སྨན་རིའི་དགེ་བཤེས་མཛད་སྒོ་ཐེངས་བཅོ་ལྔ་པ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

ཤམ་བྷ་ལའི་ཕོ་ཉ་དྲ་བ། ཕྱི་ལོ་༢༠༡༠ལོའི་ཟླ་༢པའི་ཚེས་༡༨ཉིན། རྒྱ་གར་བྱང་ཕྱོགས་ཧི་མ་ཅལ་མངའ་ཁོངས་སུ་ཡོད་པའི་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དགེ་བཤེས་མཛད་སྒོ་ཐེངས་བཅོ་ལྔ་པ་དེ་ ༢༠༡༠ ཟླ་ ༢ ཚེས་ ༡༧ ནས་དངོས་སུ་དབུ་འཛུགས་ཀྱིས་ཟླ་ ༣ ཚེས་ ༡ ཉིན་མཇུག་བསྒྲིལ་རྒྱུ་ཡིན་པ་རེད།

དེ་ཡང་ ༢༠༡༠ ཟླ་ ༢ ཚེས་ ༡༧ བོད་ལྕགས་སྟག་ལོའི་བོད་ཟླ་དང་པོའི་ཚེས་ ༣ ཉིན་གྱི་ཞོགས་པ་ཞྭ་དཀར་གཡུང་དྲུང་བོན་གྱི་བསྟན་པའི་མངའ་བདག་ྋསྐྱབས་རྗེ་སྨན་རིའི་ཁྲི་འཛིན་སོ་གསུམ་པ་རིན་པོ་ཆེ་མཆོག་དང༌། ྋསྐྱབས་རྗེ་སྨན་རིའི་དཔོན་སློབ་འཕྲིན་ལས་ཉི་མ་རིན་པོ་ཆེ་རྣམ་གཉིས་དབུ་བཞུགས་ཀྱིས་གཡུང་དྲུང་བསྟན་པའི་བཀའ་སྲུང་རྣམས་ཀྱི་དབུ་འཕང་དགུང་ལ་བསྟོད་ཅིང་དཀར་ཕྱོགས་སྐྱོང་བའི་མགྲོན་བཞིའི་སྡེ་ཚོགས་རྣམས་ལ་བསང་གསོལ་རྒྱས་འབུལ་གནང་རྗེས་དཔལ་གཤེན་བསྟན་སྨན་རིའི་གླིང་གི་གཙུག་ལག་ཁང་ཆེན་མོར་དགེ་བཤེས་མཛད་སྒོ་དངོས་སུ་དབུ་འཛུགས་ཀྱིས་དགེ་འདུན་འདུས་མང་གི་ཚོགས་དབུས་སུ་ྋསྐྱབས་རྗེ་སྨན་རིའི་དཔོན་སློབ་འཕྲིན་ལས་ཉི་མ་རིན་པོ་ཆེས་གཡུང་དྲུང་བོན་གྱི་མདོ་སྔགས་སེམས་གསུམ་གྱི་གཞུང་བཤད་དང།  བཀའ་རབ་འབྱམས་པ་གཉིས་ནས་སྔོན་འགྲོའི་བཤད་པ་གྱེར་རྒྱུགས། གུང་ཡོལ་བཤད་པ་མཇུག་བསྡུ་དང༌། བཀྲ་ཤིས་གསོལ་བ་བཅས་ཀྱི་མཛད་རིམ་བསྐྱངས། དེ་རྗེས་མུ་མཐུད་བཀའ་རམས་པ་དགུ་དང། ཁྱོན་འདི་ལོ་བཀའ་རམས་པ་བཅུ་གཅིག་ནས་ཉིན་རིམ་བཞིན་སྔོན་འགྲོའི་བཤད་པ་དང། དངོས་གཞིའི་དམ་བཅའ་ཆེན་མོ། མཐར་རབ་འབྱམས་དགེ་བའི་བཤེས་གཉེན་གྱི་མཚན་རྟགས་བཞེས་གནང་མཛད་རྒྱུ་ཡིན་པ་རེད། དགེ་བཤེས་མཛད་སྒོ་ཆ་ཚང་རིང་ྋསྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་དབུ་བཞུགས་གནང་རྒྱུ་ཡིན་པ་དང༌། བཀའ་རམས་པ་རྣམས་ཀྱིས་དགེ་འདུན་འདུས་ཚོགས་ལ་བསྙེན་བཀུར་དང་གཏོང་སྒོ་སོགས་རྒྱས་འབུལ་གནང་བཞིན་ཡོད་པ་རེད།

༡༩༥༩ ལོར་བོད་གངས་ཅན་ཞིང་གི་སྣོད་བཅུད་ཡོངས་རྫོགས་ལ་ཉམས་གུད་བཏང་རྗེས་ྋསྐྱབས་རྗེ་སྨན་རིའི་ཁྲི་འཛིན་སོ་གསུམ་པ་མཆོག་དང། ཡོངས་འཛིན་དཔོན་སློབ་བསྟན་འཛིན་རྣམ་དག་རིན་པོ་ཆེ་རྣམ་གཉིས་ཀྱིས་རྒྱལ་གཤེན་བསྟན་པའི་མེ་རོ་ཕྱི་ཕྱོགས་ནས་གསོས་ཏེ་དཔལ་གཤེན་བསྟན་སྨན་རིའི་གླིང་གི་རྟེན་དང་བརྟེན་པ་གསར་བཞེངས་དང། སྔར་སྲོལ་བོན་གྱི་མདོ་སྔགས་སེམས་གསུམ་དང། ཐུན་མོང་རིག་གནས་བཅས་པར་གསན་བསམ་སློབ་གཉེར་གྱི་ལམ་སྲོལ་བསྐྱར་གསོ་གནང་རྗེས་ ༡༩༨༦ ལོ་ནས་བཟུང་སྡེ་ལོ་གཉིས་རེའི་མཚམས་བསླབ་པ་མཐར་སོན་རབ་འབྱམས་དགེ་བའི་བཤེས་གཉེན་གྱི་མཛད་སྒོ་བསྐྱངས་གནང་གིས་ད་བར་རབ་འབྱམས་དགེ་བའི་བཤེས་གཉེན་བརྒྱ་ཕྲག་གཅིག་ལ་ཉེ་བ་ཐོན་ཟིན་ཏེ་བོད་ཕྱི་ནང་གང་སར་རྒྱལ་བསྟན་ལ་ཞབས་འདེགས་ཞུ་བཞིན་པ་རྣམས་ཀྱི་འབྲས་རྟགས་ཕྱག་འཁྱེར་ཐོག་ྋགོང་ས་མཆོག་གི་སྐུ་ཚབ་རང་གཞུང་ཆོས་རིག་བཀའ་བློན་ནས་ཀྱང་རྒྱབ་གཉེར་ཕྱག་རྟགས་བསྐྱོན་བཞིན་ཡོད་པ་བཅས།།

གསར་འགྱུར་མཁོ་སྤྲོད་པ་ཁྱུངཿསྨོན་ལམ།

 

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།