རང་དོན་དམ་པ།

འདོད་འབྱུང་ནོར་བུའི་ལྷ་སྒྲུང་ཞིག་བཙལ་བས།།
རྒྱ་མཚོའི་དེད་དཔོན་ཆུ་སྲིན་གྱིས་མིད་སོང་།།
ཤ་བའི་གླིད་བུ་གསེར་ཕྱེ་ཡིས་བཀང་དུས།།
པཎ་གྲུབ་ཕེབས་ལམ་བོད་ཡུལ་དུ་ཟུག་འདུག།
༼ནང་ཁུལ་སྤུན་ཟླའི་རྩོད་རྙོག་ཙམ་བསལ་བར།།
མཐའ་མི་ཧོར་སོག་གཤེད་མ་རུ་བོས་འདུག།༽
རི་འཛེགས་ཟིན་ཐོའི་མཚན་སྙན་ལ་བརྔམས་ཏེ།།
དབུ་སེར་དབུ་ནག་འཁྱགས་རེངས་སུ་ཤོར་སོང་།།
ཕྱི་རྒྱལ་མི་རིགས་ནང་ཆོས་ལ་དད་དུས།།
རིན་པོ་ཆེ་ཡིས་འཛམ་གླིང་འདི་བཀབ་སོང་།།
ཚོགས་སྡེ་ཆོས་སྡེའི་ཡོང་ཁུངས་དེ་གཟིགས་དུས།།
གྲྭ་ཚང་དགོན་སྡེ་གང་ས་རུ་བཞེངས་འདུག།
སྔོན་ཐོན་གསར་བརྗེའི་བསྟོད་བསྔགས་ལ་བསམ་སྟེ།།
རང་རིགས་སྤུན་ཟླ་འདམ་བུ་ལྟར་བཅོམ་སོང་།།
གནའ་ཤུལ་རྟེན་རྙིང་རིན་ཐང་གིས་ཕྱུག་དུས།།
སྐྱབས་གནས་མཆོག་གསུམ་ཤོག་སྒོར་དང་བརྗེས་འདུག།
ཨོ་སུ་ཀྲོ་ལིའི་གཞིས་ཆགས་ལ་དམིགས་ཏེ།།
བོད་དོན་བྱས་པའི་བདེན་དཔང་དག་འཚོལ་གྱི།།
ཐོངས་མཆན་ཐོབ་པའི་དགེ་མཚན་དག་གཟིགས་དུས།།
ཁྱིམ་པ་ཕོ་མོས་བཙུན་གཟུགས་ཀྱང་འཁྲབ་ཀྱི།།
ཨ་རིར་གཞིས་འཕོའི་དྲན་གདུང་གི་འོག་ནས།།
དམིགས་བསལ་ལས་འགུལ་ག་ཤེད་ནས་སྤེལ་སོང་།།
འགྲོ་བ་མི་ཡི་རང་གཤིས་ལ་གཟིགས་དང་།།
རང་དོན་ཁོ་ནས་བདེན་གྲུབ་ཏུ་བཞེངས་འདུག།
བླ་མས་གདམས་ཟབ་ནོར་ལྡན་ལ་གནང་སོང་།།
དཔོན་པོས་གཟིགས་སྐྱོང་ཕྱུག་པོ་ལ་གནང་སོང་།།
བུ་ཕྲུག་གཉོར་སྐྱོང་དྲིན་ལན་རེ་འདུག།
ཕ་མར་གུས་ཚུལ་ཤུལ་འཛིན་དུ་དམིགས་འདུག།
དགའ་ཉེ་མཛའ་བརྩེ་རྒྱུ་ནོར་ལ་རག་ལས།།
ཁྱིམ་མཚེས་བྱམས་སྡང་དབུལ་ཕྱུག་ལ་ལྟོས་འདུག།
ལྷ་ཆོས་དགེ་བ་ཕྱི་མ་ཡི་རང་དོན།།
མི་ཆོས་མཁས་མཛངས་ད་གང་འདིའི་རང་དོན།།
གཞན་དོན་ལྷག་བསམ་ཞེ་ཕུག་གི་རང་དོན།།
ང་གསོན་ཁྱོད་ཤི་ཁ་ཐད་ཀྱི་རང་དོན།།
མདོར་ན་ཡོད་ཚད་རང་དོན་འདིའི་ཆེད་དུ།།
ཐོབ་ཤོར་རྩོད་པས་མི་ཡུལ་འདི་དཀྲུགས་ནས།།
གོང་མ་ལྷ་ཡང་མགོ་ཡོར་གྱིས་བཟི་འདུག།
ཀྱེ་མ་དབེན་པའི་སྤང་ལྗོངས་ལ་གཟིགས་དང་།།
རྒྱབ་ལྗོངས་མེད་པའི་བརྩེ་དུང་གི་འཚོ་བའི།།
རི་དྭགས་མ་བའི་མཛའ་བཅུགས་ལ་ལྟོས་དང་།།
བྱོལ་སོང་ཞེས་པའི་ངན་མིང་གིས་སྨོད་ཀྱང་།།
ང་ཚོ་མི་ལ་ངོ་ཚ་ཞིག་སྟེར་གྱི།།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།