ལོ་རྒྱུས་ཐོག་ནས་བོད་རྒྱ་ཁོངས་མ་རེད། 

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༦།༠༨།༢༢ཉིན་སྤེལ།  ལོ་རྒྱུས་ཐོག་ནས་བོད་རྒྱ་ཁོངས་མ་རེད། ད་ལྟ་གནོན་ཤུགས་སྤྲད་ནའང་ཁས་ལེན་གྱི་མ་རེད།

ཟླ་འདིའི་ཚེས་༢༠ཉིན་དྷ་ཤོད་ཀ་ཅ་རི་ལ་ཡོད་པའི་དབུས་ལྟེ་གནས་གསོལ་མགྲོན་ཁང་གི་Hotel Center Point ཡང་སྟེང་དུ། བོད་མི་མང་སྤྱི་འཐུས་ཚོགས་དྲུང་ལས་ཁུངས་ཀྱི་གོ་སྒྲིག་འོག་རྒྱ་གར་གྱི་RSSསྤྱི་ཚོགས་ཞབས་ཞུ་ཚོགས་པའི་འགོ་ཁྲིད་སྐུ་ཞབས་ཨིན་དྷི་རི་ཤི་ཀུ་མཱར་Indresh Kumarམཆོག་གིས་བོད་དོན་དང་འབྲེལ་བའི་གསར་འགོད་ལྷན་ཚོགས་ཤིག་བསྐོངས་སོང་།alt

ཐེངས་འདིའི་གསར་འགོད་ལྷན་ཚོགས་སྟེང་ཕེབས་གནང་མཁན་གྱི་སྐུ་མགྲོན་གཙོ་བོ་སྐུ་ཞབས་ཨིན་དྷི་རི་ཤི་ཀུ་མཱར་མཆོག་དང་། བོད་མི་མང་སྤྱི་འཐུས་ཚོགས་གཙོ་བསོད་ནམས་བསྟན་འཕེལ་ལགས་དང་། ཚོགས་གཞོན་ཨ་ཅརྱ་ཡེ་ཤེས་ཕུན་ཚོགས་ལགས། དེ་བཞིན་འབྲེལ་ཡོད་ས་གནས་རྒྱ་གར་གྱི་མི་སྣ་ཁག གསར་འགོད་པ་བཅས་མི་གྲངས་སུམ་ཅུ་སྐོར་ཞིག་མཉམ་འཛོམས་གནང་འདུག

སྐུ་ཞབས་ཨིན་དྷི་རི་ཤི་ཀུ་མཱར་གྱིས་གསར་འགོད་ལྷན་ཚོགས་ཐོག་བོད་ཀྱི་རྩ་དོན་འཐབ་རྩོད་དང་འབྲེལ་ནས་གསུང་སྐབས། ཁོང་ཚོ་བོད་དོན་རྒྱབ་སྐྱོར་ཚོགས་པ་ཡིན་པའི་ཆ་ནས། བོད་པའི་མངོན་འདོད་གཙོ་བོ་༧རྒྱལ་བ་རིན་པོ་ཆེའི་དགོངས་གཞི་གཞིར་བཟུང་། བོད་རྒྱ་འབྲེལ་མོལ་ཐོག་ཤུགས་བརྒྱབ་པ་ཡིན་ལ། ད་དུང་ཤུགས་རྒྱག་རྒྱུའི་ནུས་པ་ཡོད་པ་དང་། དེ་བཞིན་བོད་པའི་སྤྱི་ཚོགས་ནང་རང་བཙན་འཐབ་རྩོད་པ་ཡོད་པ་དེ་ཚོར་ཡང་ང་ཚོས་རྩོད་ཆོག་གི་མ་རེད་ཟེར་གྱི་མ་རེད་ལ། ཁོང་ཚོར་ཡང་རྒྱབ་སྐྱོར་དང་མཐུན་རྐྱེན་སྦྱོར་གྱི་ཡོད་སྐོར་གསུངས་སོང་།

ཁོང་གིས་མུ་མཐུད་གསུང་དོན། ལོ་རྒྱུས་ཀྱི་ཆ་ནས་རྒྱ་དཀར་ནག་གཉིས་དབར་ས་མཚམས་ཤིག་མེད་པར། བོད་དེ་རྒྱལ་ཁབ་དེ་གཉིས་དབར་གྱི་ཞི་བའི་ལྟེ་གནས་ལྟ་བུ་ཡིན་ཡང་། རྒྱ་ནག་གིས་བོད་དབང་བསྒྱུར་བྱས་རྗེས། རྒྱ་གར་དེ་ཁྱིམ་མཚེས་བྱེད་མྱོང་མེད་པའི་རྒྱལ་ཁབ་ཅིག་ཁྱིམ་མཚེས་ཆགས་པ་དང་། རྒྱ་གར་ལ་ཡང་དཀའ་ངལ་ཡོད་སྐོར། བོད་པའི་གནད་དོན་སེལ་ཐབས་སུ་སྔ་ཕྱི་བར་གསུམ་ལས་ཀ་གནང་བ་དང་། རྒྱ་ནག་གི་དཔོན་རིགས་ཚོར་རྣམ་དཔྱོད་ཡོད་ན་༧རྒྱལ་བ་རིན་པོ་ཆེའི་དགོངས་གཞི་བཞིན་རྣམ་དཔྱོད་འདོན་དགོས་སྐོར། བོད་པ་གཅིག་པུ་མིན་པར་རྒྱ་ནག་གི་སྲིད་གཞུང་འོག་རྒྱ་མི་རིགས་ཀྱིས་ཀྱང་སྡུག་སྦྱོང་མྱོང་བསྡད་ཡོད་པ་ཚང་མས་ཁ་གྲགས་དགོས་རེད།

མཉམ་འབྲེལ་རྒྱལ་ཚོགས་ནང་མ་ཚུད་པའི་རང་དབང་མེད་པའི་རྒྱལ་ཁབ་མང་པོ་ཡོད་པ་དང་། ཁོང་ཚོའི་འབོད་སྒྲ་སླེབས་ཐབས་དང་། སྐུ་ཚབ་སླེབས་མ་ཐུབ་ནའང་གནད་དོན་སླེབས་ཐུབ་དགོས་པ། བོད་དང་ཐའེ་ཝན་སོགས་མང་པོ་ཡོད་པས་དེའི་ཐོག་ཤུགས་སྣོན་རྒྱག་དགོས་པ། སྤྱི་ཚོགས་ནང་གླེང་སློང་སྣ་ཚོགས་ཡོད་ཀྱང་། རྒྱ་གར་གྱིས་བོད་དོན་རྒྱབ་སྐྱོར་ཉམས་ཆག་འགྲོ་མི་སྲིད་སྐོར་གསུངས་སོང་།

དེ་བཞིན་ཁོང་གིས་བོད་ངོས་འཛིན་བྱེད་སྟངས་དང་འབྲེལ་ནས་གསུང་སྐབས། རྒྱ་ནག་གིས་བཤད་པ་བཞིན་བོད་དེ་རྒྱ་ནག་དང་ཁ་བྲལ་ཐབས་མེད་པ་རེད་ཟེར་བ་དེ་རྒྱ་གར་གྱིས་ནམ་ཡང་ཁས་ལེན་བྱེད་མྱོང་མེད་པ་དང་། ད་ལྟ་གནོན་ཤུགས་སྤྲད་ནའང་ཁས་ལེན་གྱི་མ་རེད། ད་ལྟའི་ཆར་བོད་དེ་རྒྱ་ནག་གིས་བཙན་གནོན་འོག་ཏུ་ཤོར་ནས། ས་གནས་མི་རིགས་རང་སྐྱོང་རྩོད་ལེན་ཐོག་རྒྱ་གར་གཞུང་མང་གཉིས་ནས་རྒྱབ་སྐྱོར་སྔ་ཕྱི་བར་གསུམ་དུ་གནང་གི་ཡོད་པ་ལས། ལོ་རྒྱུས་ཀྱི་ཐོག་ནས་ཀྱང་བོད་དེ་རྒྱ་ཁོངས་ཡིན་པ་ཁས་ལེན་ཐབས་མེད་སྐོར་གསུངས་སོང་།

ཚོགས་གཞོན་གྱིས་གསར་འགོད་ལྷན་ཚོགས་དེ་བསྐོངས་དགོས་དོན་སྐོར་ངོ་སྤྲོད་གནང་དོན། སྐུ་ཞབས་ཨིན་དྷི་རི་ཤི་ཀུ་མཱར་གྱིས་ལོ་༡༧རིང་རྒྱ་གར་རྒྱལ་ཡོངས་ནང་བོད་པའི་རྩ་དོན་ཆེད་གསུང་འབྱོན་གྱི་ཡོད་པ་དང་། ལས་འགུལ་མང་པོ་སྤེལ་གྱི་ཡོད་པ་རེད། ད་ཐེངས་རྒྱ་གར་གྱི་སྤུན་མཆེད་ཉིན་མོ་Raksha Bandanདུས་དྲན་གྱི་ཉི་མོ་ཡིན་པ་དང་། ཁོང་དྷ་སར་ཕེབས་པའི་སྐབས་དང་བསྟུན་ནས། ཁོང་གིས་དེ་སྔོན་བོད་དོན་དང་འབྲེལ་བའི་གསར་འགོད་ལྷན་ཚོགས་སྐོང་མྱོང་མེད་པར་བརྟེན་སྤྱི་འཐུས་ལྷན་ཚོགས་ཀྱི་ངོས་ནས་གསར་འགོད་ལྷན་ཚོགས་ཤིག་བསྐོང་གནང་ཡོང་པའི་རེ་བ་ཞུས་པ་ཡིན་ཞེས་གསུངས་གནང་སོང་།

གསར་འགོད་པ། ཟླ་བ་ཕུར་བུ།།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།