་དེ་དག་ཐོག་སློབ་ཁྲིད་བྱེད་ཐུབ་པ་ཞིག་ཡིན།" ཞེས་དང་།

དེ་བཞིན་དུ། "བློའི་རྣམ་གཞག་སྐོར་དེ་ད་ལྟ་འཚོ་བཞིན་པའི་འགྲོ་བ་མི་ཐེར་འབུམ་བདུན་ཡོད་པ་ཚང་མར་འབྲེལ་བ་ཡོད།  གང་ཡིན་བརྗོད་ན་ང་ཚོས་བསམ་བློའི་ནང་ཉོན་མོངས་པའི་བློ་ཤུགས་ཆུང་དུ་བཏང་ནས་བསམ་བློའི་ནང་ཞི་བདེ་བསྐྲུན་ཐབས་བྱེད་བཞིན་ཡོད། དེ་ལྟར་ཡོང་བར་ཐོག་མར་རྣམ་རྟོག་གི་འགྲོ་སྟངས་དེ་དག་སྐོར་ཤེས་དགོས།  སྐྱེ་བ་ཕྱི་མ་དང་ལྷ་ཡུལ། དེ་བཞིན་དམྱལ་བའི་སྐོར་སྐད་ཆ་བཤད་ཀྱི་མེད།" ཅེས་སོགས་ཀྱི་བཀའ་སློབ་སྩལ་ཟབ་རྒྱས་སྩལ་པ་བཅས།།

གསར་འགོད་པ་ཆོས་ཉིད།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།