འབྲི་གུང་ཞྭ་ལྷ་ཁང་གི་རྡོ་རིང་སྔ་ཕྱི་གཉིས།

ཤམ་བྷ་ལའི་ཕོཉ་དྲ་བས་༢༠༠༨ཟླ་༠༡ཚེས་༠༧ཉིན་སྤེལ། ཞྭ་ལྷ་ཁང་གི་རྡོ་རིང་ནི་༼ཞྭ་ལྷ་ཁང་ནི་མལ་གྲོ་གུང་དཀར་རྫོང་ཉི་མ་ལྕང་རྭ་ཤང་ངམ་རྫོང་ཞོལ་ཤང་ཞྭ་གྲོང་ཚོའི་ཁོངས་སུ་གནས་ཤིང༌།༽བཙན་པོ་ཁྲི་སྲོང་ལྡེ་བཙན་གྱི་སྲས་མུ་ནེ་བཙན་པོའམ་ཁྲི་ལྡེ་སྲོང་བཙན་སད་ན་ལེགས་མཇིང་ཡོན་གྱིས་སྔ་རྗེས་ཆོས་བློན་མྱང་ཏིང་འཛིན་བཟང་པོ་ལ་བཀའ་གཙིགས་གཉིས་གནང་སྟེ། རྡོ་རིང་དང་པོ་ཡིག་ཕྲེང་ ༦༢ ཡོད་པ་ནི་ཕལ་ཆེར་སྤྱི་ལོ་ ༧༩༨ ནས་ ༨༡༢ ལོའི་བར་གྱི་ལོ་ལ་བཙུགས་པ་དང༌། རྡོ་རིང་གཉིས་པ་ཡིག་ཕྲེང་ ༤༩ ཡོད་པ་ནི་སྤྱི་ལོ་ ༨༡༢ ལོར་གྲུབ་ནས་ལྷ་ས་སྐྱིད་ཆུའི་སྟོད་རྒྱུད་གཞོང་རོང་མདོ་དབུ་རུ་ཞྭ་ལྷ་ཁང་དུ་བཙུགས་ཡོད། ཞྭ་ལྷ་ཁང་ནི་རྗེས་སུ་དགོན་བདག་སེར་བྱེས་གྲྭ་ཚང་ནས་གནང༌། རིག་གནས་གསར་བརྗེའི་སྐབས་ས་རྡོའི་ཕུང་པོར་སོང་ཞིང༌། སྤྱི་ལོ་ ༡༩༨༦ ལོར་ཉམས་གསོ་ཞུས་ཏེ་དེང་དགེ་འདུན་ ༡༠ བཞུགས། ཐོག་མར་གྲུབ་མཐའ་རྙིང་ལུགས་ནས་ཕྱིས་འབྲི་གུང་བཀའ་བརྒྱུད་དུ་གྱུར། དེང་སྔོན་གྱི་རྡོ་རིང་དང༌། གཡུ་སྒྲོན་མའི་བླ་ཤིང༌། འདུ་ཁང་དང་བཅས་ཅུང་ཟད་བཞེངས་ཡོད། རིག་གསར་སྐབས་རྡོ་རིང་གཅིག་ལ་ཆག་སྐྱོན་བྱུང་ཞིང་ད་ལྟ་བསྒྲེངས་འཛུགས་གནང་མ་ཐུབ་པར་ལུས་ཡོད་པ་འདི་ཡིན།

                དེ་ཡང་སྤྱི་ལོ་ ༧༩༨ ལོར་བཙན་པོ་ཁྲི་སྲོང་ལྡེ་བཙན་གྱི་སྲས་བོད་རྒྱལ་བཞི་བཅུ་པ་མུ་ནེ་བཙན་པོས་ཕྱག་བཏབ་ ༼ལ་ལར་ཁྲི་ལྡེ་སྲོང་བཙན་གྱི་བླའི་མཆོད་གནས་པཎ་ཆེན་བི་མ་ལ་མི་ཏྲའི་དངོས་སློབ་མྱང་ཏིང་འཛིན་བཟང་པོས་ཕྱག་བཏབ་ཅེས་འཁོད༽ པའི་དབུ་རུ་ཞྭ་ལྷ་ཁང་གི་སྒོ་འགྲམ་དུ་རྡོ་རིང་གཉིས་ཡོད་པ་དེ་གཉིས་ནི་བོད་ཀྱི་བཙན་པོ་ཁྲི་ལྡེ་སྲོང་བཙན་གྱིས་རང་གི་ཆབ་སྲིད་ཀྱི་བློན་པོ་ཆེན་པོ་བན་དེ་མྱང་ཏིང་འཛིན་བཟང་པོའི་བྱས་རྗེས་གཟེངས་སུ་བསྟོད་པའི་ཞལ་བཞེས་བཀའ་གཙིགས་སྔ་རྗེས་གཉིས་གནང་བའི་མདོ་དོན་རྡོ་རིང་དུ་བཀོད་པ་ཞིག་ཡིན།

                བན་དེ་མྱང་ཏིང་འཛིན་བཟང་པོ་ཆོས་ཕྱོགས་ནས་སྙན་གྲགས་ཆེ་བ་མ་ཟད། སྲིད་ཕྱོགས་ནས་ཁྲི་ལྡེ་སྲོང་བཙན་གྱི་བློན་པོ་འཇོན་ཐང་ཅན་ཞིག་ཡིན། ཁོང་གིས་ཁྲི་ལྡེ་སྲོང་བཙན་སྐུ་ཆུང་ངུའི་དུས་སུ་ཡབ་ཡུམ་གྱི་ཚབ་བྱས་ཏེ་ལེགས་ཕྱོགས་ཀྱི་གསལ་འདེབས་ཞུ་བ་དང༌། རྒྱལ་བློན་འབངས་བཅས་མཛའ་ཞིང་མཐུན་པ་སོགས་འཕྲལ་ཕུགས་གཉིས་ཀར་ཕན་པ་ཆེ་བའི་གྲོས་བཏོན་ནས་ཟིང་ཆ་མེད་པར་བཟོས་པ་བཅས་གོང་འོག་ཀུན་གྱི་སྲོག་ཤིང་ལྟ་བུར་གྱུར་པར་བརྟེན་ཁྲི་ལྡེ་སྲོང་བཙན་ཁྲི་ལ་འཁོད་རྗེས་སྲིད་ཀྱི་བློན་པོ་ཆེན་པོར་བསྐོས་པའི་རྗེས་སུ་སྔར་ལས་ལྷག་པར་བྱ་བ་བཟང་པོ་ཤ་སྟག་བསྒྲུབས་པ་བཅས་ཐོག་མཐའ་བར་གསུམ་དུ་བཙན་པོར་ལྷག་བསམ་དག་ཅིང་བྱས་རྗེས་ཆེན་པོ་བཞག་ཡོད། དེར་བརྟེན་ཁྲི་ལྡེ་སྲོང་བཙན་གྱིས་བན་དེ་མྱང་ཏིང་འཛིན་བཟང་པོར་བྱས་རྗེས་དྲིན་གསོ་བྱེད་ཕྱིར་བཀའ་གཙིགས་ཐེངས་གཉིས་གནང་ནས་ཁོང་གི་ཕ་མེས་རྒྱུད་བཅས་བཙན་པོའི་གདུང་རྒྱུད་དང་བཅས་པས་དྲིན་གྱིས་བསྐྱངས་ཤིང་ལྟ་རྟོག་བྱེད་རྒྱུའི་ཞལ་བཞེས་མཛད་པ་ཡིན།

                རྡོ་རིང་གཉིས་ཀ་བན་དེ་མྱང་ཏིང་འཛིན་བཟང་པོར་ཞལ་བཞེས་བཀའ་གཙིགས་གནང་བ་འདྲ་ཡང༌། རྡོ་རྡིང་སྔ་མའི་ནང་དོན་ཅུང་རྒྱས་པ་དང༌། ཕྱི་མ་ནི་སྔ་མའི་ནང་དོན་ལ་ཁ་སྣོན་མཛད་པ་ཞིག་ཡིན། རྡོ་རིང་སྔ་མ་དེར་བན་དེ་མྱང་ཏིང་འཛིན་བཟང་པོའི་མེས་པོ་སྣང་བཟང་འདུས་ཀོང་གི་བུ་ཚ་རྒྱུད་བཅས་ལ་བཙན་པོ་གདུང་རབས་རིམ་བརྒྱུད་ནས་ལྟ་རྟོག་གཟིགས་བསྐྱངས་ཀྱིས་ཁོ་ཚོའི་ནང་ནས་འཇོན་ཐང་ཆེ་བ་གཅིག་ཞབས་འབྲིང་དུ་བཅུག་ནས་རང་གི་ནུས་པ་དང་བསྟུན་པའི་ཞབས་འདེབས་སྒྲུབ་ཏུ་བཅུག་པ། དུས་རྟག་ཏུ་གོང་ནས་འགོ་འདོན་མཛད་དེ་བཙན་པོར་རྒྱབ་གཏོད་བྱས་པ་ལ་སོགས་པའི་ཉེས་འཛོལ་བྱུང་བའི་ཚེའང་ཉེས་ཅན་དེ་རང་ལ་ཆད་པ་གཅོད་པ་ལས་གཉེན་ཉེ་གཞན་ལ་ལེ་ཁག་དཀྲི་བ་དང་ཁེ་དབང་གཞུང་བཞེས་མི་མཛད་པ་སོགས་ཀྱི་ནང་དོན་འཁོད་ཡོད།

                རྡོ་རིང་གཉིས་པ་དེའི་ནང་དུ་སླར་ཡང་བློན་སྣང་བཟང་འདུས་ཀོང་གི་བུ་རྒྱུད་ཙམ་དུ་མ་ཟད་དེའི་གཉེན་ཚན་གཏོགས་པ། གཙང་དང་སྟོད་ལ་སོགས་པར་གནས་པའི་མི་སེར་ཕལ་པ་ལའང་ཞང་ལོན་ཡི་གེ་པའི་ཐོབ་ཐང་གནང་རྒྱུ་དང༌། གལ་ཏེ་ཉེས་པ་མེད་བཞིན་དུ་ཁོ་ཚོའི་དབང་ལ་གནོད་འཚེ་བྱེད་མི་བྱུང་ན་མཐོ་དམའ་སུ་ཡིན་ལ་མ་ལྟོས་པར་ཆད་པ་གཅོད་རྒྱུ། སྣང་བཟང་འདུས་ཀོང་གི་བུ་ཚ་རྒྱུད་བཅས་ནམ་ཡང་བཙན་པོའི་ཆབ་འོག་ཏུ་བསྐྱངས་ནས་གཞན་གྱིས་དབང་ཡོད་བྱེད་དུ་མི་འཇུག་པ་བཅས་ཀྱི་ནང་དོན་ཁ་སྣོན་མཛད་ཡོད་པ་རེད། རྡོ་རིང་དེ་ནི་ཁྲི་སྲོང་ལྡེ་བཙན་དང་མུ་ནེ་བཙན་པོ་སྐུ་གཤེགས་རྗེས་བཙན་པོ་ཁྲི་ལྡེ་སྲོང་བཙན་གྱི་དུས་སྐབས་ཀྱི་ལོ་རྒྱུས་དང༌། རྒྱལ་བློན་བར་གྱི་འབྲེལ་བ། དེ་བཞིན་བཙན་པོ་དེའི་གཅེན་པོ་མུ་རུག་བཙན་པོའི་ལོ་རྒྱུས་བཅས་ཀྱི་ཐད་དཔྱད་གཞི་མི་ཉུང་བ་བཏོན་ཡོད་པས་ལོ་རྒྱུས་ཀྱི་དོན་སྙིང་ཆེན་པོ་ལྡན་ཡོད།

                ཀ༽ འབྲི་གུང་ཞྭ་ལྷ་ཁང་གི་རྡོ་རིང་སྔ་མའམ་རྡོ་རིང་དང་པོའི་ནང་གཤམ་གསལ་གནད་དོན་ཁག་བཞི་བཤད་ཡོད་པ་སྟེ། ༡༽ རྒྱལ་པོ་ཁྲི་ལྡེ་སྲོང་བཙན་གྱི་ཡབ་ནི་རྒྱལ་པོ་ཁྲི་སྲོང་ལྡེ་བཙན་ཡིན་པ་དང༌། ཁོང་གི་གཅེན་པོ་ནི་མུ་རུག་བཙན་པོ་ཡིན་པ་དང༌། སྐབས་དེར་བཀའ་གཙིགས་བཅས་པར་མཉམ་དུ་ཡོད་པ། ༢༽ ཁྲི་ལྡེ་སྲོང་བཙན་གྱི་ཡབ་ཁྲི་སྲོང་ལྡེ་བཙན་དང༌། གཅེན་པོ་གཉིས་རྒྱུན་རིང་པོའི་བར་མ་མཐུན་པ་བྱུང་བ་བློན་པོ་མྱང་ཏིང་འཛིན་བཟང་པོས་ཞི་འཇགས་མཐུན་འགྲིགས་བྱས་པ། ༣༽ བློན་པོ་མྱང་ཏིང་འཛིན་བཟང་པོ་ནི་བློན་ཆེན་གྱི་གོ་གནས་བཟུང་བའི་དགེ་སློང་ཞིག་དང༌། རྒྱལ་པོ་ཁྲི་ལྡེ་སྲོང་བཙན་གྱིས་སྲིད་དབང་བཟུང་སྐབས་གལ་ཆེའི་དབང་ཆ་ཡོད་པའི་ཆབ་སྲིད་ཀྱི་བློན་ཆེན་ཞིག་ཡིན་པ། ༤༽ བློན་པོ་མྱང་ཏིང་འཛིན་བཟང་པོའི་མི་རབས་གོང་མ་རྣམས་ལ་བྱ་དགར་སྤྲད་པའི་ཞིང་འབྲོག་བྲན་གཡོག་རྣམས་མུ་མཐུད་བརྒྱུད་འཛིན་བྱས་ཆོག་པ་དང༌། རབས་ཆད་པའམ། ཉེས་ཆད་ཕོག་པ་གང་ཡིན་ཀྱང་མུ་མཐུད་བདག་དབང་བྱས་ཆོག་པ་ལས་བཙན་པོས་ཕྱིར་ལེན་མི་བྱེད་པ་བཅས་བཤད་ཡོད།

                ཁ༽ འབྲི་གུང་ཞྭ་ལྷ་ཁང་གི་རྡོ་རིང་གཉིས་པ་དེར་གཤམ་གསལ་གྱི་གལ་ཆེའི་གནད་དོན་ཁག་གསུམ་གསལ་བཤད་བྱས་ཡོད་པ་སྟེ། ༡༽ རྒྱལ་པོ་ཁྲི་ལྡེ་སྲོང་བཙན་གྱིས་སྲིད་དབང་བཟུང་བའི་རིང་འབྲུག་ལོ་སྔ་རྗེས་གཉིས་བྱུང་བ་དང༌། འབྲུག་ལོ་རྗེས་མའི་སྐབས་དེར་ཕོ་བྲང་འོན་ཅང་དོ་ན་བཞུགས་ཡོད་པ་གསལ་བར་འཁོད་ཡོད་པ་དེས་དེ་སྔོན་བོད་ཀྱི་ལོ་རྒྱུས་ཡོངས་གྲགས་སུ་རྒྱལ་པོ་ཁྲི་རལ་པ་ཅན་གྱི་དུས་སུ་བོད་ཡིག་གི་བཀས་བཅད་བར་པ་བྱས་པ་བཤད་པ་དེར་ཡང་བསྐྱར་གོམ་གང་མདུན་སྤོས་ཀྱིས་བརྟག་དཔྱད་བྱེད་དགོས་པ། ༢༽ བཀའ་གཙིགས་ཐེངས་གཉིས་པ་འདི་བཅས་སྐབས་རྒྱལ་པོ་ཁྲི་ལྡེ་སྲོང་བཙན་གྱི་གཅེན་པོ་མུ་རུག་བཙན་པོའི་མིང་འཁོད་མེད་ ༼ཕལ་ཆེར་སྐུ་གཤེགས་པ་འདྲ༽ པ། ༣༽ བློན་པོ་མྱང་ཏིང་འཛིན་བཟང་པོའི་མེས་པོ་བློན་སྣང་བཟང་འདུས་ཀོང་གི་མི་རྒྱུད་གཙང་དང་སྟོད་ཁུལ་དུ་ཡོད་པ་རྣམས་ལ་ཞང་བློན་བཀའ་ཡིག་ཅན་གྱི་ཐོབ་ཐང་གནང་བ་དང༌། ཁོ་ཚོའི་རྒྱུ་ནོར་ཞིང་འབྲོག་བྲན་གཡོག་རྣམས་ལ་གཞན་གྱིས་བཙན་འཕྲོག་བྱེད་མི་ཆོག་པ་བཅས་གསལ་བཤད་བྱས་ཡོད་དོ།།

དབུ་རུ་ཞྭ་ལྷ་ཁང་གི་རྡོ་རིང་སྔ་ཕྱི་གཉིས་ཀྱི་ཡི་གེ་དངོས།

                རྡོ་རིང་གི་ཡི་གེ་དང་པོ་ནི།

༡ ༄། །གནམ་ལྷབ་ཀྱྀ་རྒྱལ་པོ། འཕྲུལ་གྱི་ལྷ་བཙན་པོ་ཁྲྀ།

༢ ལྡེ་སྲོང་བརྩན་གྱི། བཀས། ། བན་དེ་མྱང་

༣ ཏིང་ངེ་འཛྀན། དབུ་སྙུང་གཙིགས་གཡུང་དྲུང་དུ་གནང་བ།

༤ བན་དེ་ཏིང་ངེ་འཛྀན་ལྟ་ཞིག །གདོད་ནས་མཐར་སྙྀང་ཉེ་སྟེ། ང༌།

༥ སྐུ་ཆུངུ་སན། ཆབ་སྲྀད་མ་བཞེས་པའི་བར་དུ་ཡབ་ཡུཾ་གྱྀ་གོ་བྱསྟེ།

༦ ལེགས་པ་ལ་ཞེན་པར་བྱས། ཞང་དྲུང་པོའི་གོ་བྱས་ཏེ་སྐུ་བཙས།

༧ ཡབ་སྲས་གཅེན་གཅུང་ཡུཾ་སྲས། བླ་འོག་དགྱེས་ངཤྀ་འཐུན་པར།

༨ སྦྱརད། སྤྱྀར་ལེགས་པའྀ་བྐ་གྲོས་གསོལ་ཅིང༌། ལས་སུ་བྱས་པ།

༩ ལས་སྩོགས་ཏེ། དཔེན་པ་བྱེད་བྱེད། སྙྀང་ཉེ་ཉེའོ། །ཕྱིས་ཡབ་དང་

༡༠ གཅེན་ཐུགས་ནོངས་བརྟུད་པར་བྱུང་བའི་རྗེས། ང་ཆབ་སྲྀད་

༡༡ མ་བཞེས་པའྀ་སྐབསུ་ཁ་ཅིག་ཕན་དྔ། གདོན་སྩོན་པ་དག

༡༢ ཡོད་པ་ཡང༌། བན་དེ་ཏིང་ངེ་འཛྀན་གྱིས་ཉཾ་དྲོད་ཟིན་ནས། དཔེནད་

༡༣ པའྀ་བྐ་གྲོས་གསོལད། ཁྲག་ཁྲུག་མྱེད་པར་བྱས། ལེསག་པ་བྱ་འོ་ཆོག

༡༤ གི་གཞི་བཟུང་ནས། ངའྀ་ཆབ་སྲིད་ལས་སྩོག་སྟེ། སྤྱིར་ལེསག་པའྀ་

༡༥ ལས་ཆེན་པོ་བྱས་ཏེ། ངའི་ཞ་སྔར། ཆབ་སྲྀད་འདོན་འདོན། སྙིང༌།

༡༦ ཉེ་ཉེ། བླ་འོག་ཀུན་གྱི་གཟུངས་བྱས་ཏེ། ཕྱོགས་སུ་འཁྲུག་པ་མྱེད་ངཅི།

༡༧ བདེ་བར་བྱེད་བྱེད་དོ། ཆབ་སྲྀད་ཀྱྀ་བློན་པོ་ཆེན་པཽ་ལས་བྱས་ཀྱིས་

༡༨ ཀྱང༌། འཕྲལ་ཡུན་གཉིས་སུ་སྤྱིར་ལེགས་ཤྀང་དཔེན་པ་འབའ་ཞིག་

༡༩ བྱེད་བྱེད་དོ། འདྀ་ལྟར་སྔ་ཕྱྀ་གཉིས་སུ་གང་བས་ཀྱང་ལྷག་པར་སྙྀང་

༢༠ ཉེ་ངཞི། ཞོ་ཤ་ཆེན་པོ་འབུལ་འབུལ་བ། །སྔོན་གྱི་ཟླ་དེབ་དྔ་སྦྱར་ཞྀང༌། བཀཱ་

༢༡ དྲིན་འོས་རབ་སྦྱིན་རབ་དགོངས་པ་ལས། ། བན་དེ་ཉིད་རྗེ་འབངས་ཀྱི་

༢༢ ལུགས་དྔ། དགེ་སློང་གི་ཚུལ་འཛྀན་ཅིང༌། བྐ་དྲྀན་མྱྀ་ནོད་པར་གསོལ་གྱིས་

༢༣ ཀྱང༌། ཞོ་ཤའི་ལན། བྐ་དྲྀན་སྦྱིན་པའི་ཆོས་ཡིན་པས། ངའྀ་བཀས།

༢༤ བན་དེ་ཏིང་ངེ་འཛྀན། གཙིགས་བརྩན་བ་བྱིན་ཏེ། ། སྲིད་གཡུང་དྲུང་

༢༥ དུ་གནང་བ། ཡུན་དུ་བརྟན་ངཞྀ་བདེ་བར་བྱ་བ་དྔ། ཀུན་གྱིས་ཤེས་པར་བྱ༌།

༢༦ བའྀ་ཕྱིར། ། དཀོན་མཆོག་གྀ་རྟེན། གཙུག་ལག་ཁང་འདྀར། གཙིགས་

༢༧ ཀྱི་མཁར་བུ་བརྩྀགས། རྡོ་རིངས་བཙུགས་ནས། བཙྀགས་ཀྱི་མདོ།

༢༨ རྡོ་ལ་མངོན་པར་བྲྀས་ཏེ་མཐཱ་ཕྱག་རྒྱས་བཏབ་ནས་བཞག་པནཡྀ་གྱིས་

༢༩ སྲས་དབོན་ཕྱི་མ་མངཱ་མཛད་པ་རྣཾས་དྔ། ཆབ་སྲྀད་ཀྱི་བློན་པོ་ཕྱི་མ། དབྔ་

༣༠ བྱེད་པ་ལས་སྩོགས་པས་ཀྱང༌། ནཾ་ནཾ་ཞ་ཞར་གཙྀགས་ཀྱི་ཡི་གེ་ལས་འབྱུང་

༣༡ བ་དྔ། རྡོ་རིངས་ལ་བྲིས་པ་ལས་མྱྀ་དབྲྀ་མྱི་བཅོས་མྱི་བསྒྱུར་བར་གྱྀས་གཤྀ།།

༣༢ ནཾ་ནཾ་ཞ་ཞར། བཙན་པོ་གདུང་རབས་རྒྱུད་ཀྱྀས། བན་དེ་ཏྀང་ངེ་འཛྀནད་གྱི་

༣༣ མྱེས་པོ་བློན་སྣང་བཟང་འདུས་ཀོང་གྀ་བུ་ཚ་འཕེལ་རྒྱུད། །སྤུན་རས་ཀྱིས་

༣༤ བཙའ་ངཞྀ་འོས་པ་ཞམ་འབྲིང་དུ་བཞག་པ་དྔ། ཇྀ་ཙམ་དུ་ནུས་པར་བཀུར་

༣༥ བསྟོད་པ་དྔ། གཞན་གྱྀས་མནར་ཏཾ། སྟཾས་ལས་ཆད་ན། བྐ་ནོན་བླ་ནས་མཛྡ་

༣༦ པ་དྔ། ཉེས་སྔ་དག་པ་མ་ཡྀན་ན། འཕྲ་མ་མྱི་བསྩན། སྟཾས་ལས་མྱྀ་གཅད་

༣༧ པ་དྔ། སྣང་བཟང་འདུས་ངཀོ་གི་བུ་ཚ་འཕེལ་རྒྱུད། ལ་ལ་ཞྀག་གིས་སྐུ་དང་ཆབ་

༣༨ སྲིད་ལ་སྙྀང་རིངས་སཾ། ཉེས་པ་གཞན་ཞིག་བྱས་ན་ངཡ། གང་གིས་ཉེས་པ་ལ་རྨ་

༣༩ ཕུ་ནུ་བུ་ཚ་མ་ཉེས་གནཞ་ལ་ཁྲིན་མྱྀ་རྨ། གྱོད་ལ་མྱྀ་གདགས། བྐ་ནརད་མྱྀ་

༤༠ མཛད། ཅི་ཉེས་ཀྱང་གྱོད་ན་གཅྀག་གིས། བསྒྱུར་པ་དྔ། ཡྀ་གེ་གཡུང་དྲུང་

༤༡ མྱིང་མྱི་རླག་པར་བྱྀན་པ་དྔ། ལས་སྣ་ཆེན་པོ་བདེ་བ་ཡུན་དུ་ཆང་གྱུར་བྱིན་པ་

༤༢ དྔ། སྡེའི་དཔོན་པོ་རྒྱུད་དུ་གནང་པ་དྔ། སྣང་བཟང་འདུས་ངཀོ་གི་བུ་ཚ་འཕེལ་

༤༣ རྒྱུད་ཀྱྀ་བྲན་ངཞི། འབྲོག་སོག་ཚལ་ལས་སྩོགས་པ། ནཾ་ཞར་རབས་ཆད་དཾ། བྐ་

༤༤ གྱོད་ལ་ཐོགས་ན་ཡང༌། ཕྱག་ཏུ་མྱྀ་བཞེས། གཞན་མྱྀ་སྦྱིན། མས་མ་ཕུལ་ཕན་

༤༥ ཅད། ཅིའི་ཐབས་ཀྱྀས་ཀྱང་མྱྀ་དཔྲོག་མྱི་བཞེས་པར་གནང་བ་ལས་སྩོག་སྟེ་

༤༦ ནཾ་ནཾ་ཞ་ཞར། བློན་སྣང་བཟང་འདུས་ངཀོ་གི་བུ་ཚ་འཕེལ་རྒྱུད། སྲྀད་བདེ་ངཞྀ་བརྟན་

༤༧ བའྀ་གཙིག་གནང་བ་འདྀ། ནཾ་ནཾ་ཞ་ཞར་གནང་ངཞྀ་མྱི་བསྒྱུར་མྱྀ་བཅོས་རབ།

༤༨ ངའི་ཞ་སྔ་ནས་ཀྱང་དབུ་སྙུང་གནང༌། །གཅེན་མུ་རུག་བཙན་དྔ། ཇོ་མོ་མཆེད་དྔ་

༤༩ རྒྱལ་ཕྲན་རྣམས་དང༌། ཆབ་སྲིད་ཀྱི་བློན་པོ་མན་ཅད། ཞང་ལོན་ཆེ་ཕྲ་ཀུན་ཀྱང་

༥༠ མནས་བསྒགསྟེ། གཙྀགས་ཀྱི་གཡུང་དྲུང་དུ་གནང་ངོ༌། བན་དེ་ཏིང་ངེ་འཛིན་

༥༡ སྙིང་ཉེ་ཞིང༌། ཞོ་ཤ་ཇི་ལྟར་ཕུལ་པ་དྔ། དཔེན་པ་ཅི་བྱས་པ་དང༌། གཙྀགས་ཅི་གནང་བ་

༥༢ ཞིབ་མོ་ནི། གཙྀགས་ཀྱི་ཡི་གེ་ལ་བྲིས་ཏེ། ཕྱག་སྦལ་དུ་བཞག། དཔེ་གཅྀག་

༥༣ ཕྱག་རྒྱས་བཏབ་སྟེ། གཙྀགས་ཀྱི་མཁར་བུ་འདིར་བཞག །དཔེ་གཅིག་ནི་

༥༤ ཕྱག་རྒྱས་བཏབ་སྟེ། འོག་དཔེར་འཆང་དུ་བཅུག་གོ །༄། །བན་དེ་ཏིང་ངེ་

༥༥ འཛིནད་ཀྱི་མྱེས་ཁུ་བོ། དབྱྀ་གོང་གི་རྒྱུད་ཀྱང༌། དབུ་སྙུང་གཙྀགས་གནང་ངོ༌། །

༥༦ སྔོན་མྱང་དབཱས་སྙྀང་ཉེ་ངཞི་ཞོ་ཤ་ཕུལ་བར་འདྲ་པ་ལས། དབཱས་ཀྱྀ་ཟླ་དང་སྦྱར་ན།

༥༧ མྱང་བཀཱ་དྲྀན་ཆུངས་པ་འདྲ་ནས། ངའྀ། བཀས། མྱང་གྀ་གཙྀཊ་ཀྱང་ཟུར་

༥༨ ཕྱུང་བརྣན་བསྐྱེད་དེ་གནང་ངོ༌། །༄། །གཙྀགས་ཀྱི་མཁར་བུ་འདི༌། ནམ་ཞིག་

༥༩ དབྱེ་དགོས་ན་ཡང༌། །སྲས་དབོན་ཆབ་སྲྀད་ཀྱི་མངཱ་གང་མཛད་པས་རིང་ལུསག་

༦༠ ཐུགས་ཆེས་པ་གཙྀགས་བདག་འདྲང་བ་གསུཾ་ཡན་ཅད་

༦༡ བསྐོ་སྟེ། ལག་སྦྲེལ་ལ་དབྱུང་ངཞྀ། ཕྱིར་ངཡ་འདྀ་བཞིན་ཕྱག་རྒྱ་

༦༢ དྔ། རིང་ལུགས་ཀྱྀ་རྒྱས་བཏབ་སྟེ། བཞག་པར་གནང་ངོ༌། །

 

    རྡོ་རིང་གི་ཡི་གེ་གཉིས་པ་ནི།

༡ ༄། །མྱྀའི་རྒྱལ་པོ་ལྷས་མཛད་པ། །འཕྲུལ་གྱྀ་ལྷ་

༢ བཙན་པོ་ཁྲྀ། ལྡེ་སྲོང་བཙན་གྱི། བཀས། །

༣ བན་དེ་ཏྀང་ངེ་འཛིན། དབུ་སྙུང་གཙྀགས་སླད་ཀྱིས་

༤ གནང་བ། །བན་དེ་ཏིང་ངེ་འཛྀན། ངའི་ཆབ་སྲིད་འདོན་

༥ ཅིང༌། ཞོ་ཤ་ཆེན་པོ་འབུལ་འབུལ་བ། གཙྀགས་སྔ་མ་

༦ གནང་བའྀ་ཚེའང་ཟླ་དཔེ་དང༌། ཞོ་ཤའྀ་རྐྱེན་བཞྀན་

༧ བཀའ་དྲྀན་འོས་པ་ཙམ་དུ་གནང་བ་ལས། བན་དེ་ཉིད་

༨ ཀྱིས། བཀའ་དྲྀན་མྱྀ་ནོད་པར་གསོལ་ནས། གཙྀགས་

༩ རན་པར་དཔགས་པ་ལས་ཀྱང་ཕྲྀ་ཞིང་སྨད་པ་ཞོ་

༡༠ ཤའྀ་རྐྱེན་དུ་མ་བབ་སྟེ། བཀ་དྲིན་ཆུངས་ཤྀང་ཕམ་པར་

༡༡ གྱུརད། །བན་དེ་ཏིང་ངེ་འཛྀན་གྱིས། ངའི་ཞ་སྔར་ཆབ་སྲིད་

༡༢ གསོལ་ནས། ངའྀ་སྐུ་རིང་ལ། སྐུ་དང་ཆབ་སྲྀད་ལ་འཕྲལ་

༡༣ ཡུན་གཉིས་སུ་ལེགས་པའྀ་བཀའ་གྲོས་གསོལད་ཅྀང་

༡༤ སྤྱྀར་དཔེན་པའྀ་ལས་ཆེན་པོ་བྱས་པ་དང༌། བླ་འོག་ཕྱོགས་

༡༥ སུ་བདེ་བ་དང༌། ཕན་པའྀ་མདོ་ཆེན་པོ་བྱེད་བྱེད། སྙིང་

༡༦ ཉེ་ཉེ་སྟེ། ཞོ་ཤ་ཆེར་ཕུལ་བ། བཀའ་དྲིན་གཙྀགས་

༡༧ བསྐྱེད་པར། ངའི་ཐུགས་ལ་དགོངས་ན། བན་དེ་ནི་གཙྀགས་

༡༨ སྔར་གནང་བས་འཆལ་ཏེ་མྱི་བསྐྱེད་པར་གསོལ་གྱིས་

༡༩ ཀྱང་ཞོ་ཤ་ཆེན་པོའི་ལན། བཀའ་དྲྀན་མྱྀ་འཕམ་པར་སྤྱིན་པའྀ་

༢༠ རིགས་པར། རྗེ་བློན་མོལ་ནས། གཙྀགས་སྔར་གནང་བ་

༢༡ ཡང་དེ་བཞིན་གནང་བའི་སྟེང་དུ། བན་དེ་ཏིང་ངེ་འཛྀན་སྙིང་

༢༢ ཉེ་ཞིང་ཞོ་ཤ་ཆེན་པོ་ཕུལ་བའྀ་ཕྱིན། བཀའ་དྲིན་འབྲུག་གི་ལོ་

༢༣ ཕྱི་མ་ལ། ཕོ་བྲང་འོན་ཅང་དོ་ན་བཞུགས་པའྀ་ཚེ། གཙིགས་

༢༤ གསར་དུ་བསྐྱེད་དེ། ངའྀ་བཀས་གནང་བ། ཡྀ་གེ་གཡུང་དྲུང་

༢༥ སྔར་གནང་བ་བས་བསྟོད་དེ་ཆེར་གནང༌། བློན་སྣང་བཟང་

༢༦ འདུས་ཀོང་གི་བུ་ཚ་འཕེལ་རྒྱུད་དམངས་ཀྱི་རྣམས་ཀྱང་གཙང་

༢༧ དང་སྟོད་ལས་སྩོགས་པ་སྒོར་བདེ་བའྀ་རྣཾས། ཞང་ལོན་ཡྀ་གེ་

༢༨ ཅན་གྱི་ཐང་དུ་གནང་བ་དང༌། མ་ཉེས་པར་སྲོག་སྲིད་ལ་དཀུ་

༢༩ དང་གནོད་པ་བྱེད་པ་ཞིག་ཡོད་ན་སུ་ལ་བབ་ཀྱང་རུང་དཀུའ་

༣༠ བ་དང༌། ཕེའུ་པའྀ་ངོ་ཁར་མྱྀ་དོར་བ། དཀུ་བ་དུ་གཏོགས་པ།

༣༡ བཀ་གྱོད་ལ་གདགས་པར་གནང་བ་དང༌། ལྷ་རིས་སུ་བསྔོས་པ་

༣༢ ལས་ཅིར་གྱུར་ཀྱང༌། བླ་འོག་གཞན་གྱྀས་དབང་མྱྀ་བྱ་བར་གནང་

༣༣ བ་ལས་སྩོགས་ཏེ། གཙིགས་སྔ་མའྀ་སྟེང་དུ། གཙིགས་ཕྱྀ་མ་

༣༤ བསྣན་བསྐྱེད་དེ་གནང་བ་རྣམས་ཀྱང༌། དེ་བཞྀན་དུ། ནམ་ཞར་

༣༥ བརྩན་པར་གནང་སྟེ། ངའྀ་ཞ་སྔ་ནས་ཀྱང་དབུ་སྙུང་གནང༌། ཇོ་མོ་

༣༦ མཆེད་དང༌། རྒྱལ་ཕྲན་དང༌། ཆབ་སྲྀད་ཀྱྀ་བློན་པོ་རྣམས་དང༌། ཞང་

༣༧ ལོན་ཕྲ་མ་ཐམས་ཅད་ཀྱང་བརྣན་ཏེ། མནས་བསྒགས་ནས།

༣༨ གཙིགས་བསྣན་བསྐྱེད་དེ་གནང་བ་ཡང་ཡུན་དུ་བརྟན་ཞྀང་མངོན་

༣༩ པར་བྱ་བའྀ་ཕྱྀར། མདོའ་རྡོ་རིངས་ལ་བྲྀས་ཏེ་མཐའ་ཕྱག་རྒྱས་

༤༠ བཏབ་ནས། གཙུག་ལག་ཁང་དང༌། གཙྀགས་ཀྱྀ་མཁར་བུའྀ་

༤༡ དྲུང་དུ་བཞག་པ་ཡིན་གྱིས། རྗེ་བློན་ཕྱི་རབས་མངཱ་མཛད་པ་

༤༢ རྣཾས་ཀྱྀས་ཀྱང༌། ནཾ་ནཾ་ཞ་ཞར་གཙྀགས་རྣཾས་གཉིས་ཀྱྀ་ཡི་གེ་ལས་

༤༣ འབྱུང་བ་དང༌། རྡོ་རིངས་རྣ་གཉྀས་ལ་བྲྀས་པ་ལས་མྱྀ་དབྲྀ་མྱྀ་

༤༤ བཅོས་མྱི་བསྒྱུར་པར་གྱྀས་ཤིག ། གཙྀགས་སྔ་མའྀ་སྟེང་

༤༥ དུ་ཕྱྀས་གཙྀགས་བསྣན་བསྐྱེད་དེ། གནང་བ་ཡང༌། ཞིབ་ཏུ་ནྀ་

༤༦ གཙྀགས་ཀྱྀ་ཡི་གེ་ལ་བྲྀས་ཏེ། ཕྱག་སྦལ་དུ་

༤༧ བཞག ། དཔེ་གཅིག་གཙྀགས་སྔ་མ་དང་ཕྱོགས་

༤༨ སུ་གཙྀགས་ཀྱི་མཁར་བུ་འདིར་བཞག ། དཔེ་

༤༩ གཅིག་འོག་དཔེར་འཆང་དུ་བཅུག་གོ །

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:
བསམ་ཚུལ། (1)
1 ༢༣༢༠༡༣༢༣༢༡
༄། བོད་ནང་གི་རྡོ་རིང་སྐོར་མང་ཙམ་གསུང་ན།



བརྗོད་གཞི་གཞན་ཁག་ལ་གཟིགས།