དགོངས་ཚུལ།

རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པའི་བསྒྲགས་གཏམ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༧ལོའི་ཟླ་༨ཚེས་༢༤ཉིན་སྤེལ། རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་དེ་བཞིན་ཟླ་འདིའི་ཚེས་༢༡ནས་༢༣བར་ཧྥ་རན་སིའི་རྒྱལ་ས་པེ་རི་སིར་སྐོང་འཚོགས་གནང་སྟེ་བོད་རང་བཙན་སླར་གསོ་ཡོང་ཐབས་སོགས་ཀྱི་སྐོར་བགྲོད་གླེང་གནང་ཡོད་ཅིང༌། ཚོགས་ཆེན་གྱི་མཇུག་བསྡོམས་སུ་བསྒྲགས་གཏམ་ཞིག་སྤེལ་འདུག

Fourth-International-Rangzen-Conference-Paris-France-2017བོད་རང་བཙན་ཚོགས་ཆེན་དེར་ནམ་རྒྱུན་བོད་རང་བཙན་སྐོར་འཆད་རྩོད་རྩོམ་གསུམ་གནང་མཁན་གྱི་མི་སྣ་ཁག་གིས་གཙོས་བོད་རང་བཙན་ལ་དོ་གཉེར་ཡོད་པའི་བོད་མི་གཞོན་སྐྱེས་ཁག་ཅིག དེ་བཞིན་ཤར་ཏུར་ཀི་སི་ཐན་རང་བཙན་རྩོད་མཁན་དང་རྒྱ་ནག་གི་མང་གཙོ་དོན་གཉེར་བ། གཞན་ཡང་བོད་མི་སྤྱི་འཐུས་ཁག་ཅིག་བཅས་ལྷན་ཞུགས་གནང་སྟེ་མང་པོ་ཞིག་གིས་བོད་རང་བཙན་གྱི་ཐོག་གཏམ་བཤད་གནང་ཡོད་པ་རེད།

བོད་རང་བཙན་དོན་གཉེར་བ་དང་རྩོམ་པ་པོ་གྲགས་ཅན་འཇམ་དབྱངས་ནོར་བུ་ལགས་ཚོགས་ཆེན་དེར་དངོས་སུ་བཅར་ཐུབ་མེད་ཀྱང་ཁོང་གིས་འཚམས་འདྲིའི་བརྙན་ཐུང་ཞིག་ཚོགས་ཞུགས་པ་རྣམས་ལ་བཏང་ཡོད་པ་དང༌། དེར་ཁོང་གིས་ཕན་གནོན་འདྲེན་ཐུབ་པའི་བོད་རང་བཙན་གྱི་ཚོགས་པ་ཞིག་བཙུགས་དགོས་པ་མ་ཟད། དེ་ཡང་བོད་རང་བཅན་དང་འབྲེལ་བའི་ལས་དོན་དང་ལས་འགུལ་ཁག་ལག་བསྟར་དོན་ཁྱོལ་རང་བཞིན་ལྡན་པ་དང༌། ད་དུང་བོད་རང་བཙན་དང་ལྷག་དོན་དུ་བོད་མིའི་རང་ལུས་མེར་བསྲེགས་གནང་བཞིན་པ་འབྲེལ་བའི་དྲིལ་བསྒྲགས་ཁག་གཞི་རྒྱ་ཆེན་པོ་ཁྱབ་སྤེལ་ཆེད་ལས་ཁུངས་དེས་གསར་ཤོག་དང་ལོ་རྒྱུས་ཀྱི་དུས་དེབ། རླུང་འཕྲིན་ཁང་སོགས་གསར་འཛུགས་ཡོང་ཐབས་སྐོར་ཚོགས་ཐོག་ཏུ་གྲོས་མོལ་ཡོང་བའི་འབོད་སྐུལ་ཞུས་འདུག

ཚོགས་ཆེན་ཐོག་བསྒྲགས་གཏམ་སྤེལ་བའི་ནང་དུ་བཀོད་གནང་དོན། བོད་ནི་རི་མཐོ་ས་གཙང༌། ཤར་གླིང་གི་ཆུ་བོ་ཕལ་མོ་ཆེའི་འབྱུང་ཁུངས་སུ་གྲགས་ལ། ས་ཁྱོན་ཆེ་ཞིང༌། ལྷག་ཏུ་ཕྱི་ལོ་བརྒྱ་ཕྲག་དྲུག་པ་ཙམ་ནས་བརྒྱ་ཕྲག་བརྒྱད་པའི་གཡས་གཡོན་ཏུ་དབུས་ཤར་གླིང་གི་ཁུལ་དུ་དམག་ཤུགས་ཆེ་ཤོས་ཀྱི་རྒྱལ་ཁབ་ཅིག་གི་གནས་བབས་བཟུང་མྱོང་བ་མ་ཟད། བཟོ་རྩལ་སོགས་སྤྱི་ཚོགས་དཔལ་ཡོན་གྱི་འཕེལ་རྒྱས་མྱུར་ཞིང་རྒྱས་པོར་བྱུང་ཡོད་པ་ནི་སྔོན་བྱུང་ལོ་རྒྱུས་སུ་གསལ་པོར་ཡོད།

ལོ་རྒྱུས་ཀྱི་འཕོ་འགྱུར་ཁྲོད་བོད་མི་རྣམས་འཛམ་གླིང་རྒྱལ་སྤྱིའི་ཁྲོད་ནས་ཟུར་སྡོད་ཀྱིས་རྒྱུན་རིང་གནས་པ་དང༌། བར་ལམ་ནས་རྒྱ་ནག་དམར་པོའི་སྲིད་གཞུང་གིས་བཙན་འཛུལ་དབང་བསྒྱུར་བྱས་ཏེ། བོད་ཀྱི་སྣོད་བཅུད་གཉིས་ཀར་གཏོར་རྒོལ་ཚད་ལས་འདས་པ་བྱས་ཤིང༌། ལྷག་པར་རྒྱ་ནག་གིས་མི་སེར་སྤེལ་ཡུལ་དང་གཉའ་གནོན་བྱེད་ཡུལ་གྱི་གནས་སུ་བསྒྱུར་བའི་བརྒྱུད་རིམ་ཁྲོད་བོད་མི་རིགས་རིག་གནས་དང་བཅས་པ་རྩ་མེད་དུ་གཏོང་བར་བརྩམས་དང་རྩོམ་བཞིན་ཡོད་པར་བརྟེན། དུས་རབས་ཕྱེད་ལྷག་གི་རིང་ལ་ཐ་ན་བོད་ཀྱི་གྲོང་ཁྱེར་ཆེ་ཁག་ཏུ་རང་ཡུལ་ནས་རང་ཉིད་གྲངས་ཉུང་མི་རིགས་སུ་བསྒྱུར་བཞིན་ཡོད་ནའང༌། བོད་མི་རྣམས་ལ་དོན་མེད་གཞན་གྱི་བརྙས་བཅོས་མི་ཁུར་པའི་གོམས་གཤིས་ཤིག་ཡོད་པར་བརྟེན། བོད་ཀྱི་བདག་དབང་འཐབ་རྩོད་ཀྱི་འདུ་ཤེས་བརླགས་མེད་ལ། བདེན་དོན་རྩོད་ལེན་གྱི་སྦྱོར་བ་གཏན་ནས་མཚམས་འཇོག་མྱོང་མེད།

ལྷག་པར་དེང་སྐབས་འཛམ་གླིང་གི་སྟོབས་ཆེན་རྒྱལ་ཁབ་ཏུ་གྲགས་པ་དེ་ཚོས་ཀྱང་རྒྱ་ནག་ལ་བསྟུན་མཁས་འགྲོགས་མཁས་བྱེད་དགོས་པའི་གནས་བབས་ཤིག་ཏུ་གྱུར་ཡོད་ཀྱང༌། བོད་ཀྱི་བདེན་དོན་འཐབ་རྩོད་བྱེད་པར་ཐ་ན་རང་ལུས་མེར་སྲེག་བྱེད་པར་ཡ་མི་ང་བར་རྩོད་བཞིན་ཡོད་པ་རེད་ལ། དེ་ལྟར་འཐབ་རྩོད་བྱེད་པ་དེ་ཡང་བོད་མི་རྣམས་མི་རེ་ངོ་རེ་ལ་འཁྲི་བའི་མི་རིགས་དང་དུས་བབ་ཀྱི་འགན་ཁུར་ཞིག་ཏུ་ལྟ་བཞིན་ཡོད་པས། ད་ཐེངས་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་འདི་ཡང་བོད་རང་བཙན་ནམ་བོད་རྒྱལ་ཁབ་སླར་གསོ་བྱ་བའི་ལས་འགུལ་ཞིག་ཡིན།

ཚོགས་ཆེན་འདིའི་ཐོག་ང་ཚོས་རྒྱ་ནག་མང་གཙོ་དོན་གཉེར་པ་དང༌། ཐའེ་ཝན། ལྷོ་སོག ཤར་ཏུར་ཀི་སི་ཐན་བཅས་ཀྱི་རང་དབང་རང་བཙན་རྩོད་ལེན་པ་ཁག་ཅིག་དང་མཉམ་དུ་སོ་སོའི་མངོན་འདོད་རྩོད་ལེན་བྱེད་ཕྱོགས་བསམ་ཚུལ་བརྗེ་རེས་དང༌། ནུས་པ་མཉམ་སྤུངས་ཇི་ལྟར་བྱེད་དགོས་མིན་སོགས་ཀྱི་ཐད་བགྲོ་གླེང་བྱས་ཏེ། ད་ལྟའི་རྒྱ་དམར་གཞུང་འདི་ནི་གྲོས་མོལ་དང་སྤྱི་ཆིངས་ཀྱི་ལམ་ནས་གནད་དོན་ཐག་གཅོད་བྱེད་པ་དང༌། དེ་ལ་ཁག་ཐེག་འགན་སྲུང་བྱེད་མཁན་གྱི་གཞུང་ཞིག་མིན་པ་ངོས་འཛིན་བྱུང་བ་དང༌། བོད་མི་ཚོགས་ཞུགས་པ་ནང་ཁུལ་དུ་བོད་རྒྱལ་ཁབ་སླར་གསོ་ཡོང་ཐབས་སྐོར་གྲོས་བསྡུར་བྱས་པ་ཡིན།

༡༽ བོད་དང་ཤར་ཏུར་ཀི་སི་ཐན། ལྷོ་སོག ཐའེ་ཝན་བཅས་ཀྱི་རང་བཙན་འཐབ་རྩོད་པ། རྒྱ་ནག་གི་མང་གཙོ་དོན་གཉེར་བ་བཅས་ཀྱིས་མ་འོངས་པར་སོ་སོའི་རྩ་དོན་འཐབ་རྩོད་ཀྱི་ཆེད་དུ་ནུས་པ་མཉམ་སྤུངས་དང་མཉམ་ལས་བྱ་རྒྱུར་མོས་མཐུན་བྱུང་ཡོད།
༢༽ ཚོགས་ཆེན་ཐོག་བོད་མི་དང༌། ལྷོ་སོག ཤར་ཏུར་ཀི་སི་ཐན། ཐའེ་ཝན་བཅས་རྒྱ་ནག་གི་དབང་བསྒྱུར་འོག་སྡོད་འདོད་མེད་པར་རྒྱལ་ཁབ་སླར་གསོ་དགོས་པ་དང༌། རྒྱ་ནག་མང་གཙོ་དོན་གཉེར་བ་རྣམས་ཀྱིས་རྒྱ་ནག་དམར་ཤོག་ཚོགས་པའི་དབང་བསྒྱུར་འོག་ནས་ཐར་དགོས་པར་གཅིག་གྱུར་གྱིས་ངོས་འཛིན་བྱས་ཡོད།

༣༽ མ་འོངས་པའི་སྐབས་ཤིག་ལ་ང་ཚོ་བོད་གཞུང་མང་གཉིས་ཀས་བོད་རང་བཙན་འཐབ་རྩོད་བྱ་བའི་ལངས་ཕྱོགས་གཅིག་གྱུར་དུ་ཡོང་སྲིད་པའི་ཚོད་དཔག་ཐུབ་པར་བརྟེན། ང་ཚོས་བོད་རང་བཙན་འཐབ་རྩོད་ཀྱི་གནད་དོན་མ་བརླགས་པ་དང༌། འཐབ་རྩོད་པའི་སོན་རྩ་སྐྱེད་སྲིང་བྱ་དགོས།

༤༽ རྒྱ་ནག་གི་བཙན་གནོན་འོག་ནས་འདས་གྲོངས་སུ་སོང་བ་དང༌། མནར་གཅོད་མྱངས་དང་མྱོང་བཞིན་མཁན། རང་ལུས་མེར་སྲེག་གི་ངོ་རྒོལ་བྱེད་མཁན་རྣམས་ཀྱི་འབོད་སྒྲ་དང་ཁ་ཆེམས་ནི་ཤུལ་ལྷག་ང་ཚོའི་རྩ་དོན་གྱི་ཆེད་དུ་ཡིན་པ་ངོས་ཟིན་པའི་ཐོག་ནས། ང་ཚོས་དེའི་ངོ་བོ་དང་རྣམ་པ་གང་ལ་ཡང་བསྒྱུར་བཅོས་མི་ཡོང་བར་བདག་ཉར་དང་ཁྱབ་སྤེལ་བྱ་རྒྱུའི་འགན་ཁུར་དགོས།

༥༽ བོད་རྒྱལ་ཁབ་རྒྱ་ནག་གིས་དབང་བསྒྱུར་བྱས་ནས་བཟུང༌། འཕགས་བོད་ས་མཚམས་ནི་རྒྱ་དཀར་ནག་གི་ས་མཚམས་ཡིན་པར་ངོས་འཛིན་ཐོག རྩོད་གླེང་རིམ་པ་བྱུང་ཡོད་ལ། ཉེ་བའི་ཆར་ནས་ས་མཚམས་དེ་རྩོད་རྙོག་ཆེ་རུ་འགྲོ་བཞིན་ཡོད་མོད། དེ་ནི་འཕགས་བོད་གཉིས་ཀྱི་ས་མཚམས་ཡིན་པས། དེའི་ཐོག་རྒྱ་ནག་ལ་རྩོད་གླེང་ཐག་གཅོད་བྱེད་རྒྱུའི་དབང་ཚད་མེད་ལ། བོད་རང་བཙན་སླར་གསོ་མ་ཐུབ་བར་དུ་ས་མཚམས་དེའི་རྩོད་རྙོག་ཐག་གཅོད་ཡོང་ཐབས་མེད་པར་ངོས་འཛིན་བྱེད་རྒྱུ་ཡིན།

མཐར་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་འདའ་ཁའི་ཞལ་ཆེམས་དང་ཐུགས་དགོངས་ཡོངས་སུ་འགྲུབ་སྟེ། ཤི་བོའི་ཁ་ཆེམས་དང་གསོན་པོའི་རེ་བ། བོད་རང་བཙན་རྒྱལ་ཁབ་ཀྱི་ཉི་མ་མྱུར་དུ་འཆར་བ་དང༌། ྋགོང་ས་ྋསྐྱབས་མགོན་ྋརྒྱལ་བ་རིན་པོ་ཆེའི་སྐུ་ཚེ་བརྟན་ཅིང་བཞེད་དགོངས་ཡོངས་སུ་འགྲུབ་པའི་སྨོན་འདུན་དང་བཅས། རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་ནས་ཕྱི་ལོ་ ༢༠༡༧ ཟླ་ ༠༨ ཚེས་ ༢༣ ཉིན། ཧྥ་རན་སིའི་རྒྱལ་ས་པེ་རེ་སི་ནས་སྤེལ། ། བོད་རྒྱལ་ལོ། ། ཞེས་བཀོད་གནང་འདུག

གསར་འགོད་པ་བསྟན་འཛིན་ནོར་རྒྱས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།