པཎྜི་ཏའི་སྐོར་གྱི་དཔྱད་རྩོམ།

ཀ༽ཐ་སྙད་དང་དེའི་གོ་དོན།
དེ་ཡང༌།<<དུང་དཀར་ཚིག་མཛོད་ཆེན་མོ་>>ལས། པཎྜི་ཏ།འདི་རྒྱ་གར་སྐད་ཡིན།བོད་སྐད་དུ་བསྒྱུར་ན་ལྔ་རིག་པ་ཞེས་པ་སྟེ།རྒྱ་གར་སྐད་དུ་པ་ཎ་ནི་ལྔ་དང༌།ཌི་ཏ་ནི་རིག་པ་ཞེས་པའི་དོན་ཡིན།རིག་གནས་ཆེ་བ་ལྔ་དང་ཆུང་བ་ལྔ་བཅས་བཅུ་ཀ་མཁྱེན་པའི་མཁས་པ་ཡིན་ན་པཎྜི་ཏ་ཆེན་པོ་དང༌། སྣ་རེ་གཉིས་ལ་མཁས་པ་ཡིན་ན་པཎ་ཆུང་ཞེས་ཟེར། ཞེས་གསུངས་ཤིང༌། དེ་བཞིན་<<སཾ་བོད་སྐད་གཉིས་ཤན་སྦྱར་གསེར་གྱི་ཕྲེང་མཛེས>> སོགས་སུའང་གསལ་བ་ལྟར།པཎྜི་ཏ་ཞེས་པ་ལེགས་སྦྱར་གྱི་སྐད་དང༌།དོན་ལ་ལྔ་རིག་པ་སྟེ།རིག་པའི་གནས་ལྔ་ཤེས་པའི་མཁས་པ་དང༌།དོན་འགྱུར་གནས་ལྔ་རིག་པ་ཞེས་བཤད་ཅིང༌།རིག་པའི་གནས་ལྔ་ཤེས་པའི་དོན་ཡིན་ལ།<<སཾ་བོད་རྒྱ་གསུམ་ཤན་སྦྱར་གྱི་ཚིག་མཛོད་>>ལས།པཎྜི་ཏཿམཁས་པ།ཞེས་རྣམ་བཅད་ལྷག་པོ་བསྣན་པའང་སྣང༌།ཡང་<<ངག་སྒྲོན་རྩ་འགྲེལ་དང་དེའི་ཡང་འགྲེལ་>>ལས །པཎྜི་ཏ་ཞེས་པ་དེ་བློ་གྲོས་དང་འགྲོགས་པ་རིག་པའི་གནས་ལྔ་ལ་མཁས་པའི་དབང་པོའི་དོན་དུའང་འཇུག་པར་གསུངས།

ཁ༽དོགས་དཔྱོད།
དོགས་དཔྱོད།སྟོན་པའི་གཏད་རབས་སོགས་ཆེས་སྔ་མོའི་དུས་རྣམས་སུ་ནང་པའི་མཁས་པ་རྣམས་ལ་བཙུན་པ་ཆེན་པོ་ཞེས་ཞུ་བ་ལས།པཎྜི་ཏའི་མཚན་གྱིས་འབོད་ཚུལ་མེད་ཚུལ་རྗེ་བཙུན་ཏཱ་ར་ནཱ་ཐས་མཛད་པའི་<<རྒྱ་གར་ཆོས་འབྱུང་>>ལས། ཁ་ཆེའི་ཡུལ་སྣ་རྒྱན་ནགས་ཀྱི་གཙུག་ལག་ཁང་ཞེས་བྱ་བར་དགེ་སློང་མཐའ་དག་འདུས་ནས་བཀའ་བསྡུ་བ་གསུམ་པ་བྱས་ཞེས་ཁ་ཆེ་བ་རྣམས་ཟེར་ལ།གཞན་དག་ནི་ཛ་ལནྡ་རའི་དགོན་པ་ཀུ་པ་ནའི་གཙུག་ལག་ཁང་དུ་བསྡུས་པར་འདོད་པ་ལས།མཁས་པ་ཕལ་ཆེར་ཕྱི་མ་འཐད་པར་མཛད་དོ།།དེ་ལ་བོད་རྣམས་ལྟར་ན།དགྲ་བཅོམ་པ་ལྔ་བརྒྱ་དང༌།བྱང་ཆུབ་སེམས་དཔའ་ལྔ་བརྒྱ་དང༌།སོ་སོ་སྐྱེ་བོའི་པཎྜི་ཏ་ལྔ་བརྒྱ་འདུས་ནས་བསྡུས་ཟེར་ཡང༌། ཐེག་ཆེན་ལུགས་ལྟར་ན་དོན་ལ་མི་འཐད་པ་མེད་མོད།འོན་ཀྱང་དུས་དེ་ཙམ་ན་སངས་རྒྱས་པའི་མཁས་པ་ཆེན་པོ་རྣམས་ལ་བཙུན་པ་ཆེན་པོ་ཟེར་བ་མ་གཏོགས།པཎྜི་ཏའི་མིང་གིས་འབོད་པ་མེད་པས་པཎྜི་ཏ་ལྔ་བརྒྱ་ཟེར་བ་མི་ལེགས་སོ།།འགོས་ལོ་གཞོན་ནུ་དཔལ་གྱིས་གཏད་རབས་ཀྱི་འཕྲོས་ནས་རྒྱ་དཔེ་འཁྱར་པོ་ཤོག་བྱང་གཅིག་བསྒྱུར་བ་ན་ཡང་བཱ་སུ་མི་ཏྲ་ལ་སོགས་པ་བཙུན་པ་བཞི་བརྒྱ་དང་ཞེས་འབྱུང་བ་ལྟར་ལེགས་སོ།།ཞེས་གསུངས།

འོ་ན་པཎྜི་ཏ་ཞེས་པའི་ཐ་སྙད་འདི་ཉིད་ཐོག་མར་དུས་རབས་གང་ལ་འཕགས་བོད་ཀྱི་པཎྜི་གང་དག་ལ་ཆེ་བསྟོད་ཀྱི་ཐ་སྙད་ཐོགས་པ་ཞིག་ཡིན་ནམ་སྙམ་ན།<<བུ་སྟོན་ཆོས་འབྱུང་>>ལས།དེ་ནས་གངྒཱ་དང༌། ཡ་མུ་ནའི་བར་གྱི་ཡུལ་ཨནྟར་བྷི་དིའི་ཡུལ་དུ་ཏུ་རུཥྐའི་རྒྱལ་པོ་ཟླ་བ་ཞེས་བྱ་བ་བྱུང༌། དགེ་སློང་འགའ་རེས་རྒྱལ་པོའི་ཕོ་ཉ་བྱས་པས་རྐྱེན་བླངས་ཏེ། དེ་དང་བྷཾ་ག་ལ་ལ་སོགས་པའི་ཡུལ་གཞན་དང་གཞན་ན་གནས་པའི་ཏུ་རུཥྐའི་རྒྱལ་ཕྲན་མང་པོ་ཕྱོགས་གཅིག་ཏུ་བསྡུས་ཏེ་མ་ག་དྷཱའི་ཡུལ་ཐམས་ཅད་འཇོམས་པར་བྱུང་སྟེ། ཨོ་ཏནྟ་པུ་རིར་རབ་ཏུ་བྱུང་བ་མང་པོ་ཞིག་བསད། དེ་དང་བི་ཀྲ་མ་ཤཱི་ལ་གཉིས་ཆར་བཤིག ཨོ་ཏནྟ་བི་ཧ་རའི་ཤུལ་དུ་སྟག་གཟིག་གི་རྫོང་བཅས། པཎྜི་ཏ་ཤཱཀྱ་ཤྲཱི་ཤར་ཕྱོགས་ཨོ་ཊི་བི་ཤའི་ཡུལ་ཛ་ག་རྡ་ལར་བྱོན། དེར་ལོ་གསུམ་བཞུགས་ནས་བོད་དུ་བྱོན་པ་ཡིན། རནྟ་རཀྵྀ་ཏ་ཆེན་པོ་བལ་པོའི་ཡུལ་དུ་བྱོན། མཁས་པ་ཆེན་པོ་ཛྙཱ་ན་ཨཱ་ཀར་གུཔྟ་ལ་སོགས་པ་པཎྜི་ཏ་ཆེ་བ་འགའ་དང༌། པཎ་ཆུང་བརྒྱ་ཙམ་རྒྱ་གར་ལྷོ་ནུབ་ཀྱི་ཕྱོགས་སུ་བྱོན། མཁས་པ་ཆེན་པོ་བུདྡྷ་ཤྲཱི་མི་ཏྲ་དང༌། སྟོབས་བཅུ་པའི་སློབ་མ་བཛྲ་ཤྲཱི། གཞན་ཡང་པཎ་ཆུང་མང་པོ་དང་བཅས་ལྷོ་ཕྱོགས་ཐག་རིང་པོར་བྲོས། མཁས་པ་སཾ་གྷ་མ་ཤྲཱི་ཛྙཱ་ན་དང༌། ར་ཝ་ཤྲཱི་བྷ་དྲ་དང༌། ཙནྡྲ་ཀ་ར་གུཔྟ་ལ་སོགས་པ་མ་ཧཱནྟ་བཅུ་དྲུག་ཙམ་དང༌། པཎ་ཆུང་ཉིས་བརྒྱ་ཙམ་ཤར་ཕྱོགས་ཐག་རིང་པོ་ར་ཁང་དང༌། མུ་ཉུང་དང༌། ཀཾ་པོ་ཛ་ལ་སོགས་པའི་ཡུལ་རྣམས་སུ་སོང་ནས། མ་ག་དྷཱར་བསྟན་པ་ནུབ་པ་ལྟར་གྱུར་ཏོ། །དེ་སྐབས་གྲུབ་ཐོབ་དང༌། སྒྲུབ་པ་པོ་མང་པོ་བཞུགས་ཀྱང༌། སེམས་ཅན་སྤྱི་མཐུན་གྱི་ལས་ལ་ཟློག་ཐབས་མ་བྱུང་ངོ༌། །ཞེས་པ་ལྟར།པཎྜི་ཏ་དང༌།པཎ་ཆུང་ཞེས་གསལ་བ་ལྟར།པཎྜི་ཏ་ལ་དབྱེ་ན།རིག་པའི་གནས་ཆེན་ལྔ་ལ་མཁས་པ་ན་པཎ་ཆེན་དང༌།རིག་པའི་གནས་ཆུང་བ་ལྔ་ལ་མཁས་པ་ན།པཎྜི་ཏ་ཆུང་བ་སྟེ་པཎ་ཆུང༌།རིག་གནས་ཆེ་ཆུང་གཉིས་ཀར་མཁས་པ་ན་མཧཱ་པཎྜི་ཏ་ཞེས་ཞུ་ཞིང༌།

<<རྒྱ་གར་ཆོས་འབྱུང་>>ནང་དཔལ་ལྡན་ཆོས་ཀྱི་གྲགས་པའི་དུས་ཀྱི་གཏམ་གྱི་སྐབས་སུ་པཎྜི་ཏ་གཞོན་ནུ་དག་གིས་མ་ཉན་ཏེ།ཞེས་པཎྜི་ཏ་ཞེས་པའི་ཐོག་མར་གསལ་ཡོད་ལ།ཐུའུ་བཀྭན་གྲུབ་མཐའ་ལས།མངའ་བདག་ཁྲི་རལ་པ་ཅན་གྱི་རིང་ལ་པཎྜི་ཏ་ཛི་ན་མི་ཏྲ་ལ་སོགས་པ་མཁས་པ་དུ་མ་སྤྱན་དྲངས་ཏེ། དམ་པའི་ཆོས་དུ་མ་བོད་དུ་བསྒྱུར་ཅིང་གསུང་རབ་ཐམས་ཅད་སྐད་གསར་བཅད་ཀྱིས་གཏན་ལ་ཕབ། ཅེས་བསྟན་པ་སྔ་དར་སྐབས་པཎྜི་ཏའི་མཚན་གསལ་བ་ཐོག་མ་ཛི་ན་མི་ཏྲ་རེད་འདུགཡང་དེ་ཉིད་ལས།དེ་ནས་མི་རབས་ལྔ་ན་རྒྱལ་པོ་ཁྲི་སྲོང་ལྡེའུ་བཙན་གྱིས་པཎྜི་ཏ་ཆེན་པོ་ཤཱནྟ་རཀྵི་ཏ་སྤྱན་དྲངས།ཞེས་གསུངས་ལ།དེ་བཞིན་<<བུ་སྟོན་ཆོས་འབྱུང་>>ལས །དེ་ལྟར་བོད་དུ་དམ་པའི་ཆོས་དར་བར་མཛད་པའི་པཎྜི་ཏ་བོད་དུ་བྱུང་བ་ནི། མཁན་པོ་ཤནྟ་རཀྵི་ཏ་བོད་སྐད་དུ་ཞི་བ་འཚོ་དང༌། པདྨ་འབྱུང་གནས་དང༌། སྔགས་འཆང་དྷརྨ་ཀིརྟི་དང༌། བི་མ་ལ་མི་ཏྲ་དྲི་མེད་བཤེས་གཉེན་དང༌།ཞེས་སོགས་གསུངས།

གཞན་ཡང༌། <<ལམ་འབྲས་ཚིག་མཛོད་>>ལས།ས་སྐྱ་པཎྜི་ཏ། ས་སྐྱ་པཎྜི་ཏ་ (1182-1251) ཀུན་དགའ་རྒྱལ་མཚན། འདི་ཉིད་ས་ཆེན་གྱི་སྲས་བཞི་པ་འཁོན་དཔལ་ཆེན་འོད་པོའི་སྲས་སུ་རབ་བྱུང་གསུམ་པའི་ཆུ་སྟག་ལོར་གཙང་དུ་སྐུ་འཁྲུངས། རྗེ་བཙུན་གྲགས་པ་རྒྱལ་མཚན་ལས་ས་སྐྱ་གོང་མའི་གསུང་བཅུད་མདོ་སྔགས་ཀྱི་ཟབ་གནད་མ་ལུས་པ་གསན། དགུང་ལོ་ཉེར་གསུམ་ནས་བཟུང་ཁ་ཆེ་པཎ་ཆེན་མཁན་སློབ་ལས་རིག་གནས་ཆེ་ཆུང་བཅུ་ལ་སྦྱངས་པ་མཐར་ཕྱིན་མཛད་པས་པཎྜི་ཏའི་མཚན་སྙན་ཐོབ་པ་འདི་བོད་ཀྱི་པཎྜི་ཏ་དང་པོ་དེ་ཡིན། ཞེས་གསུངས་པ་ལྟར་རོ།།

དེ་ལྟར་བཅུ་ཕྲག་རིག་གནས་ལ་མཁས་པའི་ཕུལ་དུ་བྱུང་ཞིང༌། གསང་སྔགས་ཀྱི་ལམ་ལ་བརྟེན་ནས་མཆོག་དང་ཐུན་མོང་གི་དངོས་གྲུབ་ཐོབ་པའི་དཔལ་ནཱ་ལེནྡྲའི་པཎ་གྲུབ་བཅུ་བདུན་ནི།༡མགོན་པོ་ཀླུ་སྒྲུབ་དང༌།༢འཕགས་པ་ལྷ།༣འཕགས་པ་ཐོགས་མེད།༤སློབ་དཔོན་དབྱིག་གཉེན།༥སློབ་དཔོན་ཕྱོགས་གླང༌།༦དཔལ་ལྡན་ཆོས་གྲགས།༧སློབ་དཔོན་ཡོན་ཏན་འོད།༨སློབ་དཔོན་ཤཱཀྱ་འོད་བཅས་ཡོངས་གྲགས་རྒྱན་དྲུག་མཆོག་གཉིས་ཀྱི་ཐོག་ཏུ་མདོ་སྔགས་ཀྱི་གཞུང་ལུགས་སྤྱི་དང༌། ལྷག་པར་གཞུང་ཆེན་བཀའ་པོད་ལྔའི་ཐོག་རྨད་དུ་བྱུང་བའི་ལེགས་བཤད་མཛད་པ་པོ། ༩ སློབ་དཔོན་སངས་རྒྱས་བསྐྱངས་དང༌།༡༠དཔལ་ལྡན་ཟླ་བ་གྲགས་པ།༡༡སློབ་དཔོན་ལེགས་ལྡན་འབྱེད།༡༢སློབ་དཔོན་སེངྒེ་བཟང་པོ།༡༣འཕགས་པ་གྲོལ་སྡེ།༡༤རྒྱལ་སྲས་ཞི་བ་ལྷ།༡༥མཁན་ཆེན་ཞི་བ་འཚོ།༡༦སློབ་དཔོན་ཀཱ་མ་ལ་ཤཱི་ལ།༡༧ཇོ་བོ་རྗེ་དཔལ་ལྡན་ཨ་ཏི་ཤ་བཅས་པཎ་གྲུབ་ཞལ་གྲངས་དགུ་གསར་དུ་ཞལ་སྐོང་མཛད་དེ་པཎ་གྲུབ་བཅུ་བདུན་ཞེས་པ་སྲོལ་བཟང་གཏོད་པར་མཛད། དེ་ཡང་སྔར་འཕགས་བོད་ཀྱི་ཡུལ་དུ་རྒྱན་དྲུག་མཆོག་གཉིས་ལས་པཎ་གྲུབ་བཅུ་བདུན་ཞེས་པའི་ཐ་སྙད་འདི་ཉིད་མ་གྲགས་ཀྱང༌།འདི་དག་སངས་རྒྱས་ཀྱི་བསྟན་པ་ལ་ཕྱག་རྗེས་ཤིན་ཏུ་ཆེ་ཞིང༌།ལྷག་པར་བོད་གངས་ཅན་གྱི་ལྗོངས་དང་དངོས་ཤུགས་བརྒྱུད་གསུམ་གྱི་སྒོ་ནས་འབྲེལ་ཆེ་ལ།ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་བས།ཕྱི་ལོ་༢༠༠༡ཟླ་༡༢ཚེས་༡༥ཉིན་ྋགོང་ས་ྋསྐྱབས་མགོན་ཆེན་པོ་མཆོག་གིས་དཔལ་ནཱ་ལེནྡྲའི་པཎ་ཆེན་བཅུ་བདུན་གྱི་གསོལ་འདེབས་དད་གསུམ་གསལ་བྱེད་ཅེས་བྱ་བ་ལྗགས་རྩོམ་མཛད་པ་དང༌།སྐུ་ཐང་འབྲི་སྲོལ་ལྗགས་བཀོད་མཛད་པ་བཅས་ཀྱི་སྲོལ་བཟང་གསར་གཏོད་མཛད་པ་ནས་བཟུང་སྟེ་ཐ་སྙད་དེ་ཤིན་ཏུ་གྲགས་ཆེ་བར་གྱུར་ཏོ།།དེ་ལྟར་སྲོལ་བཟང་གཏོད་པའི་དགོས་དམིགས་སོགས་ཀྱི་སྐོར་ཞིབ་ཕྲ་མཁྱེན་པར་འདོད་ན། ྋགོང་ས་ྋསྐྱབས་མགོན་ཆེན་པོ་མཆོག་གིས་མཛད་པའི་<<པཎ་གྲུབ་བཅུ་བདུན་གྱི་གསོལ་འདེབས་དད་གསུམ་གསལ་བྱེད་ཀྱི་བཀའ་ཁྲིད་>>ལ་སྤྱན་རས་གཡོ་བར་འཚལ་ལོ་ཞེས་ཞུའོ།།   །།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།