དགོངས་ཚུལ།

བྱམས་བརྩེ་དང་ཞི་བདེ་གོང་འཕེལ་གཏོང་ཐབས་གནང་དགོས།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༦།༠༡།༠༩ཉིན་སྤེལ། ངས་གོ་ཐོས་བྱུང་བ་ལྟར་ན་ལོ་ལྟར་རྒྱ་རིགས་ས་ཡ་མང་པོ་ཡུལ་སྐོར་སྤྲོ་འཆམ་པ་བྱས་ཏེ་འཛམ་གླིང་ཡོངས་ལ་འགྲོ་ཐུབ་ཀྱི་ཡོད། འོན་ཀྱང་བོད་མི་བརྒྱ་ཆ་ ༩༠ ལ་ཕྱིར་བསྐྱོད་ལག་འཁྱེར་སྤྲད་མེད་པ་ཐག་བཅད་ནས་བཤད་ཐུབ་པ་ཞིག་ཆགས་ཡོད། ཅེས་སྲིད་སྐྱོང་མཆོག་གིས་བརྗོད་སོང་།

Tibet-sekyong-2017རྡོར་གདན། ཁ་སང་ཕྱི་ཚེས་༨ཉིན་གྱི་ཚོུད་༡༡ཐོག དུས་དབང་ཐེངས་ ༣༤ པའི་སྔོན་འགྲོའི་གསུང་ཆོས་ཉིན་བཞི་པའི་སྐབས་སུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་དབུ་བཞུགས་ཐོག་དུས་དབང་གོ་སྒྲིག་ཚོགས་ཆུང་གི་ཚོགས་གཞོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། དེ་བཞིན་ཕྱི་ནང་གི་གསར་འགོད་པ་བཅས་མི་གྲངས་༥༠ལྷག་གསུང་ཆོས་ར་བའི་གསར་འགོད་ཁང་དུ་འཛོམས་སོང་།
དེ་རྗེས་དཔལ་ལྡན་སྲིད་སྐྱོང་མཆོག་གིས་གསར་འགོད་ལྷན་ཚོགས་ཀྱི་སྐོར་ནས་གསུང་དོན། གནས་མཆོག་འདིར་སྟོན་པ་སངས་རྒྱས་བཅོམ་ལྡན་འདས་མངོན་པར་རྫོགས་པ་སངས་རྒྱས་པའི་གནས་ཞིག་ཆགས་ཡོད་སྟབས། བོད་མིའི་སྒྲིག་འཛུགས་དང་ཡོན་བདག་ཁག་གཅིག་གིས་ཐེངས་འདིར་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་གོ་སྒྲིག་ཞུས་ཐུབ་པ་ནི་ཧ་ཅང་བསོད་ནམས་ཆེན་པོ་ཞིག་ལ་ངོས་འཛིན་ཞུ་བཞིན་ཡོད། ༸གོང་ས་མཆོག་གི་སྐུ་མདུན་ནས་བཀའ་ཆོས་ཞུ་རྒྱུའི་གོ་སྐབས་ཐོབ་མཁན་རྣམས་ནི་ཧ་ཅང་བསྐལ་པ་བཟང་པོ་ཞིག་རེད། འདིར་བཀའ་ཆོས་ཞུས་རྗེས་སེམས་དུལ་བའི་ཐོག་ནས་མི་བཟང་པོ་ཞིག་ཆགས་ཏེ་སོ་སོའི་གནས་ཡུལ་རྒྱལ་ཁབ་ཏུ་ཕྱིར་ལོག་རྗེས་འཛམ་གླིང་ནང་བྱམས་བརྩེ་དང་ཞི་བདེ་གོང་འཕེལ་གཏོང་ཐབས་གནང་དགོས། ཞེས་སོགས་གསུངས་པ་དང་འབྲེལ། སྲིད་སྐྱོང་མཆོག་གིས་སླར་ཡང་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུས་སོང་།

གཞན་ཡང་ད་ལོའི་དུས་བོད་ནང་གི་བོད་མི་རྣམས་བཀག་སྡོམ་དང་ཕེབས་པ་རྣམས་ཕྱི་ལོག་དགོས་པའི་སྐོར་ནས་གསར་འགོད་པས་དྲི་བ་ལན་བཏབ་བཏོན། རྒྱ་ནག་གཞུང་གིས་དེ་སྔ་ལོ་རྒྱུས་ཐོག་ནས་རྫུན་དང་ཧམ་བཤད་བྱས་ཏེ་བོད་བཙན་བཟུང་བྱས་པ་རེད། རྒྱ་ནག་གཞུང་གི་ད་ལན་གནས་མཇལ་དུ་ཕེབས་མཁན་བོད་མི་རྣམས་ལ་བཀག་བསྡོམས་་བྱས་མེད་ཟེར་བ་དེ། ཁུངས་ལུང་མེད་པའི་ཧམ་བཤད་རང་རེད། རྒྱ་གར་དང་བལ་ཡུལ་སོགས་སུ་གནས་སྐོར་དུ་ཡོང་མཁན་བོད་མི་སྟོང་ཕྲག་ཁ་ཤས་ཕེབས་ཡོད་པ་དེ་དག་དུས་དབང་འགོ་བཙུགས་པའི་མཚམས་དེར་ཕྱིར་ལོག་བྱེད་དགོས་པའི་གནས་སྟངས་ཆགས་པ་དེས། རྒྱ་ནག་གཞུང་ནས་དམ་བསྒྲགས་བྱས་པའི་དཔང་རྟགས་ཧ་ཅང་གསལ་པོ་ཡིན། རྒྱ་ནག་གཞུང་གིས་དུས་རྟག་ཏུ་བོད་མིར་ཆོས་དད་དང་གཏམ་བརྗོད་རང་དབང་ཡོད་ཅེས་ཤོད་བཞིན་ཡོད་ཀྱང་། དེ་ལས་ལྡོག་སྟེ་བོད་མི་རྣམས་རྒྱ་གར་སོགས་སུ་གནས་མཇལ་དུ་བསྐྱོད་ཆེད་ལོ་མང་ནས་ཐབས་ཤེས་འདྲ་མིན་བརྒྱུད་ཕྱིར་བསྐྱོད་ལག་འཁྱེར་ཐོབ་ཐབས་བྱེད་དགོས་པའི་གནས་སྟངས་ཆགས་ཡོད།
ཐེངས་འདིར་རྒྱ་ནག་གཞུང་གིས་བོད་མི་གནས་མཇལ་བ་ཚོར་གློ་བུར་དུ་དུས་དབང་འགོ་མ་བཙུགས་གོང་ཕྱིར་ལོག་བྱེད་དགོས་པའི་བཙན་བཀའ་བཏང་ཡོད་པ་མ་ཟད། ཕྱིར་ལོག་མ་བྱས་ཚེ་ནང་མི་དང་ཁག་ཐེག་བྱེད་མི་ཚོར་དཀའ་ངལ་འཕྲད་རྒྱུ་ཡིན་སྟབས་ཕྱིར་ལོག་བྱས་པ་ནི་དངོས་ཡོད་གནས་ཚུལ་ཆགས་ཡོད། འདི་ནི་སྦ་གསང་བྱེད་ཐབས་མེད་པའི་གནས་ཚུལ་ཞིག་ཆགས་ཡོད། བོད་མི་ཚོར་ཕྱིར་བསྐྱོད་ལག་འཁྱེར་སྤྲད་རྒྱུར་ཧ་ཅང་དམ་བསྒྲགས་བྱེད་བཞིན་ཡོད། ངས་གོ་ཐོས་བྱུང་བ་ལྟར་ན་ལོ་ལྟར་རྒྱ་རིགས་ས་ཡ་མང་པོ་ཡུལ་སྐོར་སྤྲོ་འཆམ་པ་བྱས་ཏེ་འཛམ་གླིང་ཡོངས་ལ་འགྲོ་ཐུབ་ཀྱི་ཡོད། འོན་ཀྱང་བོད་མི་བརྒྱ་ཆ་ ༩༠ ལ་ཕྱིར་བསྐྱོད་ལག་འཁྱེར་སྤྲད་མེད་པ་ཐག་བཅད་ནས་བཤད་ཐུབ་པ་ཞིག་ཆགས་ཡོད། དེར་བརྟེན་ཕྱིར་བསྐྱོད་ལག་འཁྱེར་ཐོབ་མཁན་ཉུང་ཤས་ཤིག་ཡོད་པ་དེ་དག་དུས་བཀག་ནང་ཚུན་ཕྱིར་ལོག་དགོས་པའི་བཙན་བཀའ་བཏང་བ་དེས། རྒྱ་ནག་གཞུང་གིས་བོད་ནང་ཆོས་དད་རང་དབང་ཡོད་ཟེར་རྒྱུ་དེ་ཧམ་བཤད་ཁོ་ན་ཆགས་ཡོད། ཅེས་ཞུ་རྒྱུ་ཡིན་པ་བཅས།།

གསར་འགོད་པ་ཆོས་ཉིད་ཀྱིས་རྒྱ་གར་རྡོར་གདན་ནས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།