བོད་གཞུང་གི་མིང་ལས་དོན་གྱི་བྱ་བ་གལ་ཆེ།

བོད་གཞུང་གི་མིང་བརྗེ་བ་འདི་ནི། དབུ་མའི་ལམ་གྱི་སྲིད་ཇུས་ལ་ཐུག་པ་མ་ཡིན་པར། གཙོ་ཆེར་གནས་ཡུལ་གྱི་རྒྱ་གར་གྱི་སྲིད་ཇུས་ལ་ཐུག་པ་སྟེ། དེའང་སྔོན་མར་སྲིད་བློན་ནེ་རུ་མཆོག་ལ་༸གོང་ས་སྐྱབས་མགོན་ཆེན་པོས་བོད་ཀྱི་གཞུང་མི་འཛུགས་རྒྱུའི་ཞལ་བཞེས་གནང་ཡོད་པའི་རྒྱུ་མཚན་གྱིས་ཡིན་རབས་གོ་རྒྱུ་འདུག་པས། དེའི་སྐོར་ལ་བསམ་གཞིགས་དང་བརྟག་དཔྱད་གནང་དགོས་པ་ཞིག་རེད།
དེའང་གནས་ཡུལ་རྒྱ་གར་དུ་བོད་གཞུང་འཛུགས་མི་ཆོག་པའི་རྒྱུ་མཚན་ནི། རྒྱལ་སྤྱིའི་འགྲོ་ལུགས་ལ་ཡུལ་གང་ཞིག་ཏུ་བཙན་བྱོལ་དུ་སླེབས་ནས་གཞུང་བཙུགས་པའི་རྗེས་སུ་དུས་ཡུན་གང་འཚམས་ཕྱིན་རྗེས་གཞུང་དེ་ཚད་ལྡན་གྱི་གཞུང་ཞིག་དང་གནས་ཡུལ་མགྲོན་བདག་གིས་ཀྱང་དབང་སྒྱུར་མི་ཆོག་པའི་རང་དབང་ཡོད་རབས་འདུག་པས། ཨི་ཟི་རིལ་དང་པེ་ལི་སི་ཋན་གཉིས་ཀྱི་ལོ་རྒྱུས་ལྟ་བུ་ཡིན་ཚུལ་གོ་རྒྱུ་འདུག
མ་ཟད། ༸གོང་ས་མཆོག་གི་བཀའ་སློབ་སྔ་ཕྱི་དང་། ཉེ་ཆ་རང་བོད་གཞུང་བཙུགས་ན་མ་འོངས་པར་སུས་འགན་ཐུབ་མི་ཐུབ་སྐོར་ལ་བཀའ་སློབ་ཕེབས་པ་སོགས་ལས་ཀྱང་གསལ་བ་ཡིན་ཏེ། གནས་ཡུལ་རྒྱ་གར་གཞུང་གིས་གལ་ཏེ་གྲོས་ཚོགས་ཚོགས་བཞིན་པའི་སྐབས་སུ་ཁྱོད་ཚོས་གྲོས་ཚོགས་སྒོ་རྒྱོབ་ཟེར་ན། དེ་དུས་སུས་བྱ་བ་གང་བྱ་རྒྱུ་ཡིན་པ་དང་། ང་ཚོ་ལ་གྲོས་ཚོགས་དང་གཞུང་འཛུགས་ཆོག་པའི་དམིགས་བསལ་དང་ཆོག་མཆན་ཁྲིམས་མཐུན་ཡིན་རབས་ཇི་ལྟར་བཤད་རྒྱུ་ཡིན་པ་སོགས་ཀྱི་བསམ་བློ་དང་། འཆར་འགོད། གྲ་སྒྲིག་བཅས་ད་ལྟ་ནས་བྱ་དགོས་པ་རེད།
དེ་མ་གཏོགས་རང་སྣང་ཤིན་ཏུ་དག་ནས་བསྡད་ན་ནི། སྔར་ ༡༩༥༩ ལོར་བོད་ས་ཤོར་སྐབས་༸གོང་ས་སྐྱབས་མགོན་ཆེན་པོ་མ་ཕེབས་གོང་རྒྱ་གར་དུ་སྔོན་ནས་གཞིས་ཆགས་པ་བོད་པ་ཡོངས་རྫོགས་ས་མཚམས་བར་ཕྱིར་བསྐྲད་བྱས་པའི་ལོ་རྒྱུས་དང་འདྲ་བ་ཞིག་འོང་མི་སྲིད་པ་མ་རེད་ལ། དེ་དུས་གྲ་སྒྲིག་དང་འཆར་གཞི་གང་ཡོད་ད་ལྟ་ནས་བསམ་བློ་གཏོང་གི་ཨེ་ཡོད།
ལར་ནས་རང་རེའི་གཞུང་འདི་ལ་མིང་ཙམ་མ་གཏོགས་དོན་གྱིས་བཀའ་ཤག་དང་སྤྱི་འཐུས་སོགས་ཡོངས་རྫོགས་་སྔ་ལྟར་ཡོད་པ་དང་ལས་ཀའང་མུ་མཐུད་ནས་འགྲོ་བ་འདིས་ཅི་ཞིག་མཚོན་གྱི་ཡོད་མེད་ལའང་དགོངས་པ་ཞིག་བཞེས་དགོས་པ་མ་རེད་དམ།
དེའི་ཕྱིར་ང་ཚོས་མིང་ལ་རྩོད་གླེང་བྱེད་པ་ལས་དོན་ལ་ལས་དོན་སྒྲུབ་ཕྱོགས་ཐད་འཆར་གཞི་དང་ཇུས་འགོད་མང་ཙམ་གྱི་བགྲོ་གླེང་བྱེད་ན་ཡག་པོ་མི་འདུག་གམ།
ལས་དོན་ཚགས་ཚུད་འོང་ཕྱིན་ཆད་མིང་ཙམ་བསྒྱུར་བ་ནི་སླ་བའི་གནད་དོན་ཞིག་རེད།
༢༠༡༡།༥།༣༡

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།