མི་གཞི་དུར་སློག་རྒྱག་པ།

__ ཉིས་སྟོང་བཅུ་ལོའི་ངའི་ང་རྒྱལ་གྱི་སྣེ་མོ་ཞིག

“མི་གཞི” སྤྱི་ཚོགས་ཀྱི་མ་རྐང་ལ་འཐིམས་དགོས་པའི་རེ་བཞག་ལྕི་མོ་ཞིག
“མི་གཞི”སྤྱིའི་བདེ་སྡུག་གི་དྲང་བདེན་ལ་འཁྱིལ་བའི་བླ་སྲོག་གསར་པ།
“མི་གཞི”མིའི་འཚོ་གནས་ལ་སྙིང་པོ་སྐྲུན་ས་དང་ཕུགས་འདུན་གྱི་མར་ཁུ་འཕྱུར་ས།

ཆེ་ས་འཛམ་གླིང་དང་ཆུང་བ་མི་ཚང་གི་བར་དུ་མེད་དུ་མི་རུང་བའི་རང་དབང་དང་འདྲ་མཉམ། ཡིད་རྟོན། འཕེལ་རྒྱས། འབྲེལ་འདྲིས་སོགས་ཀྱི་རྟེན་སའི་གཞི་རྩ་དང༌། བསམ་བློའི་སྙིང་སྟོབས་ཀྱི་མ་ལག་རང་འཁོར་བྱས་ཏེ་སྤྱི་ཚོགས་ཀྱི་བདེན་དཔང་ལ་འཇོན་ཐང་བེད་སྤྱོད་བྱེད་པ་ནི་མི་གཞི་ལ་བརྟེན་ནས་བྱུང་བ་དང༌།  མི་གཞི་གང་ལ་མངའ་བ་དེ་དག་ནི་རྙོག་འཛིངས་ཆེ་བའི་སྨུག་སྤྲིན་གྱི་ལམ་བུ་མི་ནོར་མཁན་དང༌། གང་དང་སུ་ཡིས་པགས་པ་མཉེད་མཉེད་བྱེད་མི་ཆོག་པར། རང་ཚུགས་རང་སྟོབས་ཀྱི་བདེན་ཁ་དེ་རུལ་སུངས་ཐུལ་བའི་ཁ་གཏད་དུ་བརྟན་པོར་ལངས་ཐུབ་མཁན། རིག་གནས་ཤན་ཤུགས་དང༌། ཆོས་ལུགས་ཤན་ཤུགས། ཡུལ་སྲོལ་ཤན་ཤུགས་སོགས་རང་ཉིད་ཀྱི་མགོ་མཇུག་དང་དོན་ལྔ་སྣོད་དྲུག་གི་འགུལ་སྐྱོད་ལ་གཤགས་བཅོས་བཏང་སྟེ། དྲི་མེད་གཙང་བོ་ཞིག་གི་འཁྲུས་ཁང་ཉར་ཞིང༌། དུས་རྒྱུན་ཀྱི་ཁ་ལག་གི་འགུལ་སྐྱོད་ཡོད་ཚད་བསམ་བློའི་གོ་སྒྲིག་ལྟར་བསྐྱོད་ཐུབ་ཚེ་དེ་ནི་མི་གཞིའི་ཚད་ཐིག་ཏུ་སླེབས་ཡོད་པར་སེམས།

མི་གཞི་ལ་བསམ་བློའི་མ་རྐང་དགོས་པ་མ་ཟད། རང་གཤིས་ཀྱི་རུས་པ་ཡང་མཁྲེགས་དགོས། མིའི་འཚོལ་སྙེག་ལ་འཐིམས་པའི་མི་གཞི་གསོན་པོ་དེས། སྤྱི་ཚོགས་ཀྱི་ནག་ཉེས་ལ་བསྔོག་འདོན་བྱེད་ཐུབ། རང་ཚུགས་དང་སྙིང་སྟོབས་ནི་མི་གཞིའི་ཆ་རྐྱེན་མེད་བརླག་ཏུ་གཏོང་མི་ཉན་པ་དེ་ཡིན་པས། མི་གཞི་ནི་ངེད་ཅག་གི་གཟུགས་ཀོག་མིན་པར།  དེ་ནི་ཕྱི་ནང་ཉིས་ཆར་ཁྱབ་པའི་སྟོབས་ཤུགས་ཀྱི་མ་ལག་ཆེན་པོ་ཞིག་ཡིན།

མི་གཞི་ནི་ང་ཚོའི་འཚོ་བའི་དགོས་འདུན་ཁྲོད་ནས་མི་ཞིག་གི་རྒྱུ་སྤུས་ལ་དབྱེ་འབྱེད་བྱེད་སྤྱད་ཅིག་དང༌།  འདིའི་སྟེང་ནས་ད་གཟོད་མི་ཞིག་གི་ཉིན་རེའི་འཚོ་བ་སྐྱེལ་སྟངས་དང་དེ་ལ་ཀུན་གྱིས་གདེང་འཇོག་ག་ཚོད་ཅིག་བྱེད་མིན་མཚོན་ཐུབ། བློ་གཏད་སེམས་བདེ་ནི་མང་ཚོགས་ཀྱི་ཕུགས་རེ་ཡིན་པས་དེའི་གདེང་འཇོག་གི་གར་སྟེགས་ནི་མི་གཞི་ལས་གྲུབ་དགོས། དེ་ནི་སྤྱི་ཚོགས་ནང་གི་གདན་ཐོབ་ངེས་ཅན་ཞིག་དང་གཤིས་འཇོན་གཉིས་ལྡན་གྱི་གསེར་ནག་སྟེ། མཐོ་དམའ་དང་ཁེ་གྲགས། དབང་ཤུགས། མཆོག་དམན། དབུལ་ཕྱུག་བཅས་ཀྱིས་མ་བརྫིས་པ་ཞིག

མི་གཞི་མེད་ན་མི་བོར་གཏོར་འབྱུང་ངེས་ལ། ཚིག་མཚོན་གང་ཡིན་གྱིས་ཕུག་ཆོག་ཆོག་ཅིག་དང༌། རླུང་བུ་གང་གཡུགས་ཀྱིས་ཁུར་ཆོག་ཆོག་ཅིག་ཏུ་འགྱུར་པར་མ་ཟད། དགའ་སྤྲོའི་མཆོངས་སྐྱོད་ཀྱིས་སེམས་ཀྱི་རྐང་ཚུགས་ཕུད་སླ་ཞིང་སྡུག་ཕམ་གྱི་དོང་ཟབ་ནས་གཏན་དུ་རྨི་ལམ་འཁྲུག་པར་འགྱུར། མི་ཞིག་ཡིན་ན་མི་གཞི་འཚོལ་དགོས་པ་མ་ཟད། ཡ་མ་བརླ་དང་ར་མ་ལུག་གི་ངན་གཤིས་ལ་གདོང་གཏད་བཅག་ཏེ། ལེ་ལོ་སྒྱིད་ལུག་དང་ཕྱི་བཤོལ་མེད་པར་མིའི་སྤྱི་ཚོགས་ཀྱི་བདེན་ཁའི་སོན་རྩར་བསྙེག་དགོས་ལ།  སྤྱི་ཚོགས་ཀྱི་དངོས་ཡོད་དང་བསྟུན་ཏེ་དྲང་བདེན་ཞེས་པ་འདིའི་ལྷུ་ལག་སྒྲིག་དགོས།

རྒྱུས་ལོན་གྱི་ཕྲ་མཐོང་ཆེ་ཤེལ་ལས་མིས་མི་ལ་གདེང་འཇོག་བྱེད་ཐུབ་པའི་ཡིད་ཆེས་རྙེད་པ་དེ་ཡང་མི་ཞིག་གི་གཞི་རྩའི་མ་ལག་གཙོ་བོ་ཕྱིའི་བྱ་སྤྱོད་དང་ནང་གི་བསམ་སྤྱོད་ལ་གཡོ་རྫུན་ཁྲམ་གསུམ་གྱི་ནད་འབུ་ཞུགས་ཡོད་མེད་དང་རག་ལས། ཤེས་ཡོན་ནི་མི་གཞིའི་སྟེང་ནས་གྲུབ་ཅིང་སྤྱི་ཚོགས་དང་མཉམ་དུ་མདུན་བསྐྱོད་བྱེད་ངེས། སྤྱི་དམངས་དང་མཉམ་སྐྱོད་བྱེད་ཐུབ་ན་མི་གཞི་ཡིན་ལ། སྤྱི་དམངས་ཀྱི་གད་སྙིགས་སུ་དབོར་ཡོད་ན། ད་གཟོད་སྟག་འབུམ་རྒྱལ་གྱི་ལས་མི་གཤིས་ཀྱི་ཕྱེད་ཀ་ཁྱི་གཤིས་ཡིན་ཞེས་པ་དང་ཀུན་ནས་འདྲ། མི་གཞི་ནི་སྙིང་སྟོབས་ཤིག་ཡིན་ལ། ཕུགས་མདུན་ཞིག་ཀྱང་ཡིན། ད་དུང་རེ་བ་ཞིག་རཱ་ཡིན་ངེས།

སྤྱི་ཚོགས་ཀྱིས་མི་འཇོན་ཐང་ཅན་དང་གདོང་སྟོན་དགོས་ལ། ཤེས་ཡོན་ཅན་གྱིས་རང་ཉིད་ལ་མི་གཞི་སྐྲུན་དགོས་པ་དང་མཉམ་དུ་སྤྱི་ཚོགས་ཀྱི་དགོས་མཁོ་ལ་ཡིད་ཚིམ་པའི་ཞབས་བྲོ་རྒྱག་དགོས། མི་གཞི་མེད་ན་ཉམས་མྱོང་ཡོད་པས་ཅི་ལ་ཕན། དེ་ནི་མིས་དམོད་ཟོར་གཏོང་ཡུལ་གྱི་བརྗོད་བྱང་ཙམ་ཡིན། མི་གཞི་མེད་ན་ཤེས་ཡོན་ཡོད་པས་ཅི་ལ་ཕན། དེ་ནི་མིའི་བླ་འཚོང་དུ་ངེས་བཟུང་ཆོག ད་རུང་ཁ་བདེ་དང་ལྕེ་བདེ། སྙན་ངག་མཁན། རི་མོ་མཁན། སྒྲུང་བ། དཔྱད་བརྗོད་མཁན་ཚང་མར་མི་གཞི་མེད་ན་དོན་སྟོང་ཁ་སྟོང་གི་ལག་གཡུག་ཙམ་དུ་འགྱུར་བས། ངེད་ཚང་གི་མཁས་པ་ཚོས་ཀྱང་མི་གཞི་འཚོལ་སྟངས་ལ་ལམ་ཁ་བསྟན་ཏེ་མི་གཞིའི་ལམ་ཡིག་གི་ཁ་གསབ་ཅིག་ངེད་བོད་ཕྲུག་ཚོར་སྤྲད་ན་ཅིས་མི་ཆོག

དེ་ལས་མེད་པ་ཡོད་པར་བསྒྲུབ་མཁན་གྱི་རི་བོང་རྭ་རྩོད་མཁན་གྱི་ཁོམ་དལ་ཅན་དག་གིས་ངེད་མིའི་སྤྱི་ཚོགས་སུ་དགོས་མཁོ་ཆེ་བའི་མི་གཞིའི་ལམ་སྟོན་བྱེད་རོགས། དགེ་བཤེས་ཀྱི་ཐོབ་ཐང་དང་སློབ་མའི་ལག་ཁྱེར་གྱིས་མིའི་སྤྱི་ཚོགས་ལ་བརྡབ་གསིག་དང་ཉེན་ཁ་འབྱུང་གིན་འདུག སྤྱི་ཚོགས་དང་ཧེ་བག་ཆེ་བའི་ཤེས་ཡོན་པའི་སྡེ་ཞིག་གིས་མི་གཞི་ཡོད་མདོག་དང་རང་ཚུགས་བརྟན་བསམ་སྟེ། ཁོ་ཚོས་ཁོ་ཚོའི་ནང་ངམ་ཡང་ན་ཁོར་ཡུག་ཆུང་ཆུང་ཞིག་ཏུ། གཅིག་གིས་གཅིག་ལ་རྒྱབ་སྐྱོར་དང༌། གཅིག་གིས་གཅིག་ལ་རྒྱལ་ཕམ་མཐར་སྐྱེལ་བྱེད་ཀྱིན་འདུག འདི་མཐོང་ན། ངས་ངེད་ཅག་གི་ཤེས་ཡོན་པའི་ནང་དུ་མི་གཞི་ཅན་འཚོལ་དཀའ་བར་འདུག་ཅེས་བརྗོད་ཐུབ་ངེས་ཞེས་ངེད་ཚང་གི་ཤེས་ཡོན་པས་རང་རང་གིས་རང་ཚོར་འཕྲོད་པའི་གཏམ་རྙོག་གི་རྩེད་ཆས་ཤིག་བཟོ་གི་འདུག

༢༠༡༠ལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།