༧གོང་ས་མཆོག་གི་གསུང་འཕྲིན་ལ་བགྲོ་གླེང༌།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ། ༢༠༡༡ལོའི་ཟླ་༠༣ཚེས་༢༣ཉིན། བཞུགས་སྒར་དུ་ཡོད་པའི་བོད་མི་ཁག་ཅིག་དང་རྩོམ་པ་པོ་ཁག་གཅིག་ལས་གྲུབ་པའི་བཞུགས་མོལ་ཚོགས་འདུ་ཞིག་འཚོགས་ཏེ་༧ སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་མི་མང་སྤྱི་འཐུས་སྐབས་༡༤ བའི་གྲོས་ཚོགས་ཚོགས་དུས་ ༡༡ པར་གལ་ཆེའི་གསུང་འཕྲིན་ཤོག་ངོས་བདུན་ཅན་ཞིག་བསྩལ་གནང་བར་བགྲོ་གླེང་ཞུས་ཏེ་ དགོངས་ཚུལ་ཕྱོགས་བསྡོམས་ཀྱིས་བོད་མི་མང་སྤྱི་འཐུས་ལྷན་ཚོགས་སུ་ཕུལ་ཡོད་འདུག་པ་འདི་ག་གསར་ཁང་དུ་བཏང་འབྱོར་བྱུང་བ་གཤམ་གསལ།


༄༅།། དཔལ་ལྡན་བོད་མི་མང་སྤྱི་འཐུས་སྐབས་བཅུ་བཞི་བའི་ཚོགས་གཙོ་སྦྲེས་པོ་མཆོག་གི་དབུས་སྤྱི་འཐུས་རྣམ་པ་ལྷན་རྒྱས་ཀྱི་ཞབས་དྲུང་དུ།

ཞུ་གསོལ།༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་མི་མང་སྤྱི་འཐུས་སྐབས་ ༡༤ བའི་གྲོས་ཚོགས་ཚོགས་དུས་ ༡༡ པར་གལ་ཆེའི་གསུང་འཕྲིན་ཤོག་ངོས་བདུན་ཅན་ཞིག་བསྩལ་གནང་བར། བོད་མི་མང་སྤྱི་འཐུས་ལྷན་ཚོགས་ཀྱིས་༧གོང་ས་མཆོག་གི་གསུང་འཕྲིན་རིན་པོ་ཆེར་ཐུགས་རྗེ་ཆེ་ཞུའི་གྲོས་འཆར། ཡིག་ཆ་ཨང་ ༥ པའི་ངོ་བོར་གལ་ཆེན་དོན་ཆེན་དུ་བརྩིས་ནས་ཕྱི་ཚེས་ ༡༤ ཉིན་རྒྱབ་ནས་ཚེས་ ༡༥ ཞོགས་པ་བར་དུ་གསུང་འཕྲིན་དེར་དཔྱད་ཞིབ་བྱེད་རྒྱུའི་དུས་ཚོད་སྤྲད་པ་དང༌། ཕྱི་ཚེས་ ༡༥ ཉིན་གང་བོར་གྲོས་ཚོགས་སུ་གསུང་འཕྲིན་ལ་བགྲོ་གླེང་གནང་བ་ནི་ཧ་ཅང་གི་རླབས་ཆེན་དང་བཀུར་འོས་པའི་གནས་སུ་མཆིས།

འོན་ཀྱང༌། ཉིན་འདི་དག་ཏུ་གྲོས་ཚོགས་འཐུས་མི་ཡོངས་ཀྱིས་བཀའ་མོལ་གནང་བའི་བརྒྱུད་རིམ་ལ་བལྟས་ཚེ་༧གོང་ས་མཆོག་གི་བཀའ་དགོངས་རྟོགས་ཡོད་མེད་དང༌། གསུང་འཕྲིན་འདི་བོད་མིའི་འཕྲལ་ཕུགས་ཀྱི་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན་པར་ངོས་འཛིན་བྱུང་ཡོད་མེད་ཆ་མ་འཚལ་བ་སོགས་འདོད་བློ་ཁེངས་པ་ཞིག་མ་ཡོང་བ་དང༌། གཞན་ཡང༌།དོ་སྣང་ཡོད་མཁན་འགའ་ཞིག་གིས་གསུང་འཕྲིན་འདིའི་སྐོར་ལ་བཙན་བྱོལ་དུ་ཡོད་པའི་ཤེས་ཡོན་པའི་སྡེའི་ལྟ་སྟངས་གང་འདྲ་ཡོད་མེད་སྐོར་ལ་ཛ་དྲག་གིས་བགྲོ་གླེང་ཞིག་བྱེད་ཐུབ་ན་ཞེས་བསམ་ཚུལ་བྱུང་བར་བརྟེན། དང་བླངས་པ་ཁག་ཅིག་གིས་བོད་ཀྱི་ཆབ་སྲིད་དང་རིག་གཞུང་ལ་གཞོལ་མཁན་མཁས་དབང་དང༌། རྩོམ་པ་པོ། ཉམས་ཞིབ་པ་ཁག་ཅིག་ལ་མགྲོན་འབོད་བྱས་ནས་ཉིན་གཅིག་གི་བགྲོ་གླེང་ཞིག་གོ་སྒྲིག་ཞུས་པ་ཡིན།

བགྲོ་གླེང་སྟེང་དུ་བྱུང་བའི་བསམ་ཚུལ་ཁག་ཟུར་འདོན་བྱས་པ་གཤམ་གསལ།

དང་པོ། ༧གོང་ས་མཆོག་གི་གསུང་འཕྲིན་ལག་ལེན་ལ་བསྟར་དགོས།

ཐེངས་འདིའི་བགྲོ་གླེང་སྟེང་དམིགས་བསལ་གདན་ཞུས་ཀྱིས་གསུང་བཤད་གནང་མཁན་ ༡༡ དང༌། ཟིན་བྲིས་པ ༣ ། གོ་སྒྲིག་པ་ ༢ བཅས་ཁྱོན་ཚོགས་ཞུགས་པ་བཅུ་དྲུག་ཡོད་པ་ལས་ཚོགས་ཞུགས་པ་ ༡༣ ཀྱིས་༧གོང་ས་མཆོག་གིས་བོད་མི་མང་སྤྱི་འཐུས་གྲོས་ཚོགས་སུ་བསྩལ་བའི་གསུང་འཕྲིན་དེ་ལག་ལེན་དུ་བསྟར་རྒྱུའི་དུས་ལ་བསླེབས་ཡོད་པར་ངོས་འཛིན་གནང་ཡོད།

༧གོང་ས་མཆོག་གི་གསུང་འཕྲིན་ནང་དུ་གསལ་བོར་གསུངས་ཡོད་པ་ལྟར། ཁོང་གི་སྐུ་ཁམས་བདེ་ཐང་ཡིན་པའི་སྐབས་འདིར་བོད་མི་རྣམས་ཀྱིས་རང་འགན་རང་འཁུར་ལག་ལེན་དུ་བསྟར་རྒྱུ་དང༌། གསུང་འཕྲིན་ནང་གསལ་བ་ལྟར་བོད་མི་རྣམས་ཀྱིས་ཁོང་མེད་པ་ནང་བཞིན་གྱི་འགན་ལེན་བྱས་ནའང༌། གལ་སྲིད་བོད་མི་རྣམས་ཀྱིས་ནུས་པས་མ་ལྕོགས་པ་དང་ལས་དོན་ལ་ལམ་སྟོན་དགོས་རིགས་བྱུང་ཚེ། ༧གོང་ས་མཆོག་ལ་བཀའ་སློབ་ལམ་སྟོན་ཞུ་ཆོག་པའི་ཞལ་བཞེས་ཕེབས་ཡོད།  དེར་བརྟེན་འགན་ཐེག་མིན་ལ་མ་ལྟོས་པར་འགན་འཁུར་དགོས་པ་ཡིན་སྟབས།  གྲོས་ཚོགས་ཀྱིས་ཚོགས་འདུ་འཕར་མ་འཚོག་དགོས་བྱུང་ནའང་དེ་ལྟར་གནང་བའི་དུས་ལ་བབ་ཡོད་ཅིང༌། མང་ཚོགས་ཀྱིས་ཀྱང་གསུང་འཕྲིན་འདིའི་སྐོར་ལ་གོ་རྟོགས་འཕེལ་ཕྱིར་སྦྱང་བཤད་སོགས་ག་རེ་གནང་རྒྱུ་ཡོད་ནའང་གནང་དགོས་ལ། ད་ལྟའི་དུས་འདི་ནི་ཁོང་གི་རླབས་ཆེའི་དགོངས་གཞི་དང་གལ་ཆེའི་གསུང་འཕྲིན་ལག་ལེན་དུ་བསྟར་རྒྱུའི་འགག་རྩར་བསླེབས་ཡོད།

ལག་ལེན་ཏུ་བསྟར་སྐབས་དུས་ཐུང་ནང་འགྱུར་བ་ཆ་ཚང་གཏོང་ཐུབ་པ་ཞིག་ཡོང་གི་མེད་པ་གསལ་བོ་ཡིན་ནའང༌། ཉིན་འགྱངས་ཞག་འཕུད་དུ་མ་བཞག་པར་འགྱུར་བ་གཏོང་དགོས་པ་གལ་ཆེན་པོ་ཡིན་ལ་བོད་མི་མང་སྤྱི་འཐུས་ལྷན་ཚོགས་ཀྱིས་དེའི་ཐད་བསྐྱར་དུ་ཐུགས་བསམ་བཞེས་དགོས་པ་ཆགས་ཡོད།

གཉིས་པ། ཁོང་ལ་བསྐྱར་དུ་གསོལ་བ་འདེབས་དགོས་ནའང་དེ་ལ་ནང་གསེས་དབྱེ་བ་གཉིས་དགར་དགོས།

ཡང་ཐེངས་འདིའི་བགྲོ་གླེང་ཚོགས་མི་ ༣ ཀྱིས་༧གོང་ས་མཆོག་གི་གསུང་འཕྲིན་ལ་དབྱེ་བ་གཉིས་ཕྱེས་ཏེ། བོད་མི་རྣམས་ཀྱིས་འགན་ལེན་ཐུབ་པ་གང་ཡོད་ལ་གཞིགས་ཏེ། འགན་ལེན་བྱེད་ཐུབ་པ་རྣམས་འགན་ལེན་དང༌།

ཡང་ད་ལྟའི་དུས་འདིར་བོད་མི་རྣམས་ཀྱིས་འགན་ལེན་བྱེད་མི་ཐུབ་པ། དཔེར་ན། བོད་རྒྱ་འབྲེལ་མོལ་གྱིས་མཚོན་བོད་ཀྱི་རྩ་དོན་ལ་འཕྲད་ཉེན་ཆེ་བའི་དཀའ་ངལ་ཁག་བཅུ་གཉིས་བཀའ་ཤག་ནས་གསལ་འདོན་གནང་བ་བཞིན། ཆབ་སྲིད་ཀྱི་གལ་གནད་ཆེ་ཁག་བཅས་ལ་ཁོང་གིས་མུ་མཐུད་ཐུགས་འགན་བཞེས་རྒྱུའི་ཐད་ཁོང་ལ་གསོལ་བ་ཕུར་ཚུགས་སུ་མ་བཏབས་ཐུ་མེད་ཀྱི་གནས་སུ་ཡོད་ནའང༌། གོམ་པ་རིམ་སྤོ་བྱས་ཏེ་དུས་ཡུན་ངེས་ཅན་ཞིག་གི་ནང་ཁོང་གིས་བཀའ་གནང་བ་ལྟར་བོད་མི་རྣམས་ཀྱིས་རང་འགན་རང་འཁུར་ཆ་ཚང་ཐུབ་པ་བྱ་རྒྱུའི་གྲ་སྒྲིག་ད་ལྟ་ནས་འགོ་རྩོམ་ཐུབ་པ་བྱ་དགོས།

གསུམ་པ། མཚན་གནས་རྗེས་འབྲེལ་མ་ཡིན་པར་མང་མོས་འོས་བསྡུའི་ལམ་ནས་བོད་མིའི་དབུ་ཁྲིད་དུ་བསྐོ་བཞག་གནང་རྒྱུ།

ཡང་བགྲོ་གླེང་ཚོགས་ཞུགས་པ་ ༡ གིས་ད་ལྟའི་ཆར་༧གོང་ས་མཆོག་ལ་གསོལ་བ་འདེབས་དགོས་ནའང་ཉེ་ཆར་གསར་འགོད་པར་གསུངས་པ་ལྟར་ན། ཁོང་གིས་གསུང་འཕྲིན་དེར་འགྱུར་བ་གང་ཡང་གཏོང་གི་མིན་པ་གསལ་བོ་ཡིན་སྟབས། ལས་རིམ་གཉིས་པ་ནི་མི་མང་གིས་འོས་བསྡུ་བྱེད་དགོས་ནའང་འདྲ་ལ་གྲོས་ཚོགས་ཀྱིས་འོས་བསྡུ་བྱེད་དགོས་ཀྱི་ཡོད་ནའང་འདྲ། གང་ལྟར་སྐབས་དང་པོ་དང་སྐབས་གཉིས་པ་སྟེ་ལོ་ལྔ་ཚན་གཉིས་རིང༌། མཚན་གནས་རྗེས་འབྲེལ་གྱི་སྟེང་ནས་མིན་པར་ཁོང་མང་མོས་འོས་བསྡུའི་ལམ་ནས་བསྐྱར་དུ་བོད་ཀྱི་ཆོས་སྲིད་ཀྱི་དབུ་ཁྲིད་དུ་ཕེབས་ཐུབ་ན། དུས་ཡུན་དེའི་ནང་གཞི་ནས་བཙན་བྱོལ་བོད་གཞུང་གི་སྒྲིག་འཛུགས་དེ་སྲ་བརྟན་ཞིག་ཆགས་སྲིད་པ་དང༌། དཀའ་ངལ་འཕྲད་ཀྱི་མ་རེད་ལ། དུས་ཡུན་དེའི་ནང་བོད་མི་རྣམས་རང་འགན་རང་ཁུར་ཐུབ་པར་འབད་བརྩོན་དང་གོ་སྐབས་ཡོད།

བཞི་པ། གཞིས་བྱེས་བོད་མིར་གོ་རྟོགས་སྤེལ་དགོས།

དེ་བཞིན་དུ་བགྲོ་གླེང་བ་ཡོངས་ཀྱིས་ཐེངས་འདིའི་༧གོང་ས་མཆོག་གི་གསུང་འཕྲིན་ཐད་ནས་གཞིས་བྱེས་བོད་མི་ཡོངས་ལ་ངེས་པར་དུ་གོ་རྟོགས་ཡག་པོ་སྤེལ་དགོས་པར་མ་ཟད། གཞིས་བཞུགས་བོད་མི་རྣམས་ལ་གོ་ནོར་མི་ཐེབས་པའི་ཆེད་དུ་ངེས་པར་དུ་གསལ་བཤད་དང་བརྒྱུད་བསྒྲགས་ཡག་པོ་བྱ་དགོས། ད་ལྟའི་ཆར་གཞིས་ཀྱི་བོད་རིགས་སྤུན་ཟླ་རྣམས་ལ་༧གོང་ས་མཆོག་གིས་དགོངས་པ་ཞུ་རྒྱུ་ཡོད་པ་དང༌། བོད་མི་མང་སྤྱི་འཐུས་གྲོས་ཚོགས་ཀྱིས་དགོངས་པ་འཁྲོལ་རྒྱུ་ཡོད་པ་བཅས་ད་ལྟའི་བཙན་བྱོལ་གྱི་མང་གཙོའི་གནས་བབ་གང་ཡང་ཤེས་རྟོགས་ཐུབ་ཀྱི་མེད་པར་བརྟེན། གོ་ནོར་ཐེབས་སྲིད་པའི་ཉེན་ཁ་ཡོད་པས་གོ་བརྡ་གསལ་བོ་སྤྲོད་ཐབས་ཀྱི་འབད་བརྩོན་ངེས་པར་གནང་དགོས།

གོང་གསལ་གལ་ཆེའི་བསམ་ཚུལ་ཁག་བཞི་ནི། ཐེངས་འདིའི་ྋགོང་ས་མཆོག་གི་བཀའ་ཡིག་རིན་པོ་ཆེའི་དགོངས་དོན་ལ་ཉམས་ཞིབ་པ་དང་མཁས་དབང་ཁག་གི་ཕུལ་བའི་དགོངས་ཚུལ་ཡྀན་པས། དེ་ལ་གཞིར་བཟུང་ནས་བསྐྱར་དུ་བགྲོ་གླེང་འཕར་མ་ཡོང་བའི་རེ་སྐུལ་བཅས། བགྲོ་གླེང་གོ་སྒྲིག་པ་ཚངས་དབྱངས་རྒྱ་མཚོ་དང་ཚོགས་ཞུགས་པ་ཡོངས་ཀྱིས་ཕྱི་ལོ་ ༢༠༡༡ ལོའི་ཟླ་ ༣ ཚེས་ ༡༩ ཉིན་ཕུལ་བ་དགེའོ།།

བགྲོ་གླེང་ལ་ཚོགས་ཞུགས་བྱེད་མཁན་དག་གི་མཚན་གཞུང༌།

༡ ས་རཱ་མཐོ་སློབ་ཀྱི་སློབ་དཔོན་བསོད་ནམས་རྒྱལ་མཚན།

༢ ངྷ་ས་ས་གནས་གྲོས་ཚོགས་ཀྱི་ཚོགས་གཙོ་དགེ་འདུན་བསྟན་འཛིན།

༣ ལོ་རྒྱུས་ཉམས་ཞིབ་པ་འགུ་ལོག་དམ་ཆོས་དཔལ་བཟང༌།

༤ བོད་ཀྱི་དབུས་གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར།

༥ ལོ་རྒྱུས་ཉམས་ཞིབ་པ་མཁན་པོ་འཇུ་བསྟན་སྐྱོང༌།

༦ ནོར་གླིང་མཐོ་སློབ་འགན་འཛིན་སྒྲོལ་དཀར་སྐྱབས།

༧ བོད་ཀྱི་དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་གངས་ལྷ་མོ།

༨ རང་དབང་རྩོམ་པ་པོ་བོན་རྒྱ་བསྟན་འཛིན་རབ་རྒྱས།

༩ བོད་ཀྱི་བང་ཆེན་གསར་འགོད་པ་ལི་ཐང་འཇམ་དབྱངས་བཟོད་པ།

༡༠ ཆབ་སྲིད་བཙོན་ཟུར་དང་སྒྱུ་རྩལ་བ་མགོ་ལོག་ཟླ་པེ།

༡༡ དབུ་མའི་ལམ་མི་མང་ལས་འགུལ་ཁང་གི་དྲུང་ཆེ་རྨོག་རུ་བསྟན་པ།

༡༢ མདོ་སྨད་དབུས་རྒྱུན་ཚོགས་གཞོན་མགོན་པོ་དོན་འགྲུབ།

༡༣ བགྲོ་གླེང་གོ་སྒྲིག་པ་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ།

༡༤ བོད་ཀྱི་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་གྲགས།

༡༥ བོད་ཀྱི་དུས་བབ་གསར་འགོད་པ་ཟུར་བ་ཨ་རིག་འགྱུར་མེད།

༡༦ དགུ་བཅུ་གསུམ་ལས་འགུལ་ཚོགས་པའི་སློབ་སྤྱི་ལྷ་ཆབ་སྦྱིན་པ།

ཟུར་ཉན་པ། སཱ་ར་བོད་ཀྱི་མཐོ་རིམ་སློབ་གཉེར་ཁག་གི་སློབ་མ་ཁག་ཅིག་དང༌། ནོར་གླིང་མཐོ་སློབ་ཀྱི་སློབ་མ་ཁག་ཅིག དེ་བཞིན་དུ་མཚན་ཉིད་གྲྭ་ཚང་དང༌། ཤེས་རབ་དགའ་ཚལ་སློབ་གླིང་གི་སློབ་མ་ཁག་ཅིག དྷ་ས་དང༌། ལྷོ་ཕྱོགས་མོན་གྷོ་ཊི། ནོར་གླིང་སོགས་ནས་ཕེབས་པའི་མི་སྣ་སོགས་ཁྱོན་བསྡོམས་བཅུ་ཕྲག་བཞི་ལྷག་འདུག དེའི་ནང་ནས་ཟུར་ཉན་པ་བཅུ་ཕྲག་གཉིས་ལྷག་གིས་བསམ་ཚུལ་གསུང་ཡོད།

ངོ་བཤུས།

སྐུ་སྒེར་ཡིག་ཚང༌།

བཀའ་ཤག

གཞུང་འབྲེལ་མ་ཡིན་པའི་ཚོགས་སྡེ་ཁག་དང༌།

གནད་ཡོད་མི་སྣ་ཁག

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:
བསམ་ཚུལ། (1)
1 ༢༣༢༠༡༡༡༧༣༨
༧གོང་ས་མཆོག་གིས་བཀའ་སློབ་ཕྲ་ཞིང་ཞིབ་པ་གནང་བ་དེར་གཞུང་མང་ཚང་མས་དང་ལེན་ཞུ་དགོས་ཀྱི་འདུག ད་ལྟ་ནས་སྦྱོང་བརྡར་བྱེད་དགོས།་གལ་ཏེ་ནོར་འཁྲུལ་རིགས་ཐོན་ནའང་༧གོང་ས་མཆོག་གིས་ཐུགས་རྗེའི་ལམ་སྟོན་གནང་རྒྱུ་ཡིན་པས་བསམ་བློ་རྒྱ་ཆེ་ས་ནས་བཞེད་དགོས། སླར་ཡང་ལོ་རྒྱུས་ཀྱི་སྐྱོ་གར་གཉིས་པ་ཞིག་བོད་མི་རྩམ་གཟན་ཡོངས་ཀྱིས་མཐོང་ཐོས་རྩ་བ་ནས་མེད། དེར་བརྟེན་ང་ཚོས་མི་རྙིང་པ་ལ་བསམ་བློ་གསར་པ་ཟེར་བ་ལྟར་རང་གི་གོ་གནས་ཁོ་ནར་ཐུགས་བསམ་མ་བཞེད་པར་སྔར་བས་འབད་བརྩོན་བྱེད་དགོས་ཀྱི་འདུག



བརྗོད་གཞི་གཞན་ཁག་ལ་གཟིགས།