༣༦༽ བཟའ་འཛིང་བར་གྱི་སྙན་ངག

༈ བཟའ་འཛིང་བར་གྱི་སྙན་ངག།
ཇོ་ཇོ་རྒྱ་མཚོའི་རྐང་བ་བརྡབ་སྐྱོན་བྱུང་ངམ།།
གོམ་སྟབས་འཆལ་མ་འཁྱོལ་གྱིས་ནང་ལ་ལོག་བྱུང་།།
ཨ་ཅག་མཚོ་མོའི་སེམས་ཆུང་སྨྱོས་པ་རེད་དམ།།
སྡིར་སྒྲ་སྣ་དགུའི་གསེབ་ནས་ངུ་འབོད་བྱས་བྱུང་།།
ཇོ་ཇོའི་རྐང་བ་གྲོགས་པོའི་ཆང་གིས་བཅག་འདུག།
ཐབ་ཆས་ཁ་ཤས་ཁང་ཆུང་སྦུགས་ནས་ཆགས་འདུག།
ཨ་ཅག་སེམས་པ་ཇོ་ཇོའི་མི་ཚེས་སྨྱོས་འདུག།
མིག་ཆུ་ཐིགས་པ་སྔས་འགོའི་འོག་ན་འཁྱིལ་འདུག།
ཇོ་ཇོའི་ནང་ལ་ཇག་པའི་དགྲ་བོ་སླེབས་སམ།།
ཀི་སྒྲ་ཤར་རེ་འཐབ་འཛིང་དྲག་པོ་བྱས་བྱུང་།།
ཨ་ཅག་མཚོ་མོ་ཇག་པས་ཁྲིད་པ་རེད་དམ།།
ཞེད་སྣང་ཞིག་གིས་ངུ་ཤར་འཐེན་བཞིན་བྲོས་བྱུང་།།

ཇོ་ཇོའི་ནང་ལ་སྙིང་སྡུག་བྱམས་པ་སླེབས་རེད།།
དཔུང་ཤེད་ཡོད་ཚད་ཁོ་མོའི་སྟེང་ལ་ངོམ་རེད།།
ཨ་ཅག་མཚོ་མོ་སྙིང་གི་ཁྱོ་བོས་ཁྲིད་རེད།།
ངུ་སྐད་ཤར་རེ་ཁོང་གི་འགྲམ་ནས་བྲོས་རེད།།

ཨ་ཅག་མཚོ་མོ་ཙི་ཙི་ཆུང་ཆུང་རེད་དམ།།
ཙི་ཙིའི་དུག་སྨན་ཁ་ལ་བཞག་ནས་ཟོས་སོང་།།
ཨ་ཇོ་རྒྱ་མཚོ་ཕོ་རྒོད་ངར་མ་རེད་དམ།།
ཆུང་མའི་སྐྲ་ལོ་སྦར་མོའི་ནང་ལ་ཁྱེར་འདུག།

ཇོ་ཇོས་ལག་པ་ཆང་གིས་དབང་ཡོད་གཏོང་སོང་།།
མ་བཅོས་སེམས་ན་མཚོ་མོའི་དཀྱིལ་འཁོར་བྲིས་འདུག།
ཨ་ཅག་མཚོ་མོ་ཙི་ཙི་ཆུང་ཆུང་མ་རེད།།
འུ་ཐུག་མེ་ཚེ་ཙི་ཙིའི་སྨན་ལ་བཅོལ་རེད།།

ཁང་ཆུང་དོག་པོ་ཟིང་འཁྲུག་སློང་ས་རེད་དམ།།
བདུན་ཕྲག་རེ་ལ་འུར་སྒྲ་ཆིལ་ལེ་ལུས་འདུག།
བུ་ཆུང་བསྟན་འཛིན་ཞེ་ནད་ཁྱེར་མཁན་རེད་དམ།།
ཕ་མའི་འགྲམ་ན་མིག་ཆུ་ཤར་རེ་ལྟས་འདུག།

རྡ་སའི་གླས་ཁང་གཞོང་ཚོང་མ་དང་ཆ་རེད།།
དངུལ་ལོ་བསྡུས་ནས་འཚང་ཁ་ཤར་རེ་བསྡད་ཡོད།།
བུ་ཆུང་སེམས་ལ་སྡུག་གི་རྒྱ་མཚོ་ལོས་འཁྱིལ།།
གཞན་གྱི་འགྲམ་ནས་ངོ་ཚས་གདོང་ལྤགས་ཤུས་སོང་།།

ཨ་ཅེ་མཚོ་མོ་གཡང་ས་ཞིག་ནས་རིལ་ལམ།།
སྔོ་ཐིག་ཆགས་ནས་སྨན་ཁང་ནང་དུ་ལུས་འདུག།
ཨ་ཇོ་རྒྱ་མཚོ་བྱི་མི་ཞིག་དང་འཛིངས་སམ།།
རྨ་ཤུལ་ཤར་རེ་ལས་དཀའ་བྱེད་མཁན་འབྱོར་བྱུང།།

མཚོ་མོའི་སྟེང་ལ་ཨ་ཇོའི་ལག་པ་རིལ་སོང་།།
གདོང་བའི་རྨ་རྗེས་སེམས་ཀྱི་དཀྱིལ་དུ་དོད་སོང་།།
རྒྱ་མཚོའི་གདོང་ལ་ཨ་ཅག་མཚོ་མོ་འཐམ་སོང་།།
སེན་རྗེས་རི་མོ་མི་ཚེའི་དྲན་རྟེན་ཉར་སོང་།།

རྒྱ་མཚོ་བཟའ་མིའི་གྱོད་གཞི་གང་ལ་ཐུག་འདུག།།
ཁྱོད་དང་ང་ཞེས་ལོག་ཁ་བྱེ་གྲབས་བྱས་བྱུང།།
སྡུག་གི་སེམས་པ་ལག་པའི་ནང་དུ་ཟག་ཀྱང་།།
བློ་ཁོག་མེད་ན་མི་ཚེའི་ཐག་གཅོད་ཐུབ་བམ།།

གྱོད་གཞིའི་རྩ་བ་ཨ་རག་ཁོག་ལ་སོང་འདུག།།
ཁ་སང་དགོང་མོ་དགོད་སྒྲ་ཆིལ་ལེ་བསྡད་འདུག།།
སྙིང་གཏམ་སྦྲང་རྩི་ཐར་རེ་ཐོར་རེ་ཤད་དུས།།
སེམས་ཀྱི་བུང་བ་ཡང་ཡང་དེ་ལ་འཁོར་སོང།།
ཕྱི་ལོ་ ༢༠༡༠་༦་༡༦། ཉིན་རྡ་ས་ནས་གསར་འགོད་པ་འཆམ་ར་བས།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།