བཀའ་བློན་ཁྲི་པའི་བགྲོ་གླེང་ཆེན་མོ་གོ་སྒྲིག་བྱ་རྒྱུ་ཡིན་ཟེར།
ཤམ་བྷ་ལའི་ཕོ་ཉ། ཕྱི་ལོ་༢༠༡༠ཟླ་༨ཚེས་༡༤ཉིན། འདི་ལོ་ཕྱི་ཟླ་༩་པ་ཚེས་༣ཉིན་རྒྱ་གར་ལྷོ་ཕྱོགས་བྷེ་ཀོ་གཞིས་གྲོང་དུ་བོད་མི་ཁག་ཅིག་གིས་དང་བླངས་ཐོག ༼བཀའ་ཁྲིའི་བགྲོ་གླེང་ཆེན་མོ་༽ཟེར་བ་བཀའ་བློན་ཁྲི་པའི་འོས་མི་ལྔས་བགྲོ་གླེང་འགྲན་སྡུར་ཞིག་གོ་སྒྲིག་བྱ་འཆར་ཡོད་སྐོར་གསར་འགོད་གསལ་བསྒྲགས་བྱས་འདུག
དེ་ཡང་ཁ་སང་ཕྱི་ཚེས་༡༣ཉིན་རྒྱ་གར་ལྷོ་ཕྱོགས་བྷེ་ཀོ་རུ་བོད་མི་དང་བླངས་བ་ཁག་ཅིག་གིས། མ་འོངས་སྐབས་༣པའི་བཀའ་བློན་ཁྲི་པའི་སྔོན་འགྲོ་བའི་འོས་བསྡུ་དེ་ཟླ་བ་༡ཙམ་ལས་མེད་པའི་སོ་མཚམས་ཏེ། ཟླ་རྗེས་མའི་ཚེས་༣ཉིན་༼བཀའ་ཁྲིའི་བགྲོ་གླེང་ཆེན་མོ་༽ཟེར་བ་ཞིག་གོ་སྒྲིག་བྱས་ཡོད་པ་དང༌། སྐབས་དེར་བཀའ་བློན་ཁྲི་པའི་འོས་མི་ལྔས་བགྲོ་གླེང་འགྲན་སྡུར་ཞིག་བྱ་རྒྱུ་ཡིན་པའི་གསར་འགོད་གསལ་བསྒྲགས་ཤིག་བྱས་འདུག
གསར་འགོད་གསལ་བསྒྲགས་ཐོག་དང་བླངས་བགྲོ་གླེང་གོ་སྒྲིག་ཚོགས་ཆུང་གི་མགྲིན་ཚབ་པ་སྐུ་ཞབས་བློ་བཟང་རྡོ་རྗེ་ལགས་ཀྱིས། ༧གོང་ས་སྐྱབས་མགོན་ཆེན་པོ་མཆོག་ནི་འདི་ལོ་དགུངས་གྲངས་༧༥ཕེབས་ནས་ད་ལྟ་བགྲེས་ཡོལ་ལྟ་བུ་བཞུགས་ཡོད་པ་དང༌། ད་ལྟའི་ཆར་ཆབ་སྲིད་དང་བཙན་བྱོལ་བོད་མིའི་ལས་དོན་མང་ཆེ་བ་མི་མང་གིས་བདམས་པའི་བཀའ་བློན་ཁྲི་པས་ཐུགས་འགན་བཞེས་དགོས་ཀྱི་ཡོད་པ་རེད། དེར་བརྟེན་བཀའ་བློན་ཁྲི་པ་ནི་བཙན་བྱོལ་བོད་གཞུང་གི་ཆབ་སྲིད་ཀྱི་དབུ་ཁྲིད་གཅིག་པུར་ངོས་འཛིན་རྒྱུ་མེད་པ། དེ་ནི་མང་གཙོ་དང་ང་ཚོས་གྲ་སྒྲིག་སྡུག་ས་ནས་བྱེད་དགོས་ཀྱི་ཡོད་པ་རེད། བཀའ་བློན་ཁྲི་པ་དེས་མི་མང་གི་མངོན་འདོད་སྒྲུབ་ཐུབ་མིན་གཞི་རྩའི་འགན་ནི་མི་མང་ཚོར་ཡོད་པ་རེད་ཅེས་གསུངས་འདུག
ཡང་གསར་འགོད་གསལ་བསྒྲགས་ཐོག་བཀའ་བློན་ཁྲི་པའི་འོས་མི་འདེམས་སྟངས་སྐོར་བཀའ་འདྲི་ཞུས་པར་བློ་བཟང་རྡོ་རྗེ་ལགས་ཀྱིས་དྲི་བར་ལན་འདེབས་གནང་དོན། ང་ཚོ་གོ་སྒྲིག་པ་ཚོས་བཀའ་བློན་ཁྲི་པ་འོས་མིར་འདོན་མཁན་དམིགས་བསལ་ཚོགས་པ་དང་སྐྱིད་སྡུག་ཁག་ལ་འབྲེལ་བ་ཐོག མ་འོངས་བཀའ་བློན་ཁྲི་པར་རེ་བ་ཡོད་པའི་ཁྱོན་མི་སྣ་༡༣ཙམ་ལ་འབྲེལ་བ་བྱས་ཀྱང༌། དངོས་སུ་བཀའ་བློན་ཁྲི་པའི་འོས་མི་གྲངས་༥ལས་ལག་སོན་བྱུང་མ་སོང༌། དེ་དག་ནི་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་དང༌། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག དེ་བཞིན་མཁས་དབང་བློ་བཟང་སེངྒེ་ལགས་དང༌། གོ་འཇོ་མཁོ་ལྷ་ཚང་བསོད་རྣམ་སྟོབས་རྒྱལ་བཅས་རེད་ཅེས་འགྲེལ་བརྗོད་གནང་འདུག
བཀའ་ཁྲིའི་བགྲོ་གླེང་ཆེན་མོ་གོ་སྒྲིག་བྱེད་མཁན་ནི། བོད་ཀྱི་གཞོན་ནུ་ལྷན་ཚོགས་ཀྱི་གཙོ་གཞོན་ཟུར་པ་བློ་བཟང་ཡེ་ཤེས་ལགས་དང༌། སྤྱི་ཟུར་པདྨ་བདེ་ལེགས། སྔོན་མ་བྷེ་ཀོ་ལུགས་ཟུང་གི་སྐུ་ཚབ་སྐུ་ཞབས་བཀྲ་ཤིས་དབང་འདུས་ལགས། སོགས་ལྷོ་ཕྱོགས་དགོན་སྡེ་ཁག་གི་གྲྭ་པ་དགེ་བཤེས་དང་གསར་འགོད་པ་བཅས་ཁྱོན་མི་གྲངས་༡༢ཙམ་ཡོད་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་སངས་རྒྱས་ཀྱིས་ཕབ་བསྒྱུར་བྱས།།
མཁས་དབང་བློ་བཟང་སེང་གེ་དང་ཚོགས་གཙོ་སྐུ་ངོ་སྤེན་པ་ཚེ་རིང་གཉིས་ཀྱི་ནང་དུ་འདམ་ཀ་བྱས་ནས་དེ་གཉིས་ཀྱི་གཅིག་ལ་འོས་ཤོག་འཕེན་དགོས།
རྒྱ་གཞུང་ལ་མགོ་འདོག་་བྱེད་ཐག་གཅོད་ཡིན་།
གང་ཡིན་ཞེ་ན་།
མི་ངན་འདི་ཚོའི་འོག་ཏུ་བདེ་སྐྱིད་ཞིག་ཇི་ལྟར་ཐོབ་སྲིད་།