ཟིན་བྲིས་པའི་འདྲ་པར།

ཕ་སྐད་གཙང་མའི་གླུ་གར།

12.01.2009 11:49:31
དགེ་རྙིང་ས་བོན།

ཟླ་ཤས་སྔོན་བཀའ་ཁྲི་ཟམ་གདོང་ལགས་ནས་དེང་དུས་ཀྱི་ནང་ཆོས་བཤད་མཁན་དག་གིས་དེང་རབས་ཀྱི་འགྲོ་སྟངས་དང་མཐུན་པའི་སྒོ་ནས་ཆོས་བཤད་རྒྱུ་ལས་གནའ་སྔ་མོའི་ལུགས་སྲོལ་སྐྱར་ཟློས་ཡང་ཡང་མི་བྱེད་རྒྱུ་དང༌། བཤད་སྟངས་དེ་ཡང་མདོར་དྲིལ་ན་དེང་སང་གི་མིའི་འདོད་བློ་དང་འཚམ་པ་ཞིག་བཤད་རྒྱུ་དེ་རེད་ཟེར།


 འདིར་ང་རང་གིས་ཨ་རིའི་ནང་དུ་ལོ་ངོ་དྲུག་གི་རིང་ལ་ཕྱི་གླིང་བ་ཚོར་ནང་ཆོས་ཕྲན་བུ་ཞིག་ངོ་སྤྲོད་བྱས་པའི་ཉམས་མྱོང་འདྲ་བོ་ཞིག་མཚམས་སྦྱོར་བྱས་པ་ཡིན་ན།ཨ་རིའི་མི་ཕལ་མོ་ཆེར་གཞི་རིམ་སློབ་སྦྱོང་གི་ཤེས་ཚད་ཡོད་པས། ནང་པ་མ་ཆགས་པའི་སྔོན་དང་ཡང་ན་ནང་པ་ཆགས་པའི་ཕྱི་ཉིན་ནས་བཟུང་སྟེ་ནང་ཆོས་ངོ་སྤྲོད་ཀྱི་དཔེ་དེབ་འབོར་ཆེན་ཞིག་ཀློག་རྒྱུའི་གོམས་གཤིས་བཟང་པོ་ཞིག་འདུག་ལ།དེ་ཡང་ང་ཚོ་བོད་པ་ལ་མཚོན་ན་ཆོས་ལུགས་ཀྱི་ཕྱོགས་ཞེན་འཇིགས་སུ་རུང་བ་འདི་ངོ་མ་ཅིག་བཙོག་པས། གལ་སྲིད་དགེ་ལུགས་པའི་མཁས་པའི་བརྩམས་ཆོས་ཤིག་ཡིན་ན་ས་སྐྱ་དང་བཀའ་བརྒྱུད་པ་སོགས་ཀྱིས་ཕལ་ཆེར་ལག་པ་ཡང་མི་འཆང་བ་དང༌། དེ་བཞིན་དགེ་ལུགས་པའི་གྲྭ་པ་དག་གིས་རྙིང་མ་དང་བཀའ་བརྒྱུད་པའི་རྫོགས་ཆེན་ཕྱག་ཆེན་ལྟ་བུར་མིག་ཟུར་ཡང་མི་གཡོ་བའི་ལུགས་སྲོལ་གུ་དོག་འདི་འདྲ་ཞིག་ཕྱི་རྒྱལ་བ་ཚོའི་མང་ཤོས་ཤིག་ལ་མི་འདུག ཁོ་ཚོ་དེབ་འདྲ་མིན་ཀློག་རྒྱུའི་ལུགས་སྲོལ་དེའི་གཏིང་རུམ་དུ་བྱིངས་ཟིན་པས། ནང་ཆོས་ཀྱི་དེབ་ཅིག་ཡིན་ན་དེའི་རྩོམ་པ་པོ་དེའི་ཆོས་རྒྱུད་གང་ཡིན་རྩད་གཅོད་བྱེད་རྒྱུ་དེ་ཨང་དང་པོར་མི་འཇོག་པར་དེབ་དེའི་བརྗོད་བྱ་དེ་ཅི་ཞིག་རེད་ཨང་དང་པོར་ལྟ་གིན་འདུག དེ་ནས་ཆོས་ཚོགས་ཤིག་ལ་མཚོན་ན་ཟླ་བ་ཞིག་གི་ཉི་མ་ངེས་ཅན་འགའ་རེར་ནང་ཆོས་ཉམས་ལེན་པ་ཚོ་མཉམ་དུ་འདུས་ནས་ནང་ཆོས་ཀྱི་དཔེ་དེབ་ལ་ལྟ་ཀློག་དང་དེས་རང་རང་ལ་བཞག་པའི་ཚོར་བ་དང་ཉམས་མྱོང་བརྗེ་རེས་བྱེད་པ་དང༌། དེབ་དེ་ཚོའི་ནང་ནི་དཀའ་གནད་ཀྱི་རིགས་ལ་ཟིན་ཐོ་བཀོད་དེ་བླ་མ་དགེ་བཤེས་ནང་ཆོས་ལ་ཆ་རྒྱུས་ཡོད་པ་དག་ལ་འདྲི་ཞིབ་ཀྱིས་རང་རང་གི་ཐེ་ཚོམ་གཅོད་པའི་ཐབས་ལ་འབད་ཀྱིན་འདུག དེ་བཞིན་བླ་མ་དགེ་བཤེས་དག་གིས་ཀྱང་ཕྱི་གླིང་བ་ཚོར་ཐོག་མར་ནང་པར་འཇུག་པའི་སྒོ་ཐོག་མ་སྐྱབས་འགྲོའི་སྡོམ་པ་སྤྲོད་པ་དང་དེ་ནས་ལམ་ཐུན་མོང་བས་རྒྱུད་སྦྱོང་བ་སྟེ་སྔོན་འགྲོ་འབུམ་ལྔ་ལྟ་བུའི་རིགས་ལ་སྒོམ་སྒྲུབ་བྱེད་དུ་འཇུག་པ་དང༌། དེ་ནས་དབང་རྗེས་གནང་གི་རིགས་སྐུར་དུས་བོད་པ་ཚོར་བྱེད་པ་བཞིན་ཤར་རྒྱག་ཚར་གཅིག་ཀློག་པ་དེ་འདྲ་མ་ཡིན་པར། ཡི་དམ་གྱི་ལྷ་དེའི་སྐོར་ངོ་སྤྲོད་དང་འབྲེལ་སྐུ་གསུང་ཐུགས་ཀྱི་དབང་སྐུར་སྐབས་ཀྱི་དབང་གི་དམིགས་རྣམ་སྐྱོང་དུ་འཇུག་གིན་འདུག་ལ། དེ་འདྲ་བྱས་ནས་དབང་དོན་ངོ་འཕྲོད་ན་ད་གཟོད་དབང་ཐོབ་པའི་གོ་ཡང་ཆོད་པ་ནི་ནང་པའི་ཆོས་ཀྱི་འགྲོ་སྟངས་ངོ་མ་དེ་ལོས་ཀྱང་ཡིན། ཡིན་ན་ཡང་བོད་པ་ནང་བཞིན་བླ་མ་སྤྲུལ་སྐུ་ཞིག་གི་མིང་ཐོགས་ཚད་ལ་མགོ་སྒུར་བྱེད་པའི་ལུགས་སྲོལ་ཅུང་ཟད་ཁྱབ་ཆུང་ལ། གལ་སྲིད་བླ་སྤྲུལ་དགེ་བཤེས་དེའི་མདུན་ནས་རང་ལ་མེད་པའི་ཤེས་བྱ་ཡོན་ཏན་རེ་རེག་པ་ཡིན་ན་གཞི་ནས་མགོ་བོ་སྒུར་བཞིན་འདུག ཡིན་ན་ཡང་ཕྱི་གླིང་བ་ཡོད་ཚད་དེ་འདྲ་ཡང་ག་ལ་ཡིན། རྨོངས་དད་ཅན་ཡང་གང་འཚམ་ཞིག་འདུག་ལ་ཆོས་བརྒྱུད་ཀྱི་ཕྱོགས་ཞེན་ཅན་ཡང་འདུག ད་དུང་བོད་པ་ནང་བཞིན་དབང་སྐུར་ཞིག་ཞུས་ནས་འདོད་པ་ཚིམ་སྟེ་སྡོད་མཁན་དང་གསང་སྔགས་ཀྱི་དབང་སྐུར་མ་ཞུས་ན་ནང་པའི་སློབ་དཔོན་ལ་བླ་མར་མི་བཀུར་བའི་ལུགས་སྲོལ་དེ་ཡང་ཤ་ཐོན་རུས་ཐོན་དུ་སྐྱོང་མཁན་གང་མང་འདུག ཁོ་ཚོའི་ཡོན་ཏན་གལ་ཆེན་གཅིག་ནི་རང་གིས་མི་ཤེས་པ་དེ་ཐད་ཀར་བླ་མ་དགེ་བཤེས་སོགས་ཆོས་ཀྱི་སློབ་དཔོན་དེ་ལ་འདྲི་རྒྱུའི་གོམས་གཤིས་བཟང་པོ་དེ་རེད། དེ་བཞིན་ཆོས་ཀྱི་སློབ་དཔོན་གྱིས་ནང་ཆོས་བཤད་དུས་སྒྲ་ལེན་པ་དང་ཟིན་ཐོ་འབྲི་བ་གཉིས་ནི་ཧ་ཅང་གལ་ཆེན་དུ་རྩི་གིན་འདུག་ལ། སྐད་སྒྱུར་ཅི་ཙམ་བཟང་ན་ཡང་ཆོས་ཀྱི་སློབ་དཔོན་དེ་རང་གིས་དབྱིན་སྐད་ཀྱིས་བཤད་པའི་ཆོས་ལ་དོ་སྣང་ཆེན་པོ་འདུག ཁོ་ཚོའི་མང་པོ་ཞིག་གིས་སྐད་སྒྱུར་ཅི་ཙམ་ཞིག་བཟང་ན་ཡང་ཚིག་གནད་འགག་ཅན་དེ་འདྲ་ལྷགས་འགྲོ་བས་སློབ་དཔོན་རང་གི་ཞལ་ནས་ཐོན་པ་དེར་བྲོ་བ་དམིགས་བསལ་བ་ཞིག་འདུག་ཟེར། དེ་ནི་གོང་ས་མཆོག་གིས་ཀྱང༌། བོད་པ་ཚོས་ངས་གང་བཤད་ལ་ཟིན་བྲིས་འདེབ་ཀྱི་མ་རེད། ཡིན་ན་ཡང་ཕྱི་གླིང་བ་ཚོས་ལམ་སེང་ཤོག་བུ་དང་སྨྱུ་གུ་ཞིག་བླངས་ནས་ཟིན་བྲིས་འདེབ་ཀྱི་རེད་གསུངས་པ་དེ་ཁོ་ན་རེད། ཁོ་ཚོའི་ཞན་ཆ་དག་ལས་ང་ཚོའི་མིག་ལམ་དུ་ཆེས་མི་མཛེས་པ་ཞིག་ནི་ཁོ་ཚོའི་རིག་གཞུང་གི་ནང་ལ་མེད་པའི་རྐྱེན་གྱིས། དཔེ་དེབ་གཞན་དང་འདྲ་བར་ནང་ཆོས་ཀྱི་དེབ་ཀྱང་གདན་ཐོག་ཏུ་མི་འཇོག་པ་དང་དེའི་སྟེང་དུ་མི་འགོམ་པ་སོགས་ལ་དོ་སྣང་ཧ་ཅང་དཀོན། དེ་བཞིན་མི་ཕལ་མོ་ཆེ་ཡི་གཤིས་ཀ་སྟེ་ཟབ་ཟབ་གཉན་གཉན་ཞིག་ལ་འཇུ་རྒྱུར་དགའ་མོས་ཡོད་པ་དང༌། རྒྱུ་མ་བསྒྲུབས་པར་འབྲས་བུ་ལ་རེ་མཁན་ཡང་གྲངས་ཀྱིས་ག་ལ་ཆོད། གང་ལྟར་བོད་ཀྱི་ནང་ཆོས་འདི་ལ་བརྟེན་ནས་ཕྱི་གླིང་བ་ཁྲི་ཕྲག་མང་པོ་ཞིག་གིས་བོད་པ་ཟེར་བའི་མི་རིགས་ཉམས་ཆུང་འདི་ངོ་ཤེས་པ་དང་དེ་དང་ལྷན་དུ་ཆེ་ཆུང་མི་འདྲ་བའི་ཤ་ཚ་སེམས་ཁུར་རེ་ཡང་ཉིན་རེ་ནས་ཉིན་རེར་ཡར་རྒྱས་སུ་འགྲོ་བཞིན་པ་ནི་ང་ཚོས་མཐོང་བཞིན་པ་འདི་རེད། དེ་བཞིན་ཁོ་ཚོས་རང་གི་ལུགས་སྲོལ་དེ་རང་གི་བྱིས་པ་ལ་ཡང་འགོ་རུ་འཇུག་པ་སྟེ། གཟའ་ཉི་མ་དག་ཏུ་རང་རང་གི་ཕྲུ་གུ་དག་ཆོས་ཚོགས་སུ་ཁྲིད་ཡོང་ནས་སྐྱབས་གསུམ་དང་བདེན་བཞི། སྟོན་པའི་མཛད་རྣམ་སོགས་ངོ་སྤྲོད་བྱེད་པའི་ལུགས་སྲོལ་ཡིད་དབང་འཕྲོག་པ་ཞིག་ཀྱང་འདུག ཡིན་ན་ཡང་ཕྱི་གླིང་བ་ཆོས་ཚོགས་སུ་ཡོང་མཁན་ཚང་མ་ནང་པའི་ཆོས་ལ་ཧབ་ཤ་ལངས་ནས་ཡོང་བ་ཞིག་ག་ལ་ཡིན། ཨ་རི་ལྟ་བུར་མཚོན་ན་མི་ས་ཡ་དུ་མ་ཁེར་རྐྱང་གི་སྡུག་བསྔལ་གྱིས་མནར་བཞིན་ཡོད་པས། རང་རང་གི་གནས་སྐབས་ཀྱི་སུན་སྣང་སེལ་ཐབས་དང་ཡང་ན་དགའ་རོགས་རེ་ཨེ་རེག་གི་རེ་བས་དེད་དེ་བོད་པའི་ཆོས་ཚོགས་སུ་ཡོང་མཁན་ཡང་ཡོད་པ་རེད། དེ་བཞིན་བོད་པའི་ནང་ཆོས་དེ་དོན་ངོ་མར་ག་འདྲ་ཞིག་རེད་འདུག བོད་པའི་བླ་མ་གྲྭ་པ་དེ་ཚོའི་བྱ་སྤྱོད་ག་འདྲ་ཞིག་འདུག་པའི་ཉམས་ཚོད་ལེན་དུ་ཡོང་མཁན་ཡང་ཡོད་སྲིད།


  
 

རྩོམ་ཡིག་འདིར་ལན་འདེབས།
མྱུག་མིང༌།:

E-mail:

  གཡོན་དུ་གསལ་བའི་ཚིག་འབྲུ་བྲིས།:
 



| -