ཇམ་མུ་དང་དྷེ་ར་རྡུན་མངའ་སྡེའི་ནང་བོད་མིས་ཞུ་གཏུགས་བྱས་པ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ། ཕྱི་ལོ་༢༠༡༣ཟླ་༡ཚེས་༩ཉིན། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོས་སྣེ་ཁྲིད་པའི་རྒྱ་གར་བྱང་ཕྱོགས་ཀྱི་མངའ་སྡེ་ཁག་ནང་ཞུ་གཏུགས་ལས་འགུལ་ཚོགས་ཆུང་གིས་རྒྱ་གར་གྱི་མངའ་སྡེ་ཇམ་མུ་ནང་མངའ་སྡེ་གཞུང་གི་བློན་ཆེན་སོགས་སུ་མཇལ་འཕྲད་དང་། ཁྲོམ་སྐོར་སོགས་ཀྱི་ལས་འགུལ་སྤེལ་ཡོད་འདུག

དེ་ཡང་ཕྱི་ལོ་ ༢༠༡༢།༡༢།༣༡ ཉིན་སྤྱི་འཐུས་ཟླ་བ་ཚེ་རིང་དང་། སྤྱི་འཐུས་གངས་ལྷ་མོ། སྤྱི་འཐུས་དགེ་བཤེས་སྐལ་བཟང་དགྲ་འདུལ། སྤྱི་འཐུས་རྨོག་རུ་བསྟན་པ། ཧིན་རྡུའི་སྐད་བསྒྱུར་བ་བསྟན་འཛིན་བཅས་ཇམ་མུའུ་མངའ་སྡེའི་གྲོང་ཁྱེར་དུ་འབྱོར་བ་དང་། ཉིན་རྒྱབ་ཡུལ་བསྐོར་སྤྲོ་འཆམ་དང་རིག་གཞུང་བློན་ཆེན་ངག་དབང་རིག་འཛིན་ཇོ་ར་མཆོག་ལ་མཇལ་འཕྲལ་གྱིས་ད་ལྟའི་བོད་ནང་གི་རང་ལུས་མེར་བསྲེགས་ཀྱིས་མཚོན་པའི་གནས་བབ་ངོ་སྤྲོད་དང་། བློན་ཆེན་མཆོག་བརྒྱུད་མངའ་སྡེའི་གྲོས་ཚོགས་འཐུས་མི་དང་། མངའ་སྡེ་གཞུང་གི་དཔོན་རིགས་ཁག་ལ་གསལ་བཤད་བྱས།

དེ་བཞིན་མི་མང་སོགས་ཀྱི་ངོས་ནས་རྒྱ་ནག་གཞུང་གི་མཁྲེགས་འཛིན་ཅན་གྱི་སྲིད་བྱུས་ལ་གནོན་ཤུགས་སྤྲོད་ཐབས་ཡོང་བའི་འབོད་སྐུལ་ཞུས་ཤིང་། བློན་ཆེན་མཆོག་གིས་མཐུན་འགྱུར་རོགས་རམ་འོག་མངའ་སྡེའི་གཞུང་ངོས་ནས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་འཐུས་མིའི་མགྲོན་ཁང་དང་། བཞེས་ལག་སོགས་མཐུན་འགྱུར་གནང་བར་ཐུགས་རྗེ་ཆེ་ཞུས་ཡོད་པ་རེད། ཁོང་གིས་གསུང་དོན་ལ། ཁོང་ཉིད་གཞུང་གི་འཛིན་སྐྱོང་ཁོངས་ཡོད་པར་བརྟེན་གཞུང་ཐོག་ནས་ཁྱོད་ཚོར་རོགས་རམ་གང་འདྲ་བྱེད་ཐུབ་ཀྱིན་ཡོད་མེད་ཞུ་ཚོད་ཐུབ་པ་མི་འདུག་ཀྱང་། སོ་སོ་སྒེར་གྱི་ཐོག་ནས་གང་ཐུབ་ཞུ་རྒྱུ་མ་ཟད་ལྕམ་སྐུ་སོ་ན་ཡ་འགན་རྡེ་དང་། སར་མིན་ཀོ་ཞི་ཏེ་སོགས་དཔོན་རིགས་ཁག་ལ་བོད་དོན་རྒྱབ་སྐྱོར་ཡོང་བའི་འབོད་སྐུལ་ཞུ་རྒྱུ་ཡིན་སོགས་གསུང་ཡོད་འདུག

ཕྱི་ལོ་༢༠༡༣།༡།༡ ཉིན་རྫོང་དཔོན་ལས་རོགས་ལྕམ་སྐུ་རེ་ན་བྷོ་ཊ་མཆོག་ལ་མཇལ་འཕྲལ་གནང་སྐབས་ཁོང་གིས་སེམས་འགུལ་ལ་སྨན་པའི་བཀའ་མོལ་མང་པོ་གནང་བ་དང་། ལྷག་པར་ས་གནས་འདི་རྒྱལ་ཁབ་ཀྱི་མཐའ་མཚམས་སུ་འཁེལ་གྱིན་ཡོད་པས་སྲུང་སྐྱོབ་དམ་དྲག་ཆེན་པོ་ཡོད་པར་བརྟེན་ཁྲོམ་བསྐོར་སོགས་བྱ་རྒྱུའི་བཀའ་འཁྲོལ་ཐོབ་དཀའ་ཡང་། ལྕམ་སྐུ་མཆོག་གིས་དམིགས་བསལ་ཐུགས་འཁུར་ཆེ་བཞེས་ཀྱིས་བཀའ་འཁྲོལ་ཞུ་ཐོབ་བྱུང་ཡོད་འདུག

ཕྱི་ལོ་༢༠༡༣།༡།༢ ཉིན་གྱི་ཞོགས་པར་ལ་དྭགས་དང་། ཟངས་དཀར་སོགས་ཀྱི་ས་གནས་ངོ་ཡོད་སློབ་ཕྲུག་བརྒྱ་དང་ལྔ་བཅུ་ལྷག་ཅིག་འདུ་འཛོམས་ཀྱིས་གསར་འགོད་གསལ་བསྒྲགས་དང་། གཞུང་ལམ་ཆེན་པོའི་གྲོང་ཁྱེར་ནང་ལག་ཏུ་བོད་ཀྱི་རྒྱལ་དར་དང་། འཕྲེད་དར་སྣ་ཚོགས། ཁ་བཏགས་སོགས་བཟུང་སྟེ་སྐད་འབོད་ཁྲོམ་བསྐོར་བྱས་ཡོད་འདུག

གོང་ཚེས་ཉིན་གྱི་ཕྱི་དྲོར་ཇམ་མུ་མངའ་སྡེ་བློན་ཆེན་ཨོ་མ་རབ་བརྡོལ་ལ་མཆོག་དང་མཇལ། ཁོང་ལ་ཞུ་དགོས་ཀྱི་དོན་གནད་རྣམས་ཡིག་ངག་གཉིས་ཐོག་ནས་ཞུས་བས། ཁོང་གིས་༸གོང་ས་ཏཱ་ལའི་བླ་མ་མཆོག་གིས་བོད་ལ་རང་སྐྱོང་གི་གནས་བབ་རྩོད་ཀྱིན་པ་རྒྱ་ནག་གཞུང་གི་དཔོན་པོ་ཚོས་ཤེས་གསལ་ལྟར་རེད། རྒྱ་ནག་ནང་ཧོང་ཀོང་དང་། ཨོ་མན་སོགས་རང་སྐྱོང་གི་ལམ་ལུགས་ཤིག་ཡོད་བསྡད་ཡོད་པ་རེད། དེ་ཡིན་དུས་ཁོ་རང་ཚོས་ཨུ་ཚུགས་བྱེད་སྟངས་དེ་ལ་ཁོང་ཡ་མཚར་གྱིན་འདུག་ཅེས་སོགས་ཁོང་ཉིད་ཀྱིས་གང་ཐུབ་རྒྱབ་སྐྱོར་ཡོད་པའི་བཀའ་མོལ་གནང་།

དེ་རྗེས་མངའ་སྡེའི་སྤྱི་ཁྱབ་བློན་ཆེན་གྱི་ཆབ་སྲིད་སློབ་སྟོན་པ་རྡེ་བན་རྡར་སིན་ར་ན་སོགས་དང་མཇལ་འཕྲལ་ཞུས་ཏེ་བོད་ནང་གི་དཀའ་ངལ་གྱི་གནས་བབ་དང་རྒྱབ་སྐྱོར་ཡོང་བའི་འབོད་སྐུལ་ཞུས། ཁོང་སོགས་རྒྱ་གར་དཔོན་རིགས་ཁག་གིས་༸གོང་ས་ཏཱ་ལའི་བླ་མ་མཆོག་ལ་ཆེ་བསྟོད་དང་། མགོན་པོ་གང་གི་མཛད་རྗེས་ཡིས་བོད་དོན་ལ་རྒྱབ་སྐྱོར་དང་གཟིགས་སྐྱོང་ཡོད་པའི་དགོངས་ཚུལ་གསུང་བ་དང་། ཁོང་ནས་ཁྱོད་ཚོས་རང་གི་རྒྱལ་ཁབ་དང་མི་རིགས་ཀྱི་ཆེད་དུ་དཀའ་ལས་བསྐྱོན་པར་བསྔགས་བརྗོད་ཡོད་ཅེས་གསུང་གནས་གནང་སོང་། དགོང་དྲོ་ཆུ་ཚོད་བདུན་དང་ཕྱེད་ཀའི་སྟེང་སིམ་ལ་ཕྱོགས་སུ་ཐོན་པ་དང་ཕྱི་ཚེས་གསུམ་གྱི་སྔ་དྲོའི་ཕྱག་ཚོད་༦།༣༠སྟེང་སིམ་ལར་འབྱོར་ཡོད་འདུག

ཕྱི་ལོ་༢༠༡༣།༡།༥ ཉིན་ཞུ་གཏུགས་ལས་འགུལ་བ་རྣམས་དྷེ་ར་རྡུན་ཁུལ་དུ་འབྱོར་ཡོད་པ་དང་། མངའ་སྡེ་སྤྱི་ཁྱབ་བློན་ཆེན་བེ་ཇེ་བྷ་གྷོ་ན་Vijay Bahuguna མཆོག མངའ་སྡེ་གྲོས་ཚོགས་ཚོགས་གཙོ་སྐུ་ཞབས་Govind Singh Kungwal མཆོག་དང་། གྲོས་ཚོགས་ཚོགས་གཙོ་ཟུར་བ་Harbens Kapoor མཆོག་གིས་གཙོ་བོས་གྲོས་ཚོགས་འཐུས་མི་ཁག་ཅིག་དང་། འཛིན་སྐྱོང་བློན་ཆེན་ཁག་ཅིག་ལ་མཇལ་འཕྲལ་ཀྱིས་བོད་ནང་གི་རང་ལུས་མེར་བསྲེགས་དང་། རྒྱ་ནག་གཞུང་གི་དམ་དྲག་ཅན་གྱི་སྲིད་བྱུས་ངོ་སྤྲོད་། དེ་བཞིན་རྒྱ་གར་དཔོན་རིགས་ཁག་དང་གྲོས་ཚོགས། མི་མང་སོགས་ནས་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་ལ་གནོན་ཤུགས་སྤྲོད་ཐབས་ཡོང་བར་ཡིག་ངག་གཉིས་ཐོག་ནས་ཞུ་གཏུགས་བྱས་ཡོད་པ་རེད།

ཕྱི་ཚེས་༦ ཉིན་གྲོང་ཁྱེར་གྱི་ Inderlok Hotel ནང་གསར་འགོད་གསལ་བསྒྲགས་གནང་བ་དང་། གསར་འགོད་པ་སུམ་བཅུ་ལྷག་གིས་དོ་སྣང་ཆེན་པོས་དྲི་བ་དྲི་ལན་གནང་སྟེ་བརྙན་འཕྲིན་དང་གསར་ཤོག་གི་བརྒྱུད་ལམ་དུ་ཞུ་གཏུགས་ལས་འགུལ་གྱི་སྐོར་ཤུགས་ཆེར་འགྲེམས་བསྒྲགས་བྱས་ཡོད་པ་རེད།

ཕྱི་ཚེས་༧ ཉིན་ས་གནས་འགོ་འཛིན་ལས་ཁུངས་ཀྱི་ཁྱབ་ཁོངས་གཞིས་ཁག་ཡོངས་དང་། ཧ་པ་སྤུར་འདོད་རྒུ་གཡུལ་རྒྱལ་གླིང་དང་། སི་ལ་ཀོའི་བོད་ཁྱིམ་སློབ་ཕྲུག་སོགས་གྲྭ་བཙུན་དང་། མི་མང་༡༠༠༠ ལྷག་གིས་སྡེར་རྡུན་གྲོང་ཁྱེར་ནང་ཁ་རས་ནག་པོ་དཀྲིས་ཏེ་ཁྲོམ་སྐོར་ལས་འགུལ་ཞིག་སྤེལ་ཡོད་པ་དང་། ཁྲོམ་སྐོར་གྱི་སྔོན་དུ་མི་མང་འདུ་འཛོམས་བྱས་པ་དང་། ས་གནས་འགོ་འཛིན་འཕྲིན་ལས་འཇིགས་མེད་ལགས་ཀྱིས་ལས་འགུལ་ངོ་སྤྲོད་གནང་བ་དང་། སྤྱི་འཐུས་དགེ་བཤེས་སྐལ་བཟང་དགྲ་འདུལ་ལགས་དང་བུ་མོ་བསྟན་འཛིན་གཉིས་ཀྱིས་ཧིན་དབྱིན་གྱི་སྐད་ཡིག་སྟེང་གསར་འགོད་བསྒྲགས་གཏམ་སྤེལ་བ་དང་། སྤྱི་འཐུས་ཟླ་བ་ཚེ་རིང་དང་། སྤྱི་འཐུས་གངས་ལྷ་མོ་གཉིས་ཀྱིས་གསུང་བཤད་གནང་ཡོད་པ་རེད།

ཕྱི་ཚེས་༨ ཉིན་སྡེ་ར་རྡུན་Doonga Hotel རྡོ་ན་མགྲོན་ཁང་གི་ཐང་ཆེན་དུ་བོད་ནང་གི་རང་ལུས་མེར་བསྲེགས་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་དང་། འདས་གསོན་གཞིས་ལུས་བོད་མིའི་སྤུན་ཟླ་རྣམས་ལ་གདུང་སེམས་མཉམ་བསྐྱེད་ཆེད་ཆོས་ལུགས་རིས་མེད་ཀྱི་མཆོད་འབུལ་སྨོན་ལམ་ཞིག་འཚོགས་པ་དང་། མཆོད་འབུལ་སྨོན་ལམ་སྟེང་ནང་པའི་གྲྭ་བཙུན་དང་། ཡེ་ཤུ་ཆོས་ལུགས་ཀྱི་ཆོས་དཔོན། ཧིན་རྡུ་ཆོས་ལུགས་ཀྱི་ཆོས་དཔོན། ཁ་ཆེ་ཆོས་ལུགས་ཀྱི་ཆོས་དཔོན། ས་ཡེན་ཧིན་རྡུ་ཆོས་ལུགས་ཀྱི་ཆོས་དཔོན་སོགས་ཕེབས་ཏེ་སྨོན་ལམ་གསུང་འདོན་གནང་སྟེ་ཕྱི་ཚེས་༩ ཉིན་གྱི་ཞོགས་པར་ཞུ་གཏུགས་ལས་འགུལ་བ་རྣམས་བྷེ་ཧར་མངའ་སྡེ་ཡི་རྒྱལ་ས་ལེགས་ནོའི་ཕྱོགས་སུ་བསྐྱོད་ཡོད་པ་རེད།

གནས་ཚུལ་མཁོ་གཏོང་བ་རྨོག་རུ་བསྟན་པ།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།