བདེ་སྐྱིད་གླིང་མི་མང་ནས་བཀའ་དྲིན་རྗེ་དྲན་གྱི་གཟེངས་བསྟོད་ཕུལ་བ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ། ཕྱི་ལོ་༢༠༡༡ཟླ་༧ཚེས་༢༦ཉིན། བཙན་བྱོལ་དབུས་བོད་མིའི་སྒྲིག་འཛུགས་ཀྱི་དྲ་ཚིགས་སུ་གནས་ཚུལ་སྤེལ་གསལ་ལྟར་ན། ཁ་སང་ཕྱི་ཚེས་༢༥ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་བཀའ་ཤག་གི་ཚོགས་ཁང་དུ་རྒྱ་གར་བྱང་ཕྱོགས་དྷེ་ར་རྡུན་ས་ཁུལ་བདེ་སྐྱིད་གླིང་ས་གནས་མི་མང་གི་སྐུ་ཚབ་མི་སྣ་བདུན་རྡ་སར་ཆེད་ཕེབས་ཀྱིས་བཀའ་ཁྲི་ཟམ་གདོང་རིན་པོ་ཆེ་མཆོག་ལ་བཀའ་དྲིན་རྗེས་དྲན་མཚོན་སླད་སྤྱི་ནོར་༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུ་ཐང་དང༌། དངུལ་གྱི་མཆོད་ཀོང་ཞིག་གཟེངས་བསྟོད་དུ་ཕུལ་ཡོད།

སྐབས་དེར་བཀའ་ཁྲི་མཆོག་གིས་གསུང་དོན། སྤྱིར་ད་བར་གང་ཞུས་ཐུབ་པ་དེ་ཁ་སང་ཁ་ཉིན་བསྐྱར་དུ་ཞུས་པ་བཞིན་མང་ཚོགས་ཀྱི་རྒྱབ་སྐྱོར་ལ་བརྟེན་ནས་བྱུང་བ་ཞིག་རེད། མ་འོངས་པར་ཡང་ང་ཚོའི་མང་གཙོའི་སྤྱི་ཚོགས་ནང་གནད་དོན་གང་འདྲ་ཞིག་ཡིན་ནའང་གཙོ་བོ་མི་མང་གིས་ཐག་བཅད་དགོས་པའི་གནད་དོན་ཞིག་ཡིན་སྟབས། ད་ལྟ་བཞིན་མི་མང་ཚོས་སྤྱིར་བཏང་ཐུགས་འདུན་ཁྲིམས་གཙང་དགོས་རྒྱུ་དང༌། དེའི་ཐོག་༧གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་དང་མ་འགལ་བ་གནང་ཐུབ་ན་དེ་ལས་ལྷག་པ་གང་ཡང་དགོས་ཀྱི་མ་རེད་བསམ་གྱི་འདུག ཐུགས་རྗེ་ཆེ། ཞེས་གསུངས་ཡོད།

དེ་རྗེས་གསར་འགོད་པས་འདི་གར་བདེ་སྐྱིད་གླིང་ནས་ཆེད་དུ་བཅར་བའི་བཀའ་དྲིན་རྗེས་དྲན་གྱི་གཟེངས་བསྟོད་འབུལ་མཁན་ཞིག་ལ་གཟེངས་བསྟོད་འདི་དག་བདེ་སྐྱིད་གླིང་གི་ཚོགས་པ་གང་དང་གང་ནས་ཡིན་སྐོར་དྲིས་པར་ཁོང་གིས་འགྲེལ་བརྗོད་གནང་དོན། གཟེངས་བསྟོད་འདི་བཞིན་བདེ་སྐྱིད་གླིང་ས་གནས་འཐུས་ཚོགས་དང་། བོད་རང་དབང་བདེན་པའི་ལས་འགུལ། སྤྱི་མི་བརྒྱ་དཔོན། གཞོན་ནུ། བུད་མེད། བོད་རྒྱལ་ཡོངས་མང་གཙོ་ཚོགས་པ། ཆོལ་ཁ་གསུམ། མངའ་རིས་སྤྱི་མཐུན་ཚོགས་པ། ལྷོ་ཁ་སྤྱི་ཚོགས་བདེ་དོན། དང་ཟུར་སྐྱིད་སྡུག་སོགས་ཚོགས་པ་སྐྱིད་སྡུག་ཁག་ ༡༤ ཐུན་མོང་གི་ངོས་ནས་བཀའ་ཁྲི་མཆོག་གིས་བཀའ་ཁྲིའི་འགན་འཁུར་བཞེས་པ་ཙམ་མ་ཟད། ཁོང་བཙན་བྱོལ་དུ་འབྱོར་ནས་ད་བར་བོད་མི་རིགས་དང་རྩ་དོན་གྱི་ཆེད་བྱས་རྗེས་རླབས་ཆེན་མང་དག་ཅིག་བསྒྲུབས་ཡོད་པར་བརྟེན། རིན་པོ་ཆེ་མཆོག་ལ་ཐུགས་རྗེ་ལེགས་འབུལ་དང་བཀའ་དྲིན་རྗེ་དྲན་མཚོན་ཆེད་གཟེངས་བསྟོད་འདི་དག་ཕུལ་བ་ཡིན་ཞེས་འགྲེལ་བརྗོད་གནང་འདུག

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།