སྨན་རྩིས་ཁང་གི་སྨན་དུ་བརྫུས་ནས་བསླུ་ཁྲིད་བྱེད་ཀྱི་འདུག་ཟེར།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༧ལོའི་ཟླ་༧ཚེས་༡༩ཉིན་སྤེལ། འདི་ག་གསར་ཁང་དུ་བཏང་བའི་གནས་ཚུལ་ལ་གཞིགས་ན་བོད་སྨན་རྫུན་བཟོས་བྱས་ཏེ་བོད་ནང་གི་སྨན་རྩིས་ཁང་གི་སྨན་ཡིན་ཚུལ་གྱིས་སྣ་ཐོད་ལ་བརྒྱུད་ཚོང་སྒྱུར་བྱེད་བཞིན་ཡོད་པར་མང་ཚོགས་ནས་དོ་སྣང་དགོས་པའི་འབོད་སྐུལ་ཞུས་འདུག

Tibet-Medcine-2017དེ་ཡང་བཞུགས་སྒར་དུ་རྟེན་གཞི་བྱེད་ཡོད་པའི་སྨན་རྩིས་ཁང་གིས་ཡོངས་ཁྱབ་གསལ་བསྒྲགས་ཤིག་སྤེལ་ཡོད་པ་དང༌། དེའི་ནང་བཀོད་གནང་དོན། ༼ སྣ་ཐོད་ལ་བརྒྱུད་བོད་ནང་སྨན་རྩིས་ཁང་གི་སྨན་ཡིན་ཞེས་རྫུན་བཟོས་ཚོང་སྒྱུར་བྱེད་པར་མང་ཚོགས་ནས་དོ་སྣང་དགོས་པར་སྐུལ་འདེབས་ཞུ་རྒྱུ། ཞེས་དང༌། ༽

དྷ་ས་བོད་ཀྱི་སྨན་རྩིས་ཁང་གི་སྨན་དང༌། གསོ་རིག་ཐོན་དངོས་གཞན་རྣམས་དེ་སྔ་ལས་ཁྱོན་འབོར་གང་འཚམ་ཆེ་བ་འདོན་སྤེལ་བྱེད་ཀྱི་ཡོད་ནའང༌། སྨན་རྩིས་ཁང་གི་ཡན་ལག་སྨན་ཁང་སྔར་ལས་མང་དུ་ཕྱིན་པ་དང། དེ་དག་ནང་བསྟེན་གཏུགས་བྱེད་མཁན་ནད་པ་མང་དུ་སོང་བ། ཕྱིའི་རྒྱལ་ཁབ་ཁག་ཏུ་སྐོར་བསྐྱོད་བཅས་ཀྱིས་རྐྱེན་པས་སྨན་རྩིས་ཁང་གི་སྨན་གྱི་འགྲོ་ཤུགས་ཧ་ཅང་ཆེ་རུ་སོང་ཡོད་སྟབས་འདི་གར་སྨན་རིགས་མི་འདང་པའི་དཀའ་ངལ་ཡང་ཡང་འཕྲད་བཞིན་ཡོད་པས་གཞན་ལ་ཚོང་སྒྱུར་བྱ་རྒྱུ་དེ་བས་ག་ལ་ཡོང༌། ཞེས་བཀོད་འདུག

སྨན་རྩིས་ཁང་གི་སྨན་དང་ཐོན་དངོས་བཅས་ལ་མང་ཚོགས་ནས་གདེང་འཇོག་དང་ཡིད་ཆེས་ཚད་མཐོར་གནང་བཞིན་པའི་དུས་སྐབས་སུ། ངོ་ཚ་ཁྲེལ་གཞུང་མེད་པ་དཔལ་འབྱོར་ཁོ་ན་ལས་བསམ་མི་ཐུབ་པ་འགའ་ཞིག་གིས། སྨན་རྩིས་ཁང་གི་སྨན་སྦྱོར་ཁང་ནས་བཟོ་སྐྲུན་མ་བྱས་པའི་བོད་སྨན་རིགས་གཅིག་སྨན་རྩིས་ཁང་གི་སྨན་ཡིན་ཁུལ་བཤད་དེ་སྨན་རྩིས་ཁང་གི་མིང་བེད་སྤྱོད་ལོག་པ་གཏོང་ནས་སྣ་ཐོད་ལ་བརྒྱུད་བོད་ནང་ཚོང་འགྲེམས་ཀྱི་ཆེད་དུ་གཏོང་གི་ཡོད་པའི་གནས་ཚུལ་འདུག

དེའི་ཐད་འདི་ནས་རྩད་ཞིབ་བྱེད་བཞིན་པ་ཡིན་ལ། སྨན་རྩིས་ཁང་གི་སྨན་ཡིན་ཞེས་རྫུན་བཟོས་ཚོང་སྒྱུར་ར་འཕྲོད་བྱུང་ཚེ་འདི་ག་སྨན་རྩིས་ཁང་གི་ཡིག་ཚང་དུ་བརྡ་ལན་གནང་རོགས་ཞེས་འབོད་སྐུལ་ཞུ་རྒྱུ་ཡིན། དེ་ནི་རང་ངམ་རང་གི་ཕ་མ་གཉེན་ཚན་སོགས་ཀྱི་འཕྲོད་བསྟེན་དང་ཐད་ཀར་འབྲེལ་བའི་ཚབས་ཆེའི་བསླུ་ཁྲིད་ཀྱི་གནས་ཚུལ་ཞིག་ཡིན་པར་བརྟེན་ཚང་མས་དོགས་ཟོན་གནང་དགོས་གལ་ཆེན་པོ་ཡིན་པ་མ་ཟད། བོད་ཕྱི་ནང་གཉིས་ཀྱི་བོད་རིགས་རྒྱ་ཆེ་མང་ཚོགས་ནས་ཐུགས་སྣང་ཆེར་སྐྱེད་ཀྱིས་དུས་རྒྱུན་དུ་སྨན་རྩིས་ཁང་གི་སྨན་ཡིན་ཁུལ་གྱི་ཚོང་སྒྱུར་བྱེད་མཁན་རྣམས་ལ་དེ་མ་ཐག་ཡིད་ཆེས་མ་གནང་བར་རྩད་ཞིབ་བརྟག་དཔྱད་ངེས་པར་གནང་རོགས་ཞེས་ནན་ཏན་དུ་ཞུ་རྒྱུ་བཅས། སྨན་རྩིས་ཁང་ནས་ཕྱི་ལོ་ ༢༠༡༧ཟླ་༧ཚེས་༡༢ཉིན།། ཞེས་གསལ་བསྒྲགས་དེར་གསལ་འདུག་པ་བཅས།

གསར་འགོད་པ་བསྟན་འཛིན་ནོར་རྒྱས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།