ཟིན་བྲིས་པའི་འདྲ་པར།

ཕ་སྐད་གཙང་མའི་གླུ་གར།

ཁྲོ་གཏུམ།



ཕྱོགས་བསྐྱོད་བྱས་པའི་རགས་ཟིན།
21.11.2014 01:18:08


ཡུལ་སྐོར་ལ་འགྲོ་བ་ནི་ལས་སླ་བོ་ཞིག་མ་ཡིན་ལ་ཡུལ་སྐོར་ཁྲོད་དུ་ཟིན་བྲིས་འབྲི་བ་དེ་ལས་ཀྱང་དཀའ་ངལ་ཆེ་བ་ཞིག་རེད་འདུག   

༢༠༡༤།༠༥།༡༢ཉིན་གྱི་ཕྱི་དྲོ་རྡ་ས་དང་གྱེས་པ།
ཕྱི་དྲོ་དེར་གྲོགས་པོ་ཚེ་དབང་རིག་འཛིན་གྱིས་ཆར་བའི་འབབ་ཞོལ་ལ་མ་འཛེམ་པར་ང་རང་སྐྱེལ་མ་བྱས་སོང་། རྡ་ཞོལ་གྱི་རླངས་སྣུམ་ས་ཚིགས་སུ་སྐར་མ་ ༣༠ ལྷག་རིང་Snow Rigion ཅེས་པའི་འགྲུལ་སྐྱེལ་རླངས་འཁོར་ལ་སྒུག་ཞིང་། འགྲུལ་འཁོར་ནང་གི་རྐུབ་རྟགས་ཨང་༢༡ ལ་བསྡད་ནས་ཕྱོགས་བསྐྱོད་ཀྱི་མགོ་འཛུགས་བྱས་པ་ཡིན།



བརྗོད་གཞིའི་རིགས་བཀར་བ།:

བཀླཌ་ཐེངས།: 1372 | དེ་ལས་མང༌།...


 
མི་གཞི་དུར་སློག་རྒྱག་པ།
20.11.2014 23:01:26

__ ཉིས་སྟོང་བཅུ་ལོའི་ངའི་ང་རྒྱལ་གྱི་སྣེ་མོ་ཞིག

“མི་གཞི” སྤྱི་ཚོགས་ཀྱི་མ་རྐང་ལ་འཐིམས་དགོས་པའི་རེ་བཞག་ལྕི་མོ་ཞིག
“མི་གཞི”སྤྱིའི་བདེ་སྡུག་གི་དྲང་བདེན་ལ་འཁྱིལ་བའི་བླ་སྲོག་གསར་པ།
“མི་གཞི”མིའི་འཚོ་གནས་ལ་སྙིང་པོ་སྐྲུན་ས་དང་ཕུགས་འདུན་གྱི་མར་ཁུ་འཕྱུར་ས།

བརྗོད་གཞིའི་རིགས་བཀར་བ།:

བཀླཌ་ཐེངས།: 1324 | དེ་ལས་མང༌།...


 
རྦབས་སྒྲ་དང་ང༌།
03.11.2014 05:20:37

ཞོག་ཉི་མ་ཐོན་པའི་ས་དེ་ན་རྦབས་ཆུའི་གླུ་སྒྲ་དགོད
རྦབ་ཆུའི་ཝུ་དཀར་གཡང་གཟར་དེད་ནས་རྩེན་པ་འདི
བདག་གི་སྤོབ་པའི་དཔའ་རྩལ་རྒྱས་པའི་ལྷན་པ་ཀོར་མོ་ཞིག



བརྗོད་གཞིའི་རིགས་བཀར་བ།:

བཀླཌ་ཐེངས།: 1271 | དེ་ལས་མང༌།...


 
སྦྱིན་བདག་སྡུག་སྨྲོས་ཁ།
24.10.2014 04:58:46

༗ཟས་ཁང་འདིའི་ངོ་གདོང་ནས་ཤེས་ཡོན་པ་མཐོང་བའི་བློས་སླངས

“ཨ་རོགས། དེ་རིང་གི་མི་འདིས་ཡང་ང་ལ་ཆད་ཐོ་བརྒྱབ་སོང་།”
“ཁོ་རང་ཉེ་འཁོར་འདིའི་ལས་བྱེད་མ་རེད་དམ”
“རེད་འདུག སློབ་བུ་རྣམས་ལ་སྤྱི་ཚོགས་རྙོག་འཛིང་གི་ཤེས་ཡོན་དེ་ཁྲིད་དེབ་སྟེང་ལ་བཀོད་མེད་པ་འདྲ། ད་ལྟ་ངའི་ལག་གི་འབྲི་དེབ་འདིའི་སྟེང་དུ་མི་གཤིས་མེ་ལོང་། མི་གཞིའི་མེ་ལོང་། ཁྲེལ་གཞུང་གི་མེ་ལོང་སོགས་ཀྱི་བགྲོ་གླེང་བྱེད་ཀྱིན་ཡོད་པ་རེད།”



བརྗོད་གཞིའི་རིགས་བཀར་བ།:

བཀླཌ་ཐེངས།: 1449 | དེ་ལས་མང༌།...


 
དམར་པོ་རི་ལ་བཅར་འདྲི།
21.10.2014 04:37:47

ཕོ་བྲང་གི་མཚན་མིང་རྣམ་གྲངས།

རྩེ་པོ་ཏ་ལ། རྩེ་ཕོ་བྲང༌། ཕོ་བྲང་པོ་ཏ་ལ། ཕོ་བྲང་དམར་པོ། རི་བོ་གྲུ་འཛིན། དམར་པོ་རི།

དུས་རབས་ཀྱི་ངོ་གདོང་ནས་བརྡ་འཕྲིན་གྱི་གོམ་འགྲོས་ཧ་ཅང་མྱུར་བའི་དེང་རབས་ཅན་ནས། འཇིག་རྟེན་གྱི་འབར་གས་ཆེན་མོའི་སྒྲ་ལས་ཀྱང་རྣ་བར་གཟན་པའི་འཕྲུལ་སྒྲས་ང་ཚོ་གཉིད་དུ་མ་བཅུག་པའི་སྔ་ཕྱི་བར་གསུམ་དང༌། རི་བོ་ཕྲེལ་ཉལ་ཞིག་གིས་འཁུར་བའི་རྩེ་ཕོ་བྲང་པོ་ཏ་ལའི་རྔམ་བརྗིད་ཀྱིས་ཡར་ཀླུང་ཤོག་ཁག་བཅུ་གཉིས་དང༌། བོད་ཀྱི་རྒྱལ་ཕྲན་མཐའ་དག



བརྗོད་གཞིའི་རིགས་བཀར་བ།:

བཀླཌ་ཐེངས།: 1690 | དེ་ལས་མང༌།...


 
མི་སྣོན་གྱི་རུ་མ།
29.09.2014 23:13:28

མི་སྣོན་གྱི་རུ་མ།
-- གྲོགས་ཤར་ཕྱོགས་པའི་བུ་ཆུང་ལ་བསྒྲོན་པའི་སེམས་ཀྱི་ཞབས་བཏགས།
གངས་རིའི་རི་ཕྲེང་གི་མཐོང་ལམ་དེར
ངག་གི་གླུ་དབྱངས་ཤིག
ལུས་ཀྱི་དུམ་བུ་ཞིག
སེམས་ཀྱི་ཐོག་ས་ཞིག
ཁྱོད་ཀྱི་ཡོད་ཚད་ལ་འཐིམས་པའི་ཁྲག་གི་རྒྱུན་ཏུ་འཁྲུངས


བརྗོད་གཞིའི་རིགས་བཀར་བ།:

བཀླཌ་ཐེངས།: 1228 | དེ་ལས་མང༌།...


 
གྲོང་ཁྱེར་དང་ལས་ཁུངས་མི་སྣའི་སྐོར་གྱི་བོད་རྒྱ་ཤན་སྦྱར།
09.09.2014 23:31:25

མི་དམངས་ཚོགས་ཁང་ཆེན་མོ། 人民大会堂 མཉམ་སྤྲོ་ཁང༌།   俱乐部དྲག་ཆས་ཁང༌།  武装部 གླ་གཏོང་གཏོང་མཐུན་གཉེར་ཁང༌། 出租公司 ཟློས་གར་ཁང༌། 剧院 དཔེ་སྐྲུན་ཁང༌། 出版社


བརྗོད་གཞིའི་རིགས་བཀར་བ།:

བཀླཌ་ཐེངས།: 1315 | དེ་ལས་མང༌།...


 
མཱ་པུ་ཧྥང་གི་ལོ་རྒྱུས་མདོར་བསྡུས་ཤིག
04.09.2014 05:13:49

མཱ་པུ་ཧྥང་ནི། ཕྱི་ལོ་ ༡༩༠༣ ལོར་སྐྱེས་ཤིང་ཕྱི་ལོ་ ༡༩༧༥ ལོར་འདས། (西北五马)ཞེས་པའི་རྒྱ་ཡིག་དེབ་ཏུ་གསལ་བ་ལྟར་ན། ཁྱིམ་རྒྱུད་འདི་ནི་དྲག་པོའི་སྟོབས་ཤུགས་དང་སྒྲིག་འཛུགས་ལྡན་པའི་ཁྱིམ་རྒྱུད་ཅིག་ཡིན་པ་དང་།



བརྗོད་གཞིའི་རིགས་བཀར་བ།:

བསམ་ཚུལ་ཁག 1 | བཀླཌ་ཐེངས།: 1748 | དེ་ལས་མང༌།...


 
བོད་ཀྱི་སྙན་ངག་པའི་མཚན་མོ།
01.09.2014 06:15:17

ཐེའུ་རང་།

སྤྱི་ལོ༢༠༡༤ལོའི་ཟླ་༨པའི་ཚེས༡༣ཉིན།ཐང་སྐོར་གྱི་ཆུ་ཁ་ཞིག་ནས་གློ་བུར་དུ་གུར་ཁྲ་ཁྲ་ཞིག་བརྒྱབས།དེའི་ནང་དུ་པགས་པའི་སྟན་བཏིངས།སྒོ་ཁ་ནས་མྱེ་བོས།ནང་ནས་དཀར་མེ་བཀར།དེའི་མཐའ་རུ་སྙན་ངག་ལ་དགའ་དད་ཡོད་མཁན་མི་མགོ་ལྔ་འདུས་ཏེ་སོ་སོའི་སྙན་ངག་དག་རེས་དང་རེས་ཀྱིས་གྱེར་འདོན་བྱས་ཤིང་།



བརྗོད་གཞིའི་རིགས་བཀར་བ།:

བཀླཌ་ཐེངས།: 2058 | དེ་ལས་མང༌།...


 
རང་མོས་སྙན་ངག་ལ་ལྟ་སྟངས་ཙམ།
30.07.2014 23:40:17

རང་མོས་སྙན་ངག་ལ་ལྟ་སྟངས་ཙམ།
༡ ཚེག་བར་དབྱངས་འགྲོས་ཀྱིས་ཐག་གཅོད་པ།
༢ ཚོར་ཤུགས་ཀྱིས་རྩོམ་ལུས་ཡོངས་སུ་ཁྱབ་པ།
༣ འཕར་མཆོངས་དང་འཆོལ་བའི་གཤིས་ཀ་འདྲེས་པ།
༤ མགོ་ཚིག་དང་མཇུག་ཚིག་གི་བར་དུ་བསྡུ་ལེན་གྱི་ནུས་པ་ཡོད་པ།
༡ ཚེག་བར་དབྱངས་འགྲོས་ཀྱིས་ཐག་གཅོད་པ།
རང་མོས་སྙན་ངག་གི་སྒྲོམ་གཞིའི་སྒང་དུ་བོད་སྐད་ཡིག་གི་ཚིག་འབྲི་དག་རྒྱུན་པ་ནས་བཟུང་། རང་རེའི་སྤྱི་ཚོགས་སུ་ཡང་ ‘ཚེག་བར་དབྱངས་འགྲོས་ཀྱིས་ཐག་གཅོད་པ’ཞེས་སྙན་ངག་གསར་བའི་ལས་ལ་བརྩོན་ཞིང་འདི་ནི་སྔོན་གྱི་རྩོམ་སྟངས་དག་ལས་བརྒལ་འདུག  <<མེ་ལོང་མ>>འི་ནང་གི་ཚེག་བར་དོ་མཉམ་པ་དང་ཆ་ཡ་སྡེབས་སྟངས་ཀྱི་འབྲི་ཚུལ་དེ་ལས་ལོག་ཏུ་གྱེས་པ་རེད།  ལོ་ཚིགས་ཀྱི་སྒང་ནས་བཤད་ན་དེ་ནི་༡༩༨༣ ལོའི་སྦྲང་ཆར་དེབ་གཉིས་པའི་སྒང་ལ་སྐུ་ཞབས་རང་གྲོལ་ལམ་དོན་འགྲུབ་རྒྱལ་ནས་<<ལང་ཚོའི་རྦབ་ཆུ>>བཏོན་པའི་སྐབས་དེ་ནས་བཟུང་བོད་ཀྱི་རྩོམ་སྟེགས་སུ་དཔེ་མི་ཟད་པའི་སྙན་ངག་འབྲི་སྟངས་སུ་འགྱུར་བ་ཞིག་བྱུང་ཞིང་།  འདི་དག་ནི་བོད་ལ་མཚོན་ནས་བལྟས་ན་ཆུ་ཞིག་བགག་བགག་ནས་བཏང་བ་དང་འདྲ་ལ།  ཧ་ཅང་གིས་རང་མོས་འབྲི་མཁན་མང་དུ་བྱུང་བ་རེད།  བོད་ཀྱི་རྩོམ་སྟེགས་སུ་སྙན་ངག་བོད་སྐད་ཀྱི་གཏིང་རིམ་ལ་འཛུལ་བའི་ཐོག་མ་ནི་རང་མོས་སྙན་ངག་མགོ་བཙུགས་པ་ནས་བྱུང་བ་རེད་ཅེས་བཤད་ན་ཡང་མི་འགྲིག་པ་ག་ལ་ཡོད།
དབྱངས་འགྲོས་ནི་རང་མོས་སྙན་ངག་གི་མེད་དུ་མི་རུང་བའི་རྩ་བའི་གནད་དེ་ཡིན་པ་དང་། ཡིན་ཡང་འདིའི་དབྱངས་འགྲོས་སུ་ངེས་གཏན་གྱི་ནུས་པ་མེད་ལ་ཆ་ཡ་སྡེབ་སྟངས་ལྟ་བུའི་སྤྱི་འགྲོས་ཡང་མེད་པ་རེད།  གཙོ་བོ་དེ་ནི་སོ་སོའི་ཚོར་བའི་རྩོལ་ཤུགས་དང་བརྟེན་ནས་དབྱངས་ཀྱི་འདེགས་འཇོག་ཐག་གཅོད་བྱེད་ཅིང་།  དབྱངས་འགྲོས་འཇོག་མཚམས་རེ་རེ་ནི་རྩོམ་དེའི་མེད་དུ་མི་རུང་བའི་གཅོད་མཚམས་དེ་ཡིན་པ་རེད།  དེ་བས་རང་མོས་སྙན་ངག་ཀློག་པ་པོ་ཞིག་ཡིན་དུས་ངེས་པར་དུ་རང་མོས་སྙན་ངག་ལ་གློག་སྟངས་ཀྱི་བྱང་ཆ་ཡོད་དགོས་ལ་འདི་ནི་དེའི་ནང་དུ་དབྱངས་འགྲོས་ཀྱིས་ཐག་གཅོད་བྱས་པའི་ཚོར་ཤུགས་ཀྱི་རྩོལ་བ་དེ་འདྲེས་ཡོད་པས་ཡིན།
༢ ཚོར་ཤུགས་ཀྱིས་རྩོམ་ལུས་ཡོངས་སུ་ཁྱབ་པ།
རང་མོས་སྙན་ངག་ནི་མིའི་ཚོར་བའི་རྒྱུན་ངོ་མ་ནས་རྟོག་འགྱུ་བྱེད་པ་དང་ངེས་པར་དུ་ཚོར་ཤུགས་དྲག་པོ་དགོས་པ་རེད། དངོས་གཤིས་དང་མི་གཤིས་གཉིས་ཀྱི་མཐུན་སྦྱོར་ལ་འབད་པ་བྱས་སྟེ་རང་ཉིད་ཀྱི་བློས་བསླངས་བྱས་པའི་ཚོར་བའི་རིགས་ནི་མ་རྩོམ་སྒང་གི་མེད་དུ་མི་རུང་ཞིང་འདྲེན་ཤུགས་ཆེ་བའི་སྲོག་རྩ་ཡིན། ལྷག་པར་དུ་ཕོ་མོའི་བརྩེ་དུང་གིས་བཅོས་མིན་གྱི་ཚོར་ཤུགས་དྭངས་གཙང་དག་ཐོན་པས་ན།  དེའི་སྟོབས་ཤུགས་གཅིག་གི་ནུས་པས་རི་རབ་སྒུལ་བའི་གཏམ་རྒྱུད་དང་འཁྲབ་གཞུང་ བྱུང་བ་བཞིན་གྱིས་རང་མོས་སྙན་ངག་གིས་བསྡུས་གཟུགས་ཀྱི་ཚུལ་གྱིས་དུངས་ཚོར་རླབས་པོ་ཆེ་ཞིག་ཡི་གེ་ཡི་སྟེང་དུ་ཕབ་པ་རེད།  དངོས་བཟང་མཛེས་གསུམ་ནི་མཛེས་དཔྱོད་ཀྱི་མ་རྩ་ལ་ཐུག་ཡོད་པས་ན། འདི་གསུམ་གྱིས་དུངས་ཚོར་ལ་མ་གདན་བཏང་ནས་རྩ་བའི་རྒྱུ་ཆ་བྱེད་ཀྱིན་ཡོད་པ་རེད།  མིའི་ལུས་པོའི་སྒང་ལ་ཁྲག་གི་རྒྱུ་བ་ཡོངས་སུ་ཁྱབ་འདུག་པ་བཞིན་དུ་རང་མོས་སྙན་ངག་གི་མགོ་འཇུག་བར་གསུམ་ན་རྒྱུ་ལུགས་མ་ཡིན་པའི་ལྷོག་ལྷོག་ལྡིང་བའི་དུངས་ཚོར་གསོན་པོ་ཞིག་ཡོད།  མིའི་རྣམ་དཔྱོད་དང་བློ་གྲོས་ཀྱི་འགུལ་བསྐྱོད་ནི་བདེན་དོན་དང་གནས་ལུགས་དམར་རྗེན།  འཚོ་བའི་ངོ་བོ་སོགས་ནི་མིའི་གཞི་རྩའི་རྣམ་གཞག་གི་སྟངས་ནས་ཤེས་དགོས་པ་དང་སྒྲུབ་དགོས་པ་ཡིན་དུས།  མིའི་སེམས་ཀྱི་དུང་ཀ་དང་འདྲེས་པའི་ཚོར་བའི་རང་དབང་དེ་ནམ་མཁའ་དང་འབྲེལ་ནས་ཡོད་པས་མུ་མཐའ་མི་མངོན་པ་དང་།  དེ་ལྟའི་ཁོལ་ཡངས་བའི་ཕ་མཐའ་དག་ལ་ང་ཚོའི་བསམ་གཞིག་གི་བར་སྟོང་དག་དྲི་བའི་ཚུལ་གྱིས་བསྐྱོད་དགོས་པ་དང་། ཡང་ན་དོག་པའི་ཚུལ་གྱིས་དང་མག་མོག་གི་ཚུལ་གྱིས་འགྲོ་ངེས།
ལ་ལའི་སྒྱུ་རྩལ་ནི་མག་མོག་ཞིག་ཡིན་པ་རེད་ཟེར་བའང་འདི་ལ་ཐུག་ཡོད་པ་འདྲ། མཛེས་དཔྱོད་ཀྱིས་མཐའ་མའི་ཐག་གཅོད་ཀྱི་གཏན་ཚིགས་བྱེད་མི་ཐུབ་ཟེར་བ་བཞིན་དུ།  ག་དུས་ཡིན་ན་ང་ཚོར་ནུས་པ་རྡོག་རྡོག་གཅིག་དབང་ལྔའི་མདུན་དུ་འཇོག་རྒྱུ་ཡོད་པ་མ་རེད།  འདི་ནི་སྒྱུ་རྩལ་གྱིས་དུངས་ཚོར་ལ་རང་དབང་སྟེར་གྱི་ཡོད་པའི་རྟགས་ཤིག་རེད།  དུངས་ཚོར་གྱི་མཛེས་པ་དག་གིས་སྙན་ངག་གང་ཡིན་བརྗོད་དོན་གྱི་ཆ་ལ་རྣམ་ཤེས་གསར་བ་བསྐྲུན་པ་རེད།  འདི་ནི་མི་ལ་ལ་ཞིག་སྡོད་གནས་བརྗེ་བོ་རྒྱབ་ནས་ཡང་བསྐྱར་མི་ཚེ་གསར་བ་ཞིག་གི་མགོ་རྩོམ་པ་དང་འདྲ་བོ་ཡོད་འདུག  འདི་སེམས་ཀྱི་དུངས་ཚོར་དང་འདྲེས་པའི་སྐད་ཆ་ཞིག་ཡིན་པ་བཞིན།  མི་ཚེ་གསར་བ་ནི་ཁོ་ལ་ངེས་ཆ་མེད་ཀྱང་ཁོའི་འགྲེལ་བཤད་མི་ཕོག་པའི་བསམ་གཞིག་དེ་དང་བསྟུན་ནས་ཚོར་ཤུགས་དྲག་པའི་ནུས་པ་ཞིག་བསྐྱེད་ཐུབ་པ་བཞིན་དུ།  སྙན་ངག་ཅིག་ལེགས་འགྲུབ་བྱུང་བར་ཚོར་ཤུགས་དྲག་པོ་ཞིག་གིས་རྩོམ་གྱི་མགོ་འཇུག་བར་གསུམ་ལ་ཤ་ཁྲག་བཞིན་དུ་འདྲེས་དགོས་སོ།།
༣ འཕར་མཆོངས་དང་འཆོལ་བའི་གཤིས་ཀ་འདྲེས་པ།
མིའི་སེམས་ཁམས་ནི་ནམ་རྒྱུན་གྱི་འགུལ་བསྐྱོད་དང་གཅིག་པ་མི་ཆགས་ལ། དེར་བརྟེན་དགའ་སྐྱོ་ཆགས་སྡང་གི་གྲོང་ཁྱེར་ནས་མི་སེམས་ནི་ཚོར་གནས་གཅིག་ཏུ་འདུག་པའི་གོ་སྐབས་མེད་པས། སྙན་ངག་པའི་བསམ་བློ་ནི་ཐོལ་བརྒལ་ཞིག་ཡིན་ཞིང་།  དུངས་ཚོར་གྱི་རེ་སྙེག་ལ་བསྟུན་ནས་ཁ་ལོ་བྱེད་ཀྱིན་ཡོད། ལྷག་པར་དུ་དེབ་ངོས་དང་གཞུང་ལུགས་ཀྱི་སྟེང་གི་དྲི་མ་འགོས་ནས་ཕར་འཇིག་རྟེན་ལ་བལྟ་བའི་གཤིས་ཀ་བསྐྲུན་པ་ཞིག་མིན་ལ། འདྲིས་ལོབས་སུ་སོང་བའི་སོ་སོའི་ཆུང་ནས་ད་ལྟའི་བར་གྱི་ན་ཚོད་ཀྱི་བརྒྱུད་རིམ་སྟེང་ཤེས་བྱ་གང་མང་ཞིག་གིས་རྒྱུ་རྐྱེན་བྱས་ནས་མི་གཤིས་བསྐྲུན་ཡོད་པ་དང་།  འདི་དག་གི་གོ་རིམ་ཁྲོད་ནས་མི་གཤིས་ནི་གཏན་འཁེལ་རང་བཞིན་ཅན་ཞིག་མིན་པས། ང་ཚོས་སྤྱི་ཚོགས་འཚོ་བ་ཉམས་སུ་རོལ་ཏེ་བརྩེ་བ་ཕུན་སུམ་ཚོགས་པའི་ངོ་བོ་དག་མཐོ་དམའ་མི་སྙོམས་པར་འཕར་མཆོངས་དང་འཆོལ་བའི་རྣམ་པའི་སྒང་ནས་ཡོང་བ་དང་།  འདི་ནི་མིའི་གཤིས་ཀ་ཞིག་ཡིན་ལ་སྒྱུ་རྩལ་གྱི་ངོས་སུ་མེད་ན་མི་ཆོག་པའི་ཆ་རྐྱེན་ཆེ་ཤོས་དེ་ཡང་ཡིན་ནོ།
རང་མོས་སྙན་ངག་གི་སྒྲོམ་གཞིའི་སྒང་ནས་འདི་དག་ལ་བརྩི་འཇོག་བྱེད་ལ།  རང་མོས་སྙན་ངག་ལ་འདི་དག་ཚང་བ་མ་ཟད།  འདི་དག་གི་ཁྲོད་ན་རྩོམ་པ་པོའི་བསམ་བློའི་བར་སྟོང་དང་ཀློག་པ་པོར་ཡང་བསམ་བློའི་བར་སྟོང་ཡོད་རེད།  བསམ་བློའི་བར་སྟོང་ལ་ཡང་ངེས་གཏན་མེད་ལ་འཕར་མཆོངས་དང་འཆོལ་བའི་གཤིས་ཀ་འདི་ཡིས་རྩོམ་ཉམས་སུ་བླ་ལྷག་གིས་རོགས་ཕན་བྱེད་པ་རེད།  འདི་ནི་ཡང་རང་མོས་སྙན་ངག་གི་མེད་དུ་མི་རུང་བའི་ཆ་རྐྱེན་ཞིག་ཏུ་བརྩིས་ཆོག  རྩོམ་གྱི་བརྗོད་གཞི་རྒྱུན་མཐུད་ཀྱིས་མེད་ལ་མགོ་བཙུགས་ས་ནས་མཇུག་བསྡུ་བའི་བར་ལོག་དེར་ཆད་སྐྱོན་དང་ལྷག་སྐྱོན་གང་མང་ཡོད་པའི་མཐོང་སྣང་ཡོད།  འདི་ནི་རང་མོས་སྙན་ངག་གི་ཁྱད་ཆོས་དང་རང་མོས་སྙན་ངག་གི་སྒྲོམ་གཞིའི་སྒང་ནས་འཕར་མཆོངས་དང་འཆོལ་བའི་གཤིས་ཀ་ཟེར་བ་དེ་རེད།
‘དྲང་མོར་བཤད་ན་མྱི་མི་དགའ། དབྱུགས་པ་བསྟན་ན་ཁྱི་མི་དགའ།’ཟེར་བའི་ཁ་དཔེ་བཞིན་དུ།  སྐད་ཆའི་སྒྱུ་རྩལ་ནི་འདིའི་སྒང་ནས་ཡང་མཚོན་པ་རེད།  འདི་ནས་མི་དང་མིའི་བར་གྱི་སྐད་ཆ་ལ་བསམ་བློའི་བར་སྟོང་ངེས་ཅན་ཞིག་དགོས་པ་དང་།  མིའི་བསམ་བློའི་སྟེང་ནས་མངོན་གྱུར་བྱེད་པ་ཆ་ཚང་དག་མི་རེའི་གཤིས་ཀ་དང་འདྲེས་བསྡད་ཡོད་པས། བསམ་བློ་གཅིག་གིས་མི་ཡོད་ཅོག་གི་བསམ་ཚུལ་ལ་ཚབ་བྱེད་མི་ཐུབ་རུང་། རང་མོས་སྙན་ངག་གིས་དེ་དག་གི་ཡོད་ཚད་ཀྱི་རྩ་དོན་ལ་ཧ་ཅང་གིས་ལས་སྣོན་བྱེད་ཅིང་།  མིའི་སྐད་ཆའི་སྒྱུ་རྩལ་གྱི་ནུས་ཤུགས་ནི་དགའ་སྐྱོ་ཆགས་སྡང་གི་ཁྲོད་དུ་ལྷུང་བའི་གཡུལ་ས་དེའི་ཚེ་སྲོག་སྲུང་སྐྱོབས་ཀྱི་ཐབས་སུ་འབད་ངེས། འདི་དག་ལ་ད་གཟོད་རང་མོས་སྙན་ངག་ནང་ནས་འཕར་མཆོངས་དང་འཆོལ་བའི་གཤིས་ཀ་རེད་ཟེར་ཆོག་པ་འདྲ།
༤ མགོ་ཚིག་དང་མཇུག་ཚིག་གི་བར་དུ་བསྡུ་ལེན་གྱི་ནུས་པ་ཡོད་པ།
སྐབས་འདིར་རང་ཉིད་ཀྱི་སྙན་ངག་ཅིག་དཔེ་བརྗོད་བྱས་ནས་འགྲེལ་ཐུང་ཞིག་བརྒྱབ་པ་ཡིན་ན།
སྤྲིན།
རྫི་བོ་ཡིན་དུས
ངས་རྩྭ་ཐང་སྔས་སུ་བྱས་ནས་སྤྲིན་པར་བལྟས་མྱོང
ས་མཐར་འཁྱམས་དུས
ངས་སྤྲིན་པ་ཐོད་ལ་བླངས་ནས་སྔོན་ཆད་གླེང་རེད
གང་ལྟར            ང་ད་དུང་མ་ལོངས་བ་མང
༢༠༡༢/3/29ཉིན།
ངས་དང་པོ་རང་‘ཉིད་རྫི་བོ་ཡིན་དུས་’ནས་‘འཕར་མཆོངས་ཤིག་གིས་རྩྭ་ཐང་སྔས་སུ་བྱས་ནས་སྤྲིན་པར་བལྟས་པ་’རེད། འདིའི་བར་ལོག་གི་བྱུང་རིམ་དང་རྩོམ་པ་པོའི་བསམ་གཞིག་གི་བར་སྟོང་དག་ནི་བསྡུས་གཟུགས་ཀྱིས་བཞག་ཡོད་པ་དང་། དེའི་འོག་གི་ས་མཐར་འཁྱམས་པ་ཡང་དེ་བཞིན་ཡིན།  ཆེས་མཐར་འཇུག་གིས་‘གང་ལྟར་’ཞེས་ངལ་ཅུང་ཙམ་གསོས་ཏེ་‘ང་དུང་མ་ལོངས་བ་མང་’ཞེས་པ་འདིས་རང་ཉིད་ཀྱི་དྲན་ངོས་སུ་བཞག་པའི་དུངས་པ་མང་པོ་ཞིག་གི་འགལ་ཟླའི་ཁྲོད་དུ།  རྫི་བོ་ཡིན་དུས་དང་ས་མཐར་འཁྱམས་དུས་གཉིས་ཀྱི་འགལ་འབྲེལ་གྱི་སྣང་བ་དེར་བསྡུ་ གསོག་བྱས་ཤིང་འཁྲེང་ཞེན་ཞིག་གིས་དྲི་ཚིག་ལྟ་བུའམ་ལྡེམ་སྒོང་ལྟ་བུའི་རྩོམ་པ་ པོའི་བསམ་གཞིག་གང་མང་ཞིག་ལ་བསྡུ་ལེན་གྱི་ནུས་པ་ཐོན་ཡོད་རེད། འདི་དག་གི་ཁྲོད་དུ་རྩོམ་པ་པོ་ཡིན་ནའང་འདྲ། ཀློག་པ་པོ་ཡིན་ནའང་འདྲ། བསྡུས་གཟུགས་ཀྱི་ནུས་པའི་སྒང་སོ་སོའི་བསམ་གཞིག་གི་ནུས་པས་བསྔོགས་འདོན་བྱས་ པའི་ཁྱབ་རྒྱ་དག་གི་མཐའ་ལ་བསྙེགས་པའི་ནུས་པ་འདོན་ཞིང་།  བློ་གསའ་དང་ཕྱིར་དྲན་ཡང་བྱེད་པ།  ད་དུང་མ་འོངས་བའི་མདུན་ལམ་སོགས་ཀྱི་འགྲེལ་བརྗོད་མ་འདྲ་བ་དང་། འགྲེལ་བརྗོད་ཕྱོགས་མ་མཐུན་པའི་གོ་བ་ལེན་སྟངས་འདྲ་མིན་ཞིག་ཡོང་ངེས་སོ།  འདི་དག་གི་ནུས་པ་ཆེ་ཤོས་ནི་གཙོ་བོ་དེ་མགོ་ཚིག་དང་མཇུག་ཚིག་གི་བར་དུ་ཡོད་ རེད། འདིའི་བར་གྱི་བྱ་བ་དག་ནི་བསྡུས་གཟུགས་ཀྱི་ནུས་རྩལ་ལ་ཐུག་ཡོད་དོ། སྐད་ཆ་ཞིག་བཤད་ན་ང་ཚོས་ཚིག་རྩ་ལ་འཇུ་དགོས་པ་རེད་ཞེས་རྒད་པོ་ཚོའི་ཁ་ན་ནམ་ རྒྱུན་ཡོད་པ་ལྟར་དུ་རང་མོས་སྙན་ངག་ལ་ཡང་མགོ་ཚིག་དང་མཇུག་ཚིག་གི་ཕྱོགས་སུ་ འཇུ་དགོས་པ་རེད།  དེ་འདྲ་བྱས་པ་ཡིན་ན་ད་གཟོད་རྩོམ་པ་པོ་དང་ཀློག་པ་པོ་གང་ཡིན་འབྲི་ཤེས་པ་དང་གོ་བ་ལོན་པའི་གནད་འགག་མང་པོ་ཞིག་ལ་ཆ་རྒྱུས་ལོན་ངེས་སོ།།
2013/03ཞིག་ལ།

༡ ཚེག་བར་དབྱངས་འགྲོས་ཀྱིས་ཐག་གཅོད་པ། ༢ ཚོར་ཤུགས་ཀྱིས་རྩོམ་ལུས་ཡོངས་སུ་ཁྱབ་པ། ༣ འཕར་མཆོངས་དང་འཆོལ་བའི་གཤིས་ཀ་འདྲེས་པ། ༤ མགོ་ཚིག་དང་མཇུག་ཚིག་གི་བར་དུ་བསྡུ་ལེན་གྱི་ནུས་པ་ཡོད་པ།

བརྗོད་གཞིའི་རིགས་བཀར་བ།:

བཀླཌ་ཐེངས།: 1671 | དེ་ལས་མང༌།...


 
མཐའ་མཇུག་གི་ཚེ་སྲོག
22.07.2014 00:39:48
མཐའ་མཇུག་གི་ཚེ་སྲོག སྤྲེལ་ནག་པ་བློ་གྲོས་དཔལ་བཟང༌།
བདེ་ལྡན་བུ་མོ་མྱོས་པའི་མཁུར་ཚོས་ཟེགས་མའི་མེ་ཏོག་ས་ལ་དྲུད།།
མཉེན་འཇམ་པདྨའི་མངལ་དུ་སྦྲུམ་པའི་ཟེའུ་འབྲུ་འདབ་མ་གཡོ་བས་འདར།།
གསང་ལྕམ་མཆུ་སྒྲོ་འཛུམ་པའི་སྒེག་ཉམས་མྱོས་འཛིན་འོ་ཡིས་དལ་གྱིས་གཞིབ།།
ངོ་མཚར་རྩེ་དགའི་ཡིད་ཀྱི་སྒྱུ་མ་སྐལ་བཟང་སྙིང་ལ་ཁོ་མོས་རྩེན།།
ཀུན་གསལ་དགའ་མའི་འདྲེན་བྱེད་འོད་རླབས་མུན་པའི་དུས་འདིར་ཅི་ལ་ཟུམ།།
ས་འཛིན་མཛེས་མའི་རྒྱན་སྤྲས་མེ་ཏོག་ཉམ་ཆུང་ཤུགས་ཀྱིས་ཅི་ལ་འཐོར།།
མཉེན་འཇམ་རེག་བྱས་སྙིང་ལ་བསྣུན་པའི་ཆགས་ལྡན་བུ་མོ་ཅི་ལ་ངུ།།
ཁྱེད་དང་འུ་གཉིས་སྒྱུ་མའི་གླིང་འདིར་ཚེ་ཡི་སྲོག་ཆུང་སུ་ཡིས་བྱིན།།
ཞོགས་པའི་ཉི་ཟེར་དལ་གྱིས་འཛུམ་ཡང་རྟ་བདུན་སྒྱུ་མའི་རླུང་ལ་ཤོར།།
མཚན་མོའི་ཟླ་གཞོན་མཁའ་ལམ་འགྲིམ་དུས་སྒྲ་གཅན་གདོང་གི་ཁ་ལ་འཐབ།།
མཚོ་སྐྱེས་སྙིང་གི་མུ་ཏིག་འདར་ན་སྟེང་འཐུང་འདབ་མས་གར་བྱེད་ཀྱང༌།།
སྣང་བ་གསོན་པའི་རྒྱུ་ལམ་འགག་དུས་དབུ་ཕྲེང་ཚོམས་བུའི་གསེར་ཡིག་ལྷུང༌།།
གངས་དཀར་འདབ་མ་བརྩེགས་པའི་ལྷུན་པོ་དགུ་སྒྲིལ་ཉི་མའི་འོད་ཀྱིས་འཐུང།།
སྐྱོ་གདུང་མཆི་མ་ས་ལ་ཟགས་པ་འདམ་བརྫིས་པདྨའི་ལྕེ་ཡིས་ལྡག།
སེར་ཞག་ལོ་མ་ལྷུང་བའི་བེམ་རོ་དྲི་བཞོན་སྤར་མོས་མཁའ་ལ་གཏོར།།
མཚར་སྡུག་གོས་ལྭ་དུས་ཀྱིས་བྱིལ་བས་ས་འཛིན་ལྗོན་པའི་སྐྲ་ལོ་འཛིངས།།
ཤར་གྱིས་ཉལ་འགྲོའི་ལྦུ་བའི་རྐང་གདུབ་དྲི་བཞོན་ལད་མོའི་ཟློས་གར་གྱིས།།
སྤང་སྤོས་གཡུ་ལོ་རལ་བའི་མེ་ཏོག་འདབ་མ་འདེགས་པའི་རླབས་གྱིས་བཤལ།།
རྩྭ་ལྡུམ་རྩེ་མོའི་ཆུ་ཡི་རིལ་ཆུང་ཉི་ཟེར་འཇབ་པའི་གསང་སྟབས་ཀྱིས།།
སྣང་སྟོང་འོད་ལྔ་ཚོན་དུ་སྡེབ་པའི་གཡས་འཁྱིལ་རི་མོ་སུ་ཡིས་བརྐུས།།
དཔྱིད་ཀྱི་ན་ཆུང་མྱོས་པའི་རྡུལ་དམར་རང་བྱུང་རྣལ་མའི་ཟོལ་གྱིས་འཛུམ།།
དབྱར་དུས་མཛེས་མའི་རྩེ་དགའི་འཕྲུལ་སྣང་དཀར་ཟླུམ་བརླ་ཡི་ལང་ཚོ་ངོམ།།
སྟོན་ཀའི་མ་མའི་འོ་འཛིན་མེ་ཏོག་གཉིས་སྦྱོར་གསང་བའི་བསླུ་བྲིད་ཀྱིས།།
དགུན་ཁའི་རྒན་མོའི་རུས་ཕྲེང་འཁོར་ལོ་གངས་འཁྱགས་སྦྲུམ་མའི་སྙིང་དུ་བཏབ།།
རྟ་བདུན་རི་བོ་ཁྲོས་པའི་ཁ་རླངས་ལེགས་བྲིས་ཟ་བའི་གཤེད་དུ་འབར།།
ཆུ་གཏེར་བདུད་མོ་འཁྲིགས་པའི་དཔུང་བས་ཉི་ཟླའི་རྣ་ལུང་ས་ལ་ཕབ།།
གཤིན་རྗེ་ཕོ་ཉའི་རླུང་གི་རྩལ་འཆང་སྟོང་གསུམ་ཧྲུལ་བའི་མཚོན་དུ་ཆེ།།
རྩེ་འཛུམ་ཕྱག་རྒྱ་དམ་དུ་སྣོལ་བ་ཁྱབ་འཇུག་རྐང་བའི་ཤུགས་ཀྱིས་མནན།།
ཟེའུ་བཅུད་འོ་སྤྲི་མཆུ་ཡིས་འཛིན་པའི་དྲུག་ལྡན་རྐང་བའི་མཆོངས་རྩལ་གྱིས།།
ཁ་བསགས་འདབ་མའི་སྐྱུར་རྩི་འཐུང་བ་མྱོས་འཆང་ར་ཡིག་འདར་ལྡན་པ།།
གསེར་གྱི་སྦྲང་ཆུང་འདམ་བུའི་ཚལ་ན་པདྨ་འཚོལ་བའི་མིག་འཕྲུལ་གྱིས།།
དགུང་ཁའི་ཉི་མོར་རེ་བས་ལྟ་བཞིན་སྐྱོ་བའི་མཆི་མ་གདོང་ལ་དྲུད།།
ཁུ་བྱུག་གྲེ་འགྱུར་སྲིད་པའི་གྲོང་ན་གྱེས་བྲལ་གདུང་བའི་ཕལ་གཏམ་གྱིས།།
རྨ་བྱ་སྒེག་མོའི་དངུལ་དཀར་སྒྲོ་མདོངས་རྒས་གཉེར་རི་མོའི་གདོང་ལ་བརྗེ།།
ཁྱུང་ཆེན་འཛིངས་པའི་གློག་གི་གོམ་སྟབས་དོན་ཡོན་སྒྱུ་མའི་གསེར་ཐག་གིས།།
སྙོམས་འཇུག་ཚེ་ཡི་ཕ་མཐའ་ཟད་པའི་གཟུགས་མེད་མིང་གི་ཁྲི་ལ་བཏགས།།
རྒྱུ་སྐར་ལག་ཆུང་ས་ལ་ཟུག་པ་འཆི་བདག་འཛུམ་པའི་དཔང་རྟགས་སུ།།
གཉུག་མའི་ལྗོན་པར་རྐང་སྟེགས་འཆའ་བའི་སྤྲེལ་ནག་འཁྱམས་པའི་མཚན་མོ་དེར།།
མགྱོགས་འགྲོ་རལ་བའི་དཀྱིལ་འཁོར་འཚུབ་པ་གཏུམ་ཆེན་ཁྲོས་པའི་གཡབ་མོ་བཅས།།
བྱེ་ཐང་ཉུལ་བའི་བྱང་གི་སྤྱང་ལྟོགས་ཚེ་མཇུག་བཀྲེས་པའི་སྙིང་གཏམ་བརྡོལ།།
སྲིད་པའི་བལ་ཐག་དགུང་ནས་འཁེལ་བའི་ལྔ་ལེན་བུ་མོ་གདོང་ནག་མས།།
ལྤགས་ཤུབ་མེ་ཏོག་སྒྲོམ་བུའི་ཁ་ཕྱེ་རུས་ཕྲེང་དཀར་བོའི་སེ་མོ་དོ།།
སེན་ཞག་ལོ་མས་ཁྲག་གི་རྗེས་བཏབ་ཙིཏྟ་དམར་པོའི་བྲང་སྦྱོར་གྱིས།།
ཤེས་འཛིན་ཕྲ་མོ་དམྱལ་ཕྲེང་དགྱེས་ཕྱིར་སྟོང་འཇུག་ལྷ་ཡི་གཉེན་དུ་བསུ།།
ཟླ་ཤེལ་ཁུ་བ་འོ་ཡིས་ལེན་པའི་བརྩེ་ཆེན་ཁེངས་པའི་མཚར་སྡུག་གིས།།
དྲན་ཤེས་རི་དྭགས་མིག་ཕྲེང་འཛིན་པའི་སྒེག་ཉམས་གར་གྱི་སྟངས་སྟབས་ཅན།།
ཤལ་མ་ལ་ཡི་རྐང་འཐུང་ཚལ་ན་རྔ་ཡབ་རྒན་པོའི་གསང་མཚོན་གྱིས།།
སྣང་སྲིད་མཆོད་པ་ཟས་སུ་རོལ་ཞིང་དུང་སེམས་དཀར་མོའི་བཞིན་ལ་འཕྱ།།
ཆུང་ཆུང་བྱིས་པའི་དུས་ཀྱི་མེ་ཏོག་ཉལ་འགྲོ་སྒྱུ་མའི་རླབས་ཀྱིས་འཐུ།།
བརྩེ་ལྡན་མཛའ་མོ་མྱོས་པའི་ཟུར་མིག་ནུབ་ཕྱོགས་གྲོང་ཚོམས་རི་ལ་ལྟ།།
གངས་ཚོན་འདབ་མས་དབུ་སྐྲ་བྱུགས་རྣམས་གཡོ་མེད་ཏིང་འཛིན་མལ་དུ་ལྷུང༌།།
འབྱུང་བ་ངེས་མེད་ཟོ་ཆུན་འཁོར་ལོས་འཕར་ལྡིང་སྲོག་རྩའི་སྙིང་ལ་བསྣུན།།
གནམ་ལྕགས་འཁོར་ལོ་འབར་བའི་ཟེགས་མ་མི་རྟག་སྒྱུ་མའི་ཞལ་ལྕེ་ལས།།
རྟག་བརྟན་གཡུང་དྲུང་རིས་སུ་འཛུམ་པའི་རྡོ་རྗེ་རྐེད་པ་ཐང་མར་བརྡལ།།
འཇིགས་རུང་སྤྲིན་ནག་རུས་པའི་སོ་ཕྲེང་གཤིན་རྗེ་དམར་བོའི་རླུང་ཞགས་ཀྱིས།།
བདེ་གཤེགས་ཕོ་བྲང་བྱེ་མར་འཐགས་པས་བཅོམ་ལྡན་རིག་པའི་སྣང་ཤེས་འགགས།།
དེ་ལྟར་འབྱུང་བོའི་རྐང་བྲོ་བརྡུངས་ཤིང་སྲིན་བྱ་དགོད་པའི་དུར་ཁྲོད་ན།།
ཕྱི་གཟུགས་སྒྱུ་མའི་ནང་ཁྲོད་སྟོན་པ་གསང་བ་བསྙིལ་བའི་སྤྲེལ་ནག་པའི།།
ཁྲག་ཞག་འཁོལ་མ་ཁོང་ནས་འབབ་པའི་དྲག་ལྡན་སྙིང་རྩ་འཕར་ཤུགས་ཀྱིས།།
མུན་ནག་ཕྱི་ལམ་བརྒྱུད་འགྲིམ་བྱེད་པའི་མཐའ་མཇུག་ཚེ་ཡི་གླུ་དབྱངས་བླངས།།
སྙན་དངགས་ཀྱི་བརྩམས་ཆོས་འདི་ཁོང་གི་མཐའ་མཇུག་གི་ཚེ་སྲོག་ཅེས་པའི་སྙན་དེབ་ལས་དྲངས་ཏེ་ཀློག་པ་པོ་རྩོམ་དགའ་དག་ལ་སྐྱེས་སུ་བརྫངས་པ་ཡིན།
སྤྲེལ་ནག་པ་བློ་གྲོས་དཔལ་བཟང༌།
བདེ་ལྡན་བུ་མོ་མྱོས་པའི་མཁུར་ཚོས་ཟེགས་མའི་མེ་ཏོག་ས་ལ་དྲུད།།
མཉེན་འཇམ་པདྨའི་མངལ་དུ་སྦྲུམ་པའི་ཟེའུ་འབྲུ་འདབ་མ་གཡོ་བས་འདར།།
གསང་ལྕམ་མཆུ་སྒྲོ་འཛུམ་པའི་སྒེག་ཉམས་མྱོས་འཛིན་འོ་ཡིས་དལ་གྱིས་གཞིབ།།
ངོ་མཚར་རྩེ་དགའི་ཡིད་ཀྱི་སྒྱུ་མ་སྐལ་བཟང་སྙིང་ལ་ཁོ་མོས་རྩེན།།

བརྗོད་གཞིའི་རིགས་བཀར་བ།:

བཀླཌ་ཐེངས།: 1407 | དེ་ལས་མང༌།...


 
དགེ་ལྡན་ལེགས་བཤད་པདྨ་དཀར་པོའི་ཆུན་པོ།
21.07.2014 01:47:30

དགེ་ལྡན་ལེགས་བཤད་པདྨ་དཀར་པོའི་ཆུན་པོ།
པཎ་ཆེན་བསོད་ནམས་གྲགས་པ། (༡༤༠༨ - ༡༥༥༤)
མཁས་པ་ཡོན་ཏན་ཀུན་ལྡན་པས། །གང་དུ་ཕྱིན་པ་དེ་རུ་བྲིན། །
རྟ་ཕོ་བཟང་དང་རྒྱན་བཟང་པོ། །ཚོང་དུས་དག་ཏུ་བྲིན་པ་བཞིན། །
བླུན་པོ་ཉེས་པ་ཀུན་ལྡན་པས། །གང་དུ་ཕྱིན་པ་དེ་ལས་ལྡོག །
བོང་ཤ་ཡིན་པར་ངོ་ཤེས་ན། །སུས་ཀྱང་ཉོ་བ་མེད་ལ་ལྟོས། །
མཁས་པ་ཤིན་ཏུ་རྒུད་ན་ཡང༌། །ཟླ་བ་བཞིན་དུ་ཡར་ངོ་འབྱུང༌། །
བཙོན་རར་འཁོད་པའི་བློན་པོ་མགར། །རྗེས་སུ་ཀུན་ལས་རྒྱལ་ལ་ལྟོས། །
བླུན་པོས་རྟོག་དཔྱོད་མི་གཏོང་བར། །དགྲ་ལ་རྩོད་པ་བླུན་རྟགས་ཏེ། །
མར་མེའི་འོད་ལ་འཐབ་པ་ཡི། །ཕྱེ་མ་ལེབ་ཀྱི་ངང་ཚུལ་ལྟོས། །
མཁས་པས་ལྟོ་གོས་ཁྱད་བསད་ནས། །བཟང་པོའི་གཏམ་ལ་ངོ་སོར་བྱེད། །
དཔའ་བོ་གང་ལའང་མི་ལྟ་བར། །གཡུལ་ལས་རྒྱལ་བར་བྱེད་ལ་ལྟོས། །
མཁས་པས་སྔར་སྲོལ་བཟང་པོ་སྐྱོང༌། །དེ་ཡིས་བདེ་བ་བརྟན་པོ་འཐོབ། །
ཡེ་དབང་རྒྱལ་པོས་ཡབ་མེས་བཞིན། །རྒྱལ་བའི་བསྟན་པ་མཆོད་ལ་ལྟོས། །
བླུན་པོས་སྔར་སྲོལ་བཟང་པོ་སྣུབ། །དེ་ཡིས་སྡུག་བསྔལ་དྲག་ཏུ་འཐོབ། །
རྒྱལ་པོ་འུ་དུམ་བཙན་གྱིས་ནི། །བསྟན་པ་བསྣུབས་པའི་ཉེས་དམིགས་ལྟོས། །

པཎ་ཆེན་བསོད་ནམས་གྲགས་པ། (༡༤༠༨ - ༡༥༥༤)

མཁས་པ་ཡོན་ཏན་ཀུན་ལྡན་པས། །གང་དུ་ཕྱིན་པ་དེ་རུ་བྲིན། །

རྟ་ཕོ་བཟང་དང་རྒྱན་བཟང་པོ། །ཚོང་དུས་དག་ཏུ་བྲིན་པ་བཞིན། །

བརྗོད་གཞིའི་རིགས་བཀར་བ།:

བཀླཌ་ཐེངས།: 1429 | དེ་ལས་མང༌།...


 
སྦག་ས།
19.06.2014 00:11:42

སྦག་ས།
རྒྱ་གར་དང་འབྲུག་གི་ས་མཚམས་འཁེལ་ཡུལ་སྦག་ས་ཞེས་པ་དེ་སྔ་རྒྱ་གར་དབྱིན་ཇིའི་དབང་འོག་ཏུ་ཡོད་སྐབས་དབྱིན་གཞུང་ལ་ངོ་རྒོལ་བ་བཙོན་འཇུག་བྱ་ཡུལ་ཡིན་ཞིང་། རྒྱ་གར་གྱི་མེས་པོ་དམ་པ་གྷན་དྷི་དང་། ནེ་ཧ་རུ་སོགས་ཀྱང་བཙོན་ཁང་དེར་བཞུགས་མྱོང་ཡོད། ས་གནས་དེ་ནི་གནམ་ས་གྲུ་གསུམ་པ་རི་བྲག་གུ་དོག་དང་། ཚ་བ་ཆེ་བ་སོགས་སྣོད་བཅུད་གང་ཐད་ནས་མཐུན་རྐྱེན་འཚམ་པོ་མེད་པའི་གནས་ཤིག་ཡིན་འདུག
ཕྱི་ལོ་ ༡༩༥༩ ལོར་བོད་ས་ཡོངས་རྒྱ་ལག་ཏུ་ཤོར་རྗེས་འབྲུག་དང་འབྲས་ལྗོངས་བརྒྱུད་རྒྱ་གར་ནང་བཙན་བྱོལ་དུ་འབྱོར་བའི་གྲས་དང་། ས་གནས་གཞན་ནས་འབྱོར་རིགས་བཅས་ཀྱི་ནང་ནས། རིས་མེད་ཆོས་རྒྱུད་ཁག་གི་མཁན་བླ་དགེ་བཤེས་དང་སློབ་གཉེར་བ་གྲྭ་རིགས་རྣམས་ཁ་འཐོར་དུ་མི་འགྲོ་བར་དམ་པའི་ཆོས་སློབ་གཉེར་གྱི་རྒྱུན་མཐུད་པའི་དགོས་དོན་གཙོ་བོར་དམིགས་ཏེ། ༸གོང་ས་མཆོག་གིས་བོད་ཀྱི་དགེ་འདུན་པ་རྣམས་ལ་བཞུགས་ཡུལ་དང་སློབ་གཉེར་ཐད་རོགས་སྐྱོར་སྐོར་རྒྱ་གར་གཞུང་ལ་ཞུ་སྐུལ་གནང་འབྲས་སུ། རྒྱ་གར་གཞུང་ངོས་ནས་དགེ་འདུན་པ་ཞལ་གྲངས་སུམ་བརྒྱ་ཐམ་པར་མཐུན་འགྱུར་མཁོ་སྤྲོད་ཀྱི་བཀའ་འཁྲོལ་སྩལ་ཐོབ་མཚམས། དགེ་འདུན་པ་ཞལ་གྲངས་ཆིག་སྟོང་ལྔ་བརྒྱ་ཡས་མས་ཤིག་སློབ་གཉེར་ཆེད་སྦག་སར་བཞུགས་ཆོག་པའི་ཞུ་སྐུལ་སྐྱར་ནན་གནང་བ་དེར་ཡང་རྒྱ་གར་གཞུང་ནས་ངོས་ལེན་ཐོབ་སྟེ། ཕྱི་ལོ་ ༡༩༦༠ ལོར་གདན་ས་གསུམ་གྱིས་གཙོས་པའི་རིས་སུ་མ་ཆད་པའི་ཆོས་རྒྱུད་ཁག་མཉམ་འདུས་ཀྱི་སྦག་ས་ཆོས་སྒར་རམ་སྦག་ས་ནང་བསྟན་ཤེས་རིག་འཛིན་སྐྱོང་སློབ་གཉེར་ཁང་གསར་འཛུགས་བསྐྱངས།
དགེ་འདུན་པ་ཞལ་གྲངས་ཆིག་སྟོང་ལྔ་བརྒྱ་ཡས་མས་དེ་ནི། སྐབས་དེར་བཙན་བྱོལ་དུ་ཕེབས་འབྱོར་གྲྭ་རིགས་དྲུག་སྟོང་ལྷག་ཡོད་ཁོངས་ནས། ལོ་ན་ཆུང་ཤོས་དང་། ཤེས་རིག་བཀྲ་བ། འཇོན་ཐང་ཆེ་ཤོས། ཉམས་མྱོང་ལྡན་པའི་དགེ་བའི་བཤེས་གཉེན་འཚོ་བཞུགས་བཅས་ཚུད་པའི་ཧྲག་བསྡུས་ཤིག་ནས་མགོ་ཚུགས་ཡོད་པ་དང་། སྐབས་དེའི་སློབ་གཉེར་བ་ཚོས་ལོ་ངོ་བཅུ་སྐོར་ནང་ས་གནས་དེ་གར་རྒྱལ་བསྟན་མི་ཉམས་རྒྱུན་སྐྱོང་གི་ཕྱག་བཞེས་རླབས་པོ་ཆེ་བསྐྱངས་གནང་བ་དེ་ནི་བོད་ཀྱི་ལོ་རྒྱུས་ནང་ཆེས་གཉན་འཕྲང་གི་དུས་སྐབས་སུ་གྲུབ་འབྲས་ཚད་མཐོ་ཤོས་བླངས་པ་ཞིག་ཆགས་ཡོད།
ཕྱི་ལོ་ ༡༩༦༩ ལོར་སྦག་ས་ཆོས་སྒར་མུ་མཐུད་གནས་མ་དགོས་པར་གཞིས་ཁོངས་སོ་སོར་ཆོས་སྡེའི་རྟེན་གཞི་འཛུགས་པའི་མགོ་བརྩམས་ཤིང་། ཕྱི་ལོ་ ༡༩༧༢ ལོ་ནས་ཡོངས་སུ་གནས་སྤོས་ཐུབ་པ་བྱུང་སྟེ། དེང་གི་སེ་འབྲས་དགེ་གསུམ་དང་རྒྱུད་གྲྭ་སྟོད་སྨད་སོགས་ཆོས་སྡེ་ཁག་ནི། སྦག་ས་ཆོས་སྒར་ ནས་གཅིག་ལ་གཉིས་སུ་མཆེད་པ་ཞིག་ཡིན།
དྲ་གྲོགས་རིལ་དཀར་གྱི་མཁོ་འདོན་གནང་སོང་།
༢༠༡༤།༠༦།༡༨ཉིན།

རྒྱ་གར་དང་འབྲུག་གི་ས་མཚམས་འཁེལ་ཡུལ་སྦག་ས་ཞེས་པ་དེ་སྔ་རྒྱ་གར་དབྱིན་ཇིའི་དབང་འོག་ཏུ་ཡོད་སྐབས་དབྱིན་གཞུང་ལ་ངོ་རྒོལ་བ་བཙོན་འཇུག་བྱ་ཡུལ་ཡིན་ཞིང་། རྒྱ་གར་གྱི་མེས་པོ་དམ་པ་གྷན་དྷི་དང་། ནེ་ཧ་རུ་སོགས་ཀྱང་བཙོན་ཁང་དེར་བཞུགས་མྱོང་ཡོད། ས་གནས་དེ་ནི་གནམ་ས་གྲུ་གསུམ་པ་རི་བྲག་གུ་དོག་དང་། ཚ་བ་ཆེ་བ་སོགས་སྣོད་བཅུད་གང་ཐད་ནས་མཐུན་རྐྱེན་འཚམ་པོ་མེད་པའི་གནས་ཤིག་ཡིན་འདུག

བརྗོད་གཞིའི་རིགས་བཀར་བ།:

བཀླཌ་ཐེངས།: 1650 | དེ་ལས་མང༌།...


 
བོད་ལ་མི་ལས་ལྷ་མང་གི
18.06.2014 22:58:48

 

བོད་ལ་མི་ལས་ལྷ་མང་གི
---ཁྲོ་གཏུམ།
བློས་བསླངས་ཡོང་ཁུངས།
༢༠༡༤།༠༥།༡༧ཉིན་གྱི་དགོང་མོ། དགུ་ཆུ་སྐད་ཚོམས་སུ་གུས་པས་དྲ་གྲོགས་རིལ་དཀར་ལགས་ཀྱིས་བོད་ལ་ལྷ་མང་ངམ་མི་མང་ཟེར་བའི་དྲི་བ་སྣང་འགྲོ་ཞིག་བཀོད་སོང་བས་དེ་ནི་ང་ཚོ་བོད་ནས་སྐྱེས་པ་རྣམ་ལ་ཧ་ཅང་ཆ་རྒྱུས་ཡོད་པ་ཞིག་དང་འདྲེས་ཤིང་ངེས་པ་ཞིག་ཡིན་དུས་བསམ་བློ་རག་གཏོང་ཅིག་བྱས་ཡིན།
བོད་མི་གྲུབ་ནས་ལྷ་ཡོད་པའི་བཤད་སྲོལ།
ཕ་སྤྲེའུ་བྱང་ཆུབ་སེམས་དཔའ་དང་། མ་བྲག་ཟིན་མོ་གཉིས་ནི་མིའི་འབྱུང་ཁུངས་ཀྱི་སྒྲུང་རྒྱུགས་ཆེ་ཤོས་ཡིན་ཞིང་། ལོ་རྒྱུས་དེབ་ཐེར་དག་ལས་གོས་སུ་ཤིང་ལོ་གོན་པ་དང་ཟས་སུ་ལོ་ཏོག་ཟ་བའི་སྐབས་ནས་བཟུང་། རང་བྱུང་ཁམས་ཀྱི་འཇིགས་པ་ལ་སྐྲག་ནས་རི་བྲག་ལྷ་རུ་བཀུར་བའི་སྲོལ་བྱུང་བ་དང་། དེ་མུར་བོན་ཆོས་དར་ནས་བོད་ཀྱི་རྒྱལ་བོ་ཐོག་མ་གཉའ་ཁྲི་བཙན་པོ་ཡང་ལྷ་ཡིན་པའི་ལོ་རྒྱུས་ཡིག་ཆ། རྒྱལ་བོ་ཐོག་མ་ནས་སྲུང་བཙན་བར་དུ་ལྷ་ཡི་རྒྱལ་བོ་སོ་གཉིས་བྱུང་ཡོད་ལ། པུར་གནམ་ལ་བཏབ་པའི་ལོ་རྒྱུས། རྒྱལ་བོ་དེ་དག་གི་ལྷའི་བསྟེན་སྲོལ་གྱི་ཐོས་རྒྱ་ང་ལ་མེད། སྲུང་བཙན་ནས་ནང་ཆོས་དར་ཞིང་། དེ་ནས་ད་རག་བར་ཡུལ་ལྷ་གཞི་བདག་དང་ཆོས་སྐྱོང་སྲུང་མ། ཟེར་བ་ཞིག་ཡོངས་གྲགས་ཡིན་ལ། བོད་གངས་ཅན་ལྗོངས་ཀྱི་རི་བོ་མཐོན་པོ་དག་ལ་ལྷ་མིང་རེ་ཡོད་པ་བོད་མི་བྱིངས་ཀྱིས་ཤེས་ཤིང་། ལྷ་དེ་རིགས་སུ་འཁོར་དང་སྲས་ཡི་གྲངས་ཀ་ཧ་ཅང་མང་པས། རག་བརྩིས་བྱས་ན་ཡང་བོད་མིའི་གྲངས་ཀ་དང་མཚུངས་ལ་ཉེ།
ཡུལ་ལྷ་གཞི་བདག་གཙོས་བོད་མིར་ལྷ་མང་བ།
བོད་རྒྱལ་སྲོང་བཙན་སྒམ་པོ་ནས་ནང་ཆོས་དར་མགོ་བཙུག་པ་དང་ལྷ་ཡང་མང་རུ་ཕྱིན་པར་འདུག མདོ་དབུས་ཁམས་གསུམ་གྱི་ལྷ་གསོལ་གླུ་གསོལ་གྱི་སྲོལ་ལུགས་ཤེས་པར་བྱས་ཏེ། བྱེ་བྲག་སྡེ་བ་རེ་དང་དེ་ལས་ཆ་ཤས་ཁྱིམ་ཚང་རེར་བབས་ན། སྡེ་བ་རེ་ལ་གཞི་བདག་རེ་ཡོད་ཅིང་། ཁྱིམ་ཚང་གཅིག་ལ་ཆ་བཞག་ན། ཁྱིམ་ལྷ། ཐབ་ལྷ། ནོར་ལྷ། ཟས་ལྷ། གཡང་ལྷ། སྒོ་ལྷ། ཕོ་ལྷ། དགྲ་ལྷ། མོ་ལྷ། མགྲོན་ལྷ་སོགས་དྲན་ཚོད་ཀྱིས་བཅུ་གྲངས་ཤིག་བྲིས་པ་འདི་ནི་ཁྱིམ་ཚང་མི་གྲངས་མང་ཤོས་ཀྱིས་གྲས་སུ་བཞག་ཆོག་ལ། མི་གྲངས་ཉུང་རུང་ལྷ་འདི་དག་ངེས་པར་ཚང་དགོས་པ་ཞིག་ཏུ་གྱུར་བའི་བོད་གངས་ཅན་ལྗོངས་སུ་མི་ལས་ལྷ་མང་བའི་གནས་ཚུལ་མདོར་བསྡུས་ཤིག
༢༠༡༤།༠༥།༡༨ཉིན་མའི་སོར་ལ་མེ་འཁོར་ནས་འགྲོ་བའི་ཆུ་ཚོད་བེད་སྤྱད་དེ་བྲིས།

བློས་བསླངས་ཡོང་ཁུངས།

༢༠༡༤།༠༥།༡༧ཉིན་གྱི་དགོང་མོ། དགུ་ཆུ་སྐད་ཚོམས་སུ་གུས་པས་དྲ་གྲོགས་རིལ་དཀར་ལགས་ཀྱིས་བོད་ལ་ལྷ་མང་ངམ་མི་མང་ཟེར་བའི་དྲི་བ་སྣང་འགྲོ་ཞིག་བཀོད་སོང་བས་དེ་ནི་ང་ཚོ་བོད་ནས་སྐྱེས་པ་རྣམ་ལ་ཧ་ཅང་ཆ་རྒྱུས་ཡོད་པ་ཞིག་དང་འདྲེས་ཤིང་ངེས་པ་ཞིག་ཡིན་དུས་བསམ་བློ་རག་གཏོང་ཅིག་བྱས་ཡིན།



བརྗོད་གཞིའི་རིགས་བཀར་བ།:

བཀླཌ་ཐེངས།: 1398 | དེ་ལས་མང༌།...


 
དགེ་འདུན་ཆོས་འཕེལ་དང་རང་གྲོལ་གཤིབ་བསྡུར།
09.05.2014 00:39:15

གསུང་བཤད་གནང་མཁན་ཨ་ཁུ་པདྨ་འབུམ་གྱི་གཏམ་བཤད་དངོས་གཞི།

དེ་རིང་ཁ་བརྡ་ཡིན། གཏམ་བཤད་མིན། བརྗོད་གཞི་འདི་ལ་ནམ་རྒྱུན་བསམ་བློ་བཏང་མྱོང་བ་ལས་བང་རིམ་མ་བསྒྲིགས་པ་ཞིག་ཡིན་པས། དེ་རིང་བང་རིམ་འགྲིག་མོ་དང་གསལ་བོ་ཞིག་བཤད་རྒྱུ་མེད་པ་འདྲ།  ཕྱི་ལོ་ ༢༠༠༤ ནས་ལོ་རེར་ཐེངས་རེར་ང་ཕ་ཡུལ་ལ་འགྲོ་གི་ཡོད་པ་རེད། ཡུལ་ལ་འགྲོ་དུས་གཙོ་བོ་དཔེ་ཆ་ཉོ་གི་འགྲོ་གི་ཡོད། དེའི་སྐབས་སུ་རེབ་གོང་དང་ཟི་ལིང་ནས་སྒེར་གྱི་ཚོང་ཁང་དུ་རྩིག་ངོས་ལ་སྦྱར་རྒྱུའི་པར་མང་པོ་མཐོང་རྒྱུ་ཡོད་པའི་ནང་ནས་རྒྱུན་དུ་མཐོང་བའི་པར་གཅིག་ནི་དོན་གྲུབ་རྒྱལ་དང་དགེ་འདུན་ཆོས་འཕེལ་གཉིས་ཀྱི་པར་དང༌། ཡང་ན་མི་རིགས་ཀྱི་ལར་ཞེན་ཡོད་པའི་ཁོང་གཉིས་ཀྱི་གསུང་ཚིག་དུམ་བུ་རེ་ཡི་པར་དང་ཁོང་གཉིས་མཉམ་དུ་ཡོད་པའི་པར་མཐོང་གི་འདུག
ཁོང་གཉིས་མི་རྣམས་ཀྱི་སེམས་ལ་བག་ཆགས་མཐུག་པོ་ཡིན་པ་མ་ཟད། པར་སོགས་རྩིག་ངོས་སུ་སྦྱར་བའི་ཚད་དུ་སླེབས་འདུག དེ་ནས་བཟུང་ངས་ཁོང་གཉིས་ལ་དོ་སྣང་སླེབས་ཏེ་ཁོང་གཉིས་ཀྱི་ཁྱད་པར་ག་རེ་རེད། ཁོང་གཉིས་ཀྱིས་ཅི་ཞིག་བཤད་ཀྱི་ཡོད་པ་རེད། མཚམས་དང་མཚམས་ལ་འདི་ལྟ་བུའི་བསམ་བློ་ཞིག་འཁོར་ཏེ་བསམ་བློའང་བཏང་བ་རེད། ན་ནིང་ལོ་མཇུག་ཀན་སུའུ་མི་རིགས་དཔེ་བསྐྲུན་ཁང་གི་གཅོད་པ་ཀླུ་རྒྱལ་གྱིས་ཁོ་ཚོས་ཀྱང་དོན་གྲུབ་རྒྱལ་དང་དགེ་འདུན་ཆོས་འཕེལ་གཉིས་ཀྱི་སྐོར་ལ་དཔྱད་རྩོམ་ཕྱོགས་བསྒྲིགས་ཤིག་དཔར་གྱི་ཡོད།  རྩོམ་ཡིག་ཅིག་འབྲི་ཐུབ་བམ་ཟེར་ནས་བཤད་བྱུང༌། རྩོམ་སྤུས་དག་རེ་འབྲི་བར་དུས་ཚོད་འགོར་བ་དང༌། ང་རང་གི་ལས་ཁུངས་ཀྱི་ནང་ལ་ཞུ་དག་བྱེད་རྒྱུ་སོགས་ལས་ཀ་མང་པོ་ཞིག་ཡོད་པས་ངས་དེ་ཁས་བླངས་མེད། དེ་དུས་ཀྱང་འདིའི་སྐོར་ལ་བསམ་བློ་ཞིག་བཏང་བ་ཡིན།  གང་ལྟར་ཁོང་གཉིས་འུ་ཚོའི་མི་རབས་འདིའི་སྐབས་ལ་བྱུང་བ་རེད། ཁོ་གཉིས་ཀྱི་འདྲ་ས་དང་མི་འདྲ་ས་གང་ཡིན་པ་དང༌། གལ་སྲིད་རྩོམ་ཡིག་ཅིག་འབྲི་དགོས་པ་ཡིན་ན་ཇི་ལྟར་འབྲི་དགོས་པར་ཡང་བསམ་བློ་བཏང་བ་ཡིན། ཉེ་ཆར་དེབ་དེ་དཔར་བསྐྲུན་བྱས་ཟིན་ཡོད་པ་རེད་ཟེར།
དེ་རིང་གཏམ་མ་བཤད་སྔོན་ལ། དཔེ་ཆ་དེ་རག་ཡོད་པ་ཡིན་ན། འུ་ཚོར་བསམ་བློ་གསར་བ་གཏོང་རྒྱུར་ཕན་ཐོགས་ཡོད་ཀྱང་དེབ་མ་རག་པ་རེད། ཡིན་ན་ཡང༌། ཁྱད་པར་མི་འདུག དེ་རིང་ངས་སྡོམ་ཚིག་འཇོག་དགོས་པ་མ་རེད།  ང་རང་གི་བསམ་ཚུལ་གང་ཡིན་པ་དེ་བཤད་དགོས་ཀྱི་ཡོད་པ་རེད། སྤྱིར་བཏང་ང་རང་ལ་མཚོན་ན། མི་དང་མཉམ་དུ་ཁ་བརྡ་བྱས་ཚེ་ཇེ་གསལ་དུ་ཡོང་གི་འདུག ནོར་ཡོད་པ་དེའང་ཇེ་གསལ་དུ་ཡོང་གི་འདུག་ལ། གསལ་ལ་མི་གསལ་བ་དེའང་གསལ་བོ་ཆགས་ཡོང་གི་འདུག ཁ་བརྡ་བྱས་ན་ང་རང་ལ་མཚོན་ན་ཕན་ཐོགས་འདུག  དེ་རིང་འདི་ནས་ང་གཅིག་པུས་བཤད་པས་འདི་གཉིས་ཆ་ཚང་བ་ཞིག་ཤེས་ཐུབ་པ ཆགས་མི་ཐུབ་ན་ཡང༌། ངས་རང་གི་བསམ་ཚུལ་ང་ཚོའི་དཀྱིལ་ལ་བཞག གཞན་པ་ཚོས་ཀྱང་དེའི་ཐོག་བསམ་བློ་བཏང་ནས་ཚང་མ་མཉམ་རུབ་ཀྱིས་གྲོས་བསྡུར་རེ་བྱས་ན། དགེ་འདུན་ཆོས་འཕེལ་དང་དོན་གྲུབ་རྒྱལ་གཉིས་ཀྱི་སྐོར་ལ་ཤེས་རྟོགས་ཇེ་གསལ་དང༌། ཇེ་དག་ཏུ་འགྲོ་རྒྱུར་ཕན་ཐོགས་ཡོད་ཀྱི་རེད་བསམ།
དགེ་འདུན་ཆོས་འཕེལ་དང་འབྲེལ་བ་ཡོད་པའི་གསལ་བསྒྲགས་ཤིག
གཏམ་བཤད་མ་བྱས་སྔོན་ལ་གསལ་བསྒྲགས་ཤིག་བྱས་ཆོག་པ་ཞུ།  གསལ་བསྒྲགས་འདི་དགེ་འདུན་ཆོས་འཕེལ་དང་འབྲེལ་བ་ཡོད་པ་ཞིག་ཡིན། ཚང་མས་ཤེས་གསལ་ལྟར། ཕྱི་ལོ་ ༢༠༠༣ ལོར། ལ་རྩེ་དཔེ་མཛོད་ཁང་གིས་དགེ་འདུན་ཆོས་འཕེལ་འཁྲུངས་ནས་ལོ་བརྒྱ་འཁོར་བའི་རྗེས་དྲན་ཚོགས་འདུ་འཚོགས་པ་རེད། དེའི་དཔེ་ཆ་ད་བར་དཔར་མྱོང་མེད། ད་ལྟ་ང་ཚོས་དཔེ་ཆ་པར་སྐྲུན་དང་རྩོམ་ཡིག་དྲ་ཐོག་ལ་འཇོག་པའི་ལས་དོན་ཞིག་སྒྲུབ་ཀྱིན་ཡོད།  དཔེ་ཆ་ནི་རྗེས་དྲན་ཚོགས་འདུ་དེའི་ཐོག་ལ་འཁྱེར་ཡོང་བའི་དགེ་འདུན་ཆོས་འཕེལ་གྱི་རི་མོ་དང་འདྲ་པར་གྱི་རིགས་ཡིན།
དེའི་ནང་གི་རི་མོ་སྐོར་ཞིག་ཚོགས་འདུ་དེའི་ཐོག་ལ་ཐེངས་དང་པོར་འགྲེམས་སྟོན་བྱས་ཡོད། དགེ་ཆོས་ཀྱི་རི་མོ་ཕྱག་བསྟར་མ་ལ་རིགས་གཉིས་ཡོད་པའི་ནང༌། ཀན་ལྷོ་ནས་ཡོང་བའི་ཆུ་ཚོན་རི་མོ་ཉི་ཤུ་རྩ་བདུན་དང༌། འཇར་མན་ནས་ཁོང་གིས་བྲིས་པའི་སྐྱ་བྲིས་རི་མོ་སུམ་ཅུ་རག་ཡོད་པ་རེད། རི་མོའི་སྐོར་ཆ་ཚང་དཔེ་སྐྲུན་བྱས་པ་ད་རེས་ཐེངས་དང་པོ་རེད། རི་མོའི་སྐོར་དེ་གཉིས་གཙོ་བྱས་ཏེ་ཁོང་གི་བརྗེད་ཐོའི་འབྲི་དེབ་ཞིག་དང༌། རྡོ་ནོལ་ལོ་པེ་སི་ཡིས་(Donald Lopez)བྲིས་པའི་དགེ་འདུན་ཆོས་འཕེལ་གྱི་མི་ཚེ་དང་གསུང་རྩོམ་བསྐྱར་ཞིབ་ཀྱི་རྩོམ་གཅིག རི་མོ་བསྐྱར་ཞིབ་ཀྱི་རྩོམ་གཅིག མགོ་བརྗོད་ལ་ངས་ ༢༠༠༣ ལོའི་ཚོགས་འདུའི་རིམ་པ་རྒྱས་བཤད་ཀྱི་རྩོམ་གཅིག་ཡོད། དེབ་འདི་ན་ནིང་དབྱིན་ཡིག་ཏུ་རྩོམ་སྒྲིག་བྱས་ཏེ་དཔེ་བསྐྲུན་བྱས་ཟིན་ཡང་སྒོ་འབྱེད་བྱེད་ཐུབ་ཡོད་པ་མ་རེད། ཚོགས་འདུའི་སྐབས་ལ་གསུང་བཤད་བོད་སྐད་དུ་བཤད་པ་ཚང་མ་དབྱིན་ཡིག་ཏུ་བསྒྱུར་བ་དང༌། དབྱིན་སྐད་དུ་བཤད་པ་བོད་ཡིག་ཏུ་བསྒྱུར་ཚར་ཡོད། འདི་ལོའི་ཟླ་ ༥ ཚེས་ ༢༢ ཉིན་དཔེ་ཆ་དེ་སྒོ་འབྱེད་དང་མཉམ་དུ་ཚོགས་འདུའི་ཐོག་ཡོང་བའི་གསུང་བཤད་ཆ་ཚང་ཀུན་ཕན་ཐེབས་རྩ་ཚོགས་པའི་ལ་རྩེ་དཔེ་མཛོད་ཁང་གི་དྲ་བའི་ཐོག་ནས་ཀྱང་བཀྲམ་རྒྱུ་ཡིན།
དེ་མ་ཡིན་པའི་སུད་སི་ན་ཡོད་པའི་ལུའུ་ཁི་ཧྲད་ལིར་གྱི་བཅར་འདྲི་སྐོར་ཞིག་ཡོད། ཁོས་འབུམ་རམས་པའི་ཆེད་རྩོམ་ལ་དགེ་འདུན་ཆོས་འཕེལ་གྱི་སྐོར་བྲིས་ཡོད་པ་རེད། ཁོས་༼ཡིད་ཕྱུང་བའི་གྲྭ་བ་༽ Angry monk ཟེར་བའི་དངོས་བརྗོད་གློག་བརྙན་ཞིག་ཀྱང་བཟོས་ཡོད་པ་དེ་བཟོ་སྐྲུན་བྱེད་ཆེད་དགེ་འདུན་ཆོས་འཕེལ་དང་དངོས་སུ་ཐུག་མྱོང་མཁན་དང༌། སློབ་མ། འབྲེལ་བ་ཡོད་མཁན། ཞིབ་འཇུག་བྱེད་མཁན་མི་སྣ་བཞི་བཅུར་ཉེ་བ་བཅར་འདྲི་བྱས་ཡོད་པ་རེད། བཅར་འདྲི་དེ་དག་གློག་བརྙན་ནང་ཉུང་ཉུང་རེ་མ་གཏོགས་བེད་སྤྱོད་གཏོང་ཐུབ་ཡོད་པ་མ་རེད། བོད་ཡིག་ནང་ཡོད་པ་ཚང་མ་ཁ་བརྡ་དྲ་བར་བཀྲམས་ཟིན་པ་རེད། དེའི་དབྱིན་ཡིག་ཐོག་ཡོད་པའི་བཅར་འདྲི་དག་ཁོའི་དཔེ་དེབ་ནང་ཡོད་པ་མ་གཏོགས་ད་བར་བཀྲམས་ཡོད་པ་མ་རེད།
ཉེ་ཆར་ང་ཚོས་ལུའུ་ཁི་ཧྲད་ལིར་ལ་འབྲེལ་བ་བྱས་ནས་ང་ཚོས་ཚོགས་འདུའི་གཏམ་བཤད་ཚང་མ་དྲ་ཐོག་དཔེ་སྐྲུན་བྱེད་ཀྱིན་ཡོད། དེ་དང་མཉམ་དུ་ཁོང་གི་བཅར་འདྲི་དེ་དག་གི་བརྙན་ཐག་དང་ཡི་གེ་ཚང་མ་མཉམ་དུ་དཔར་བསྐྲུན་བྱས་ན་ཟེར་ནས་ཞུ་དུས། ཁོང་གིས་ཡིན་ད་ཡིན་དཔར་བསྐུན་བྱེད་ཐུབ་ན་ཡག་པོ་འདུག་ཟེར་གྱི་འདུག ང་ཚོས་དབྱིན་ཡིག་གི་བཅར་འདྲི་རྣམས་བོད་ཡིག་ལ་བསྒྱུར་བཞིན་པ་ཡིན། བཅར་འདྲི་བྱེད་སའི་ནང་ལ་དགེ་འདུན་ཆོས་འཕེལ་བཙོན་འཇུག་དང་འབྲེལ་བ་ཡོད་པའི་དབྱིན་ཇིའི་  ཧིག་ཌི་རི་ཆར་ཌི་སོན་  སོགས་མི་སྣ་གལ་ཆེན་མང་པོ་ཡོད་པ་རེད། དེ་ཡང་ང་ཚོའི་དེབ་དང་མཉམ་དུ་དྲ་བའི་ཐོག་བཀྲམ་གྱི་ཡོད། དེའི་ཐོག་ལ་ཚོགས་འདུའི་ཐོག་གི་འདྲ་པར་གྱི་སྐོར་དང༌།  འདོད་པའི་བསྟན་བཅོས་ཀྱི་ངོ་བཤུས་དང་པོ་དང༌། དགེ་འདུན་ཆོས་འཕེལ་གྱི་བརྗེད་ཐོ་ཆུང་ཆུང་ཞིག་ཡོད་པ་ཆ་ཚང་བཅས་ཟླ་ ༥ ཚེས་ ༢༢ ཉིན་བཀྲམ་གྱི་ཡོད། རྗེས་ལ་ཁྱབ་བསྒྲགས་སྤེལ་རྒྱུ་ཡིན་པ་ལྟར།  ནེའུ་ཡོག་ན་ཡོད་པའི་བོད་པ་ཐུགས་སྣང་ཡོད་པ་རྣམས་མང་ཙམ་ཞིག་ཕེབས་རྒྱུའི་རེ་བ་བྱེད་ཀྱི་ཡོད། འདི་བརྗོད་གཞི་དང་འབྲེལ་བ་ཡོད་པས་དུས་ཚོད་ཅུང་བཟུང་སོང་ཡང་དགོངས་པ་མ་ཚོམས།
དང་པོ། འཚར་ལོངས་བྱུང་སའི་སྤྱི་ཚོགས་བསྡུར་བ།
བརྗོད་གཞིའི་ཐོག་བབ་ན་༼དགེ་འདུན་ཆོས་འཕེལ་དང་དོན་གྲུབ་རྒྱལ་གཉིས་གཤིབ་བསྡུར་༽ཞེས་པ་དེ་རེད།  དང་པོ། ཁོང་གཉིས་ཀྱི་སྐྱེས་ས་དང་འཚོ་བ་རོལ་ས། འཚར་ལོངས་བྱུང་སའི་སྤྱི་ཚོགས་ལ་གཤིབ་བསྡུར་བྱས་ན་བསམ་སོང༌། དགེ་འདུན་ཆོས་འཕེལ་ཕྱི་ལོ་ ༡༩༥༡ ལོར་གྲོངས་པ་རེད། དེ་ནས་ལོ་གཉིས་ཀྱི་རྗེས་ལ་དོན་གྲུབ་རྒྱལ་སྐྱེས་པ་རེད། གུང་ཁྲན་ཏང་གི་བཤད་ཕྱོགས་ལྟར་ན། དགེ་འདུན་ཆོས་འཕེལ་གྲོངས་དུས་སྤྱི་ཚོགས་རྙིང་བའི་མཇུག་བསྡུས་པ་རེད། དོན་གྲུབ་རྒྱལ་སྐྱེས་དུས་སྤྱི་ཚོགས་གསར་བའི་འགོ་བཙུགས་པ་རེད། དེ་དུས་གུང་ཁྲན་ཏང་གིས་ང་ཚོའི་མི་ཐོག་འདི་ལ་སྤྱི་ཚོགས་གསར་པའི་ནང་ལ་སྐྱེས་ཏེ། དར་དམར་འོག་ནས་འཚར་ལོངས་བྱུང་ཟེར་བ་ལྟར་དོན་གྲུབ་རྒྱལ་དང་ང་ཚོའི་གྲས་གཅིག་པ་རེད། སྤྱི་ཚོགས་གསར་བའི་ནང་སྐྱེས་པ་རེད། སྤྱིར་བཏང་སྤྱི་ཚོགས་གསར་རྙིང་ཟེར་བ་ནི་གུང་ཁྲན་ཏང་གི་བརྗོད་སྟངས་ཤིག་རེད། འདིའི་དབྱེ་བ་ནི་མི་དམངས་ཀྱི་གོ་གནས་ཐོག་ནས་བཤད་ཀྱི་ཡོད། རིག་གནས་གསར་བརྗེ་ཆེན་མོ་བརྒྱུད་མྱོང་མཁན་ཞིག་ཡིན་ཚེ་ཤེས་ཀྱི་རེད། སྤྱི་ཚོགས་རྙིང་བ་ནི་མི་དམངས་ལ་བཤུ་གཞོག་དང་གཉའ་གནོན་བྱེད་ཡུལ་ཞིག་དང༌། སྤྱི་ཚོགས་གསར་བ་ཟེར་བའི་མི་དམངས་ནི་རྒྱལ་ཁབ་དང་རང་གི་ལས་དབང་གི་བདག་པོ་ཆགས་ཡོད་པ་བཤད་ཀྱིན་པ་དེས་ཁྱད་པར་འབྱེད་ཀྱི་ཡོད་པ་རེད།
བཤད་ཚུལ་དེ་ལ་མོས་མཐུན་ཡོད་མེད་དེ་གལ་ཆེན་མ་རེད། གལ་ལྟར་ཡང་གཙོ་བོ་བོད་ཀྱི་ཤེས་ཡོན་དང་སྤྱི་ཚོགས་ཀྱི་སྒྲིག་གཞི་སོགས་ཚང་མར་གནམ་ས་གོ་ལྡོག་པའི་འགྱུར་བ་ཞིག་སླེབས་པ་རེད། དགེ་འདུན་ཆོས་འཕེལ་གྲོངས་དུས་འགྱུར་བ་སོང་ནས་བཅིངས་གྲོལ་དམག་ཀྱང་སླེབས་ཟིན་པ་མ་ཟད། ཁོང་གི་ནང་ལའང་སོང་ཡོད་པ་རེད། ཕྱི་ལོ་ ༢༠༠༢ སམ་ ༢༠༠༣ གང་རུང་ལ་འབའ་བ་ཕུན་ཚོགས་དབང་རྒྱལ་ནེའུ་ཡོག་ལ་སླེབས་སོང༌། དགོང་མ་གཅིག་ངེད་ཚང་ལ་གདན་འདྲེན་ཞུས་ནས་ང་ཚོས་ཁ་བརྡ་བྱས་པ་ཡིན། དེ་དུས་འབའ་བ་ཕུན་ཚོགས་དབང་རྒྱལ་གྱིས་བཅིངས་གྲོལ་དམག་ལྷ་སར་འགྲོ་རྒྱུ་བྱེད་དུས་བཅིངས་གྲོལ་དམག་གི་ལྔ་དཔུང་ཁྲིད་མཁན་ཝང་ཆིས་མིན་ལ་དགེ་འདུན་ཆོས་འཕེལ་ཟེར་བའི་མཁས་པ་མ་འདྲ་བ་ཞིག་ཡོད། ཁོང་ལ་ཅིག་བལྟ་རུ་འགྲོ་རོགས་ཟེར་ནས་མངགས་བཅོལ་བྱས་པ་ཡིན་ཟེར་གྱི་འདུག དེའི་རྗེས་ཁོ་རང་ཡང་དམག་མི་དང་མཉམ་དུ་ལྷ་སར་འབྱོར་དུས་དགེ་འདུན་ཆོས་འཕེལ་གྲོངས་ཚར་འདུག ཁོས་མངགས་བཅོལ་སྐོར་སྐད་ཆ་དྲིས་པར། དཔོན་པོ་ཆུང་ཆུང་ཞིག་དགེ་འདུན་ཆོས་འཕེལ་ལ་བལྟ་རུ་སོང་བའི་སྐབས་ལ། སྨན་གྱིས་ཀྱང་ཕན་ཐོགས་མེད་པའི་ཚད་དུ་སླེབས་ཡོད་འདུག གང་ལྟར་སྤྱི་ཚོགས་ཀྱི་སྟེང་ནས་དོན་སྙིང་ཡོད་ཀྱང་མེད་ཀྱང་སྤྱི་ཚོགས་རྙིང་བ་མཇུག་བསྡུས་ཏེ་བཅིངས་གྲོལ་དམག་ལྷ་སར་སླེབས། ལོ་བརྒྱ་ཕྲག་དུ་མའི་རིང་གི་ཤེས་ཡོན་སྦྱང་སའི་སྒྲོམ་གཞི་ཞིག་མཇུག་བསྡུས་ནས་གསར་བ་ཞིག་གི་འགོ་འཛུགས་པའི་དུས་ལ་དགེ་འདུན་ཆོས་འཕེལ་གྲོངས་པ་རེད། དོན་གྲུབ་རྒྱལ་སྐྱེས་པ་རེད། གཅིག་གིས་སྤྱི་ཚོགས་རྙིང་པ་མཇུག་བསྡུས་ནས་བུད་སོང་བ་དང༌། གཅིག་གིས་སྤྱི་ཚོགས་གསར་བ་འགོ་བཙུགས་ནས་སྐྱེས་པ་རེད། འདི་ཁོང་གཉིས་ཀྱི་འཚར་ལོངས་བྱུང་སའི་ཁྱད་པར་རེད།
གཉིས་པ།  སློབ་སྦྱོང་གི་རིམ་པ་བསྡུར་བ།
གཉིས་པ་ཁོང་གཉིས་ཀྱི་སློབ་སྦྱོང་གི་རིམ་པ་རེད། དགེ་འདུན་ཆོས་འཕེལ་གྱི་སློབ་སྦྱོང་གི་བརྒྱུད་རིམ་ནི་ང་ཚོའི་སྲོལ་རྒྱུན་གྱི་སློབ་སྦྱོང་བརྒྱུད་རིམ་རེད། གོ་ཐོས་ལ། ཁོང་རྒྱ་གར་ལ་མ་སོང་བར་ལྷ་རམས་པའི་དམ་བཅའ་འཇོག་པའི་ནང་ཞུགས་ཡོད་ཚེ། ལྷ་རམས་པའི་མཚན་ཐོབ་ལ་སླེབས་ཡོད་པ་རེད་ཟེར་གྱི་འདུག དེ་ལྟར་ན་ཆོས་ལུགས་ཀྱི་སློབ་སྦྱོང་གི་བརྒྱུད་རིམ་ཆ་ཚང་བ་དང༌། ཚད་དང་ལྡན་པ་ཞིག་གི་ལམ་ནས་སློབ་སྦྱོང་ཐོབ་ཡོད་པ་རེད། དེའི་ཐོག་ཁོང་རིག་པ་ཧ་ལས་པའི་ཡག་པོ་དང༌། དཔེ་ཆ་སྣ་ཚོགས་ལ་བལྟ་རྒྱུར་དགའ་བས་རྒྱལ་རབས་དང་ཆོས་འབྱུང༌། མཁས་པ་རེ་རེའི་གསུང་ཕྲན་བུ་ཚུན་ཆད་ལ་ངེས་པ་ཡོད་པའི་སློབ་སྦྱོང་ཐོབ་ཡོད་པ་རེད། སྐབས་དེར་རང་གིས་གང་ཤེས་འདོད་པ་དང་གང་སྦྱང་འདོད་པ་དེ་ལ་སྲོལ་རྒྱུན་གྱི་ཐོག་ན་བཀག་རྒྱ་ཞིག་ཡོད་པ་ལས་ཆབ་སྲིད་ཀྱི་སྟེང་ནས་བཀག་རྒྱ་མེད་པར་ཧ་ཅང་རང་དབང་རེད། རང་དབང་དེ་ལ་བརྟེན་ནས་ཁོང་རྒྱ་གར་ལའང་སླེབས་ཏེ་ཁོང་གིས་བཤད་བཞིན་པའི་རིག་གསར་རམ་ཚན་རིག་གི་ངོས་ནས་འཇིག་རྟེན་ལ་ལྟ་སྟངས་སོགས་ལ་རྒྱ་ཆེ་བ་དང༌། ཧ་ཅང་ཞིབ་མོས་རྒྱུས་ལོན་བྱེད་ཐུབ་ཡོད་པ་རེད།
དེ་ནས་མ་འདྲ་བ་ཞིག་ནི་ཁོང་གི་རི་མོ་རེད། བོད་ཀྱི་འབྲི་སྟངས་ལྟར་ན། ཐིག་རྩ་ལྟར་སྔོན་མ་བྲིས་ཡོད་པ་དེ་ཡང་བསྐྱར་བྲིས་འདུག་རྒྱུ་དེ་རེད། ཁོང་གི་རི་མོ་ནི་དེ་ལྟ་བུ་མ་ཡིན་པར་དངོས་པོའི་གཤིས་ལུགས་འཚོལ་བའི་ཕན་གྲོགས་སུ་འགྱུར་བའི་དེང་སང་གི་རི་མོ་རེད། དེང་རབས་རི་མོའི་སྒྱུ་རྩལ་གྱི་ངོས་ནས་བལྟས་ན། རི་མོ་འབྲི་མཁན་གྱིས་འཇིག་རྟེན་གྱི་ཤེས་སྟངས་མ་འདྲ་བ་ཞིག་ཡྀན་ཟེར་གྱི་འདུག དེ་ཡིན་ཡང་ཡིན་རྒྱུ་རེད། ཁོང་གིས་བྲྀས་པའི་རི་མོ་དེ་དག་གིས་ཡིག་ཐོག་ནས་ངོ་སྤྲོད་བྱེད་མི་ཐུབ་པ་མང་པོ་ཞིག་རི་མོའི་ལམ་ནས་ངོ་སྤྲོད་བྱེད་པའི་ཐབས་ཤེས་བཏང་ཡོད་པ་རེད། གང་ལྟར་ཁོང་ལ་སྒྱུ་རྩལ་གྱི་ལམ་ནས་འཇིག་རྟེན་ཤེས་རྟོགས་བྱེད་པའི་ནུས་པའང་ཡོད་པ་རེད། འདི་ལྟ་བུའི་ཕྱོགས་ཁ་ཤས་ན་བློ་དང་རྣམ་དཔྱོད་བསྐྱེད་བསྲིངས་བྱེད་པའི་ཁོར་ཡུག་དང་ནུས་པ་ཡོད་པ་རེད།
དོན་གྲུབ་རྒྱལ་གྱི་སློབ་སྦྱོང་ལ་མཚོན་ན་ཧ་ཅང་ཆ་མི་ཚང་བ་ཞིག་རེད། ཁོང་ཕྱི་ལོ་ ༡༩༥༣ ལོར་སྐྱེས་པ་རེད། སྐབས་དེར་དགོན་པར་སློབ་སྦྱོང་དུ་འགྲོ་བའི་ལམ་ཁ་ཆད་ཟིན་པས་ཁོང་དགོན་པར་སློབ་སྦྱོང་དུ་སོང་ཡོད་ཀྱི་མ་རེད་བསམ། སློབ་གྲྭའི་ལམ་ལུགས་ཡིན་ཡང་དགུ་རོང་ཧ་ཅང་གི་ས་ཁུག་ཀྱོག་ཡིན་པས་སློབ་གྲྭ་མགྱོགས་པོ་འཛུགས་ཐུབ་ཡོད་ཀྱི་མ་རེད་བསམ། གལ་སྲིད་བཙུགས་ཀྱང་དགེ་རྒན་དང་སློབ་ཁང་གི་མཐུན་རྐྱེན་འཛོམས་པོ་ཞིག་ཡིན་རྒྱུ་མ་རེད།  འདི་ངའི་རང་གི་ཉམས་མྱོང་ཐོག་ནས་བཤད་པ་ཡིན། ངའི་སྡེ་བ་ཁུལ་ཐོག་ཏུ་ཡོད་པ་རེད། ཁུལ་དང་རྫོང༌། རོང་བོ་དགོན་ཆེན་སོགས་ཡོད་ས་དོན་གྲུབ་རྒྱལ་སྐྱེས་ས་ལས་ང་སྐྱེས་ས་གྲོང་ཁྱེར་རེད་ཟེར་ཆོག་གི་རེད། དེ་འདྲ་ཞིག་ཡིན་ཡང༌། ང་ཚོའི་སྡེ་བའི་ནང་དུ་སློབ་གྲྭ་འཛུགས་དུས་ང་སློབ་གྲྭ་འགྲོ་མཁན་ཐོག་མའི་གྲས་རེད། ངའི་སྤུན་ཆེ་བ་སློབ་གྲྭར་སོང་ཡང་ཁོང་ང་ཚོའི་སྡེ་བའི་ནང་མ་ཡིན་པར་རྫོང་ཐོག་གི་སློབ་གྲྭ་ཞིག་ལ་སོང་འདུག  ང་ཚོར་སློབ་གྲྭ་ཚུགས་པའི་སྐབས་དེར་སློབ་ཁང་གཅིག་ཏུ་འཛིན་གྲྭ་གཉིས་ཚུགས་དགོས། སྡེ་བ་གཅིག་གི་སློབ་གྲྭར་དགེ་རྒན་གཅིག་ལས་མེད་པའི་མཐུན་རྐྱེན་འོག་ང་ཚོ་སློབ་གྲྭ་ལ་སོང་བ་རེད། དགུ་རོང་ལ་སྐབས་དེར་ཕལ་ཆེར་མཐུན་རྐྱེན་དེ་ཡང་ཧ་ཅང་དཀོན་པོ་ཡིན་རྒྱུ་རེད་བསམ། མཐུན་རྐྱེན་ཇི་ལྟ་བུ་ཞིག་ཡིན་པ་གསལ་བོ་བཤད་དཀའ་ཡང༌། མ་མཐའ་ཡང་དེ་འདྲ་ཞིག་གི་ཐོག་ཚུགས་ཡོད་པར་བཤད་ན། སློབ་གྲྭ་དེའི་ནང་མང་པོ་སློབ་ཀྱི་ཡོད་པ་མ་རེད། གཙོ་བོ་སྐད་ཡིག་དང་རྩིས་རིག་གཉིས་བསླབ་ནས་འབྲི་ཀློག་རེ་དང༌། རྩིས་རིག་ལས་སྣོན་རྩིས་དང་འཕྲི་རྩེས་རེ་ལས་སློབ་རྒྱུ་ཡོད་པ་མ་རེད། དོན་གྲུབ་རྒྱལ་དགུ་རོང་ནས་སློབ་གྲྭ་སོང་ཡོད་ཚེ། སློབ་གྲྭའི་གནས་སྟངས་འདི་ལས་མི་སྡུག་ན་འདི་ལས་བཟང་ཐབས་ཡོད་པ་མ་རེད། གཅན་ཚ་རྫོང་ཐོག་ནས་སློབ་གྲྭར་སོང་ཡོད་ཚེ་ངས་མི་ཤེས།

དེའི་རྐྱེན་གྱིས་ཕལ་ཆེར་སློབ་ཆུང་དེ་ཆ་ཚང་བ་དང་ཚད་ལྡན་པ་ཞིག་འགྲོ་ཐུབ་ཡོད་ཀྱི་མ་རེད། སློབ་ཆུང་ཚར་བའི་མཚམས་ལ་སླེབས་དུས་ཕྱི་ལོ་ ༡༩༦༦ ཟླ་ ༥ བའི་ནང་རིག་གནས་གསར་བརྗེ་ཆེན་པོ་སླེབས་པས་ཚང་མ་གསར་བརྗེའི་ནང་ཞུགས་ཏེ་གཏོར་བཅོམ་བྱས་པ་རེད། རིག་གནས་གསར་བརྗེ་ཆེན་མོ་སླེབས་དུས་ང་སློབ་རིམ་གསུམ་པ་ཚར་མ་ཚར་གྱི་མཚམས་ཤིག་རེད། དེ་དུས་ད་དུང་སློབ་སྦྱོང་གང་འཚམ་འདུག སློབ་རིམ་བཞི་བར་སླེབས་དུས་སློབ་གྲྭའི་སྒྲིག་གཞི་ཚང་མ་འཐོར་ཏེ་སློབ་གྲྭར་སོང་ཡང་ཆོག་ལ་མ་སོང་ཡང་འགྲིག་གི་འདུག ང་ཚོ་ཆུང་དྲག་ནས་དེ་དུས་ཁྲོམ་སྐོར་དང་གཏོར་བཅོམ་ནང་ལ་དགོས་ཀྱི་མི་འདུག དོན་གྲུབ་རྒྱལ་སྐབས་དེར་ང་ལས་ལོ་ཅུང་ཙམ་ཆེ་བས་དེའི་ནང་ཞུགས་པའི་ནུས་པའི་འདང་དུས་རེད། སྐབས་དེར་རིག་གནས་གསར་བརྗེ་ཆེན་མོའི་ལས་འགུལ་ཚ་ཚ་འུར་འུར་དེའི་ནང་མི་ཚང་མ་ཞུགས་ཀྱི་ཡོད་པས་ཁོང་འདུག་བསམ་རུང་འདུག་ས་ཡོད་པ་མ་རེད། སློབ་ཆུང་གི་ཐོག་ནས་དེ་འདྲ་ཞིག་རེད། སློབ་སྦྱོང་ཆ་ཚང་ཡག་པོ་ཞིག་ཡོང་ཡོད་པ་མ་རེད།

དེ་ནས་འབྲིང་རིམ་རེད། འབྲིང་རིམ་ནི་རྨ་ལྷོ་ཀྲིག་གི་དགེ་རྒན་སློབ་གྲྭ་རེད། དེ་དུས་རྨ་ལྷོ་ཀྲིག་གི་རྫོང་ཁག་བཞི་བོ་ན་སློབ་འབྲིང་མ་གཏོགས་ཡོད་པ་མ་རེད། མཚོ་སྔོན་མི་དམངས་རྒྱང་བསྒྲགས་ཁང་གི་ཕུར་བ་ལ་དོན་གྲུབ་རྒྱལ་གྱི་སྐོར་བཅར་འདྲི་ཞིག་ཡོད་པའི་ནང་དུ། དོན་གྲུབ་རྒྱལ་དགེ་རྒན་སློབ་གྲྭ་ནས་མཐར་ཕྱིན་ནས་ཟི་ལིང་ལ་མཚོ་སྔོན་མི་དམངས་རྒྱང་བསྒྲགས་ཁང་ལ་ལས་ཀ་བྱེད་དུ་ཡོང་དུས་ཕྱི་ལོ་ ༡༩༦༩ ལོ་རེད་ཟེར། དེ་ཡིན་དུས་རིག་གནས་བརྗེ་ལངས་པའི་ལོ་དེར་ཁོང་སློབ་གྲྭར་སོང་འདུག་པ་དང༌། ཚ་ཚ་འུར་འུར་གྱི་སྐབས་ལ་མཐར་ཕྱིན་ནས་ཟི་ལིང་ལ་ལས་ཀ་བྱེད་དུ་སོང་འདུག་པས་སློབ་སྦྱོང་བྱེད་ཐུབ་ཡོད་པ་མ་རེད། རིག་གནས་གསར་བརྗེ་ཆེན་མོ་བོད་ལ་དང་པོ་ཡོང་དུས་རྒྱ་ནག་ནང་བཞིན་ངར་ལངས་ཡོད་པ་མ་རེད། ངར་ལངས་པའི་དུས་སྐབས་ནི་ཕྱི་ལོ་ ༡༩༦༧ དང་༡༩༦༨ ལ་རེད།

སྐབས་དེར་དགེ་རྒན་སློབ་གྲྭ་རོང་བོ་དགོན་པའི་ནང་རྒྱུགས་མཁན་སྔོན་ཐོན་པ་སྔ་དཔུང་གི་གྲས་རེད། མྱི་བཟང་ངན་གྱི་དབྱེ་བ་མེད་པར་ཚང་མ་རྒྱུགས་དགོས་པ་རེད། ང་འགྲོ་གི་མིན་ཟེར་ནས་འདུག་ས་ཡོད་པ་མ་རེད། དེ་དུས་ཡོད་ཚད་ལ་འཐབ་རྩོད་དང། དགོན་པ་གཏོར་བ་སོགས་བྱེད་ཀྱི་ཡོད་པ་རེད། ཕྱོགས་གཞན་ཞིག་ནས་ཚང་མ་གསར་བུ་རེད། ངར་ཡང་ལངས་བསྡད་ཡོད་པ་རེད། དེར་བརྟེན། དགེ་རྒན་སློབ་གྲྭའི་ལོ་གསུམ་པོའི་རིང་ལ་དོན་གྲུབ་རྒྱལ་ལ་སློབ་སྦྱོང་གི་གོ་སྐབས་ཡག་པོ་ཞིག་ཡོང་མེད་པ་གསལ་བོ་རེད།

དོན་གྲུབ་རྒྱལ་དགེ་རྒན་སློབ་གྲྭ་ནས་མཐར་ཕྱིན་པའི་ལོ་རྗེས་མ་ཕྱི་ལོ ༡༩༧༠ ལོར་ང་དགེ་རྒན་སློབ་གྲྭར་སོང་བ་རེད། ལོ་དེར་སློབ་གྲྭའི་སྒྲིག་གཞི་ཕྱིར་བཅོས་ནས་སློབ་གྲྭ་ཚུགས་ཀྱི་ཡོད་ཀྱང༌། སློབ་དེབ་མེད་པའི་དཀའ་ངལ་ཡོད། རིག་གནས་གསར་བརྗེ་ཆེན་པོའི་སྔོན་གྱི་སློབ་དེབ་ཚང་མ་དུག་རྩྭ་ཡི་ནང་ལ་སོང་ཡོད་པས་བེད་སྤྱོད་བྱས་ཆོག་གི་མ་རེད། རིག་གནས་གསར་བརྗེ་ཆེན་མོའི་སྐབས་ལ་ཚང་མ་འུར་ལངས་ནས་སློབ་དེབ་སྒྲིག་ཡོད་པ་མ་རེད། ང་ཚོར་སློབ་དེབ་མེད་པར་སྐད་ཡིག་ལ་མའོ་ཙེ་ཏུང་གི་གསུང་བཏུས་བཀླགས་བསྡད་པ་རེད། དོན་གྲུབ་རྒྱལ་ཡོད་དུས་ང་ཚོ་ལས་ཀྱང་སྨྱོ་བཞིན་པའི་སྐབས་རེད། ང་ཚོ་ཡོད་དུས་ཁྲོམ་སྐོར་ལ་འགྲོ་བ་དང༌། མི་ངན་རིགས་བཞི་དང་ལྷ་འདྲེ་གདོན་བགེགས་ལ་ངོ་རྒོལ་དང་འཐབ་རྩོད་བྱེད་པའི་ལེ་ཚན་རྫོགས་ཡོད་ཀྱང་སློབ་ཁྲིད་ཡག་པོ་བྱེད་ཐུབ་ཀྱི་མེད། དོན་གྲུབ་རྒྱལ་སློབ་གྲྭ་ན་ཡོད་དུས་མང་ཆེ་བ་གསར་བརྗེའི་ནང་ལ་ཞུགས་ཡོད་པས་སློབ་སྦྱོང་བྱེད་ཐུབ་ཀྱི་ཨེ་ཡོད།

གཞན་ཕུར་བས་བཤད་པ་ལྟར་ན། དོན་གྲུབ་རྒྱལ་སློབ་གྲྭ་ནས་ཐོན་པ་ནས་སྲོལ་རྒྱུན་རིག་གནས་ཟེར་བ་འདི་རྩ་ཆེན་པོ་ཞིག་ཡིན་པ་ཤེས་ཡོད་ས་རེད། ལྐོག་ནས་དཔེ་ཆ་མང་པོ་ཀློག་པ་དང་དེའི་ནང་ནས་ཀྱང་དཔེ་རྙིང་གི་རིགས་རྒྱུན་དུ་བཀླགས་ཀྱི་འདུག་ཟེར། རིག་གནས་གསར་བརྗེ་ཆེན་མོའི་སྐབས་ལ་ཚད་ལྡན་གྱི་སློབ་གྲྭ་ཆེན་མོའི་སློབ་གསོའི་ལམ་ལུགས་འཐོར་སོང་བས། རྗེས་ལ་བཟོ་ཞིང་དམག་གི་སློབ་གྲྭ་བཙུགས་པ་རེད། ཁོ་བཟོ་ཞིང་དམག་གི་སློབ་གྲྭ་ལ་སོང་བ་རེད། སློབ་གྲྭ་དེ་ནས་ལོ་གསུམ་བསྡད་ན་ཆོག་གི་རེད་ལ་ཡིག་ཚད་ཀྱང་གཙོ་བོ་ཤེས་ཚད་ལ་བལྟ་གི་མ་རེད། དོན་གྲུབ་རྒྱལ་དང༌། ཟླ་བ་བློ་གྲོས། མཚོ་སྔོན་གྱི་སངས་རྒྱས་སྐྱབས་དང༌། རྩིས་རིག་ལ་མཁས་པའི་སངས་རྒྱས་རྒྱལ་སོགས་སློབ་གྲྭ་འདི་ལ་སོང་བ་རེད། དེའི་ནང་ནས་ཀྱང་ཁོང་ཚོ་ལྟ་བུའི་བོད་ཀྱི་རིག་གཞུང་ལ་ཕན་ཐོགས་པའི་ཤེས་ཡོན་པ་སྐོར་ཞིག་བྱུང་བ་རེད།  དོན་གྲུབ་རྒྱལ་ཡང་དེའི་གྲས་ཀྱི་རེད། དེ་དུས་ཟླ་བ་དང་ཁོ་ཚོ་ཀྲུང་དབྱང་མི་རིགས་སློབ་གླིང་ནས་སློབ་གྲོགས་རེད། རྗེས་ལ་ཟླ་བ་དང་ང་ཚོ་མཉམ་དུ་ལོ་གསུམ་བཞི་ཞིག་ལ་བསྡད་པ་རེད། ཟླ་བས་བཤད་ན། ཁོ་ཚོ་སློབ་གྲྭར་ཡོད་དུས་དོན་གྲུབ་རྒྱལ་གྱིས་བོད་མཁས་པ་མི་ཕམ་དགེ་ལེགས་རྣམ་རྒྱལ་གྱི་སྙན་འགྲེལ་དེ་ལྐོག་ནས་བཀླགས་ཀྱི་འདུག་ཟེར། དེ་དུས་བོད་ཀྱི་སྲོལ་རྒྱུན་གྱི་དཔེ་ཆ་བཀླགས་ཆོག་གི་ཡོད་པ་མ་རེད། ཀྲུང་དབྱང་མི་རིགས་སློབ་གྲྭ་ཆེན་མོར་ཡོད་པའི་དུས་ཡིན་ནའང་རེད། ཟི་ལིང་དུ་ལས་ཀ་བྱེད་དུས་ཡིན་ནའང་རེད། གང་ལྟར་ཁོང་ལ་སློབ་སྦྱོང་མ་ཐོབ་ཀྱང་ཁོ་རང་གི་ངོས་ནས་བོད་ཀྱི་སྲོལ་རྒྱུན་གྱི་དཔེ་ཆ་ཡང་ཡང་བཀླགས་ཡོད་པ་འདྲ།

དགེ་ཆོས་དང་རང་གྲོལ་གཉིས་བསྡུར་ན། དགེ་འདུན་ཆོས་འཕེལ་ལ་སྲོལ་རྒྱུན་གྱི་སློབ་གསོ་དང་ཤེས་ཡོན་ཆ་ཚང་བ་ཞིག་ཐོབ་ཡོད་པ་དང༌། དཔེ་ཀློག་ཚད་མེད་པ་ཞིག་བྱས་ཡོད་པ། རང་དབང་བེད་སྤྱོད་མང་དུ་གཏོང་ཐུབ་ཡོད་པ། དེའི་སྟེང་སྒྱུ་རྩལ་གྱི་མིག་དབང་ཁྱད་པར་བ་ཞིག་ཡོད་པ་བཅས་མཐུན་རྐྱེན་བཞིས་ཁོང་གི་རྣམ་དཔྱོད་དང་ཤེས་ཡོན་བསྐྲུན་འདུག  དོན་གྲུབ་རྒྱལ་ནི་ཤེས་ཡོན་སྦྱོང་བའི་གོ་སྐབས་ཧ་ཅང་ཉག་ཕྲ་བའི་སྐབས་ཤིག་ལ་ཤེས་ཡོན་ཆ་མི་ཚང་བའི་དུས་ཚོད་ཅིག་དང༌། ཧ་ཅང་བཀག་རྒྱ་ཅན་གྱི་སྤྱི་ཚོགས་ཤིག་ནས་རྣམ་དཔྱོད་དང་ཤེས་ཡོན་སྤེལ་བ་རེད། རང་གྲོལ་གྱི་ཚད་དང་ལྡན་པའི་སློབ་སྦྱོང་ནི་ཕྱི་ལོ་ ༡༩༧༧ རྗེས་ཀྱི་ཚད་ལྡན་གྱི་ཡིག་ཚད་བཏང་ནས་འགྲོ་དགོས་པའི་ཞིབ་འཇུག་སློབ་མའི་སློབ་སྦྱོང་དེ་རེད། དེའི་སྔོན་གྱི་སློབ་སྦྱོང་ཚང་མ་ཁོ་རང་གི་སྐྱེས་སྟོབས་ཀྱི་ཤེས་རབ་ཀྱིས་སྦྱང་བ་མ་གཏོགས་ཚད་ལྡན་སློབ་སྦྱོང་ཐོབ་ཡོད་མ་རེད། ཁོང་གཉིས་ཀྱི་སློབ་སྦྱོང་ཐོག་ནས་མཁས་པ་ཆགས་པའི་རྒྱབ་ལྗོངས་དེ་འདྲ་ཞིག་རེད།

གསུམ་པ།  རྩོམ་འབྲིའི་ནུས་རྩལ་གྱི་མ་རྩ།

ངས་དོ་སྣང་བྱུང་བ་ལྟར་ན། དགེ་འདུན་ཆོས་འཕེལ་རྒྱ་གར་ལ་སོང་བ་ནས་རྩོམ་འབྲི་བའི་མགོ་བཙུགས་འདུག འུ་ཚོས་ད་བར་རྙེད་པའི་རྩོམ་ཡིག་མང་ཆེ་བ་རྒྱ་གར་ལ་སོང་བའི་རྗེས་ནས་བྲིས་པ་རེད། རྒྱ་གར་ལ་མ་སོང་གོང་བྲིས་པའི་རྩོམ་འདུག་གམ། ཁོང་ཕྱི་ལོ་ ༡༩༠༣ ལོར་སྐྱེས་པའི་དབང་དུ་བཏང་ན། ལོ་སུམ་ཅུ་ཙམ་ནས་རྩོམ་འབྲི་རྒྱུའི་མགོ་བཙུགས་འདུག དེ་ལ་བལྟས་ནས་བཤད་ན། དགེ་འདུན་ཆོས་འཕེལ་ལ་མཚོན་ན། ཆོས་ལུགས་ཀྱི་སློབ་སྦྱོང་གི་རིམ་པ་རྒྱ་ཆེན་པོ་ཞིག་ཚར། དཔེ་ཀློག་ཀྱང་རྒྱ་ཆེན་པོ་བྱས།  ཕྱི་རོལ་གྱི་འཇིག་རྟེན་ཡང་གང་ལ་གང་འཚམ་ཞིག་མཐོང་བའི་སྟེང་གཞན་དང་ཐུན་མོང་མ་ཡིན་པའི་རང་གི་ལྟ་བ་ཞིག་ཀྱང་རྙེད་ཡོད་པའི་རྒྱབ་ལྗོངས་ཐོག་ནས་རྩོམ་འབྲི་བའི་འགོ་བཙུགས་འདུག ཁོང་གིས་རྩོམ་འབྲི་དུས་ལོ་ཅུང་ཆེ་ཡང་ཤེས་ཡོན་དང་ལྟ་བའི་རྒྱབ་ལྗོངས་མཐུག་པོ་རེད། རྡོ་ནོལ་ལོ་པེ་སི་༼Donald Lopez༽་ཡིས་ཁོང་ཚད་མ་རིག་པ་བ། སྙན་ངག་པ། རྩོམ་འབྲི་བ། རི་མོ་བ། སྐད་རིགས་སྨྲ་བ། ཡིག་བསྒྱུར་བ། ས་རྒྱུས་སྨྲ་བ། ལོ་རྒྱུས་མཁས་པ། སྤྱི་ཚོགས་དཔྱད་བརྗོད་པ། ཆགས་སྲེད་འཁྲིག་སྦྱོར་ཞིབ་འཇུག་པ། རྩི་ཤིང་སྔོ་ལྡུམ་ཞིབ་འཇུག་པ། གསར་འགོད་པ། མིའི་རིགས་རྒྱུད་ཀྱི་རིག་པ་སྨྲ་བ་སོགས་ཡིན་པར་བཤད་འདུག་པ་འདི་ཡང་དགེ་ཆོས་ཀྱི་རྩོམ་ཡིག་གི་བརྗོད་གཞི་རྒྱ་ཆེན་པོ་ཡིན་པ་དེའི་ཐོག་ནས་ལོས་ཡིན།

དོན་གྲུབ་རྒྱལ་གྱིས་རྩོམ་འབྲི་དུས་ཧ་ཅང་གཞོན་གཞོན་རེད། ཁྱོད་ཚོས་དོ་སྣང་བྱས་ཡོད་མེད་གང་ཤེས། ཕྱི་ལོ་ ༡༩༧༦ ལོའི་ལོ་མཇུག་ནས་རིག་གནས་གསར་བརྗེ་ཆེན་མོ་མཇུག་རྫོགས་སོང་བ་རེད། ཕྱི་ལོ ༡༩༧༧ ལོ་ནས་མི་ཚང་མར་སྲིད་ཇུས་ལྷོད་པའི་ཚོར་བ་ཡོང༌། མཁས་པ་ཚོས་ཀྱང་བོད་ཀྱི་ཚགས་པར་སྟེང་བོད་ཀྱི་རྩོམ་སྤེལ། རྒྱང་བསྒྲགས་ནང་ནས་ཀྱང་གེ་སར་སྒྲུང་དང༌། གླུ་ཡང་གོ་རྒྱུ་བྱུང་སྟེ་གཞི་ནས་ལྷོད་ཡངས་ཀྱི་འགོ་བཙུགས་པ་རེད། ཕྱི་ལོ་ ༡༩༧༧ དང་ ༡༩༧༨ གང་ཡིན་གསལ་བོ་མི་དྲན་ཡང༌། དེ་དུས་རླུང་འཕྲིན་རྒྱལ་ཟེར་བ་ཞིག་གིས་ཚིགས་བཅད་ཀྱི་རྩོམ་འབྲི་གི་རེད། ཚིགས་བཅད་དེ་དག་ཚིག་རྐང་དང་པོ་དང་གཉིས་པ་ས་སྐྱ་ལེགས་བཤད་ཀྱི་རྩོམ་དང་ཚིག་རྐང་གསུམ་པ་དང་བཞི་བ་གཉིས་དེ་ཁོ་རང་གིས་བྲིས་པ་སྐོར་ཞིག་ཐོན་གི་རེད། དེ་ཚོའི་རྩོམ་པ་པོ་ངས་དོན་གྲུབ་རྒྱལ་རེད་བསམས་བསྡད་ཡོད། གང་ལྟར། ཁོས་འཕྱི་མཐའ་ཡང་སྤྱི་ལོ་ ༡༩༧༨ ནས་རྩོམ་འབྲི་རྒྱུ་འགོ་བཙུགས་འདུག དེ་ཡིན་ན་ཁོས་རང་ལོ་ཉེར་བཞི་ཙམ་ནས་རྩོམ་ཡིག་སྤེལ་འགོ་བརྩམས་འདུག

དགེ་འདུན་ཆོས་འཕེལ་དང་ཁོང་གཉིས་ལ་གཅིག་ནས་ལོ་ཡི་ཁྱད་པར་དང༌། གཉིས་ནས་རྩོམ་འབྲི་བའི་མ་རྩའི་ཆ་ནས་ཁྱད་པར་འདུག  དགེ་འདུན་ཆོས་འཕེལ་སློབ་སྦྱོང་ཆ་ཚང་བ་དང༌། མཐོང་རྒྱ་ཐོས་ཆེན་པོ། ཁོང་ལ་རང་སྟེང་གི་རི་མོའི་ནུས་པ་ཡོད་པ་དེ་འདྲའི་མ་རྩ་ཆེན་པོའི་ཐོག་ནས་བྲིས་འདུག དོན་གྲུབ་རྒྱལ་མཚོན་ན། རང་ཉིད་ལ་སྐྱེས་སྟོབས་ཡོད་པ་རེད་མ་གཏོགས། སྦྱང་སྟོབས་ཀྱི་ངོས་ནས་དགེ་འདུན་ཆོས་འཕེལ་དང་བསྡུར་རྒྱུ་མི་འདུག  ཁོང་གཉིས་ལ་གནམ་སའི་ཁྱད་པར་ཤོར་གྱི་འདུག འདི་ཁོང་གཉིས་ཀའི་རྩོམ་འབྲིའི་མ་རྩའི་ཁྱད་པར་རེད།

བཞི་བ། ཤེས་ཡོན་གྱི་སྡེ་ལ་མཛད་རྗེས་བསྡུར་བ།

དགེ་འདུན་ཆོས་འཕེལ་གྱི་གསུང་རྩོམ་ལ་བལྟས་ནའང་འདྲ། ཁོང་དང་རྒྱུས་ཡོད་པའི་མི་རྣམས་ལ་བཅར་འདྲི་བྱས་པ་དང་རྩོམ་ལ་བལྟས་ནའང་འདྲ། ཁོང་ལ་གཤིས་ཀ་མ་འདྲ་བ་ཞིག་ཡོད་པ་ནི། ཁོང་གིས་སློབ་སྦྱོང་བྱེད་དུས་ཤེས་ཡོན་གསོག་པ་དང་མཉམ་དུ་དོགས་པའང་གསོག་གི་འདུག ནང་ཆོས་ཀྱི་ནང་དུ་ལྟ་བ་གང་ཞིག་ཇི་ལྟར་སླེབས་པ་དང༌། རྒྱ་གར་གྱི་ཤིང་ཏོག་ཅིག་ཡིན་ཡང་དེ་ག་རེ་ཡིན་ནམ་བསམ་པའི་དོགས་པ་མང་པོ་གསོག་གི་འདུག རྗེས་ལ་ཁོས་ཞིབ་འཇུག་གི་དུས་ཚོད་ལ་ཐོན་དུས་ཁོས་གཙོ་བོ་ག་རེ་བཙལ་འདུག་ཟེར་ན། སློབ་སྦྱོང་བྱེད་པའི་སྐབས་ལ་བྱུང་བའི་རྣམ་རྟོག་དང་དོགས་པ་མང་པོ་ཞིག་ཡོད་པ་དེ་ལ་ལན་བཙལ་འདུག དེ་ལ་བརྟེན་ནས་ཁོང་ལ་ཤེས་ཡོན་མང་པོ་རྒྱས་པ་རེད།  དཔེར་ན། རྒྱ་གར་གྱི་སྔོ་རྩྭའི་རིགས་མང་པོ་ངོས་འཛིན་དང༌། རྒྱ་གར་གྱི་མིའི་འཚོ་བ་རོལ་སྟངས། སིངྒ་ལའི་འཚོ་བ་རོལ་སྟངས་སོགས་གཏམ་རྒྱུད་གསེར་གྱི་ཐང་མ་བཀླག་ན་ཤེས་ཀྱི་རེད། དེ་རིང་བཀླགས་ན་དེ་རིང་ཡང་ཤེས་རྒྱུ་ཡོད་པ་སང་ཉིན་བཀླགས་ན་སང་ཉིན་ཡང་ཤེས་རྒྱུ་ཡོད་པ་དེ་ལྟ་བུ་ཞིག སྐད་རིགས་ཀྱི་ལོ་རྒྱུས་འབྱུང་ཁུངས་སོགས་ཧ་ཅང་རྒྱ་ཆེ་བ་རེད། ཁོང་གིས་ཆོས་སྦྱང་ཞོར་ཏུ་བྱུང་བའི་དོགས་པ་མང་པོ་ལ་ལན་འཚོལ་བའི་ཞོར་དུ་ཤེས་ཡོན་རྒྱ་ཆེན་པོ་ཞིག་རྙེད་འདུག  ཁོང་གིས་ང་ཚོར་སྤྲོད་དུས་ག་རེ་སྤྲོད་ཀྱི་འདུག་ཟེར་ན། ད་བར་དུ་དོགས་གཞིར་ལུས་པ་ཞིག་ལ་ལན་ཞིག་བཙལ་ནས་བོད་ལ་སྟེར་རྒྱུ་ནི་ཁོང་གི་གཞི་འཛིན་ས་གཙོ་བོ་རེད།

དོན་གྲུབ་རྒྱལ་གྱིས་བརྗོད་གཞི་གཏིང་ཟབ་མོ་ཞིག་དང༌། རྒྱ་ཆེ་བ་ཞིག་ང་ཚོར་ངོ་སྤྲོད་བྱེད་རྒྱུ་ཁོའི་དམིགས་ཡུལ་མ་རེད། ཁོང་དེའི་སྟེང་ལ་འགྲོའང་ཐུབ་ཡོད་པ་མ་རེད། གོང་ནས་ཁོང་གི་སློབ་སྦྱོང་གི་གནས་སྟངས་བཤད་ཟིན་པ་ལྟར་ཁོང་དེ་འདྲའི་བརྗོད་གཞི་རྒྱ་ཆེ་པོ་ཞིག་གི་སྟེང་ལ་འགྲོ་བའི་ནུས་པ་དང་རྒྱབ་ལྗོངས་ཀྱང་ཡོད་པ་མ་རེད། ཁོས་བོད་སྤྱི་ཚོགས་སྟེང་ལ་རྩོམ་སྟངས་གསར་བ་ཞིག་འདྲེན་རྒྱུ་དེ་ཁོའི་ནུས་པ་རེད། ལང་ཚོའི་རྦབ་ཆུ་ཐོན་རྗེས་ཀྱི་ཉིན་གཅིག་ངའི་གྲོགས་པོ་བན་ཁོ་མཚོ་སྔོན་མི་རིགས་སློབ་གྲྭ་ཆེན་མོར་སོང་ནས་ཕྱིར་སླེབས་སོང༌། སྐབས་དེར་ཁོས། དེང་སྐབས་མཚོ་སྔོན་མི་རིགས་སློབ་གྲྭ་ཆེན་མོའི་ནང་དུ་ངའི་ཤ་དང་ངའི་ཁྲག ངའི་སྙིང་གིས་བཀང་ནས་འདུག་ཟེར། ལང་ཚོའི་རྦབ་ཆུ་ཐོན་པ་ནས་རང་མོས་སྙན་ངག་འབྲི་རྒྱུར་ཁ་ཕྱོགས་པ་རེད། གཅིག་སྙན་ངག་གསར་བའི་ལམ་ལ་འགྲོ་རྒྱུ་དར་བ་དང༌། གཉིས་ནས་བརྗོད་གཞི་གསར་བ་ཞིག་གི་ནང་དུ་ཞུགས་པ་རེད། དེའི་སྔོན་དུ་སྙན་ངག་གི་བརྗོད་གཞི་བསྟོད་པའི་ནང་དུ་ཡོད་པ་རེད། དེ་ནས་བཟུང་རྩོམ་ཁ་མི་རྀགས་ཀྱི་ལ་རྒྱ་དང་ཞེན་ཁོག་བཤད་རྒྱུར་བསྐོར་བ་རེད།

གཞན་ཞིག་ནི་སྒྲུང་རྩོམ་གྱི་སྐོར་ནས་རེད། ༼འབྲོང་སྟག་ཐང༽་ཐོན་པའི་རྗེས་ནས་ཆབ་འགག་རྡོ་རྗེ་ཚེ་རིང་གིས་༼ཆབ་ཆའི་རྩྭ་ཐང་གི་གླུ་སྒྲ༽་ཞེས་པ་ཞིག་བྲིས་ཡོད་པ་ལྟ་བུ་རེད། སྒྲོམ་གཞི་ཚུན་ནས་གཅིག་མཚུངས་བྲིས་ཏེ་༼འབྲོང་སྟག་ཐང་༽གི་མིང་ཇི་ལྟར་ཐོགས་ཚུལ་བྲིས་ཡོད་པ་བཞིན་ཆབ་ཆ་ཟེར་བའི་མིང་ཇི་ལྟར་ཐོགས་པ་བྲིས་ཡོད་པ་རེད། ལད་ཟློས་ཟེར་བ་ངོ་ཚ་དགོས་པ་ཞིག་ལ་བརྩི་སྲིད་ཀྱང༌། རྩོམ་གྱི་འགོ་འཛུགས་དུས་ལད་ཟློས་མ་བྱས་པ་དཀའ་མོ་རེད། དོན་གྲུབ་རྒྱལ་རང་གིས་ཀྱང་རྒྱ་རྩོམ་མང་པོ་ལ་ལད་མོ་བྱས་ཡོད་པ་རེད། དོན་གྲུབ་རྒྱལ་གྱིས་རྒྱ་རྩོམ་གྱི་ལད་མོ་བྱས། བོད་གཞོན་རྣམས་ཀྱིས་དོན་རྩོམ་གྱི་ལད་མོ་བྱས་ཡོད་པ་རེད།

རྩོམ་སྟངས་མ་གཏོགས་བསམ་བློའི་སྟེང་ནས་དོན་གྲུབ་རྒྱལ་མེད་ཚེ་བསམ་བློ་འདི་སྐྱེས་མེད་ཟེར་བའི་གནས་སྟངས་ཅང་ཡོད་པ་མ་རེད། ཁོས་རྩོམ་གྱི་ནང་ལ་བྲིས་པ་དེ་དག་སྐབས་དེའི་ཤེས་ཡོན་ཅན་གྱི་སྡེ་ན་བསམ་བཞིན་པ་དང་བཤད་བཞིན་པ་རྐྱང་རེད། དོན་གྲུབ་རྒྱལ་མིང་གྲགས་ཆེ་བ་དེ་ཁོའི་སྒྲུང་གཏམ་དང་སྙན་ངག་འབྲི་སྟངས་གསར་རྩོམ་དེའི་ཐོག་ནས་ཡིན་པ་མ་གཏོགས། ཁོ་ལ་གཞན་གྱི་སེམས་ལ་འཁོར་མི་ཐུབ་པའི་བསམ་བློ་གསར་པ་ཡོད་པ་དང༌།  ཡང་ན་ཞིབ་འཇུག་གི་གསར་རྙེད་ཡོད་པའི་ཐོག་ནས་མ་རེད། ཁོས་མགུར་གླུའི་ལོ་རྒྱུས་དང༌། ལོ་རྒྱུས་ཐོག་གི་རྟ་ཟམ་གྱི་བྱུང་རབས་དང་ངང་ཚུལ་ལ་ཞིབ་འཇུག་བྱས་པའི་རྩོམ་ཡིག་འགའ་རེ་ཡོད་པ་རེད། ཡིན་ན་ཡང༌། དེ་ཚོ་ཁོའི་སྙན་གྲགས་རྒྱས་བྱེད་མ་རེད། དགེ་འདུན་ཆོས་འཕེལ་ནི་དེ་ལྟར་མ་རེད།  ཁོའི་བསམ་བློ་སྐོར་ཞིག་ཁོ་མེད་ཚེ་སྤྱི་ཚོགས་སྟེང་ལ་ཁོ་རང་ཡོད་པའི་སྐབས་ལ་ཡོང་གང་ནས་ཐུབ། ད་ལྟ་ཡང་ཡོང་ཐུབ་ཀྱི་མ་རེད། དགེ་འདུན་ཆོས་འཕེལ་མིང་དུ་གྲགས་པ་ནི་ཁོང་གི་ལྟ་བ་གསར་བ་དང་གསང་བ་མང་པོ་བཏོན་པ་དེའི་ཐོག་ན་ཡོད་པ་རེད།

ལྔ་བ། སྙན་ངག་གི་ཁྱད་ཆོས་བསྡུར་བ།

ཁོ་གཉིས་ལ་ཐུན་མོང་གི་ཆ་ཞིག་ཡོད་པ་ནི་ཁོང་གཉིས་ཀ་སྙན་ངག་འབྲི་རྒྱུར་དགའ་བ་དེ་རེད། ཡིན་ཡང༌།  སྙན་ངག་གི་ཁྱད་ཆོས་མ་འདྲ་བ་རེད། དང་པོ་བརྗོད་གཞིའི་ཐོག་ནས་དགེ་འདུན་ཆོས་འཕེལ་གྱི་བརྗོད་གཞི་ནི་མཚན་ཉིད་རིག་པའི་ངོ་བོ་དང་ལྡན་པའི་བརྗོད་གཞི་ཅན་གྱི་སྙན་ངག་འབྲི་རྒྱུར་དགའ་གི་རེད། མཚན་ཉིད་རིག་པ་ཟེར་བ་ནི་བོད་ཀྱི་རྟགས་གསལ་གཏོང་བའི་མཚན་ཉིད་རིག་པ་དེ་མ་ཡིན་པར། དེང་སང་གི་མཚན་ཉིད་རིག་པ་ཟེར་དུས་སྤྱིར་བཏང་འགྲོ་བ་མིའི་སྤྱི་ཚོགས་དང་ཤེས་རིག བསམ་བློ་སོགས་ཀྱི་ངོ་བོ་གཤིས་ལུགས་འཚོལ་བྱེད་ཀྱི་རིག་པ་དེའི་མིང་ལ་བཤད་ཀྱི་ཡོད་པ་རེད། དཔེར་ན། དགེ་འདུན་ཆོས་འཕེལ་གྱི་སྙན་ངག

གྲོག་མ་མིག་མེད་བདེ་བའི་ཆེད་དུ་རྒྱུགས།།

ས་འབུ་རྐང་མེད་བདེ་བའི་ཆེད་དུ་རྒྱུགས།།

མདོར་ན་འཇིག་རྟེན་ཐམས་ཅན་བང་འགྲན་ནས།།

གཅིག་ལས་གཅིག་མགྱོགས་བདེ་བའི་ཕྱོགས་སུ་རྒྱུགས།།

ཞེས་པ་འདི་ལྟ་བུར་མཚོན་ན་མི་ལས་འདས་པའི་སྤྱིར་བཏང་དབུགས་ཐོགས་ཐམས་ཅད་ཀྱི་གཤིས་ཀ་ཅིག་བརྗོད་ཀྱི་ཡོད་པ་རེད། ཁོ་ཚོ་ཅིའི་ཕྱིར་སྐྱེས་པ་དང་ཅི་ཞིག་བྱེད་ཀྱིན་པ་བརྫོད་ཀྱི་ཡོད་པ་རེད། འདི་ལྟ་བུའི་སྙན་ངག་ལ་དུས་དང་ཡུལ་གྱི་བཀག་རྒྱ་ཡོད་པ་མ་རེད། སྙན་ངག་འདི་ཡུལ་དུས་གང་ཞིག་གི་གནས་སྟངས་ལ་ཡང་སྦྱར་ཐུབ་པའི་སྙན་རྩོམ་རེད།  འདི་ལྟ་བུ་མང་པོ་འདུག  ཡང༌།

ཇི་ལྟར་དངོས་པའི་གཤིས་ལ་ཉེ་གྱུར་པ།།

དེ་ལྟར་མཁས་པའི་ཚིག་ནི་ལྐུགས་འགྱུར་བས།།

རང་གཞན་ཉིད་ཀྱིས་ཕྲ་བའི་ཆོས་རྣམས་ཀུན།།

སྨྲ་བསམ་བརྗོད་པའི་ཡུལ་ལས་འདས་པར་སྐད།།

ཞེས་པ་འདི་ལྟ་བུར་མཚོན་ནའང༌། བདེན་པ་ལ་ཅི་ཙམ་ཉེ་ན་ཚིག་གི་ནུས་པ་དེ་ཙམ་གྱིས་ཆུང་ནས་བརྗོད་པ་དཀའ་ཟེར་བ་རེད། འདི་ལའང་རྒྱལ་ཁབ་ཕྱི་ནང་དང་མི་རིགས་ཀྱི་དབྱེ་བ་ཡོད་པ་མ་རེད། ཡུལ་དུས་ཀྱི་བཀག་རྒྱ་མེད་པ་དེ་འདྲ་རེད།  གཞན་མཚམས་ལན་རེར་ཁོང་གི་སྙན་ངག་གི་ནང་དུ་ཁེར་རྐྱང་གི་སྙན་ངག་དེ་འདྲ་སྐོར་ཞིག་མཐོང་རྒྱུ་འདུག

དོན་གྲུབ་རྒྱལ་གྱི་སྙན་ངག་ལ་མང་ཆེ་བར་ཡུལ་དུས་ཀྱི་བཀག་རྒྱ་གསལ་བོ་རེད། དུས་སྐབས་གང་ལ་བྱུང་བའི་ས་མཚམས་ཆུ་མཚམས་གསལ་བོ་རེད། ཁོའི་སྙན་ངག་༼བསྟོད་ཚིག་མེ་ཏོག་ཕྲེང་མཛེས༽་ལྟ་བུར་མཚོན་ན། དུས་ཀྱི་རྣམ་པ་ཧ་ཅང་གསལ་བོ་རེད། རིག་གནས་གསར་བརྗེ་ཆེན་པོ་མཚམས་བཞག་པའི་རྗེས་སུ་རིག་གནས་བརྗེ་ཆེན་པོའི་ནང་ཞྭ་ནག་པོ་གོན་ནས་ཚེ་སྲོག་ཤོར་སོང་བ་མང་པོ་རེད། དེའི་ནང་གི་གཅིག་ལིག་ཧྲའོ་ཆི་རེད། ལིག་ཧྲའོ་ཆི་རིག་གནས་གསར་བརྗེ་ཆེན་མོའི་ནང་མའོ་ཙེ་ཏུང་གིས་ཕམ་པར་རྒྱག་དགོས་པ་གཙོ་བོ་དེ་རེད། ཁོ་འཐབ་རྩོད་བྱས་ནས་ཤི་སོང་བ་རེད། ༼བསྟོད་ཚིག་མེ་ཏོག་ཕྲེང་མཛེས༽་ནང་གི་བསྟོད་བྱ་དེ་ལིག་ཧྲའོ་ཆི་རེད། རིག་གནས་གསར་བརྗེ་ཆེན་པོའི་རྗེས་སུ། ཧུའུ་ཡའོ་པང་གིས་རིག་གནས་གསར་བརྗེའི་ཆེན་པོའི་སྐབས་ལ་མ་ཉེས་ཁ་གཡོག་གི་སྒང་ནས་བཙོན་ལ་བཅུག་པ་དང་ཚེ་སྲོག་ཤོར་བ་བཅས་ལ་དཀར་འདོན་གྱི་སྲིད་ཇུས་ཤིག་སླེབས་པ་རེད། དེའི་ནང་ནས་གཙོ་བོ་ལིག་ཧྲའོ་ཆི་དཀར་འདོན་མ་བྱས་ན་གཞན་པ་ཚོ་ཡོང་ཐུབ་ཀི་ཡོད་པ་མ་རེད། ཁོ་དཀར་འདོན་བྱས་ཚེ་གཞན་པ་ཚོ་རང་བཞིན་གྱིས་དཀར་ཡོང་གི་ཡོད་པ་རེད། དཀར་འདོན་གྱི་སྲིད་ཇུས་དེ་དང་དོན་གྲུབ་རྒྱལ་གྱི་སྙན་ངག་དེ་དཀར་འདོན་གྱི་སྲིད་ཇུས་དེ་ལ་བསྟོད་ཆེད་བྲིས་པ་རེད། དེང་སང་རྩོམ་དེ་བཀླགས་ན་ཚིག་ཙམ་མ་གཏོགས་དོན་གྱིས་མི་ཚང་མས་བཀླགས་མི་འདོད་པར་གྱུར་ཡོད་ཀྱི་རེད། གཅིག་བྱས་ན། དེང་སང་གི་གཞོན་ནུ་ཞིག་གིས་གོ་རྒྱུ་ཡང་མ་རེད། དེ་ནི་གཞོན་ནུ་དེའི་སྙན་ངག་གི་གོ་སྟོབས་ལ་སྐྱོན་ཤོར་བ་མིན་པར། སྙན་རྩོམ་དེ་ལ་དུས་ཀྱི་བཀག་རྒྱ་ཆེ་དྲག་པ་རེད། དེ་ལྟ་བུའི་སྙན་ངག་མང་པོ་ཞིག་སྐབས་དེའི་དུས་ཚོད་ཀྱི་བཀག་རྒྱ་དང་དངོས་པོ་བྱེ་བྲག་པ་ལ་བརྟེན་ནས་བྲིས་ཡོད་པ་རེད།

སྤྱིར་བཏང་སྙན་ངག་གི་རྣམ་གཞག་གི་སྟེང་ནས་སོང་ན་དེ་འདྲ་ཞིག་ཡིན་དགོས་པ་རེད།  རྩོམ་རིག་སྤྱི་ཡོངས་ནས་བྱེ་བྲག་བྱེ་བྲག་པ་འབྲི་དགོས་ཀྱི་ཡོད། དགའ་བ་དང༌། མི་དགའ་བ། ཚིག་པ་ཟ་བ། རླུང་ལངས་པ་སོགས་བྱེ་བྲག་གི་སྟེང་ནས་མ་གཏོགས་དངོས་པོ་སྤྱི་མཚན་གྱི་སྟེང་ནས་ཡོང་མི་ཐུབ། བྱེ་བྲག་གི་སྟེང་ནས་ཚོར་བ་ཇེ་གསལ་ཏུ་འགྲོ་ཐུབ་ཟེར་ནས་བཤད་ཀྱི་ཡོད་པ་རེད་ལ་ཡིན་དགོས་པའང་རེད། དངོས་པོ་བྱེ་བྲག་བྲིས་པ་དེ་སྐྱོན་ཏུ་འགྱུར་གྱི་ཡོད་པ་མ་རེད། དེ་ལ་ལྟ་སྟངས་ཐད་ཆབ་སྲིད་ཀྱི་ཤུགས་རྐྱེན་དང་ཁ་མ་བྲལ་བར་འགྲོ་བ་མིའི་རང་བཞིན་གྱི་ཚོར་བས་བལྟ་མ་ཐུབ་པ་དེའི་ཐོག་ནས། སྙན་ངག་དང་རྩོམ་མང་པོ་ཞིག་སྐབས་དེའི་དུས་ཚོད་ཐུང་ཐུང་ནང་མ་གཏོགས་ཚེ་སྲོག་ཡལ་སོང་བ་མང་པོ་ཞིག་བྱུང་ཡོད་པ་རེད། རྩོམ་གྱི་ཚེ་ཡི་རིང་ཐུང་བཤད་ན། དགེ་འདུན་ཆོས་འཕེལ་གྱི་སྙན་ངག་མང་པོ་ཞིག་ད་ལྟ་བཀླགས་ནའང་ཚེ་སྲོག་ཡོད་པ། ལོ་རྗེས་མར་བཀླགས་ནའང་ཚེ་སྲོག་ཡོད་པ། གཅིག་བྱས་ན་ལོ་ལྔ་བཅུའི་རྗེས་ནས་བཀླགས་ཀྱང་ཚེ་སྲོག་ཡོད་པ་རེད། དོན་གྲུབ་རྒྱལ་གྱི་སྙན་ངག་མང་པོ་ཞིག་རིག་གནས་གསར་བརྗེ་ཆེན་པོའི་རྗེས་ནས་ཚེ་སྲོག་ཡོད་ཀྱང༌། ད་ལྟ་གསོན་ཉམས་ཇེ་ཆུང་དུ་སོང་ཡོད་པ་རེད།

ཚིག་སྦྱོར་གྱི་ཆ་ནས་དགེ་འདུན་ཆོས་འཕེལ་གྱིས་ཀྱང་མཚམས་ལན་རེར་གསར་བ་བཙལ་གྱི་མེད་འགྲོ་བསམ་གྱི་འདུག དཔེར་ན། ཀླུ་སྒྲུབ་དགོངས་རྒྱན་ལ་མཚོན་ན་ཁོས་མཚམས་ལན་རེར་ལྟ་བ་གསར་བ་འཚོལ་གྱི་ཡོད་པ་རེད། དེའི་ཐོག་བརྗོད་སྟངས་གསར་བ་འཚོལ་གྱི་ཡོད་པ་རེད། ཀླུ་སྒྲུབ་དགོངས་རྒྱན་ནང་དུ། དངོས་པོ་ཞིག་བདེན་པ་རེད་དམ་རྫུན་པ་རེད་ཟེར་ནས་མཐའ་ལ་གཏུགས་ཡོང་ན། ཁྱེད་རང་ཉིད་ལ་ཐུག་འདུག་ཅེས་བཤད་ཡོད་པ་རེད། སྟོན་པ་ཤཱཀྱ་ཐུབ་པ་བདེན་པ་ཡིན་པ་སུས་ཤེས་ཀྱི་འདུག་ཟེར་ན་སློབ་དཔོན་ཀླུ་སྒྲུབ་ཀྱིས་ཤེས་ཀྱི་འདུག སློབ་དཔོན་ཀླུ་སྒྲུབ་བདེན་པ་ཡིན་པ་སུས་ཤེས་ཀྱི་རེད་ཟེར་དུས་རྗེ་ཙོང་ཁ་བ་སོགས་སྐོར་ཞིག་གིས་ཤེས་ཀི  རྗེ་ཙོང་ཁ་བ་སོགས་བདེན་པ་ཡིན་མིན་སུས་ཤེས་ཀྱི་འདུག་ཟེར་དུས་ངའི་བླ་མས་ཤེས་ཀྱི་འདུག་ཟེར་བ་དང༌། བླ་མ་བདེན་པ་ཡིན་པ་མཐར་གཏུགས་ན་ཁྱེད་རང་ལ་ཐུག་འདུག་ཅེས་ཁོ་རང་གི་ལྟ་བ་བཙལ་སྟངས་ཤིག་རེད།

ཁྱོད་ཚོའི་ནང་དུ་མཚན་ཉིད་དང་དབུ་མའི་ལྟ་བ་སྦྱང་མྱོང་མཁན་ཡོད་ཀྱི་རེད། ང་ལ་མཚོན་ན་འདི་ནི་ཕྲ་ཞིང་ཞིབ་པ་དང་ཐུན་མོང་མ་ཡིན་པ་འདི་ལྟ་བུའི་ལྟ་བ་གཏན་ལ་འབེབ་སྟངས་ཤིག་རེད་བསམ་སོང༌། དེ་གང་ཡིན་ཡང་ཁྱད་པར་མི་འདུག མཐར་ཐུག་ཁོས་དེ་བཤད་དུས་སེང་གེའི་དཔང་པོ་ལ་སྟག སྟག་གི་དཔང་པོ་ལ་གཡག གཡག་གི་དཔང་པོ་ལ་ཁྱི། ཁྱི་ཡི་དཔང་པོ་ལ་བྱི་བ། བྱི་བའི་དཔང་པོ་ལ་འབུ་བཅས་མཐར་ཐུག་འབུ་ལ་ཐུག་འདུག་ཅེས་བཤད་ཡོད། ཁོང་ལ་ལང་ཚོའི་རྦབ་ཆུ་ནང་བཞིན་དང་བརྩམས་སྒྲུང་གི་འབྲི་སྟངས་མེད་ཀྱང༌། བང་རིམ་སྒྲིག་སྟངས་དང་ལྟ་བ་བརྗོད་སྟངས། ཚིག་བརྗོད་ཀྱི་ཆ་ནས་ཧང་སངས་པ་དེ་འདྲ་མང་པོ་འདུག འདི་ལྟ་བུའི་ཁྱད་པར་གང་ནས་བལྟས་ཀྱང་མང་པོ་རྙེད་ཀི་འདུག

དྲུག་པ། ཤུགས་རྐྱེན་བསྡུར་བ།

ཤུགས་རྐྱེན་ལ་རིམ་པ་ཁ་ཤས་འདུག  ཤུགས་རྐྱེན་ཟེར་ནས་ཁ་ནང་ནས་བཤད་བདེ་བོ་ཡོད་ཀྱང་ཞིབ་ཏུ་བསམ་བློ་བཏང་ན་དེ་ལ་བསམ་བློ་གཏོང་རྒྱུ་ཡོད་པ་རེད། སྤྱིར་བཏང་ང་ལ་མོས་མཐུན་ཡོང་བ་བྱེད་པ་ཙམ་ཡང་ཤུགས་རྐྱེན་རེད། མོས་མཐུན་ཡོད་པའི་སྟེང་ལ་ལྟ་བ་དང་སྤྱོད་ལམ་བསྒྱུར་དུ་བཅུག་པ་ཤུགས་རྐྱེན་ཆེན་པོ་རེད། ང་ཙམ་མ་ཟད་མི་མང་པོ་ཞིག་ལ་ངའི་བསམ་པ་ནང་བཞིན་བསྒྱུར་ཐུབ་ན་ཤུགས་རྐྱེན་ཧ་ཅང་ཆེན་པོ་རེད། ཤུགས་རྐྱེན་ཁ་ཤས་ཆོས་ལུགས་ཀྱི་རྐྱེན་རེད། གང་བཤད་པ་ཚང་མ་བདེན་པར་བཟུང་སྟེ་ཕྱག་འཚལ་ཞིང༌། བདེན་མིན་ལ་བསམ་བློ་ཙམ་ཡང་གཏོང་མི་དགོས་པ་དེ་ཤུགས་རྐྱེན་ཆེས་ཆེ་ཤོས་དེ་རེད། དེ་དད་པའི་ཕྱོགས་ལ་བུད་སོང་བ་རེད།

འདི་ལྟར་བལྟས་ན། དགེ་འདུན་ཆོས་འཕེལ་གྱི་ཤུགས་རྐྱེན་གྱིས་དོན་གྲུབ་རྒྱལ་གྱི་ཤུགས་རྐྱེན་གྱི་རྗེས་མི་ཆོད་པ་འདྲ། དོན་གྲུབ་རྒྱལ་གྱི་ཤུགས་རྐྱེན་ནི་རྒྱ་ཆེན་པོ་དང་མགྱོགས་པོ་རེད། ལྗང་བུས་དོན་གྲུབ་རྒྱལ་གྱི་སྐོར་ལ་རྩོམ་ཞིག་བྲིས་ཡོད་པའི་ནང་དུ། རྩོམ་རེ་བྲིས་ན་སྤྱི་ཚོགས་ཐེངས་རེ་འགུལ་མྱོང་བ་དང༌། བསམ་བློ་གསར་བ་གཏོང་དགོས་འཁེལ་ཡོད་པར་བཤད་ཡོད། དེ་བདེན་པ་རེད། ལྷག་པར་དུ་ལང་ཚོའི་རྦབ་ཆུ་བྲིས་པའི་རྗེས་ལ་སྙན་ངག་གི་ཆུ་ལོག་ཅིག་བོད་ཀྱི་སྤྱི་ཚོགས་ནང་རྒྱུགས་ཡོད་པར་བཤད་ཆོག་པ་རེད། ༼འབྲོང་སྟག་ཐང༽དང༌། ༼འབྲུག་མཚོ།༽ ༼པད་མཚོ་༽སོགས་སྒྲུང་གཏམ་བྲིས་རྗེས་མི་ཚང་མས་བོད་ཡིག་གིས་སྒྲུང་རྩོམ་འབྲི་ཐུབ་ཀྱི་འདུག་ཟེར་ནས་ཡ་མཚན་ཡོད་པ་རེད། དེའི་སྔོན་ལ་བོད་ཡིག་གིས་སྲོལ་རྒྱུན་གྱི་སྙན་ངག་རྩོམ་འབྲི་ཐུབ་པ་ལས་སྒྲུང་གཏམ་གྱི་རིགས་འབྲི་ཐུབ་མི་ཐུབ་ལ་རྩོད་པ་དང་ཐེ་ཚོམ་ཡོད་པ་རེད། བོད་ཡིག་ཡག་པོ་ཡོད་མཁན་དང་དགའ་མཁན་ཚོས་འབྲི་ཐུབ་ཟེར་གྱི་ཡོད་ཀྱང༌། དེ་ལ་ཚོད་ལྟ་བྱེད་པའི་སྤོབས་པ་སླེབས་ཡོད་པ་མ་རེད། རྒྱ་ཡིག་ཤེས་མཁན་དང་བོད་ཡིག་ཡག་པོ་མི་ཤེས་མཁན་ཚོས་བོད་ཡིག་གི་སྒྲུང་རྩོམ་འབྲི་མི་ཐུབ་ཟེར་དུས་མི་དགའ་ཡང་ཁུངས་སྐྱེལ་ལག་ལེན་བྱེད་ཐུབ་ཀྱི་མེད་པ་རེད། སྐབས་དེར། དོན་གྲུབ་རྒྱལ་གྱིས་བྲིས་ཡོང་བ་དེས་འབྲི་ཐུབ་པའི་ཁུངས་སྐྱེལ་ཏེ་སྤོབས་པའང་བྱིན་ནས་ཁོའི་ཤུགས་རྐྱེན་གཙོ་བོ་སྤོབས་པའི་ཐོག་ནས་སླེབས་པ་རེད། མི་ཚང་མས་བོད་ཀྱི་སྐད་ཡིག་གིས་འབྲི་ཐུབ་ཀྱི་འདུག་ཟེར་ནས་རྗེས་ལ་འབྲི་མཁན་མང་པོ་བྱུང་བ་རེད།

དགེ་འདུན་འཕེལ་ལ་མཚོན་ན། མི་ཚང་མས་ཁོ་མཁས་པ་ཡིན་པར་ཁས་བླངས་ཡོད་ཀྱང་ཤུགས་རྐྱེན་སྤྱི་ཚོགས་ནང་སླེབས་ཐུབ་མེད། དགེ་འདུན་ཆོས་འཕེལ་གྱི་ཤུགས་རྐྱེན་སླེབས་མ་ཐུབ་པ་ལ་རྒྱུ་རྐྱེན་ཁ་ཤས་འདུག དང་པོ། དགེ་འདུན་ཆོས་འཕེལ་གྱི་རྣམ་དཔྱོད་དང་ང་ཚོའི་རྣམ་དཔྱོད་ཀྱི་བར་ཐག་རིང་དྲག་ཏེ་རྗེས་ཟིན་མཁན་མེད་སོང་བ་རེད། དཔེར་ན། དགེ་འདུན་ཆོས་འཕེལ་རྒྱ་གར་ལ་སོང་ནས་ལོ་བཅུ་གཉིས་རིང་བསྡད་དེ་གཏམ་རྒྱུད་གསེར་གྱི་ཐང་མ་བྲིས་པ་རེད། དེའི་ནང་ན་ང་ཚོས་མ་ཤེས་པ་ཇི་འདྲའི་མང་པོ་ཞིག་རྙེད་རྒྱུ་འདུག གླིང་བཞི་གླིང་ཕྲན་བརྒྱད་ལྟ་བུར་མཚོན་ན། ཁོས་རྒྱ་གར་གྱི་ཡུལ་ཁམས་བཞི་ཡིན་པ་རྙེད་ཅིང༌། ལྷོ་ཛམ་བུ་གླིང་ཟེར་བ་ནི་ཆོང་བ་ལུ་མང་སའི་ས་ཆ་ཞིག་རེད་ལྟ་བུ། ཆོས་ལུགས་ཀྱི་ནང་ནས་ཆེ་རུ་བཏང་བ་མ་གཏོགས་དོན་དངོས་སུ་རྒྱ་གར་གྱི་ཡུལ་ཁམས་བཞི་རེད་ཅེས་བཤད་པ་རེད།

དེའི་རྗེས་ནས་བོད་མི་འབུམ་གཅིག་ལྷག་རྒྱལ་བ་རིན་པོ་ཆེ་གཙོ་བྱས་ནས་རྒྱ་གར་ལ་ཡོང་སྟེ་ལོ་ལྔ་བཅུ་ལྷག་འགོར་བའི་རིང་ནང་ཆོས་ཤེས་མཁན་དང༌། རྒྱ་གར་སྐད་དང་སཾསྐྲིཏ། དབྱིན་སྐད་སོགས་ཤེས་མཁན་ཡོད་ཀྱང༌། དགེ་འདུན་ཆོས་འཕེལ་ནང་བཞིན་རྒྱ་གར་ནས་བོད་ལ་བསྒྱུར་བའི་ཆོས་དཔེ་ནང་རྒྱ་གར་གྱིས་བཤད་ཀྱིན་པ་འདི་རེད་ཟེར་ནས་གསར་དུ་རྙེད་མཁན་སུ་ཡོད་པ་རེད། མ་མཐའ་ཁ་སྣོན་སྣ་གཅིག་རྙེད་མཁན་སུ་ཡོད་པ་རེད། མཐུན་རྐྱེན་དང་སྐད་ཡིག་ཆ་ནས་མ་འཛོམས་པ་མིན་ཡང་དགེ་འདུན་ཆོས་འཕེལ་ནང་བཞིན་རྣམ་དཔྱོད་ཀྱིས་མ་འདང་བ་རེད། ཕལ་ཆེར་རྗེས་མ་ཡང་ཡོང་ཁག་པོ་རེད།

དོན་གྲུབ་རྒྱལ་ནང་བཞིན་སྒྲུང་རྩོམ་འབྲི་མཁན་དང་སྙན་ངག་འབྲི་མཁན་ཡོང་ཡོད་པ་རེད། དོན་གྲུབ་རྒྱལ་ལས་ཡར་རྒྱས་སོང་ལོས་ཡོད་བསམ་པ་དང་འབྲི་མཁན་མང་པོ་རེད། ཡིན་ཡང་དགེ་འདུན་ཆོས་འཕེལ་གྱིས་སེང་གེའི་དཔང་པོ་ལ་སྟག སྟག་གི་དཔང་པོ་ལ་གཡག དེའི་དཔང་པོ་ལ་ཁྱི་ཟེར་བ་ལྟ་བུའི་བཤད་སྟངས་གསར་བ་དང་ཚིག་གི་དོ་ཟླར་ཡོང་མཁན་ད་དུང་ཡོང་ཡོད་ཀྱི་མ་རེད་ལ།

བླུན་པོ་མཁས་པའི་རྗེས་སུ་མི་འབྲངས་ཡང།།

མཁས་པ་བླུན་པོའི་རྗེས་སུ་མི་འབྲངས་པ།།

དེ་ནི་མཁས་པའི་དམ་ཚིག་དང་པོ་སྟེ།།

སྲོག་ལ་བབས་ཀྱང་འབད་པས་སྲུང་བར་བྱ།།

ཟེར་བ་ལྟ་བུ་མཁས་པ་ལ་ངོས་འཛིན་གསལ་ཞིང་མཁས་པའི་རང་ཚུགས་ཀྱི་ས་མཚམས་གསལ་བོ་འཛིན་ཐུབ་མཁན་བྱུང་ཡོད་དམ།  དོན་གྲུབ་རྒྱལ་གྱིས་རྩོམ་སྟངས་གསར་བའི་ཐད་སྣེ་ཁྲིད་ཡོད་ལ། ཁོའི་རྗེས་སུ་འབྲང་མཁན་ཡང་མང་པོ་ཞིག་བྱུང་ཡོད་པས།  ཁོས་རང་གི་རྗེས་འབྲངས་པ་དེ་དག་གི་སྤོབས་པ་ཇེ་ཆེར་བཏང་བ་དང་ཇེ་མགྱོགས་སུ་བཏང་བ་དེ་ལྟ་བུ་ཡོང་ཁོ་ཐག་རེད།  དགེ་འདུན་ཆོས་འཕེལ་གྱིས་གསར་དུ་རྙེད་པ་དེ་དག་ཁོ་རང་གིས་རྙེད་མེད་པ་ཡིན་ན། གཞན་ཞིག་གིས་རྙེད་ཀྱི་རེད་དམ་ཟེར་ན་དེ་ཐེ་ཚོམ་གྱི་གནས་རེད།

དཔེར་ན། ཐོན་མི་སམ་བྷོ་ཊས་ཡི་གེ་གསར་བ་ཁ་ཤས་བསྣན་པ་དེ་གཞན་པ་མ་རེད། ཙ་ཚ་ཛ་གསུམ་རེད། དེ་ཡིན་པའི་རྟགས་ག་རེ་འདུག་ཟེར་བ་ཅ་ཆ་ཇ་གསུམ་གྱི་སྟེང་དུ་རྟགས་ཤིག་ཡོད་པ་དེ་གསར་རྙེད་ཀྱི་རྟགས་རེད་ཅེས་ཧ་ཅང་རིག་པ་ཞིབ་མོ་དང༌། རྣམ་དཔྱོད་རྣོན་པོ་ཡིན་པས་དགེ་འདུན་ཆོས་འཕེལ་མེད་ཚེ་ང་ཚོས་དེ་རྙེད་ཐུབ་ཀྱི་རེད་དམ། ཡང་དཔེར་མཚོན་ཞིག་ལ། དགེ་འདུན་ཆོས་འཕེལ་གྱིས་དབུ་མེད་དེ་དབུ་ཅན་མགྱོགས་པོར་བྲིས་པ་ལ་བརྟེན་ནས་བྱུང་བ་ཡིན་པ་ལས་ལཉྫ་དང་ཝར་ཏུ་ལས་བྱུང་བ་མ་རེད། ཐོན་མི་སམ་བྷོ་ཊ་རྒྱ་གར་ལ་འགྲོ་དུས་རྒྱ་གར་ན་ལཉྫ་དང་ཝར་ཏུ་མི་འདུག་གསུངས་ཡོད་པ་རེད། དེ་ནས་ལོ་ངོ་དྲུག་ཅུ་ལྷག་འགོར་རྗེས་མི་གཞན་པ་ཞིག་གིས་རང་ས་ནས་ཞིབ་འཇུག་བྱས་ནས་ལྟ་བ་འདི་ཡང་སྐྱར་རྙེད་ཅིང་ཇེ་ཞིབ་ཏུ་བཏང་ཡོད་པ་རེད། དེ་ཡང་བོད་པ་མ་རེད། དབྱིན་ཇི་པ་ Sam Van Schalk ཟེར་བ་ཞིག་རེད། ཁོས་ཀྱང་ཏུན་ཧོང་གཏེར་ཡིག་ལ་གཞི་བཅོལ་ནས་དབུ་ཅན་ནས་དབུ་མེད་བྱུང་ཚུལ་ཧ་ཅང་ཞིབ་རྒྱས་ཀྱི་རྩོམ་ཡིག་ལོ་རེ་ཟུང་གི་སྔོན་ལ་བྲིས་འདུག

རྩོམ་དེའི་ནང༌། དགེ་འདུན་ཆོས་འཕེལ་གྱི་ལྟ་བ་དེའི་སྐོར་གླེང་མེད་པས་ཁོ་རང་ཉིད་ཀྱིས་ཞིབ་འཇུག་གིས་རྙེད་པ་འདྲ། ངས་ད་སྔ་དགེ་ཆོས་ཀྱིས་རྙེད་ཟིན་པ་ཞིག་མི་ཞིག་གིས་ཁོང་ལ་མ་བརྟེན་པར་གསར་དུ་རྙེད་ཡོད་མཁན་འདི་ལས་མཐོང་མ་མྱོང༌། འདི་ལ་བལྟས་ཚེ་རྣམ་དཔྱོད་ཀྱི་ཁྱད་པར་ཤོར་བ་ཆེ་དྲག་ནས་ཁོང་གི་རྗེས་ཟིན་དཀའ་བའི་ཚོར་བ་དེ་འདྲ་ཞིག་འདུག

ཁོའི་ཤུགས་རྐྱེན་སྤྱི་ཚོགས་ནང་སླེབས་མི་ཐུབ་པའི་རྒྱུ་མཚན་གཞན་གཅིག་ནི། ཁོས་གསང་བ་དེ་དག་བཀྲོལ་བའི་དུས་ཚོད་འཕྱི་འདུག དཔེར་ན། ཁོང་གིས་བོད་ཀྱི་ནང་ཆོས་ཀྱི་ནང་ན། མཁའ་འགྲོ་མ་ཟེར་བ་ཞིག་ཡོད་པ་དེ་རྒྱ་གར་ནས་ཡོང་བ་ཞིག་ཡིན་ན། རྒྱ་གར་གྱི་ངོས་འཛིན་ལ་དེ་ནི་བུད་མེད་ཀྱི་རིགས་ཐ་ཤལ་གྱི་ནང་གི་ཐ་ཤལ་ཞིག་ཡིན་པ་དང༌། རྒྱ་གར་སྤྱི་ཚོགས་ནང་ལ། བུད་མེད་ཅིག་ལ་མཁའ་འགྲོ་མ་ཞེས་བོས་ཚེ་དེ་ལས་ལྷག་པའི་དམའ་འབེབས་བྱེད་རྒྱུ་མེད་པའི་འབོད་ཚུལ་ཞིག་ཡིན་ཚུལ་བརྗོད་ཡོད། ཡིན་ན་ཡང༌། ང་ཚོ་བོད་ལ་མཁའ་འགྲོ་མ་ཟེར་བ་དེ་དད་པ་བྱེད་ས་ཞིག་དང་བྱིན་རླབས་འབྱུང་ས་ཅན་ཞིག་ཏུ་གྱུར་ཡོད་པ་རེད། དེ་འདྲར་གྱུར་ནས་ལོ་བརྒྱ་ཕྲག་དུ་མའི་རིང་དད་པ་བྱས་པ་ཡིན་པས་དགེ་འདུན་ཆོས་འཕེལ་གྱིས་མཁའ་འགྲོ་མ་ཟེར་ནི་དེ་མ་རེད་ཟེར་ནས་བཤད་ན་མཁའ་འགྲོ་མ་དེ་དག་གང་དུ་འཇོག་དགོས་རེད། དེའི་རྐྱེན་གྱིས་དགེ་འདུན་ཆོས་འཕེལ་གྱིས་གསང་བ་བརྟོལ་བ་དེ་དག་འུ་ཚོའི་རིག་གཞུང་ནང་དུ་ཤེས་ཀྱང་གཡུག་ས་མི་འགྲོ་བའི་ཚད་ལ་སླེབས་ཡོད་པ་རེད། དེང་སང་ཁོང་གི་ལྟ་བ་ངོས་ལེན་གྱི་ཤུགས་རྐྱེན་ཙམ་ནི་ཡོང་ཐུབ་ཀྱང་ཁོ་ནང་བཞིན་ལྟ་བ་གསར་བ་རྙེད་ཐུབ་དཀའ་རྒྱུ་རེད།

བདུན་པ། རིག་པའི་གཞི་འཛིན་ས་བསྡུར་བ།དང་པོ།

དགེ་འདུན་ཆོས་འཕེལ་དང་དོན་གྲུབ་རྒྱལ་གཉིས་ཀྱི་རིག་པའི་གཞི་འཛིན་ས་ཁ་ཁ་རེད། དགེ་འདུན་ཆོས་འཕེལ་གྱི་སྐབས་ལ་རང་དབང་ཡོད་དུས་རེད། ཁོས་གཞི་འཛིན་ས་ནི་མི་རིགས་ལ་རྒྱའི་དོན་དག་ཅིག་མ་རེད། སྔོན་མ་ལྟག་མཚེར་རིན་པོ་ཆེས་ང་ལ་དགེ་འདུན་ཆོས་འཕེལ་མི་རིགས་རིང་ལུགས་པ་མ་རེད་གསུངས་བྱུང༌། དེ་དུས་བསམ་བློ་མ་འཁོར་ཡང༌། རྗེས་ལ་བསམ་བློ་གཏོང་དུས་ལྟག་མཚེར་རིན་པོ་ཆེས་དོན་དག་ཆེན་པོ་ཞིག་བཟུང་འདུག དགེ་འདུན་ཆོས་འཕེལ་གྱིས་མི་ཡི་རིག་པ་ནི་གཞུང་ལུགས་དང་ལྟ་བ་གཅིག་གིས་བཟུང་ན་ཡག་པོ་མེད་པར་ལྟ་བ་གུ་ཡངས་མོ་བྱས་ནས་འདུག་དགོས་ཀྱི་འདུག་ཟེར་གྱི་ཡོད་པ་རེད། ཀླུ་སྒྲུབ་དགོངས་རྒྱན་དུ་ད་ལྟ་ཁྱོད་ཀྱི་མིག་གཉིས་གདོང་དུ་འཕྲེད་དུ་ཡོད་པ་རེད། གལ་སྲིད་ཐོད་པའི་ཐོག་མིག་གསུམ་པ་ཞིག་གྱེན་དུ་ཡོད་པ་ཡིན་ན། འཇིག་རྟེན་ཏུ་ཤེས་ཡོན་གྱི་རྣམ་པ་གསར་བ་ཞིག་ཡོང་གི་རེད། དེར་བརྟེན་གཞུང་ལུགས་དང་ལྟ་གྲུབ་གཅིག་གི་ཐོག་ན་བཤད་བཞིན་པ་དེས་བློ་བཅིངས་ནས་འདུག་མི་རུང༌། དད་པ་ཟེར་བ་ཞིག་དགོས་མཁོ་ཡོད་ཀྱང་དད་པས་རང་གི་རྣམ་དཔྱོད་མེད་པ་བཟོ་མི་རུང༌། སོང་ཙང་ཐ་སྙད་ཚད་གྲུབ་འཇོག་ལ་བློ་མ་བདེ་ཟེར་གྱི་ཡོད་པ་རེད།

དོན་གྲུབ་རྒྱལ་གྱིས་སྔོན་མ་བོད་འདི་རླབས་ཆེན་ཞིག་རེད། ད་ལྟ་ཚད་འདི་ལ་ལྷུང་ཡོད་པས་འདི་ལྟར་འདུག་མི་རུང་ཟེར་གྱི་ཡོད་པ་རེད། ལང་ཚོའི་རྦབ་ཆུར་མཚོན་ན། གཅིག་ནས་སྙན་ངག་གི་འབོད་ཚུལ་ཡིན་ཡང༌། གུང་ཁྲན་གྱི་གཤིས་ཀ་ཡང་ཡོད་པ་རེད། དཔེར་ན།

གྲལ་འགྲིག་པའི་རུ་དཔུང་དེ་ནི།

བོད་གངས་ཅན་གྱི་མི་རབས་གསར་བ་རེད།

ཉོན་དང༌།

འགྲོས་མཉམ་པའི་གླུ་སྒྲ་དེ་ནི།

བོད་གངས་ཅན་གྱི་གཞོན་ནུའི་གོམ་སྒྲ་རེད།

ཟེར་བ་འདི་ལྟ་བུར་མཚོན་ན་མི་མང་པོའི་བསམ་བློ་གཅིག་དང་དབྱངས་གཅིག གོམས་སྟབས་གཅིག་ཡིན་པའི་ཚོར་བ་སྤྲོད་ཀྱི་རེད་ལ། མཚམས་ལན་རེར། གུང་ཁྲན་གྱི་དམག་དཔུང་གྲལ་བསྒྲིགས་ནས་འགྲོ་བཞིན་པའི་ཚོར་བའང་སྟེར་གྱི་རེད། ཁོང་གིས་རང་གི་མི་རིགས་ཀྱི་རང་དབང་དང་ལ་རྒྱ་རྩོད་ཀྱིན་པའི་རྣམ་པ་ཡོད་པ་རེད། དགེ་འདུན་ཆོས་འཕེལ་གྱིས་སྤྱིར་བཏང་མི་བཅིངས་འགྲོལ་བྱེད་རྒྱུ་བཤད་ཀྱི་ཡོད་པ་དང༌། དོན་གྲུབ་རྒྱལ་གྱིས་དབང་བསྒྱུར་ཞིག་གི་འོག་ནས་ཐར་རྒྱུ་བཤད་ཀྱི་ཡོད་པས་རྒྱ་ཆེ་ཆུང་མ་འདྲ་བ་རེད།

ཕྱི་ལོ་ ༢༠༡༤ ཟླ་ ༤ ཚེས་ ༢༥ ལ་ཕབ་བཤུ་དང་ཞུས་དག་བཅས་གྲུབ་བོ།།

༼དགུ་ཆུ་སྐད་འཕྲིན༽་ཚོགས་པས་ཆེད་འགྲེམས་ཞུས།གསུང་བཤད་གནང་མཁན་ཨ་ཁུ་པདྨ་འབུམ་གྱི་གཏམ་བཤད་དངོས་གཞི།

སྔོན་གླེང།

དེ་རིང་ཁ་བརྡ་ཡིན། གཏམ་བཤད་མིན། བརྗོད་གཞི་འདི་ལ་ནམ་རྒྱུན་བསམ་བློ་བཏང་མྱོང་བ་ལས་བང་རིམ་མ་བསྒྲིགས་པ་ཞིག་ཡིན་པས། དེ་རིང་བང་རིམ་འགྲིག་མོ་དང་གསལ་བོ་ཞིག་བཤད་རྒྱུ་མེད་པ་འདྲ།  ཕྱི་ལོ་ ༢༠༠༤ ནས་ལོ་རེར་ཐེངས་རེར་ང་ཕ་ཡུལ་ལ་འགྲོ་གི་ཡོད་པ་རེད། ཡུལ་ལ་འགྲོ་དུས་གཙོ་བོ་དཔེ་ཆ་ཉོ་གི་འགྲོ་གི་ཡོད། དེའི་སྐབས་སུ་རེབ་གོང་དང་ཟི་ལིང་ནས་སྒེར་གྱི་ཚོང་ཁང་དུ་རྩིག་ངོས་ལ་སྦྱར་རྒྱུའི་པར་མང་པོ་མཐོང་རྒྱུ་ཡོད་པའི་ནང་ནས་རྒྱུན་དུ་མཐོང་བའི་པར་གཅིག་ནི་དོན་གྲུབ་རྒྱལ་དང་དགེ་འདུན་ཆོས་འཕེལ་གཉིས་ཀྱི་པར་དང༌། ཡང་ན་མི་རིགས་ཀྱི་ལར་ཞེན་ཡོད་པའི་ཁོང་གཉིས་ཀྱི་གསུང་ཚིག་དུམ་བུ་རེ་ཡི་པར་དང་ཁོང་གཉིས་མཉམ་དུ་ཡོད་པའི་པར་མཐོང་གི་འདུག



བརྗོད་གཞིའི་རིགས་བཀར་བ།:

བཀླཌ་ཐེངས།: 1656 | དེ་ལས་མང༌།...


 
བསྟན་པ་སྤང་ལ་ཆགས་པ།
07.05.2014 01:13:24
བསྟན་པ་སྤང་ལ་ཆགས་པ།
བསྟན་པ་སྤང་ལ་ཆགས་སོང༌།།
འབྲི་མོ་རི་ལ་བྲོས་སོང༌།།
ས་གདན་ཞིག་གི་དུང་ཤ་ཡོད་པའི་སྤང་སྔོན་ལེབ་མོ་དེ
བདག་གི་རྐང་འགྲོས་ཀྱི་རི་མོ་ནམ་རྒྱུན་འབྲི་ས
མིག་ཟུང་ཡང་དེ་ལྟར་གྱིས་ཕྱོགས་ཀུན་ཏུ་ཡན
སེམས་པར་ཡང་རེ་སྙེག་ཅིག་ཡོད་ལ
འཁྲེང་ཞེན་ཡང་མང
ཁོར་ཡུག་ཀུན་ཏུ་བབས་པའི་བྱ་ཚོགས་དེའི་རིགས
ཁ་ཐག་རིང་བའི་རྒྱང་རིང་ལ་འཁྲེན་པ་ལྟར
ཁོག་སྡུག་ཅིག་གི་དོད་དུ་ནམ་རྒྱུན་སྤང་ལ་ལོབས་ཡོད
དབུགས་ངལ་གྱི་སུག་བར་ན་རྩྭ་ལོ་དག་ཐུང་དུ་འགྲོ་གིན་འདུག
དེ་ལྟར་སྐྲ་ལོ་དཀར་པོར་གྱུར་པའང་ཉུང་ཉུང་མ་རེད
ཤེལ་ཕོར་གཟུགས་ཐུང་འགའ་ཡི་དཀྱིལ་ཁུག་ཏུ
ལོ་ངོ་གསུམ་ནི་མཛུབ་མོ་འགུགས་ཐེངས་གསུམ་གྱི་མཚོན་བྱེད་ཡིན་འདུག
བསྟན་པས་སྔར་བཞིན་སྤང་ལ་དཀྱིལ་ཀྲུང་བཞག
བདག་གིས་དེ་བཞིན་ཁོང་ལ་ཀུ་རེ་བསླངས
རྩེད་སྟངས་འདི་བྱིས་དུས་ལས་ཐོལ་བ་ཞིག
ཁོ་རང་སྤང་ཆུང་འདི་ནས་རྟ་རྒྱུག་པའི་འདུན་པ་ཆེ
འོ......  མ་རེད
ཡང་ན་འབྲི་མོ་ལྷས་རར་འཁོར་བ་ལྟ་བུའི
མ་བུ་དང་མ་བུ་འདྲེས་པའི་འཚང་ཁ་ལ་ཞེན་པ་འདྲ
ཁོའི་མིག་ཟུང་གི་གློད་མཚམས་ནི་ཧ་ཅང་སྐྱེན་པས
ངས་བསྟན་པ་གཅིག་པོར་བལྟ་དོན
གང་ལྟར་བདག་གིས་ཁོའི་མིག་ཟུང་གི་རྗེས་མི་ཟིན
དེ་རིང་ཡང་ཤེལ་ཕོར་གཟུགས་ཐུང་དེ་ཉིན་ལ་བསྐོར་འདུག
ཉི་མས་གཟས་ནས་ཁོའི་མཁུར་ཚོས་ལ་རྟ་སིལ་དམར་པོ་བྱུགས
ཀུ་རེ་དང་དགོད་སྒྲའི་ཀློང་དུ་དེ་ལ་འཛུམ་ཞིག་ཡོད
རང་ཉིད་ལ་དྲི་བ་ཞིག་འཁོར
ཡང་ན་སེམས་ཁོང་དུ་དྲི་བ་ཞིག་བཏང
ནམ་ཞིག་གི་བསྟན་པ
དེས་ན་མ་འོངས་བའི་བསྟན་པ
སྤང་འདི་རེད
འོ་ན      དོན་གཞན་ཞིག
གང་ལྟར       སྤང་འདི་བསྟན་པར་དབང་མི་འདུག
འདི་ལྟར
བསྟན་པས་སྤང་ནས་ཇ་འཐུང་བ་ནི་ཨང་རྩིས་ནང་གི་བསྡུས་འཁོར་སིལ་གྲངས་འདྲ
སྤང་ལ་མེ་ཏོག་མེད་རུང་ཁོའི་དཀར་ཤ་དང་དམར་མདངས་ཡོད
འོ་ཇར་བྲོ་བ་ཞན་ཡང་ཤེལ་ཕོར་སྟོང་པ་མདུན་ན་ཇེ་དགོད་རེད
འཛུམ་མེད་པ་དག་སྤང་ལ་ལོབས་འདྲའི
ལས་མེད་དག་གི་སེམས་གཡེང་བྱེད་ས་ལྟ་བུའི
བྱིས་པ་དང་ཨ་མ     ཨ་ཕ་དང་བྱིས་པ
ད་དུང་ཕ་མ་དང་བྱིས་པ

མིག་གི་ལོངས་སྤྱོད་དུ་ཐད་ཀར་བཤམས་པའི་རི་མོ་འདི

བསྟན་པའི་ཚེ་སྲོག་གི་མཛེས་སྣང་ཞིག་དང་སྐྱོ་བ་ཞིག

སྐེ་ཚིགས་ན་འཁོར་བའི་མགོ་བོ་ལས

སྤང་ཐང་གི་མེ་ཏོག་གང་ཞིག་འཚོལ་གྱིན་འདུག

སྤང་འདི་ནས་མེ་ཏོག་སྐྱེས་མ་མྱོང

གལ་སྲིད་སྐྱེས་པ་ཡིན་ན

ཕུགས་འདུན་གྱིས་ཁེངས་པའི་མིག་ཟུང་གང་མང་ཞིག

བསྟན་པ་ལྟར་སྤང་ཐང་འདི་ལ་མི་ལོབས་པ་ག་ལ་སྲིད

སྤང་འདི་ནས་འཁྲེང་ཞེན་འབུས་མ་མྱོང

གལ་སྲིད་འབུས་པ་ཡིན་ན

བརྩེ་དུང་གི་ལྷག་མ་གང་མང་ཞིག

བསྟན་པ་ལྟར་ས་འདི་ནས་མི་སྐྱེས་པ་ག་ལ་སྲིད

སྤང་ལྗོངས་སུ་འཐིམས་པ་ནི་ཁོ་རང་གི་བྱིས་དུས་ཀྱི་དུངས་ཚོར་ཞིག་ཡིན་པ་འདྲ

སྤང་ནས་ཇ་འཐུང་བ་ནི་ཁོར་ཡུག་འདིའི་ལོབས་ཕྱོགས་ཤིག

དེ་མིན་ལྟད་མོར་གཡེང་བའི་རིན་ཐང་གི་ངོ་བོ་ཞིག

སློབ་མཐར་ཕྱིན་ན་བསྟན་པ་གང་དུ་འདུག་སྲིད་དམ

ཡང་ན་སྤང་ལ་གྱེས་ཕྱག་ཇི་ལྟར་འབུལ་ལམ

དྲི་བ་འདི་ཁོ་རང་གི་རེད་དམ

ཡང་ན     ངས་རྟོག་བཟོ་བྱས་པ་ཞིག

སྤང་ལ་ལོབས་པའམ་ཇ་ལ་འཁོར་བའི་ཟིན་བྲིས་རེ་ནི་རེ་བ་ངག་ལ་འཁྱིལ་བའི་རོལ་དབྱངས་ཤིག

ལེན་སྟངས་མ་ཤེས་པའི་གཞས་གདངས་ཆག་རོ་ཞིག

ཟ་ལད་རྒྱལ་འགའ་ཡང་འདི་རུ་ཡོང་སྟེ

ཇ་རེ་འཐུང་ནས་བུད་འགྲོ་གི

སྤང་འདི་ཡི་མེ་ཏོག་ནི

‘ཟླ་བཞི་བའི་མེ་ཏོག་སེར་ཆེན།།

དལ་ཀོལ་ལེ་བཞད་ནི་མ་དགོས།།

བྲེལ་ཀོལ་ལེ་འགྲོ་དོན་ཅི་ཡིན།།’

དྲི་བ་འདི་འདྲ་ཞིག་གིས་བསྟན་པར་ཕོག་ཐུག་བཏང་ཡོད་སྲིད

བསྟན་པའི་ཁོམ་སྐབས་ཀྱི་ཆུ་ཚོད་དེ་སྤང་ན་ཡོད

སྤང་གིས་བསྟན་པར་སྒུག་པ་འདྲ་ལ

བསྟན་པས་སྤང་འདི་གཉོར་བ་འདྲ

དེ་བས་བསྟན་པ་དང་སྤང་ལྗོངས་ནི་གསང་བ་ཞིག་སྟེ

རྒྱ་རུ་ཚུད་པའི་གཏོར་གཟུགས་མཆོད་རྟེན་ལས་ཐུ

ཁོའི་ནག་ཀྲུག་ཀྲུག་གི་སྐྲ་ལོས

ནམ་ཡང་ཚུགས་ཀ་འཇོག་ལ

ཀུ་རེ་མིག་མཐར་ཉར་ནས་སྤང་ན་ཡོད

ཁོ.....   ནམ་རྒྱུན་སྤང་ན་ཡོད

དོན་དག་མེད་ན་བསྟན་པ་སྤང་ན་ཡོད་སྲིད

ཁོའི་ཀོ་ལྷམ་ངོས་ཀྱི་འོད་དེ་ཡལ་མྱོང་མེད

ཉིན་རེའི་ཕྱི་བདར་ལས་ཐོན་པ་ཞིག་གམ

སྤང་ལ་འགྲོ་བའི་སྟ་གོན་ཞིག

ཉི་མ་ཤིན་ཏུ་ཚ་ན

བསྟན་པའི་ལྷམ་དེ་སྤང་ལ་ཉི་མར་ལྡེ་ཡོད

༢༠༡༣།༣།༢༣ཉིན་འཛིན་ཁང་དུ།

བསྟན་པ་སྤང་ལ་ཆགས་སོང༌།།
འབྲི་མོ་རི་ལ་བྲོས་སོང༌།།
ས་གདན་ཞིག་གི་དུང་ཤ་ཡོད་པའི་སྤང་སྔོན་ལེབ་མོ་དེ

བདག་གི་རྐང་འགྲོས་ཀྱི་རི་མོ་ནམ་རྒྱུན་འབྲི་ས

མིག་ཟུང་ཡང་དེ་ལྟར་གྱིས་ཕྱོགས་ཀུན་ཏུ་ཡན

སེམས་པར་ཡང་རེ་སྙེག་ཅིག་ཡོད་ལ

འཁྲེང་ཞེན་ཡང་མང



བརྗོད་གཞིའི་རིགས་བཀར་བ།:

བཀླཌ་ཐེངས།: 1382 | དེ་ལས་མང༌།...


 
གསར་འགོད་བྱེད་སྟངས་རག་བསྡུས་ཤིག
08.04.2014 02:04:29

གསར་འགོད་པའི་ལས་ཀར་འཛུལ་ནས་ཟླ་དྲུག་ལ་སླེབས་པའི་སྐབས་སུ། རང་ཉིད་ཀྱི་སེམས་སུ་ཤར་བའི་བསམ་ཚུལ་འགའ་མདོར་བསྡུས་ཀྱིས་ཡིག་ཐོག་ཏུ་ཕབ་ན། གསར་འགོད་པས་རྒྱུན་ཤེས་འདི་ཙམ་ཤེས་དགོས་པའི་དོན་གནད་ཀྱི་རྒྱུད་རིམ་ཞིག་བློས་བསླངས་བྱས་པར་ཉེས་སྐྱོན་ཆད་ལྷག་ཡོད་ན་དེ་བཞིན་དུ་གསལ་སྟོན་གནང་དགོས་པའི་འབོད་སྐུད་ཞུས་པ་ཡིན།

བརྗོད་གཞིའི་རིགས་བཀར་བ།:

བཀླཌ་ཐེངས།: 3110 | དེ་ལས་མང༌།...


 
བཙན་པོ་རིམ་བྱོན་གྱི་མཚན་བྱང༌དང་ལོ་ཚིག
13.03.2014 22:54:32

 

བཙན་པོ་རིམ་བྱོན་གྱི་མཚན་བྱང༌།
历代赞普的称号
༡ གཉའ་ཁྲི་བཙན་པོ། ༼སྤྱི་ལོའི་སྔོན་གྱི་ལོ་༤༠༠---༣༠༠ཙམ༽
1:聂赤赞普(公元前400---300年)
༢ མུ་ཁྲི་བཙན་པོ།
2:木赤赞普
༣ དིང་ཁྲི་བཙན་པོ།
3:丁赤赞普
༤ སོ་ཁྲི་བཙན་པོ།
4:索赤赞普
༥ མེར་ཁྲི་བཙན་པོ།
5:美赤赞普
༦ གདགས་ཁྲི་བཙན་པོ།
6:达赤赞普
༧ སྲིབ་ཁྲི་བཙན་པོ།
7:思赤赞普
༨ གྲི་གུམ་བཙན་པོ།༼སྤྱི་ལོའི་སྔོན་གྱི་ལོ་༢༠༠ཙམ༽
8:志共赞普(公元前200年)
༩ པུ་ལྡེ་གུང་རྒྱལ།༼བྱ་ཁྲི་བཙན་པོའང༽
9:布德贡杰又名:恰赤赞普
༡༠ ཨེ་ཤོ་ལེགས།
10:埃肖勒
༡༡ དེ་ཤོ་ལེགས།
11:德肖勒
༡༢ ཐི་ཤོ་ལེགས།
12:提肖勒
༡༣ གུང་རུ་ལེགས།
13:共如勒
༡༤ འབྲོང་ཞེར་ལེགས།
14:仲协勒
༡༥ ཨི་ཤོ་ལེགས།
15:俄肖勒
༡༦ ཟ་ནམ་ཟིན་ལྡེ།
16:萨囊森德
༡༧ ལྡེ་འཕྲུལ་ནམ་གཞུང།
17:徳处囊雄
༡༨ སེ་སྣོལ་གནམ་ལྡེ།
18:色诺囊德
༡༩ སེ་སྣོལ་པོ་ལྡེ།
19:色诺波德
༢༠ ལྡེ་སྣོལ་ནམ།
20:德诺囊
༢༡ ལྡེ་སྣོལ་པོ།
21:徳诺波
༢༢ ལྡེ་རྒྱལ་པོ།
22:德杰波
༡༣ ལྡེ་སྤྲིན་བཙན།
23:德珍赞
༢༤ ཏོ་རི་ལུང་བཙན།
24:朵热隆赞
༢༥ ཁྲི་བཙན་ནམ།
25:赤赞囊
༡༦ ཁྲི་སྒྲ་དཔུང་བཙན།
26:赤扎绷赞
༢༧ ཐོག་རྗེ་ཐོག་བཙན།
27:妥杰妥赞
༡༨ ཐོ་ཐོ་རི་གཉན་བཙན།༼ཐོ་རི་སྙན་ཤལ་ཡང༽སྤྱི་ལོའི་དུས་རབས༣༠༠ཙམ
28:妥妥日年赞又名:妥日年协(公元300年)
༢༩ ཁྲི་གཉན་གཟུངས་བཙན།
29:赤年松赞
༣༠ འབྲོང་གཉན་ལྡེ་རུ།
30:仲年德如
༣༡ སྟག་རི་གཉན་གཟིགས།
31:达日年思
༣༢ གནམ་རི་སྲོང་བཙན།
32: 郎日伦赞
༣༣ སྲོང་བཙན་སྒམ་པོ།༼༦༢༩---༦༥༠༽
33:松赞干布(629---650)
༣༤ གུང་རི་གུང་བཙན།༼༦༥༠---༦༥༥༽
34:贡日贡赞(650---655)
༣༥ མང་སྲོང་མང་བཙན།༼༦༥༥---༦༧༦༽
35:芒松芒赞(655---676)
༣༦ འདུས་སྲོང་མང་པོ་རྗེ།༼༦༧༦---༧༠༤༽
36:都松芒波结(676---704)
༣༧ ཁྲི་ལྡེ་གཙུག་བརྟན།  མེས་ཡག་ཚོམ་ཡང༼༧༠༤---༧༥༥༽
37:赤德祖丹又名:美髯公(704---755)
༣༨ ཁྲི་སྲོང་ལྡེ་བཙན།༼༧༥༥---༧༩༧༽
38:赤松德赞(755---797)
༣༩ མུ་ནེ་བཙན་པོ།༼༧༩༧---༧༩༨༽
39:木奈赞普(797---798)
༤༠ སད་ན་ལེགས།༼༧༩༨---༨༡༥༽
40:色纳勒(798---815)
༤༡ ཁྲི་རལ་པ་ཅན། ཁྲི་གཙུག་ལྡེ་བཙན་ཡང།༼༨༡༥---༨༤༡༽
41:赤热巴坚又名:赤祖德赞(815---841)
༤༢ གླང་དར་མ། འུ་དུམ་བཙན་པོ་ཡང།༼༨༤༡---༨༤༦༽
42:郎达玛又名:乌冬赞普(841---846¥

历代赞普的称号

༡ གཉའ་ཁྲི་བཙན་པོ། ༼སྤྱི་ལོའི་སྔོན་གྱི་ལོ་༤༠༠---༣༠༠ཙམ༽

1:聂赤赞普(公元前400---300年)

༢ མུ་ཁྲི་བཙན་པོ།

2:木赤赞普

༣ དིང་ཁྲི་བཙན་པོ།

3:丁赤赞普



བརྗོད་གཞིའི་རིགས་བཀར་བ།:

བཀླཌ་ཐེངས།: 3067 | དེ་ལས་མང༌།...


 
ལྕགས་རྡོའི་སྙན་ངག་ལ་ཕྲན་དཔྱད་ཅིག་སྤེལ་ཁུལ་བྱས་པ།
24.02.2014 05:21:59

དངོས་མིང༌། རྡོ་རྗེ་ཕུན་ཚོགས། མིང་གཞན། ཨ་ཉོག ལྕགས་རྡོ་སོགས་སུ་འབོད། སྐྱེས་ཡུལ་བོད་ཁམས་ནང་ཆེན། ཆུང་དུས་བེའུ་ལུག་འཚོ་ཞོར་བོད་ཡིག་འབྲི་ཀློག་སྦྱངས། ༢༠༠༡ རྒྱ་གར་དུ་འབྱོར་ཏེ་རྫོང་སར་བཤད་གྲྭར་ཆོས་ཞུགས་ཀྱིས། གཙོ་བོ་ནང་ཆོས་ཀྱི་གཞུང་ཆེན་ཁག་ལ་ཐོས་བསམ་བྱས་ཤིང༌། ཞོར་དུ་སྙན་ངག་དང་སུམ་རྟགས་སོགས་ལའང་བློ་ཁ་ཕྱོགས།

བརྗོད་གཞིའི་རིགས་བཀར་བ།:

བཀླཌ་ཐེངས།: 1823 | དེ་ལས་མང༌།...


 
ཞི་ཅིན་ཕེན་གྱི་བུ་མོ་རང་ཡུལ་དུ་མི་ལོག་པའི་རྒྱུ་མཚན་ཅི།
16.02.2014 04:18:46

ལིས་ཁེ་ཧྥོ་ཡི་སྒེར་གྱི་དྲ་བ་ལས་བཤུས།     རྟ་ནག་སྐལ་བཟང་ལུང་རིགས་ཀྱིས་བསྒྱུརད།
ཞི་ཅིན་ཕེན་གྱི་བུ་མོ་ཧ་ཧྥུ་སློབ་གླིང་དུ་ཡོད། སྲིད་འཛིན་ཁོང་གིས་མོས་རང་རྒྱལ་དུ་སློབ་སྦྱོང་བྱས་ན་བསམ།  དེ་ལྟ་ནའང་མོ་རང་རྒྱལ་དུ་མི་ལོག་པའི་སེམས་ཐག་བཅད།  རྒྱུ་མཚན་ཅི།

མོས་བཤད་རྒྱུར།  ཧ་ཧྥུའུ་སློབ་ཆེན་དུ་རིན་ཐང་བླ་མེད་ཀྱི་གྱོན་ཆས་དང༌། རྩ་ཆེ་བའི་LVཨེལ་ཝེ་ཁུག་མ་དང་སྒེག་ཆོས་སོགས་མཐོང་རྒྱུ་མེད་ལ།  མིང་གྲགས་ཅན་གྱི་ལྭ་བ་གྱོན་མཁན་གྱི་སློབ་དཔོན་ཆེན་མོ་དང་སློབ་མ་ཡང་མཐོང་རྒྱུ་མེད།  དངོམ་ཆེ་བའི་རླངས་འཁོར་དག་གིས་མཛེས་མ་བསུ་མཁན་ཡང་མཐོང་རྒྱུ་མེད་དོ།།  མཐོང་ཡོང་བ་གཅིག་ནི་བྲེལ་བྲེལ་འཚབ་འཚུབ་ཀྱི་གོམ་སྟབས་དང༌། བློ་རྩེ་འགྱུར་མེད་ཀྱིས་འབྲི་བཞིན་པའི་ཆེས་ཐོག་མའི་མི་ཚེ་དེའོ།།

བརྗོད་གཞིའི་རིགས་བཀར་བ།:

བཀླཌ་ཐེངས།: 2094 | དེ་ལས་མང༌།...


  ཤོག་ངོས། 3 ནས། 4
| -