ཟིན་བྲིས་པའི་འདྲ་པར།

ཕ་སྐད་གཙང་མའི་གླུ་གར།

20.01.2010 22:37:30
བེ་རི་འཇིགས་མེད་དབང་རྒྱལ།

ཉི་མའི་གོ་ལ་ནུབ་མཐའི་སྤྲིན་གསེབ་ཡིབས།།
ལས་གྲྭ་ཕལ་ཆེར་ལས་ཐག་གཅོད་ལ་ཉེ།།
ན་ལེནྡྲ་ནས་ས་འོག་མེ་འཁོར་རྒྱུད།།
བྷེལ་ཇམ་བོད་རིགས་ཚོགས་པའི་མཇལ་འཕྲད་བཅར།།

ཟློག་མེད་ལས་དབང་འོག་ནས་ཁ་གྲམས་ཀྱང༌།།
ཕུགས་བསམ་ལུས་ཟུངས་ཁྲག་རྒྱུན་གཅིག་པ་ཡི།།
སྐྱབས་བཅོལ་བོད་རིགས་སྤུན་ཟླ་བརྒྱ་ཕྲག་ལྷག།
བྷ་ར་སིལ་གྱི་ཟ་ཁང་ཞིག་ཏུ་འཛོམས།།
ངེས་མེད་ས་མཐར་འཁྱམས་པའི་བོད་རིགས་ཚོ།།
རྡོག་རྩ་གཅིག་ཏུ་སྒྲིལ་བའི་ནུས་ཤུགས་ཀྱིས།།
བོད་དོན་བདེན་པའི་རུ་ཚོན་འཕྱར་དང་ལྷན།།
དགྲ་བོའི་རྫུན་འབག་དབྲལ་བ་ཉུང་ཉུང་མིན།།
ཕྱོགས་འདིའི་བོད་རིགས་ཚོགས་པའི་གནས་སྟངས་ཚུལ།།
ཐོས་ཚེ་སྤྲོ་བའི་ཚོར་རླབས་འཕྱུར་དང་ལྷན།།
ལག་དེབ་ལྗང་ཁུའི་འགྱུར་འགྲོས་གནས་བབ་དང༌།།
གྲོས་ཚོགས་དྲི་བའི་དོགས་པའི་འཕྱངས་འཕྲུལ་དཔྱངས།།
ཕྱག་རོགས་སྤྱི་འཐུས་བཞི་དང་གཞུང་ཚབ་ཀྱིས།།
འཛམ་གླིང་ཁ་འཐོར་བོད་རིགས་ཡོངས་རྫོགས་ཀྱིས།།
ཆིག་སྒྲིལ་དཔུང་པའི་ནུས་ཤུག་བརྟན་པོ་ཡིས།།
བདེན་དོན་རྩོད་ལེན་དགོས་པའི་དྲན་སྐུལ་གནང༌།།
ཁ་ཤགས་སྒྱུ་རྩལ་སྨྲ་བ་དཔལ་ཚེ་ཡི།།
ལྗང་གུ་གསུམ་གྱི་གསང་བའི་གཏམ་བརྒྱུད་ལས།།
རང་དབང་ལག་དེབ་ལྗང་ཁུའི་རིན་ཐང་དང༌།།
གལ་ཆེའི་རང་བཞིན་ལྡན་པའི་དྲན་གསོ་གཏོང༌།།
དམངས་གཙོའི་ལྟ་གྲུབ་ལྡན་པའི་གྲོས་ཚོགས་ནང༌།།
སྨྲ་བརྗོད་རང་དབང་ཡོད་པའི་བགྲོ་གླེང་ཐོག།
གྲོས་འཆར་བགྲོ་གླེང་ལངས་འདུག་གང་བྱས་ཀྱང༌།།
ཁྲིམས་དང་སྒྲིག་འགལ་མིན་པའི་ཚུལ་ལུགས་ཞུས།།
སུམ་སྟོང་བདུན་བརྒྱའི་འཐུས་མི་ཚོགས་ན་ཡང༌།།
གཏམ་བརྗོད་རང་དབང་མེད་པའི་གུང་ཁྲན་གྱི།།
གྲལ་བསྟར་འགྲིགས་པའི་སྣང་བརྙན་རྫུན་འབག་གིས།།
རང་དབང་བདེན་པའི་ཚོགས་རར་འགྲན་ནུས་མིན།།
གྲོས་ཚོགས་ལས་རིམ་བརྒྱ་སྟོང་དུ་མ་ལས།།
ཆ་ཤས་ཤིག་གི་རྐང་པ་ཙམ་ཞིག་ལ།།
ཐག་གཅོད་མ་བྱུང་རེ་ཞིག་ཕྱིར་འགྱངས་ཀྱང༌།།
ལས་རིམ་གཞན་དག་རྩ་བརླག་སོང་བ་མེད།།
བོད་རྒྱའི་ཟླའི་ཛ་དྲག་མེ་རླབས་འཕྱུར་བ་དང༌།།
འགག་ལ་ཐུག་པའི་རྩ་དོན་གཉན་འཕྲང་སྐབས།།
གཅིག་རྒྱབ་གཅིག་མཆོང་གནང་བའི་ལོ་རྒྱུས་ལས།།
ཕྱིར་བཀྱེད་བྱས་པའི་གཏམ་རྒྱུད་མེད་ཚུལ་གླེང༌།།
རྒྱང་རིང་ནུབ་ཕྱོགས་གནས་སྡོད་བོད་རིགས་ཚོ།།
མཉམ་དུ་འཛོམས་པའི་དགའ་སྟོན་གསོལ་ཚིགས་ཐོག།།
དྲན་རྟེན་མཚོན་པའི་འདྲ་པར་བཏབ་པ་དང༌།།
བྱུང་འདས་གཏམ་གྱི་སྒོ་མོ་ཅི་ཡང་ཕྱེས།།
སྐྱེས་ཡུལ་གཅིག་པའི་མི་དང་སྤུན་མཆེད་འགས།།
གདན་ཞུས་ངོ་ལྡོག་མ་ནུས་ཁྱིམ་དུ་སོང༌།།
ཁྲག་དྲི་བྲོ་བའི་གཞིས་ཀྱི་དྲག་གནོན་དང༌།།
མི་ཡུལ་འགྲིམས་པའི་ལོ་ཟླའི་རྒྱུད་རིམ་གླེང༌།།
ད་ནི་ནམ་ཕྱེད་རྒྱལ་བའི་དཀྱིལ་འཁོར་ཟིན།།
ཤར་གླིང་ཡུལ་གྲུར་སྐྱ་རེངས་འཆར་ལ་ཉེ།།
གཉིད་ཀྱོགས་བརྒྱབ་ནས་མགོ་བོ་མི་ཐེག་པས།།
རྨི་ལམ་མགྲོན་པོའི་སྔོན་བརྡ་གཏོང་ན་རན།།
2009།11།15།མཚན་མོ་ ཆུ་ཚོད་ 12.30 ཐོག་བྷེལ་ཇམ་གྲོང་ཁྱེར་བྷ་ར་སིལ་(Brussel)སྤུན་ནོར་བུའི་ཁྱིམ་དུ་བྲིས།

  མ་འོངས་པའི་དབུ་ཁྲིད།
 

རྩོམ་ཡིག་འདིར་ལན་འདེབས།
མྱུག་མིང༌།:

E-mail:

  གཡོན་དུ་གསལ་བའི་ཚིག་འབྲུ་བྲིས།:
 



| -