ངའི་གྲོགས་མོས་བྲིས་པའི་དབྱིན་བོད་དམག་འཁྲུག་གླེང་བ་ཞེས་པ།

གཉིས། སྐབས་དེའི་བོད་ཀྱི་གནས་བབ་ལ་ལྟ་བ། དེ་ཡང་རྒྱ་གར་གཞུང་འཛིན་དབྱིན་ཇིས་བོད་ཐོག་དམག་མ་དྲངས་གོང་ཙམ་ན་བོད་སྤྱིའི་གནས་བབ་ནི་ཧ་ཅང་ཉག་ཕྲ་ཞིང། ཆབ་སྲིད། རིག་གནས། དཔལ་འབྱོར་སོགས་གང་ཅིའི་ཐད་གནས་སྟངས་ཛ་དྲག་ཅིག་ཏུ་གྱུར་ཡོད། སྐབས་དེའི་སྤྱི་ཚོགས་ནང་རྨོངས་དད་དང། མཁྲེགས་འཛིན་གྱི་བསམ་བློས་ལེགས་ཉེས་དབྱེ་འབྱེད་ཀྱི་ཤེས་རབ་དེ་བསྒྲིབས་ནས་ཡོད་པ་སོང་། དུས་རབས་དང་མཐུན་པའི་གོམ་པ་རྒྱག་རྒྱུ་ཕར་བཞག་རྒྱལ་ཁབ་གཞན་དང་འབྲེལ་བ་གཏན་ནས་བྱེད་ཀྱི་མེད་པས་རང་གི་རིག་གནས་རྒྱལ་ཁབ་གཞན་ལ་སྤེལ་རྒྱུ་དང།

གཞན་གྱི་རིག་གནས་བོད་དུ་ཚུར་ནང་འདྲེན་བྱ་རྒྱུ་ནི་གཉི་ག་ཆེས་ཐ་ཤལ་གྱི་ལས་སུ་ངོས་འཛིན་གནང་ཡོད། དེ་ནི་གཞན་གྱི་ཆོས་ལུགས་དང་རིག་གནས་སོགས་ནང་འདྲེན་བྱས་ན་རང་ཉིད་ཀྱི་བླ་ན་མེད་པའི་རིག་གཞུང་དང་ཆོས་ལུགས་རྩ་བརླག་ཏུ་འགྲོ་རྒྱུའི་ཉེན་ཁ་ལྟ་བུར་བརྩིས་ནས་རྨོངས་དད་ཀྱི་གཏམ་ཁོ་ན་བཤད་ཀྱི་ཡོད། དེའི་ཚུལ་སྲིད་དོན་རྒྱལ་རབས་ལས། “ཕ་མས་བུ་ཕྲུག་ལ་རྒྱ་གར་ནས་ཐོན་པའི་ཁྲུས་རྫས་བེད་སྤྱོད་བྱེད་པ་དང་མངར་ཆ་བྱི་རིལ་བཟས་ན་ཕྱི་རྒྱལ་གྱི་ལྟ་བ་འཇགས་ཏེ་ཆོས་ལ་སྐྱོན་བྱེད་ཚུལ་ཤོད་སྲོལ་ཞིག་བྱུང་བ་རེད།” ཅེས་འབྱུང་བ་དང་དེ་ཙམ་མ་ཟད་ནང་ཁུལ་ཆབ་སྲིད་ཐད་རྙོག་དྲ་མང་དག་ཅིག་ཀྱང་ཡོད་པ་ནི། གཞུང་གི་གོ་གནས་འཛིན་པའི་ལས་ཀྱི་སྣེ་མོ་བ་ཚོའི་ནང་ཕན་ཚུན་ལའང་གོ་གནས་ཐོབ་རྩོད་ཀྱིས་རྙོག་འཛིངས་མང་པོ་བྱུང་ཡོད་༸རྒྱལ་དབང་སྐུ་ཕྲེང་བརྒྱད་པའི་སྐབས་ར་བཤད་དོན་རྐྱེན་ལྷག་པ་དེའང་ཆབ་སྲིད་དང་ལས་གནས་ཀྱི་ཐོག་ནས་བྱུང་བ་དང། ལྷག་པར་སྐུ་ཕྲེང་བརྒྱད་པ་དང་། དགུ་པ། བཅུ་པ། བཅུ་གཅིག་པ་སོགས་སྐུ་ཡུན་རིང་འཚོ་བཞུགས་མ་བྱུང་བ་ཡང་རྒྱལ་ཚབ་གཙོས་པའི་བོད་ཞིང་བྲན་གྱི་བདག་པོ་ཚོས་ངན་བྱས་ལས་བྱུང་བ་རེད་ཅེས་དེང་རབས་ཀྱི་ལོ་རྒྱུས་སྨྲ་བ་ཚོས་གླེང་བཞིན་ཡོད་པ་དང། ༸གོང་ས་བཅུ་གསུམ་པ་ཆེན་པོ་མཆོག་ལ་དེ་མོ་རྒྱལ་ཚབ་ངག་དབང་བློ་བཟང་འཕྲིན་ལས་རབ་རྒྱས་ནས་མཐུ་གཏད་བྱས་པ་དངོས་བདེན་ཡིན་པ་སོགས་ལ་བསམས་ན་སྐབས་དེར་རྒྱལ་བའི་སྐུ་ལ་བསྡོ་བ་ལ་ཡང་ཡ་ང་བག་ཚ་མེད་པའི་བོད་ཞིང་བྲན་གྱི་བདག་པོ་ཆེན་པོ་ཡོད་པ་ནི་སྨྲོས་མེད་རེད།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།