གནས་མཆོག་མཚོ་པདྨ་ཅན་གྱི་མཛད་འཕྲིན་ལེགས་པར་གྲུབ་པ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ། ཕྱི་ལོ་༢༠༡༢ཟླ་༤ཚེས་༤ཉིན། གུ་རུའི་གནས་མཆོག་མཚོ་པདྨ་ཅན་དུ་ཟངས་མདོག་དཔལ་རིའི་ཕོ་བྲང་བརྟེན་དང་རྟེན་པ་གསར་བཞེངས་ལེགས་གྲུབ་བྱུང་བར་དབུ་འབྱེད་རབ་གནས་དང་། དེ་བཞིན་སྔོན་ནས་ཇི་ལྟར་གསོལ་བ་བཏབ་པ་བཞིན་མི་མང་ལ་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་བསྩལ་ཡོད་འདུག

ཟླ་འདིའི་ཕྱི་ཚེས་ ༡ ཉིན་གྱི་སྔ་དྲོའི་ཕྱག་ཚོད་༩ཐོག ༧སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་ཕེབས་འཁོར་ཐོག་ཆིབས་ཞལ་བསྒྱུར་ཏེ་ཕྱག་ཚོད་ ༡་དང་སླར་༤༠ཐོག གུ་རུའི་གནས་མཆོག་མཚོ་པདྨར་ྋཞབས་སོར་བདེ་བར་འཁོད་དེ་འབྲི་གུང་བཀའ་བརྒྱུད་དགོན་ཐུབ་བསྟན་བཤད་སྒྲུབ་གླིང་དུ་གནས་གཟིགས་སུ་ཆིབས་སྒྱུར་གནང་ཞིང་། དགོན་དེའི་དབོན་སྤྲུལ་རིན་པོ་ཆེ་ནས་ྋགོང་ས་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུས། དེ་རྗེས་དཀོན་མཆོག་རྗེས་དྲན་གསུང་མུར་གསོལ་ཇ་བཞེས་འབྲས་ཕེབས། དེ་རྗེས་ཆོས་འབྲེལ་བྱང་ཆུབ་སེམས་དཔའི་སྡོམ་པ་འབོགས་ཆོག་དང་རབ་གནས་བཀའ་དྲིན་སྩལ་རྗེས་འཛི་སྒར་དགོན་པར་ཆིབས་ཞལ་བསྒྱུར། དེར་ྋཞབས་སོར་འཁོད་སྐབས་འཛི་སྒར་རིན་པོ་ཆེ་དང་མཁན་ཆེན་འཕྲིན་ལས་རྡོ་རྗེ་སོགས་ཀྱིས་འཚམས་ཞུའི་མཇལ་དར་ཕུལ་ཞིང་། གྲྭ་དམངས་ཀྱིས་མཆོད་རྫས་སྣ་ཚོགས་ཐོགས་པའི་སེར་སྦྲེང་དང་མི་མང་ཁག་གཅིག་གི་གླུ་དབྱངས་ཀྱི་མཆོད་པ་བཅས་ཕེབས་བསུ་གཟབ་རྒྱས་ཞུས།

དེ་ གའི་གསར་དུ་བཞེངས་པའི་གཙུག་ལག་ཁང་རྟེན་དང་བརྟེན་པར་དབུ་འབྱེད་རབ་གནས་དང་ཆོས་འབྲེལ་གནང་རྒྱུ་བཅས་ལ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་དང་ བདེ་སྲུང་བཀའ་བློན། དེ་བཞིན་བོད་མི་མང་སྤྱི་འཐུས་ཚོགས་གཙོ་བགྲེས་གཞོན་དང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ། གཞན་ཡང་དགོན་པའི་སྐུ་མགྲོན་དང་སྦྱིན་བདག་ཁག གྭར་ཞ་དང་སྤི་ཏི། ཁུ་ནུ། སྦིར་དང་ཅོན་ཏ་ར་སོགས་ནས་ཆོས་ཞུ་བ་མི་མང་སྟོང་ཚོ་བརྒལ་བ་ཆེེད་བཅར་ཞུས་ཡོད་འདུག

ཕྱི་ཟླ་ ༤ ཚེས་ ༢ ཉིན་གྱི་ཕྱག་ཚོད་ ༡།༣༠ ཐོག་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གུ་རུའི་གནས་མཆོག་མཚོ་པདྨར་གསར་དུ་བཞེངས་པའི་ཟངས་མདོག་ དཔལ་རིའི་ཕོ་བྲང་གི་དབུ་བླ་རི་མགོ་རིན་པོ་ཆེ་དང་དགེ་བསྐོས་གཉིས་ནས་སྤོས་སྣེ་དང་དགེ་འདུན་པའི་སེར་སྦྲེང་བཅས་གཟིམ་ཆུང་ནས་ཟངས་མདོག་དཔལ་རིའི་ཕོ་བྲང་རྟེན་དང་བརྟེན་པ་བཅས་པ་གསར་བཞེངས་ལེགས་པར་གྲུབ་པའི་དབུ་འབྱེད་མཛད་སྒོར་གདན་ཞུས་གཞུང་སྒོར་མཆོག་གསུམ་ཤིས་བརྗོད་ཀྱི་ཞལ་འདོན་དང་འབྲེལ་དར་ཚོན་གཅོད་འབྲེག་བཀྲིན་བསྐྱངས། དེ་ནས་གཙུག་ལག་ཁང་དུ་གདན་ཞུས་ཀྱིས་སྣང་གསལ་ཞལ་འབྱེད་དང་འབྲེལ་ཕོ་བྲང་དང་ལྷ་ཁང་ཁག་ལ་གནས་གཟིགས་བཀའ་དྲིན་བསྐྱངས། དེ་རྗེས་བཞུགས་ཁྲིར་ྋཞབས་ སོར་འཁོད་བསྟུན་དབུ་མཛད་ཀྱིས་ཞལ་འདོན་གསུང་བསྐུལ་དང་། རི་མགོ་རིན་པོ་ཆེས་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས།  དེ་ནས་གསོལ་ཇ་བཞེས་འབྲས་ཕེབས་རྗེས་རི་མགོ་རིན་པོ་ཆེས་ཟངས་མདོག་དཔལ་རི་གསར་བཞེངས་དང་འབྲེལ་བའི་ལོ་རྒྱུས་ྋསྙན་སྒྲོན་ཞུས། དེ་རྗེས་ཆོས་རིག་བཀའ་བློན་པདྨ་ཆོས་འབྱོར་མཆོག་ནས་བཀའ་ཤག་གི་ཚབ་ཞུས་ཏེ་འཚམས་འདྲིའི་གསུང་བཤད་གནང༌།

དེ་ནས་ྋགོང་ས་མཆོག་གིས་ཟངས་མདོག་དཔལ་རིའི་སྦྱིན་བདག་བཟའ་ཚང་གཉིས་དང་འཆར་འགོད་པ། ལྷ་བཟོ་བ། ལས་དཔོན་བཅས་ལ་ལེགས་སྐྱེས་གསོལ་རས་དང་བཀའ་སློབ་བཀའ་དྲིན་སྩལ། དེ་རྗེས་མཁན་པོ་ཨོ་རྒྱན་རིག་འཛིན་གྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་ མཛད་སྒོ་ལེགས་པར་གྲུབ། ྋགོང་ ས་མཆོག་སྤྱན་རྒྱ་སྤོས་སྣེས་གཟིམ་ཆུང་དུ་གདན་འདྲེན་ཞུས་མཚམས་མདུན་ཐང་དུ་དགེ་འདུན་པ་རྣམས་ཀྱིས་བཀྲ་ཤིས་རོལ་འཆམ་དང་། འབྲུག་ནས་ཆེད་དུ་བཅར་བའི་གཞོན་ནུ་ཕོ་མོ་རྣམས་ཀྱིས་བཀྲ་ཤིས་པའི་ཞབས་བྲོ་གཟིགས་འབུལ་ཞུས།  ཕྱག་ཚོད་ ༣ ཐོག་ྋགོང་ས་ྋསྐྱབས་མགོན་ཆེན་པོ་མཆོག་ཟ་ཧོར་མཚོ་པདྨ་ཅན་ཨོ་རྒྱན་ཧེ་རུའི་ཕོ་བྲང་ངམ་རྙིང་མའི་དགོན་དུ་ཚེས་བཅུའི་ཚོགས་མགོན་དུ་ྋཞབས་འཁོད་ཀྱིས་ཚེས་བཅུའི་གསུང་ཚོགས་རྒྱས་པ་དང་འབྲེལ་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་བཀའ་དབང་བཀྲིན་སྩལ།

ཡང་ཕྱི་ཚེས་ ༣ ཉིན་གྱི་སྔ་དྲོའི་ཕྱག་ཚོད་ ༧ པའི་ཐོག་ྋམགོན་པོ་མཆོག་གནས་མཆོག་མཚོ་པདྨའི་གཡས་སུ་ཆགས་པའི་ཧིན་རྡུའི་དེ་ཝ་ཀི་རི་ཤི་ནར་ལྷ་ཁང་དང༌། གཡོན་དུ་ཆགས་པའི་གུ་རུ་རྡུ་ཝར་ལྷ་ཁང་བཅས་པར་གནས་གཟིགས་སུ་ཕེབས་སྐབས་ཁུལ་དེའི་མི་མང་དང་ལྷ་ཁང་གི་བདག་པོ་སོགས་ནས་ཕེབས་བསུ་སྣེ་ལེན་གཟབ་རྒྱས་ཞུས། དེ་རྗེས་སྔ་དྲོའི་ཕྱག་ཚོད་ ༨ ཐོག་འཛི་སྒར་ཨོ་རྒྱན་གླིང་དུ་གསར་བཞེངས་བསྒྲུབས་པའི་གུ་རུའི་གཙུག་ལག་ཁང་གི་བཞུགས་ཁྲིར་ྋཞབས་སོར་འཁོད་དེ་རབ་གནས་དང་བྱིན་འབེབས་ཀྱི་ཆོ་ག་གསུང་འདོན་མཛད། དེ་ནས་འཛི་སྒར་རིན་པོ་ཆེས་ྋགོང་ས་མཆོག་ལ་མཎྜལ་རྟེན་གསུམ་འདེགས་འབུལ་དང་ྋམགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་པའི་བརྟན་བཞུགས་བསྡུས་པ་བསྟར་འབུལ་ཞུས།

སྐབས་དེར་ྋགོང་ས་མཆོག་གིས་འདུས་མང་ལ་བཀའ་སློབ་སྩལ་དོན། ད་རེས་འགལ་རྐྱེན་ཞིག་འཕྲད་པའི་དབང་གིས་སྒོ་དབྱེ་འབྱེད་གནང་མ་ཐུབ་ཀྱང་འདིར་བརྟན་བཞུགས་གནང་བ་དང་རབ་གནས་བྱིན་ཕེབས་ཀྱང་ཧ་ཅང་ཡག་པོ་བྱུང་སོང་བ་ཚང་མར་ཐུགས་རྗེ་ཆེ་ཞུ་རྒྱུ་ཡིན། གཙོ་བོ་རིན་པོ་ཆེས་གཙོས་རྣམ་པ་ཚོས་ལོ་ནས་ལོ་བསྟུད་དེ་དཀའ་ལས་བརྒྱབ་པའི་ གྲུབ་འབྲས་རེད། བླ་མ་བགྲེས་སོང་ཁྱེད་རང་དེ་སྔ་ངོས་རང་འདི་གར་ཡོང་སྐབས་ཐེངས་གཅིག་ཐུག་པ་རེད། ཁྱེད་ཀྱིས་འདོད་དོན་ལྟར་བསྟན་པའི་སྲི་ཞུ་བསྒྲུབ་རྒྱུ་ཞིག་ཆགས་པ་རེད། ང་ཚོས་བསྟན་པའི་སྲི་ཞུ་འདི་ལྟ་བུ་སྒྲུབ་སྐབས་བསྔོ་བ་དང་ཡི་རང་བྱ་རྒྱུ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ་ཏེ་དགོན་པ་དེའི་བླ་མ་དབང་པོ་རིན་པོ་ཆེ་དང་མཁན་པོ་འཕྲིན་ལས་རྡོ་རྗེ། མཁན་པོ་བསོད་ནམས་བཀྲིས། དེ་བཞིན་སྦྱིན་བདག་ཁག་ལ་མཇལ་ཁ་སྩལ་ཏེ་གནས་མཆོག་མཚོ་པདྨའི་རི་ཁྲོད་ལ་གནས་ གཟིགས་སུ་ཆིབས་སྒྱུར་བསྐྱངས་པ་སོགས་ཐེངས་འདིའི་གནས་མཆོག་མཚོ་པདྨའི་མཛད་འཕྲིན་ཁག་ཡོངས་སུ་ལེགས་པར་གྲུབ་སྟེ་བཞུགས་སྒར་རྡ་སར་ཆིབས་ཞལ་བསྒྱུར་ཡོད་པ་རེད་ཅེས་བཙན་བྱོལ་བོད་མིའི་སྒྲིག་འཛུགས་ཀྱི་དྲ་བ་ལས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།