2010.03.03 21:39:05

ལི་ཐང་བློ་བསྟན།

༨༽དཀར་ནག་ཁྲ་གསུམ་མདུན་གྱི་ལམ་བུ་འཁྱོག།
བགྲོད་པ་དཀའ་བའི་བཀག་རྡོ་བང་དུ་བསྒྲིགས།།
འདེགས་པ་དཀའ་བའི་ཁུར་པོས་ཕྲག་ནས་མནན།།
རྔུལ་ཆུའི་ཐིགས་པས་ས་གཞིའི་གདོང་མདོག་བསྒྱུར།།

གྲགས་ཅན་ཉི་མའི་འོད་མདངས་རིང་དུ་བདས།།
མཚན་དགོན་ཟླ་བའི་ཞལ་རས་སྤྲིན་གྱིས་བསྒྲིབས།།
ཞོགས་པའི་སྐར་ཆེན་སྨུག་པའི་ཀློང་དུ་ཐིམ།།
འཇིག་རྟེན་འདི་ཡི་མཛེས་སྡུག་མུན་ལ་སྟེར།།

ས་གཞིའི་ཉལ་སྟེན་ཚེར་མའི་རྡུལ་གྱིས་ཁེངས།།
མིག་ཆུའི་ཐིགས་པ་ལི་ཆུའི་རླབས་དང་འདྲེས།།
མགོ་བོའི་སྐྲ་ལོ་བསིལ་བུ་རླུང་གིས་ཟད།།
བང་སོའི་རྣམ་གྲངས་རྒྱ་མཚོའི་བྱེ་མ་འདྲ།།

སྒོ་ཡི་ཐེམ་པ་བརྒལ་ན་གདོན་གྱིས་བཟུང་།།
ལ་མོ་འཕྲད་ཀྱིས་བཅད་ན་གཡང་ལ་ལྷུང་།།
མིག་ཟུང་ཧབ་ཏུ་བལྟས་ན་མུན་དུ་ཟག།
འཇིགས་རུང་འཁོར་བ་འདི་ལ་ཅིས་མི་སྐྲག།

སོག་རི་སྐྱ་མོའི་མགོ་བོ་སྤྲིན་གྱིས་བསྒྲིབས།།
ལི་ཆུ་སྔོན་པོའི་ལུས་ཟུངས་དར་གྱིས་མནན།།
སྡོང་རྒན་སྐམ་པོའི་རྩེ་མོ་ཆག་ལ་ཁད།།
ཚངས་ཆེན་རྒྱལ་པོའི་སྤྱན་གྱིས་འབུར་ཚུགས་གཟིགས།།

གླིང་སྐོར་རྒན་པོའི་མིག་ཟུང་མཆི་མས་ཁེངས།།
ཕྲེང་གོག་རྒྱུས་ཐག་ཆད་ནས་ས་ལ་འཐོར།།
ཁྲོམ་གཞུང་མི་ཚོགས་གདོང་མདོག་སྐྱོ་ལྷང་ལྷང་།།
འཚོང་སྒྲོམ་སྟེགས་བུའི་ཐལ་མདོག་སྐྱ་སིང་སིང་།།

ཐོགས་རྒོད་དམར་པོས་ཀླད་ཁྲག་གནམ་ལ་སྟེར།།
སེར་བ་དྲག་པོས་མགོ་བོ་ས་ལ་སྟིམ།།
བྱང་རླུང་ནག་པོས་མུན་པའི་གླིང་དུ་བསྐྱལ།།
གློ་སྙིང་གདབ་པའི་ཁྲག་དམར་ཁ་ནས་སྐྱུག།

རེ་བའི་གཞི་མ་མེ་ལྕེ་དམར་པོས་བསྲེགས།།
ཐལ་བ་འཇམ་པོ་ལི་ཆུའི་ཁ་ནང་བཏོར།།
བརྩེ་བའི་མིག་ཟུང་ཆུ་རྡུལ་ཕྲེང་བས་གང་།།
མགོ་བོ་གོས་ཀྱིས་གཏུམས་ཏེ་ངུ་འབོད་བྱས།།
ཕྱི་ལོ་༢༠༡༠ཟླ་༢ཚེས་༡༠ཉིན་ལི་ཐང་བློ་བསྟན་གྱིས་བྲིས།།

ཁུར་པོ།