ཤམ་བྷ་ལ་གང་ན་ཡོད་ཞེ་ན།

སྤྱིར་འཛམ་བུ་གླིང་འདིར་གནས་ཁྱད་པར་ཅན་ལྔ་ཡོད་པར་གྲགས། དབུས་སུ་གནས་མཆོག་རྡོ་རྗེ་གདན་དང་། ཤར་ཕྱོགས་སུ་རྗེ་བཙུན་འཇམ་པའི་དབྱངས་ཀྱི་ཞིང་རྒྱ་ནག་རི་བོ་རྩེ་ལྔ། ལྷོ་ཕྱོགས་སུ་འཕགས་པ་སྤྱན་རས་གཟིགས་དང་རྗེ་བཙུན་སྒྲོལ་མའི་ཞིང་རི་བོ་པོ་ཏཱ་ལ་དང་གཡུ་ལོ་བཀོད། ནུབ་ཕྱོགས་སུ་ཨོ་རྒྱན་མཁའ་འགྲོའི་གླིང་། བྱང་ཕྱོགས་སུ་ཤམ་བྷ་ལ་བཅས་རེད། རྒྱ་གར་གྱི་པཎ་གྲུབ་ཆེན་པོ་དུས་ཞབས་པ་སོགས་ཀྱིས་རྗེ་བཙུན་སྒྲོལ་མ་ཉམས་བཞེས་གནང་ཞིང་། ལྷག་པའི་ལྷ་ཡི་ཏང་ངེས་འཛིན་གྱི་ཐུན་མོང་མ་ཡིན་པའི་རྫུ་འཕྲུལ་དང་ནུས་པ་བསྒྲུབས་ཏེ་བྱང་ཕྱོགས་ཤམ་བྷ་ལར་དངོས་སུ་ཕེབས་ཏེ། རིག་ལྡན་གྱི་དྲུང་ནས་དུས་ཀྱི་འཁོར་ལོའི་དབང་ལུང་མན་ངག་དང་བཅས་པ་འཕགས་ཡུལ་ལ་གདན་འདྲེན་ཞུས་རྗེས། རྒྱུན་དེ་རིམ་གྱིས་བོད་དུ་དར་བ་རེད་ཟེར་བའི་ལོ་རྒྱུས་ཡོད། བོད་གངས་ཅན་ལྗོངས་སུ་ཡང་པཎ་ཆེན་དཔལ་ལྡན་ཡེ་ཤེས་ཀྱིས་མཚོན་པའི་སྐྱེས་བུ་དམ་པ་མང་པོ་རྫུ་འཕྲུལ་གྱི་བཀོད་པ་ལ་བརྟེན་ཏེ་བྱང་ཕྱོགས་ཤམ་བྷ་ལར་ཕེབས་པ་མ་ཟད། ལམ་ཡིག་ཅིག་ཀྱང་མཛད་ཡོད་པ་རེད། དུས་ཚོད་ཀྱི་ཆ་ནས་ཀྱང་། སྟོན་པས་དཔལ་ལྡན་འབྲས་སྤུངས་སུ་དུས་འཁོར་རྒྱུད་དང་པོ་གསུངས་སར་ཆེད་དུ་བཅར་བའི་འདུལ་བྱ་དེ་ཤམ་བྷ་ལའི་ཆོས་རྒྱལ་ཟླ་བ་བཟང་པོ་གཙོས་པའི་རྒྱལ་ཕྲན་ ༩༦ ཙམ་ཤམ་བྷ་ལ་ནས་ཚུར་ཕེབས་ཏེ་སྟོན་པའི་མདུན་ནས་དུས་འཁོར་རྒྱུད་ཞུས་པ་རེད། སྐབས་དེའི་རྒྱལ་བོ་ཟླ་བ་བཟང་པོ་ནས་རྩིས་པའི་ཆོས་རྒྱལ་བདུན་གྱི་བར་ཉམས་བཞེས་གནང་ཞིང་། རིག་ལྡན་དང་པོ་འཇམ་དཔལ་གྲགས་པ་ནས་ད་ལྟའི་བར་རིག་ལྡན་ཉེར་གསུམ་པར་བསླེབས་ཡོད། རྒྱལ་བོ་དེ་དག་མང་ཆེ་བ་ལོ་རྒྱ་ལྷག་ལ་རྒྱལ་སར་བཞུགས་པ་རྐྱང་རེད། ད་ལྟ་ང་ཚོས་སྨོན་ལམ་རྒྱག་ཡུལ་དེ་རིག་ལྡན་ཉེར་ལྔ་པ་དེ་རེད། མ་འོངས་པར་བྱང་ཕྱོགས་ཤམ་བྷ་ལ་རུ་རིག་ལྡན་དྲག་པོའི་འཁོར་ལོ་བསྐོར་ཏེ་ཀླ་ཀློའི་དཔུང་ཚོགས་བཅོམ་པ་རེད་ཟེར་བ་དེ་གང་འདྲ་ཞིག་ལ་ཟེར་ཞེ་ན། སྐབས་དེའི་དམག་འཁྲུག་དེ་ད་ལྟའི་འཛམ་གླིང་གི་དམག་འཁྲུག་ལྟ་བུ་ཞིག་ལ་ཡིད་ཆེས་བྱེད་ཀྱི་མེད། གང་ཡིན་ཟེར་ན། ཤམ་བྷ་ལའི་རིག་ལྡན་དྲག་པོའི་འཁོར་ལོས་བཅོམ་ཟེར་བ་དེ་ཕྱི་ལ་སྦྱར་རྒྱུ་དང་ནང་ལ་སྦྱར་རྒྱུ་སོགས་གསུངས་ཡོད། ནང་ལ་སྦྱར་རྒྱུ་དེ་གཟུགས་ཕུང་ནང་གི་རྩ་རླུང་ཐིག་ལེ་ལ་སྦྱོར་དགོས་སྟབས། དེང་གི་དམག་འཁྲུག་དེ་རྩ་རླུང་ཐིག་ལེ་ལ་སྦྱར་སྲོལ་མེད། རྫུ་འཕྲུལ་གྱི་བཀོད་པ་སྣ་ཚོགས་ཤིག་གི་ཐོག་ནས་བཏུལ་པར་མཛད་པ་ཞིག་ཡིན་པ་འདྲ། དཔེ་ན། བདག་ཅག་གི་སྟོན་པ་ཐོ་རངས་སངས་རྒྱས་པའི་སྔར་ནུབ་དེར་བདུད་དམག་བྱེ་བ་མང་པོ་བཏུལ་བའི་མཛད་པ་བསྟན་པ་རེད། ཙོང་ཁ་བས། “ མདའ་མཚོན་གོ་ཆ་མ་བཟུང་བར། །རང་ཉིད་གཅིག་པུས་བྱེ་བའི་བདུད། །མ་ལུས་ཕམ་མཛད་གཡུལ་འགྱེད་བས། །ཁྱོད་ལས་གཞན་པ་སུ་ཡིས་ནུས” ཞེས་གསུངས་པ་ལྟར་རེད།།


བརྗོད་གཞི་གཞན་ཁག་ལ་གཟིགས།