བླ་རྒན་ང་ཡི་སེམས་ངོགས་ཀྱི་དགའ་མ།།

Kissརང་བཞིན་དབེན་ཡང་སྟོང་པའི་ངང་ལས་ལྷག་པའི་ལྷ་ཡི་རྣམ་རོལ་མ།།
སྲིད་ལས་བྲལ་ཡང་འབྱུང་བཞིའི་ས་བོན་བྃ་ཡིག་ལས་འཁྲུངས་འཕགས་མཆོག་མ།།
ཆགས་པ་སྤངས་ཀྱང་ཆགས་པའི་ཉམས་ཀྱིས་སྐུ་ལུས་དམར་མདངས་ཤིན་དུ་རྒྱས།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་མཛེས།།
Kiss
བྱམས་པས་བརླན་ཡང་ཡེ་ཤེས་མེ་ཡིས་ནག་པོའི་རྩ་ལག་བསྲེགས་མཛད་མ།།
སྡང་སེམས་མེད་ཀྱང་མ་རུང་དགྲ་ལ་ནས་འབྲུའི་མཆེ་བ་ཀུན་དུ་བརྩིགས།།
ཁྲོ་སེམས་དབེན་ཡང་ཁྲོ་གཉེར་སྨིན་མ་མཚམས་སུ་བསྡུས་པའི་ཁྲོ་མོ་ཁྱེད།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་མཛེས།།
Kiss
སྤྲོས་བྲལ་ངེས་ཀྱང་ཁྱེད་ཀྱི་སྐུ་ལུས་རུས་པའི་རྒྱན་གྱིས་སྤྲོས་མཛད་མ།།
སྲེད་ལས་གྲོལ་ཡང་གཅེར་བུ་བཞེངས་ཏེ་སྲེད་བཅས་ཀུན་ལ་འདོད་ལམ་བསྟན།།
གནས་ཞེན་བྲལ་ཡང་དབུ་ནི་འཁྱོགས་ཏེ་མཁའ་སྤྱོད་ཞིང་ལ་རྒྱང་གཟིགས་མཛད།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་མཛེས།།
Kiss
ཁམས་ཟས་སྤངས་ཀྱང་ཕྱག་གཡས་ཐོད་པ་ཁྲག་གི་བསྐངས་ཏེ་གསོལ་མཛད་མ།།
མཚན་མ་བྲལ་ཡང་ཁ་ཊཾ་གཱ་ཡི་ཕྱག་མཚན་གཡོན་གྱི་གྲུ་མོར་མནམས།།
རྗེས་ཆགས་དབེན་ཡང་ན་རོ་པ་སོགས་རྣལ་འབྱོར་པ་རྣམས་རྗེས་སུ་བཟུང།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་ཙམ།།
Kiss
ཞི་ཉམས་ལྡན་ཡང་ཐོད་སྐམ་ལྔ་ཡི་དྲག་པོའི་དབུ་རྒྱན་འཆངས་མཛད་མ།།
འཚེ་བ་མེད་ཀྱང་ཚེ་སྲོག་བཅད་པའི་མི་མགོ་ལྔ་བཅུའི་དོ་ཤལ་ནི།།
མགུལ་རྒྱན་ཡིན་ཡང་ཕྲ་སྦོམ་བརླ་ཤའི་མཚམས་སུ་འཕྱངས་བའི་རྣལ་འབྱོར་མ།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་མཛེས།།
Kiss
བདུད་དཔུང་ཟ་ཡང་ཞབས་གཡོན་བསྐུམས་པས་མ་ལུས་འགྲོ་བ་འདྲེན་མཛད་མ།།
ལས་འབྲས་མཁྱེན་ཡང་ཞབས་གཡས་བརྐྱངས་པས་ངན་སོང་སྒོ་ནི་ཀུན་དུ་འགོག།།
འགྲོ་ལ་བརྩེ་ཡང་འཇིག་རྟེན་པ་ཡི་དྲེགས་ཚོགས་བརྐྱང་བསྐུམ་ཞབས་ཀྱི་གདན།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་མཛེས།།
Kiss
མ་བསྒྲུབས་ན་ཡང་མཆོག་མཐུན་དངོས་གྲུབ་བདེ་རླག་མྱུར་དུ་སྩོལ་མཛད་མ།།
མ་བསྒོམས་ན་ཡང་སྐལ་ལྡན་ཡིན་ན་ཐད་ཀར་མཁའ་སྤྱོད་ཞིང་ལ་འཁྲིད།།
མགྲོན་གཉེར་མིན་ཡང་སྒྲུབ་པ་པོ་རྣམས་བར་དོའི་འཕྲང་ན་བསུ་མཁས་ཁྱེད།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་ཙམ།།
Kiss
ངེས་པ་མེད་ཀྱང་རྒྱ་བལ་བོད་གསུམ་གནས་ཆེན་ཉེར་བཞི་བཀོད་མཛད་མ།།
དབང་ཕྱུག་རློམས་ཡང་དཔའ་བོ་དཔའ་མོ་ཉེར་བཞིི་གནས་ཀྱི་བདག་པོར་གྱུར།།
ནང་བསྟན་ཉམས་ཀྱང་དུས་ཀྱི་མཐའ་འདིར་ཁྱེད་ཀྱི་བསྟན་པ་དེ་བས་རྒྱས།།
རབ་ཏུ་བྱུང་ཡང་རྣལ་འབྱོར་ང་ཡི་སེམས་ངོགས་ལྷ་མོ་ཁྱེད་ཉིད་མཛེས།།
ཅེས་གུས་པ་ཉེ་སྔོན་རྣལ་འབྱོར་མའི་ལྷ་ཁང་དུ་གནས་སྐོར་ཕྱིན་སྐབས་ཀྱི་དྲན་ཐོ་ཡི་ཚུལ་དུ་བྲིས།
འདི་གར་དག་ཡིག་གི་དཔེ་དེབ་སོགས་མེད་སྟབས་ཚིག་སྐྱོན་འདྲ་བྱུང་ཡོད་ན་དགོངས་འགལ་མེད་པར་མཁྱེན།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:
བསམ་ཚུལ། (1)
1 ༠༤༢༠༡༨༠༨༣༦
རྣམ་གྲོལ་
གུས་འོས་པ་དང་དགའ་འོས་པའི་གནས་སུ་སྣང་བས་་བཀའ་དྲིན་ཆེ། ང་ཡང་རྣལ་འབྱོར་མའི་ཉམས་ལེན་་བྱ་མཁན་་ཞིག་མིང་སྐམ་པོ་ཞིག་ཡོད་པས་དེ་རིང་ངས་གོང་གི་རྩོམ་ཡིག་་དེར་དགའ་གུས་ཐོབ་སོང་།



བརྗོད་གཞི་གཞན་ཁག་ལ་གཟིགས།