སྟོན་པ་ནི་ཚན་རིག་པ་ཞིག་ལ་ངོས་འཛིན་ཞུ་བཞིན་ཡོད།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༦།༡༢།༡༢ཉིན་སྤེལ། བོད་མི་རྣམས་བཙན་བྱོལ་དུ་འབྱོར་མཚམས་ཤེས་ཡོན་སྤྱི་དང་ལྷག་པར་དེང་དུས་ཤེས་ཡོན་ལ་ཤུགས་བརྒྱབ་པའི་གྲུབ་འབྲས་ལ་བརྟེན་ད་ཆ་བཙན་བྱོལ་བོད་མིའི་སྤྱི་ཚོགས་ཁྲོད་ཕན་ཐོགས་ཡོད། ཅེས་༧གོང་ས་མཆོག་གིས་བཀའ་སློབ་སྩལ་འདུག

འདི་ཟླའི་ཕྱི་ཚེས་ ༩ ཉིན། ལྡི་ལི་བོད་ཁང་དབུ་བརྙེས་ནས་མི་ལོ་ ༥༠ འཁོར་བ་དང་བོད་ཀྱི་སྨན་རྩིས་ཁང་དབུ་བརྙེས་ནས་མི་ལོ་ ༡༠༠ འཁོར་བའི་དུས་ཆེན་གཉིས་འཛོམས་ཐོག་སྤྱི་ནོར་༧གོང་ས་མཆོག་གིས་ཏྱགཱ་རཱ་ཇ་རྩེད་ཐང་ Thyagaraj Stadium ཆེན་མོའི་ནང་མང་ཚོགས་སྟོང་ཕྲག་མང་པོར་མི་ཚེའི་དོན་སྙིང་དང་། བཟང་སྤྱོད་སྐོར་བཀའ་སློབ་སྩལ་དོན།

དེ་ནས་༸གོང་ས་མཆོག་གིས་བཀའ་སློབ་སྩོལ་སྐབས་མཛད་སྒོ་གོ་སྒྲིག་གནང་མཁན་ལྡི་ལི་བོད་ཁང་དང་སྨན་རྩིས་ཁང་གཉིས་ལ་ཐུགས་རྗེ་ཆེ་ཞུ་གནང་མཛད་པ་མ་ཟད།  བོད་མི་རྣམས་བཙན་བྱོལ་དུ་འབྱོར་མཚམས་ཤེས་ཡོན་སྤྱི་དང་ལྷག་པར་དེང་དུས་ཤེས་ཡོན་ལ་ཤུགས་བརྒྱབ་པའི་གྲུབ་འབྲས་ལ་བརྟེན་ད་ཆ་བཙན་བྱོལ་བོད་མིའི་སྤྱི་ཚོགས་ཁྲོད་ཕན་ཐོགས་ཧ་ཅང་བྱུང་ཡོད་སྐོར་དང་།  སྟོན་པ་བཅོམ་ལྡན་འདས་ནི་ཚན་རིག་པ་ཞིག་ལ་ངོས་འཛིན་ཞུ་བཞིན་ཡོད་པ་དང་།    མགོན་པོ་གང་ཉིད་མཆོག་ཀྱང་ཕྱེད་ཀ་ནང་པ་དང་ཕྱེད་ཀ་ཚན་རིག་པ་ཞིག་ཡིན་སྐོར།  དབང་ཤེས་ལ་བརྟེན་པའི་འདོད་ཡོན་ལོངས་སུ་སྤྱོད་རྒྱུའི་ཚོར་བ་དེ་ཙམ་གྱིས་ཡིད་བློར་ཕུགས་ཀྱི་བདེ་བ་ཞིག་སྦྱིན་མ་ཐུབ་པ་དང་།  དབང་ཤེས་ཀྱི་ཚོར་བ་བདེ་བ་ལས་ཡིད་བློའི་བདེ་བ་དེ་བརྟན་པ་ཡོད་ཅིང་། ཡིད་བློའི་སྟེང་བདེ་བ་ཡོང་བར་བློ་དང་ཐད་ཀར་འབྲེལ་བ་ཡོད་སྟབས་བློའི་རྣམ་གཞག་དང་བྱེད་ལས། དེ་བཞིན་བློའི་རིགས་འདྲ་མིན་ཡོད་པ་དེ་དག་རྣམ་རྟོག་དང་འབྲེལ་ནས་ལས་བཟང་ངན་གསོག་རྒྱུ་བཅས་ཀྱི་སྐོར་རྒྱ་གར་གནའ་རབས་ཀྱི་རིག་གཟུང་ནང་ཞིབ་ཚགས་པོའི་ཐོག་ནས་གསུངས་ཡོད་སྐོར་དང་།  ང་ཚོར་ལུས་པོའི་འཕྲོད་བསྟེན་དགོས་པ་ལྟར་བསམ་བློའི་འཕྲོད་བསྟེན་ཡང་དགོས་རྒྱུ་ཧ་ཅང་གལ་ཆེ་ཡིན་སྐོར་དང་།

དེང་སྐབས་བཀའ་འགྱུར་བསྟན་འགྱུར་པོ་ཏི་གསུམ་བརྒྱ་ཙམ་ཡོད་པ་དེ་དག་ལས་ནང་པའི་ཚན་རིག་དང་ལྟ་གྲུབ་རྣམ་གཞག  དེ་བཞིན་ཉམས་ལེན་གྱི་ཆ་བཅས་སོ་སོར་དབྱེ་བ་ཕྱེ་ནས་སྡེ་ཚན་སོ་སོའི་ནང་སློབ་གཉེར་ཇི་ལྟར་བྱེད་དགོས་མིན་ཐད་ལས་གཞི་རྩོམ་བཞིན་ཡོད་སྐོར་དང་།  ནང་ཆོས་ནས་གསུང་པའི་ཚན་རིག་དང་ལྟ་གྲུབ་རྣམ་གཞག་དེ་དག་ལ་སློབ་སྦྱོང་བྱེད་པར་ངེས་པར་དུ་ནང་པ་ཡིན་མི་དགོས་པ་མ་ཟད། སློབ་ཚན་དེ་དག་དེང་དུས་ཤེས་ཡོན་ལམ་ལུགས་ནང་དུའང་ཕན་ཐོགས་ཡོད་སྐོར་དང་། དེ་སྔ་རྒྱ་གར་རྡུལ་ཕྲན་དངོས་ཁམས་རིག་པའི་ཚན་རིག་པ་རཱ་ཇ་ར་མནནཱ་ Raja Ramana ཞུ་བ་ཁོང་གིས་མགོན་པོ་ཀླུ་སྒྲུབ་ཀྱིས་ཆོས་རྣམས་རང་བཞིན་གྱི་གྲུབ་པས་སྟོང་པ་ཡིན་ཚུལ་གསུང་པ་དེར་བསྔགས་བརྗོད་རྒྱ་ཆེ་ཞུས་པ་དང་སྦྲགས།  ལྟ་གྲུབ་འདི་དེང་སྐབས་ཚད་རྡུལ་དངོས་ཁམས་རིག་པའི་ནང་གི་ལྟ་ཚུལ་དང་ཧ་ཅང་མཚུངས་པོ་ཡོད་ཚུལ་དང་། དེ་བཞིན་སེམས་ཁམས་རིག་པ་བ་སྐུ་ཞབས་ཨེ་རོན་བྷེག་ Aaron Beck ཁོང་གིས་ཆགས་སྡང་གི་བློ་སྐྱེ་སྐབས་བརྒྱ་ཆ་ ༩༠ ཚུལ་མིན་ཡིད་བྱེད་རྣམ་རྟོག་གིས་སྒྲོ་བཏགས་པ་ལས་བྱུང་བ་ཞིག་ཡིན་སྐོར་གསུང་པ་དེ་དཔལ་མགོན་འཕགས་པ་ཀླུ་སྒྲུབ་ཀྱིས་གསུངས་པ་དེ་དག་ཧ་ཅང་འདྲ་མཚུངས་ཡིན་ཚུལ་སོགས་ཀྱི་སྐོར་བཀའ་སློབ་སྩལ་བསྟུན་མང་ཚོགས་ཀྱི་དྲི་བ་རྣམས་ལ་བཀའ་ལན་སྩལ་བ་པ་བཅས།།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།