ཤམ་བྷ་ལའི་ཕོ་ཉའི་ངོ་དེབ།

༸གོང་ས་མཆོག་གི་འཁྲུངས་སྐར་ལ་སྲུང་བརྩི་གཟབ་རྒྱས་ཞུས་པ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༦།༠༧།༠༦ཉིན་སྤེལ། དེ་རིང་ཞོགས་པ་ཆུ་ཚོད་༨།༠༠ནས་འགོ་འཛུགས་གནང་ཏེ་བཞུགས་སྒར་དྷ་རམ་ས་ལའི་ཐེག་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་༨༡ལ་ཕེབས་པའི་སྐུའི་འཁྲུངས་སྐར་ལ་གཞུང་མང་གཉིས་ཀྱིས་སྲུང་བརྩི་གཟབ་རྒྱས་ཞུས་གནང་སོང་།

དེ་ཡང་བོད་རྒྱལ་ལོ་༢༡༤༣ཕྱི་ལོ་༢༠༡༦ཟླ་༧ཚེས་༦ཉིན་བདག་ཅག་ཁ་བ་གངས་ཅན་པ་ཡོངས་ཀྱི་མགོན་སྐྱབས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་༨༡ལ་ཕེབས་པའི་སྐུའི་འཁྲུངས་སྐར་གྱི་ཉིན་མོ་ཡིན་པར་བརྟེན་སྔ་དྲོ་ཆུ་ཚོད་༨ཐོག་དབུས་བོད་མིའི་སྒྲིག་འཛུགས་ཀྱི་སྲི་ཞུ་བ་ཆེ་ཕྲ་ཆུང་གསུམ་ཚང་མས་ལུས་ལ་གཟབ་མཆོར་ལེགས་པར་སྤྲས་ཏེ་བཞུགས་སྒར་ལྷ་རྒྱལ་རིར་རླུང་རྟ་དར་འཛུགས་དང་། དགེ་འདུན་པ་ཚོས་བསྟན་སྲུང་གསོལ་ཏེ་༸གོང་ས་མཆོག་གི་ཐུགས་བཞེད་ལྷུན་འགྲུབ་དང་། བོད་རང་དབང་གི་བདེན་མཐའ་མྱུར་དུ་གསལ་བའི་འཕྲིན་བཅོལ་གསོལ་འདེབས་གནད་སྨིན་གནང་མཐར་ལྷ་རྒྱལ་རིའི་སྲུང་མ་དམར་ནག་གཉིས་ཀའི་མདུན་ཐང་དུ་བོད་རྒྱལ་ཁབ་ཆེན་ པོའི་རྒྱལ་གླུ་བཏང་རྗེས་ཚང་མས་སྒྲ་དབྱངས་གཅིག་གྱུར་ཐོག ཀི་ཀི་བསྭོ་བསྭོ་ལྷ་རྒྱལ་ལོ། ཞེས་འབྲུག་སྒྲ་གྲགས་པ་ལྟར་ལན་གསུམ་འཐེན་རྗེས་སྔ་དྲོའི་ཆོས་ཕྱོགས་ཀྱི་མཛད་སྒོ་ཁག་གྲུབ།alt

དངོས་གཞི་གཞུང་འབྲེལ་མཛད་སྒོ་སྔ་དྲོ་ཆུ་ཚོད་༡༠ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་དབུ་གཡབ་ཏུ་བོད་ མིའི་སྒྲིག་འཛུགས་ཀྱི་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་དབུས་ཁྲིམས་ཞིབ་པ་གཞན་གཉིས་མཆོག་དང་། སྲིད་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་གཙོས་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ། ཡབ་གཞིས་སྐུ་འཁོར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་དང་དྲུང་ཆེ་རྣམ་པ། སྲི་ཞུའི་ལས་བྱེད་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་རྣམ་པ། སེར་སྐྱ་མི་མང་བཅས་ཁྱོན་མི་གྲངས་སྟོང་མཚོ་བརྒལ་བ་འདུ་འཛོམས་གནང་ཡོད་པ་དང་། སྐུ་མགྲོན་རྣམས་བཞུགས་གྲལ་དུ་འཁོད་མཚམས། བོད་ཀྱི་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་པར་སྲིད་ཚབ་མཆོག་གིས་བོད་རྒྱལ་ཁབ་ཆེན་ པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྐབས་ཚང་མ་སྐུ་བཞེངས་ཀྱིས་འཕགས་བོད་གཉིས་ཀྱི་རྒྱལ་གླུ་བཏང་། དེ་རྗེས་སྲིད་ཚབ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས། ཁྲིམས་ཞིབ་པ་ཆེ་བ་མཆོག་གིས་གཙོས་ཁྲིམས་ཞིབ་པ་གཞན་གཉིས་མཆོག བོད་མི་མང་སྤྱི་འཐུས་ཚོགས་གཞོན་མཆོག ཡབ་གཞིས་སྐུ་འཁོར་རྣམ་པ། བཀའ་བློན་ལས་ཟུར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ་བཅས་ནས་རིམ་བཞིན་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་མཇལ་དར་སྒྲོན་འབུལ་དང་ཆབས་ཅིག་བོད་ཀྱི་ཟློས་གར་ཚོགས་པས་དྲུག་ཅུའི་དབྱངས་ལྡན་གྱི་མཉམ་གཞས་བཏང་རྗེས་གསོལ་ཇ་འབྲས་སིལ་འདེགས་འབུལ་ཞུས།

དེ་ནས་བོད་ཀྱི་ཟློས་གར་ཚོགས་པས་སྟོད་དིང་རིའི་འཁྲབ་གཞས་༼གནས་ཆེན་རོང་པོ།༽ཞེས་པའི་གཞས་སྣ་འཁྲབ་སྟོན་ཞུས་གྲུབ་མཚམས། དཔལ་ལྡན་སྲིད་ཚབ་མཆོག་གིས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གསུམ་ལ་ལས་བྱེད་འདེམས་བསྐོ་ལྷན་ཁང་ནས་ཞབས་ལོ་༢༥ཧྲིལ་པོ་འཁོར་བའི་ལེགས་སྐྱེས་ཕྱག་རྟགས་དང་། བོད་མིའི་སྒྲིག་འཛུགས་ཀྱི་ལས་བྱེད་ལས་དོན་གཟེངས་ཐོན་གཟེངས་རྟགས་ཐོབ་མཁན་འགན་འཛིན་སྡེ་ཚན་ནས་ཟུང་དྲུང་ཚེ་རིང་བསམ་གྲུབ་ལགས་དང་། ལས་བྱ་སྡེ་ཚན་ནས་ཕྱི་དྲིལ་སྣར་ཐང་པར་ཁང་གི་སྡེ་འགན་རྡོ་རྗེ་ཚེ་རིང་ལགས་གཉིས་ལ་གཟེངས་རྟགས་གནང་། དེ་ནས་རྡ་སྟེང་བོད་ཁྱིམ་སློབ་གྲྭ་ནས་མཉམ་༼༸རྒྱལ་བའི་བཀའ་དྲིན་རྗེས་དྲན།༽ཞེས་པ་གཟིགས་འབུལ་ཞུས། དེ་རྗེས་ཁྲིམས་ཞིབ་པ་ཆེ་བ་མཆོག་གིས་བོད་ལྗོངས་སློབ་གྲྭ་ཆེན་མོའི་སློབ་ཟུར་ཆབ་སྲིད་བཙོན་ཟུར་བློ་བཟང་བསྟན་འཛིན་ལགས་ཀྱི་མི་ཚེའི་ལོ་རྒྱུས་སྙིང་བསྡུས་སྤྱི་ཟུར་གངས་ལྷ་མོ་ལགས་ཀྱིས་རྒྱ་ཡིག་ཐོག་ཕབ་སྒྱུར་དང་། ཕྱི་དྲིལ་རྒྱ་ཡིག་ཚན་པས་ཞུ་བཅོས་གནང་བ༼བཙན་གནོན་ལ་རྒོལ་བའི་སྙིང་སྟོབས་བློ་བཟང་བསྟན་འཛིན།༽ཞེས་པའི་རྒྱ་ཡིག་དཔེ་དེབ་དབུ་འབྱེད་གནང་གྲུབ་བསྟུན།

རྡ་ས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིངྒ་མཆོག་གིས་གསུང་བཤད་དང་། དེ་ནས་རྡ་ཤོད་བོད་ཁྱིམ་ནས་༼རྗེ་མར་པ་དང་རྗེ་མི་ལ་རས་པ་མཇལ་འཕྲ།་༽ ཞེས་པ་འཁྲབ་སྟོན་ཞུས་གྲུབ་བསྟུན། དཔལ་ལྡན་སྲིད་ཚབ་མཆོག་གིས་བཀའ་ཤག་གི་གསུང་བཤད་གནང་། དེ་ནས་ནོར་གླིང་བུ་བཅོལ་ཁང་ནས་གཞས་སྣ་༼ང་ཚོ་བོད་ལ་ཡོད།༽ཞེས་པ་འཁྲབ་སྟོན་ཞུས་གྲུབ་རྗེས། དཔལ་ལྡན་ཁྲིམས་ཞིབ་པ་ཆེ་བ་མཆོག་གིས་སྐུ་ཞབས་ཝི་ཇེ་ཀ་རན་ཏི་ལགས་ཀྱིས་རྩོམ་སྒྲིག་གནང་བའི་དཔེ་དེབ་The Dalai Lama : The Soldier of Peace ཞེས་པ་ཧིན་དྷིའི་སྐད་ཡིག་ཐོག་བསྒྱུར་བའི་དཔེ་དེབ་དབུ་འབྱེད་གནང་། དེ་ནས་མདོ་སྨད་ཆོལ་ཁ་ནས་གཞས་སྣ་༼བྱམས་བརྩེའི་མེ་ཏོག༽ཞེས་པ་འཁྲབ་སྟོན་ཞུས་གྲུབ་མཚམས། དཔལ་ལྡན་བོད་མི་མང་སྤྱི་འཐུས་ཚོགས་གཞོན་མཆོག་གིས་ཤེས་རིག་ལས་ཁུངས་ཀྱིས་NCAརོགས་སྐྱོར་འོག་གཏན་ཉིན་སློབ་གྲྭ་ཁག་གི་གཞི་རིམ་ཨང་རྩིས་གནས་ཚད་གོང་མཐོར་གཏོང་ཐབས་སུ་༼འཛིན་རིམ་ཁག་ལྔའི་ཨང་རྩིས་སློབ་ཁྲིད་བརྙན་སྡེར།༽དབུ་འབྱེད་དང་། བོད་ཀྱི་ཟློས་གར་ཚོགས་པས་འདོན་སྤེལ་ཞུས་པའི་༼༢༠༡༦ལོའི་དབྱར་སྐྱིད་བརྙན་འཕྲིན་འོད་སྡེར།༽དབུ་འབྱེད་གནང་། དེ་ནས་དབུས་གཙང་ཆོལ་ཁས་གཞས་སྣ་༼སྐྱིད་ལུང་སྒྲོལ་མའི་རི་ལ།༽ཞེས་པ་གཟིགས་འབུལ་ཞུས་བསྟུན། དཔལ་ལྡན་བོད་མི་མང་སྤྱི་འཐུས་ཚོགས་གཞོན་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་། མདོ་སྟོད་ཆོལ་ཁ་ནས་༼གངས་དཀར་ཏི་སི།༽ཞེས་པ་དང་། ཡོངས་གླིང་སྔོན་འགྲོའི་སློབ་གྲྭ་ནས་༼བསོད་ནམས་སྤང་རྒྱན།༽ ཞེས་པ་འཁྲབ་སྟོན་གནང་། དེ་ནས་མེས་དབོན་གཙུག་ལག་དཔེ་སྟོན་སློབ་གྲྭ་ནས་མཉམ་གཞས་༼གསང་གསུམ་མཛད་འཕྲིན་རྒྱས་པའི་སྨོན་འདུན།༽ ཞེས་པ་བཏང་རྗེས་མི་མང་སྟོང་ཚོ་བརྒལ་བ་འདུ་འཛོམས་བྱུང་བ་རྣམས་ལ་རྡ་ས་ཚོང་ཁང་སྐྱིད་སྡུག་སོགས་ནས་སྐུའི་འཁྲུངས་སྐར་ལ་རྟེན་འབྲེལ་མཚོན་ཆེད་དུ་མངར་ཟས་དང་ཞལ་ཏོག ཆབ་མངར་མོ་སོགས་མི་དམངས་ཁྱོན་ཡོངས་ལ་གནང་སྟེ་སྐུའི་འཁྲུངས་སྐར་དུས་ཆེན་གཟབ་རྒྱས་ངང་གྲོལ་སོང་།།

གསར་འགོད་པ། ཟླ་བ་ཕུར་བུ།།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།