བོད་ཀྱི་གཞོན་སྐྱེས་གླུ་མ་ལྷ་སྐྱིད།

གཞས་མ་ལྷ་སྐྱིད་དང་ཁོ་མོའི་དད་འདུན་གྱིས་སྙེག་གིན་པའི་སྒྱུ་རྩལ་གྱི་འགྲུལ་བཞུད། གཞོན་སྐྱེས་གླུ་མ་ལྷ་སྐྱིད་ནི་ཕ་ཡུལ་ཟི་ཁྲོན་དཀར་མཛེས་ཁུལ་གསེར་རྟ་རྫོང་ཡང་གོ་ཡུལ་ཚོ་ཡར་ཤོག་ཚོ་བའི་རོང་ཁྱིམ་དཀྱུས་མ་ཞིག་ཏུ་སྐྱེས། བོད་ཀྱི་གཞོན་སྐྱེས་གླུ་མ་ལྷ་སྐྱིད།ལོ་བདུན་གྱི་སྟེང་རང་ཡུལ་གྱི་སློབ་ཆུང་འགྲིམས་ཏེ་གསལ་བྱེད་སུམ་ཅུ་གཙོས་པའི་བོད་ཡིག་གི་རྨང་གཞིའི་ཤེས་བྱའི་སྐོར་ལ་བག་ཆགས་ཕྲན་ཙམ་འཇོག་མགོ་བརྩམས་མོད། རྗེས་སུ་ཁྱིམ་དང་སློབ་གྲྭའི་ཕྱི་ནང་གི་རྒྱུ་རྐྱེན་གང་མང་ཞིག་གིས་རྐྱེན་བྱས་མུ་མཐུད་དུ་སློབ་གྲྭར་འགྲིམ་པའི་སྐལ་བ་མ་ལྡན་པ་རེད། དུས་དེ་ནས་བཟུང༌། མོས་མི་འདོད་བཞིན་དུ་ཕ་ཡུལ་གྱི་ཆེས་སྤྱིར་བཏང་གི་རོང་མོ་དཀྱུས་མ་ཞིག་གི་ངོས་ཐད་ནས་སླེ་བོ་གྲུ་བཞི་རྒྱབ་ལ་ཁུར་ནས་ཟོར་ཆུང་ལེབ་མོ་སྐེད་ལ་བཏེགས་ཏེ་ཞིང་ལས་ལ་འབད། ཁོ་མོ་ལ་ཆུང་དུས་ནས་བག་ཆགས་ཀྱི་སྐད་ངག་སྙན་མོ་ཞིག་ལྷན་སྐྱེས་སུ་ཡོད་པས། རྣམ་ཀུན་རྣང་ཞིང་གི་གྲུ་ག་རེ་རེ་ནས་བདེ་མོ་ངག་ལ་བཀུག་པའི་དམངས་གླུའི་འགྱུར་ཁུགས་སྙན་མོས་ཡུལ་དེའི་ལས་རོགས་བུ་མོ་ཚོར་ལས་ཚེགས་ཀྱི་ངལ་བ་དྲུངས་ནས་ཕྱུངས་ཏེ་དགའ་སྐྱིད་ཀྱི་སྣང་བ་ཡང་མོ་ཞིག་སྟེར་བཞིན་ཡོད། སྤྱི་ལོ2004ལོར།  ཁོ་མོའི་སྙིང་ཉེ་བའི་གྲོགས་པོ་གྲོགས་མོ་མང་པོ་ཞིག་གིས་རྒྱབ་སྐུལ་ལ་བརྟེན་ནས་ལས་དབང་གི་ལྕགས་ཁེམ་དང་སླེ་བོ་སོགས་ཞིང་ལས་ཡོ་བྱད་དག་རྒྱབ་ལ་བསྐྱུར་ནས་གླུ་གར་གྱི་སྟེགས་བུའི་སྟེང་གོམ་པ་དང་པོ་སྤོ་མགོ་བརྩམས། སྔ་རྗེས་སུ། ཀུན་གྱིས་གངས་ལྗོངས་ཁུ་བྱུག་སྔོན་མོར་འབོད་པའི་རྡུང་ལེན་པ་བདུད་བྷེ་སོགས་དགེ་རྒན་དུ་བསྟེན་ནས་མདོ་སྨད་ས་ཁུལ་དུ་དར་ཁྱབ་ཆེ་བའི་སྒྲ་སྙན་རྡུང་ལེན་དང་གཞས་ཀྱི་འགུག་སྟངས་སོགས་ལ་སྦྱངས་བ་ནན་གྱིས་བྱས། ལོ་དེར་ཆེས་ཐོག་མར་ཧོར་གཙང་སྨོན་ལམ་དང་བཀྲ་ཤིས་དོན་གྲུབ་སོགས་རྡུང་ལེན་པ་སྐོར་ཞིག་དང་མཉམ་འབྲེལ་གྱིས་གླུ་གཞས་མཉམ་བསྡུས་ཀྱི་སྒྲ་ཐག་ཅིག་ཕབ་སྐྲུན་བྱས། ད་དུང«མེ་ཏོག་གི་ལང་ཚོ»དང«གསེར་མདོག་གི་ཕ་ས»ཞེས་པའི་བརྙན་སྡེར་གཉིས་ཀྱང་འགྲེམ་སྤེལ་བྱས། གཞན་ཡང་ལོ་དེར་བསྡུས་པའི་གསེར་རྟ་རྫོང་གི་རྫོང་སྟོན་ལ་ཁོ་མོས«ངའི་ཕ་ཡུལ་དང་སྐྱིད་པའི་ལུང་པ»ཞེས་པའི་གཞས་ཤིག་བཏང་པར་ཡུལ་མི་སྤུན་ཟླའི་དགའ་བསུ་ཆེན་པོ་ཐོབ། དེ་ནས་བཟུང༌། ཁོ་མོ་ལྷ་ས་དང་ནག་ཆུ། མཚོ་སྔོན་ཡུལ་ཤུལ་དང་ཆབ་མདོ། དཀར་མཛེས་སོགས་བོད་ཡུལ་མདོ་དབུས་ཁམས་གསུམ་ལ་འཁྲབ་སྟོན་དུ་བསྐྱོད། སྤྱི་ལོ2010ལོར། ཁོ་མོའི་ཆེད་བསྒྲིགས་བརྙན་འཁོར་ཐོག་མ“ནས་ཁུར་བུ་མོ”ཞེས་པ་འགྲེམ་སྤེལ་བྱས་པར་རྒྱལ་ཁབ་ཕྱི་ནང་གི་བོད་པ་ཀུན་གྱི་དགའ་བསུ་ཆེན་པོ་ཐོབ། ད་ལྟའི་བར་ཁྱོན་བསྡོམས་བརྙན་སྡེར་སུམ་ཅུ་ལྷག་གི་ནང་ལ་ཁོ་མོས་དམངས་གླུ་དང་སྒྲ་སྙན་རྡུང་ལེན། གཞས་སོགས་བླངས་ཡོད།  2010ལོར་ཁོ་མོ་མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་གྱིས་རོགས་སྒྲུབ་བྱས་པའི་གངས་ཆབ་ཟེགས་མའི་འགྱུར་ཁུགས་ཅེས་པའི་རིག་རྩལ་སྤྲོ་ཚོགས་ཆེན་མོ་སྟེ། «པི་ཝང་གི་འཇིག་རྟེན»ཞེས་པར་ཞུགས་པ་དང༌། སྤྱི་ལོ2013ལོར། མཚོ་སྔོན་བོད་སྐད་བརྙན་འཕྲིན་ཁང་གིས་ལོ་རེར་བསྒྲུབས་བཞིན་པའི་ལོ་སར་དགོང་ཚོགས«དགྱེས་འཛོམས་དཔྱིད་ཀྱི་ཉི་མ»ཞེས་པར་ཞུགས། མིག་སྔར་ཁོ་མོས་བོད་ཁུལ་གྱི་མིང་དུ་གྲགས་པའི་གཞས་པ་དག་དང་ལྷན་དུ་ཁོ་མོའི་ཆེད་བསྒྲིགས་བརྙན་འཁོར་གཉིས་པ་འགྲེམ་སྤེལ་བྱེད་པར་སྟ་གོན་བྱེད་བཞིན་མཆིས། མདོར་ན་གཞས་མ་ལྷ་སྐྱིད་ནི་རྒན་བཀུར་ཆུང་བྱམས་ཀྱི་གུས་བརྩི་རང་ཆས་སུ་གྲུབ་ཅིང༌། བོད་སྐད་གཙང་མ་བཤད་ཅིང་བོད་གཞས་དག་མ་ལེན་པའི་བོད་ཀྱི་ན་གཞོན་གཞས་མ་ཞིག་ཡིན་པར་མ་ཟད། ཆ་གང་ནས་ཀྱང་བོད་ཁམས་ཀྱི་གཞས་མ་རྩེ་གྲས་ཤིག་ཏུ་གྱུར་ཡོད།  དཔེར་ན།  བཅར་འདྲི་ཞིག་ལས། “བདག་ནི་ནམ་ཡང་བོད་ཀྱི་གཞས་མ་ཆེས་ཕལ་བ་ཞིག་ལས་མཚན་སྙན་གྱི་ཆེ་བ་ཅི་ཡང་མེད། ཡིན་ནའང༌།  བདག་གི་གླུ་སྐད་ལ་བོད་པ་མང་པོ་ཞིག་གིས་དགའ་བསུ་དང་ཁས་ལེན་ཐོབ་ཡོད་པའི་གཞས་མ་ཞིག་གི་ཆ་ནས།  ངས་ནམ་ཡང་བོད་སྐད་གཙང་མ་བཤད་ནས་བོད་ལྭ་ངོ་མ་གྱོན་བཞིན། བོད་ཀྱི་གནའ་བོའི་རིག་གནས་ཀྱིས་ཕྱུག་པའི་དབྱངས་རྟ་མང་པོ་ཞིག་ལ་དུས་རབས་གསར་བའི་ཟུང་ཁྲག་བསྣོན་པ་ལ་ཤ་ཐང་དུ་འབད་ཀྱིན་ཡོད”ཅེས་པའི་གླེང་མོལ་ཐུང་ངུ་དེས་ཀྱང་ཁོ་མོའི་སྒྱུ་རྩལ་གྱི་དད་འདུན་དང་གཞན་དྲིང་མི་འཇོག་པའི་ཤེས་རྒྱ་དེ་དོན་གྱིས་བསྒྲུབས་འདུག

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:
བསམ་ཚུལ། (1)
1 ༣༡༢༠༡༩༠༨༡༣
ཧོར་གཙང་བཀྲ་ཤིས་བཟང་པོ།
བོད་ཀྱི་ལ་རྒྱ་བཟང་གི ང་ཡང་དེར་དགའ་ཞེན་ཆེ།



བརྗོད་གཞི་གཞན་ཁག་ལ་གཟིགས།