སྔ་འགྱུར་སྨོན་ལམ་ཆེན་མོ་དབུ་འཛུགས་གནང་བ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ། ཕྱི་ལོ་༢༠༡༡ཟླ་༢ཚེས་༥ཉིན། ཁ་སང་བོད་ཟླ་༡༢་༡་ཕྱི་ཟླ་༢་༣་ཉིན་དཔལ་གསང་ཆེན་(སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་༢༢ པ་)དེ་གནས་མཆོག་རྡོ་རྗེ་གདན་དུ་དབུ་འཛུགས་ཀྱིས་འཚོགས་གནང་སོང༌།

སྔ་འགྱུར་རྙིང་མའི་སྨོན་ལམ་ཆེན་མོ་ནི་ཐོག་མ་དར་ཐང་མཆོག་སྤྲུལ་རིན་པོ་ཆེས་དབུ་བཙུགས་པ་དང༌། དེ་ནས་དཔལ་སྔ་འགྱུར་རྙིང་མའི་དབུ་འཛིན་གསུམ་པ ྋསྐྱབས་རྗེ་ྋགྲུབ་དབང་པད་ནོར་རིན་པོ་ཆེ་དང༌། ལ་དྭགས་ཆོས་རྗེ་རིན་པོ་ཆེ་སོགས་ཀྱིས་མཐུན་འགྱུར་རོགས་དན་གནང་བ་ལ་བརྟེན་ནས། ད་བར་སྨོན་ལམ་འཚོགས་ཐེངས་༢༢ བར་སོང་ཟིན།

སྤྱིར་སྨོན་ལམ་ཆེན་མོ་འདི་འཚོགས་དུས། རྡོ་རྗེ་གདན་མཆོད་རྟེན་རིན་པོ་ཆེའི་ཕྱོགས་བཞིར་སྐོར་ནས་འཚོགས་ཀྱིན་ཡོད་པ་ནི། ༡་ཤར་ཕྱོགས་སུ་བཙུན་དགོན་མཚོ་རྒྱལ་བཤད་སྒྲུབ་གླིང་གིས་དབུས་བཙུན་མའི་སྡེ་དང༌། ༢་ལྷོ་ཕྱོགས་སུ་རྫོགས་ཆེན་དགོན། ཞེ་ཆེན་དགོན། སྨིན་གྲོལ་གླིང༌། རྡོ་རྗེ་བྲག་སོགས་དང༌། ༣་ནུབ་ཕྱོགས་སུ་རྣམ་གྲོལ་གླིང༌། ༤་བྱང་ཕྱོགས་སུ་སྔགས་པའི་སྡེ་བཅས་ཁག་བགོས་གནང་ཡོད།

འདི་ལོར་སྔ་འགྱུར་སྨོན་ལམ་ཆེན་མོའི་ཚོགས་མགོན་དུ་ཤར་ཕྱོགས་སུ་མཁན་ཆེན་པདྨ་ཤེས་རབ། ལྷོ་ཕྱོགས་སུ་ྋསྐྱབས་རྗེ་དིལ་མགོ་མཁྱེན་བརྩེ་རིན་པོའི་ཡང་སྲིད་དང༌། ཞེ་ཆེན་རབ་འབྱམས། སྨིན་གླིང་མཁན་ཆེན། ནུབ་ཕྱོགས་ྋསྐྱབས་རྗེ་པད་ནོར་རིན་པོའི་བཞུགས་ཁྲིའི་ཐོག་སྐུ་པར་མཐོང་གྲོལ་རིན་པོའི་གཡས་སུ། གྱང་ཁང་སྤྲུལ་སྐུ་དང༌། གཡོན་དུ་རྨུགས་སངས་སྤྲུལ་སྐུ། བྱང་ཕྱོགས་སུ་ྋསྐྱབས་རྗེ་བདུད་འཇོམས་རིན་པོའི་ཡང་སྲིད་དང༌། ནམ་མཁའ་རིན་པོ་ཆེ་བཅས་ཕེབས་ཡོད་པ་རེད།

དེ་བཞིན་ལོ་ལྟར་གདན་ས་རྣམ་གྲོལ་གླིང་ནས་སྨོན་ལམ་འཚོགས་མཁན་གྲྭ་བཙུན་ཉིས་སྟོང་རེ་ཕེབས་ཀྱིན་ཡོད་པ་དང༌། འདི་ལོ་ཚོགས་ཞུགས་དགེ་འདུན་པའི་སྡེ་དང་བཙུན་མའི་སྡེ་བཅས་ཡང་བསྡོམས་༦༠༠༠ ཡན་མན་ཙམ་ཡོད་ཚུལ་བཤད་ཀྱིན་འདུག་ལ། ད་ལོའི་སྨོན་ལམ་ཆེན་མོའི་སྦྱིན་བདག་ནི་ཞེ་ཆེན་དགོན་པའི་སྡེ་དགེ་མཁན་པོ་རེད་ཅེས་སྨོན་ལམ་ལས་བྱེད་པ་ཞིག་གིས་གསུངས་སོང༌།

དམིགས་བསལ་འདི་ལོ་སྨོན་ལམ་ཆེན་མོ་ཉིན་གྲངས་བཅུ་གཅིག་འཚོགས་རྒྱུ་ཡིན་འདུག  ནམ་རྒྱུན་བོད་ཟླ་༡༢་༡་ནས་ཚེས་༡༠བར་འཚོགས་ཀྱིན་ཡོད་ལ། འདི་ལོར་བོད་ཚེས་གཉིས་པ་གཉིས་ཡོད་པར་བརྟེན་བོད་ཚེས་༡༠ པ་བར་ཉིན་གྲངས་བཅུ་གཅིག་ཆགས་ཀྱིན་ཡོད་འདུག སྨོན་ལམ་ཆེན་མོ་ཚར་བའི་ཉིན་མོ་ནི། འདི་ཟླའི་ཕྱི་ཚེས་༡༣ ཉིན་ཁེལ་ཡོད་ལ། ཉིན་དེ་ནི་ཆུ་སྒང་དབུས་རྒྱུན་གྱི་སྔོན་འགྲོའི་འོས་བསྡུའི་དུས་ཚོད་དེ་ཡིན་འདུག

གནས་མཆོག་རྡོ་རྗེ་གདན་ནས་སློབ་དཔོན་འཆང་ར་དྲི་མེད་རྒྱལ་མཚན་གྱིས་གནས་ཚུལ་མཁོ་སྤྲོད་གནང༌།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།