དགུ་བཅུ་གསུམ་ལས་འགུལ་ཚོགས་པས་བསྒྲགས་གཏམ་སྤེལ་བ།

Attention, open in a new window. ཕི་ཌི་ཨེཧཕ། པར་འདེབས།གློག་འཕྲིན།

༢༠༡༣།༡༡།༠༦ཉིན་སྤེལ། ཚེས་༦ཉིན་རྒྱབ་ཆུ་ཚོད་༣།༠༠ཐོག་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་ཕྱི་ལོ་ ༢༠༡༣ ཟླ་བ་ ༡༡ ཚེས་ ༣ ནས་ཚེས་ ༥ ཉིན་བར་ཉིན་གྲངས་གསུམ་རིང་བཞུགས་སྒར་དྷ་རམ་ས་ལའི་གཙོས་ཉེ་འགྲམ་གྱི་ས་ཁུལ་ཁག་གསུམ་ནས་ཁྱོན་མཚན་རྟགས་ཉི་སྟོང་ལྷག་བསྡུ་རུབ་ཞུས་ཡོད་པ་དེ་ནི་རྒྱ་ནག་གཞུང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་འོས་བབ་མེད་པའི་རྣམ་འགྱུར་གསལ་སྟོན་བྱེད་པའི་ཆེད་དུ་ད་ཐེངས་ཀྱི་ལས་འགུལ་འདི་སྤེལ་བ་ཡིན་འདུག

ཉིན་འདིེར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་པ་སང་ཚེ་རིང་གིས་བོད་ཡིག་སྟེང་ནས་བསྒྲགས་གཏམ་སྒྲོགས་སྦྱང་དང་། ཚོགས་གཞོན་རྣམ་རྒྱལ་སྒྲོན་དཀར་གྱིས་དབྱིན་ཡིག་སྟེང་རག་བསྡུས་ཞུས་སོང་བ། དྲུང་ཆེ་རྨེའུ་དཀོན་རྒྱམ་ལགས་ནས་བསྒྲགས་གཏམ་སྤེལ་དགོས་དོན་དང་ས་ཡིག་བསྡུ་རུབ་བྱས་པའི་སྐོར་ནས་འགྲེལ་བརྗོད་གནང་སོང་།

༄༅།    །ཕྱི་ལོ་  ༢༠༡༣  ལོའི་ཟླ་  ༡༠  ཚེས་  ༢༢  ཉིན་རྒྱ་ནག་རྒྱལ་སྲིད་སྤྱི་ཁབ་ཁང་གི་གསར་འགྱུར་གཞུང་ལས་ཁང་ཟེར་བས་ཞེས་པའི་རྒྱབ་ཤ་དཀར་པོའི་དེབ་འདོན་ཐེངས་བཅུ་པར་གྲགས་པ་འགྲེམས་སྤེལ་བྱས་ཡོད་ལ།


ཐེངས་འདིའི་རྒྱབ་ཤ་དཀར་པོའི་དེབ་ཀྱི་ནང་དོན་མདོར་བསྒྲིལ་ན་“བོད་ཞི་བའི་བཅིངས་འགྲོལ་གྱི་ལོ་ངོ་དྲུག་ཅུའི་”འཕེལ་རྒྱས་སྐོར་བཤད་ཡོད་ཅིང་།      དེབ་དེའི་ནང་གསལ་སྟོན་བྱས་པའི་ནང་དོན་རྣམས་ཚན་པ་དྲུག་ལ་འགར་ནས་ཡོད་པ་སྟེ།

༡    དཔལ་འབྱོར་གོང་དུ་འཕེལ་ཚུལ་དང་དམངས་ཀྱི་འཚོ་བར་ལེགས་བཅོས་བྱུང་ཚུལ།  
༢    ཆབ་སྲིད་ཡར་ཐོན་བྱུང་ཚུལ་དང་མི་དམངས་ཀྱིས་རང་ཁྱིམ་རང་བདག་བྱས་ཚུལ།  
༣    རིག་གནས་སྲུང་སྐྱོང་བྱས་པ་དང་ཆོས་དད་རང་མོས་ཡིན་ཚུལ།   
༤   སྤྱི་ཚོགས་འཕོ་འགྱུར་བྱུང་ཚུལ་དང་བྱ་གཞག་ཁག་འཕེལ་རྒྱས་བྱུང་ཚུལ།   
༥   ཁོར་ཡུག་སྲུང་སྐྱོང་དང་སྣོད་བཅུད་དཔལ་ཡོན་འཛུགས་སྤེལ་བྱས་ཚུལ།  
༦   མི་མང་ལུས་ཁམས་བདེ་ཞིང་འཚོ་བ་སྐྱིད་པོ་ཡིན་ཚུལ་བཅས་བཀོད་ཡོད།

དེས་ན་རྒྱ་ནག་གཞུང་གིས་བཤད་པ་ཇི་བཞིན་ད་ལྟའི་བོད་ས་ཁྱོན་ཡོངས་ཀྱི་གནས་སྟངས་དེ་ཡང་སྙིང་ཅི་འདྲ་ཞིག་ཡོད་མེད་གསལ་བཤད་བྱེད་རྒྱུར།
1. ད་ལྟའི་བོད་ནང་གི་དཔལ་འབྱོར་གནས་སྟངས་ཐད་ནས་བརྗོད་ན།      ལྷ་ས་གྲོང་ཁྱེར་གྱིས་མཚོན་པའི་གྲོང་ཁྱེར་དང་།      གྲོང་བརྡལ་ཁག་ལ་སྔར་ལས་ཅུང་ཟད་དཔལ་འབྱོར་ཡར་རྒྱས་ཕྱིན་ཡོད་ནའང་།      དེ་དག་ཏུ་གནས་སྡོད་བྱེད་མཁན་ཕལ་ཆེ་བ་ནི་རྒྱ་མི་རིགས་དག་ཡིན་པས་ཡར་རྒྱས་ཕྱིན་པའི་དཔལ་འབྱོར་གྱི་ཁེ་ཕན་ཐོབ་ས་གཙོ་བོ་དེའང་རྒྱ་མི་རིགས་ཡིན་པ་ལས།       བོད་མི་འདུ་སྡོད་བྱ་ས་གཙོ་བོ་ནི་གྲོང་གསེབ་ཀྱི་ཞིང་འབྲོག་ས་ཁུལ་ཁག་ཡིན་པས་དེ་དག་གི་དཔལ་འབྱོར་གནས་སྟངས་ནི་སྔར་བཞིན་ཉམས་ཐག་ཡིན་པས་ད་ལྟ་ཡང་དབུལ་ཕོངས་ཀྱི་འཆིང་རྒྱ་ལས་གྲོལ་ཐུབ་མེད།

2. ཆབ་སྲིད་ཡར་ཐོན་དང་མི་དམངས་ཀྱིས་རང་ཁྱིམ་རང་བདག་ཇི་ཙམ་བྱུང་བ་བརྗོད་ན།        བོད་ནང་གི་ད་ལྟའི་ཆབ་སྲིད་ཀྱི་གནས་སྟངས་ནི་ཡ་ང་ཞིང་ཡིད་སྐྱོ་དགོས་པའི་ཛ་དྲག་ཧ་ཅང་ཆེ་བའི་གནས་བབས་སུ་ལྷག་ཡོད་ཅིང་།       ཞི་བའི་ངོ་རྒོལ་བྱེད་མི་རྣམས་ཀྱི་སྟེང་དྲག་མཚོན་ཐོག་པའི་དམག་མིས་དྲག་གནོན་བསམ་ཡུལ་འདས་པ་བྱས་དང་བྱེད་མུས་ཡིན་པ་ནི་མང་དུ་བགྲངས་མི་དགོས་པར་ཉེ་ཆར་ཕྱི་ལོ་  ༢༠༡༣  ལོའི་ཟླ་བ་  ༡༠  ཚེས་  ༢༦  ཉིན་ལྷ་སར་ཚོགས་པའི་“ལྗོངས་ཡོངས་ཀྱི་སྤྱི་ཚོགས་བརྟན་ལྷིང་སྲུང་སྐྱོང་ལས་དོན་གྱི་བརྙན་ལམ་ཚོགས་འདུ”འི་སྟེང་བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་པདྨ་འཕྲིན་ལས་ཀྱིས་“མིག་སྔའི་བརྟན་ལྷིང་སྲུང་སྐྱོང་ལས་དོན་ཡག་པོ་བསྒྲུབ་རྒྱུ་དེ་དེ་བས་མངོན་གསལ་གྱི་གནས་བབ་ཐོག་འཇོག་པ།      ཚད་མཐོའི་ཆབ་སྲིད་ཀྱི་དོགས་ཟོན་སྔ་ཕྱི་བར་གསུམ་དུ་རྒྱུན་འཁྱོངས་བྱེད་”དགོས་པའི་འཁྲིད་སྟོན་བྱས་ཡོད་ལ།      ཏང་ཨུད་ཀྱི་ཧྲུའུ་ཅི་གཞོན་པ་དང་བོད་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ།     ལྗོངས་ཏང་ཨུད་ཀྱི་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཏེང་ཞའོ་ཀང་གིས“་ལྗོངས་ཡོངས་ཀྱི་རིམ་ཁག་དང་སྡེ་ཚན་ཁག་གིས་གཙིགས་མཐོང་གལ་ཆེན་དང་།   དུས་རྟག་ཏུ་རིག་པ་དངས་གསལ་ཡོང་རྒྱུ་རྒྱུན་འཁྱོངས་བྱས་ཏེ་འབད་བརྩོན་ལྷོད་མེད་ཀྱིས་སྒོ་ནས་སྲུང་སྐྱོང་བྱ་རྒྱུ་དེ་ལས་འགན་ཨང་དང་པོར་བརྩི་བ།  ལྷོད་གཡེང་དང་རྣམ་གཡེང་གི་བསམ་བློ་དང་དམག་འཐབ་ལ་སུན་སྣང་སྐྱེ་བའི་བསམ་བློ་ཁྱད་བསད་མཐའ་གཅིག་ཏུ་བྱེད་པ།      སྤྱི་ཚོགས་སྔོན་འགོག་ཚོད་འཛིན་ལ་ཤུགས་སྣོན་ཏན་ཏིག་རྒྱག་པ།     གསང་འཕྲིན་དང་ཆ་འཕྲིན་གྱི་ལས་དོན་ལ་ཤུགས་སྣོན་རྒྱག་”དགོས་པ་སོགས་ཀྱི་ནན་བཤད་བྱས་ཡོད།   གོང་གི་གཏམ་བཤད་ལས་ད་ལྟའི་བོད་ནང་གི་བོད་མིའི་ཚོའི་ཆབ་སྲིད་ཀྱི་གནས་བབ་ཚད་གཞི་ག་ཚོད་ཅིག་ཡོད་མེད་ལོང་བས་བལྟས་ཀྱང་ཁམས་གསུམ་ཡིན་ལ།      ཅི་སྟེ་རྒྱ་ནག་གཞུང་གིས་བཤད་པ་ལྟར་བོད་ནང་གི་བོད་མི་ཚོའི་ཆབ་སྲིད་གནས་སྟངས་ཐོག་འདྲ་མཉམ་དང་དྲང་བདེན་ཞིག་ཡོད་ན།      ཕྱི་ལོ་  ༢༠༠༩  ལོ་ནས་དེ་རིང་གི་བར་བོད་མིའི་བརྒྱ་དང་ཉི་ཤུ་རྩ་གཅིག་ཙམ་གྱི་རང་ལུས་མེར་བསྲེགས་ཀྱི་དོན་རྐྱེན་དེ་ལྷག་དགོས་དོན་མེད་ལ།      ༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མས་དབུས་བོད་མི་ཆབ་སྲིད་བཙོན་པ་ཆིག་སྟོང་ཡས་མས་ཤིག་གི་ཆབ་སྲིད་དབང་ཆ་དང་།      ཐོབ་དགོས་པའི་འགྲོ་བ་མིའི་རང་དབང་གི་གོ་སྐབས་ཡོངས་སུ་བཙན་འཕྲོག་བྱས་ཏེེ་རྒྱ་ནག་གི་སྡུག་རྩུབ་ཤིན་ཏུ་ཆེ་བའི་བཙོན་ཁང་ནང་བཅུག་དགོས་པའི་རྒྱུ་མཚན་ཅི་ཡོད།      དེར་བརྟེན་རྒྱ་ནག་གཞུང་གི་འགྲོ་བ་མིའི་ཐོབ་ཐང་དང་།      དེ་བས་གྲངས་ཉུང་མི་རིགས་ཁག་གི་སྟེང་སྤེལ་བའི་ཆབ་སྲིད་ཀྱི་ལང་ཕྱོགས་ནི་དྲང་བཞག་དང་།      འདྲ་མཉམ་ཏིལ་འབྲུ་ཙམ་མེད་པར་ཆེས་སྡུག་རྩུབ་དང་དྲག་གནོན་ཁོ་ནའི་འོག་ཏུ་འགྲོ་འདུག་བྱེད་དགོས་པའི་ཆབ་སྲིད་ཀྱི་གནས་བབས་ཤིག་བསྐྲུན་ཡོད།

3. རིག་གནས་སྲུང་སྐྱོབ་དང་ཆོས་དད་རང་མོས་ཡིན་ཚུལ་གྱི་ཐོག་ནས་བརྗོད་ན།      ཐོག་མར་རྒྱ་ནག་གུང་ཁྲན་ཏང་གིས་བོད་ས་ཁྱོན་ཡོངས་ལ་དབང་བསྒྱུར་བྱས་ཚུན་ནས་སྔ་ཕྱི་བར་གསུམ་དུ་བོད་མི་རིགས་ཀྱི་སྐད་ཡིག་རིག་གཞུང་ལ་འཛིན་པའི་ལྟ་སྟངས་ནི་ཆེས་རྗེས་ལུས་དང་།      བོད་ཀྱི་སྤྱི་ཚོགས་ནི་ཆེས་མུན་ནག་ཡིན་ལུགས་སུ་བརྙས་ཤིང་རྙིང་བཞི་རྩ་གཏོར་གྱི་ལས་འགུལ་འོག་ཧ་ལམ་ཤུལ་མེད་དུ་བཏང་ཡོད་ལ།      བར་ལམ་ནས་སླར་ཡང་ནང་བསྟན་སློབ་གཉེར་གནང་མཁན་གྱི་གྲྭ་བཙུན་ལ་ཚད་བཀག་དང་།       སློབ་གཉེར་ལ་སུན་གཙེར་སྣ་ཚོགས་བཟོ་བ།       སློབ་གྲྭ་ཁག་ཏུ་བོད་ཀྱི་སྐད་ཡིག་རིག་གཞུང་སློབ་གཉེར་བྱ་ས་མེད་པའི་སྲིད་ཇུས་བཟོ་བ།        བོད་ཀྱི་སྐད་ཡིག་སློབ་གཉེར་བྱེད་མཁན་ལ་ལས་ཞུགས་ཀྱི་གོ་སྐབས་མི་སྤྲོད་པ་སོགས་ལས་ཀྱང་རྒྱ་ནག་གཞུང་གིས་བོད་ཀྱི་རིག་གནས་སྲུང་སྐྱོང་ཇི་ལྟར་གནང་གི་ཡོད་མེད་ཟུར་བལྟས་ལེབ་མཐོང་ཡིན་ཞིང་།       ང་ཚོས་ཐག་རིང་པོ་ཞིག་ནས་བརྗོད་མི་དགོས་པར་རྒྱབ་ཤ་དཀར་པོའི་དེབ་འདི་ཉིད་དྲིལ་བསྒྲགས་བྱས་པའི་ཉིན་བཞི་ཡི་རྗེས་ཏེ་ཕྱི་ལོ་  ༢༠༡༣  ལོའི་ཟླ་བ་  ༡༠  ཚེས་  ༢༦  ཉིན་ལྷ་སར་ཚོགས་པའི་“ལྗོངས་ཡོངས་ཀྱི་སྤྱི་ཚོགས་བརྟན་ལྷིང་སྲུང་སྐྱོང་ལས་དོན་གྱི་བརྙན་ལམ་ཚོགས་འདུ”འི་སྟེང་ཏང་ཨུད་ཀྱི་ཧྲུའུ་ཅི་གཞོན་པ་དང་བོད་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ།      ལྗོངས་ཏང་ཨུད་ཀྱི་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཏེང་ཞའོ་ཀང་གིས་“ལྗོངས་ནང་ཁུལ་གྱི་མི་སྣ་རྒྱལ་མཚམས་སྒྲོལ་ནས་དུས་འཁོར་དབང་ཆེན་ནང་ཞུགས་རྒྱུ་གཏན་འགོག་བྱེད་པའི་ལས་དོན་ཡག་པོ་སྒྲུབ་”དགོས་ཞེས་བཀའ་བཏང་ཡོད་པ་ལས་ཀྱང་གུང་ཁྲན་ཏང་གིས་བོད་ལ་ཆོས་དད་རང་མོས་ཅི་ཙམ་ཞིག་སྤྲོད་ཀྱི་ཡོད་པ་ར་སྤྲོད་གསལ་པོ་མི་འདུག་གམ།    གཞན་ཡང་ཟླ་འདིའི་ཚེས་གཅིག་ཉིན་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་ཁྲེན་ཆོན་གོ་ཡིས་བོད་ནང་རྒྱ་ནག་གཞུང་གི་སྒྲ་སྐད་ཁོ་ན་ལས་གཞན་མི་ཐོས་པ་བཟོ་རྒྱུ་ཡིན་ལུགས་ཀྱི་རྩོམ་ཡིག་ཅིག་སྤེལ་ཡོད་ཅིང་དེ་ཡང་།     ཁྲེན་ཆོན་གོ་ཡིས་“རང་ལྗོངས་ཀྱི་སྤྱི་ཁྲི་ངོས་གྲུ་ཁྲི་ཚོ་  ༡༢༠  ཡོད་པའི་ཡངས་པའི་ས་གཞིའི་ཐོག་ཏང་གི་གསུང་སྒྲ་ཐོས་ཐུབ་པ་དང་གཟུགས་བརྙན་མཐོང་ཐུབ་པ་བཟོ་རྒྱུ་དང་།     དགྲ་འཛིན་སྟོབས་ཤུགས་དང་ཏཱ་ལ་སྐྱེས་འཕྲེང་བཅུ་བཞི་པའི་སྐད་སྒྲ་ཐོས་མི་ཐུབ་པ་དང་གཟུགས་བརྙན་མཐོང་མི་ཐུབ་པ་བཟོ་དགོས་”ཞེས་པའི་བརྗོད་བབ་འདི་ཁོ་ནས་ཀྱང་ད་ལྟའི་བོད་ནང་ཆོས་དད་རང་མོས་དང་།    འགྲོ་འདུག་རང་དབང་སོགས་མདོར་ན་འགྲོ་བ་མིའི་ཐོབ་ཐང་ཅི་ཙམ་ཞིག་ཡོད་པ་ལོང་བས་ཀྱང་མཐོང་ཚོད་དང་འོན་པས་ཀྱང་གོ་ཚོད་ཡིན།

4. སྤྱི་ཚོགས་འཕོ་འགྱུར་དང་བྱ་གཞག་ཁག་འཕེལ་རྒྱས་ཐད་ནས་བརྗོད་ན།      ཕ་ཚ་བུ་རྒྱུད་ནས་ཞིང་ལས་འཐོན་སྐྱེད་ཀྱི་འཚོ་བར་རོལ་ཞིང་རང་སྣང་གང་སྐྱིད་ཀྱི་འཚོ་བ་དེ་ད་ཆ་གུང་ཁྲན་ཏང་གི་འཁྲིད་སྟོན་གྱིས་ཞིང་པའི་ས་ཞིང་བཙན་འཕྲོག་གིས་ཨར་ལས་འཛུགས་སྐྲུན་བྱས་ཏེ་བཟོ་གྲྭ་དང་།    ཚོང་ར་སོགས་བཟོས་ཏེ་དེ་དག་གི་ཁེ་ཕན་ཡོད་ཚད་བོད་དུ་གཞིས་སྤོས་བྱས་དང་བྱེད་བཞིན་པའི་རྒྱ་མི་རིགས་ཀྱི་འཚོ་བའི་བརྟེན་ཁུངས་བཟོ་བ་དང་།    འབྲོག་པའི་ཕྱུགས་ཟོག་གི་གྲངས་འབོར་ལ་ཚད་གཞི་བཟོ་བ།      རྩྭ་ཁ་བཟང་སའི་རི་ལུང་མང་པོ་ཞིག་ནས་གཏེར་ཁ་སྣ་ཚོགས་བརྔོགས་འདོན་བྱས་ཏེ་རྒྱ་ནག་ཏུ་དབོར་འདྲེན་བྱས་དང་བྱེད་བཞིན་ཡོད་ལ།      མདོར་ན་ཞིང་འབྲོག་མང་ཚོགས་ཀྱི་འཚོ་བའི་བརྟེན་ཁུངས་མེད་པ་བཟོས་ནས་དེ་དག་གྲོང་བརྡལ་ཅན་དུ་འགྱུར་ཐབས་བྱེད་པ་དང་།      དེའི་དམིགས་ཡུལ་ནི་མི་རིགས་འཕེལ་རྒྱས་ལ་ཚད་བཀག་བཟོ་བདེ་བ་དང་།      མི་རིགས་དེའི་རིག་གཞུང་རྩ་མེད་གཏོང་བདེ་བ།      རྒྱ་ནག་གཞུང་ལ་དཔལ་འབྱོར་ཁེ་ཕན་ཐོབ་མང་བའི་སྲིད་ཇུས་ཁོ་ནར་དམིགས་པ་ཡིན།       དཔེར་ན་ཕྱི་ལོ་  ༢༠༡༣  ལོའི་ཟླ་བ་  ༡༠   ཚེས་   ༢༨  ཉིན་རྒྱ་ནག་གཞུང་གིསྤེལ་བའི་ “གཙང་གསུམ་ཆུ་འགོའི་འབྲོག་པ་ཁྲི་དྲུག་ཙམ་གྲོང་ཁྱེར་དུ་གནས་སྤོ་བྱས་པ”་ཞེས་པའི་འཕྲིན་ནང་།     “མཚོ་སྔོན་གྱི་གཙང་གསུམ་ཆུ་འགོའི་རང་བྱུང་སྲུང་སྐྱོང་ཁུལ་གྱི་སྣོད་བཅུད་སྲུང་སྐྱོང་འཛུགས་སྐྲུན་གྱི་ལས་གྲྭ་ལག་ལེན་བསྟར་བ་དང་བསྟུན་མིག་སྔར་གཙང་གསུམ་ཆུ་འགོའི་ཁུལ་གྱི་ཞིང་འབྲོག་ཁྲི་དྲུག་ཙམ་རྩྭ་ཆུ་བཟང་སར་བསྐྱས་སྤོས་བྱས་ཏེ་གྲོང་ཁྱེར་གྱི་འཚོ་བ་སྐྱེལ་འགོ་ཚུགས་པ་རེད་”ཅེས་པའི་འགལ་འདུའི་ཤོད་སྟངས་དེས་ཞི་མིས་རང་གི་གཙོག་པར་ཐལ་བ་བཀབ་པ་བཞིན་གུང་ཁྲན་ཏང་གིས་སོ་སོའི་བྱས་ཉེས་སྦས་བསྐུང་ཇི་ལྟར་བྱས་ཀྱང་ཉི་ཤར་སྦར་མོས་འགེབས་ཐབས་མེད་ལ།     བྱས་ཉེས་ངོ་ལ་ཇི་ཙམ་འཁྱེར་ནའང་འདིའི་རྒྱབ་ལྗོངས་དང་དམིགས་ཡུལ་ནི་གོང་དུ་དྲངས་པ་བཞིན་རྒྱ་ནག་གཞུང་གི་ཁེ་ཕན་ཁོ་ན་ལ་དམིགས་པ་ཞིག་ཡིན།

5. ཁོར་ཡུག་སྲུང་སྐྱོང་དང་སྣོད་བཅུད་ཐད་ནས་བརྗོད་ན།      ད་ལྟའི་བོད་ཀྱི་ཁོར་ཡུག་གནས་སྟངས་ནི།    ༡   རི་བོ་ཐམས་ཅད་པགས་པ་བཤུས་ཏེ་གཏེར་ཁ་གང་བྱུང་དུ་བརྔོགས་འདོན་བྱས་པས་རྩྭ་ས་དུ་མ་བེད་མེད་དུ་གྱུར་པའི་སྟབས་ཀྱིས་འབྲོག་པའི་ཕྱུགས་ཟོག་ལ་རྩྭ་ཁ་མ་འདངས་བར་གོད་ཆག་མི་ཉུང་བ་བྱུང་དང་འབྱུང་བཞིན་པ་དང་།      དེས་རྐྱེན་པས་འབྲོག་པ་མང་ཚོགས་ཀྱི་འཚོ་བ་ལ་གནོད་སྐྱོན་ཚབ་ཆེན་ཕོགས་པ་མ་ཟད་རྩྭ་སའི་རྒྱ་ཁྱོན་ཆུང་དུ་སོང་བའི་སྟབས་ཀྱིས་མང་ཚོགས་ནང་ཁུལ་རྩྭ་སའི་དོན་དུ་འཁྲུགས་བརྩོད་ཆེ་ཆུང་རབ་དང་རིམ་པ་ཐོན་གྱི་ཡོད།      ༢   བོད་ཁུལ་གྱི་གདོད་མའི་ནགས་ཚལ་གཅོད་དྲེག་བྱེད་ཐལ་ཆེ་བའི་སྟབས་ཀྱིས་ཆུ་ལོག་དང་།      རང་བྱུང་གནོད་འཚེ་རིམ་པར་ཐོན་ཅིང་དེའི་དབང་གིས་ཡུལ་མི་མང་ཚོགས་གི་མི་རྒྱུ་ཟོག་གསུམ་གར་གནོད་སྐྱོན་ཚབ་ཆེན་ཕོགས་ཀྱིན་ཡོད་ལ།      ནགས་ཚལ་ལ་འཚོ་གནས་བྱེད་པའི་རྩ་ཆེའི་རི་སྐྱེས་སྲོག་ཆགས་ཀྱང་མི་ཉུང་བ་ཞིག་རྩ་སྟོང་དང་གྲངས་འབོར་ཆགས་ཤིང་ཡོད།     ༣    གཙང་ཆུ་མང་པོ་ཞིག་ཁ་བསྒྱུར་དང་།      གློག་ཁང་གསར་རྒྱག     བཟོ་གྲྭ་བཙུགས་པ་སོགས་ཀྱིས་ཆུ་མགོ་ཐམས་ཅད་འབག་གཙོག་བཟོས་པས་བོད་དང་ཁ་ཐག་ཉེ་བའི་ཨེ་ཤེ་ཡའི་ཁོར་ཡུག་སྤྱི་དང་།        བྱེ་བྲག་བོད་ཀྱི་ཞིང་འབྲོག་མང་ཚོགས་ཀྱི་འཚོ་རྟེེན་ལ་དོ་ཕོགས་གཏོང་ཚད་ཤིན་ཏུ་ཆེན་པོ་ཡིན།     དེ་ཡང་ཕྱི་ལོ་  ༢༠༡༣  ལོའི་ཟླ་བ་  ༡༠  ཚེས་  ༢༨  ཉིན་རྒྱ་ནག་གཞུང་གི་ཡིས་སྤེལ་བའི་“གཙང་གསུམ་ཆུ་འགོའི་འབྲོག་པ་ཁྲི་དྲུག་ཙམ་གྲོང་ཁྱེར་དུ་གནས་སྤོ་བྱས་པ”་ཞེས་པའི་འཕྲིན་ནང་།    “དུས་རབས་གོང་མའི་ལོ་རབས་བརྒྱད་ཅུ་ཚུན་དུ་སྣོད་བཅུད་གནད་དོན་ཉིན་བཞིན་ཚབས་ཆེན་དུ་ཕྱིན་ཡོད་པ་རེད་”ཅེས་གུང་ཁྲན་ཏང་གིས་བོད་དུ་བཙན་འཛུལ་བྱས་པའི་རྗེས་ནས་བོད་ཀྱི་སྣོད་བཅུད་ཁྱོན་ཡོངས་ལ་ཉམས་ཉེས་བཏང་ཡོད་པ་རྒྱ་ནག་གཞུང་རང་གིས་ཀྱང་ཡོངས་གྲགས་ཁས་ལེན་བྱས་ཡོད།

6. མི་མང་ཀྱི་ལུས་ཁམས་བདེ་ཐང་དང་འཚོ་བའི་ཐད་ནས་གླེང་ན།    གུང་ཁྲན་ཏང་གིས་བོད་ས་ཁྱོན་ཡོངས་ལ་བཙན་འཛུལ་བྱས་རྗེས་རྒྱ་མི་ཤིན་ཏུ་འབོར་ཆེན་བོད་དུ་མིང་འདོགས་སྣ་ཚོགས་ཀྱིས་གཞིས་སྤོས་བྱས་པ་དང་།      གྲོང་ཁྱེར་དང་གྲོང་བརྡལ་གང་སར་ཞང་ཁང་།     ཨར་ཁང་།      རྒྱན་འཛུགས་ཁང་སོགས་ཆེ་ཆུང་དུ་མ་གསར་འཛུགས་བྱས་པའི་ཉེར་ལེན་གྱིས་བོད་མི་ན་གཞོན་དུ་མའི་མི་ཚེའི་མདུན་ལམ་དང་།      ལང་ཚོ་ཡོངས་སུ་བརླགས་དང་རླག་བཞིན་ཡོད་ལ།     བོད་དུ་སྔར་གྲགས་མ་མྱོང་བའི་ཉེན་ཚབ་ཆེ་བའི་འགོས་ནད་སྣ་ཚོགས་ཁྱབ་བརྡལ་དུ་འགྲོ་བའི་ཚད་གཞི་མགྱོགས་པ་དང་།     གྲངས་ཚད་མང་བ་བཅས་ཀྱི་གནས་ཚུལ་ཐོན་བཞིན་པ་དང་།      དེ་དག་ལ་དམིགས་པའི་སྨན་བཅོས་ཀྱི་མཐུན་རྐྱེན་མེད་པ།      མཐའ་ཁུལ་གྱི་ཞིང་འབྲོག་ས་ཁུལ་ཁག་གཅིག་ལ་ད་དུང་ཡང་གཞུང་ལམ་ཚད་ལྡན་མེད་པ་དང་མང་ཚོགས་ཀྱི་འཚོ་བའི་གནས་བབ་ཆེས་ཉམས་ཞན་ཡིན།     བོད་ནང་ལ་མཚོན་ན་དུས་ད་ལྟ་ཡང་ཞི་བདེ་ལྷིང་འཇགས་ཀྱི་འཚོ་བ་ཞིག་སྐྱེལ་ཐུབ་ཀྱི་མེད་ཅིང་།      ཕྱི་ལོ་  ༢༠༡༣  ལོའི་ཟླ་བ་  ༡༠   ཚེས་  ༡༨  ཉིན་བོད་ལྗོངས་ཉིན་རེའི་ཚགས་པར་ཐོག་ཞི་ཅིན་ཕིན་གྱི་བཏོན་པའི་བསམ་འཆར་ལུང་དྲངས་པ་“རྒྱལ་ཁབ་སྐྱོང་ན་ངེས་པར་དུ་མཐའ་མཚམས་སྐྱོང་པ་དང་།     མཐའ་མཚམས་སྐྱོང་པར་སྔོན་ལ་བོད་ལྗོངས་གཏན་འཇགས་ཡོང་དགོས་”ཞེས་དང་།     ཕྱི་ལོ་  ༢༠༡༣  ལོའི་ཟླ་བ་  ༡༠  ཚེས་  ༢༩  ཉིན་སྤེལ་བའི་འཕྲིན་ནང་“བོད་ལྗོངས་རྒྱུན་མཐུད་བརྟན་ལྷིང་དང་།   ཡུན་རིང་བརྟན་ལྷིང་།      ཁྱོན་ཡོངས་བརྟན་ལྷིང་བཅས་ཡོང་རྒྱུར་འགན་ལེན་བྱེད་དགོས་”ཞེས་པའི་བརྗོད་གཞིའི་འོག་“ཚད་མཐོའི་ཆབ་སྲིད་ཀྱི་དོགས་ཟོན་སྔ་ཕྱི་བར་གསུམ་དུ་རྒྱུན་འཁྱོངས་བྱེད་པ།      སྤྱི་ཚོགས་བརྟན་ལྷིང་སྲུང་སྐྱོང་གི་རྩ་བ་དེ་དམ་པོར་འཛིན་པ།     ལས་འགན་ཁ་གསལ་དང་འགན་འཁྲི་དོན་འཁྱོལ་བཅས་བྱས་ཏེ་ཚགས་ཚུད་དོ་ནན་གྱི་སྒོ་ནས་བརྟན་ལྷིང་སྲུང་སྐྱོང་གི་བྱེད་ཐབས་ཁག་དོན་འཁྱོལ་བྱ་རྒྱུར་དམ་འཛིན་ཡག་པོ་བཅས་བྱས་ཏེ་ཏང་གི་སྐབས་བཅོ་བརྒྱད་པའི་ཀྲུང་ཨུའུ་ཚང་འཛོམས་གྲོས་ཚོས་ཐེངས་གསུམ་པ་བདེ་བླག་ངང་འཚོག་ཆེད་བདེ་འཇགས་ཞི་མཐུན་གྱི་སྤྱི་ཚོགས་ཁོར་ཡུག་གཏོད་རྒྱུར་འགན་ལེན་དང་ལྗོངས་ཡོངས་རྒྱུན་མཐུད་བརྟན་ལྷིང་དང་།     ཡུན་རིང་བརྟན་ལྷིང་།     ཁྱོན་ཡོངས་བརྟན་ལྷིང་བཅས་ཡོང་རྒྱུར་འགན་ལེན་བྱེད་དགོས་”ཞེས་བཤད་ཡོད་པ་ལས་ང་ཚོས་གསལ་པོ་ཤེས་ཐུབ་པ་ནི་རྒྱ་ནག་གཞུང་གིས་ཁ་གཅིག་ནས་བོད་ནང་ཆབ་སྲིད་བརྟན་ལྷིང་ཡིན་རབས་དང་།      མི་དམངས་ཀྱི་འཚོ་བ་བདེ་སྐྱིད་ཡིན་རབས་ཀྱི་མི་བདེན་རྫུན་བསྒྲིགས་རྐྱང་རྐྱང་བརྗོད་དེ་འཛམ་གླིང་མི་དམངས་མགོ་སྐོར་གཏོང་ཐབས་བྱེད་ཀྱི་ཡོད་ནའང་།       དོན་དངོས་ཐོག་བོད་ནང་ཆབ་སྲིད་ཀྱི་རང་དབང་ཅུང་ཟད་ཙམ་མེད་པའི་ཐོག་སྤྱི་ཚོགས་བརྟན་ལྷིང་ལ་ཁ་གཡར་ནས་བོད་མི་རིགས་ལ་རྡུང་རྡེག་དང་།      འདྲ་མཉམ་དང་དྲང་བདེན་མེད་པར་མི་རིགས་དབྱེ་འབྱེད་ཀྱིས་སྲིད་ཇུས་བཟུང་ནས་དོན་ངོ་མའི་སྤྱི་ཚོགས་བརྟན་ལྷིང་མེད་པ་བཟོ་མཁན་གཙོ་བོ་དེ་རྒྱ་ནག་གཞུང་ཡིན་པས།      དྲང་བདེན་ལ་དགའ་བ་དང་།     འགྲོ་བ་མིའི་ཐོབ་ཐང་ལ་བརྩི་མཐོང་གནང་མཁན་གྱི་རྒྱལ་ཁབ་དང་།     ཚོགས་སྡེ་ཁག      མི་སྒེར་བཅས་ཚང་མས་རྒྱ་ནག་གཞུང་གི་དྲང་བདེན་གྱིས་ཕོངས་ཤིང་སྡུག་རྩུབ་ཀྱི་གཏིང་བརྣགས་པའི་སྲིད་ཇུས་ཀྱི་གདོང་རིས་ངོ་མ་དེ་གསལ་རྟོགས་གནང་རྒྱུ་དང་།       བྱེད་བབ་དེ་དག་ལ་ནུས་པ་ཐོན་པའི་བྱ་ཐབས་སྤེལ་རྒྱུར་འབོད་སྐུལ་ཡང་ཞུ་བཞིན་ཡོད།

བོད་ཀྱི་དགུ་བཅུ་གསུམ་ལས་འགུལ་ཚོགས་པ་ནས།
སྤྱི་ལོ་  ༢༠༡༣   ལོའི་ཟླ་བ་  ༡༡  ཚེས་   ༦   ཉིན་སྤེལ།


༄༅།  །མཁྱེན་ཡངས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བདུན་པའི་ཚོགས་གཙོ་རེ་མཱི་གྷ་སེ་ཨེག་ཁཱེ་ལེ་སི་ཧན་ཛལ་(Remigiusz Achilles Henczel)མཆོག་གི་༸ཞབས་དྲུང་དུ།

གུས་ཞུ།

བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་ཕྱི་ལོ་ ༢༠༡༣ ཟླ་བ་ ༡༡ ཚེས་ ༣ ནས་ཚེས་ ༥ ཉིན་བར་ཉིན་གྲངས་གསུམ་རིང་བཞུགས་སྒར་དྷ་རམ་ས་ལའི་གཙོས་ཉེ་འགྲམ་གྱི་ས་ཁུས་ཁག་གསུམ་ནས་ཁྱོན་མཚན་རྟགས་ཉི་སྟོང་ལྷག་བསྡུ་རུབ་ཞུས་ཡོད་པ་དང་། ཐེངས་འདིའི་མཚན་རྟགས་བསྡུ་རུབ་ཀྱི་གྲངས་འབོར་དེ་འདྲ་མང་པོ་ཞིག་མིན་ན་ཡང་། ཐེངས་འདིའི་ལས་འགུལ་གྱི་དམིགས་ཡུལ་གཙོ་བོ་ནི་དེ་སྔ་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བདུན་པའི་ཚོགས་མིའི་ནང་འོས་བབ་མེད་པའི་རྒྱ་ནག་གཞུང་འཛུལ་ཞུགས་བྱས་ཡོད་ཀྱང་། དེས་རྒྱ་ནག་རང་གི་འགྲོ་བ་མིའི་ཐོབ་ཐང་གནས་བབ་དྲག་ཏུ་ཕྱིན་མེད་པར་དེ་བས་སྡུག་རྩུབ་དང་། དྲག་གནོན་བྱེད་ཤུགས་ཆེ་རུ་བཏང་ཡོད་ཅིང་། ཕྱི་ལོ་ ༢༠༡༣ ཟླ་ ༡༡ ཚེས་ ༡༢ ཉིན་སླར་ཡང་རྒྱ་ནག་གཞུང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བརྒྱད་པའི་ཚོགས་མིའི་ནང་འཛུལ་ཞུགས་བྱ་འཆར་ཡོད་པ་དེ་ཉིད་ལ་དྲང་བདེན་གྱི་ཐོག་ནས་རྒྱ་ནག་གཞུང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་འོས་བབ་མེད་པའི་རྣམ་འགྱུར་གསལ་སྟོན་བྱེད་པའི་ཆེད་དུ་ད་ཐེངས་ཀྱི་ལས་འགུལ་འདི་སྤེལ་བ་ཡིན། དེ་ཡང་འདས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་སྐབས་བདུན་པའི་དུས་ཡུན་སྟེ་ཕྱི་ལོ་ ༢༠༠༦ ལོ་ནས་ ༢༠༡༢ ལོའི་བར་ལ་སྤྱིར་རྒྱ་ནག་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གནས་སྟངས་ཚད་གཞི་ཅི་ཙམ་ཞིག་ཡོད་པ་ས་རིས་ཐང་གསལ་དང་། ལྷག་པར་བོད་དང་ཡུ་གུར་མི་རིགས་ཀྱིས་གཙོས་པའི་གྲངས་ཉུང་མི་རིགས་སྟེང་སྤེལ་བའི་རྒྱ་ནག་གཞུང་གི་སྲིད་ཇུས་དང་སྡུག་རྩུབ་ཆེ་བའི་དྲག་པོའི་བཙན་གནོན་ཇི་བྱས་འཛམ་གླིང་རྒྱལ་ཁབ་ཁག་གི་མི་མང་ཚང་མས་གསལ་པོ་མཁྱེན་བཞིན་ཡོད་པས། འདི་ནས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་གྱི་སྲིད་གཞུང་ཞིག་འགྲོ་བ་མིའི་ཐོབ་ཐང་ཐོག་ལྟ་རྟོགས་བྱེད་མཁན་གྱི་ཚོགས་ཁོངས་སུ་འཛུལ་ཞུགས་བྱེད་རྒྱུར་ངོ་རྒོལ་མཐའ་གཅིག་ཏུ་ཡོད་པའི་རྣམ་འགྱུར་གསལ་སྟོན་བྱེད་ཀྱི་ཡོད་ན།     འགྲོ་བ་མིའི་ཐོབ་ཐང་ཐོག་ཐུགས་འཁུར་དང་འགན་འཁུར་གནང་མཁན་གྱི་རྒྱལ་ཁབ་ཁག་དང་། དབུ་འཁྲིད་རྣམ་པ། ལྷག་པར་དུ་ལྷན་ཚོགས་འདིའི་ཚོགས་མི་རྣམས་པས་ཐེངས་འདིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིའི་ཁོངས་འོས་བབ་གང་ཡང་མེད་པའི་རྒྱ་ནག་གཞུང་འཛུལ་ཞུགས་མི་ཆོག་པའི་དགག་བྱ་མཐའ་གཅིག་ཏུ་གནང་རོགས་ཞེས་འབོད་སྐུལ་ཞུ་བཞིན་ཡོད།    
བོད་ཀྱི་དགུ་བཅུ་གསུམ་ལསའགུལ་ཚོགས་པ་ནས།

ཕྱི་ལོ་  ༢༠༡༣  ་ལོའི་ཟླ་བ་ ༡༡  ཚེས་  ༦  ཉིན།

ངོ་བཤུས་འབུལ་ཡུལ།
རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་རྒྱལ་ཁབ་བརྒྱ་དང་དགུ་བཅུ་གོ་གཉིས།

གསར་འགོད་པ། ཆོས་ཉིད།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:
བསམ་ཚུལ། (2)
2 ༠༨༢༠༡༣༡༧༠༧
གཡག་རཱ་ལ་རྩེ།
ཁ་ནས་རང་བཙན་དང་དབུ་མའི་ལམ་གང་ལབ་མིན་ཁྱད་པར་འདྲ་འདུག་གམ། ཡང་ན་ལང་ཕྱོགས་ཞེས་པ་དེ་ཁ་ནས་ལབ་པ་ཙམ་ལས། དོན་དངོས་ཀྱི་ལས་འགུལ་དང་ལག་བསྟར་གང་གནང་ཐུབ་མིན་ལ་རག་ལུས་ཡོད།
1 ༠༧༢༠༡༣༠༦༣༥
འོ་དགུ་བཅུ་སུམ་ཚོགས་པ་འདི། ཟམ་གདོང་བླ་མའི་བཀའ་དགོངས་སུ་ཤར་སྐྱོད་བྱེད་མཁན་གྱི་ཚོགས་པ་ཞིག་ཡིན་པ་གྲགས་པས། ད་ཐེངས་ཁྱེད་ཚོས་། ང་ཧང་སངས་ངེ་བར་བཟོས་སོང་། ཁྱེད་ཚོས་ཁ་ནས་ཟམ་གདོང་བླ་མའི་བཀའ་ལ་གཙུག་ཏུ་བཀུར་དགོས་རབས་ཙམ་ལས། དོན་དངོས་ཁོང་གི་བཀའ་དང་རྦད་དེ་རྩ་འགལ་བྱེད་ཀྱིན་འདུག
ཟམ་གདོང་རིན་པོ་ཆེས་ལན་གྲངས་མང་པོར་ནན་གསུངས་བྱས་པ་ནི། ཀྲུང་ཧ་མི་དམངས་སྤྱི་མཐུན་རྒྱལ་ཁབ་དང་། དེའི་མཐོ་རིམ་མི་སྣ་ལ་ངོ་རྒོལ་སྐད་འབོད་རིགས་བྱ་མི་རུང་གསུངས། གལ་ཏེ་དེ་དག་བྱས་པ་ཡིན་ན། གྷན་དྷིའི་ལྟ་གྲུབ་དང་འགལ་འགྲོ་བ་མ་ཟད། འཚེ་བ་མེད་པའི་ལྟ་གྲུབ་དང་རྩ་འགལ་རེད། ཅེས་གསུངས་སོ།



བརྗོད་གཞི་གཞན་ཁག་ལ་གཟིགས།