སྲིད་སྐྱོང་གིས་ཉི་ཧོང་གི་སྲིད་བློན་གསར་པར་འཚམས་འདྲི་ཞུས་པ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ། ཕྱི་ལོ་༢༠༡༢ཟླ་༡༢ཚེས་༡༨ཉིན། སྐུ་ཞབས་ཤིན་ཛོ་ཨ་བྷེ་ Mr Shinzo Abe མཆོག་ཉི་ཧོང་གི་སྲིད་བློན་དུ་སླར་ཡང་འདེམས་ཐོན་བྱུང་བར་བོད་མིའི་སྒྲིག་ འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁ་སང་ཕྱི་ཚེས་ ༡༧ རེས་གཟའ་ཟླ་བའི་ཉིན་འཚམས་འདྲི་ཕུལ་བའི་ནང་འཁོད་དོན།

ངས་དེ་རིང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་རང་དབང་མང་གཙོ་ཚོགས་པའི་ཚོགས་གཙོ་ Liberal Democratic Party སྐུ་ཞབས་ཤིན་ཛོ་ཨ་བྷེ་མཆོག་ཉི་ཧོང་གི་སྲིད་བློན་དུ་འདེམས་ཐོན་བྱུང་བར་དགའ་བསུའི་འཚམས་འདྲི་ཞུས་པ་དང་སྦྲགས། བྱ་བ་ལམ་ལྷོང་ཡོང་བའི་སྨོན་འདུན་ཞུ་རྒྱུ་ཡིན། ངས་ཉི་ཧོང་གཞུང་མང་གཉིས་ཀྱིས་བོད་མིའི་མང་གཙོ་དང་འཚེ་མེད་ཞི་བའི་ལམ་ནས་བོད་དོན་འཐབ་རྩོད་ལ་ཡུན་རིང་ཐོག་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་རྗེས་དྲན་ཞུ་རྒྱུ་དང། འབྱུང་འགྱུར་ཡང་བོད་དོན་ཐོག་མུ་མཐུད་རྒྱབ་སྐྱོར་ཡོང་བའི་རེ་བ་ཞུ་རྒྱུ་ཡིན། ཞེས་འཁོད་ཡོད།

སྤྱིར་འདི་ལོའི་ཕྱི་ཟླ་ ༤ ནང་སྲིད་སྐྱོང་མཆོག་ཉི་ཧོང་དུ་གཞུང་འབྲེལ་འཚམས་གཟིགས་སུ་ཕེབས་སྐབས། སྐུ་ཞབས་ཤིན་ཛོ་ཨ་བྷེ་མཆོག་དང་ཐེངས་བཞི་མཇལ་འཕྲད་ཀྱིས་གསུང་མོལ་ལྷུག་པོ་བྱུང་ཡོད། དེ་ཡང་མཇལ་འཕྲད་སྐབས་སྐུ་ཞབས་ཨ་བྷེ་མཆོག་གིས་བོད་ཀྱི་གནད་དོན་ནི་ཉི་ཧོང་ནང་ཆབ་སྲིད་འདྲ་མིན་ཡོད་པ་ཚང་མས་གཅིག་གྱུར་ཐོག་རྒྱབ་སྐྱོར་བྱ་རྒྱུའི་གནད་དོན་འགའ་ཤིག་ཡོད་ཁོངས་ནས་གཅིག་ཆགས་ཡོད་པ་དང་། ཁོང་གིས་རང་ནུས་གང་ཐུབ་ཀྱིས་བོད་ནང་བཟང་ཕྱོགས་ཀྱི་འགྱུར་བ་ཡོང་རྒྱུར་རྒྱབ་སྐྱོར་མུ་མཐུད་ཞུ་རྒྱུའི་འབད་བརྩོན་གནང་རྒྱུ་ཡིན། ཞེས་གསུངས་པ་མ་ཟད། ཕྱི་ཟླ་ ༡༡ ནང་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་དུ་ཆིབས་སྒྱུར་སྐབས་སླར་ཡང་བོད་དོན་རྒྱབ་སྐྱོར་ཞུ་རྒྱུའི་ཁས་ལེན་གནང་ཡོད། ཅེས་སོགས་འཁོད་ཡོད། དེ་བཞིན་ཉེ་ལམ་༸གོང་ས་མཆོག་ཉི་ཧོང་གྲོས་ཚོགས་སུ་གདན་ཞུས་ཀྱིས་གྲོས་ཚོགས་འཐུས་མི་ ༢༣༠ བརྒལ་བར་བཀའ་སློབ་སྩལ་རྒྱུར་རྒྱབ་སྐྱོར་གནང་བར་ཐུགས་རྗེ་ཆེ་ཅེས་ཞུས་འདུག

ཡང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་མཆོག་སླར་ཡང་ཉི་ཧོང་གི་སྲིད་བློན་དུ་འདེམས་ཐོན་གནང་བར་དགའ་བསུའི་འཚམས་འདྲི་ཞུས་པའི་ནང་འཁོད་དོན། རེས་གཟའ་ཉི་མའི་ཉིན་ཉི་ཧོང་རྒྱལ་ཡོངས་འོས་འདུའི་གྲུབ་འབྲས་གསལ་བསྒྲགས་སྐབས་སྐུ་ཉིད་མཆོག་གི་ཆབ་སྲིད་ཚོགས་པར་མང་མོས་རྒྱལ་ཁ་ཐོབ་པར་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱིས་དགའ་བསུའི་འཚམས་འདྲི་ཞུ་རྒྱུ་དང་། སྐུ་ཉིད་མཆོག་གིས་བོད་དོན་རྒྱབ་སྐྱོར་སྤྱི་དང་ལྷག་པར་འདི་ལོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་དུ་ཆིབས་སྒྱུར་སྐབས་གདན་ཞུས་མཚོན་རྒྱབ་སྐྱོར་གྱི་ལངས་ཕྱོགས་བརྟན་པོ་བཟུང་བར་བསྔགས་བརྗོད་ཞུ་རྒྱུ་ཡིན།

ང་ཚོས་སྐུ་ཉིད་མཆོག་ལ་བྱ་བ་ལམ་ལྷོང་ཡོང་བའི་གསོལ་འདེབས་ཞུས་པ་དང་སྦྲགས། ད་ལྟའི་བོད་ནང་གི་ཛ་དྲག་གནས་སྟངས་ཞི་འཇམ་ཐོག་གཉིས་སྨན་གྱི་ཐབས་ལམ་འཚོལ་བ་བརྒྱུད་བོད་ཀྱི་གནད་དོན་སེལ་རྒྱུར་སླར་ཡང་རྒྱབ་སྐྱོར་མུ་མཐུད་གནང་རོགས་ཞེས་འབོད་སྐུལ་ཞུ་རྒྱུ་ཡིན་ཞེས་གསུངས་འདུག

རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་སངས་རྒྱས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།