བོད་མིའི་གདུང་སེམས་མཉམ་སྐྱེད་ལས་འགུལ་ཆེན་མོའི་གསལ་བསྒྲཌ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ། ༢༠༡༣ལོའི་ཟླ་༠༡ཚེས་༢༩ཉིན། དེ་རིང་ཉིན་རྒྱབ་ཚོུད་༣།༣༠ཐོག་རྒྱ་གར་གྱི་རྒྱལ་ས་ལྡི་ལི་གསར་པར་ཡོད་པའི་རྒྱ་གར་གྱི་གསར་འགོད་མཐུན་ཚོགས་ཀྱི་ཚོགས་ཁང་དུ་བཀའ་སྤྱི་གཉིས་མཉམ་འབྲེལ་གྱིས་གསར་འགོད་གསལ་བསྒྲགས་ཤིག་སྐོང་འཚོགས་གནང་ཡོད་པ་དང་། སྐབས་དེར་གསར་འགོད་པ་༡༠༠ལྷག་འདུ་འཛོམས་ཀྱི་དབུས་སུ་སྲིད་སྐྱོང་བློ་བཟང་སེངྒེ་མཆོག་དང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་ནས་ཐེངས་འདིའི་ལས་འགུལ་དང་འབྲེལ་བའི་སྐོར་ཡོངས་ཁྱབ་གསུང་བཤད་གནང་གྲུབ་རྗེས་གསར་འགོད་པ་ཚོས་དྲི་བ་གང་མང་བཏོན་གནང་ཡོད་པར་ཁོང་རྣམ་གཉིས་ནས་ལན་འདེབས་གསལ་བཤད་གནང་ཡོད་པ་རེད། གཤམ་དུ་བཀའ་སྤྱི་གཉིས་ནས་སྤེལ་བའི་གསར་འགོད་གསལ་བསྒྲགས་ལ་གཟིགས་ཞིབ་གནང་རོགས།
རྒྱ་གར་རྡ་རམ་ས་ལར་རྟེན་གཞི་བྱེད་པའི་བོད་མིའི་སྒྲིག་འཛུགས་ཀྱི་བཀའ་ཤག་དང་སྤྱི་འཐུས་ལྷན་ཚོགས་ཐུན་མོང་ནས་བོད་མིའི་གདུང་སེམས་མཉམ་སྐྱེད་ཀྱི་ལས་འགུལ་འདི་བཞིན་ཕྱི་ལོ་ ༢༠༡༣ ཟླ་ ༡ ཚེས་ ༣༠ ནས་ཟླ་ ༢ པའི་ཚེས་ ༢ བར་རྒྱ་གར་རྒྱལ་ས་ལྡི་ལི་གསར་པར་གོ་སྒྲིག་བྱེད་བཞིན་ཡོད་འཁོད་ཡོད་པ་རེད།
ང་ཚོས་ལས་འགུལ་འདི་སྤེལ་དགོས་པའི་དམིགས་ཡུལ་གཙོ་བོ་ནི་བོད་ནང་གི་བོད་མི་ཚོར་གདུང་སེམས་མཉམ་སྐྱེད་མཚོན་བྱེད་དང་། རྒྱལ་སྤྱིའི་ཐོག་ནས་ད་ལྟའི་བོད་ནང་གི་ཆེས་ཛ་དྲག་དང་ཡིད་སྐྱོ་དགོས་པའི་གནས་སྟངས་མཁྱེན་རྟོགས་དང་རྒྱབ་སྐྱོར་ཐོབ་ཐབས་ཆེད་དུ་ཡིན།
བོད་མིའི་སྒྲིག་འཛུགས་ཀྱི་ངོས་ནས་བོད་ནང་གི་བོད་མི་ཚོར་ཡང་ཡང་འབོད་སྐུལ་ཞུས་ཀྱང་། བོད་ནང་དུ་སྤྱི་སྲོལ་ཞི་རྒོལ་བྱ་ལམ་གྱི་ཁོར་ཡུག་ཡེ་ནས་མེད་སྟབས། རང་ལུས་མེར་བསྲེགས་ཀྱི་ལས་འགུལ་སྔར་ལོ་རྒྱུས་ཀྱི་འཕེལ་རིམ་ནང་བྱུང་མྱོང་མེད་པའི་ཚ་རླབས་ཆེན་པོ་འཕྱུར་བཞིན་ཡོད་པ་རེད། ཕྱི་ལོ་ ༢༠༠༩ ནས་ཉེ་ལམ་ཕྱི་ལོ་ ༢༠༡༣ ཟླ་ ༡ ཚེས་ ༢༢ ཉིན་དཀོན་མཆོག་སྐྱབས་ལགས་ཀྱི་བར་བོད་ནང་ཁྱོན་བོད་མི་ ༩༩ ཡིས་རྒྱ་གཞུང་གིས་བོད་ནང་ལག་བསྟར་བྱེད་པའི་གདུག་རྩུབ་སྲིད་ཇུས་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་བཏང་ཡོད། ཁོང་ཚོའི་ཞལ་ཆེམས་དང་འབོད་སྒྲ་ལ་གཞིགས་ན། རང་ལུས་མེར་བསྲེགས་གཏོང་དགོས་པའི་ཀུན་སློང་དང་ཕུགས་བསམ་ནི་བོད་ལ་རང་དབང་དགོས་པ་དང། ༸གོང་ས་སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་དགོས་པ་དེ་ཡིན། འོན་ཀྱང། རྒྱ་ནག་གཞུང་ནས་བོད་ནང་གི་རང་ལུས་མེར་བསྲེགས་ཀྱི་བྱུང་རྐྱེན་དངོས་ལ་ཞིབ་འཇུག་བྱ་རྒྱུའི་ཚབ་ཏུ། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང། ཕྱིའི་སྟོབས་ཤུགས་ཀྱིས་བརྒྱུད་བསྐུལ་བྱས་ལུགས་ལ་ཁག་དཀྲིས་བྱེད་བཞིན་ཡོད།
རྒྱ་གཞུང་གིས་བོད་ནང་རང་ལུས་མེར་བསྲེགས་བཏང་བའི་གནས་ཚུལ་དེར་གདོང་ལེན་བྱེད་སྟངས་ནི་སྔར་བས་གདུག་རྩུབ་ཆེ་བའི་སྲིད་ཇུས་ལག་བསྟར་བྱས་ཡོད། ཁོ་ཚོས་རང་ལུས་མེར་བསྲེགས་བྱུང་ཡུལ་གྱི་ས་གནས་ཁག་ཏུ་སྔར་བས་དམ་དྲག་ཆེ་རུ་བཏང་སྟེ། བརྒྱུད་ལམ་པ་ཁག་དང། ཡུལ་བསྐོར་སྤྲོ་འཆམ་པ། གཞན་གཟིགས་བསྐོར་བ་བཅས་ཡོངས་སུ་བཀག་འགོག་བྱས་པ་མ་ཟད། རང་ལུས་མེར་བསྲེགས་བྱུང་ཡུལ་ཁག་ཏུ་དམག་མི་དང། དྲག་ཆས་ཉེན་རྟོག་པ་སོགས་ཕོན་ཆེ་འགྲེམས་གཏོང་བྱས་ཡོད། དེ་དག་ལ་བལྟས་ན། པེ་ཅིང་ནས་བོད་མི་ཚོའི་ཞི་རྒོལ་གྱི་བྱ་ལམ་དེ་དག་འགོག་ཆེད་ཤིན་ཏུ་གདུག་རྩུབ་ཆེ་བའི་ཐབས་བྱུས་སྤེལ་བཞིན་པ་གསལ་པོ་རེད། ཁོ་ཚོས་རང་ལུས་མེར་བསྲེགས་གཏོང་མཁན་གྱི་ནང་མི་དང་གྲོགས་པོ་དོགས་ཡོད་ཅན་རྣམས་ལ་ནག་ཉེས་ཀྱི་ཁྲིམས་གཅོད་གཏོང་བཞིན་ཡོད།   
རྒྱ་གཞུང་གིས་འདས་པའི་མི་ལོ་ ༦༠ ལྷག་གི་རིང་བོད་ཐོག་ལག་བསྟར་བྱས་པའི་ཆབ་སྲིད་དྲག་གནོན་དང་། རིག་གཞུང་རྩ་མེད། མི་སེར་སྤེལ་ཡུལ། མི་རིགས་དབྱེ་འབྱེད། དཔལ་འབྱོར་དང་ཤེས་ཡོན་ཟུར་ཕུད། ཁོར་ཡུག་གཏོར་བཤིག་ཚབས་ཆེ་བཏང་བ་བཅས་བོད་མི་རིགས་དང་རིག་གཞུང་རྩ་མེད་གཏོང་ཐབས་ཆེ་ཆེར་བཏང་ཡོད།  
བོད་མིའི་སྒྲིག་འཛུགས་ཀྱི་ངོས་ནས་མཉམ་འབྲེལ་རྒྱལ་ཚོགས་གཙོས་པའི་འཛམ་གླིང་རྒྱལ་ཁབ་སོ་སོའི་གཞུང་གིས་བོད་ཀྱི་གནད་དོན་ཐོག་སེམས་འཚབ་ཡོད་པའི་བསྒྲགས་གཏམ་སྤེལ་བར་ཡི་རངས་ཞུ་བཞིན་ཡོད། ད་དུང་དེ་བས་མང་བ་བྱེད་དགོས་པ་ཞིག་ནི་རྒྱ་ནག་གཞུང་ལ་བོད་ཀྱི་གནད་དོན་དེ་༸གོང་ས་མཆོག་གི་སྐུ་ཚབ་མཉམ་ཞི་མོལ་བྱས་ཏེ་ཕན་ཚུན་གཉིས་ཕན་དབུ་མའི་ལམ་ནས་སེལ་དགོས་པའི་འབོད་བསྐུལ་གནང་དགོས་པ་དེ་ཡིན།
བོད་མིའི་སྒྲིག་འཛུགས་ཀྱི་ངོས་ནས་བོད་ནང་གི་བོད་མི་ཚོ་ལ་གདུང་སེམས་མཉམ་སྐྱེད་བྱེད་རྒྱུ་དང།  དེ་བཞིན་རྒྱ་གར་དང། རྒྱལ་སྤྱིའི་སྤྱི་ཚོགས་ལ་འབོད་བསྐུལ་ཞུ་རྒྱུར།
•    གསར་འགྱུར་བརྒྱུད་ལམ་ཁག་དང། མཉམ་འབྲེལ་རྒྱལ་ཚོགས། རྒྱལ་སྤྱིའི་རྟོག་ཞིབ་ཚོགས་པ་ཁག་བཀག་སྡོམ་མེད་པར་བོད་དུ་ཕེབས་བཅུག་སྟེ་བོད་ནང་རང་ལུས་མེར་བསྲེགས་གཏོང་དགོས་པའི་དངོས་ཡོད་རྒྱུ་རྐྱེན་གང་ཡིན་རྟོག་ཞིབ་ཀྱིས་སྙན་ཐོ་འདོན་ཐུབ་པ་གནང་དགོས་རྒྱུ།  
•    བོད་ནང་གི་དངོས་ཡོད་གནས་སྟངས་མཁྱེན་རྟོགས་ཆེད་རྒྱལ་ཁབ་ཁག་གི་གཞུང་དང། གྲོས་ཚོགས། གཞུང་ཚབ་ཁག་གི་སྐུ་ཚབ་བཅས་བོད་ནང་ལ་ཕེབས་ཐུབ་པ་གནང་དགོས།  
•    རྒྱ་ནག་གིས་བོད་ཐོག་འཛིན་པའི་མཁྲེགས་འཛིན་གྱི་སྲིད་བྱུས་ལ་བསྐྱར་ཞིབ་དང་། བོད་མིའི་དངོས་ཡོད་དཀའ་སྡུག་ལ་བསམ་གཞིགས་བྱས་ཏེ་བོད་ཀྱི་གནད་དོན་ཞི་མོལ་གྱི་ལམ་ནས་སེལ་དགོས།

བོད་མིའི་སྒྲིག་འཛུགས་ཀྱི་སྲིད་སྐྱོང།                   བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ།

བློ་བཟང་སེངྒེ་མཆོག                                                  སྤེན་པ་ཚེ་རིང་མཆོག

ཕྱི་ལོ་ ༢༠༡༣ ཟླ་ ༡ ཚེས་ ༢༩ ལ།
Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།