ཉཱི་ཧོང་གི་རང་བྱུང་ལྷན་སྐྱེས་ཀྱི་ཀུ་ཤུ་འདེབས་མཁན་ཐོག་མ།

images/stories/japan.jpg

 

 

 

 

ཉཱི་ཧོང་གི་རང་བྱུང་ལྷན་སྐྱེས་ཀྱི་ཀུ་ཤུ་འདེབས་མཁན་ཐོག་མ།

The first person in Japan to cultivate natural apples

日本純天然栽培蘋果第一人

སྤྱིར་ན་ཤིང་ཏོག་རིགས་ལའང་འབུ་གསོད་བྱེད་སྨན་དང་རྫས་ལུད་སྤྱོད་དགོས་མོད། འོན་ཀྱང་རྫས་སྨན་མ་སྤྱོད་པར་རང་བྱུང་གིས་ཀུ་ཤུ་འདེབས་ལས་མཁན་རང་ལོ་ ༥༨ ལོན་པའི་ཉཱི་ཧོང་གི་ས་ཆ་ཨཱམ་མི་རི་ཧྥུ་ཅི་ས་གནས་སུ་ Aomori Hirosaki གནས་སྡོད་བྱེད་མཁན་ནམ་ཤིང་ཏོག་འདེབས་ལས་བྱེད་མཁན་ཀཱི་མི་ར་ Akira Kimura ཡིས་སྨན་དང་རྫས་ལུད་མ་སྤྱོད་པར་ཡ་མཚན་ཟེར་བའི་གྲུབ་འབྲས་ཐོན་པར་བརྟེན། ཁོང་ལ་ཀུ་ཤུའི་རྒྱལ་པོ་ཞེས་འབོད་ཅིང་། དེ་ནི་ཡ་མཚན་དངོས་བྱུང་ཞིག་ལ་བརྩི་སྲོལ་ཡོད་པ་རེད།

 

ཉཱི་ཧོང་གི་ཚགས་པར་ཞིག་ཏུ་སྐུ་ཞབས་ཀཱི་མི་རར་བཅའ་འདྲི་བྱེད་སྐབས་ཁོང་གི་དཀའ་སྡུག་ཡོངས་རྫོགས་སྐད་ཅིག་ནང་ཡལ་ཞིང་། གྲུབ་འབྲས་དེ་ནི་ཁོང་ལྷ་ཡུལ་དུ་སླེབས་པའི་དགའ་ཚོར་བྱུང་ཚུལ་གསུངས།

 

དེང་ཞིང་ཁར་སྨན་སྣ་དང་རྫས་ལུད་བེད་སྤྱོད་པ་དེ་ནི་རྒྱུན་སྲོལ་ཞིག་རེད། འོན་ཀྱང་ད་ཐེངས་ཀྱི་གྲུབ་འབྲས་དེ་ནི་ཡོང་མི་སྲིད་པ་ཞིག་ཡིན་ལ། སློབ་ཆེན་ཞིང་ལས་ཚན་རིག་ཁང་གི་སློབ་དཔོན་སཱོ་གྷི་ཡ་མཱོ་ཡི་ཆིས་ Sugiyama Shuichi  འདི་ནི་འཛམ་གླིང་ཡོངས་ལ་ཐེངས་དང་པོ་མིན་ཡང་དེ་ནི་ཧ་ལས་པ་ཞིག་ལ་ངས་ངོས་འཛིན་བྱེད་ཀྱི་ཡོད། དེ་ནི་རྒྱུན་སྲོལ་བཞིན་བགྱིས་པ་མིན་སྟབས་ཤེས་བྱའི་ཐོག་ནས་ཧ་ཅང་དོན་སྙིང་ལྡན་པ་ཞིག་རེད་ཅེས་གསུངས། ད་བར་ཞིང་ལུད་དང་སྨན་རྫས་མ་སྤྱོད་པའི་རིག་གནས་དེ་ལ་ད་དུང་ཡང་གསལ་ཁ་མེད། ཉཱི་ཧོང་གི་ཞིང་ལས་སྡེ་ཚན་དང་སློབ་ཆེན་གྱིས་ཀྱང་དེའི་སྐོར་ཞིབ་འཇུག་བྱེད་མུས་ཡིན།

 

 

གོང་མཚུངས་ཀུ་ཤུ་ཧ་ཅང་སྐྱེ་འཕེལ་བྱེད་ས་ནཱ་གྷ་ནོ་རྫོང་ Nagano  ལ་མཚོན་ནའང་ལུད་དང་སྨན་རྫས་ཚོད་འཛིན་གྱིས་སྤྱོད་སྟངས་ཀྱིས་ཞིང་པར་གདིང་འཇོག་བྱེད་སྟངས་ཀྱི་ལམ་ལུགས་གཏན་འབེབས་བཟོས་ཡོད། འོན་ཀྱང་གོང་གསལ་ཞིང་ས་ལྡུམ་རའི་འགན་འཛིན་གྱིས་ཀྱང་སྨན་དང་ལུད་བེད་སྤྱོད་རྩ་བ་ནས་མི་བྱེད་པར་ཧ་ཅང་དཀའ་ངལ་ཡོད་པ་ཞིག་རེད། ཡིན་ཡང་དེར་ཞིབ་འཇུག་གི་རིན་ཐང་ལྡན། དེ་བཞིན་གོང་དེར་ཐོན་སྐྱེད་ཧ་ཅང་མང་པོ་བསྐྲུན་མི་ཐུབ་པ་དང་། དེ་ཚོང་རྫས་སུ་བསྒྱུར་བ་ལའང་དཀའ་ངལ་ཡོད་པ་རེད། ཅེས་བཤད།

 

 

དེ་བཞིན་སློབ་དཔོན་གྱིས་དེ་ནི་ཧ་ཅང་ཉེན་ཁ་ཆེ་བའི་ཞིང་ལས་ཐོན་སྐྱེད་ཀྱི་ཐབས་ལམ་ཞིག་རེད། གལ་ཏེ་ཀུ་ཤུར་རྒྱུས་ཡོད་ཧ་ཅང་ཆེན་པོ་ཞིག་མིན་ན་དེ་འདྲ་ཡོང་ཐབས་མེད་པ་རེད། ཅེས་ཀྱང་གསུངས།

དོན་དངོས་ཀྱང་དེ་འདྲ་ཡིན་ལ། རང་བྱུང་ཁམས་གཙང་གིས་ཞིང་ལས་དང་ཤིང་འབྲས་བསྐྱེད་བསྲིང་བྱེད་པའི་དབང་གིས་མཐར་དེ་དང་སྨན་རྫས་སྤྱོད་པའི་ཐོན་རྫས་ཀྱི་གྲངས་འབོར་བར་ཧ་ཅང་ཧེ་བག་ཡོད། སྐུ་ཞབས་ཀཱི་མི་རའི་ཀུ་ཤུ་ད་དུང་ཁྲོམ་རར་སླེབས་རྒྱུ་ཡིན་ལ། ཁོང་གི་ཀུ་ཤུ་དེ་དག་གྲགས་ཅན་གྱི་ཟ་ཁང་ཁག་ཅིག་དང་། དེ་དག་ཉོ་འདོད་མཁན་རྣམས་ཙམ་ལས་མཁོ་སྤྲོད་བྱེད་ཐུབ་ཀྱི་མེད་པ་རེད།

 

 

བཤད་སྲོལ་ལྟར་ན་ཁོང་གི་ཀུ་ཤུ་ཁ་བཤགས་རྗེས་རྙིད་པ་མི་ཆག་ལ། མངར་མོའི་ཚད་གཞི་སྤྱི་བཏང་གི་ཀུ་ཤུ་གཞན་ལས་ཀྱང་མཐོ། སློབ་དཔོན་གྱིས་དེ་ནི་ཁོང་གིས་ཀུ་ཤུར་སྨན་རྫས་དང་ལུད་བེད་སྤྱོད་མ་གནང་བ་དང་འབྲེལ་བ་ཡོད་དམ། ཞེས་དང་། དེ་བཞིན་རང་བྱུང་ཀུ་ཤུ་གསོ་སྟངས་དང་འབྲེལ་འགྲེལ་བརྗོད་དགོས་པའི་གསང་བ་མང་དག་ཅིག་ཡོད།

 

 

ཀུ་ཤུའི་རྒྱལ་པོ་ཀཱི་མི་ར་ནི་ས་གནས་རང་གི་མཐོ་སློབ་ཐོན་རྗེས་གྲོང་ཁྱེར་དུ་བཟོ་ཚོང་ག་གེ་མོར་ལོ་གཅིག་དང་ཕྱེད་ལས་ཀ་བྱས་རྗེས་དེ་ནས་ཕྱིར་དོན་ཏེ་སོ་སོའི་ཕ་ཡུལ་དུ་ཕ་མའི་ཤུལ་འཛིན་གྱིས་ཀུ་ཤུ་འདེབས་ལས་བྱེད་འགོ་བརྩམས། ཡིན་ཡང་གོམས་འདྲིས་ཡོང་ཐབས་མེད་པའི་འཚོ་བ་ཉིན་རེ་བཞིན་བསྐྱར་ཟློ་བྱས། ཞིང་ལས་བྱེད་རྒྱུ་མེད་པའི་ཉིན་ཞིག་ལ་ཁོང་དཔེ་དེབ་ཁང་ཞིག་ཏུ་སླེབས་ཅིང་རང་བྱུང་ཞིང་ལས་འདེབས་སྟངས། ཅེས་པའི་དེབ་ཅིག་མཐོང་། དེའི་ནང་ལུད་རྫས་བེད་སྤྱོད་མེད་པའི་སྒོ་ནས་འབྲས་འདེབས་ལས་བྱས་པའི་དོན་དངོས་ཀྱི་གྲུབ་འབྲས་དེས་ཁོ་པར་ཤུགས་རྐྱེན་ཆེན་པོ་བཞག སྐབས་དེར་ཁོའི་བརྩེ་ཆེན་གྱི་བཟའ་ཟླ་མོར་ཞིང་སྨན་གྱིས་མི་འཕྲོད་པའི་ན་ཚས་སུན་པོ་འབྱུང་བཞིན་ཡོད། ཁོ་པས་སེམས་ནང་ལུས་གཟུགས་དང་ཕྱིའི་ཁོར་ཡུག་གཉིས་ཀར་ཕན་ཞིང་། ལུད་རྫས་དང་ཞིང་སྨན་སྤྱོད་མི་དགོས་པའི་ཀུ་ཤུ་འདེབས་མི་ཐུབ་པ་ཡིན་ནམ་བསམ། བསམ་བློ་དེས་སོ་སོའི་རང་བྱུང་གཙང་མས་ཀུ་ཤུ་འདེབས་ལས་ལ་རེ་བས་ཁེངས་པར་བྱས།

 

སྤྱི་ལོ་ ༡༩༧༨ ཟླ་ ༤ པར་ཁོང་གིས་རྫས་ལུད་མེད་པའི་ཀུ་ཤུ་འདེབས་འཛུགས་ཀྱི་ཚོད་ལྟ་འགོ་བརྩམས། ཡིན་ཡང་ཀུ་ཤུའི་སྡོང་པོ་དེར་མེ་ཏོག་ཁྱོན་ནས་བཞད་མེད་པ་མ་ཟད། ད་དུང་ཞིང་སའི་ནང་གི་འབའ་འབུ་སྲིན་དང་རྫོགས་མཐའ་མེད་པའི་འཐབ་རྩོད་རྒྱུན་མཐུད་གནང་དགོས་བྱུང་། ཡོངས་འབབ་མེད་པའི་ཐོག་གཞན་གྱིས་སྨྱོན་པ་ལྟར་ཚོར་བཞིན་པའི་ཉི་མ་རེ་རེ་དེ་ལྟར་སོང་།

 

 

ཉིན་ཞིག་གི་མཚན་མོར་ཁོང་རི་བོར་འཛེགས་ཏེ་ཤིང་སྡོང་ཞིག་ལ་ཐག་པ་བཏགས་ནས་རང་ཤི་རྒྱག་བརྩིས་བྱས། ཡིན་ཡང་ཐག་པ་ཐུང་དྲག་པས་བསམ་པ་བཞིན་མ་ཐུབ། ཁོང་གིས་གློ་བུར་དུ་རྐང་པས་བརྫས་པའི་སྡོང་པོ་དེ་ཀུ་ཤུའི་སྡོང་པོ་ཞིག་ཡིན་འདྲ་ཤར། ཁོ་པ་མར་སྒུར་ནས་སའི་དྲི་ལ་བསྣུམ་ཙམ་བྱས། དེ་ནས་དྲི་མ་འཕུར་ཡོང་བའི་དེ་ནི་སོ་སོའི་ཀུ་ཤུའི་ར་བ་ནས་ཡོང་བ་དང་ཁྱོན་ནས་མི་འདྲ་བ་ཚོར། མགོ་བོ་སྟེགས་ནས་ལྟ་དུས་དེར་སྐྱེས་པའི་སྡོང་པོའི་ཡ་ག་རྒྱས་ཤིང་རྩ་བའང་བརྟན་པར་མཐོང་། གློ་བུར་དུ་ཁོང་གིས་དེར་ཡོད་པའི་ས་དེ་གཞན་དང་མི་འདྲ་བ་ཡིན་པར་ཤེས།

 

 

ཁོང་གིས་སྡོང་པོའི་སྐྱེ་འཕེལ་གྱི་ནུས་ཤུགས་ལ་དམིགས་ཚད་བཟུང་ནས་ཤུགས་གནོན་རྒྱག ཁོང་གིས་ས་དེར་སྲན་ཆེན་འདེབས་རྗེས་སྡོང་པོའི་རྩ་བར་འགྱུར་ལྡོག་བྱུང་བ་མཐོང་། དེ་ནས་ཁོང་གིས་ཀུ་ཤུའི་སྡོང་པོ་དེ་སྔར་ལས་ལེགས་པར་སྐྱེ་འཕེལ་འགྲོ་བའང་མཐོང་།

༡༩༨༧ ལོར། ཀུ་ཤུ་སྡོང་པོ་དེ་ལ་མེ་ཏོག་རྐང་བདུན་སྐྱེས། དེའི་ནང་ཀུ་ཤུ་ལྔ་འབུ་ཡིས་བཟས་ཚར། འོན་ཀྱང་མཐར་ཁོང་ལ་ཀུ་ཤུ་རྨ་མེད་གཉིས་ལག་ཏུ་རག་བྱུང་།

 

 

ཀུ་ཤུ་འདེབས་ལས་ཀྱི་རྒྱུན་སྲོལ་ལྟར་སྨན་རྫས་སྤྱོད་དགོས་པའི་ལྟ་བ་དེ་མེད་པར་ཆག་རྗེས་རང་བྱུང་ཁམས་གཙང་གི་ཀུ་ཤུ་སྐྱེ་འཕེལ་འདེབས་ལས་ལ་མཐར་གྲུབ་འབྲས་ཐོན་པ་བྱུང་ཡོད། ཀཱི་མི་རས་གཅིག་བྱས་ན་ཞིང་ལ་རྫས་ལུད་སྤྱོད་ཆེ་དྲག་པའི་རྐྱེན་གྱིས་ནད་འབུ་སྐྱེ་འཕེལ་ཡོང་གི་ཡོད་པའང་སྲིད། ཅེས་གསུངས།

ད་ལྟའི་ཆར་ཁོང་ཉིན་ལྟར་རྒྱལ་ཁོངས་སུ་འབྲུ་རིགས་དང་ཤིང་ཏོག་འདེབས་ལས་སྐོར་སློབ་འཁྲིད་གནང་གི་ཡོད་པ་མ་ཟད། ད་དུང་ཕྱིའི་རྒྱལ་ཁབ་ཁག་ཏུ་སྔོ་ཚལ་དང་འབྲས་བཅས་རང་བྱུང་གིས་འདེབས་ལས་སྐོརལའང་སློབ་འཁྲིད་གནང་བར་ཕེབས་ཀྱི་ཡོད་པ་རེད། 

 

 

 

ཞལ་རིས་ལ་འཛུམ་གྱིས་གཏིང་ཟབ་པའི་གཉེར་མ་ཁེངས་པའི་ཀཱི་མི་རས། ཕྱིའི་ཁོར་ཡུག་ལ་ཕན་པའི་ཞིང་ལས་འདེབས་ལས་བྱེད་སྟངས་དེ་རྗེས་རབས་པ་ཚོར་བརྒྱུད་སྤེལ་བྱ་བ་དེ་ནི་ངའི་འོས་འགན་ཡིན་པ་འདྲ། ཞེས་གསུངས་ཡོད་པ་རེད།

 

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།