ཉི་ཧོང་ནས་བོད་པའི་བྲོ་བ་ལྡན་པའི་དུས་སྟོན་ལ་རོལ་བ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༦།༠༩།༢༢ཉིན་སྤེལ། ཉེ་ལམ་ཉི་ཧོང་ནས་བོད་ཀྱི་ཡུལ་སྲོལ་གོམ་གཤིས་དང་། ཆོས་དང་རིག་གཞུང་། དེ་མིན་དེང་དུས་ཀྱི་རྣམ་པ་ཡོད་པའི་སྒོ་ནས་དུས་སྟོན་གཟབ་རྒྱས་འཚོགས་ཡོད་འདུག

ད་རེས་ཀྱི་ཕྱི་ཚེས་ ༡༧ ནས་ ༡༩ བར་ཉི་ཧོང་གི་བྱང་ཁུལ་དུ་ཡོད་པའི་ལོ་རྒྱུས་ལྡན་པའི་གྲོང་ཁྱེར་མ་ཏ་སུ་མོ་ཊོར་བོད་ཀྱི་དུས་སྟོན་ཚོགས་ཡུལ་བདམས་ཏེ་དུས་སྟོན་ཐོག་མཉམ་ཞུགས་གནང་མཁན་རྣམས་ལ་བོད་པའི་ཁོར་ཡུག་བསྐྲུན་ཆེད་ཡིན་འདུག དུས་སྟོན་ཐོག་རོལ་དབྱངས་འདུ་འཛོམས་དང་། བོད་པའི་རོལ་དབྱངས་དང་སྲོལ་རྒྱུན། སྨན་བཅས་ཀྱི་ཐོག་ཟབ་སྦྱོང་སོགས་ཀྱི་ལས་རིམ་མང་དག་ཅིག་གོ་སྒྲིག་གནང་ཡོད་འདུག

དེ་ཡང་ཐོག་མར་བསང་གསོལ་བཏང་གྲུབ་བསྟུན་ད་ལྟ་ཉི་ཧོང་ནང་གནས་སྡོད་བྱེད་མཁན་དེ་སྔའི་བོད་ཀྱི་ཟློས་གར་ཚོགས་པའི་སྒྱུ་རྩལ་བ་བསྟན་འཛིན་ཀུན་བཟང་ལགས་ཀྱིས་ལྷ་མོའི་འཁྲབ་སྟོན་གནང་རྗེས་བོད་པའི་སྒོར་གཞས་འཁྲབ་སྟངས་སྐོར་ཟབ་སྦྱོང་གནང་ཡོད།

དུས་སྟོན་ཐོག་རྡ་ས་དབུས་སྨན་རྩིས་ཁང་ནས་བོད་ཀྱི་གསོ་བ་རིག་པའི་ཐོག་སྨན་སློབ་ཐོན་པ་ཉི་ཧོང་པ་སྐུ་ཞབས་ཨོ་ག་བ་ལགས་ཀྱིས་བོད་སྨན་ཐོག་ཟབ་སྦྱོང་གནང་སྐབས་ཐོག་མར་ཁོང་གིས་བོད་ཀྱི་སྨན་གཞུང་ནས་ཚིགས་བཅད་སྒྲོགས་སྦྱང་གནང་གྲུབ་བསྟུན་བོད་ཀྱི་གསོ་བ་རིག་པའི་སྲོལ་རྒྱུན་ཐོག་འགྲེལ་བཤད་གཟབ་རྒྱས་གནང་ཡོད།

ཕྱོགས་མཚུངས་དུས་སྟོན་ཐོག་ཨ་རིར་གནས་སྡོད་བོད་མི་གློག་བརྙན་བཟོ་སྐྲུན་པ་བསྟན་འཛིན་ཚེ་བརྟན་ལགས་ཀྱིས་བཟོ་སྐྲུན་གནང་བའི་ཕ་ས་བུ་ཐུག ཅེས་པའི་དངོས་བྱུང་གློག་བརྙན་བསྟན་ཡོད། གློག་བརྙན་འདི་བཞིན་ཨ་རིར་གནས་སྡོད་བསྟན་འཛིན་རིག་གྲོལ་ལགས་ཀྱིས་ཁོང་གི་འཆི་བཞིན་པའི་ཕས་སོ་སོའི་ལུང་པའི་ས་གཞི་ཐོག་གོམ་པ་སྤོ་ཐུབ་རྒྱུའི་ཕུག་བསམ་སྒྲུབ་སྟངས་ཐོག་གཞིར་བཞག་པ་ཞིག་ཡིན་འདུག

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།