ཟིན་བྲིས་པའི་འདྲ་པར།

ཕ་སྐད་གཙང་མའི་གླུ་གར།

23.03.2009 11:00:54
གཡུ་འབྲུག་སྔོན་མོ།

དང་བོ། གངས་ཉི་དང་བདག་གི་གསང་བ། ཉེ་བའི་ལོ་འགའི་སྔོན་ལ་ང་རང་ནུབ་བྱང་མི་རིགས་སློབ་ཆེན་གྱི་བོད་རིགས་སློབ་ཆེན་སློབ་མ་ཞིག་གི་མིང་བྱང་འཁུར་མཁན་ཞིག་ཏུ་གྱུར་ལ།  བོད་ཡིག་ཟིན་བྲིས་ཀྱང་དེ་དང་མཉམ་དུ་བདག་གི་མི་ཚེ་ལ་ལམ་འཇུག་བྱེད་མཁན་ཐོག་མའི་གྲས་མ་རེད་ཅེས་སུས་ཀྱང་ཁ་ཚོན་གཅོད་ག་ལ་ཐུབ། དུས་དེ་ནས་བཟུང་ངས་དྲ་ཐོག་གི་གྲོགས་པོ་མང་བོ་ཞིག་ངོ་ཤེས་ཤིང་འདྲིས་པར་གྱུར།


ཐ་ན་ངའི་གྲོགས་པོ་ཐེའུ་རང་དང་ངེད་གཉིས་ཀྱང་འཛིན་གྲྭ་གཅིག་གི་སློབ་གྲོགས་སུ་གྱུར་བ་ནས་སྙིང་གཏམ་གླེང་བ་མ་ཡིན་པར། དྲ་བ་གཅིག་གི་དྲ་གྲོགས་སུ་གྱུར་བ་ནས་ངེད་གཉིས་ལ་འབྲེལ་འདྲིས་བྱུང་བ་ཡིན། དྲ་ཐོག་གི་གྲོགས་པོ་འདི་དག་ལས་གྲོགས་གངས་ཉི་ལགས་ནི་ང་ལ་བག་ཆགས་ཆེས་ཟབ་ཅིང་། དང་བོ། གངས་ཉི་དང་བདག་གི་གསང་བ། ཉེ་བའི་ལོ་འགའི་སྔོན་ལ་ང་རང་ནུབ་བྱང་མི་རིགས་སློབ་ཆེན་གྱི་བོད་རིགས་སློབ་ཆེན་སློབ་མ་ཞིག་གི་མིང་བྱང་འཁུར་མཁན་ཞིག་ཏུ་གྱུར་ལ།  བོད་ཡིག་ཟིན་བྲིས་ཀྱང་དེ་དང་མཉམ་དུ་བདག་གི་མི་ཚེ་ལ་ལམ་འཇུག་བྱེད་མཁན་ཐོག་མའི་གྲས་མ་རེད་ཅེས་སུས་ཀྱང་ཁ་ཚོན་གཅོད་ག་ལ་ཐུབ། དུས་དེ་ནས་བཟུང་ངས་དྲ་ཐོག་གི་གྲོགས་པོ་མང་བོ་ཞིག་ངོ་ཤེས་ཤིང་འདྲིས་པར་གྱུར། ཐ་ན་ངའི་གྲོགས་པོ་ཐེའུ་རང་དང་ངེད་གཉིས་ཀྱང་འཛིན་གྲྭ་གཅིག་གི་སློབ་གྲོགས་སུ་གྱུར་བ་ནས་སྙིང་གཏམ་གླེང་བ་མ་ཡིན་པར། དྲ་བ་གཅིག་གི་དྲ་གྲོགས་སུ་གྱུར་བ་ནས་ངེད་གཉིས་ལ་འབྲེལ་འདྲིས་བྱུང་བ་ཡིན། དྲ་ཐོག་གི་གྲོགས་པོ་འདི་དག་ལས་གྲོགས་གངས་ཉི་ལགས་ནི་ང་ལ་བག་ཆགས་ཆེས་ཟབ་ཅིང་།  བློ་སེམས་ཆེས་ཉེ་བའི་གྲོགས་པོ་ཞིག་ཡིན་ལ། ང་དང་འདྲ་བའི་དྲ་གྲོགས་ཁྱོད་ཚོ་ཡང་ཁོ་ལ་བར་ཐག་ཤིན་ཏུ་ཉེ་བར་ངེས། ནམ་རྒྱུན་དྲ་བ་བརྒྱུད་ནས་ངས་ཁོང་གི་བསམ་བློ་དང་སྙིང་སྟོབས་ཀློག་གིན་ཡོད་ལ། ཁོས་ཀྱང་ངའི་བརྩམས་ཆོས་འགའ་རེ་ཀློག་གིན་ཡོད་ཅེས་ང་ལ་ཡང་དང་བསྐྱར་དུ་བཤད་མྱོང་ཞིང་།  སྙིང་སྟོབས་དང་སྒུལ་ཤུགས་མང་དུ་བྱིན་མྱོང་བ་ཁྱོད་ཚོས་ག་ལ་ཤེས། 

གཉིས་པ།  གངས་ཉི་དང་ཁ་སང་གི་གསར་འགྱུར།

ཧི་གཟུགས་ཟིན་བྲིས་དང་མཆོད་མེ་པོད་ཁུག་མ་བྱུང་བའི་ཡར་སྔོན་དུ།  འུ་ཅག་ལ་སྙིང་གཏམ་གླེང་སའི་སྟེགས་བུ་ལེགས་པོ་ཞིག་ཡོད་པ་ནི་བོད་ཡིག་ཟིན་བྲིས་ཡིན་ལོས་ཆེ། བོད་ཡིག་ཟིན་བྲིས་སུ་ཐོག་མའི་དུས་ན་ཟིན་བྲིས་པ་ཧ་ཅང་ལེགས་པོ་སྐོར་རེ་ཡོད་ན་ཡང་།  གྲོགས་པོ་གངས་ཉི་ལགས་ནི་བོད་ཡིག་ཟིན་བྲིས་འདིར་འཁྲིགས་ཆ་དོད་པོ་བཟོ་མཁན་ཞིག་རེད་ལ། གསར་འགྱུར་དང་འབོལ་རྩམ། སྙན་ངག་སོགས་འུ་ཅག་གི་བགོ་སྐལ་དུ་ཁོང་གི་བསམ་བློའི་རྒྱགས་ཕྱེ་མང་དུ་བསྟར་བས། སྐོམ་པས་མྱོས་ཀྱིན་པའི་དྲ་གྲོགས་ཚོ་འཚང་ཁ་འུར་འུར་གྱིས་ཁོང་གི་རྨི་ལམ་དཀྲོགས་པར་ཆས་མྱོང་བ་རེད། ལྷག་པར་དུ། བར་སྐབས་ཤིག་ལ་ཁོང་གི་བོད་ཡིག་ཟིན་བྲིས་ཀྱི་སྒོ་བརྒྱབས་པ་དེས་འུ་ཅག་ལ་ཉེན་བརྡ་ཆེན་པོ་ཞིག་བྱིན་ན་ཡང་།  འདི་ལ་སེམས་ཁུར་བྱེད་མཁན་གྱི་མི་ནི་གངས་ཉི་རང་ཉིད་ལས་སུ་ཞིག་ཡོད་ཨང་། སྐབས་འདིར་ཐོན་དུས་གྲོགས་པོ་རེ་གཉིས་ཀྱིས་ང་རང་ཡོད་ཅེས་ལག་པ་ཡར་དུ་འགྱོགས་ན།  ངས་དེ་ལ་སྙིང་ཐག་པ་ནས་བཀའ་དྲིན་ཆེ་ཞུ་གི་ཡིན།  ཡིན་ན་ཡང་།  སྐུ་ཞབས་གངས་ཉི་ལགས་ཀྱི་དཔའ་སྤོབས་དེ་དེ་ཙམ་གྱིས་ག་ལ་འདུལ་ཐུབ་ཏེ་མ་ཐུབ་བོ།  །  ཁོང་གིས་ད་དུང་མུ་མཐུད་དུ་རང་ཉིད་ཀྱི་ཁེར་ལམ་དེད་དེ་ལམ་ལ་ཆས་བྱུང་བས།  སྐྲ་ལོ་རིང་དུ་སྐྱེས་པའི་གྲོགས་པོ་ཚོ་ཁོང་ལ་ཡིད་སྨོན་འཆོར་ཞིང་དཔའ་སྤོབས་རྒྱས། དུས་དེ་ནས་བཟུང་།  ཁོང་གིས་ཟིན་བྲིས་ཀྱི་ཁྱད་ཆོས་གཞན་ཞིག་རྙེད་པ་ནི་འདྲ་པར་གྱིས་ཟུར་བརྒྱན་བྱེད་པའམ།  ཡང་ན་འདྲ་པར་ལས་འཇིག་ཉེན་བརྗོད་པ་དེ་རེད།  སྐབས་དེ་ནས་བཟུང་།  ཡང་མང་བོ་ཞིག་གིས་དེ་ལ་ལད་ཟློས་བྱས་ཏེ་འདྲ་པར་འཇོག་པའི་སྲོལ་ཞིག་ག་ལེར་དར་དང་དར་བཞིན་མཆིས། 

གསུམ་པ།  གངས་ཉི་དང་དེ་རིང་གི་འཇིག་ཉེན།

ཁ་སང་གྲོགས་པོ་ཞིག་གིས་གསར་འགྱུར་ལྟ་བུའི་སྐད་ཅིག་འཁྱེར་འོང་བ་ནི་གྲོགས་གངས་ཉི་ལགས་འཛིན་བཟུང་ཐེབས་སོང་ཞེས་པ་དེ་རེད། སྐབས་དེར་ང་ལྟ་བུའི་གྲོགས་པོ་ཚང་མའི་བློ་ཁ་བདེ་ལ་འབབ་ཐུབ་ཀྱིན་ཡོད་ཚོད་མ་རེད། ཡིན་ན་ཡང་།  སྐབས་དེའི་ཁོར་ཡུག་གི་དབང་གིས་ངས་གྲོགས་པོ་དེར་རྒྱུ་མཚན་དང་གནས་ལུགས་མང་དུ་འདྲི་མ་ཐུབ། གྲོགས་པོ་འདིས་བཤད་པ་བདེན་པར་ཆོག་ལ་མ་བདེན་ཡང་ཆོག  གང་ལྟར་འདི་ལས་ཁོ་བོས་འཇིག་ཉེན་ཞིག་ཚོར་ཞིང་། གྲོགས་པོ་གངས་ཉི་ལྟ་བུའི་དྲ་གྲོགས་མང་བོ་ཞིག་ག་ལེར་དྲན་འོང་གི  སྤྱིར་ན་གནས་ལུགས་བཤད་རྒྱུ་ནི་འུ་ཅག་གི་འགན་དབང་ཡིན་ན་ཡང་།  ཁ་སང་དེ་རིང་གནས་ལུགས་ལ་རྡོག་བརྫིས་གཏོང་ཞིང་གནད་དོན་ལ་དབྱེ་ཞིབ་མི་བྱེད་པས།  ད་དུང་གྲོགས་པོ་གངས་ཉི་ལྟ་བུའི་འུ་ཅག་གི་ཤེས་ཡོན་ཅན་དུ་ཙམ་འཁྲིད་འགྲོ་བར་བསམ་ན།  གློག་ཀླད་དྲ་བ་འདིའི་མདུན་ནས་བདག་གིས་ཅི་ཞིག་འབྲི་དགོས་པ་ཡང་ཡེ་ནས་ཚོར་གྱིན་མི་འདུག

བཞི་བ།  གངས་ཉི་ལས་གྲོགས་ཐེའུ་རང་གླེང་བ།

ཉེ་བའི་དུས་ཡུན་འདིའི་རིང་ལ་བདག་གི་ཉེ་འཁོར་དུ་འཇིག་ཉེན་གྱི་རླུང་འཚུབ་རྟག་ཏུ་ལྡང་གིན་པ་སུ་ཞིག་གིས་ཚོར་རམ།  སྐབས་འདིར་ངས་ཀྱང་རང་ཉིད་ཀྱི་སྨྲ་ལྕེ་རང་ཉིད་ཀྱིས་བསྡམས་འདོད་ཡེ་ནས་མེད་དེ། འདི་ནི་དགྱ་ནག་གི་དཔོན་གནས་རིང་ལུགས་པ་ཚོའི་བྱ་སྤྱོད་ཅིག་དང་འདྲ་བས་སོ། །  གྲོགས་པོ་ཐེའུ་རང་ནི་འུ་ཅག་ལ་བག་ཆགས་ཧ་ཅང་ཟབ་ཤོས་ཀྱི་སློབ་ཆེན་སློབ་མ་ཞིག་ལགས་པས།  སྐབས་འདིར་གྲོགས་པོ་མང་བོ་ཞིག་གིས་རིག་པ་སྒྲིམ་ཏེ་མིག་ཟུང་ཅེར་ནས་ཀློག་གིན་ཡོད་སྲིད།  བཀའ་དྲིན་ཆེ། ཁྱོད་ཚོས་མུ་མཐུད་ཀློགས་དང་ངས་ཀྱང་མུ་མཐུད་དུ་འཆད་འོང་།  ཉིས་སྟོང་བརྒྱད་ལོར་ཤར་དུང་རི་ནི་ཚང་མས་རེ་བ་བཅའ་ས་ཞིག་ཏུ་གྱུར་ཡོད་པ་རེད་ལ།  རེ་འབྲས་དོན་སྨིན་བྱུང་བ་ཡང་རེད།  ཡིན་ན་ཡང་།  མང་བོ་ཞིག་གིས་དེའི་ཁྲོད་ཀྱི་རྩོམ་པ་པོ་དག་ལ་ཡིད་སྨོན་དང་སེམས་ཁུར་བྱེད་ཀྱིན་ཡོད་པ་ལས་དེབ་འདིའི་རྩོམ་སྒྲིག་པ་དག་ལ་སེམས་ཁུར་བྱེད་ཀྱིན་མེད་ལོས་ཆེ། རྒྱུ་མཚན་ཡང་ཧ་ཅང་སླ་སྟེ། དེབ་འདིས་གནས་ལུགས་དང་གནོད་དོན་བཤད་ཀྱིན་ཡོད་པས་སོ། ། ཡིན་ན་ཡང་།  ངས་ཁྱོད་ཚོར་སྙིང་རླུང་ལྡང་བའི་དོན་ཞིག་བཤད། ཉེ་ལམ་འདི་ཚང་གིས་སྤྱང་ལྟོགས་ལུག་ལ་རྔམ་པ་ལྟར་འོང་སྟེ།  ཤར་དུང་རིས་འཇིགས་པོ་ཞིག་བཤད་ཡོད་རབས་དང་། དེའི་སྐོར་གྱི་གནས་ཚུལ་དག་ལ་བརྩད་གཅོད་བྱེད་ཀྱིན་པ་སུ་ལ་ཡང་གསང་ཐབས་ཡོད་པ་མ་རེད། ཡང་ཡ་མཚར་བ་ཞིག་ལ་ཐེའུ་རང་གི་སྐྲ་ལོ་རིང་བོ་དེ་ཁོ་ཚང་གི་མིག་ལ་མ་མཛའ་བས་མིན་ན། ཐོག་མར་ཐེའུ་རང་ལ་འདྲི་གཅོད་ཚ་ནན་གཏོང་གིན་འདུག  སློབ་ཁྲིད་ཀྱི་ཁེ་དབང་ཡོངས་སུ་འཕྲོག་ནས། ཅི་ཞིག་ཧ་གོ་སོང་བའི་ཚུལ་གྱིས། དོན་དངོས་སུ་ཅི་ཡང་ཧ་གོ་གི་ཡོད་ཚོད་མ་རེད། གལ་ཏེ་ཧ་གོ་གི་ཡོད་ན།  དེ་རུ་བོད་ཀྱི་ཤེས་ཡོན་ཅན་སྐོར་ཞིག་གིས་གནས་ལུགས་ཀྱི་རི་མོ་གསལ་བོར་བྲིས་ཡོད་པ་རེད། གནས་ལུགས་བཤད་དབང་ཡང་མེད་ཟེར་ན། ཉིད་སྟོང་བརྒྱད་ཀྱི་རྡུང་གཅོག་འཕྲོག་བསྲེག་ཅེས་པའི་ཉེས་མིང་འཇིགས་ཡེར་བ་དེ་སྔོན་ནས་ཁོ་ཚོས་རང་ལ་གྲ་སྒྲིག་བྱས་པ་ཤ་སྟག་རེད།

ད་དུང་མཇུག་མཐར་བཤད་རྒྱུར།  ཐེངས་རྗེས་མར་ཡང་བསྐྱར་ཁྱོད་དང་ཐུག་དགོས་ཚེ། དེ་ནི་ཤོག་བུ་དང་སྨྱུ་གུའི་འབྲེལ་བ་མིན་པར། ལྕགས་ཐག་དང་ཚེ་སྲོག་ལྟ་བུའི་འབྲེལ་བ་ཡིན་ཚུལ་གྱི་སྐད་ཆ་སྦོམ་པོ་རེ་ཡང་བཤད་སོང་བ་རེད།  སྐད་ཆ་འདིར་བལྟས་ན།  འདི་ཚང་གིས་གང་ཞིག་ནས་གནད་དོན་ཞིག་བུད་སོང་ཁུལ་གྱི་ཁ་གཡར་ཏེ་འུ་ཅག་གི་ན་གཞོན་ཤེས་ཡོན་ཅན་འདི་ནམ་ཞིག་ལ་གང་ཞིག་ཏུ་ཁྲིད་མི་འགྲོ་བའི་ངེས་པ་ཡེ་ནས་ཡོད་ཚོད་མ་རེད། གནས་ལུགས་དང་རྒྱུ་མཚན་ཅི་ཡང་མེད་པའི་སྒོ་ནས།  གོ་སྐབས་ལ་སྒུག་ཏེ་གོ་གནས་སྤར་བར་འདོད་པའི་ལྟོ་ཆེན་དེ་ཚོས། རང་ཉིད་ཀྱིས་བྱས་རྗེས་ཤིག་བཞག་ཡོད་རབས་ཀྱིས། བདག་གི་གྲོགས་པོ་ཁོང་ཡང་ཁྲིད་མི་འགྲོ་བའི་ངེས་པ་ག་ལ་ཡོད།

ལྔ་བ།  གངས་ཉི་དང་ཤེས་ཡོན་ཅན་གྱི་འཇིག་ཉེན།

མི་ཉིད་ནི་རྒྱུ་འབྲས་དང་གནས་ལུགས་ཀྱི་མདུན་ནས་འདྲ་མཉམ་ཡིན་ཞེས་པ་དེ།  ད་ལྟ་བདག་གི་ཁོར་ཡུག་ཏུ་ཡེ་ནས་མཐོང་གིན་ཡོད་ཚོད་མ་རེད། གལ་ཏེ་དེ་ལྟར་ཡིན་ན།  ཤེས་ཡོན་ཅན་ནི་རྒྱལ་ཁབ་དང་མི་རིགས་ཀྱི་ལས་དབང་ལ་སེམས་ཁུར་བྱེད་མཁན་གྱི་དཔུང་སྡེ་གཙོ་བོ་རེད་ལ།  གནས་ལུགས་དང་རྒྱུ་འབྲས་འཚོལ་གྱི་གཟུ་བོ་ཡང་རེད།  དེ་བས།  དེ་དག་གིས་ཅི་ཞིག་བཤད་ཀྱིན་ཡོད་མེད་ལ་ངེས་པར་དུ་མཉམ་འཇོག་བྱ་དགོས་ཀི་རེད་ལ།  གནས་ལུགས་ཡོད་མེད་ལ་བརྟག་དཔྱད་ཡག་པོ་གཏོང་དགོས་ཀི་རེད། འདི་ནི་ཁྲིམས་འགལ་དང་གན་ཡང་ལུགས་འགལ་རེད་ཟེར་ནས།  ལྕགས་ཐག་གི་འདང་ཚོད་ཅིག་ཁྲིད་ནས་སོང་ན།  ཁྱོད་ཚང་གི་ལྕགས་ཐག་ལ་ཚད་མེད་ཀྱང་ངེད་ཚང་གིས་ཤེས་ཡོན་ཅན་ལ་ཚོད་ཡོད་པས།  ཡེ་ནས་འདང་གི་མ་རེད། ཞོགས་ལྗང་།


  
 

25.03.2009 08:05:38


 
 
05.04.2009 07:13:22

ལག་བྱུང་ཐུགས་རྗེ་ཆེ། མུ་མཐུད་བོད་ཀྱི་སྐད་ཡིག་འདི་ཉིད་གོང་འཕེལ་གཏོང་རོགས་མཛོད་གྲོགས་ལགས།

 
 
རྩོམ་ཡིག་འདིར་ལན་འདེབས།
མྱུག་མིང༌།:

E-mail:

  གཡོན་དུ་གསལ་བའི་ཚིག་འབྲུ་བྲིས།:
 



| -