སྐུ་སྒེར་དྲུང་ཆེ་ཟུར་པ་སྐུ་ངོ་རྟ་ར་བ་འདས་གྲོངས་སུ་ཕྱིན་པ།

 པར་འདེབས།

ཤམ་བྷ་ལའི་ཕོ་ཉ། ཕྱི་ལོ་༢༠༡༣ཟླ་༡ཚེས་༡༥ཉིན། དཔལ་ལྡན་སྐུ་སྒེར་དྲུང་ཆེ་ཟུར་པ་སྐུ་ངོ་རྟ་ར་བ་བསྟན་འཛིན་ཆོས་ཉིད་མཆོག དགུང་ལོ་མཐོར་པོར་ཕེབས་ཁར་བར་ལམ་ནས་སྐུ་བསྙུན་གྱིས་ཕྱི་ལོ་ ༢༠༡༣ ཟླ་ ༡ ཚེས་ ༡༤ སྔ་དྲོ་ཆུ་ཚོད་ ༡༡།༡༣ ཙམ་ལ་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག

དེར་བརྟེན་ཐུགས་ཕམ་དང་བཅས་དམ་པ་དེ་ཉིད་ཀྱིས་ཚེ་རབས་ཕྲེང་བ་ནས་བསགས་པའི་སྡིག་སྒྲིབ་བྱང་ཞིང་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་ཐོབ་ཆེད་ཕྱི་ཚེས་ ༡༤ ཉིན་གྱི་ཕྱེད་ཡོལ་ཆུ་ཚོད་ ༣ པའི་ཐོག་ལས་བྱེད་གསོལ་ཚང་ཡང་སྟེང་ཚོགས་ཁང་དུ་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཀྱིས་བཀའ་དྲུང་གཡུ་ཐོག་ཀརྨ་དགེ་ལགས་ཀྱིས་དམ་པ་ཁོང་གི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་རྗེས་ཆུ་ཚོད་ ༤ བར་སྨོན་ལམ་གསུང་འདོན་དང་དེ་ནས་མྱ་ངན་གུས་འདུད་ཀྱི་གདུང་སེམས་མཉམ་སྐྱེ་མཚོན་སླད་དབུས་ཀྱི་ལས་ཁུངས་ཁག་སྒོ་བརྒྱབ་ཡོད།

དཔལ་ལྡན་སྐུ་སྒེར་ཡིག་ཚང་གི་དྲུང་ཆེ་ཟུར་པ་རྟ་ར་བ་བསྟན་འཛིན་ཆོས་ཉིད་མཆོག་གི་ནི་མི་ལོ་ ༦༡ རིང་༸གོང་ས་༸སྐྱབས་མགོན་ཆེན་པོ་མཆོག་དང་རང་གཞུང་ལ་ཞབས་ཞུ་གནང་མྱོང་མཁན་གྱི་ལོ་རྒྱུས་སྟེང་མི་སྣ་ཧ་ཅང་བྱས་པ་ཅན་ཞིག་ཡིན། དེ་ཡང་སྐུ་ངོ་མཆོག་ནི་ལོ་རྒྱུས་སྙིང་བསྡུས། དམ་པ་ཁོང་ནི་མྱང་སྟོད་རྒྱལ་རྩེ་རྫོང་ཁོངས་མཁར་ཁ་གཞིས་སུ་ཕྱི་ལོ་ ༡༩༢༠ ལོར་ཡབ་སྐལ་བཟང་ཆོས་འབྱོར་དང་ཡུམ་བདེ་སྐྱིད་མཚོ་མོ་གཉིས་ཀྱི་སྲས་སུ་སྐུ་འཁྲུངས། སྔར་ལམ་ཡིག་རྩིས་རིག་གནས་སློབ་གཉེར་དང་། གཞུང་སྲོལ་ཕྱག་བྲིས་ཀྱི་ལས་དོན་སྤྱན་ལྟོས་མྱོང་གསོག་ལེགས་གྲུབ་ཀྱི་དགུང་གྲངས་ ༢༢ ལྕགས་སྤྲུལ་ཕྱི་ལོ་ ༡༩༤༡ ལོར་གཞུང་ཞབས་རྩེ་དྲུང་གི་གསར་མཇལ་ཞུས་ཏེ་ཞབས་སྣེའི་ཐོག་མ་རྩྭ་གཉེར་དང་། རིམ་པར་ལྷ་བུ་གཞིས་སྡོད། བཀྲས་ལྷུན་ཛ་བླའི་ལས་བྱ། རྒྱ་ནག་དོན་གཅོད་ཐའི་མཁན་སྦྲེལ་པོའི་ལས་བྱ་རྩེ་མགྲོན། བོད་ལྗོངས་ཚོགས་འདུ་ཧྲགས་བསྡུས་ནང་རྩེ་མགྲོན་གྱི་འཐུས་མིར་འདེམས་ཐོན་ཚོགས་ཞུགས།

མཁན་ཆུང་གི་མཚན་གནས་ཐོག་ནོར་གླིང་ནང་མ་ཁང་དུ་ཕྱག་བྲིས་ཞབས་ཞུའི་འགན་བཞེས། རྒྱ་དཀར་ནག་གིས་མཚོན་ཕྱི་ནང་ཆིབས་སྒྱུར་གར་གནང་ལ་༸རྒྱལ་བའི་ཆིབས་ཞབས་ལྷན་བཅར། ལྷག་པར་ཕྱི་ལོ་ ༡༩༥༩ ལོར་ལྷ་སར་རྒྱ་མིས་བོད་གཞུང་ལ་མཐོ་བརྩམས་ཟིང་བསླངས་དྲག་མནོན་ཛ་དྲག་གི་ཉེན་ཆེའི་སྐབས་ལྷ་ཁུལ་སེར་སྐྱ་མང་ཚོགས་ནས་སྐུ་ཕྱྭ་བསྟན་སྲིད་སྙིང་བཅངས་དང་བླང་སྒྲིག་འཛུགས་ཚན་ཁག་ལ་ཇུས་འགོད་དབུ་འདོམས་བཀའ་བཀོད་ཁང་གི་དབུ་འཁྲིད་ཁོངས་མང་མོས་འོས་འདེམས་ལྟར་ཕྱི་ནང་གསང་གསུམ་གྱིས་སྐུ་ཕྱྭའི་སྲུང་སྐྱོབ་དང་རྒྱ་གར་དུ་གདན་ཞུའི་ཐབས་སྐུལ་ཐུགས་རྩོལ་ཆེ་བསྐྱེད་དོན་འཁྱོལ། ཟིང་འཁྲུག་ནང་དགྲ་བོར་གདོང་གཏུགས་མེ་ལན་སློག་རྒྱུར་ཐུགས་འགྱོད་མེད་པ་གནང་མཐར་བཙན་བྱོལ་དུ་ཕེབས་ཏེ་སྐུ་ཚེ་མཐའ་འཁྱོངས་སྐུ་སྒེར་དྲུང་ཆེའི་ཐུགས་འགན་རྐང་བཞེས་སྲི་ཞུ་རྟག་འགྲུས་མཛད་ཐོག གཞུང་འབྲེལ་འགངས་ཆེའི་ཡིག་ཆ་དང་།༸གོང་ས་༸སྐྱབས་མགོན་ཆེན་པོ་མཆོག་གི་ལུགས་ཟུང་མཛད་འཕྲིན་ནམ་མཁའི་ཕ་མཐར་ཀླས་པ་ལས་གསུང་གི་མཛད་པ་རྒྱ་ཆེའི་ཕྱི་ནང་མང་ཚོགས་ལ་ལེགས་འདོམས་བཀའ་སློབ་སྔ་ཕྱི་རིམ་ཅན་སྡེ་ཚན་གླེགས་བམ་ཕྱོགས་བསྒྲིགས།་ཞུས།

ཡང་སྒོས་སྐུ་ཚེའི་ལོ་རྒྱུས་ཕྱག་དེབ་ཅིག་ཀྱང་བྲིས་གནང་ཡོད་པ་དེའི་ནང་རྣམ་དཔྱོད་ཅན་གྱི་རང་རིགས་ན་གཞོན་རྣམས་ལ་འཕྲལ་ཡུན་བདེ་སྐྱིད་སྒྲུབ་ཚུལ་མི་འཆོལ་ཆེད་ཆོས་སྲིད་ཞི་དྲག་ལོ་རྒྱུས་དང་བཅས་པར་ཐུགས་མྱོང་དངོས་ཀྱི་ཞལ་ཏ་ཟབ་གནད་ལམ་སྟོན་མཛད་འདུག་སྟབས། རང་རིགས་སྤྱི་དང་ཆབ་སྲིད་བྱ་བའི་སྣེར་གཏོགས། ལྷག་པར་ན་གཞོན་སློབ་པ་ལམ་ཞུགས་ཚོས་སྐུ་ངོ་མཆོག་གིས་གཞུང་མང་དུས་གཉན་སྐུ་ངལ་ཆེ་སྐབས་སྒེར་དོན་ཉེན་ཟོན་རིང་སྤངས་གདུང་འདེགས་ཀ་བ་ལྟ་བུའི་སྤྱི་སྨན་མཛད་འགན་བཞེས་ཡོད་པ་བཅས་ཞིབ་ཕྲ་བོད་ཀྱི་དཔེ་མཛོད་ཁང་ནས་པར་སྐྲུན་གནང་བའི་ངག་རྒྱུན་ལོ་རྒྱུས་དེབ་ཕྲེང་ ༡༨ ༼རང་ཉིད་ངོ་སྤྲོད་༽ཅེས་པའི་སྐུ་ངོ་མཆོག་གིས་བརྩམས་གནང་བའི་ཕྱག་དེབ་ལས་གསལ་ཡོད་འདུག དབུས་བོད་མིའི་སྒྲིག་འཛུགས་ཀྱི་དྲ་ཚིགས་ལས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།



བརྗོད་གཞི་གཞན་ཁག་ལ་གཟིགས།