ཤམ་བྷ་ལའི་ཕོ་ཉའི་ངོ་དེབ།

༧གོང་ས་མཆོག་གི་ཕྱག་དེབ་གཞི་བཅོལ་ནས་སློབ་དེབ་བཟོ་བ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༦།༡༢།༡༢ཉིན་སྤེལ། ༧གོང་ས་མཆོག་གི་ཕྱག་དེབ་ལ་གཞི་བཅོལ་ནས་རྒྱ་གར་མཐོ་སློབ་ནང་རིས་མེད་བཟང་སྤྱོད་ཀྱི་སློབ་ཚན་གཏན་འབེབས་གནང་བཞིན་ཡོད་འདུག

འདི་ཟླའི་ཕྱི་ཚེས་ ༡༡ ཉིན། ༧གོང་ས་༧སྐྱབས་མགོན་ཆེན་པོ་མཆོག་གིས་རྒྱ་ གར་གྱི་ཊ་ཊ་ཤེས་ཡོན་བསྟི་གནས་ཁང་གི་སྤྱི་ཚོགས་ཚན་རིག་སྡེ་ཚན་ Tata Institute of Social Sciences གྱི་འགན་འཛིན་གཙུག་ལག་སློབ་དཔོན་སྐུ་ཞབས་ཨེ་སི་པར་སུ་ར་མན་ Prof S Parasuraman མཆོག་སོགས་ལ་མཇལ་ཁ་སྩལ་ཡོད་འདུག་པ་དང་།

སྐབས་དེར་འགན་འཛིན་མཆོག་ནས་༧གོང་ས་མཆོག་གི་བཀའ་སློབ་ལྟར། སྤྱིར་དེང་དུས་ཤེས་ཡོན་ནི་ངོ་མཚར་ལྡན་པ་ཞིག་ཡིན་ནའང་། ནང་གི་གཤིས་རྒྱུད་དང་འབྲེལ་བའི་བཟང་པོའི་རིན་ཐང་གོང་མཐོར་གཏོང་ཐབས་ལ་མཚོན་ན། དེང་དུས་ཤེས་ཡོན་རྐྱང་པས་འདང་གི་མེད་སྟབས། ཊ་ཊ་ཤེས་ཡོན་བསྟི་གནས་ཁང་གི་སྤྱི་ཚོགས་ཚན་རིག་སྡེ་ཚན་ནས་༧གོང་ས་མཆོག་གི་ཆོས་ལུགས་དང་མ་འབྲེལ་བའི་བཟང་སྤྱོད་གོང་མཐོར་གཏོང་རྒྱུའི་ལམ་སྟོན་ལས་བློ་སྐྱེད་བླངས་ཏེ་ཆུ་ཚོད་ ༣༠ རིང་གི་སློབ་ཚན་ཞིག་གཏན་འབེབས་ཞུ་རྒྱུའི་ལས་རིམ་འགྲོ་མུས་ཡིན་པའི་སྐོར་ལྷན་སྙན་སྒྲོན་འབུལ་ཞུས་ཡོད་འདུག

སྐབས་དེར་༧གོང་ས་མཆོག་གིས་ལས་གཞི་དེར་བསྔགས་བརྗོད་མཛད་པ་དང་། དེང་དུས་འཕྲུལ་རིགས་དང་འབྲེལ་བའི་ཤེས་ཡོན་དང་གནའ་རབས་སྲོལ་རྒྱུན་གྱི་ལེགས་བཤད་གཉིས་ཟུང་འབྲེལ་ཐོག་ནས་འགྲོ་ཐུབ་མཁན་ཧ་ལམ་རྒྱ་གར་ཁོ་ན་ཡིན་སྐོར་ཀྱི་བཀའ་སློབ་སྩལ་འདུག

དེ་རྗེས་ལྕམ་སྐུ་རེ་ནུ་མེ་ཏ་ Renu Mehta ཞུ་བ་ཁོང་གིས་དངོས་བྱུང་གློག་བརྙན་ ‘The Great and the Good’  སྐྱེས་བུ་དམ་པ་དང་མཆོག ཅེས་པ་ཞིག་བཟོ་སྐྲུན་དང་འབྲེལ་ནས་༧གོང་ས་མཆོག་ལ། ང་ཚོས་འཛམ་གླིང་འཆམ་མཐུན་ལྡན་པ་ཞིག་ཇི་ལྟར་བསྐྲུན་ཐུབ་ཅེས་པའི་དྲི་བར་༧གོང་ས་མཆོག་གིས་བཀའ་ལན་སྩལ་དོན།
ང་ཚོ་དང་ཁོ་པ་ཚོ། ཞེས་པའི་ལྟ་ཚུལ་འཛིན་བཞིན་པའི་ཆགས་སྡང་གི་བློ་དེ་མགོ་གནོན་ཐུབ་པ་དགོས། རང་བདེ་དོན་གཉེར་ཁོ་ན་བསམ་ནས་བསྡད་པ་ཡིན་ན། རང་བཞིན་གྱིས་གཞན་ལ་འཇིགས་སྣང་སྐྱེ་བ་དང་ཡིད་ཆེས་བློ་འགེལ་མ་ཐུབ་པ་ཡོང་རྒྱུ་རེད། ཅེས་བཀའ་ལན་སྩལ་བ་དང་།

གཞན་ཡང་སྐབས་དེར་ལྕམ་སྐུ་རེ་ནུ་མེ་ཏ་ལགས་ཀྱིས་འཛམ་གླིང་འཆམ་མཐུན་ཡོང་བར་སྒོམ་ཉམས་ལེན་གྱིས་ཕན་ཐོགས་ཇི་ཡོད་སྐོར་གྱི་དྲི་བར་༧གོང་ས་མཆོག་གིས་བཀའ་ལན་སྩལ་དོན།
ཞི་གནས་སྒོམ་སྐབས་དམིགས་པ་ཡུལ་གཅིག་ལ་དམིགས་ནས་བསྒོམ་དགོས། དེ་ནི་བཟི་ཁབ་བརྒྱབ་པ་དང་འདྲ་པོ་ཡོད། འཕྲལ་ལ་ཕྲན་བུ་ཕན་ཡང་ཕུགས་ལ་དཀའ་ངལ་མུ་མཐུད་གནས་རྒྱུ་རེད།  དེ་ལས་ལྷག་མཐོང་སྐབས་བློས་ཡུལ་ལ་དཔྱད་པ་བྱེད་བཞིན་པ་ནི་དཔེར་ན། ཁོང་ཁྲོའི་ཉེས་དམིགས་སོགས་ལ་བསམ་བློ་གཏང་ཐུབ་པ་ཡིན་ན་ཁོང་ཁྲོའི་བློ་དེར་གཉེན་པོ་བསྟེན་ཐུབ། ཅེས་བཀའ་ལན་སྩལ།

དེ་རྗེས་མི་ཚེ་ལམ་ལྷོང་ལྡན་པ་ཞིག་ཇི་ལྟར་བཟོ་ཐུབ་མིན་གྱི་དྲི་བར་༧གོང་ས་མཆོག་གིས། རང་གཞན་གཉིས་ཀའི་བདེ་སྐྱིད་ཀྱི་རྩ་བ་མཐར་གཏུགས་ན་བྱམས་བརྩེའི་ཀུན་ལས་བླངས་པའི་གཞན་དོན་ལ་སེམས་ཁུར་བྱ་རྒྱུ་དེ་རེད། ཅེས་བཀའ་ལན་སྩལ། །

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།