ཝེ་ཐི་ནམ་གྱི་དགེ་སློང་མའི་སྡོམ་རྒྱུན་ལ་ཞིབ་འཇུག་བྱེད་དགོས།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༧།༡།༡༠ཉིན་སྤེལ། ཝེ་ཐི་ནམ་ནང་དགེ་སློང་མའི་སྡོམ་རྒྱུན་རྣམ་དག་བར་མ་ཆད་དུ་ཡོད་པ་རེད་ཅེས་ཤོད་མཁན་བྱུང་། དེ་ཚོ་གྲས་ཉམས་ཞིབ་བྱེད་དགོས་འདུག ཅེས་བཀའ་སྩལ་སོང་།

Tibet-His Holiness-2017རྡོར་གདན། དེ་ཡང་ཕྱི་ཚེས་ ༨ ཉིན༧གོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པའི་སྔོན་འགྲོའི་བཀའ་ཆོས་ཉིན་བཞི་པར་སྤྱོད་འཇུག་གི་བསྔོ་བའི་ལེའུ་ནང་གི་དགེ་སློང་མ་རྣམས་རྙེད་ལྡན་ཞིང་། འཐབ་དང་གནོད་པ་སྤོང་བར་ཤོག ། ཅེས་པ་ལས་འཕྲོས་ཏེ་བོད་པའི་བཙུན་མའི་ནང་དགེ་སློང་མ་བསྒྲུབ་རྒྱུ་དེ་འདུལ་བའི་འགྲོ་སྟངས་དང་མཐུན་པ་བྱས་ཏེ་འགྲོ་རྒྱུ་རེད་མ་གཏོགས། ངོས་ཀྱིས་ཐག་བཅད་ནས་བྱེད་ཐུབ་རྒྱུ་མི་འདུག ཅེས་བཀའ་སློབ་སྩལ་གནང་སོང་།

ཀུན་འདུས་མཆོག་གིས་དགེ་སློང་མ་དང་འབྲེལ་བཀའ་སློབ་འཕྲོས་དོན། འདུལ་བ་དང་མཐུན་པའི་ཐོག་འཁོར་རྣམ་བཞི་ཆ་ཚང་བ་ཞིག་གི་ཐོག་ནས་དགེ་སློང་མ་དགོས་རྒྱུ་གལ་ཆེན་པོ་རེད་མ་གཏོགས་རང་དགར་བྱས་ན་འགྲིག་གི་མ་རེད། དེ་སྔ་བོད་ལ་བླ་མ་སྐྱེས་བུ་དམ་པ་དེ་འདྲས་རང་གིས་མར་དགེ་སློང་བསྒྲུབ་པ་གནང་བ་དེ་འདྲ་བྱུང་ཡོད། འོན་ཀྱང་ཉེས་མེད་ཕུན་ཚོགས་ཆགས་དང་མ་ཆགས་ཟེར་བ་དེ་ཚོའི་གྲས་བསམ་བློ་གཏོང་དགོས་པ་ཞིག་རེད། འདུལ་བའི་སྡེ་པ་མི་འདྲ་བ་ཡོད་སྟབས། ང་ཚོའི་སྡོམ་རྒྱུན་གཞི་ཐམས་ཅད་ཡོད་པར་སྨྲ་བའི་སྡེ་པ་རེད། དེ་གའི་འགྲོ་སྟངས་ནས་འདུལ་བའི་གཞུང་གཞིར་བཞག་བྱས་ཏེ་འགྲོ་དགོས་པ་ཞིག་ཡིན་པར་བརྟེན། དེའི་སྐོར་ང་ཚོས་སྔར་ཕན་ཆད་ཐེངས་གང་ཙམ་ཚོགས་པ་རེད།

དེ་བཞིན་དེའི་སྐོར་ཐེ་ཝན་དང་འབར་མའི་འདུལ་བ་འཛིན་པ་དང་ལྷན་ཚོགས་འདུ་ཚོགས་པ་དེ་འདྲ་བྱུང་ཡོད། འོན་ཀྱང་གསལ་པོ་དང་དོགས་པ་ཆོད་པ་ཞིག་བྱུང་མེད། ངོས་ཀྱིས་བྱེད་ཐུབ་པ་དེ་བཙུན་མ་ཚོས་དཔེ་ཆ་བལྟ་རྒྱུ་དགོས་རེད། ཅེས་ལོ་བཞི་བཅུ་ཙམ་གྱིས་གོང་ནས་ངོས་ཀྱིས་འབོད་སྐུལ་བྱས་པ་ལྟར། བཙུན་མའི་དགོན་པ་ཁག་མང་པོ་ཞིག་གིས་གཞུང་ཆེན་བལྟས་ནས་ལོ་ཉི་ཤུའི་རྗེས་ད་ལོ་བཙུན་མའི་དགེ་བཤེས་མ་ཐོན་ཐུབ་པ་བྱུང་ཡོད།

TIbet-himalayan-2017ཉེ་ཆར་ང་ཚོས་རྟེན་འབྲེལ་བྱས་ཏེ་ཕལ་ཆེར་བོད་པའི་ལོ་རྒྱུས་ནང་ཐོག་མ་ལྟ་བུ་ཆགས་ཡོད།   བཙུན་མ་ཚོས་ལོ་ཉི་ཤུའི་རིང་དཔེ་ཆ་བལྟས་ནས་གཞུང་ཆེན་གྱི་སྦྱངས་པ་ཚད་ལོངས་པ་བྱུང་སྟེ་དགེ་བཤེས་མའི་ལག་འཁྱེར་སྤྲད་པ་ཡིན།  འདི་ངོས་ཀྱིས་ཐག་བཅད་དེ་བྱེད་ཐུབ་པ་ཞིག་རེད། དགེ་སློང་མ་དེ་འདུལ་བའི་གཞུང་དང་མཐུན་པ་བྱས་ཏེ། རིས་སུ་མ་ཆད་པའི་འདུལ་བ་འཛིན་པ་ཚོའི་དགོངས་པ་མཉམ་པ་ཞིག་བྱུང་ན་ཡག་པོ་རེད། གཞན་དེ་སྔ་བོད་པའི་ནང་པའི་ཆོས་ལ་བླ་མའི་ཆོས་ལུགས་ (Lamaism) ཞེས་མིང་ཐོག་ཡོད། བླ་མའི་ཆོས་ལུགས་བྱེད་མཁན་གྱིས་མི་བྱེད་དགུ་བྱེད་བྱེད་ཀྱི་འདུག་ཅེས་བརྗོད་མཁན་བྱུང་ན་ཡག་པོ་མེད། ཝེ་ཐི་ནམ་ནང་དགེ་སློང་མའི་སྡོམ་རྒྱུན་རྣམ་དག་བར་མ་ཆད་དུ་ཡོད་པ་རེད་ཅེས་ཤོད་མཁན་བྱུང་། དེ་ཚོ་གྲས་ཉམས་ཞིབ་བྱེད་དགོས་འདུག

Tibet-teaching Ground-2017རྒྱ་ནག་ལུགས་ཀྱི་དགེ་སློང་མའི་སྡོམ་རྒྱུན་དེ་རྒྱ་ནག་རང་གི་མཁན་པོ་ཚོས་ཕྲན་བུ་ཐེ་ཚོམ་བཟོ་འདྲ་གནང་གི་འདུག སྔོན་ལ་ང་ཚོས་དེ་ཚོའི་གྲས་མུ་མཐུད་ནས་ཉམས་ཞིབ་དང་སློབ་སྦྱོང་བྱེད་དགོས་པ་ཞིག་རེད། གང་ལྟར་དགེ་བཤེས་མ་ཐོན་ཐུབ་པ་བྱུང་བ་རེད། མ་འོངས་པར་དགེ་བཤེས་མ་མུ་མཐུད་ནས་ཡོང་ཐུབ་པ་ཞིག་དང་། རིམ་པས་བོད་དང་ཧི་མཱ་ལ་ཡའི་རི་རྒྱུད། རྒྱ་ནག་བཅས་ནས་དགེ་བཤེས་མ་ཐོན་ཐུབ་པ་ཞིག་བྱེད་དགོས་པ་བཅས་བཀའ་སློབ་གཟབ་རྒྱས་གནང་ཞིང་གསུང་ཆོས་མཇུག་གྲུབ་གནང་སོང་པ་བཅས།།

གསར་འགོད་པ་ཆོས་ཉིད་ཀྱིས་རྡོར་གདན་ནས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།