དགོངས་ཚུལ།

རྒྱན་དྲུག་མཆོག་གཉིས་ཀྱི་དོགས་དཔྱོད་རགས་ཟིན།

ཀ༽ རྒྱན་དྲུག་དེ་ཡང་འཛམ་གླིང་མཛེས་པར་བྱེད་པའི་རྒྱུན་དྲུག་དང༌། མཆོག་གཉིས་ཞེས་བོད་གངས་ཅན་གྱི་ལྗོངས་སུ་རླུང་ལྟར་གྲགས་པའི་འཕགས་ཡུལ་གྱི་པཎ་གྲུབ་རྣམ་བརྒྱད་ལ་རྒྱན་དྲུག་མཆོག་གཉིས་ཞེས་པའི་ཐ་སྙད་ནི་ཐོག་མར་རྗེ་བདག་ཉིད་ཆེན་པོའི་བླ་མ་དཔལ་ས་སྐྱའི་མཁས་པ་རྗེ་བཙུན་རེད་མདའ་བ་གཞོན་ནུ་བློ་གྲོས་ཀྱིས་མཛད་པའི་རྒྱན་དྲུག་མཆོག་གཉིས་ཀྱི་བསྟོད་པ་མཁའ་མཉམ་མ་ལྗགས་རྩོམ་མཛད་པ་ནས་བཟུང་སྟེ་དར་འཕེལ་བྱུང་བ་ཞིག་མིན་ནམ་སྙམ་པ་ལས། ཞལ་གསལ་ཞིབ་ཕྲ་བཀོད་པའི་དེབ་ཐེར་སོགས་དཔྱད་གཞི་ལག་ཏུ་མ་སོན་པས་ཁ་ཚོན་བཅད་ནས་ཞུ་དཀའ་ཞིང༌། དེ་ཡང་མཁའ་མཉམ་མ་ནི།
མཁའ་མཉམ་འགྲོ་ལ་མཁྱེན་བརྩེས་རབ་དགོངས་ནས། །
གྲངས་མེད་གསུམ་དུ་ཚོགས་གཉིས་རབ་རྫོགས་ཤིང༌། །
སྟོང་གསུམ་མི་མཇེད་ཞིང་གི་དཔལ་གྱུར་པ། །
འདྲེན་མཆོག་ཤཱཀྱའི་ཏོག་ལ་ཕྱག་འཚལ་ལོ། །
ཤེས་རབ་ཆེན་པོས་དེ་ཉིད་ལེགས་རྟོགས་ནས། །
བརྩོན་པ་ཆེན་པོས་གོ་འཕང་མཆོག་བརྙེས་ཤིང༌། །
བསྟན་པ་འདི་ལ་སྟོན་པ་གཉིས་པར་གྲགས། །
འཕགས་མཆོག་ཀླུ་སྒྲུབ་ཞབས་ལ་ཕྱག་འཚལ་ལོ། །
དེ་སྲས་ཐུ་བོ་དགེ་ལེགས་དཔལ་ཡོན་ཅན། །
ལོག་སྨྲ་ཚར་བཅད་སྐལ་ལྡན་རྗེས་སུ་འཛིན། །
ཐར་འདོད་རྣམས་ལ་ཐར་པའི་ལམ་སྟོན་པ། །
ཨཱརྱ་དེ་བའི་ཞབས་ལ་ཕྱག་འཚལ་ལོ། །
མཁྱེན་པའི་དཀྱིལ་འཁོར་ལེགས་བཤད་འོད་སྟོང་ཅན། །
རབ་འབྱམས་ཤེས་བྱའི་མཁའ་ལ་རབ་འཕགས་ཤིང༌། །
བདེ་གཤེགས་གསུང་རབ་ཉིན་མོར་བྱེད་པའི་དཔལ། །
འཕགས་པ་ཐོགས་མེད་ཞབས་ལ་ཕྱག་འཚལ་ལོ། །
དགུ་བཅུ་གོ་དགུ་འབུམ་སྡེའི་གཞུང་རྣམས་ཀྱིས། །
གང་གིས་བློ་གྲོས་མགུལ་བ་རབ་བརྒྱན་ཅིང༌། །
འཛམ་གླིང་འདི་ན་ཀུན་མཁྱེན་གཉིས་པར་གྲགས། །
མཁས་མཆོག་དབྱིག་གཉེན་ཞབས་ལ་ཕྱག་འཚལ་ལོ། །
ཕུལ་དུ་བྱུང་བའི་བློ་གྲོས་སྟོབས་ཀྱིས་བཙུན། །
རྨད་དུ་བྱུང་བའི་ཡོན་ཏན་ཁུར་གྱིས་བརྗིད། །
ལོག་སྨྲ་འདམ་བུའི་ཚལ་རབ་འཇོམས་མཛད་པའི། །
ཕྱོགས་ཀྱི་གླང་པོའི་ཞབས་ལ་ཕྱག་འཚལ་ལོ། །
ཆོས་ཀྱི་རིགས་པས་ཆོས་མིན་ཕམ་མཛད་ཅིང༌། །
གྲགས་པའི་སྒྲ་ཆེན་འཇིག་རྟེན་གསུམ་ན་གྲགས། །
སྨྲ་ངན་མུན་འཇོམས་སྨྲ་བའི་ཉི་མ་མཆོག །
ཆོས་ཀྱི་གྲགས་པའི་ཞབས་ལ་ཕྱག་འཚལ་ལོ། །

ཞེས་རྒྱན་དྲུག་རྣམས་ལ་བསྟོད་པ་ཚིགས་སུ་བཅད་པ་རེ་རེ་དང༌། གཤམ་གྱི་ཤོ་ལོ་ཀ་གཉིས་ལས་དང་པོ་འདི་བཞིན་རེད་མདའ་བས་མཛད་པའི་མཁའ་མཉམ་མ་དང༌། རྗེ་ཙོང་ཁ་པ་ཆེན་པོས་མཛད་པའི་རྒྱན་དྲུག་མཆོག་གཉིས་ལ་བསྟོད་པ་གཉིས་ཀར་གཅིག་མཚུངས་སུ་སྣང་བས། དེ་ནི་མཁའ་མཉམ་མའི་ཞལ་སྐོང་གི་ཚུལ་དུ་རྗེ་བདག་ཉིད་ཆེན་པོས་མཛད་པའི་བསྟོད་པ་ལས་བསྣན་པ་ཞིག་ཡིན་ནམ་སྙམ།

དེ་ཡང༌། ཚུལ་ཁྲིམས་རྒྱ་མཚོའི་དབུས་ན་གནས་བཅས་ཤིང༌། །
འབུམ་ཕྲག་འདུལ་བའི་གཞུང་གི་གདེངས་ཀས་བརྗིད། །
རྣམ་གྲོལ་ཐར་པའི་ནོར་བུས་གཙུག་ན་མཛེས། །
མཆོག་གཉིས་ཀླུ་ཡི་དབང་པོ་ལ་ཕྱག་འཚལ། །
ཐུབ་པའི་བསྟན་ལ་ཤིང་རྟའི་སྲོལ་བཏོད་ནས། །
སྐྱེ་དགུ་རྣམས་ལ་ལེགས་པའི་ལམ་སྟོན་པ། །
འཛམ་གླིང་མཛེས་བྱེད་རྒྱན་དྲུག་མཆོག་གཉིས་ལ། །
རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ། །

ཞེས་གསུངས་པ་ལྟར་འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་ཞེས་པའི་རྒྱན་དྲུག་ནི། འཕགས་པ་ཀླུ་སྒྲུབ་དང༌། སློབ་དཔོན་ཨཱརྱ་དེ་བ། འཕགས་པ་ཐོགས་མེད། སློབ་དཔོན་དབྱིག་གཉེན། སློབ་དཔོན་ཕྱོགས་ཀྱི་གླང་པོ། དཔལ་ལྡན་ཆོས་ཀྱི་གྲགས་པ་དང་དྲུག་ཡིན་ཅིང༌། བོད་ཡིག་ཚིག་གཏེར་རྒྱ་མཚོ་ལས། འཛམ་གླིང་མཛེས་པར་བྱེད་པའི་རྒྱན་དྲུག་སྟེ། དབུ་མའི་རྒྱན་ཀླུ་སྒྲུབ་དང་འཕགས་པ་ལྷ། མངོན་པའི་རྒྱན་ཐོགས་མེད་དང་དབྱིག་གཉེན། ཚད་མའི་རྒྱན་ཕྱོགས་གླང་དང་ཆོས་གྲགས་བཅས་རྒྱ་གར་དུ་བྱོན་པའི་སློབ་དཔོན་ཆེན་པོ་དྲུག་ཅེས་གསུངས་པ་ལྟར་རོ།

སྒྲ་བཤད་ནི། འཛམ་གླིང་མཛེས་པར་བྱེད་པའི་ཆ་ནས་རྒྱན་ཞེས་བརྗོད་ཀྱང༌། དོན་དུ་སངས་རྒྱས་ཀྱི་བསྟན་པ་རིན་པོ་ཆེ་ཉི་མོ་ལྟར་གསལ་བར་བྱེད་པས་རྒྱན་ཞེས་བྱའོ། །དེ་ཡང་སྤྱིར་རྒྱན་ལ་རང་བཞིན་གྱི་རྒྱན་དང༌། མཛེས་བྱེད་ཀྱི་རྒྱན། གསལ་བྱེད་ཀྱི་རྒྱན། དགའ་བའི་རྒྱན་དང་བཞི་ཡོད་པ་ལས། འདི་ནི་གསལ་བྱེད་ཀྱི་རྒྱན་ཡིན་ཏེ། ས་ཆེན་པོ་འདི་རིན་པོ་ཆེའི་མེ་ཏོག་གིས་བརྒྱན་པ་ལས་ཀླུ་སྒྲུབ་ཐོགས་མེད་ལ་སོགས་པའི་སྐྱེས་མཆོག་རེ་བྱོན་པས་ཐུབ་བསྟན་གསལ་བྱེད་ཀྱི་རྒྱན་དང༌། ལྷ་མིའི་དབུས་ན་རང་བཞིན་གྱི་རྒྱན་འགྲན་ཟླ་དང་བྲལ་བ་ཡིན་པས་ནི། བཀའ་ཐམས་ཅད་ཀྱི་སྙིང་པོ་རྣམས་ངོ་བོ་དང༌། གོ་རིམ། གྲངས་ངེས་གསུམ་དང༌། ལུང་རིགས་དཔེ་གསུམ། ཚད་མ་གསུམ་དང༌། རིགས་པ་བཞིས་གཏན་ལ་ཕབ་ཚུལ་དེས་ཀྱང་ངེས་ཤེས་འདྲོངས་པར་འགྱུར་རོ།།

དེ་ཡང་ཇོ་ནང་ཏཱ་ར་ནཱ་ཐས་མཛད་པའི་ <<རྒྱ་གར་ཆོས་འབྱུང་>> ལས། དེ་ལྟར་ན་རྒྱན་དྲུག་པོ་དེ་དག་ལས། ཀླུ་སྒྲུབ། ཐོགས་མེད། ཕྱོགས་གླང་གསུམ་ནི་གཞུང་བྱེད་པ་པོ་ཡིན་ལ། འཕགས་པ་ལྷ། དབྱིག་གཉེན། ཆོས་ཀྱི་གྲགས་པ་གསུམ་ནི་འགྲེལ་པ་བྱེད་པ་པོ་ཡིན་ནོ། །དེ་རྣམས་སོ་སོའི་དུས་སྐབས་ལ་ལྟོས་ཏེ། བསྟན་པ་གསལ་བར་བྱེད་པའི་མཛད་པ་མཉམ་པས་རྒྱན་དྲུག་ཅེས་གྲགས་སོ། །ཞེས་གསུངས་པ་ལྟར་སློབ་དཔོན་ཀླུ་སྒྲུབ་ནི་དབུ་མའི་ཤིང་རྟའི་སྲོལ་འབྱེད་དང༌། འཕགས་པ་ཐོགས་མེད་ནི་སེམས་ཙམ་པའི་ཤིང་རྟའི་སྲོལ་འབྱེད། སློབ་དཔོན་ཕྱོགས་གླང་ནི་དོན་གྱིས་ཚད་མའི་ལམ་སྲོལ་འབྱེད་པ་པོ་དང༌། འཕགས་པ་ལྷ་ནི་ཀླུ་སྒྲུབ་ཀྱི་རྗེས་འབྲང་དང༌། སློབ་དཔོན་དབྱིག་གཉེན་ནི་ཐོགས་མེད་ཀྱི་རྗེས་འབྲང༌། དཔལ་ལྡན་ཆོས་གྲགས་ནི་སློབ་དཔོན་ཕྱོགས་གླང་གི་ཚད་མའི་ལམ་སྲོལ་གཏན་ལ་འབེབས་མཁན་དང༌། སློབ་དཔོན་ཡོན་ཏན་འོད་དང་ཤཱཀྱ་འོད་ནི་འདུལ་བའི་སྲོལ་འཛིན་དང༌། གཞན་རྣམས་ནི་ཐེག་ཆེན་གྱི་གཞུང་ལུགས་སྨྲ་བའི་མཁས་པ་རྩོད་མེད་ཡོངས་གྲགས་དང༌། ལྷག་པར་དུ་རྒྱལ་སྲས་ཞི་བ་ལྷ་དང༌། དཔལ་ལྡན་ཟླ་བ་གྲགས་པ་གཉིས་ནི་ཟབ་ལམ་སྨྲ་བའི་མཁས་པ་འགྲན་ཟླ་དང་བྲལ་བའོ།།

དེ་བཞིན་བདུད་འཇོམས་ཆོས་འབྱུང་ལས། སྟོན་པ་ཉིད་ཀྱི་ལུང་བསྟན་པ་ལྟར་བྲམ་ཟེ་ཆེན་པོ་ས་ར་ཧའི་སློབ་མ་ཟབ་མོ་ལྟ་བའི་ཤིང་རྟའི་སྲོལ་འབྱེད་པ་པོ་སངས་རྒྱས་གཉིས་པ་ཀླུ་སྒྲུབ། རྗེ་བཙུན་བྱམས་པའི་སློབ་མ་རྒྱ་ཆེན་སྤྱོད་པའི་རིང་ལུགས་ཀྱིས་འཛམ་བུ་གླིང་ཐམས་ཅད་ཁྱབ་པར་མཛད་པ་པོ་འཕགས་པ་ཐོགས་མེད། འཇམ་དཔལ་དབྱངས་ཀྱིས་རྗེས་སུ་བཟུང་ཞིང༌། ཕྱོགས་ཐམས་ཅད་ལས་རྣམ་པར་རྒྱལ་བའི་དངོས་གྲུབ་བརྙེས་པས་དངོས་སྟོབས་རིགས་པའི་སྲོལ་འབྱེད་སློབ་དཔོན་ཕྱོགས་ཀྱི་གླང་པོ་སྟེ། གཞུང་བྱེད་པ་པོ་གསུམ་དང༌། ཀླུ་སྒྲུབ་ཀྱི་སློབ་མ་པདྨའི་སྙིང་པོ་ལས་བརྫུས་ཏེ་འཁྲུངས་པ་སློབ་དཔོན་ཨཱརྱ་དེ་ཝ། ཐོགས་མེད་ཀྱི་གཅུང་གཞུང་འབུམ་སྡེ་དགུ་བཅུ་གོ་དགུ་ཐུགས་ལ་མངའ་ཞིང༌། མང་དུ་ཐོས་པ་རྒྱ་མཚོའི་མཐར་སོན་པ་སློབ་དཔོན་དབྱིག་གཉེན། ཕྱོགས་ཀྱི་གླང་པོའི་སློབ་མ་རྒོལ་བ་དབང་ཕྱུག་སྡེའི་རྗེས་སུ་ཞུགས་པའི་ཕྱི་རོལ་པ་ཐམས་ཅད་ཀྱི་བརྟན་པ་གཅིག་ཅར་དུ་འཕྲོག་པའི་བྱེད་པོ་དཔལ་ཆོས་ཀྱི་གྲགས་པ་སྟེ། འགྲེལ་པ་བྱེད་པ་པོ་གསུམ་ཞེས་འཛམ་བུ་གླིང་མཛེས་པར་བྱེད་པའི་རྒྱན་དྲུག་ཅེས་གསུངས་པ་ལྟར་མགོན་པོ་ཀླུ་སྒྲུབ་དང༌། འཕགས་པ་ཐོགས་མེད། སློབ་དཔོན་ཕྱོགས་གླང༌། སློབ་དཔོན་ཡོན་ཏན་འོད་བཞི་ནི་རྩ་བའི་མཁན་པོ་དང༌། སློབ་དཔོན་ཨཱརྱ་དེ་བ་དང༌། སློབ་དཔོན་དབྱིག་གཉེན། དཔལ་ལྡན་ཆོས་གྲགས། ཤཱཀྱ་འོད་བཞི་ནི་འགྲེལ་པ་མཛད་མཁན་གྱི་སྒོ་ནས་ཀྱང་བཞག་ཏུ་རུང་ངོ༌།།

གཞན་ཡང་རྗེ་ཙོང་ཁ་པ་(1357-1419)ཆེན་པོས་མཛད་པའི་རྒྱན་དྲུག་མཆོག་གཉིས་ལ་བསྟོད་པ་ལས །
མཐའ་བྲལ་ལྟ་བས་ཆོས་ཀུན་སྟོང་པར་གཟིགས།།
ཡང་དག་རིགས་པས་རྒོལ་ངན་དྲེགས་པ་འཇོམས།།
དམིགས་མེད་ཐུགས་རྗེས་འགྲོ་ལ་བུ་ལྟར་བརྩེ།།
འཕགས་མཆོག་ཀླུ་སྒྲུབ་ཡབ་སྲས་ལ་ཕྱག་འཚལ།།
རྣམ་བཀྲའི་གཟུགས་ལ་མིག་གིས་ལྟ་བ་བཞིན།།
རྣམ་མང་རྒྱལ་བའི་གསུང་རབ་ཇི་སྙེད་ལ།།
རྣམ་དག་མཁྱེན་པ་ཐོགས་པ་མེད་འཇུག་པ།།
ཐོགས་མེད་སྐུ་མཆེད་ཞབས་ལ་ཕྱག་འཚལ་ལོ།།
གནས་གསུམ་གཞལ་བྱའི་དེ་ཉིད་མ་ལུས་པ།།
ཚད་མ་གསུམ་གྱིས་གཏན་ལ་ཕབ་པའི་དོན།།
སྒྲུབ་དང་སུན་འབྱིན་ངག་གིས་འདོམས་མཛད་པ།།
རིགས་པའི་དབང་ཕྱུག་གཉིས་ལ་ཕྱག་འཚལ་ལོ།།
ཚུལ་ཁྲིམས་རྒྱ་མཚོའི་དབུས་ན་གནས་བཅས་ཤིང༌།།
འབུམ་ཕྲག་འདུལ་བའི་གཞུང་གི་གདེངས་ཀས་བརྗིད།།
རྣམ་གྲོལ་ཐར་པའི་ནོར་བུས་གཙུག་ན་མཛེས།།
མཆོག་གཉིས་ཀླུ་ཡི་དབང་པོ་ལ་ཕྱག་འཚལ།།

ཞེས་པ་འདི་ནི་རིགས་རུས་ཕུན་སུམ་ཚོགས་པའི་མངའ་བདག་བདག་པོ་གྲགས་པ་རྒྱལ་མཚན་པས་བསྐུལ་བའི་དོན་དུ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་སྦྱར་བའོ། །
ཞེས་པ་ལྟར་སྒོམ་སྡེ་ཚིག་མཛོད་ཆེན་མོ་ལས། འདིར་ཚིག་ཟིན་ལ་རྒྱན་ལྔ་དང་མཆོག་གཉིས་མ་གཏོགས་མི་གསལ་ལོ། །ཞེས་གསུངས་ཀྱང༌། ཚིགས་བཅད་དང་པོའི་ཀླུ་སྒྲུབ་ཡབ་སྲས་ཅེས་པས་ཡབ་མགོན་པོ་ཀླུ་སྒྲུབ་དང༌། སྲས་སློབ་དཔོན་ཨཱརྱ་དེ་བ་གཉིས་ཏེ་དེ་གཉིས་བླ་སློབ་ཡིན་པས་ཡབ་སྲས་ཞེས་བྱ་བ་དང༌། ཚིགས་བཅད་གཉིས་པར་ཐོགས་མེད་སྐུ་མཆེད་ཅེས་པས་གཅེན་སློབ་དཔོན་ཐོགས་མེད་དང༌། གཅུང་སློབ་དཔོན་དབྱིག་གཉེན་གཉིས་བསྟན། ཚིགས་བཅད་གསུམ་པར་རིགས་པའི་དབང་ཕྱུག་གཉིས་ཞེས་པས་སློབ་དཔོན་ཕྱོགས་གླང་དང༌། དཔལ་ལྡན་ཆོས་གྲགས་གཉིས་བསྟན། ཚིགས་བཅད་བཞི་པའི་མཆོག་གཉིས་ཞེས་པས། བསྟན་པའི་རྩ་བ་མཆོག་ཏུ་གྱུར་པ་འདུལ་བའི་སྡེ་སྣོད་ལ་ཤིན་ཏུ་མཁས་པའི་སློབ་དཔོན་སློབ་དཔོན་ཡོན་ཏན་འོད་དང༌། ཤཱཀྱ་འོད་བཅས་རྒྱན་དྲུག་མཆོག་གཉིས་ཆ་ཚང་གསལ་བར་བསྟན་འདུག་སྙམ།


ཁ༽ མཆོག་གཉིས།
དེ་ཡང་མཆོག་གཉིས་ཞེས་པ་ནི། དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་ཡོན་ཏན་འོད་དང༌། དེའི་སློབ་མ་ཤཱཀྱ་འོད་གཉིས་ཏེ། རྒྱན་དྲུག་མཆོག་གཉིས་ཀྱི་བསྟོད་པ་མཁའ་མཉམ་ལས།
ཐུབ་པའི་བསྟན་ལ་ཤིང་རྟའི་སྲོལ་བཏོད་ནས། །
སྐྱེ་དགུ་རྣམས་ལ་ལེགས་པའི་ལམ་སྟོན་པ། །
འཛམ་གླིང་མཛེས་བྱེད་རྒྱན་དྲུག་མཆོག་གཉིས་ལ། །
རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ། །
ཞེས་དང༌། རྗེ་བཙུན་རེད་མདའ་བས་མཛད་པའི་མཁའ་མཉམ་མ་དང༌། རྗེ་བདག་ཉིད་ཆེན་པོས་མཛད་པའི་རྒྱན་དྲུག་མཆོག་གཉིས་ལ་བསྟོད་པ་གཉིས་ཀར།
ཚུལ་ཁྲིམས་རྒྱ་མཚོའི་དབུས་ན་གནས་བཅས་ཤིང༌། །
འབུམ་ཕྲག་འདུལ་བའི་གཞུང་གི་གདེངས་ཀས་བརྗིད། །
རྣམ་གྲོལ་ཐར་པའི་ནོར་བུས་གཙུག་ན་མཛེས། །
མཆོག་གཉིས་ཀླུ་ཡི་དབང་པོར་ལ་ཕྱག་འཚལ། །

ཞེས་པ་ཙམ་ལས་མ་བྱུང་ཡང༌། དོན་ཐོབ་ཀྱིས་སློབ་དཔོན་ཡོན་ཏན་འོད་དང༌། སློབ་དཔོན་ཤཱཀྱ་འོད་གཉིས་ལ་གོ་དགོས་ཏེ། བོད་རྒྱ་ཚིག་མཛོད་ཆེན་མོ་ལས། མཆོག་གཉིས། ༡ སྔར་རྒྱ་གར་གྱི་སློབ་དཔོན་འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་གྲས་ཀྱི་མཆོག་གཉིས་ཏེ་ཡོན་ཏན་འོད་དང་ཤཱཀྱ་འོད་གཉིས། ༢) ཟབ་མོ་ལྟ་བའི་སྲོལ་འབྱེད་ཀླུ་སྒྲུབ་དང༌། རྒྱ་ཆེན་སྤྱོད་པའི་སྲོལ་འབྱེད་ཐོགས་མེད་གཉིས་ནི་འཛམ་གླིང་མཛེས་པར་བྱེད་པའི་རྒྱན་དྲུག་གི་ནང་ནས་མཆོག་ཏུ་གྱུར་པའི་སློབ་དཔོན་ཤིང་རྟ་ཆེན་པོ་གཉིས་ཡིན་ཞེས་གསུངས་ལ། རྗེ་བདག་ཉིད་ཆེན་པོས་མཛད་པའི་རྟོགས་བརྗོད་མདུན་ལེགས་མ་ལས་ཀྱང༌། དེ་ཉིད་ཕྱིར་ན་མི་ཕམ་ཆོས་རྗེ་དང༌། ། འཛམ་གླིང་རྒྱན་དྲུག་མཆོག་གཉིས་ཞེས་གྲགས་པའི། ། གཞུང་ལ་ཕྱོགས་རེ་བ་དང་རགས་པ་རེས། ། ཚིམ་པར་མ་བྱས་ཀུན་ལ་ཞིབ་ཏུ་སྦྱངས། །ཞེས་གསུངས་སོ།། ཇོ་ནང་ཏཱ་ར་ནཱ་ཐས་མཛད་པའི་ <<རྒྱ་གར་ཆོས་འབྱུང་>> ལས།
འཛམ་གླིང་རྒྱན་དྲུག་ཡོངས་སུ་གྲགས་པ་ཉིད། །
དཔའ་བོ་སྒྲ་གཅན་འཛིན་དང་ཡོན་ཏན་འོད། །
ཆོས་སྐྱོང་རྣམས་ལ་ཆེན་པོ་བཞི་ཞེས་གྲགས། །
ཞི་བ་ལྷ་དང་ཙནྡྲ་གོ་མི་ལ། །
རྨད་བྱུང་སློབ་དཔོན་གཉིས་ཞེས་མཁས་རྣམས་སྒྲོག །
མཆོག་གཉིས་རྒྱ་གར་ཡུལ་ན་གྲགས་པ་མེད། །
རྒྱན་དྲུག་མཆོག་གཉིས་ཞེས་བྱར་བོད་ཀྱིས་བཏགས། །

ཞེས་གསུངས་པ་ལྟར། རྒྱ་གར་འཕགས་ཡུལ་དུ་འཛམ་གླིང་མཛེས་པར་བྱེད་པའི་རྒྱན་དྲུག་ཡོངས་སུ་གྲགས་པ་དྲུག་དང༌། སློབ་དཔོན་དཔའ་བོ་དང༌། སྒྲ་གཅན་འཛིན་བཟང་པོ། སློབ་དཔོན་ཡོན་ཏན་འོད། སློབ་དཔོན་ཆོས་སྐྱོང་བཅས་ལ་སློབ་དཔོན་ཆེན་པོ་བཞི་ཞེས་གྲགས་པ་དང༌། ངོ་མཚར་གྱི་གཏམ་བདུན་མངའ་བའི་རྒྱལ་སྲས་ཆེན་པོ་ཞི་བ་ལྷ་དང༌། རིག་པའི་གནས་ཡན་ལག་དང་བཅས་པ་ལ་མཁས་ཤིང་དངོས་གྲུབ་བརྙེས་པའི་སློབ་དཔོན་ཙནྡྲ་གོ་མི་གཉིས་ལ་རྨད་བྱུང་གི་སློབ་དཔོན་གཉིས་ཞེས་མཁས་པ་རྣམས་ཀྱིས་བསྔགས་བརྗོད་ཀྱིས་སྒྲོག་པར་མཛད་མོད། མཆོག་གཉིས་ཞེས་པའི་ཐ་སྙད་ནི་རྒྱ་གར་འཕགས་ཡུལ་དུ་མ་གྲགས་པས། རྒྱན་དྲུག་མཆོག་གཉིས་ཞེས་པ་ནི་བོད་ཀྱི་སྔོན་བྱོན་མཁས་པ་རྣམས་ཀྱིས་བཏགས་པ་ཞིག་ཡིན་པར་གསུངས་སོ།། སྔ་འགྱུར་རྙིང་མའི་མཁས་པ་ཆེན་པོ་རྣམས་ཀྱི་བཞེད་ཚུལ་ལ་མཚོན་ན། ཀློང་ཆེན་རབ་འབྱམས་པའི་(1308-1363)གྲུབ་མཐའ་མཛོད་ལས། མཁས་ཤིང་གྲུབ་པ་བརྙེས་པ་ཚད་མེད་ཀྱང༌། ཡོངས་སུ་གྲགས་པ་དྲུག་དང༌། མཆོག་བརྒྱད་ནི་ཉི་ཟླ་དང་ནོར་བུ་ལྟ་བུའོ། །རྒྱན་དྲུག་ནི། ཀླུ་སྒྲུབ་སྙིང་པོ་དང༌། ཐོགས་མེད། དབྱིག་གཉེན། ཕྱོགས་ཀྱི་གླང་པོ། ཆོས་ཀྱི་གྲགས་པ། ཡོན་ཏན་འོད་དོ། །མཆོག་བརྒྱད་ནི། དེ་རྣམས་ཀྱི་སྟེང་དུ། འཕགས་པ་ལྷ། ཙནྡྲ་གོ་མི། དཔའ་བོ་གསུམ་བསྣན་ནས། ཕྱོགས་གླང་ཕྲི་བའོ། །ཞེས་གསུངས་པ་ལྟར། རི་བོ་དགེ་ལྡན་པའི་ཕྱོགས་ལ་རྒྱན་དྲུག་མཆོག་གཉིས་ལས་རྒྱན་དྲུག་མཆོག་བརྒྱད་ཀྱི་ཐ་སྙད་མ་གྲགས་སོ། །

བོད་ཡིག་ཚིག་གཏེར་རྒྱ་མཚོ་ལས། མཆོག་བརྒྱད། ༡ཤེས་རབ་ཅན་གྱི་མཆོག་ནི་ཤཱ་རིའི་བུ་དང༌། ༢ རྫུ་འཕྲུལ་ཅན་གྱི་མཆོག་ནི་མཽའུ་འགལ་གྱི་བུ། ༣ ཟབ་མོ་ལ་མོས་མཆོག་ནི་རབ་འབྱོར། ༤ ལྷའི་མིག་ལྡན་མཆོག་ནི་མ་འགགས་པ། ༥ མལ་སྟན་བགོ་མཆོག་ནི་གྱད་ནོར་བུ། ༦ ཁྱིམ་བདག་དད་པ་སྐྱེས་མཆོག་ནི་འཆར་ཀ། ༧ མང་དུ་ཐོས་པའི་མཆོག་ནི་ཀུན་དགའ་བོ། ༨ བསླབ་པ་གུས་མཆོག་ནི་སྒྲ་གཅན་འཛིན། ཞེས་གསུངས་པ་དོན་གཅིག་ཡིན་ནམ་སྙམ། སྣང་བརྒྱད་ལས་དེ་ལས་གཞན་པར་གསུངས་སོ།།

དེ་བཞིན་འཇུ་མི་ཕམ་རིན་པོ་(1846-1912)ཆེས་མཛད་པའི་སྐད་གཉིས་ཤན་སྦྱར་ལས ། ཀླུ་སྒྲུབ། ཨཱརྱ་དེ་བ། འཕགས་པ་ཐོགས་མེད། སློབ་དཔོན་དབྱིག་གཉེན། སློབ་དཔོན་ཕྱོགས་ཀྱི་གླང་པོ། དཔལ་ཆོས་ཀྱི་གྲགས་པ་དང་དྲུག་གོ མཆོག་གཉིས་ནི་དེ་དྲུག་གི་ནང་ནས་ཤིང་རྟ་ཀླུ་ཐོགས་གཉིས་ལ་འདོད། ཅེས་གསུངས་ལ། དེ་བཞིན་བདུད་འཇོམས་ཆོས་འབྱུང་ལས་ ཀྱང༌། ཕལ་ཆེར་དུ་ཀླུ་ཐོགས་གཉིས་ལ་མཆོག་གཉིས་སུ་གྲགས་ཤིང༌། ཕྱི་མ་རྣམས་ཀྱི་སྟེང་དུ་སློབ་དཔོན་ཡོན་ཏན་འོད་དང༌། ཤཱཀྱ་འོད་བསྣན་པས་རྒྱན་དྲུག་ཏུའང་བྱེད་དོ། ཞེས་གསུངས་པ་ལྟར་རྒྱན་དྲུག་ཡོངས་གྲགས་དང་བཞེད་པ་མཐུན་ཡང༌། མཆོག་གཉིས་ཀྱི་བཞེད་ཚུལ་དཔལ་ས་སྐྱ་པ་དང་རི་བོ་དགེ་ལྡན་པའི་མཁས་པའི་བཞེད་ཚུལ་དང་མི་མཐུན་པ་དང༌། གཞན་ཡང་འཇུ་མི་ཕམ་རིན་པོ་ཆེས་མཛད་པའི་སྐད་གཉིས་ཤན་སྦྱར་ལས། ཡང་ཁ་ཅིག་མཆོག་གཉིས་ཤིང་རྟ་གཉིས་དང༌། དེའི་རྗེས་སུ་འཕགས་པ་ལྷ་སོགས་རྒྱན་དྲུག་གཞན་བཞེད་པ་དང༌། ཡོན་ཏན་འོད་དང་ཤཱཀྱ་འོད་རྣམ་པ་གཉིས་ལ་འདུལ་འཛིན་མཆོག་གཉིས་ཞེས་འདོད་པ་སོགས་ཡོད། ཅེས་གསུངས་སོ།།
ཡང་མཁའ་མཉམ་པའི་གཞུང་ལ་ལའི་མཇུག་ཏུ།
ཕན་བདེའི་འབྱུང་གནས་བསླབ་གསུམ་རྒྱན་གྱིས་སྤྲས། །
བཀའ་དང་བསྟན་བཅོས་སྒྲ་བསྒྱུར་གཏན་ལ་ཕབ། །
སངས་རྒྱས་བསྟན་པ་ཕྱོགས་བཅུར་རྒྱས་མཛད་པའི། །
མཁས་གྲུབ་ལོ་པཎ་རྣམས་ལ་ཕྱག་འཚལ་ལོ། །
ཞེས་པའི་ཚིག་བཅད་གཅིག་ཀྱང་སྣང་མོད།

འོན་ཀྱང་ཡོངས་གྲགས་ཀྱི་ཆོས་སྤྱོད་རྣམས་སུ་ཚིགས་སུ་བཅད་པ་འདི་ཉིད་མི་སྣང་ངོ༌། །
དེ་ལྟར་རྒྱ་གར་འཕགས་ཡུལ་དུ་རྒྱན་དྲུག་བཞུགས་པའི་དུས་ན། ཐེག་ཆེན་གྱི་སློབ་དཔོན་རྣམས་ཆེས་མཁས་ཤིང༌། དགེ་འདུན་ཡང་བཟང་པོར་ཡོད་ཚུལ་རྒྱ་གར་ཆོས་འབྱུང་དུ་གསལ་བ་ལྟར། རྒྱལ་བའི་གསུང་རབ་ཀྱི་དོན་ལ་དབང་འབྱོར་པའི་སློབ་དཔོན་མཐའ་ཡས་པ་བྱོན་ཏེ་གཙོ་བོར་ཕ་རོལ་ཏུ་ཕྱིན་པའི་བསྟན་པ་གསལ་བར་མཛད་པ་ལགས་སོ།།

དཔྱད་གཞིའི་ཡིག་ཆའི་ཁུངས།
༡) སི་ཁྲོན་མི་རིགས་དཔེ་སྐྲུན་ཁང༌། ༢༠༡༣ སྟོད་ཆ། ཤོག་གྲངས། ༦༠༩
༢) རྒྱ་གར་ཆོས་འབྱུང༌། སི་ཁྲོན་མི་རིགས་དཔེ་སྐྲུན་ཁང༌། ༡༩༩༤ ཤོག་གྲངས། ༢༢༨
༣) བདུད་འཇོམས་ཆོས་འབྱུང༌། སི་ཁྲོན་མི་རིགས་དཔེ་སྐྲུན་ཁང༌། ༡༩༩༦ ཤོག་གྲངས། ༥༠
༤) རྗེའི་གསུང་པོད་གསུམ་པ། གསུང་ཐོར་བུ། བཀྲས་ལྷུན་པར་མ། ཤོག ༥བ༤
༥) སྡོམ་སྡེ་ཚིག་མཛོད་ཆེན་མོ། ༢༠༡༣ ཐའེ་ཝན་པར་མ། གླེགས་བམ་དང་པོ། ཤོག་ ༤༡༨
༧) བོད་རྒྱ་ཚིག་མཛོད་ཆེན་མོ། མི་རིགས་དཔེ་སྐྲུན་ཁང༌། ༢༠༠༨ སྟོད་ཆ། ཤོག ༨༥༣
༨) རྒྱ་གར་ཆོས་འབྱུང༌། སི་ཁྲོན་མི་རིགས་དཔེ་སྐྲུན་ཁང༌། ༡༩༩༤ ཤོག་གྲངས། ༧
༩) ཀུན་མཁྱེན་གསུང་འབུམ་པོད། ༼ཙ༽ ཀྲུང་གོའི་བོད་རིག་པ་དཔེ་སྐྲུན་ཁང༌། ༢༠༠༩ ཤོག ༣༢
༡༠) སི་ཁྲོན་མི་རིགས་དཔེ་སྐྲུན་ཁང༌། ༢༠༡༣ སྟོད་ཆ། ཤོག་གྲངས། ༦༠༩
༡༡) འཇུ་མི་ཕམ་རིན་པོ་ཆེའི་སྐད་གཉིས་ཤན་སྦྱར་ཤོག་གྲངས་ ༡༢ མདུན་ཕྲེང་ ༦ པ།
༡༢)་བདུད་འཇོམས་ཆོས་འབྱུང༌། སི་ཁྲོན་མི་རིགས་དཔེ་སྐྲུན་ཁང༌། ༡༩༩༦ ཤོག་གྲངས། ༥༠
༡༣)་འཇུ་མི་ཕམ་རིན་པོ་ཆེའི་སྐད་གཉིས་ཤན་སྦྱར་ཤོག་གྲངས་ ༡༢ མདུན་ཕྲེང་ ༦ པ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།