དངུལ་དམར་ལས་གྲུབ་པའི་འཇིག་རྟེན།

b16445
ཕ་བླ་མར་དད་པའི་ཆོས་སེམས་ཤིག་ཡོད་ཅིང་། །
ལམ་སྒོམ་སྒྲུབ་འཇུག་ལ་སྙིང་སྟོབས་དེ་ཆེ་ཡང་། །

སྐྱབས་དད་རྗས་འབུལ་བའི་དངུལ་དམར་དེ་མེད་ན། །

རྗེ་བླ་མ་ཟེར་ན་འཇའ་མཚོན་ལྟར་མིན་འགྲོ། །
རྟེན་མི་ལུས་གནང་བའི་ཡབ་ཡུམ་གྱི་སྐུ་དྲིན། །
སེམས་བསམ་པའི་དབུས་ནས་འཇལ་འདོད་དེ་ཡོད་ཀྱང་། །
དྲིན་གསོ་བར་རིན་ཆེན་དངུལ་དམར་དེ་མེད་ན། །
བུ་རིགས་བཟང་ཟེར་ན་ཚིག་སྐམ་རང་མིན་འགྲོ། །
གཉེན་སྤུན་མཆེད་སྟོང་གི་འཁོར་དཀྱིལ་དུ་གནས་ཤིང་། །
གྲོགས་ཕོ་མོ་ཁྲི་ཡིས་ཕྱོགས་བཞི་རུ་བསྐོར་ཡང་། །
ཐུགས་འདོད་དོན་སྐང་བའི་དངུལ་དམར་དེ་མེད་ན། །
བུ་ཕོ་རབ་ཟེར་ཡང་ལབ་སྲོལ་ཙམ་མིན་འགྲོ། །
ལས་བཙན་པོའི་དབང་གིས་ཚེ་ཐོག་འདིར་ཐུག་ནས། །
སྙིང་དམར་པོ་དགའ་བའི་མཚོན་རྟགས་སུ་འཕུལ་ཡང་། །
ལུས་རྒྱན་ཆ་ཉོ་བའི་དངུལ་དམར་དེ་མེད་ན། །
རྟེན་འདུན་མ་ཟེར་ཡང་གནས་སྐབས་རང་མིན་འགྲོ། །
རྟེན་དལ་འབྱོར་མི་ལུས་རིན་ཆེན་དུ་བརྩི་ཞིང་། །
རྐུན་གཡོ་ཁྲམ་མེད་ན་རྒྱུད་བཟང་ཞིག་འདོད་ཀྱང་། །
རང་ཁ་ཕོ་གསོ་བའི་དངུལ་དམར་དེ་མེད་ན། །
ཁྱི་རྒྱ་བོ་ཞིག་གི་མཚུངས་ཟླ་རང་མིན་འགྲོ། །

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།