རྟགས་རིགས་ཀྱི་རྣམ་བཞག་ལུང་རིགས་ཀྱི་སྙིང་པོ་བསྡུས་པ།

༄༅། །རྟགས་རིགས་ཀྱི་རྣམ་བཞག་ལུང་རིགས་ཀྱི་སྙིང་པོ་བསྡུས་པ་མཁས་པ་དགྱེས་བྱེད་ཅེས་བྱ་བ་བཞུགས་སོ།།[སྔོན་འགྲོའི་དཔར་གཞི།]་
@001A ༄༅༅། །མངོན་པ་གཉིས་ནས་བཤད་པའི་བློ་རིགས་དང་རྟགས་རིགས་ཀྱི་རྣམ་གཞག་ལུང་རིགས་ཀྱི་སྙིང་པོ་བསྡུས་པ་མཁས་པ་དགྱེས་བྱེད་ཞེས་བྱ་བ་བཞུགས་སོ།།
@001B ༄༅༅། །ན་མོ་ཤཱཀྱ་མུ་ན་ཡེ། །རྒྱལ་ཀུན་མཁྱེན་བརྩེའི་ཕུང་པོ་ཉིད། །དམར་སེར་མདོག་ཅན་གཞོན་ནུའི་སྐུ། །འཇམ་པའི་དབྱངས་ཞེས་གྲགས་པ་དེའི། །ཞབས་པད་སྙིང་གི་དབུས་སུ་བསྟེན། །འདིར་བློ་རྟགས་ཀྱི་རྣམ་
གཞག་ཅུང་ཟད་བཤད་པར་བྱ་སྟེ། དེ་ལ་དང་པོ་བློ་རིགས་ཀྱི་རྣམ་གཞག་རྒྱས་པར་ནི་བདག་ཉིད་ཀྱིས་གཞན་དུ་བྲིས་ཟིན་ཀྱང་དེའི་སྙིང་པོ་བསྡུས་ཏེ་བརྗོད་པ་ལ་གཉིས། རིགས་པའི་མངོན་པ་ནས་བཤད་པའི་ཚུལ་དང༌། ལུང་གི་མངོན་པ་
ནས་བཤད་པའི་ཚུལ་ལོ། །དང་པོ་ལ་གཉིས། བློ་རིགས་ཀྱི་རྣམ་གཞག་དང༌། དེ་ལ་དཔྱོད་པའི་སྒོ་བསྟན་པའོ།།

དང་པོ་ལ་གཉིས། མཚན་ཉིད་དང༌། དབྱེ་བའོ།། དང་པ་ནི། རིག་པ། བློའི་མཚན་ཉིད། གཉིས་པ་དབྱེ?་ངོ་བོའི་སྒོ་ནས་
གཙོ་སེམས་དང་སེམས་བྱུང་གཉིས་གསུངས་པ་ནི་འོག་ཏུ་འཆད་ཅིང༌། ཚད་མ་དང་ཚད་མིན་གྱི་ཤེས་པ་གཉིས་གསུངས་པའི་དང་པོ་ནི་རྣམ་འགྲེལ་ལས། ཚད་མ་སླུ་མེད་ཅན་ཤེས་པ། །ཞེས་བས་བསྟན་ཏེ། དེ་ལ་གཉིས་མཚན་ཉིད་
དང༌། དབྱེ་བའོ། དང་པོ་ནི་གསར་དུ་མི་སླུ་བའི་རིག་པ། ཚད་མའི་མཚན་ཉིད་ཚད་མའི་སྐད?་དོད་པྲ་མཱ་ན་ནི་མི་སླུ་བ་ཡ་འཇུག་ཅིང་དེ་ཡང་རང་ཡུལ་གསར་དུ་རྟོགས་པ་ལྟར་གྲུབ་པའི་དོན་དོན་ཏེ། ཡུལ་དེ་དང་པོའི་ཐོག་མར་འཇལ་པ་ལྟར་དོན་ལ་
གནས་པའོ།། གཉིས་པ་ཚད་མ་ལ་དབྱེ་ན་གཉིས། མངོན་སུམ་གྱི་ཚད་མ་དང༌། རྗེས་བདག་ཚད་མའོ།། དང་པོ་ལ་གཉིས་མཚན་ཉིད་དང༌། དབྱེ་བའོ།། དང་པོའི། རྟོག་པ་དང་བྲལ་ཞིང་མ་འཁྲུལ་པའི་གསར་དུ་མི་སླུ་བའི་
@002A ༄༅། །རིག་པ། མངོན་སུམ་གྱི་ཚད་མའི་མཚན་ཉིད། གཉིས་པ་དབྱེ་ན་བཞི་སྟེ། དེར་གྱུར་པའི་དབང་པོའི་མངོན་སུམ། ཡིད་ཀྱི་མངོན་སུམ། རང་རིག་མངོན་སུམ། རྣལ་འབྱོར་མངོན་སུམ་དང་བཞི། དབང་པོའི་མངོན་སུམ་ལ་དབྱེ་ན། མིག་གི་དབང་པོའི་
མངོན་སུམ་ནས། ལུས་ཀྱི་དབང་པོའི་མངོན་སུམ་དང་ལྔ་སྟེ། དེ་དག་ནི་གཟུགས་སོགས་ཡུལ་ལྔ་འཛིན་པའི་སྒོ་ནས་གཟུ(Gs) འཛིན་དབང་པོའི་མངོན་སུམ་ནས་རེག་འཛིན་དབང་པོའི་མངོན་སུམ་ཞེས་ཐ་སྙད་བྱེད་དོ།། ཡིད་མངོན་ནི། སོ་སྐྱེའི་རྒྱུད་ཀྱི་གཟུགས་འཛིན་དབང་
པོ་མངོན་སྐད་ཅིག་དང་པོའི་རྗེས་སུ་སྐྱེས་ཤིང་གཟུགས་གསལ་བར་སྣང་ཡང་དེ་ལ་དེས་པ་འདྲེན་མི་ནུས་པའི་ཡིད་ཤེས་ལྟ་བུའོ།། རང་རིག་ནི་རྣམ་འགྲེལ་ལས། རྟག་ཏུ་བདག་ལ་ནང་མངོན་ཕྱོགས། །རིག་བྱ་རིག་བྱེད་རྣམ་པ་མེད། །ཅེས་གསུངས་པ་ལྟར། སྔོན་འཛིན་ཉ(Ms)
སུམ་མྱོང་བའི་ཁ་ནང་ཁོ་ན་ལ་ཕྱོགས་པའི་འཛིན་རྣམ་ལྟ་བུའོ།། རྣལ་འབྱོར་མངོན་སུམ་ནི་རྟགས་ལམ་བརྟེན་པར་རྣལ་འབྱོར་གྱི་སྟོབས་ཀྱིས་རང་ཡུལ་བདེན་པ་ཕྲ་རགས་ཅི་རིགས་མངོན་སུམ་དུ་རྟོགས་པའི་ཡེ་ཤེས་རྣམས་ཏེ། འཕགས་པའི་རྒྱུད་ཀྱི་བདག་མེད་མངོན་
སུམ་དུ་རྟོགས་པའི་ཡེ་ཤེས་ཐམས་ཅད་དོ།། སྒྲ་དོན་ནི། གཟུགས་འཛིན་མིག་ཤེས་སོགས་ལྔ་པོ་དེ་ཆོས་ཅན། ཁྱོད་ལ་དབང་མངོན་ཞེས་བྱ་སྟེ། རང་གི་ཐུན་མོང་མ་ཡིན་པའི་བདག་རྐྱེན་མིག་གི་དབང་པོ་སོགས་དབང་པོ་གཟུགས་ཅན་ལྔ་པོ་གང་རུང་སྐྱེས་
བའི་མངོན་སུམ་ཡིན་པའི་རྒྱུ་མཚན་གྱིས་དེ་ལྟར་དུ་བརྗོད་པའི་ཕྱིར། སོ་སྐྱེའི་རྒྱུད་ཀྱི་གཞན་སེམས་ཤེས་པའི་མངོན་ཤེས་ཆོས་ཅན། ཁྱོད་ལ་ཡིད་མངོན་ཞེས་བྱ་སྟེ། ཡིད་དབང་ཙམ་གྱི་བདག་རྐྱེན་ལས་སྐྱེས་པའི་མངོན་སུམ་ཡིན་པས་ན་དེ་ལྟར་དུ་
@002B བརྗོད་པའི་ཕྱིར། མིག་གི་རྣམ་ཤེས་ཉམས་སུ་མྱོང་བའི་འཛིན་རྣམ་ཡིན་འགར་བ་དེ་ཆོས་ཅན། ཁྱོད་ལ་རང་རིག་མངོན་སུམ་ཞེས་བྱ་སྟེ། རང་གི་བདག་ཉིད་དུ་གྱུར་པའི་ཡུལ་ཁ་ནང་བལྟས་ཀྱི་ཚུལ་དུ་རིག་པས་ན་དེ་ལྟར་དུ་བརྗེད་པའི་ཕྱིར། བདག་མེད་མངོན་སུམ་དུ་རྟོགས་
བའི་འཕགས་པའི་ཡེ་ཤེས་ཆོས་ཅན། ཁྱོད་ལ་རྣལ་འབྱོར་མངོན་སུམ་ཞེས་བྱ་སྟེ། རྟགས་ལམ་ལྟོས་བར་རྣལ་འབྱོར་གྱི་སྟོབས་ཀྱིས་བདེན་པ་ཕྲ་རགས་གང་རུང་རྟོགས་པའི་མངོན་སུམ་ཡིན་པས་ན་དེ་ལྟར་དུ་བརྗོད་པའི་ཕྱིར་རོ།། གཉིས་པ་ལ་གཉིས་མཚན་ཉིད་དང༌།
དབྱེ་བའོ།། དང་པོ་ནི། རང་གི་རྟེན་རྟགས་ཡང་དག་ལ་བརྟེན་ནས་རང་གི་གཞལ་བྱ་ལྐོག་གྱུར་པ་ལ་གསར་དུ་མི་སླུ་བའི་རིག་པ་དེ། རྗེས་བདག་ཚད་མའི་མཚན་ཉིད། གཉིས་པ་དེ་ལ་སྒྲས་བརྗོད་རིགས་ཀྱིས་དབྱེ་ན། རང་དོན་རྗེས་དཔག་དང༌། གཞན་དོན་རྗེས་དཔག
གཉིས། དང་པོ་དང་རྗེས་དཔག་དོན་གཅིག་ཅིང༌། མཚན་གཞི་ནི་ཕག་གི?་དུ་བ་འདུག་པས་མེ་ཡང་ཡོད་ངེས་སྙམ་པ་དུ་བ་རྟགས་ལས་དུ་ལྡན་གྱི་ལ་ལ་མེ་ཡོད་པར་རྟོགས་པའི་རྗེས་དཔག་ལྟའུའོ།། གཉིས་པ་ནི། གང་བྱས་ན། མི་རྟག་པས་ཁྱབ། དཔེར་ན། བུམ་
པ་བཞིན་སྒྲ་ཡང་བྱས་སོ་ཞེས་བརྗོད་པའི་སྒྲུབ་ངག་ལྟ་བུ་སྟེ་རྗེས་དཔག་ཏུ་བཏགས་པ་ཙམ་མོ།། གཞན་ཡང་རྗེས་དཔག་ལ་རྣམ་གྲངས་ཀྱིས་དབྱེ་ན། དངོས་སྟོབས་རྗེས་དཔག། ཡིད་ཆེས་རྗེས་དཔག། དཔེ་ཉེར་འཇལ་གྱི་རྗེས་དཔག། གྲགས་པའི་རྗེས་དཔག
དང་བཞི་ཡོད་དེ། དང་པོ་ནི། བྱས་པའི་རྟགས་ལས་སྒྲ་མི་རྟག་པར་རྟོགས་པའི་རྗེས་དཔག་ལྟ་བུ། གཉིས་པ་ནི། སྦྱིན་པ་བཏང་བདག་ལས་ལོངས་སྤྱོད་དང་ཚུལ་ཁྲིམས་བསྲུང་པ་ལས་མངོན་མཐོ་འགྲུབ་བར་གསུངས་པ་སོགས་དཔྱད་གསུམ་གྱིས་
@003A ༄༅། །དག་བའི་ལུང་རྣམས་རང་གི་བསྟན་བྱའི་དོན་ལ་མི་སླུ་བར་རྟོགས་པའི་རྗེས་དཔག་ལྟ་བུ། གསུམ་བ་ནི། རྭ་དང་རྨིག་པ་དང་ནོག་དང་ལྐོག་ཤལ་སོགས་ཀྱི་རྟགས་ལས་བ་མེན་པ་ལང་དང་འདྲ་བར་རྟོགས་པའི་རྗེས་དཔག་ལྟ་བུ། བཞི་པ་ནི།
རི་བོང་ཅན་ལ་ཟླ་བའི་སྒྲས་བརྗོད་རུང་དུ་རྟོགས་པའི་རྗེས་དཔག་ལྟ་བུ་རྣམས་སོ།། རྗེས་དཔག་ཞས་བརྗོད་པའི་རྒྱུ་མཚན་ཡོད་དེ། ཕྱོགས་ཆོས་དང་ཁྱབ་འབྲེལ་ངེས་པའི་རྗེས་སུ་བསྒྲུབ་བྱ་དཔོག་ཅིང་ངེས་བར་བྱེད་པས་ན་དེ་ལྟར་དུ་བརྗོད་པའི་ཕྱིར་རོ།། མངོན་
སུམ་ཡིན་ན། རྟོག་པ་དང་བྲལ་དགོས་ཤིང༌། རྗེས་དཔག་ཡིན་ན། རྟོག་པ་ཡིན་དགོས་ལ། བྲལ་བྱའི་རྟོག་པ་ནི། སྒྲ་དོན་འདྲེས་རུང་དུ་འཛིན་པའི་རྟོག་པ་ཉིད་ཡིན་ཏེ། ཐར་ལམ་གསལ་བྱེད་དང་རིག་རྒྱན་ཆེན་མོ་ལས། ཆོས་དེའི་སྒྲ་སྤྱི་དང་དོན་སྤྱི་
གཉིས་ཡུལ་དུ་བྱེད་པའི་ཚེ་སྒྲ་དོན་འདྲེས་རུང་དུ་འཛིན་པ་ཡིན་ལ། འདྲེས་རུང་ཞེས་སྨོས་པ་ནི་བརྡལ་མ་བྱད་བའི་བྱིས་པའི་རྟོག་པས་སྒྲ་དོན་གང་རུང་ཞིག་ཡུལ་དུ་བྱེད་ཀྱི། སྒྲ་དོན་གཉིས་ཀ་ཚོགས་ནས་ཡུལ་དུ་བྱེད་མི་ནུས་པས་དེ་སྡུད་པའི་ཆེད་ཡིན་
བར་བཤད་ལ། འོན་ཀྱང་སྡེ་བདུན་མུན་སེལ་ལས་ནི། སྒྲ་དོན་ཞེས་བ་ནི་དོན་སྤྱི་ཉིད་ལ་བྱེད་ཀྱི་སྒྲ་སྤྱི་དང་དོན་སྤྱི་ཞེས་སོ་སོར་མི་གཅོད་པར་བཤེད་བརྟག། གཞལ་བྱ་ལ་རང་སྤྱི་གཉིས་སུ་གྲངས་ངེས་བས་ཚད་མ་ལ་མངོན་རྗེས་གཉིས་སུ་གྲངས་ངེས་པ་ཡིན་ཏེ། གཞལ་
བྱ་རང་མཚན་དངོས་ཡུལ་དུ་བྱེད་པའི་སྒོ་ནས་མངོན་སུམ་ཚད་མ་དང༌། སྤྱི་མཚན་དངོས་ཡུལ་དུ་བྱེད་པའི་ཆ་ནས་རྗེས་དཔག་ཚད་མ་བཞག་པའི་ཕྱིར་ཏེ། རྣམ་འགྲེལ་ལས། གཞལ་བྱ་གཉིས་ཕྱིར་ཚད་མ་གཉིས།། ཞེས་གསུངས་པའི་
@003B ཕྱིར། འཁྲུལ་ཤེས་ཡིན་ན། ཚད་མ་མ་ཡིན་པས་མ་ཁྱབ་སྟེ། རྗེས་དཔག་ཚད་མ་དེ་སྣང་ཡུལ་ལ་འཁྲུལ་ཡང་ཆོད?་མར་མི་འགལ་བའི་ཕྱིར་ཏེ། རྣམ་འགྲེལ་ལས། འཁྲུལ་བ་ཡིན་ཡང་ཚད་མ་ཉིད། །ཅེས་གསུངས་པའི་ཕྱིར། ཚད་མ་ནི་འདིར་ཡུ་འཇལ་པའི་ཤེས་པ་ཞིག
ལ་འཇོག་ཀྱང༌། སྤྱིར་སྐྱེས་བུ་ཚད་མ་དང་ཚད་དང་གྲངས་འཇལ་བའི་ཚད་མ་སོགས་ཡོད་དེ། དོན་ཇི་ལྟ་བ་བཞིན་གཟིགས་ནས་ངག་གིས་སྟོན་པ་ལ་མི་སླུ་བི་སྟོན་པ་སངས་རྒྱས་ལྟ་བུ་སྐྱེས་བུ་ཚད་མ་དང་ཚད་མའི་སྐྱེས་བུ་ཞེས་ཀྱན་བྱ་ལ། བྲེ་སྲང་ཚད་ལྡན་ལྟ་བུ་ཚད་དང་
གྲངས་འཇལ་བ་ལ་ཚད་མར་འཇོག་པ་སོགས་ཡོད་བའི་ཕྱིར་རོ།། གཉིས་པ་ཚད་མིན་གྱི་ཤེས་པ་ལ་གཉིས། མཚན་ཉིད་དང༌། དབྱེ་བའོ།། དང་པོ་ནི། གསར་དུ་མི་སླུ་བའི་ཤེས་པ་མ་ཡིན་པའི་རིག་པ་དེ། ཚད་མིན་གྱི་ཤེས་པའི་མཚན་ཉིད། གཉིས་པ་དེ་ལ་དབྱེ་ན་
སྤྱིར་དུ་མ་ཡོད་ཀྱང་འདིར་ལོག་རྟོག་སེལ་བའི་དབང་དུ་མཛད་ནས་ལྡར་བཤད་དེ། ལོག་ཤེས། ཐེ་ཚོམ། བཅད་ཤེས། ཡིད་དཔྱོད། སྣང་ལ་མ་དེས་པའི་བློ་དང་ལྔའོ། །དང་པོ་ནི། རང་གི་ཞེན་ཡུལ་ལ་འཁྲུལ་བའི་རིག་པ། རང་ཉིད་ལོག་ཤེས་ཡིན་པའི་མཚན་ཉིད། དེ་ལ་རྟོག
བ་ལོག་ཤེས་དང༌། རྟོག་མེད་ལོག་ཤེས་གཉིས་ཡོད་པ་ལས། རི་བོང་རྭ་དང་གང་ཟག་གི་བདག་ཡོད་པར་འཛིན་པའི་རྟོག་པ་དང༌། སྒྲ་རྟག་པར་འཛིན་པའི་རྟོག་པ་དང༌། ལས་འབྲས་སོགས་ཡོད་པའི་དོན་རྣམས་མེད་པར་འཛིན་པའི་རྟོག་པ་ལྟ་བུ་ནི་རྟོག་པ་ལོག
ཤེས་ཏེ་ཡིད་ཤེས་ཡིན་ལ་དུང་དཀར་སེར་འཛིན་དང༌། གངས་རི་སྡོར་སྣང་དང༌། སྨིན་རྒྱུ་ཆུར་སྣང་དང༌། ལྗོན་ཤིང་འགྲོར་སྣང་གི་དབང་ཤེས་སོགས་ནི་རྟོག་མེད་ལོག་ཤེས་ཡིན་ནོ།། གཉིས་པ་ནི་རང་ཡུལ་ལ་དོགས་པའི་སེམས་བྱུང་དེ། ཐེ་ཚོམ་གྱི་མཚན་
@004A ༄༅། །ཉིད༌།དེ་ལ་གསུམ་སྟེ་དོན་འགྱུར་ཐེ་ཚོམ་དང༌། དོན་མི་འགྱུར་དང༌། ཆ་མཉམ་དུ་དོགས་བའི་ཐེ་ཚོམ་མོ།། སྒྲ་རྟག་གམ་མི་རྟག་ཕལ་ཆེར་མི་རྟག་སྙམ་བ་དང༌། ལས་འབྲས་བདེན་ནམ་མི་བདེན་ཕལ་ཆེར་བདེན་སྙམ་བའི་ཐེ་ཚོམ་ལྟ་བུ་ཞི་དོན་
འགྱུར་ཐེ་ཚོམ་དང༌། སྒྲ་ལྟ་བུ་ཕལ་ཆེར་རྟག་སྙམ་པ་དང༌། ལས་འབྲས་ཕལ་ཆེར་མི་བདེན་སྙམ་པའི་ཐེ་ཚོམ་ལྟ་བུ་ནི་དོན་མི་འགྱུར་དང༌། དེ་དག་ལ་ཁྱད་མེད་མཉམ་དུ་དོ(Gs) པ་ནི་ཆ་མཉམ་པའི་ཐེ་ཚོམ་མོ།། གསུམ་པ་ནི་རྟོགས་ཟིན་རྟོགས་པའི་རིག་པ༌།
བཅད་ཤེས་ཀྱི་མཚན་ཉིད། དེ་ལ་གཉིས་ཏེ། མངོན་སུཾ་བཅད་ཤེས་དང༌། རྟོག་པ་བཅད་ཤེས་གཉིས་ལས། དང་པོ་ནི། སོ་སྐྱེའི་མངོན་སུམ་སྐད་ཅིག་གཉིས་?་ལྟ་བུ་དང༌། གཉིས་པ་ནི་རྗེས་དཔག་སྐད་ཅིག་གཉིས་པ་ལྟ་བུ་སྟེ། ཚད་མ་སྐད་ཅིག་སྔ་མས་
གསར་དུ་རྟོགས་ཟིན་པའི་དོན་ལ་སླར་བྱེད་པ་བསྣན་ནས་འཇུག་པ་ཙམ་ཡིན་གྱི་གསར་དུ་རྟོགས་པ་མིན་པའོ།། བཞི་བ་ནི་མྱོང་བ་དང་རྟགས་ཡང་དག་གང་རུང་ལ་མ་བརྟེན་པར་རང་ཡུལ་མཐའ་གཅིག་ཏུ་ངེས་པའི་ཞེན་རེག། ཡིད་དཔྱོད་ཀྱི་མཚན་ཉིད། དེ་ལ་ལྔ་
སྟེ། རྒྱུ་མཚན་འགལ་བའི་ཡིད་དཔྱོད། རྒྱུ་མཚན་མེད་པའི་དེ། རྒྱུ་མཚན་མ་ངེས་པའི་དེ། རྒྱུ་མཚན་མ་གྲུབ་པའི་དེ། རྒྱུ་མཚན་གཏན་ལམ་ཕབ་པའི་དེ་རྣམས་ལས། མཉན་བྱ་ཡིན་པའི་རྒྱུ་མཚན་གྱིས་སྒྲ་མི་རྟག་པར་འཛིན་པ་ལྟ་བུ་ནི་དང་པོ། རྒྱུ་མཚན་
མེད་པར་སྒྲ་མི་རྟག་པར་འཛིན་པ་ལྟ་བུ་གཉིས་པ། ཡོད་པ་ཡིན་པའི་རྒྱུ་མཚན་གྱིས་སྒྲ་མི་རྟག་པར་འཛིན་པ་ལྟ་བུ་གསུམ་པ། མིག་ཤེས་ཀྱིས་གཟུང་བྱ་ཡིན་པའི་རྒྱུ་མཚན་གྱིས་སྒྲ་མི་རྟག་པར་འཛིན་པ་ལྟ་བུ་བཞི་བ། སྒྲ་བྱས་པ་ཡིན་པ་ཙམ་རྒྱུ་མཚན་
@004B དུ་བྱེད་ཀྱང་བྱས་བར་མ་ངེས་པར་སྐུ་མི་རྟག་པའོ་སྙམ་དུ་འཛིན་པའི་ཡིད་དཔྱོད་ལྟ་བུ་ལྔ་བ་སྟེ། མདོར་ན་དོན་དེ་དང་དེ་ཡིན་པའི་རྒྱུ་མཚན་མི་ཤེས་བཞིན་དུ་དེ་དང་དེའི་མཉམ་དུ་དོན་མཐུན་དུ་འཛིན་བ་རྣམས་ཡིད་དཔྱོད་དོ།། ལྔ་བ་ནི། རང་གི་འཇུག་ཡུལ་གྱི་དོན་རང་མཚན་གསལ་བར་
སྣང་ཡང་དེ་ལ་ངེས་བ་འདྲེན་མི་ནུས་པའི་རིག་པ་དེ། སྣང་ལ་མ་ངེས་པའི་བློའི་མཚན་ཉིད། དེ་ལ་གསུམ་སྟེ། དེར་གྱུར་བའི་དབང་མངོན་དང༌། ཡིད་མངོན། རང་རིག་མངོན་སུམ་རྣམས་ལས་ཚུར་མཐོང་གི་གཟུགས་འཛིན་དབང་མངོན་སྐད་ཅིག་གཉིས་པ་ལྟ་བུ་ནི་དང་
བོ༑ དེའི་གཟུགས་འཛིན་ཡིན་མངོན་ལྟ་བུ། གཉིས་པ། དེའི་རྒྱུད་ཀྱི་རྟོག་པ་སྐད་ཅིག་ཐ་མ་ཉམས་སུ་མྱོང་བའི་རང་རིག་ལྟ་བུ་གསུམ་པའོ།། མདོ?་ན་རང་གི་རྟོགས་བྱའི་དངོས་པོ་དེ་རང་ལ་གསལ་བར་སྣང་ཡང་དེ་ཡིན་བའི་ངེས་པ་འདྲེན་མི་ནུས་པའི་ཤེས་པ་
ཞིག་སྟེ། སྐྱེས་མ་ཐག་བའི་?་པའི་ཤེས་པ་ཕལ་ཆེར་རོ། གཉིས་པ་དཔྱོད་པའི་སྒོ་བསྟན་པ་ལ། རྣམ་འགྲེལ་ལས། མདོན་སུམ་ལྟར་སྣང་རྣམ་པ་བཞི། །ཞེས་གསུངས་པ་ལྟར། མངོན་སུམ་ལྟར་སྣང་དེ་ལ་དུ་མ་ཡོད་དེ། འཁྲུལ་རྒྱུ་ཡུལ་ལ་ཡོད་པ་དང༌། རྟེན་
ལ་ཡོད་པ་དང༌། གནས་ལ་ཡོད་པ་དང༌། དེ་མ་ཐག་རྐྱེན་པ་ཡོད་པ་དང་བཞི་ཡོད་བའི་ཕྱིར་ཏེ། མགལ་མེ་མྱུར་དུ་བསྐོར་བ་ལས་འཁོར་ལོར་སྣང་བའི་དབང་ཤེས་སྐྱེ་བ་ལྟ་བུ་ནི་འཁྲུལ་རྒྱུ་ཡུལ་ཡོད་པ་ཡིན་ལ། རབ་རིབ་ཀྱིས་མིག་བསླད་པས་ཟླ་བ་གཉིས་སུ་སྣང་བའི་
དབང་ཤེས་སྐྱེ་བ་ནི་འཁྲུལ་རྒྱུ་རྟེན་ལ་ཡོད་པ་དང༌། གྲུར་ཞུགས་ནས་འགྲོ་བ་ན་ཕ་རོལ་ཚུ་རོལ་གྱི་རི་ལྗོན་འགྲོར?་སྣང་གི་དབང་ཤེས་སྐྱེ་བ་ནི་འཁྲུལ?་རྒྱུ་གནས་ལ་དང༌། ཡིད་ཞེ་སྡང་གིས་དཀྲུགས་པ་ལས་ས་གཞིར་དམར་སྣང་གི་དབང་ཤེས་སྐྱེ་བ་ལྟ་བུ་ནི་
@005A ༄༅། །འཁྲུལ་རྒྱུ་དེ་མ་ཐག་རྐྱེན་ལ་ཡོད་པའི་དབང་གིས་ཡིན་པའི་ཕྱིར་ཏེ། རྒྱུ་དེ་དག་གི་དབང་གིས་དང་པོ་དེ་འགལ་མེའི་དབྱིབས་སམ་རྣམ་པ་ལ་འཁྲུལ། གཉིས་པ་ནི་ཟླ་བའི་གྲངས་ལ་འཁྲུལ། གསུམ་པ་ནི་རི་ལྗོན་གྱི་བྱ་བ་ལ་འཁྲུལ། བཞི་པ་ནིས་གཞིའི་ཁ་
དོག་ལ་འཁྲུལ་པའི་ཕྱིརོ།། རྟོག་མེད་དབང་ཤེས་རྣམས་ནི་རྣམ་པ་དང་གྲངས་དང་དུས་སོགས་ངོ་བོ་དང་ཁྱད་པར་གང་ལ་འཁྲུལ་ནའང་འཁྲུལ་བར་འཇོག་པ་ཡིན་ཏེ། རིགས་རྒྱན་ལས། དེས་ན་རྟོག་མེད་ཀྱི་ཤེས་པ་རྣམས་རང་ཡུལ་ཆ་གཅིག་ལ་འཁྲུལ་ན?་ད?་དག
ཉིད་ཐམས་ཅད་ལ་འཁྲུལ་བ་དང༌། ཞེས་གསུངས་པའི་ཕྱིར། འཕགས་བོད་ཀྱི་པཎ་ཆེན་ཁ་ཅིག་སྔར་བཤད་པའི་ཤེས་པ་དེ་དག་རང་གི་དམིགས་པ་ལ་མ་འཁྲུལ་ཏེ། དང་པོ་མེད་དང་གཉིས་པ་ཟླ་བ་དང་གསུམ་པ་རི་ལྗོན་དང་བཞི་པས་གཞི་པ་མ་
འཁྲུལ་བའི་ཕྱིར་ན། དེ་དག་ལའང་ཚད་མ་སྲིད་ཅེས་བཞེད་མོད་རང་ལུགས་ནི་དེ་དག་འཁྲུལ་ཤེས་དང་ལོག་ཤེས་ཀྱང་ཡིན་ནོ།། འོན་བར་སྣང་གི་ཉི་ཟླ་རྒྱུ་སྐར་སོགས་ཀྱི་དཀྱིལ་འཁོར་དང་རྒྱང་རིང་པོའི་གཟུགས་ལ་བལྟས་པའི་ཚེ་དེ་དག་རང་གི་ཚད་ལས་ཆུང་
དུར་སྣང་བའི་དབང་ཤེས་དེ་འཁྲུལ་ཤེས་སུ་འཇོག་གམ་མི་འཇོག། འཇོག་ན་མི་འཐད་དེ། དེ་ལྟ་ན་ཚུལ་མཐོང་གི་མིག་ཤེས་ཚང་མས་རྒྱད་རིང་པོའི་རི་དང་ལྗོན་ཤིང་སོགས་གང་ཡང་མི་མཐོང་བར་ཐལ་བའི་ཕྱིར། མི་འཇོག་ནའང་མི་འཐད་དེ། དེའི་ཆོ་
དེ་དག་རང་རང་གི་ཚད་ལས་ཆུང་བར་སྣང་བས་ཚད་ལ་འཁྲུལ་བའི་ཕྱིར་ཞེ་ན། སྐྱོན་མེད་དེ། དེའི་ཚེ་རྒྱད་རིང་པོ་ན་ཡོད་པའི་གཟུགས་དེ་དག་མཐོང་བའི་མིག་ཤེས་ཚད་མ་དེ་འཁྲུལ་ཤེས་མ་ཡིན་ཡང༌། དེ་དག་རང་རང་གི་ཚད་ལས་ཆུང་བར་སྣང་བའི་དབང་ཤེས་
@005B དང་དེ་ལྟར་འཛིན་པའི་ཡིད་རྟོག་རྣམས་ནི་འཁྲུལ་ཤེས་སུ་འཇོག་རིགས་པའི་ཕྱིར་ཏེ། དང་པོ་གྲུབ་སྟེ། དབང་མ?་དོན་ཡིན་པའི་ཕྱིར། གཉིས་པ་གྲུབ་སྟེ། མཁས་གྲུབ་རྗེས་སྡེ་བདུན་ཡིད་ཀྱི་མུན་སེལ་ལས། མྱ་དམ་ཀྱི་ཐང་དུ་རྒྱང་རིང་པོ་ནས་བལྟས་པའི་ཚོ་གོང་བུ་ཆུང་དུ་ཡང་ཆེན་
པོར་སྣང་བའི་མིག་ཤེས་ལྟ་བུ་ཚད་ལ་འཁྲུལ་བའི་ཤེས་པ། ཞེས་གསུངས་པའི་ཕྱིར། འོ་ན༑ ཉི་ཟླ་འཆར་ནུབ་ཀྱི་དུས་སུ་རི་རྩེ་ལ་འབྱར་བ་ལྟར་སྣང་བའི་མིག་ཤེས་དེ་འཁྲུལ་ཤེས་མིན་ནམ་མ་ཡིན་ནམ། ཞེ་ན། སྔ་མ་དང་འདྲ་སྟེ་རི་རྩེ་ལ་འབྱར་བ་ལྟར་སྣང་བའི་ཉི་ཟླ་
སོགས་ཀྱི་དཀྱིལ་འཁོར་གྱི་གཟུགས་མཐོང་བའི་མིག་ཤེས་ཚད་མ་དེ་དབང་མངོན་ཡིན་པས་མ་འཁྲུལ་ཡང༌། རི་རྩེར་འབྱར་བ་ལྟར་འཛིན་པའི་མིག་ཤེས་དང་དེ་ལྟར་འཛིན་པའི་རྟོག་པ་དེ་འཁྲུལ་ཤེས་ཡིན་པའི་ཕྱིར། དང་པོ་གྲུབ་སྟེ། སྡེ་བདུན་མུན་སེལ་ལས། ཉི་
མ་རི་རྩེ་ལ་འབྱར་བ་ལྟ་བུ་ཡང་འཁྲུལ་བར་བཞེད་པ་འཐད་པར་མ་མཐོང་སྟེ། ཞེས་པ་ནས། ཉི་མའི་དཀྱིལ་འཁོར་དང་རིའི་བར་གྱི་ནམ་མཁའ་མ་མཐོང་བ་ཡིན་གྱི་ཞེས་གསུངས་པའི་ཕྱིར། དེའི་དོན་ནི་བར་སྣང་གི་སྐབས་ཡོད་ཀྱི་གཟུགས་མ་མཐོང་བའོ། ཕྱི་མ་
གྲུབ་སྟེ། དེའི་ཚེ་དོན་ལ་ཉི་ཟླ་རི་རྩེ་ལ་འབྱར་བ་ལྟར་མེད་པའི་ཕྱིར་རོ།། ?་སོས་ཁའི?་དུས་སུ་བྱེ་མ་སྐྱ་བོའི་ཡུལ་དང་ཉེ་བའི་ཚེ་ཆུ་མེད་བཞིན་དུ་སྔོ་འཁྲེགས་འཁྲེགས་རྒྱུགས་པའི་སྨིག་རྒྱུའི་ཆུ་མཐོང་བའི་མིག་ཤེས་དེ་ཚད་མ་ཡིན་ན་མ་ཡིན་ཞེ་ན། སྔ་མ་དང་འདྲ་སྟེ།
དེའི་ཚེ་སྨིག་རྒྱུའི་ཆུ་མཐོང་བའི་མིག་ཤེས་དེ་ཚད་མ་ཡིན་ཡང༌། སྨིག་རྒྱུ་ལ་ཆུར་འཛིན་པའི་དབང་ཤེས་དང་རྟོག་པ་རྣམས་ནི་འཁྲུལ་ཤེས་སུ་འཇོག་རིགས་པའི་ཕྱིར། དང་པོ་གྲུབ་སྟེ། སྡེ་བདུན་མུན་སེལ་ལས། སྨིག་རྒྱུའི་ཁ་དོག་མཐོང་བའི?་མངོན་སུམ་
@006A ༄༅། །ཡང་སྔ་ཞིང་འབྱུགས་པའི་ཆ་ལ་ཚད་མ་ཡིན་ཞིང༌། དེ་ལ་ངེས་པ་དྲངས་པ་ཡིན་ཏེ། དེའི་ཚེ་སྔོ་འཁྱུག་པ་ཙམ་ཡང་མ་མཐོང་ན་ཆུར་སྒྲོ་འདོགས་པ་ག་ལ་འགྱུར། ཞེས་གསུངས་པའི་ཕྱིར། ཕྱི་མ་གྲུབ་སྟེ། སྨིག་རྒྱུ་ཆུ་མ་ཡིན་པའི་ཕྱིར། ཡང༑
ལམ་ཀྱི་དབང་གིས་ཡི་དགས་འགའ་ཞིག་གི་མིག་ཤེས་ལ་བལྟ་བྱའི་ཆུ་ཀླུང་རྣག་ཁྲག་ཏུ་སྣང་བའི་ཚེ་མིག་ཤེས་དེ་དག་ཚད་མ་ཡིན་ནམ་མ་ཡིན། ཡིན་ན༑ མི་འཐད་དེ། གངས་རི་སྡོར་སྣང་གི་དབང་ཤེས་ལ་ཚད་མ་མི་སྲིད་པ་ལྟར་ཆུ་ཀླུང་རྣག་ཁྲག་ཏུ་སྣང་བ་ལའང?་
མཚུངས་པའི་ཕྱིར། མ་ཡིན་ན་མི་འཐད་དེ། དེའི་ཚེ་ལས་ཀྱི་དབང་གིས་རྣག་ཁྲག་ཚད་གྲུབ་པ་འབྱུང་བའི་སྲིད་པའི་ཕྱིར། དེར་ཐལ། ཚངས་ཅོད་མ་ལས། ཆུ་ཡང་རྣག་ཁྲག་ཉིད་དུ་མཐོང༌།། ཞེས་པ་དང༌། ལས་ཅན་གྱི་ལྷ་མི་ཡི་དགས་གསུམ་གྱིས་བརླན་ཞིང་གཤེར་
པ་ཕོར་བ་གང་ལ་ཅིག་ཆར་དུ་བལྟས་པའི་ཚེ་དངོས་པོ་ཚད་གྲུབ་པ་གསུམ་འབྱུང་སྲིད་བར་བཤད་པའི་ཕྱིར་ཏེ། ནི་ཤུ་བ་ལས། དངོས་གཅིག་ཡིད་ནི་ཐ་དད་ཕྱིར། །ཞེས་གསུངས་པའི་ཕྱིར། ཞེ་ན། རྒྱུ་མཚན་དེ་ཉིད་ཀྱིས་ན་དེའི་ཚེ་ཁ་ལྟ་བྱའི་ཆུ་ཀླུང་རྣག་ཁྲག་ཏུ་
སྣང་བའི་དབང་ཤེས་ལ་ཚད་མ་ཡིན་པ་མིན་གཉིས་ཡོད་པས་གངས་རི་སྡོར་སྣང་གི་དབང་ཤེས་དང་མི་མཚུངས་སོ།། ཡང༑ མར་མེའི་རྩེར་མོ་ཁྲ་སྒོར་སྣང་བའི་མིག་ཤེས་དེ་ཆད་མ་ཡིན་ནམ་མ་ཡིན། ཡིན་ན་མི་འཐད་དེ། མར་མེའི་རྩེ་མོ་ན?་དེ་ལྟ་བུའི་ཁྲ་
སྒྲར་མེད་བའི་ཕྱིར། མ་ཡིན་འང་མི་འཐད་དེ། མར་མེའི་རྩེ་མོར་ཁྲ་སྒོར་སྣང་བའི་མིག་ཤེས་ཀྱིས་མར་མེའི་རྩེ་མོ་མངོན་སུམ་མཐོང་བའི་ཕྱིར་ཏེ། སྡེ་བདུན་མུན་སེལ་ལས། མར་མེའི་རྩེ་མོ་ཁྲ་སྒོར་སྣང་བའི་དབང་ཤེས་གྱིས་ཀྱང་མར་མེའི་རྩེ་མོ་ངོན་
@006B སུམ་དུ་མཐོང་བར་འདོད་དགོས་ཤིང༌། འདི་དག་མངོན་སུམ་དུ་མཐོང་བར་མྱོང་བས་གྲུབ་བོ།། ཞེས་གསུངས་པའི་ཕྱིར་ན། སྐྱོན་མེད་དེ། དེའི་ཚེ་མར་མེའི་རྩེ་ན་ཁྲ་སྒོར་ཡོད་པར་འཛིན་པའི་ཤེས་པ་རྣམས་འཁྲུལ་ཤེས་སུ་འཇོག་ཀྱང༌། མར་མེའི་རྩེ་མོ་ཁྲ་སྒོར་དང་བཅས་པ་
སྣང་བ་ཙམ་གྱིས་འཁྲུལ་ཤེས་སུ་མི་འཇོག་པའི་དོན་ཡིན་པ་འདྲ་སྟེ་དཔྱད་བར་བྱའོ། །ཡང༌། ཁྲ་འཛིན་དབང་མངོན་གྱིས་ཟ་འོག་ལྟ་བུའི་ཁྲ་བོ་ལ་བལྟས་པའི་ཚེ་ཁྲ་འཛིན་མིག་ཤེས་གཅིག་སྐྱེས་པ་ཡིན་ནམ། ཆ་ཤས་ཀྱི་གྲངས་དང་མཉམ་པའི་མིག་ཤེས་རེ་རེ་
སྐྱེས་པ་གང་ཡིན། དང་པོ་ཡིན་ན། དེའི་ཚེ་སེར་པོ་ལྟ་བུ་གཅིག་མཐོང་བའི་ཆ་དེས་དམར་པོ་སོགས་མཐོང་ངམ་མི་མཐོང་མཐོང་ན་ཤེས་པའི་ཆ་གཅིག་གིས་ཡུལ་གྱི་ཆ་ཐམས་ཅད་མཐོང་བར་ཐལ་ཞིང༌། མི་མཐོང་ན་ནི་ཆ་རེ་རེ་ལ་བལྟོས་པའི་ཤེས་པ་ཡང་རེ་རེ་སྐྱེ་དགོས་པར་
འགྱུར་རོ།། གཉིས་པ་ལྟར་ནའང་མི་འཐད་དེ། དེ་ལྟར་འདོད་པ་དེའི་ཚེ་ཆ་གྲངས་མེད་པ་ལ་བལྟས་པའི་མིག་ཤེས་ཀྱང་གྲངས་མེད་པ་ཞིག་སྐྱེ་བར་ཁས་ལེན་དགོས་ན་མི་འཐད་དེ། ཧ་ཅང་ཐལ་བའི་ཕྱིར་རོ།། ཞེ་ན། སྐྱོན་མེད་དེ། དེའི་ཚུལ་ནི་སྡེ་བདུན་མུན་
སེལ་ལས། དེའི་ཚེ་རྣམ་པ་སོ་སོ་བ་དེ་དག་མིག་ཤེས་ཀྱི་ཆ་ཤས་ཡིན་ལ། དེ་དག་ཚོ(Gs) པའི་ཆ་ཅན་དུ་གྱུར་པའི་རྣམ་པ་ཁྲ་འཛིན་མིག་ཤེས་ཡིན་ཅིང༌། ཆ་ཤས་དེ་དག་ཆ་ཅན་དང་རྫས་གཅིག་ཡིན་ལ། ཆ་ཤས་ནང་ཕན་ཚུན་རྫས་ཐ་དད་དོ་ཞེས་ཤེས་པར་བྱ་ཞིང་
ཞེས་གསུངས་པ་ལྟར་འདོད་པར་བྱའོ།། འོན་ཀྱང་ཚུལ་འདི་དཀའ་སྟེ། འདིའི་དབང་གིས་འཕགས་ཡུལ་གྱི་མཁས་པ་ལའང་གཟུང་འཛིན་གྲངས་མཉམ་དང་སྣ་ཚོགས་གཉིས་མེད་དང་སྒོ་ང་ཕྱེད་ཆ་ལ་སོགས་ཀྱི་ལུགས་མི་འདྲ་བ་བྱུང་ངོ།། ཡང༑ ཤེས་པ་རྣམས་ལ་
@007A ༄༅། །?་ཀྱི་?་ཤར་ནས་འཛིན་ནམ་མ་ཤར་བར་?་?་དུ་འཛིན། དང་པོ་ལྟར་ན། རྣམ་པ་དེ་དག་ཤེས་པ་ཡིན་ནམ་མིན། ཤེས་པ་ཡིན་ན་མི་འཐད་དེ། དེའི་ཡུལ་གྱི་དོན་རྣམ་ཀྱང་ཤེས་པ་ཉིད་དུ་ཐལ་ལོ།། མ་ཡིན་ན་མི་འཐད་དེ། སྡེ་བདུན་མུན་
སེལ་ལས། མིག་ཤེས་ཀྱི་གཟུང་རྣམ་མིག་ཤེས་ཡིན་པའི་རྒྱུ་མཚན་ཅི་ཡིན་ཞེ་ན་བཤད་པར་བྱ་སྟེ། འདི་ལྟར་མིག་ཤེས་ཀྱི་གཟུངས་རྣམ་མི་གཤེས་མ་ཡིན་ན། འོས་གཞན་མེད་བས་མིག་ཤེས་གྱི་ཡུལ་ཡིན་པར་འདོད་དགོས་ན་དེ་མི་འཐད་དེ། ཞེས་གསུངས་པའི་
ཕྱིར་ན། སྐྱོན་མེད་དེ། དེ་ནི་མིག་ཤེས་སོགས་ཀྱི་ཤེས་རྣམ་ནི་ཤེས་པ་དེ་དང་དེའི་གཟུང་རྣམ་ཡིན་པར་འདོད་དགོས་པའི་དོན་ཏེ། དེའི་ཚེ་ཡུལ་གྱི་རྣམ་བ་ཤར་ནས་འཛིན་བས་ཡུལ་གྱི་དོན་རྣམ་ཡོད་ཁྱད་མི་གཤེས་སོགས་ཀྱི་དོན་རྣམ་ནི་མིག་ཤེས་སོགས་ཀྱི་རྣམ་པ་
མ་ཡིན་ནོ་ཞེས་བྱ་སྟེ་ཚུལ་གཉིས་སོ། །བྱེ་བྲག་སྨྲ་བ་མ་གཏོགས་བའི་རང་སྡེ་རྣམས་ཀྱིས་ཤེས་པ་གང་ཡིན་ཀྱང་རང་གི་ཡུལ་འཛིན་ཕན་ཡུལ་གྱི་རྣམ་བ་ཤར་ནས་འཛིན་པར་འདོད། །བྱ་བྲག་སྨྲ་བས་ཤེས་པ་ལ་གཟུང་རྣམ་མི་འདོད་ཅིང༌། དེ་ལ་མྱོང་བ་གསལ་
རིག་གི་ཆ་ཁས་ལེན་ཀྱང༌། རང་རིག་ལས་མི་ཡིན་ཏེ། སྡེ་བདུན་མུན་སེལ་ལས། བྱེ་བྲག་སྨྲ་བའང་ཤེས་བ་རྣམས་ཀྱི་མྱོང་བ་?་ལ་རིག་གི་ཆ་དེ་ལྟ་བུ་ཁས་ལེན་མོད་ཀྱི། འོན་ཀྱང་དེ་རང་རིག་ཏུ་ཁས་མི་ལེན་པ་ཡིན་ལ། (E'I)་རྒྱུ་མཚན་ལང་ཤེས་པ་རྣམ་མེད་
དུ་ཁས་ལེན་པས་གཟུང་རྣམ་ཤེས་བྱ་བ་ཅུང་ཟད་ཀྱང་ཁས་མི་ལེན་ལ། ཞེས་གསུངས་པའི་ཕྱིར། བྱེ་བྲག་ཏུ་སྨྲ་བས་ཤེས་པ་ནམ་མེད་དུ་ཁས་བླངས་པ་ལ། མདོ་སྡེ་པ་སོགས་ཀྱིས་སྐྱོན་འདི་ལྟར་དུ་བརྗོད་དེ། འོ་ན་དགྲ་གཉིད་གཉིས་ཀྱིས་སྐྱེས་བུ་ཅིག
@007B གི་གཟུགས་ལ་ཅིག་ཆང་དུ་བལྟས་པའི་ཚེ། སྐྱེ་བ་དུ་གཅིག་པོ་དེའི་གཟུག་དེ་འདོད་མི་འདོད་གཉིས་ཀའི་བདག་ཉིད་དུ་ཐལ་ཏེ། དེའི་ཚེ་དགྲ་གཉེན་དེ་གཉིས་ཀྱི་ཤེས་པ་ལ་འདོད་མི་འདོད་གཉིས་སུ་སྣང་བ་གང་ཞིག། རྣཾ་པ་མ་ཤར་འ?་ཆེར་དུ་མཐོང་བའི་ཕྱིར་རྟགས་
ཁས་ཞས་སྨྲས་ཏེ། རྣམ་འགྲེལ་ལས། མ་ཡིན་དུ་མའི་བདག་སྐྱོན་ཕྱིར།། ཞེས་གསུངས་པའི་ཕྱིར་རོ། །འདོད་མི་ནུས་ཏེ། དེ་གཉིས་ཕན་ཚུན་འགལ་བའི་ཕྱིར་རོ། །ཡང་དབང་ཤེས་ལ་ཟླ་བ་གཉིས་སྣང་བ་དང་སྐྲ་ཤ་དང་འཇིག་སྣང་དང་སྨིག་རྒྱུ་ཆུར་སྣང་དང་གཟུགས་
བརྙན་བྱང་བཞིན་དུ་སྣང་བའི་སྣང་བདེ་རྣམས་ནི་དངོས་པོ་ཡིན་ནམ་མ་ཡིན། ཡིན་ན་རྟོག་པ་ལ་བུམ་པར་སྣང་བ་སོགས་ཀྱང་དངོས་པོར་འགྱུར་ལ། མ་ཡིན་ན། མི་འཐད་དེ། སྟོང་མཐུན་ཆེན་མོ་ལས། དབང་ཤེས་ལ་སྐྲ་ཤད་དུ་སྣང་བའི་སྣང་བ་དང་སྨིག་རྒྱུ་?་?་
བའི་སྣང་བ་དང་གཟུགས་བརྙན་བྱང་བ་ནི་ན་དུ་སྣང་བའི་སྣང་བ་རྣམས་གཟུགས་ཀྱི་སྐྱེ་མཆེད་ཡིན་ཏེ། དབང་ཤེས་ཀྱི་སྣང་ཡུལ་དུ་གྱུར་པའི་གཟུགས་ཡིན་པའི་ཕྱིར་རོ། །ཞེས་གསུངས་པའི་ཕྱིར་ཞེ་ན། བརྟག་པ་ཕྱི་མཁས་ཡིན་ཅིང༌། དང་པོ་ཁས་ལེན་པ་མ་ཡིན་ཏེ། ?་
བའི་སྣང་ཡུལ་དང་དབང་ཤེས་ཀྱི་སྣང་ཡུལ་མི་འདྲ་བའི་ཕྱིར་ཏེ། རྟོག་པའི་སྣང་ཡུལ་རྣམས་ནི་འདུས་མ་བྱས་ཡིན་པའི་ཕྱིར་དང༌། ཁྱད་པར་རྨི་ལམ་གྱི་མི་དང་རྟ་གླང་སོགས་དང་མི་?་བསྒོམ་པའི་ཡིད་ཤེས་ཀྱི་(SNNA)ང་བ་སོགས་ནི་ཀུན་བཏགས་པའི་
གཟུགས་སམ་ཆོས་ཀྱི་སྐྱེ་མཆེད་ཀྱི་གཟུགས་ཞེས་གྲགས་པ་དེ་ཡིན་པའི་ཕྱིར་ཏེ། སྟོང་(MTHN)་ལས༑ དེ་ཡང་ཡིད་ཤེས་ཁོ་?་ནི་ཡུལ་དུ་གྱུར་བའི་ཆོས་ཀྱི་སྐྱེ་མཆེད་ཀྱི་གཟུགས་ཡིན་ཞིང༌། དེའི་ནང་ནས་ཀུན་བཏགས་པའི་གཟུགས་ཡིན་ལ། མི་སྡུག་བ་
@008A ༄༅། །བསྒོམས་མའི་ཡིད་ལ་ས་གཞི་ཀེང་དུས་ཀྱིས་གང་ཕར?་སྣང་པ་འབད་དང་འདྲའོ༌།།ཤེས་གསུངས་པའི་ཕྱིར། ཡང་བུམ་འཛིན་མིག་ཤེས་ངེས་བུམ་པའི་གཟུགས་ཀྱི་?་ཕྲན?་རྣམས་མཐོང?་ངམ་མས?་ཐོང༌། མཐོང་ན་བུམ་ནང་གི་རྡུལ་ཡང་མཐོང་པར་
ཐལ་ལོ།། མི་མཐོང་ན་མི་འཐད་དེ། དབང་ཤེས་ཡུལ་ལ་སྒྲུབ་འཇུག་ཡིན་པའི་ཕྱིར་དང༌། རྣམ་འགྲེལ?་ལས། གང་ཕྱིར་དངོས་པོ་མཐོང་བ་ཡིས། །ཡོན་ཏན་མཐའ་དག་མཐོང་བ་ཉིད། །ཅེས་གསུངས་པའི་ཕྱིར་ན། སྐྱོན་མེད་དེ། བུམ་འཛིན་དབང་མངོན་གྱིས་
བུམ་བའི་རྡུལ་ཕྲན་ཡན་འགར་བ་མི་མཐོང་ཡང༌། ཆ་ཅན་བུམ་པ་དང་འབྲེལ་བའི་རྡུལ་ཕྲན་མཐོང་བའི་ཕྱིར། དང་པོ་གྲུབ་སྟེ། རྣམ་འགྲེལ་ལས། དེ་ཕྱིར་དབང་ཡུལ་རྡུལ་ཕྲན་མིན། །ཞེས་གསུངས་པའི་ཕྱིར། ཕྱི་མ་གྲུབ་སྟེ། རྣམ་འགྲེལ་ཊིཀ?་ཆེན་ཐར་ལམ་གསལ་བྱེད་
ལས། དབང་ཤེས་ཀྱི་གཟུང་དོན་གྱི་རྡུལ་ཐན་དེ་དག་ལ་བསགས་པ་ཞེས་སྒྲས་བརྗོད་པའི་རྒྱུ་མཚན་ཡོད་དེ། ཞེས་གསུངས་པའི་ཕྱིར། བུམ་འཛིན་རྟོག་པ་དེས་བུམ་བའི་མཆུ?་ཞབས་དང་རྡུལ་ཕྲན་སོགས་དངོས་སུ་མི་འཛིན་ཏེ། དེ་བུམ་པ་ལ་སེལ་འཇུག་ཡིན་པའི་ཕྱིར་ཏེ།
སྒྲ་རྟོག་ཡུལ་ལ་སེལ་འཇུག་ཏུ་མཚུངས་པའི་ཕྱིར་ཏེ། རྣམ་འགྲེལ་ལས། སྤྱི་བརྗོད་དང་ཚུལ་ཅན་སྒྲ་དང༌།། རྟོག་པའང་དེ་དང་དོན་གཅིག་ན།། ཞེས་གསུངས་པའི་ཕྱིར། ཡང་དབང་ཤེས་དང་རྟོག་པ་གཉིས་ལ་ཡུལ་གསལ་བར་སྣང་བ་འདྲའམ་མི་འདྲ་
ཞེ་ན། མི་འདྲ་སྟེ། ཡུལ་གསལ་བར་སྣང་ན་རྟོག་བྲལ་དུ་འགྱུར་པའི་ཕྱིར་ཏེ། རྣམ་འགྲེལ་ལས། གསལ་བར་སྣང་བ་ཅན་བློ་གང༌། །དེ་ནི་རྟོག་མེད་ཤེས་པར་འདོད། །ཞེས་གསུངས་པའི་ཕྱིར། རྟོག་པ་ལ་ཡུལ་གསལ་བར་མི་སྣང་སྟེ། རྣམ་འགྲེལ་
@008B ལས། རྣམ་པར་རྟོག་དང་རྗེས་འབྲེལ་བ། །དོན་གསལ་སྣང་བ་ཅན་མ་ཡིན། །ཞེས་གསུངས་པའི་ཕྱིར། སད་པ་དང་གཉིས་དུས་གཉིས་ཀར་ཡང་ཡུལ་གསལ་བར་སྣང་མི་སྣང་གཉིས་ཀ་ཡོད་པར་རྟོག་པ་དང་རྟོག་མེད་ཀྱི་ཤེས་པ་གཉིས་ཀ་འབྱུང་བ་ཡོད་དེ། རྣམ་འགྲེལ་ལས༑
གཉིད་ལོག་པའམ་སད་པ་ན། །གསལ་པ་སྣང་བ་ཅན་བློ་གང༌། །དེ་ནི་རྟོག་མེད་གཉིས་ཀ་ཡང༌། །ཞེས་གསུངས་པའི་ཕྱིར། །ཕྱིན་ཅི་ལོག་མ་ལོག་གི་དོན་གང་ཡིན་ཀྱང་ཡིད་ལ་ཡང་ཡང་གོམས་པས་གསལ་སྣང་བྱུང་བན?་རྟོག་བྲལ་དུ་འགྱུར་བ་ཡིན་ཏེ། རྣམ་འགྲེལ་
ལས། མི་གཙང་ཟད་པར་ས་ལ་སོགས། །ཡང་དག་མ་ཡིན་བསྒོམས་པ་ཡི། །སྟོབས་ཀྱིས་སྤྲུལ་པ་རྟོག་མེད་དང༌། །གསལ་བར་སྣང་བ་ཅན་དུ་མཐོང༌། །དེ་ཕྱིར་ཡང་དག་ཡང་དག་མིན། །གང་གང་ཤིན་ཏུ་བསྒོམས་ཁྱུར་པ། །གོམས་པ་ཡོངས་སུ་རྫོགས་པ་ན། །དེ་
གསལ་མི་རྟོག་བློ་འབྲས་ཅན། །ཞེས་གསུངས་པའི་ཕྱིར་རོ།། །།གཉིས་པ་ལུང་གི་མངོན་པ་ནས་བཤད་ཚུལ་ལ་གཉིས། མངོན་པ་ཀུན་བཏུས་ནས་བཤད་ཚུལ་དང༌། མངོན་པ་མཛོད་ནས་བཤད་ཚུལ་ལོ།། དང་པོ་ལ་གཉིས། སྤྱིར་བསྟན་པ་དང༑
སོ་སོར་བཤད་པའོ།། དང་པོ་ལ་གཉིས། གཅོ?་སེམས་དང་སེམས་བྱུང་ངོ།། དང་པོ་ལ། རང་ཡུལ་གྱི་ངོ་བོ་འཛིན་པའི་སྒོ་ནས་བཞག་པའི་གཙོ་བོའི་རྣམ་རིག་དེ། གཙོ་སེམས་ཀྱི་མཚན་ཉིད། གཙོ་སེམས་དང་སེམས་དང་ཡིད་དང༌། རྣམ་ཤེས་རྣམས་དོན་
གཅིག་མིང་གི་རྣམ་གྲངས་སོ།། ངོ་བོའི་སྒོ་ནས་དབྱེ་ན་མིག་གི་རྣམ་ཤེས་ནས་ཡིད་ཀྱི་རྣམ་པར་ཤེས་པའི་བར་དྲུག་སྟེ། བསྡུན?་དབང་པོའི་རྣམ་ཤེས་དང༌། ཡིད་ཀྱི་རྣམ་ཤེས་གཉིས་སུ་འདུའོ།། རང་ཡུལ་གྱི་ཁྱད་པར་ཅི་རིགས་འཛིན་ཅིང་གཙོ་སེམས་
@009A ༄༅། །གང་རུང་གི་འཁོར་དུ་བྱུང་བའི་རིག་ག?་སེམས་བྱུང་གི་མཚན་ཉིད། དབྱེ་བ་ནི་འཆད་པར་འགྱུར་ཞིང༌། མཚན་ཉིད་དེ་ལྟར་འཐད་དེ། བྱམས་མགོན་གྱིས་དབུས་མཐའ་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་
བྱུང༌། །ཞེས་གསུངས་པའི་ཕྱིར། གཙོ་སེམས་དང་དེའི་འཁོར་དུ་གྱུར་པའི་སེམས་བྱུང་རྣམས་ངོ་བོ་གཅིག་ལ་ལྡོག་པ་ཐ་དད་ཡིན་ཏེ། ཐོགས་མེད་ཀྱིས་བསྡུ་བ་ལས། གཅིག་ཚེ་གསལ་བར་བསྒྲིབས་ན་ཡང༌། །སེམས་ཀྱི་ཁྱད་པར་རྒྱུན་དག་ལས། །ཐ་དད་པར་ནི་
མཐོང་བའི་ཕྱིར། །ཐ་དད་རྣམ་གཞག་གྲུབ་པ་ཡིན། །ཞེས་གསུངས་པའི་ཕྱིར་དང༌། རྒྱལ་ཚབ་རྗེས། རྣམ་བཤད་སྙིང་པོའི་རྒྱན་ལས། སེམས་སེམས་བྱུང་རྫས་ཐ་དད་དུ་བསྟན་ནོ་ཞེས་ཟེར་བ་ནི་འགལ་ན་རྫས་ཐ་དད་ཀྱིས་ཁྱབ་པ་ཚངས་པས་ཀྱང་བསྒྲུབ་མི་ནུས་སོ། །
ཞེས་དང༌། མཁས་གྲུབ་རྗེའི་སྡེ་བདུན་མུན་སེལ་ལས། དེས་ན་འཕགས་པ་ཐོགས་མེད་སྐུ་མཆེད་དང་རིགས་པའི་དབང་ཕྱུག་རྣམ་གཉིས་སོགས་ཕལ་ཆེ་བ་གཙོ་ཆེས་དང་དེའི་འཁོར་སེམས་བྱུང་རྣམས་རྫས་གཅིག་ཏུ་བཞེད་པ་ཡིན་ལ། ཞེས་དང༌། རྗེ་དགེ་འདུན་
གྲུབ་ཀྱི་སྤྱི་དོན་རིགས་རྒྱན་ལས། སྐྱེས་བུ་གཅིག་གི་རྒྱུད་ལ་ཡོད་པའི་གཙོ་པོའི་རྣམ་པར་རྟོག་པ་དང་དེའི་འཁོར་དུ་བྱུང་བའི་སེམས་བྱུང་རྣམས་ངོ་བོ་གཅིག་ལ་ལྡོག་པ་ཐ་དད་ཡིན་ལ། ཞེས་གསུངས་པའི་ཕྱིར། སེམས་དང་དེའི་འཁོར་དུ་གྱུར་པའི་སེམས་
བྱུང་རྣམས་ཕན་ཚུན་མཚུངས་ལྡན་རྣམ་པ་ལྔ་མཚུངས་ཡིན་ཏེ། རྟེན་དང་དམིགས་པ་དང་རྣམ་པ་དང་དུས་དང་རྫས་རྣཾས་མཚུངས་པའི་ཕྱིར་ཏེ། གཙོ་སེམས་རྟེན་དབང་པོ་གང་ལ་བརྟེན་པ་དེ་ལ་འཁོར་སེམས་བྱུང་དེ་བརྟེན། གཙོ་སེམས་དམིགས་པ་གང་
@009B ལ་བརྟེན་ནས་སྐྱེ་བ་དེ་ལ་འཁོར་སེམས་བྱུང་སྐྱེ། གཙོ་སེམས་ཡུལ་གང་གི་རྣམ་པ་ཤར་བ་ལྟར་འཁོར་སེམས་བྱུང་དེ་ལ་དེའི་རྣམ་པ་ཤར། གཙོ་སེམས་དུས་གང་གི་ཚེ་སྐྱེས་པ་དང་མཉམ་དུ་འཁོར་སེམས་བྱུང་ཀྱང་སྐྱེས། གཙོ་སེམས་དང་འཁོར་སེམས་བྱུང་རྣམས་རྫས་རིགས་གཅིག
གིས་ཁྱད་པར་དུ་བྱས་ནས་སྐྱེའི། རྫས་རིགས་ཐ་དད་པར་མི་སྐྱེ་བའི་ཕྱིར་ཏེ། མཛོད་ལས། དོན་གཅིག་སེམས་དང་སེམས་བྱུང་རྣ(Ms)། །མཚུངས་པར་ལྡན་པ་རྣམ་པ་ལྔ། །ཞེས་གསུངས་པའི་ཕྱིར། སེམས་བྱུང་ལ་དབྱེ་ནང?་གཅིག་ཡོད་དེ། ཀུན་འགྲོ་ལྔ། ཡུལ་དེས?་ལྔ། དགེ་
བ་བཅུ་གཅིག། རྩ་ཉོན་དྲུག། ཉེ་ཉོན་ཉི་ཤུ། གཞན་འགྱུར་བཞི་རྣམས་སུ་ཡོད་པའི་ཕྱིར། དང་པོ་ལྔ་ཡོད་དེ། ཚོར་བ། འདུ་ཤེས། སེམས་པ། རེག་པ། ཡིད་ལ་བྱེད་པ། རེག་པ་དང་ལྔ་ནི་སེམས་ཀུན་གྱི་འཁོར་དུ་འགྲོ་བས་ཀུན་འགྲོ་ཞེས་བཤད་པའི་ཕྱིར་ཏེ།
དེ་ལྔ་པོ་གང་རུང་གཅིག་མ་ཚང་ན་ཡུལ་གྱི་ལོངས་སྤྱོད་མི་རྫོགས་པའི་ཕྱིར་ཏེ། ཚོར་བ་མེད་ན་བདེ་སྡུག་སོགས་མྱོང་བ་མི་འབྱུང༌། འདུ་ཤེས་མེད་ན་ཐ་སྙད་འདོགས་པ་སོགས་མེད། སེམས་པ་མེད་ན་ཡུལ་ལ་འཇུག་པ་མེད། ཡིད་བྱེད་མེད་ན་དམིགས་པ་
ལ་སེམས་གཏོད་པ་མེད། རེག་པ་མེད་ན་ཚོར་བ་བདེ་སྡུག་སོགས་མི་སྐྱེ་བའི་ཕྱིར་རོ། །འོན་ཀྱང་དེ་དག་མངོན་གྱུར་དུ་ཡོད་དགོས་པའི་ངེས་པ་མེད་དེ། འཆི་སེམས་ཕྲ་མོའི་སྐབས་དང་ཉིང?་མཚམས་སྦྱར་མ་ཐག་པའི་དུས་དང་འགོག་པ་ལ་སྐོམས་པར་ཞུགས་པ་
སོགས་ཀྱི་ཚེ་ཚོར་བ་སོགས་འགའ་ཞིག་ནི་བག་ལ་ཞ་བའི་ཚུལ་གྱིས་འཇུག་པ་ཙམ་ཡིན་པའི་ཕྱིར། གཉིས་པ་ཡུལ་དེས་ལྔ་ཡོད་དེ། འདུན་པ། མོས་པ། དྲན་པ། ཏིང་ངེ་འཛིན། ཤེས་རབ་དང་ལྔ་ནི་ཡུལ་སོ་སོར་ངེས་པས་ཡུལ་དེས་ཞེས་བརྗོད་
@010A ༄༅། །པའི་ཕྱིར་ཏེ། འདུན་བས་ཡུལ་ལ་འདུན་ཞིང་དོན་དུ་གཉེར། མོས་པས་དེ་ལ་དགའ་བར་འཇུག །དྲན་པས་དམིགས་རྣམ་འཛིན། ཏིང་ངེ་འཛིན་གྱིས་རྩེ་གཅིག་ཏུ་གནས། ཤེས་རབ་ཀྱིས་སོ་སོར་དབྱོད་པར་བྱེད་པའི་ཕྱིར༑ གསུམ་
པ་དགེ་བ་བཅུ་གཅིག་ཡོད་དེ། དད་པ་དང༌། ངོ་ཚ་ཤེས་པ། ཁྲེལ་ཡོད། མ་ཆགས་པ། ཞེ་སྡང་མེད་པ། གཏི་མུག་མེད་པ། བརྩོན་འགྲུས། ཤིན་དུ་སྦྱངས་པ། བག་ཡོད། བཏང་སྙོམས། རྣམ་པར་མི་འཚེ་བ་རྣམས་ནི་རང་གི་ལྡོག་ཕྱོགས་མ་དད་པ་
སོགས་ལས་ལྡོག་པའི་སྒོ་ནས་དགེ་བར་འགྱུར་བས་དགེ་བ་བཅུ་གཅིག་ཞེས་གྲངས་ངེས་ཀྱིས་བཞག་པའི་ཕྱིར། འོན་ཀྱང་བདུད་སོགས་དད་པའི་ཡུལ་མིན་པ་ལ་དད་པ་དང༌། མི་དགེ་བའི་ཕྱོགས་ལ་བརྩོན་པ་ནི་དད་པ་དང་བརྩོན་འགྲུས་བཏགས་པ་
ཡིན་གྱི་དེ་གཉིས་དངོས་མིན་པས་ཁྱད་པར་དབྱེ་དགོས་སོ།། བཞི་བརྩ་ཉོན་ལྔ་ཡོད་དེ། དེ་ལྟར་གྱུར་པའི་འདོད་ཆགས། ཁོང་ཁྲོ། ང་རྒྱལ། མ་རིག་པ། ཐེ་ཚོམ་ཉོན་མོངས་ཅན། ལྟ་བ་ཉོན་མོངས་ཅན་དང་དྲུག་ནི་ཉེ་ཉོན་རྣམས་དང་སྲིད་པའི་རྩ་བ་
ཅི་རིགས་བྱེད་པས་ན་རྩ་ཉོན་ཞེས་བརྗོད་པའི་ཕྱིར། འདོད་ཆགས་དང་མ་རིག་པ་ཡིན་ན། རྩ་ཉོན་ཡིན་མི་དགོས་ཏེ། བྱང་འཕགས་ཀྱི་རྒྱུད་ཀྱི་དེ་དག་རྩ་ཉོན་མ་ཡིན་པའི་ཕྱིར་ཏེ། དེ་དག་ནི་སྨན་དང་སྔགས་ཀྱིས་བཅོམ་པའི་དུག་བཞིན་དུ་ནུས་པ་
ཆུང་བའི་ཕྱིར་རོ། །ལྔ་པ་ཉེ་ཉོན་ཉི་ཤུ་ཡོད། ཁྲོ་བ། འཁོན་འཛིན། འཆབ་པ། འཚིག་པ། ཕྲག་དོག། སེར་སྣ། སྒྱུ། གཡོ། རྒྱགས་པ། རྣམ་འཚེ། ངོ་ཚ་མེད། ཁྲེལ་མེད། རྨུགས་པ། རྒོད་པ། མ་དད་པ། ལེ་ལོ། བག་མེད། བརྗོད་ངེས༑
@010B ཤེས་བཞིན་མིན་པ། རྣམ་གཡེང་དང་ཉི་ཤུ་ནི་རང་རྒྱུ་རྩ་ཉོན་ལས་བྱུང་ཞིང་དེ་དང་ཉེ་བས་ན་ཉེ་ཉོན་ཞེས་བརྗོད་པའི་ཕྱིར། དྲུག་པ་གཞན་འགྱུར་ཡོད་དེ། གཉིད་དང༌། འགྱོད་པ། རྟོག་པ། དཔྱོད་པ་བཞི་ནི་དགེ་མི་དགེ་ལུང་མ་བསྟན་གསུམ་དུ་འགྱུར་སྲིད་པས་དེ་ལྟར་དུ་བརྗོད་པའི་
ཕྱིར་ཏེ། གཉིད་དུས་སུ་དཀོན་མཆོག་ལ་དད་མ་དད་དང་དགེ་སྡིག་ལ་འགྱོད་མི་འགྱོད་སོགས་ཀྱིས་དེ་ལྟར་འགྱུར་སྲིད་པའི་ཕྱིར་རོ།། ༈ གཉིས་པ་མངོན་པ་མཛོད་ནས་བཤད་ཚུལ་ལ་གཉིས་ཡོད་དེ། སྡེ་ཚན་དུ་ངེས་པ་དང་མངེས?་པ་གཉིས་ཡོད་པའི་ཕྱིར༑
དང་པོ་ལ་ལྔ་སྟེ། སེམས་ཀྱི་ས་མང་པོ་པ་དང༌། དགེ་བའི་ས་མང་པོ་པ། ཉོན་མོངས་པའི་ས་མང་པོ་པ་དང༌། མི་དགེ་བའི་ས་མང་པོ་པ་དང༌། ཉོན་མོངས་ཆུང་ངུའི?་ས་མང་པོ་པ་རྣམས་སུ་ཡོད་པའི་ཕྱིར། དང་པོ་ལ་བཅུ་ཡོད་དེ། མཛོད་ལས། ཚོར་དང་སེམས་པ་འདུ་ཤེས་
དང༌། །འདུན་དང་རིག་དང་བློ་གྲོས་དྲན། །ཡིད་ལ་བྱེད་དང་མོས་པ་དང༌། །ཏིང་ངེ་འཛིན་སེམས་ཐམས་ཅད་ལ། །ཞེས་གསུངས་པ་ལྟར་ཡོད་པའི་ཕྱིར། བཅུ་བོ་དེ་ཆོས་ཅན། ཁྱོད་ལ་སེམས་ཀྱི་ས་མང་པོ་པ་ཞེས་བྱ་སྟེ། སེམས་ཐམས་ཅད་ཀྱི་འཁོར་དུ་འགྲོ་བའི་
ཕྱིར། དེ་ནི་སྤྱིའི་རྣམ་གཞག་ཡིན་གྱི། སེམས་ཡིན་ན་དེའི་འཁོར་དུ་ཏིང་ངེ་འཛིན་ཡོད་པས་མ་ཁྱབ་སྟེ། གཡེང་བའི་སེམས་ཐམས་ཅད་ལ་དེ་ཡོད་དཀའ་བའི་ཕྱིར་ཏེ་ཡོད་ན་ཏིང་འཛིན་ཧ་ཅང་ཁྱབ་ཆེ་བའི་སྐྱོན་དུ་འགྱུར་སྙམ་མོ། །གཉིས་པ་ལ་བཅུ་ཡོད་དེ།
མཛོད་ལས། དད་དང་བག་ཡོད་ཤིན་ཏུ་སྦྱངས། །བཏང་སྙོམས་ངོ་ཚ་ཤེས་ཁྲེལ་ཡོད། །རྩ་བ་རྣམ་གཉིས་མི་འཚེ་དང༌། །བརྩོན་འགྲུས་རྟག?་ཏུ་དགེ་ལ་འབྱུང༌། །ཞེས་གསུངས་པ་ལྟར་ཡོད་པའི་ཕྱིར། བཅུ་པོ་དེ་ཆོས་ཅན། དགེ་བའི་ས་མང་པོ་པ་ཞེས་བྱ་སྟེ༑
@011A ༄༅། །དགེ་བའི་སེམས་ཀུན་གྱི་འཁོར་དུ་འབྱུང་བའི་ཕྱིར། དེ་ཡང་སྔར་ལྟར་ཏེ། རྩ་བ་རྣམ་གཉིས་ནི་ཆགས་མེད་དང་སྡང་མེད་དོ།། གསུམ་པ་ལ་དྲུག་ཡོད་དེ། མཛོད་ལས། རྨོངས་དང་བག་མེད་ལེ་ལོ་དང༌། །སྒྱུ་དང་རྒྱགས་དང?་རྣམ་འཚེ་ནི། །ཉོན་མོངས་ཅན་
ལ་རྟག་ཏུ་འབྱུང༌། །ཞེས་གསུངས་པ་ལྟར་ཡོད་པའི་ཕྱིར། དྲུག་པོ་དེ་ཆོས་ཅན། ཉོན་མོངས་པའི་ས་མང་པོ་པ་ཞེས་བྱ་སྟེ། ཉོན་མོངས་པ་ཅན་གྱི་སེམས་ཀུན་གྱི་འཁོར་དུ་འབྱུང་བའི་ཕྱིར། བཞི་བ་ལ་གཉིས་ཡོད་དེ། མི་དགེ་བ་ལ་ཁྲེལ་མེད་དང༌། །ངོ་ཚ་མེད་
པའོ།། ཞེས་གསུངས་པའི་ཕྱིར། གཉིས་པོ་དེ་ཆོས་ཅན། མི་དགེ་བའི་ས་མང་པོ་པ་ཞེས་བྱ་སྟེ། མི་དགེ་བའི་སེམས་ཀུན་གྱི་འཁོར་དུ་འབྱུང་བའི་ཕྱིར། ལྔ་པ་ལ་བཅུ་ཡོད་དེ། ཁྲོ་བ་དང༌། འཁོན་དུ་འཛིན་དང་གཡོ་དང་ནི། །ཕྲག་དོག་འཚིག་འཆབ་སེར་སྣ་དང༌། །
སྒྱུ་དང་རྒྱགས་དང་རྣམ་འཚེ་རྣམས། །ཉོན་མོངས་ཆུང་ངའི?་ས་པ་རྣམས། །ཞེས་གསུངས་པ་ལྟར་ཡོད་པའི་ཕྱིར། བཅུ་པོ་དེ་ཆོས་ཅན། ཉོན་མོངས་ཆུང་ངའི་ས་པ་ཞེས་བྱ་སྟེ། མཚུངས་ལྡན་གྲོགས་ཀྱིས་ཆུང༌། སྤད་?་རིགས་ཀྱིས་ཆུང༌། འབྱུང་བ་རྟེན་གྱིས་
ཆུང་པའི་ཕྱིར། གཉིས་པ་མ་ངེས་པ་བརྒྱད་ཡོད་དེ། རྟོག་དང་དཔྱོད་དང་འགྱོད་པ་དང༌། །གཉིད་དང་ཁྲོ་བ་ཆགས་རྣམས་དང༌། །ང་རྒྱལ་ཐེ་ཚོམ་ཞེས་བྱ་བ། །བརྒྱད་ནི་ངེས་པ་མིན་པར་བཤད། །ཅེས་འབྱུང་བ་ལྟར་ཡོད་པའི་ཕྱིར། བརྒྱད་པ་དེ་ཆེས་ཅན།
མ་ངེས་པ་ཞེས་བྱ་སྟེ། གོང་གི་སྡེ་མཚན་སྡེ་དེ་རྣམས་སུ་མ་ངེས་པར་འབྱུང་བའི་ཕྱིར། དེར་ཐལ། ཆོས་དང་ཆོས་མིན་གཉིས་ཀ་ལ་རྟོག་དཔྱོད་དང་འགྱོད་པ་འབྱུང༌། གཉིད་དུས་སུ་དགེ་མི་དགེའི་སེམས་གཉིས་ཀ་ལ་ནས། ཆོས་དང་ཆོས་མིན་བྱེད་པ་
@011B གཉིས་ཀ་ལ་དམིགས་ནས་ཁྲོ་བ་འབྱུང༌། དེ་གཉིས་ཀ་བྱེད་པ་ལ་ཆགས་ཤིང་ཞེན་པ་འབྱུང༌། རིགས་གཟུགས་ལོངས་སྤྱོད་ཐོས་པའི་ཡོན་ཏན་གྱིས་ཀྱང་ང་རྒྱལ་བྱེད་པ་འབྱུང༌། ཆོས་དང་ཆོས་མིན་གཉིས་ཀ་ལ་ཐེ་ཚོམ་འབྱུང་བ་ལྟ་བུ་ཡིན་པའི་ཕྱིར། དེ་དག་ནི་སྡེ་ཚན་དུ་མ་ངེས་
པར་ཀུན་སློང་སོགས་ཀྱིས་དབང་གིས་སྡེ་ཚན་གཞན་དང་གཞན་དུ་འབྱུང་བ་ཡིན་ལ། རྟོག་དཔྱོད་འགྱོད་གཉིད་ཐེ་ཚོམ་རྣམས་ནི་དགེ་མི་དགེ་ལུང་མ་བསྟན་གསུམ་དུ་མཐའ་གཅིག་མ་ངེས་པར་སྐབས་འགར་དགེ་བ་དང་ལ་ལར?་མི་དགེ་པ་དང་གཞན་དུ་ལུང་མ་བསྟན་དུའང་འགྱུར་སྲིད་པའི་ཕྱིར་
མ་ངེས་པའོ།། འདི་དག་གི་རྣམ་གཞག་རྒྱས་པར་ནི་བདག་གིས་མཛོད་ཀྱི་ཊཱིཀྐ་དང་ཕུང་པོ་ལྔའི་རྣམ་གཞག་སོགས་ལས་བཤད་ཟིན་པས་འདིར་མི་སྤྲོའོ།། ༈ གཉིས་པ་རྟགས་རིགས་ཀྱི་རྣམ་གཞག་རྒྱས་པར་ནི་གཞན་དུ་བཤད་ཟིན་ཅིང་འདིར་མདོར་བསྡུས་མཚོན་
ཙམ་ཞིག་བཤད་པར་བྱ་སྟེ། དེ་ནི། རྣམ་འགྲེལ་ལས། ཕྱོགས་ཆོས་དེ་ཆས་ཁྱབ?་པ་ཡི།། གཏན་ཚིགས་ཞེས་པས་མདོང་བསྟན་ཏེ་འདི་ལ་གསུམ། རྟགས་ཀྱི་མཚན་ཉིད། དབྱེ་པ། འགྲོས་དོན་བཤད་པའོ།། དང་པོ་ནི། རྟགས་སུ་བཀོད་པ། རྟགས་ཀྱི་མཚན་
ཉིད། དེ་སྒྲུབ་ཀྱི་རྟགས་སུ་བཀོད་པ། དེ་སྒྲུབ་ཀྱི་རྟགས་ཀྱི་མཚན་ཉིད། ཡོད་མེད་གང་རུང་ཡིན་ན། དེ་སྒྲུབ་ཀྱི་རྟགས་ཡིན་པས་ཁྱབ་སྟེ། དེ་ཡིན་ན། དེ་སྒྲུབ་ཀྱི་རྟགས་སུ་བཀོད་པས་ཁྱབ་པའི་ཕྱིར་ཏེ། རི་བོང་རྭ་དེ་ཆོས་ཅན། མི་རྟག་སྟེ། རི་བོང་རྭ་ཡིན་པ་འཕྱར?་ཞེཥ་
པའི་རྟག་སུ་བཀོད་པའི་ཕྱིར། སྒྲ་མི་རྟག་པར་སྒྲུབ་པར་བྱེད་པའི་རྟགས་སུ་བཀོད་པ། སྒྲ་མི་རྟག་པར་སྒྲུབ་པར་བྱེད་པའི་རྟགས་ཀྱི་མཚན་ཉིད། དེ་བཞིན་དུ་གཞན་ལ་སྦྱོར་ཚུལ་འགྲེའོ།། བྱས་པའི་རྟགས་ཀྱིས་སྒྲ་མི་རྟགས་པར་སྒྲུབ་པར་བྱེད་པའི་རྟག་སུ་
@012A ༄༅། །བཀོད་པ། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྟགས་ཀྱི་མཚན་ཉིད་ཡིན་ཀྱང་དེ་ཡིན་ན་བྱས་པ་དང་གཅིག་ཡིན་པས་ཁྱབ་པ་ཡིན་ནོ། །གཉིས་པ་ལ་གཉིས། རྟགས་ཡང་དག་བཤད་པ་དང༌། རྟགས་ལྟར་སྣང་བཤད་པའོ། །
དང་པོ་ལ་གསུམ། དེའི་ལྟོས་གཞི་དང༌། མཚན་ཉིད། དབྱེ་བའོ། །དང་པོ་ལ་གཉིས། ཕྱོགས་ཆོས་ཀྱི་ལྟོས་གཞི་དང༌། ཁྱབ་པའི་ལྟོས་གཞིའོ། དང་པོ་ལ་གསུམ། ཤེས་འདོད་ཆོས་ཅན་སྐྱོན་མེད་ཀྱི་མཚན་ཉིད་དང༌། མཚན་གཞི་དང༌། སྒྲུབ་བྱེད་
དེ། དང་པོ་ནི་མཚོན་ན། ཁྱོད་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཆོས་ཅན་དུ་བཟུང་བ་ཡང་ཡིན་ཁྱོད་བྱས་པར་ཚད་མས་དེས་ནས་མི་རྟག་པ་ལ་ཤེས་འདོད་ཞུགས་པའི་གང་ཟག་སྲིད་པ་ཡང་ཡིན་པའི་གཞི་མཐུན་པར་དམིགས་པ་དེ༑
ཁྱོད་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་གྱི་མཚན་ཉིད། དེ་སྒྲུབ་ཀྱི་རྩོད་གཞི་ཡིན་ན། དེ་སྒྲུབ་ཀྱི་ཤེས་འདོད་ཆོས་ཅན་ཡིན་པས་མ་ཁྱབ་ཀྱང༌། ཕྱི་མ་ཡིན་ན་སྔ་མ་ཡིན་པས་ཁྱབ་བོ། །འོན་
ཀྱང་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དང༌། དེ་སྒྲུབ་ཀྱི་རྩོད་གཞི་དང༌། དེ་སྒྲུབ་ཀྱི་དཔག་གཞི་གསུམ་དོན་གཅིག་གོ །གཉིས་པ་མཚན་གཞི་ནི་སྒྲ་དེའོ།། གསུམ་པ་སྒྲུབ་བྱེད་ནི། སྒྲ་ཆོས་ཅན།
ཁྱོད་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་བར་བྱེད་པའི་ཤེས་འདོད་ཆོས་ཅན་སྐྱོན་མེད་ཡིན་ཏེ། མཚན་ཉིད་བཤད་པ་ལྟར་ཡིན་པའི་ཕྱིར་ཞེས་བྱའོ། །གཉིས་པ་ཁྱབ་པའི་ལྟོས་གཞི་ལ་གཉིས། བསྒྲུབ་བྱའི་ཆོས་དང༌། མཐུན་ཕྱོགས་
@012B དང་མི་མཐུན་ཕྱོགས་སོ།། དང་པོ་ལ་གསུམ། མཚན་ཉིད། དབྱེ་བ། སྒྲུབ་བྱེད་དོ།། བསྒྲུབ་བྱའི་ཆོས་སུ་བཟུང་བར་བྱ་བ་དེ། བསྒྲུབ་བྱའི་ཆོས་ཀྱི་མཚན་ཉིད། དེ་སྒྲུབ་ཀྱི་བསྒྲུབ་བྱའི་ཆོས་སུ་བཟུང་བར་བྱ་བ། དེ་སྒྲུབ་ཀྱི་བསྒྲུབ་བྱའི་ཆོས་ཀྱི་མཚན་ཉིད། བདག་མེད་ཡིན་ན༑
དེ་སྒྲུབ་ཀྱི་བསྒྲུབ་བྱའི་ཆོས་ཡིན་པས་ཁྱབ་སྟེ། རི་བོང?་རྭ་དེ་རི་བོང་གི་རར་སྒྲུབ་བར་བྱེད་པའི་བསྒྲུབ་བྱའི་ཆོས་སུ་བཟུང་བྱ་ཡིན་པའི་ཕྱིར་ཏེ། དེ་ཆོས་ཅན། རི་བོང་རྭ་ཡིན་ཏེ། དེ་ཡིན་པའི་ཕྱིར་ཞེས་པའི་བསྒྲུབ་བྱའི་ཆོས་ཡིན་པའི་ཕྱིར། དེས་ན་བསྒྲུབ་བྱའི་ཆོས་ཡིན་ན།
ཆོས་ཡིན་པས་མ་ཁྱབ་བོ།། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་སུ་བཟུང་བར་བྱ་བ་དེ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་མཚན་ཉིད། མི་རྟག་པ་དེ་དེའི་མཚན་གཞིའོ། །སྒྲ་ཆོས་ཅན། མི་རྟག་སྟེ། བྱས་པའི་ཕྱིར་བཀོད་པའི་ཚེ་སྒྲ་
རྩོད་གཞི། མི་རྟག་པ་བསྒྲུབ་བྱའི་ཆོས། སྒྲ་མི་རྟག་པ་བསྒྲུབ་བྱ། བྱས་པ་རྟགས་ཡང་དག། རྟག་པ་དགག་བྱའི་ཆོས། སྒྲ་རྟག་པ་དགག་བྱར་འཇོག་སྟེ་གཞན་ལ་སྦྱོར་ཚུལ་ཤེས་པར་བྱའོ།། གཉིས་པ་དེ་ལ་དབྱེ་ན། དེའི་དངོས་ཀྱི་བསྒྲུབ་བྱའི་ཆོས་དང༌། ཤུགས་ཀྱི་
བསྒྲུབ་བྱའི་ཆོས་གཉིས་ཡོད་པའི་མི་རྟག་པ་དེ་དང་པོ་དང་སྐད་ཅིག་མ་ནི་ཕྱི་མའོ།། གསུམ་པ་སྒྲུབ་བྱེད་ནི། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་བར་བྱེད་པའི་བསྒྲུབ་བྱའི་ཆོས་ཡིན་ཏེ། མཚན་ཉིད་དེའི་ཕྱིར་རོ།། གཉིས་པ་ཁྱབ་པའི་ལྟོས་གཞི་ལ་གཉིས་
དངོས་པོ་དང༌། དཔེ་གཉིས་བཤད་པའོ།། དང་པོ་ལ་བཞི། མཚན་ཉིད། དབྱེ་བ། སྒྲ་དོན། སྒྲུབ་བྱེད་དོ། །དང་པོ་ནི། དེ་སྒྲུབ་ཀྱི་བསྒྲུ་བྱའི་ཆོས་གྱི་འགོད་ཚུལ་དང་མཐུན་པར་ཡོད་པ་དེ། དེ་སྒྲུབ་ཀྱི་མཐུན་ཕྱོགས་ཀྱི་མཚན་ཉིད། དེ་ལ་ཡིན་འགོད་དང་ཡོད་འགོད་གཉིས།
@013A ༄༅། །སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་ཡོད་པ་དེ། དེ་སྒྲུབ་ཀྱི་མཐུན་ཕྱོགས་ཀྱི་མཚན་ཉིད། དེ་དང་མི་རྟག་པ་གཉིས་དོན་གཅིག། དེ་སྒྲུབ་ཀྱི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མེད་པ་དེ། དེ་སྒྲུབ་ཀྱི་
མི་མཐུན་ཕྱོགས་ཀྱི་མཚན་ཉིད། དེ་བཞིན་དུ་སྒྲ་མི་རྟག་པར་སྒྲུབ་པར་བྱེད་མི་མཐུན་ཕྱོགས་ཀྱི་མཚན་ཉིད་དང་སྦྱར་ན། དེ་དང་མི་རྟག་པ་མ་ཡིན་པ་གཉིས་དོན་གཅིག། གཉིས་པ་དབྱེ་ན་གསུམ་སྟེ་དེ་སྒྲུབ་ཀྱི་མེད་པ་མི་མཐུན་ཕྱོགས། གཞན་པ་མི་མཐུན་ཕྱོགས༌།
འགལ་ཟླ་མི་མཐུན་ཕྱོགས་སོ། །དང་པོ་ནི་རི་བོང་གི་རྭ་ལྟ་བུ། གཉིས་པ་ནི་ཤེས་བྱ་ལྟ་བུ། གསུམ་པ་ནི་རྟག་པ་ལྟ་བུའོ། །གསུམ་པ་སྒྲ་དོན་ནི། རི་བོང་རྭ་སོགས་གསུམ་པོ་དེ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ཡིན་ཏེ། དེ་སྒྲུབ་ཀྱི་བསྒྲུབ་
བྱའི་ཆོས་ཀྱི་འགོད་ཚུལ་དང་མི་མཐུན་པའི་ཕྱིར་ཏེ། དངོས་མེད་ཡིན་པའི་ཕྱིར། བཞི་པ་སྒྲུབ་བྱེད་ནི། བུམ་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཡིན་ཏེ། དེ་ལྟར་སྒྲུབ་པའི་འགོད་ཚུལ་དང་མཐུན་པའི་ཕྱིར་ཏེ། མི་རྟག་པ་ཡིན་པའི་
ཕྱིར?་རོ།། གཉིས་པ་དཔེ་གཉིས་ལས། ཆོས་མི་མཐུན་སྦྱོར་གྱི་སྒྲུབ་ངག་གི་མི་མཐུན་དཔེ་ནི། གང་རྟག་ན་མ་བྱས་པས་ཁྱབ། དཔེར་ན་འདུས་མ་བྱས་ཀྱི་ནམ་མཁའ་བཞིན། སྒྲ་ནི་བྱས་སོ།། ཞེས་པའི་ངག་ལྟ་བུ་དང༌། ཆོས་མི་ཐུན་སྦྱོར་གྱི་སྒྲུབ་ངག་གི་དབེ་ནི་
གང་བྱས་ན་མི་རྟག་པས་ཁྱབ། དཔེར་ན་བུམ་པ་བཞིན། སྒྲ་ཡང་བྱས་སོ་ཞེས་པ་ལྟ་བུ་སྟེ། སྤྱིར་མི་མཐུན་ཕྱོགས་ཀྱི་དཔེ་མེད་དེ། གཞི་གྲུབ་ན། སྒྲ་གང་ཟག་གི་བདག་མེད་དུ་སྒྲུབ་པར་བྱེད་པའི་མཐུན་དཔེ་ཡིན་དགོས་པའི་ཕྱིར་རོ། །གཉིས་པ་ལ་ལྔ་མཚན་
@013B ཉིད་དང༌། དབྱེ་བའོ།། དང་པོ་ལ། ཚུལ་གསུམ་ཡིན་པ། རྟགས་ཡང་དག་གི་མཚན་ཉིད། ཚུལ་གསུམ་ནི། ཕྱོགས་ཆོས། རྗེས་ཁྱབ། ལྡོག་ཁྱབ་བོ།། ཚུལ་གསུམ་སོ་སོ་ལ་མཚན་ཉིད། སྒྲུབ་བྱེད་ཀྱི་ཚད་མ་དང་རྗེས་སུ་འགྲོ་ལྡོག་ངེས་བྱེད་སོགས་
ལས། དང་པོ་ནི། དེ་སྒྲུབ་ཀྱི་ཤེས་འདོད་ཆོས་ཅན་སྐྱོན་མེད་ཀྱི་སྟེང་དུ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ། དེ་སྒྲུབ་ཀྱི་ཕྱོགས་ཆོས་ཀྱི་མཚན་ཉིད། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཀྱི་སྟེང་དུ་བཀོད་
ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་དེ། སྒྲ་མི་རྟག་པར་སྒྲུབ་པར་བྱེད་པའི་ཕྱོ(Gs) ཆོཥ་ཀྱི་མཚན་ཉིད། དེ་བཞིན་དུ་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཀྱི་མཚན་ཉིད་སོགས་ལ་སྦྱོར་ཚུལ་འགྲེའོ། །
དེ་སྒྲུབ་ཀྱི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་དེ། དེ་སྒྲུབ་ཀྱི་རྗེས་ཁྱབ་ཀྱི་མཚན་ཉིད། དེ་བཞིན་དུ་སྒྲ་མི་རྟག་པར་སྒྲུབ་བར་བྱེད་པའི་རྗེས་ཁྱབ་ཀྱི་མཚན་ཉིད་དང༌། བྱས་པའི་རྟགས་ཀྱིས་སྒྲ་མི་
རྟག་པར་སྒྲུབ་པར་བྱེད་པའི་རྗེས་ཁྱབ་ཀྱི་མཚན་ཉིད་སོགས་ལ་སྦྱར་བར་བྱའོ།། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་ཀྱི་དོན་ལྡོག་དང་འབྲེལ་སྟོབས་ཀྱིས་དེ་སྒྲུབ་ཀྱི་མི་མཐུན་ཕྱོགས་ལ་འགོད་ཚུལ་དང་མཐུན་པར་མེད་པ་ཉིད་དུ་ཚད་མས་ངེས་པ་
དེ། དེ་སྒྲུབ་ཀྱི་ལྡོག་ཁྱབ་ཀྱི་མཚན་ཉིད་དང་གཞི་ལ་སྦྱར་ན། སྒྲ་མི་རྟག་པར་སྒྲུབ་པར་བྱེད་པའི་ལྡོག་ཁྱབ་དང༌། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ལྡོག་ཁྱབ་ཀྱི་མཚན་ཉིད་ཀྱང་དེས་རིགས་འགྲེའོ།། བྱས་པ་དེ་སྒྲ་མི་རྟག
@014A ༄༅། །པར་སྒྲུབ་པར་བྱེད་པའི་ཚུལ་གསུམ་གའི་མཚན་གཞི་ཡིན་ནོ།། སྒྲུབ་བྱེད་ལ་བྱས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཡིན་ཏེ། ཁྱོད་ཁྱོད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་
མེད་ཀྱི་སྟེང་དུ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པའི་ཕྱིར། དེར་ཐ། དེ་འདྲའི་ཤེས་འདོད་ཆོས་ཅན་སྒྲའི་སྟེང་དུ་འགོད་ཚུལ་ཡིན་འགོད་དང་མཐུན་པར་ཡོད་པ་ཁོ་ན་ཡིན་ཅིང་སྐབས་ཀྱི་རྒོལ་བས་ཀྱང་རང་གི་ཚད་མས་ངེས་པའི་ཕྱིར་རོ།
བྱས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་ཡིན་ཏེ། ཁྱོད་ཁྱོད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཁོ་ན་ལ་ཡོད་པ་ཉིད་དུ་ཚད་མས་ངེས་པའི་ཕྱིར། དེར་ཐལ། ཁྱོད་མི་རྟག་པ་ཡིན། ཁྱོད་ཡིན་ན་མི་རྟག
ཡིན་པས་ཁྱབ་པའི་ཚུལ་གྱིས་ཁྱོད་མི་རྟག་པ་ཁོ་ན་ཡོད་པ་ཉིད་ཚད་མས་ངེས་པའི་ཕྱིར། བྱས་པ་ཆོས་ཅན། ཁྱོད་དེ་སྒྲུབ་ཀྱི་ལྡོག་ཁྱབ་ཡིན་ཏེ། ཁྱོད་དེ་སྒྲུབ་ཀྱི་བསྒྲུབ་བྱའི་ཆོས་ཀྱི་དོན་ལྡོག་དང་འབྲེལ་སྟོབས་ཀྱིས་དེ་སྒྲུབ་ཀྱི་མི་མཐུན་ཕྱོགས་ལ་འགོད་
ཚུལ་དང་མཐུན་པར་མེད་པ་ཉིད་དུ་ཚད་མས་ངེས་པའི་ཕྱིར། དེར་ཐལ། ཁྱོད་མི་རྟག་པ་ཡིན། ཁྱོད་ཡིན་ན་མི་རྟག་ཡིན་པས་ཁྱབ། ཁྱོད་མི་རྟག་པ་དང་འབྲེལ་ཞིང་མི་རྟག་པ་མ་ཡིན་པ་ལ་མེད་པ་ཉིད་དུ་ཚད་མས་ངེས་པའི་ཕྱིར་རོ།། གཉིས་པ་དབྱེ་
བ་ལ་གསུམ། འབྲས་རྟགས། རང་བཞིན་གྱི་རྟགས། མ་དམིགས་པའི་རྟགས་སོ།། དང་པོ་ནི། རྣམ་འབྲེལ་ལས། རྒྱུལ་རང་བཞིན་ཇི་སྙེད་ཅིག། ཅེས་སོགས་དང༌། མེ་ཡི་འབྲས་བུ་དུ་བ་སྟེ།། ཞེས་པས་བསྟན་ཅིང༌། འདི་ལ་གསུམ། མཚན་
@014B ཉིད། དབྱེ་བ། སྒྲུབ་བྱེད་དེ།། དང་པོ་ནི། འབྲས་བུའི་ཚུལ་གསུམ་ཡིན་པ། འབྲས་ཏས་ཡང་དག་གི་མཚན་ཉིད། དེ་དང་འདུས་བྱས་གཉིས་དོན་གཅིག། དེ་སྒྲུབ་ཀྱི་འབྲས་བུའི་ཚུལ་གསུམ་ཡིན་པ། དེ་སྒྲུབ་ཀྱི་འབྲས་རྟགས་ཡང་དག་གི་མཚན་ཉིད། ག?་དང་སྦྱར་ན།
ཁྱོད་དེ་སྒྲུབ་ཀྱི་རྟགས་ཡང་དག་གང་ཞིག། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱའི་གཙོ་ཡང་ཡིན། ཁྱོད་ཀྱི་རྒྱུ་ཡང་ཡིན་པའི་གཞི་མཐུན་སྲིད་བ་དེ། ཁྱོད་དེ་སྒྲུབ་ཀྱི་འབྲས་རྟགས་ཡང་དག་གི་མཚན་ཉིད། འབྲས་རྟགས་པ་དབྱེ་ན་སྦྱིར་
མང་ཡང༌། བསྡུ་ན་རྒྱུ་དངོས་གྲུབ་དང༌། རྒྱུ་སྔོན་སོང་དང༌། རྒྱུ་ཆོས་རྗེས་དཔོག་གི་འབྲས་རྟགས་གསུམ་ཡོད་པ་ལས། དུ་བ་དེ། དུ་ལྡན་གྱི་ལ་ལ་མེ་ཡོད་པར་སྒྲུབ་པའི་རྒྱུ་དངོས་གྲུབ་ཀྱི་འབྲས་རྟགས། པར་སྣང་གི་སྔོ་ལོང་པོ་དེ། རང་རྒྱུ་མེ་སྔ་མ་སྔོན་སོང་དུ་སྒྲུབ་
པའི་འབྲས་རྟགས། བུ་རོད་ལྟ་བ་དེ། ཁོ་ནང་བུ་རོ་གོང་བུའི་སྟེང་དུ་བུ་རོ་སྔ་མས་རོ་གཟུགས་ཕྱི་མ་བསྐྱེད་པའི་ནུས་པ་ཡོད་པར་སྒྲུབ་པའི་རྒྱུ་ཆོས་རྗེས་དཔོག་གི་འབྲས་རྟགས་སོ།། སྒྲུབ་བྱེད་ནི། དུ་བ་ཆོས་ཅན། ཁྱོད་དུ་བ་དང་ལྡན་པའི་ལ་ལ་མེ་ཡོད་པར་སྒྲུབ་པའི་འབྲས་རྟགས་
ཡིན་ཏེ། ཁྱོད་དེ་སྒྲུབ་ཀྱི་རྟགས་ཡང་དག་གང་ཞིག། ཁྱོད་མེའི་འབྲས་བུ་ཡིན་པའི་ཕྱིར་ཞེས་པ་ནི་མཚོན་པ་ཙམ་མོ།། (~)༌།།གཉིས་པ་ནི། རྣམ་འགྲེལ་ལས། རང་བཞིན་ཡོད་ཙམ་དང༌། །འབྲེལ་པ་ཅན་གྱི་ངོ་བོ་ཡང༌། །ཞེས་པས་བསྟན་ཏེ། འདི་ལ་མཚན་ཉིད་སོགས་གསུཾ་གྱི་
?་པོར་?་གྱི་ཚུལ་གསུམ་ཡིན་པ། རང་བཞིན་གྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་རང་བཞིན་གྱི་ཚུལ་གསུམ་ཡིན་པ། དེ་སྒྲུབ་ཀྱི་རང་བཞིན་གྱི་རྟགས་ཡང་དག་གི་མཚན་ཉིད། ཡང་ཁྱོད་དེ་སྒྲུབ་ཀྱི་རྟགས་ཡང་དག་གང་ཞིག། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་དངོས་ཀྱི་
@015A ༄༅། །བསྒྲུབ་བྱའི་ཆོས་སུ་བཟུང་བྱ་ཡིན་ན་ཁྱོད་དང་བདག་ཉིད་གཅིག་ཡིན་དགོས་པའི་ཆ་ནས་བཞག་པ་དེ། ཁྱོད་དེ་སྒྲུབ་ཀྱི་རང་བཞིན་གྱི་རྟག་ཡང་དག་གི་མཛ?་ཉིད། དབྱེ་ན། དེར་གྱུར་པའི་ཁྱད་པར་ལྟོས་པ་བའི་དེ་དང༌། ཁྱད་པར་དག་པ་པའི་དེ་
གཉིས་སོ།། དང་པོ་ལ་དེར་གྱུར་པའི་རང་གི་བྱེད་ཆོས་དངོས་སུ་འཕངས་པ་དང༌། ཤུགས་ལ་འཕངས་པ་གཉིས། དང་པོ་ནི། སྒྲ་ཆོས་ཅན། མེ་རྟག་སྟེ། སྐྱེས་པ་ཡིན་པའི་ཕྱིར་ཞེས་བཀོད་པའི་ཚེ་སྐྱེས་པ་ལྟ་བུ། གཉིས་པ་ནི། དེ་ཆོས་ཅན། མི་རྟག་སྟེ།
བྱས་པའི་ཕྱིར་ཞེས་བཀོད་པའི་ཚེ་བྱས་བ་ལྟ་བུ། དག་པ་བ་ནི། དེ་ཆོས་ཅན། མི་རྟག་སྟེ། དངོས་པོ་ཡིན་པའི་ཕྱིར་ཞེས་པའི་རྟགས་ལྟ་བུ། སྐད་ཅིག་མ་དེ་སྒྲ་མི་རྟག་པར་སྒྲུབ་བར་བྱེད་པའི་ཤུགས་ཀྱི་བསྒྲུབ་བྱའི་ཆོས་སུ་བཟུང་བྱ་ཡིན་གྱི། དངོས་ཀྱི་
བསྒྲུབ་བྱའི་ཆོས་སུ་བཟུང་བྱ་མིན་ལ་དངོས་ཀྱི་བསྒྲུབ་བྱའི་ཆོས་ལ་ནི་མི་རྟག་པ་ཉིད་འཇོག་ཅིང༌། འོན་ཀྱང་དེའི་དངོས་ཀྱི་བསྒྲུབ་བྱའི་ཆོས་ནི་མི་རྟག་པར་བཞག་ཏུ་མི་རུང་ངོ། །སྒྲུབ་བྱེད་ནི་རང་བཞིན་གྱི་རྟགས་ཡང་དག་གི་མཚན་ཉིད་གོ་བ་དང་སྦྱར་ནས་
བཞག་པ་དེས་ཤེས་པར་བྱའོ།། ༈ །།གསུམ་པ་མ་དམིགས་པའི་རྟགས་ཡང་དག་ལ་གཉིས། མི་སྣང་བ་མ་དམིགས་པའི་རྟགས་ཡང་དག་དང༌། སྣང་རུང་མ་དམིགས་པའི་རྟགས་ཡང་དག་གོ། དང་པོ་ནི། རྣམ་འབྲེལ་ལས། ཚད་མ་རྣམས་
ནི་མི་འཇུག་པ། ཞེས་སོགས་ཀྱིས་བསྟན་ཏེ་འདི་ལ་བཞི། མཚན་ཉིད། འཇུག་དུས། དབྱེ་བ། དགོས་པ་སོགས་ལས། མི་སྣང་བ་མ་དམིགས་པའི་ཚུལ་གསུམ་ཡིན་པ། མི་སྣང་བ་མ་དམིགས་པའི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་མི་སྣང་བ་
@015B མ་དམིགས་པའི་ཚུལ་གསུམ་ཡིན་པ། དེ་སྒྲུབ་ཀྱི་མི་སྣང་བ་མ་དམིགས་པའི་རྟག་ཡང་དག་གི་མཚན་ཉིད། གོ་བ་ངང་སྦྱར་བ་ནི་སྒྲ་བཤད་ཀྱིས་ཤེས་ལ། འཇུག་དུས་ནི། དགག་གཞི་སྣང་རུང་ཡིན་ཡང་དེ་སྒྲུབ་ཀྱི་དགག་བྱའི་ཆོས་སུ་བཏགས་པའི་དོན་དེ་རྒོལ་བ་དེའི་ངོ་བོར་སྣབ་
དུ་མི་རུང་ན། མི་སྣང་བ་མ་དམིགས་པའི་རྟོགས་འཇུག་ཅིང༌། དེའི་སྒོ་ནས་སྒྲ་བཤད་ཀྱང་ཤེས་པར་བྱའོ། །དབྱེ་ན། དེར་གྱུར་པའི་འབྲེལ་ཟླ་མ་དམིགས་པའི་རྟགས་དང༌། འགལ་ཟླ་དམིགས་པའི་རྟགས་གཉིས་ལས། དང་པོ་ནི། དེ་སྒྲུབ་ཀྱི་མི་སྣང་བ་མ་དམིགས་པའི་
རྟག་ཡང་དག་གང་ཞིག། རང་གི་དངོས་མིང་གི་མཐར་མེད་མིན་སོགས་དགག་ཚིག་ཅི་རིགས་སྦྱར་བའི་ཆོས་དེ། དེ་སྒྲུབ་ཀྱི་མི་སྣང་བའི་འབྲེལ་ཟླ་མ་དམིགས་པའི་རྟགས་ཡང་དག་གི་མཚན་ཉིད། དེ་ལ་དབྱེ་ན། དེར་གྱུར་པའི་རྒྱུ་མ་དམིགས་དང༌། ཁྱབ་བྱེད་མ་དམིགས་དང༌།
རང་བཞིན་མ་དམིགས་པའི་རྟགས་དང་གསུམ་སྟེ་ཁྱད་པར་རྒྱས་པར་ནི་གཞན་དུ་ཤེས་པར་བྱ་ཞིང་མཚོན་ཙམ་ནི། མདུན་གྱི་གཞི་འདིར་ཆོས་ཅན། ཤ་ཟ་སྐལ་ལྡན་དུ་སོང་བའི་གང་ཟག་གིས་དེ་ཡོད་ཅེས་དམ་བཅའ་མི་རིགས་ཏེ། གང་ཟག་དེའི་རྒྱུད་ལ་ཤ་ཟ་དམིགས་
བྱེད་ཀྱི་ཚད་མ་མེད་པའི་ཕྱིར་ཞེས་པ་ལྟ་བུའོ། །དགོས་པ་ནི། མདུན་གྱི་གཞི་འདིར་ལྷའི་བར་སྲིད་དང༌། ཤ་ཟ་ཡོད་མེད་ཐེ་ཚོམ་ཟ་བའི་སྒོ་ནས་བསྐལ་དོན་དུ་སོང་བའི་གང་ཟག་གིས་གཞི་འདིར་དེ་གཉིས་ཡོད་ཅེས་སམ་མེད་ཅེས་ཐག་གཅོད་དུ་མི་རུང་བ་དཔེར་མཛད་ནས།
དོན་ལ་གང་ཟག་གང་དང་གང་གིས་སྐྱོན་ཡོན་རང་གི་ཚད་མས་མ་དེས་བཞིན་དུ་སྒྲོ་བསྐུར་བྱང་མི་རུང་བར་ཤེས་པའི་ཆེད་དོ། །བློ་ལ་ལྟོས་པའི་བསྐལ་དོན་ལ་གསུམ་ཡོད་དེ། ཡུལ་དང་དུས་དང་ངོ་བོའི་བསྐལ་དོན་གསུམ་ཡོད་པའི་ཕྱིར། དང་པོ་ནི། རང་དང་ཕྱོགས་ཐག་ཤིན་ཏུ་
@016A ༄༅། །རིང་བ་ན་ཡོད་པའི་སྣོད་བཅུད་ཀྱི་ཁྱད་པར་ལྟ་བུ། གཉིས་པ་ནི། བསྐལ་པ་འདས་ཟིན་པ་དང་འབྱུང་བའི་དུས་ན་ཇི་འདྲ་བྱུང་བ་དང་འབྱུང་བའི་ཁྱད་པར་ལྟ་བུ་སྟེ། དེ་རྣམས་ནི་སྤྱིར་བསྐལ་དོན་མིན་ཡང་རང་གི་བློ་ལ་བལྟོས་པའི་བསྐུལ་
དོན་ནོ། །གསུམ་པ་ནི། རང་དང་ཉེ་བ་ན་ཡོད་ཀྱང་ངོ་བོ་ཕྲ་བའི་དབང་གིས་བསྐལ་དོན་དུ་སོང་བ་མདུན་གྱི་ཤ་ཟ་ལྟ་བུ་དང༌། ལྷ་མའི་བར་སྲིད་པ་རྣམས་དང་དེའི་བུམ་པ་ལྟ་བུའོ།། ༈ གཉིས་པ་སྣང་རུང་མ་དམིགས་པའི་རྟགས་ནི། རྣམ་འགྲེལ་ལས། གཏན་
ཚིགས་བྱེ་བྲག་ལ་བལྟོས་ནས། །འགའ་ཞིག་མེད་ཤེས་འབྲས་བུ་ཅན། །ཞེས་སོགས་ཀྱིས་བསྟན་ཏེ་འདི་ལ་གསུམ། མཚན་ཉིད། དབྱེ་བ། ཞར་བྱུང་ངོ།། དེའི་དང་པོ་ནི། སྣང་རུང་མ་དམིགས་པའི་ཚུལ་གསུམ་ཡིན་པ། སྣང་རུང་མ་དམིགས་པའི་རྟགས་
ཡང་དག་གི་མཚན་ཉིད། དེ་སྒྲུབ་ཀྱི་སྣང་རུང་མ་དམིགས་པའི་ཚུལ་གསུམ་ཡིན་པ། དེ་སྒྲུབ་ཀྱི་སྣང་རུང་མ་དམིགས་པའི་རྟགས་ཡང་དག་གི་མཚན་ཉིད། གོ་བ་དང་སྦྱར་ན། ཁྱོད་དེ་སྒྲུབ་ཀྱི་མ་དམིགས་པའི་རྟགས་ཡང་དག་གང་ཞིག །ཁྱོད་ཀྱི་རྟགས་ཀྱིས་དེ་
སྒྲུབ་ཀྱི་དགག་བྱའི་ཆོས་སུ་བཏགས་པའི་དོན་དེ་ཡོད་ན། ཁྱོད་དེ་སྒྲུབ་ལ་ཕྱོགས་ཆོས་ཅན་དུ་སོང་བའི་གང་ཟག་གི་ཚད་མ་ལ་སྣང་རུང་ཡིན་དགོས་པ། ཁྱོད་དེ་སྒྲུབ་ཀྱི་སྣང་རུང་མ་དམིགས་པའི་རྟགས་ཡང་དག་གི་མཚན་ཉིད། གཉིས་པ་དེ་ལ། དབྱེ་ན་སྣང་
རུང་གི་འབྲེལ་ཟླ་མ་དམིགས་པ་དང༌། འགལ་ཟླ་དམིགས་པའི་རྟགས་གཉིས། དང་པོ་ལ། སྣང་རུང་གི་རྒྱུ། ཁྱབ་བྱེད། རང་བཞིན། དངོས་འབྲས་མ་དམིགས་པའི་རྟགས་དང་བཞི། དང་པོ་ནི། མེ་མེད་པའི་མཚན་མོའི་རྒྱ་མཚོར་ཆོས་ཅན། དུ་བ་
@016B མེད་དེ། མེ་མེད་པའི་ཕྱིར་ཞེས་བཀོད་པའི་ཚེ་མེ་མེད་པ་ལྟ་བུ། གཉིས་པ་ནི། ཤིང་མེད་པའི་བྲག་རྫོང་ན་ཆོས་ཅན། ཤ་བ་མེད་དེ། ཤིང་མེད་པའི་ཕྱིར་ཞེས་པའི་རྟགས་དེ་ལྟ་བུ། གསུམ་པ་ནི། བུམ་པས་དབེན་པའི་ས་ཕྱོགས་ཆོས་ཅན། བུམ་པ་མེད་དེ། བུམ་པ་ཚད་
མས་མ་དམིགས་པའི་ཕྱིར་ཞེས་པའི་རྟགས་དེ་ལྟ་བུ། བཞི་པ་ནི། དུ་བས་དབེན་པའི་ས་ཕྱོགས་ཆོས་ཅན། དུ་བའི་དངོས་རྒྱུ་མེད་དེ། དུ་བ་མེད་པའི་ཕྱིར་ཞེས་པའི་རྟགས་དེ་ལྟ་བུ། གཉིས་པ་འགལ་ཟླ་དམིགས་པའི་རྟགས་ལ་དབྱེ་ན། ལྷན་ཅིག་མི་གནས་
འགལ་གྱི་དེ་དང༌། ཕན་ཚུན་སྤངས་འགལ་གྱི་དེ་གཉིས། དང་པོ་ལ་འགལ་བའི་རང་བཞིན་དམིགས་པ་བཞི། འབྲས་བུ་དམིགས་པ་བཞི། ཁྱབ་བྱ་དམིགས་པ་བཞི་སྟེ་བཅུ་གཉིས་སོ།། དེ་དག་གི་དབྱེ་བ་རྒྱས་པར་ནི་གཞན་དུ་བལྟ་ལ། མཚན་གཞི་ཙམ་ནི།
མེ་སྟོབས་ཆེན་པོས་ཁྱབ་པར་གནོན་པའི་ཤར་གྱི་དངོས་ཆོས་ཅན། གྲང་རེག་རྒྱུན་ཆགས་སུ་གནས་པ་མེད་དེ། མེ་སྟོབས་ཆེན་པོས་ཁྱབ་པར་གནོན་པའི་དངོས་པོ་ཡིན་པའི་ཕྱིར་ཞེས་པའི་རྟགས་དེ་ལྟ་བུའོ།། གཉིས་ཕན་ཚུན་སྤངས་འགལ་ནི། སྒྲ་ཆོས་
ཅན། རྟག་པས་སྟོང་སྟེ། བྱས་པ་ཡིན་པའི་ཕྱིར་ཞེས་པའི་རྟགས་དེ་ལྟ་བུའོ།། གསུམ་པ་ཞར་བྱུང་ནི། རྟགས་དེ་ལ་དངོས་སྟོབས་ཀྱི་རྟགས། ཡིད་ཆེས་ཀྱི་རྟགས། གྲགས་པའི་རྟགས། དོན་སྒྲུབ་ཀྱི་རྟགས། ཐ་སྙད་སྒྲུབ་ཀྱི་རྟགས། མཐུན་ཕྱོགས་
ལ་རྣམ་གཉིས་སུ་འཇུག་པ་དང་ཁྱབ་བྱེད་དུ་འཇུག་པའི་རྟགས་ལྔ་ལས། བྱས་པ་དེ། སྒྲ་མི་རྟག་པར་སྒྲུབ་པར་བྱེད་པའི་དངོས་སྟོབས་ཀྱི་རྟགས། དཔྱད་གསུམ་གྱིས་དག་པའི་ལུང་དེ། རང་གི་བསྟན་བྱའི་དོན་ལ་མི་སླུ་བར་སྒྲུབ་པར་བྱེད་པའི་ཡིད་ཆེས་ཀྱི་རྟགས།
@017A ༄༅། །རྟོགས་ཡུལ་ན་ཡོད་པ་དེ། རི་བོང་ཅན་ཟླས་སྒྲས་རུང་དུ་སྒྲུབ་པར་བྱེད་པའི་གྲགས་པའི་རྟགས། བྱས་པ་དེ་སྒྲ་སྐད་ཅིག་མར་སྒྲུབ་པར་བྱེད་པའི་དོན་སྒྲུབ་ཀྱི་རྟ(Gs)། སྐད་ཅིག་མ་དེ། སྒྲ་མི་རྟག་པར་སྒྲུབ་པར་བྱེད་པའི་ཐ་སྙད་འབའ་ཞིག་སྒྲུབ་ཀྱི་རྟ(Gs)།
རྩོལ་བྱུང་དེ་སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ལ་རྣམ་གཉིས་སུ་འཇུག་པའི་རྟགས། བྱས་པ་དེ་དེ་སྒྲུབ་ཀྱི་མཐུན་ཕྱོགས་ལ་ཁྱབ་བྱེད་དུ་འཇུག་པའི་རྟགས་ཡང་དག་ཡིན་ནོ།། ཡང་སྐྱེ་བ་སྔ་ཕྱི་ཡོད་པར་སྒྲུབ་པའི་རྟགས་སྦྱོར་ནི། སོ་སྐྱེ་འཆི་ཁ་མའི་
སེམས་ཐ་མ་ཆོས་ཅན། ཁྱོད་ཀྱི་ཉེར་འབྲས་སུ་གྱུར་པའི་རིག་པ་ཕྱི་མ་ཡོད་དེ། ཁྱོད་ཟག་བཅས་ཀྱི་རིག་པ་ཡིན་པའི་ཕྱིར། དཔེར་ན། ད་ལྟའི་བློ་བཞིན། བྱིས་པ་བཙས་མ་ཐག་པའི་བློ་ཆོས་ཅན། རང་གི་རིགས་འདྲའི་བློ་སྔ་མ་སྔོན་དུ་སོང་སྟེ། རིག་པ་ཡིན་པའི་
ཕྱིར། དཔེར་ན། རྒན་པོའི་བློ་བཞིན་ཞེས་ལྟ་བུའོ།། ༈ གཉིས་པ་རྟགས་ལྟར་སྣང་ནི། རྣམ་འགྲེལ་ལས་ལྟར་སྣང་དེ་ལས་གཞན་སོགས་ཀྱིས་བསྟན་ཏེ། དེ་ལ་སྤྱིར་རྟགས་ལྟང་སྣང་མེད་དེ། གཞི་གྲུབ་ན་རྟགས་ཡང་དག་ཡིན་དགོས་པའི་ཕྱིར།
དེ་སྒྲུབ་ཀྱི་རྟགས་ལྟར་སྣང་ཡོད་དེ། དེ་སྒྲུབ་ཀྱི་ཚུལ་གསུམ་མ་ཡིན་པ། དེ་སྒྲུབ་ཀྱི་རྟགས་ལྟར་སྣང་གི་མཚན་ཉིད། དབྱེ་ན་གསུམ་སྟེ། དེ་སྒྲུབ་ཀྱི་འགལ་བའི་རྟགས། མ་ངས?་པའི་རྟགས། མ་གྲུབ་པའི་རྟགྶོ། །དེ་སྒྲུབ་ཀྱི་ཕྱོགས་ཆོས་གང་ཞིག །ཁྱོད་
ཀྱི་རྟགས་ཀྱིས་དེ་སྒྲུབ་ཀྱི་ཁྱབ་པའི་ཚུལ་གཉིས་ཕྱིན་ཅི་ལོག་ཏུ་ངེས་པ། དེ་སྒྲུབ་ཀྱི་འགལ་རྟགས་ཀྱི་མཚན་ཉིད། མཚན་གཞི་ནི་སྒྲ་ཆོས་ཅན། རྟག་སྟེ?། བྱས་པ་ཡིན་པའི་ཕྱིར་ཞེས་པའི་རྟགས་དེ་ལྟ་བུ། དེ་སྒྲུབ་ཀྱི་ཕྱོགས་ཆོས་གང་ཞིག །ཁྱོད་ཀྱི་རྟགས་ཀྱིས་དེ་
@017B སྒྲུབ་ཀྱི་ཁྱབ་པའི་ཚུལ་གཉིས་རྣམ་མར་མ་ངེས་པ། དེ་སྒྲུབ་ཀྱི་མ་ངེས་པའི་གཏན་ཚིགས་ཀྱི་མཚན་ཉིད། མཚན་གཞི་ནི། སྒྲ་ཆོས་ཅན། མི་རྟག་སྟེ། ཡོད་པའི་ཕྱིར་ཞེས་པའི་རྟགས་དེ་ལྟ་བུ། དེ་སྒྲུབ་ཀྱི་ཕྱོགས་ཆོས་མ་ཡིན་པར་དམིགས་པ་དེ། དེ་སྒྲུབ་ཀྱི་མ་གྲུབ་པའི་གཏན་
ཚིགས་ཀྱི་མཚན་ཉིད། དབྱེ་ན་མང་ཡང་བསྡུ་ན་དགུ་སྟེ། དེ་སྒྲུབ་ཀྱི་རྟགས་ཀྱི་ངོ་བོ་མེད་ནས་མ་གྲུབ་པ། དེ་བཞིན་དུ་ཆོས་ཅན་གྱི་ངོ་བོ་མེད་ནས་མ་གྲུབ་པ། རྩོད་གཞིའི་སྟེང་དུ་མེད་ནས་མ་གྲུབ་པ་གསུམ་དང༌། ཤེས་འདོད་མེད་ནས་མ་གྲུབ་པ། ཆོས་ཅན་ལ་ཐེ་ཚོམ་ཟ་ནས་
མ་གྲུབ་པ། འབྲེལ་པ་ལ་ཐེ་ཚོམ་ཟ་ནས་མ་གྲུབ་པ་གསུམ་དང༌། རྟགས་ཆོས་ཐ་དད་མེད་ནས་མ་གྲུབ་པ། གཞི་ཆོས་ཐ་དད་མེད་ནས་མ་གྲུབ་པ། གཞི་རྟགས་ཐ་དད་མེད་ནས་མ་གྲུབ་པ་དང་གསུམ་སྟེ་དགུའོ།། མཚན་གཞི་ནི་རིམ་པ་བཞིན་དུ་དང་པོ་ནི། སྒྲ་
ཆོས་ཅན། སྐྱེས་པ་ཡིན་ཏེ། རྒྱུ་རྟག་པ་ལས་བྱུང་བའི་ཕྱིར་ཞེས་པའི་རྟགས་དེ་ལྟ་བུའོ།། གཉིས་པ་ནི་རི་བོང་གི་རྭ་ཆོས་ཅན། ཡོད་དེ། རྭ་ཡིན་པའི་ཕྱིར་ཞེས་པའི་རྟགས་དེ་ལྟ་བུ། གསུམ་པ་ནི། སྒྲ་ཆོས་ཅན། དངོས་པོ་ཡིན་ཏེ། མིག་གིས་མཐོང་བའི་ཕྱིར་
ཞེས་པའི་རྟགས་དེ་ལྟ་བུ་དང༌། བཞི་པ་ནི། དེ་ཆོས་ཅན། མཉན་བྱ་ཡིན་ཏེ། མི་རྟག་པ་ཡིན་པའི་ཕྱིར་ཞེས་པའི་རྟགས་ལྟ་བུ། ལྔ་པ་ནི། དྲི་ཟ་བསྐལ་དོན་དུ་སོང་བའི་གང་ཟག་གི་ངོ་བོར་དྲི་ཟའི་གླུ་དབྱངས་ཆོས་ཅན། མི་རྟག་སྟེ། བྱས་པའི་ཕྱིར་ཞེས་པའི་རྟགས་དེ་
ལྟ་བུ། དྲུག་པ་ནི། དེ་ཆོས་ཅན། ཡོད་དེ། དྲི་ཟའི་ཚད་མས་གྲུབ་པའི་ཕྱིར་ཞེས་པའི་རྟགས་དེ་ལྟ་བུ་དང༌། འདུན་པ་ནི། སྒྲ་ཆོས་ཅན། མི་རྟག་སྟེ། མི་རྟག་པའི་ཕྱིར་ཞེས་པའི་རྟགས་དེ་ལྟ་བུ། བརྒྱད་པ་ནི། སྒྲ་ཆོས་ཅན། སྒྲ་ཡིན་ཏེ། མི་རྟག་པའི་
@018A ༄༅། །ཕྱིར་ཞེས་པའི་རྟགས་དེ་ལྟ་བུ། དགུ་པ་ནི། སྒྲ་ཆོས་ཅན། མི་རྟག་སྟེ། སྒྲ་ཡིན་པའི་ཕྱིར་ཞེས་བཀོད་པའི་ཚེ་རྟགས་དེ་ལྟ་བུའོ།། གསུམ་པ་འཕྲོས་དོན་ལ་གཉིས། སྒྲུབ་དག་བཤད་པ་དང༌། འཕྲོས་དོན་གཞན་བཤད་པའོ།། དང་པོ་ལ་གཉིས། ཡང་དག
དང༌། ལྟར་སྣང་ངོ།། དང་པོ་ལ་དབྱེ་ན། འབྲས་རང་མ་དམིགས་པའི་སྒྲུབ་དག?་གསུམ། དང་པོ་ལ་ཆོས་མཐུན་སྦྱོར་དང༌། ཆོས་མི་མཐུན་སྦྱོར་གྱི་སྒྲུབ་དག་གཉིས་ལས། དང་པོ་ནི། སྦྱོར་བ་བཀོད་རྗེས་སུ། དུ་བ་ཡོད་ན། མེ་ཡོད་པས་ཁྱབ། དཔེར་ན། ཚངས་མང་
བཞིན། དུ་ལྡན་གྱི་ལ་ལ་ཡང་དུ་བ་ཡོད་དོ།། ཞེས་པ་ལྟ་བུ། གཉིས་པ་ནི། མེ་མེད་ན། དུ་བ་མེད་པས་ཁྱབ། དཔེར་ན། ཆུ་ཀླུང་བཞིན། དུ་ལྡན་གྱི་ལ་ལ་དུ་བ་ཡོད་དོ་ཞེས་པ་ལྟ་བུའོ།། གཉིས་པ་རང་བཞིན་གྱི་སྒྲུབ་དག་ལ་ཆོས་མཐུན་མི་མཐུན་གཉིས་
ཡོད་པ་ལས་དང་པོ་ནི། བྱས་ན། མི་རྟག་པས་ཁྱབ། དཔེར་ན། བུམ་པ་བཞིན་སྒྲ་ཡང་བྱས་སོ་ཞེས་པ་ལྟ་བུ། གཉིས་པ་ནི། རྟག་ན། མ་བྱས་པས་ཁྱབ། དཔེར་ན། འདུས་མ་བྱས་ཀྱི་ནམ་མཁའ་བཞིན། སྒྲ་ནི་བྱས་སོ་ཞེས་པ་ལྟ་བུའོ།། གསུམ་པ་མ་
དམིགས་པའི་སྒྲུབ་དག་ལ་གཉིས་ལས་དང་པོ་ནི། ཤིང་མེད་ན། ཤུགས་པ་མེད་པས་ཁྱབ། དཔེར་ན། ཤིང་མེད་པའི་ཐང་བཞིན་ཤིང་མ་དམིགས་པའི་བྲག་ངོས་ན་ནི་ཤིང་མེད་དོ་ཞེས་པ་ལྟ་བུ། གཉིས་པ་ནི། ཤུགས་པ་ཡོད་ན། ཤིང་ཡོད་པས་
ཁྱབ། དཔེར་ན། ནགས་ཚལ་བཞིན། ཤིང་མ་དམིགས་པའི་བྲག་ངོས་ན་ནི་ཤིང་མེད་དོ་ཞེས་པ་ལྟ་བུའོ།། སྤྱིར་སྒྲུབ་དག་ཡང་དག་ལ། ཚུལ་གསུམ་དཔེ་དང་བཅས་པ་ལྷག་ཆད་མེད་པར་སྟོན་པ་ཞིག་དགོས་ཏེ། མཚོན་ཙམ་བརྗོད་ན། སྒྲ་
@018B ཆོས་ཅན། མི་རྟག་སྟེ། བྱས་པའི་ཕྱིར་ཞེས་བཀོད་ནས། བྱས་ན་མི་རྟག་པས་ཁྱབ། དཔེར་ན་བུམ་པ་བཞིན། སྒྲ་ཡང་བྱས་སོ་ཞེས་པའི་དག་འདེའི་བྱས་ནས་མི་རྟག་ཁྱབ་ཅེས་པས་རྗེས་ཁྱབ་དངོས་སུ་བརྗོད་ནས་ལྡོག་ཁྱབ་ཤུགས་ལ་འཕེན་ཅིང༌། སྒྲ་ཡང་བྱས་ཞེས་
བས་ཆོས་ཅན་དང་འབྲེལ་བའི་ཕྱོགས་ཆོས་དངོས་སུ་བརྗོད་དེ། དཔེར་ན་བུམ་པ་བཞིན་ཞེས་པས་མཐུན་དཔེ་དངོས་སུ་བརྗོད་པ་ལྟ་བུ་ཡིན་པའི་ཕྱིར། ཕྱོགས་ཆོས་དང་ལྡོག་ཁྱབ་དངོས་སུ་བརྗོད་ནས་རྗེས་ཁྱབ་ཤུགས་ལ་འཕེན་པ་ནི། རྟག་ན་མ་བྱས་པས་ཁྱབ།
དཔེར་ན། ནམ་མཁའ་བཞིན། སྒྲ་ནི་བྱས་སོ་ཞེས་པ་ལྟ་བུའོ།། འོན་ཀྱང༌། བྱས་ན་མི་རྟག་པས་ཁྱབ་པ་དང༌། རྟག་ན་མ་བྱས་པས་ཁྱབ་པ་གཉིས་ནི། སྦྱོར་བ་དེའི་རྗེས་ཁྱབ་དང་ལྡོག་ཁྱབ་མ་ཡིན་གྱི། བྱས་པ་ཉིད་དེའི་རྗེས་ཁྱབ་དང་ལྡོག་ཁྱབ་
ཡིན་ཞིང༌། ཕྱོགས་ཆོས་ཀྱང་ཡིན་ཏེ། དེའི་ཚུལ་གསུམ་ཡིན་པའི་ཕྱིར་རོ། །གཉིས་པ་འཕྲོས་དོན་གཞན་ལ། འོ་ན། གཞི་མ་གྲུབ་པ་ཆོས་ཅན་དུ་བཟུང་བའི་རྟགས་ཡང་དག་ཡོད་དམ་མེད། ཡོད་ན་དེའི་ཕྱོགས་ཆོས་ཇི་ལྟར་གྲུབ། མེད་ན་ནི།
རི་བོང་རྭ་ཆོས་ཅན། བདག་མེད་ཡིན་ཏེ། ཡོད་མེད་གང་རུང་ཡིན་པའི་ཕྱིར་ཞེས་པ་འདི་རྟགས་སྦྱོར་ཡང་དག་ཇི་ལྟར་ཡིན་ཞེ་ན་འདི་ལ་བཞེད་པ་མི་མཐུན་པ་ཡོད་ཀྱང་རྒྱལ་ཚབ་རིན་པོ་ཆེས་ནི་སྒྲུབ་རྟགས་ལ་གཞི་མ་གྲུབ་པ་རྩོད་གཞིར་བཟུང་བའི་རྟགས་
ཡང་དག་མེད་ཀྱང༌། དགག་རྟགས་ལ་དེ་ཡོད་པར་བཤད་པས་དཔྱད་རྒྱུད?་མང་ཡང་བཞག་གོ །ཡང༌། དབུ་མའི་ལུགས་ཀྱི་རྟེན་འབྲེལ་གྱི་རྟགས་དང༌། ཆ་ཅན་གྱི་རྟགས། གཅིག་དུ་བྲལ་གྱི་རྟགས། མུ་བཞི་སྐྱེ་འགོག་གི་
@019A ༄༅། །རྟགས་རྣམས་སྔར་བཤད་པའི་རྟགས་གསུམ་གང་རུང་དུ་འདུས་སམ་མ་འདུས་ཞེ་ན། སྤྱིར་རྟགས་ཡང་དག་ཐམས་ཅད་འབྲས་རང་མ་དམིགས་པའི་རྟགས་གསུམ་དུ་འདུས་ལ། འབྲས་རང་གི་རྟགས་གཉིས་ནི་གཙོ་བོར་སྒྲུབ་རྟགས་
ཡིན་ཞིང༌། མ་དམིགས་པའི་རྟགས་ལ་དགག་རྟགས་གཙོ་བོ་ཆེ་ཡང༌། དེ་སྒྲུབ་ཀྱི་དགག་རྟགས་ཡིན་ན། དགག་པ་ཡིན་མི་དགོས་ཏེ། བྱས་པ་དེ་སྒྲུབ་པ་ཡིན་ཀྱང་དེ་སྒྲ་མི་རྟག་པར་སྒྲུབ་པར་བྱེད་པའི་རང་བཞིན་གྱི་རྟགས་ཡང་དག་དང༌། སྒྲ་རྟག
སྟོང་དུ་སྒྲུབ་པར་བྱེད་པའི་མ་དམིགས་པའི་རྟགས་ཡང་དག་ཡིན་པའི་ཕྱིར། ཕྱི་མ་གྲུབ་སྟེ། དེ་དེ་སྒྲུབ་ཀྱི་འགལ་ཟླ་དམིགས་པའི་རྟགས་ཡང་དག་ཡིན་པའི་ཕྱིར་ཏེ། སྒྲ་ཆོས་ཅན། ཁྱོད་རྟག་པས་སྟོང་སྟེ། བྱས་པ་ཡིན་པའི་ཕྱིར་
ཞེས་བཀོད་པའི་ཚེ་ན་དེ་ལྟར་ཡིན་པའི་ཕྱིར།། དབུ་མའི་ལུགས་ཀྱི་རྟེན་འབྲེལ་གྱི་རྟགས་ནི། དེའི་ལུགས་ལ་དངོས་པོ་བདེན་མེད་དུ་སྒྲུབ་པའི་འགལ་ཟླ་དམིགས་པའི་རྟགས་ཡིན་པར་རྗེ་ཉིད་ཀྱིས་བཤད་ཅིང༌། ཆ་བཅས་ཀྱི་རྟགས་ཀྱང་དེ་དང་
འདྲའོ།། གཅིག་ཏུ་བྲལ་གྱི་རྟགས་ནི་དབུ་མ་རྒྱན་ལས། བདེན་མེད་སྒྲུབ་པའི་ཁྱབ་བྱེད་མ་དམིགས་པའི་རྟགས་སུ་བཤད་ཅིང༌། འདིའི་རིགས་པས་དེ་སྒྲུབ་ཀྱི་བདེན་མེད་སྒྲུབ་པའི་རྟགས་ཡང་དག་ཐམས་ཅད་ཀྱང་དེ་སྒྲུབ་ཀྱི་མ་དམིགས་
པའི་རྟགས་སུ་འགྱུར་ཏེ། དེ་ཡང་སྣང་རུང་མ་དམིགས་པའི་རྟགས་གཙོ་ཆེའོ། །མཚོན་ན། བུམ་པ་ཆོས་ཅན། བདེན་པར་མེད་དེ། བདེན་པར་ཚད་མས་མ་དམིགས་པའི་ཕྱིར་ཞེས་པའི་རྟགས་འདི་ལྟ་བུ་རང་བཞིན་མ་དམིགས་
@019B པའི་རྟགས་དང༌། བུམ་པས་དག་པའི་ས་ཕྱོགས་ན་ཆོས་ཅན། གསེར་བུམ་མེད་དེ། བུམ་པ་མེད་པའི་ཕྱིར་ཞེས་པའི་རྟགས་འདི་ལྟ་བུ་ཁྱབ་བྱེད་དེ་མ་དམིགས་པའི་རྟགས་དང༌། མེས་དབེན་པའི་རྩིག་སྐོར་ན་ཆོས་ཅན། དུ་བ་མེད་དེ། མེ་མེད་པའི་ཕྱིར་
ཞེས་པའི་རྟགས་འདི་ལྟ་བུ་རྒྱུ་མ་དམིགས་པའི་རྟགས་དང༌། མྱུ་གུ་ཆོས་ཅན། བདེན་བས་སྟོང་སྟེ། རྟེན་འབྲེལ་ཡིན་པའི་ཕྱིར་ཞེས་པའི་རྟགས་འདི་ལྟ་བུ་འགལ་ཟླ་དམིགས་པའི་རྟགས་ཡང་དག་ཡིན་པ་དེ་བཞིན་དུ་གཞན་ལ་སྦྱར་ནས་ཤེས་པར་
བྱའོ། །གཞི་གཅིག་ལ་ལྟོས་པའི་རྟགས་གསུམ་འགལ་ཡང་བསྒྲུབ་གཞི་སོ་སོ་ལ་ལྟོས་ནས་མི་འགལ་ཏེ། མཚོན་ན། སྐྱེས་པ་དེ། མྱུ་གུ་རང་གི་རྒྱུ་ལས་བྱུང་བར་སྒྲུབ་པར་བྱེད་པའི་འབྲས་རྟགས་ཡང་དག་ཡིན་ཀྱང༌། མྱུ་གུ་
མི་རྟག་པར་སྒྲུབ་པའི་རང་བཞིན་གྱི་རྟགས་དང༌། དེ་གང་ཟག་གི་བདག་མེད་དུ་སྒྲུབ་པར་བྱེད་པའི་མ་དམིགས་པའི་རྟགས་ཡང་དག་ཡིན་པའི་ཕྱིར་རོ། །བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་དོན་གསུམ་པོ་སྤྱི་མཚན་
རྟོག་པས་བརྟགས་ཙམ་ཡིན་ཡང༌། དེ་སྒྲུབ་ཀྱི་རྟགས་ཆོས་དོན་གསུམ་པོ་གང་རུང་ཡིན་ན། རང་མཚན་ཡིན་དགོས་ཏེ། དེ་ཡིན་ན། དངོས་པོ་ཡིན་དགོས་པའི་ཕྱིར་ཏེ། དེ་སྒྲུབ་ཀྱི་དོན་རྩོད་གཞི་ཡིན་ན་སྒྲ་ཡིན་དགོས་ཤིང༌། དངོས་ཀྱི་བསྒྲུབ་བྱའི་ཆོས་ཡིན་
@020A ༄༅། །ན་མི་རྟག་པ་ཡིན་དགོས། རྟགས་ལ་བྱས་པ་ཉིད་དགོས་པའི་ཕྱིར་རོ། །དེས་ན་དེ་སྒྲུབ་ཀྱི་རྟགས་ཆོས་དོན་གསུམ་ནི་དེ་སྒྲུབ་ཀྱི་རྟགས་ཆོས་དོན་གསུམ་མིན་ཞེས་བྱ་སྟེ། དེ་བཞིན་དུ་གཞན་ལ་ཡང་སྦྱར་ནས་ཤེས་
པར་བྱ་དགོས་སོ། །།སྨྲས་པ། རིགས་གཞུང་ཆུ་གཏེར་ཆེན་པོ་ལས་འཁྲུངས་པའི། །རིགས་ཚུལ་སྙིང་པོ་བསྡུས་པའི་ཆ་ཙམ་ཞིག །རིགས་པ་དོན་གཉེར་ཅན་ལ་ཕན་པའི་ཆེད། །
རིགས་པའི་ལམ་ནས་དྲངས་ཏེ་བདག་གིས་བཀོད། །འོན་ཀྱང་སྦྱངས་མཁས་བློ་ཡི་མེ་ལོང་དེས?། །ཚུལ་འདིའི་ཟབ་དོན་གཟུགས་བརྙན་གསལ་འཆར་ཡང༌། །མ་སྦྱངས་མི་མཁས་བློ་གྲོས་རྩིག་ངོ་རུ། །འཆར་དཀའ་ཆོས་ཉིད་
ཡིན་ཕྱིར་བདག་ལྟས་ནི། །ཅེས་པ་འདི་ཡང་ཡང་རིས་རབ་འབྱམས་པ་བློ་བཟང་རྒྱལ་མཚན་ཞེས་བྱ་བ་དགེ་བཤེས་སུ་གྲགས་པ་དེས་བསྐུལ་བ་ལ་བརྟེན་ནས། ཤཱ་ཀྱའི་དགེ་སློང་གྲགས་པ་བཤད་སྒྲུབ་ཀྱིས་ཅོ་ནེའི་དགོན་ཉིད་དུ་སྦྱར་བའོ།། མངྒ་ལཾ།།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།