གསུམ་བཅུའི་དུས་དྲན་ཐེངས་སོ་དགུ་པར་བསྩལ་བའི་གསུང་འཕྲིན།།

ཤམ་བྷ་ལའི་ཕོ་ཉ་དྲ་བས་ཟླ་༠༢ཚེས་༡༨ཉིན་སྤེལ། དུས་རབས་ཉེར་གཅིག་པ་འཆར་ལ་ཉེ་བའི་སྐབས་འདིར་འཛམ་གླིང་གི་ས་ཕྱོགས་གང་སར་འགྱུར་བ་ཆེན་པོ་ཞིག་འགྲོ་བཞིན་ཡོད། དེང་སྐབས་སྤྱིར་བཏང་གི་རྩོད་རྙོག་གསར་པ་ཡོང་གི་ཡོད་ན་ཡང༌། རྩོད་རྙོག་གི་གནད་དོན་མང་པོ་ཞིག་ཞི་མོལ་དང་མཛའ་མཐུན་གྱི་འབྲེལ་བའི་ཐོག་ནས་སེལ་རྒྱུའི་བསམ་བློ་གཏོང་གི་ཡོད། ངོས་ཀྱི་མཐོང་ཚུལ་ལྟར་ན། རྫོགས་ལ་ཉེ་བའི་དུས་རབས་ཉི་ཤུ་པ་འདིའི་ནང་འགྲོ་བ་མིའི་སྤྱི་ཚོགས་ཀྱིས་ཉམས་མྱོང་དུ་མ་བསགས་པ་ལ་བརྟེན་ནས་སློབ་གསོ་ཐོབ་ཡོད། ཕྱོགས་གཅིག་ནས་དུས་རབས་འདི་དམག་འཁྲུག་དང་མི་གསོད་ཁྲག་སྦྱོར་གྱི་དུས་རབས་ཤིག་ཏུ་བརྗོད་ཆོག་པ་ཡིན། འོན་ཀྱང་ཉམས་མྱོང་གི་སློབ་གསོའི་ནང་སྤྱི་ཚོགས་འཚར་ལོངས་བྱུང་ཡོད་པས་ལྷག་བསམ་དང་སེམས་ཤུགས་ལ་བརྟེན་ནས་འབད་བརྩོན་བྱས་ན་དུས་རབས་རྗེས་མ་དེ་དཀའ་རྙོག་རྣམས་ཞི་མོལ་དང༌། འཚེ་བ་མེད་པའི་ཐབས་ལམ་ནས་སེལ་ཐུབ་པའི་དུས་རབས་ཤིག་བཟོ་ཐུབ་པའི་རེ་བ་ཡོད།

༄༅། །སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་ཕྱི་ལོ་༡༩༩༨གསུམ་བཅུའི་དུས་དྲན་ཐེངས་སོ་དགུ་པའི་ཐོག་ཡོངས་ཁྱབ་ཏུ་བསྩལ་བའི་གསུང་འཕྲིན།།

ཤམ་བྷ་ལའི་ཕོ་ཉ་དྲ་བས་ཟླ་༠༢ཚེས་༡༨ཉིན་སྤེལ། དུས་རབས་ཉེར་གཅིག་པ་འཆར་ལ་ཉེ་བའི་སྐབས་འདིར་འཛམ་གླིང་གི་ས་ཕྱོགས་གང་སར་འགྱུར་བ་ཆེན་པོ་ཞིག་འགྲོ་བཞིན་ཡོད། དེང་སྐབས་སྤྱིར་བཏང་གི་རྩོད་རྙོག་གསར་པ་ཡོང་གི་ཡོད་ན་ཡང༌། རྩོད་རྙོག་གི་གནད་དོན་མང་པོ་ཞིག་ཞི་མོལ་དང་མཛའ་མཐུན་གྱི་འབྲེལ་བའི་ཐོག་ནས་སེལ་རྒྱུའི་བསམ་བློ་གཏོང་གི་ཡོད། ངོས་ཀྱི་མཐོང་ཚུལ་ལྟར་ན། རྫོགས་ལ་ཉེ་བའི་དུས་རབས་ཉི་ཤུ་པ་འདིའི་ནང་འགྲོ་བ་མིའི་སྤྱི་ཚོགས་ཀྱིས་ཉམས་མྱོང་དུ་མ་བསགས་པ་ལ་བརྟེན་ནས་སློབ་གསོ་ཐོབ་ཡོད། ཕྱོགས་གཅིག་ནས་དུས་རབས་འདི་དམག་འཁྲུག་དང་མི་གསོད་ཁྲག་སྦྱོར་གྱི་དུས་རབས་ཤིག་ཏུ་བརྗོད་ཆོག་པ་ཡིན། འོན་ཀྱང་ཉམས་མྱོང་གི་སློབ་གསོའི་ནང་སྤྱི་ཚོགས་འཚར་ལོངས་བྱུང་ཡོད་པས་ལྷག་བསམ་དང་སེམས་ཤུགས་ལ་བརྟེན་ནས་འབད་བརྩོན་བྱས་ན་དུས་རབས་རྗེས་མ་དེ་དཀའ་རྙོག་རྣམས་ཞི་མོལ་དང༌། འཚེ་བ་མེད་པའི་ཐབས་ལམ་ནས་སེལ་ཐུབ་པའི་དུས་རབས་ཤིག་བཟོ་ཐུབ་པའི་རེ་བ་ཡོད།

དེ་རིང་གསུམ་བཅུའི་དུས་དྲན་ཐེངས་༣༩པ་འདིའི་ཐོག་ད་ཕན་དཀའ་ངལ་ཚད་མེད་འཕྲད་པར་ཁོག་ཡངས་བཟོད་བསྲན་ཆེན་པོས་ལྷག་བསམ་སྙིང་སྟོབས་བརྟན་པོར་གནས་པའི་བོད་མི་མང་ལ་བསྔགས་བརྗོད་དང༌། འཚམས་འདྲི་ཡོད། དེང་དུས་བོད་ཀྱི་གནས་སྟངས་དང༌། བོད་དོན་སྐོར་གྲུབ་འབྲས་ལྡན་པའི་གོམ་བགྲོད་མ་ཐུབ་པར་བརྟེན་བོད་མི་མང་པོ་འདོད་བློ་མ་ཁེངས་པའི་བསམ་ཚུལ་ཤུགས་ཆེར་འགྲོ་བཞིན་པའི་ཐོག་འགའ་ཞིག་འཚེ་མེད་ཞི་བའི་ལམ་ལ་རེ་ཐག་ཆད་ནས་ཐབས་ལམ་གཞན་དག་འཚོལ་རྒྱུའི་ཉེན་ཁ་མཐོང་བས་དེར་བློ་གཡེང་ཡོད། ཁྱེད་ཚོའི་བསམ་ཚུལ་ངོས་ནས་ཤེས་རྟོགས་གསལ་པོ་ཡོད་ཀྱང༌། ང་ཚོའི་འཐབ་རྩོད་ཀྱི་ལམ་ཕྱོགས་འཚེ་མེད་ཞི་ལམ་ཁོ་ནར་བརྟེན་རྒྱུ་དོན་གལ་ཆེན་པོ་ཡིན་པ་ཡང་བསྐྱར་ནན་བརྗོད་བྱ་རྒྱུ་ཡིན། ང་ཚོས་ད་ཕན་འཚེ་མེད་ཞི་བའི་ལམ་བརྒྱུད་འབད་བརྩོན་བྱས་པ་འདིར་རྒྱལ་སྤྱིའི་ཐོག་ནས་བསྔགས་བརྗོད་དང༌། རྒྱབ་སྐྱོར་ཆེན་པོ་ཐོབ་ཡོད་ཅིང༌། འཚེ་མེད་ཞི་བའི་ཐབས་ལམ་འདི་དོན་ཕན་ཆེ་ཤོས་དང༌། འགྲུབ་ཐག་ཉེ་ཤོས་ཡིན་པར་ངོས་འཛིན་བྱེད་ཀྱི་ཡོད། ང་ཚོས་དེ་ལྟར་མུ་མཐུད་ལག་ལེན་བསྟར་ཐུབ་པ་ཡིན་ན། འཛམ་གླིང་འདིར་འཚེ་བ་མེད་པའི་ཞི་བདེའི་ཆབ་སྲིད་ཀྱི་ལྟ་སྤྱོད་གོང་འཕེལ་ཡོང་རྒྱུར་ང་ཚོས་དཔེ་སྟོན་ཞལ་འདེབས་འབུལ་ཐུབ་ངེས་ཡིན།

འཛམ་གླིང་ཁྱོན་ཡོངས་ལ་འགྱུར་བ་ཆེན་པོ་འགྲོ་བ་འདིས་རྒྱ་ནག་ལའང་ཤུགས་རྐྱེན་ཐེབས་ཡོད་པ་དང༌། ཏེང་ཞའོ་ཕིང་གིས་བསྒྱུར་བཅོས་ཀྱི་ལམ་ལུགས་གསར་གཏོད་བྱས་པ་དེས་རྒྱ་ནག་གི་དཔལ་འབྱོར་ཙམ་མ་ཡིན་པར་ཆབ་སྲིད་ཀྱི་ཐོག་ལ་ཡང་འགྱུར་བ་ཕྱིན་ཡོད། ད་ལྟའི་རྒྱ་ནག་གི་ཆབ་སྲིད་སྐྱོང་སྟངས་དེ་སྔོན་དང་བསྡུར་ན། ལྟ་བའི་ཆ་ནས་གུ་ཡངས་སུ་ཕྱིན་པ་དང༌། སྤྱོད་པའི་ཆ་ནས་ཀྱང་མང་ཚོགས་ལ་དེ་ཙམ་བཙནཤེད་སྐུལ་འདེད་མི་བྱེད་པ། སྤྱི་དམངས་ལ་དམ་དྲག་ཆུང་དུ་ཕྱིན་པ། དབུས་གཞུང་ནས་མངའ་སྡེ་ཁག་ལ་དཔལ་འབྱོར་འདུ་འགོད་ལ་སོགས་པའི་ཁེ་དབང་གང་འཚམས་སྤྲད་པ་སོགས་དེང་སང་རྒྱ་ནག་གི་འགོ་ཁྲིད་ཚོའི་རྒྱལ་འབྲེལ་སྲིད་བྱུས་ཕྲན་བུ་གུ་ཡངས་སུ་ཕྱིན་ཡོད་པ་ནི་རྒྱ་ནག་རྒྱལ་སྤྱིའི་བཤད་སྟེགས་ཁག་ལ་ཞུགས་རྒྱུ་མང་དུ་སོང་བ་དང༌། རྒྱལ་སྤྱིའི་ཚོགས་མི་ཁག་དང་མཉམ་སྦྲེལ་གྱི་ལས་ཀ་བྱེད་ཤུགས་ཆེ་རུ་སོང་བ་དེ་ནས་གསལ་པོ་མཚོན་གྱི་ཡོད།

དེ་བཞིན་བསྔགས་བརྗོད་འོས་པའི་འགྱུར་བ་གཞན་ཞིག་ནི། སྔ་ལོ་ཧོང་ཀོང་དེ་དཀའ་རྙོག་གང་ཡང་མེད་པར་རྒྱ་ནག་གི་མངའ་ཁོངས་སུ་ཕྱིར་ལོག་རྩིས་ལེན་བྱས་པ་དང༌། དེ་རྗེས་ཀྱང་ཧོང་ཀོང་གི་གནད་དོན་ཐོག་གུ་ཡངས་ཀྱི་སྲིད་བྱུས་ཤིག་ལག་བསྟར་བྱས་ཡོད། ཉེ་དུས་པེ་ཅིང་ནས་གསལ་བསྒྲགས་བྱས་དོན་ལྟར་ན། ཐེ་ཝན་དང་ཞི་མོལ་འགོ་འཛུགས་བསྐྱར་དུ་བྱེད་རྩིས་ཡོད་པ་དེས་ཀྱང་སྲིད་བྱུས་ལྷུག་ཏུ་ཕྱིན་པ་གསལ་པོར་མངོན། དེང་སྐབས་ཀྱི་རྒྱ་ནག་དེ་ལོ་བཅོ་ལྔ་ཉི་ཤུའི་གོང་གི་གནས་སྟངས་ལས་ཡར་རྒྱས་ཕྱིན་ཡོད་པ་ནི་བསྔགས་བརྗོད་བྱེད་འོས་པ་དང༌། ལོ་རྒྱུས་ཐོག་འཁོད་འོས་པའི་འགྱུར་བ་ཞིག་ཡིན། འོན་ཀྱང་ད་དུང་རྒྱ་ནག་ནང་ཚབས་ཆེའི་འགྲོ་བ་མིའི་ཐོབ་ཐང་སྐོར་དང༌། དེ་མིན་དཀའ་ངལ་གཞན་དག་མང་པོ་ཡོད་མུས་ལ་བརྟེན་རྒྱ་ནག་གི་དབུ་ཁྲིད་གསར་པ་ཚོས་བློ་སྤོབས་དང༌། མཐོང་རྒྱ། སྙིང་སྟོབས་ཆེར་བསྐྱེད་བཅས་ཀྱི་ཐོག་ནས་ད་དུང་རྒྱ་ནག་མི་མང་ལ་རང་དབང་ཆེ་ཙམ་སྤྲོད་པའི་རེ་བ་ཡོད། འགྲོ་བ་མིའི་ལོ་རྒྱུས་ཐོག་བལྟས་ཚེ་ཕྱི་རོལ་དངོས་པོའི་ཆ་རྐྱེན་ཡར་རྒྱས་ཇི་ལྟར་སོང་ན་ཡང་མིའི་འདོད་པ་ཡོངས་སུ་ཁེངས་མི་ཐུབ་པ་དེ་ཧ་ཅང་གསལ་པོ་མཐོང་ཐུབ།

བློ་ཕམ་བྱེད་དགོས་པའི་གནས་ཚུལ་ཞིག་ལ། རྒྱ་ནག་ནང་བཟང་ཕྱོགས་ཀྱི་འགྱུར་བ་དེ་ལྟར་འགྲོ་གི་ཡོད་ན་ཡང༌། དེ་ལས་ཡོངས་སུ་ལྡོག་སྟེ་བོད་ནང་གི་གནས་སྟངས་ནི་ལོ་ཤས་ནང་ཇེ་ཞན་ཇེ་སྡུག་ཏུ་འགྲོ་བཞིན་ཡོད། ཉེ་བའི་དུས་སུ་བོད་ནང་ལག་ལེན་བསྟར་བའི་སྲིད་བྱུས་དེ་དག་ནི། བོད་མི་རིགས་ཀྱི་རིག་གཞུང་ཆེད་མངགས་རྩ་མེད་བཟོ་བའི་སྲིད་བྱུས་ལྟ་བུ་ཞིག་ཏུ་གྱུར་ཡོད། བོད་མི་ཚོའི་ཆོས་དད་དང༌། རྒྱལ་ཞེན་གྱི་བསམ་བློ་གནོན་ཆེད་རྡུང་རྡེག་ཚ་ནན་གཏོང་བ་ཟེར་བའི་ངོ་ཚ་བྲལ་བའི་སྲིད་བྱུས་ལོ་རེ་བཞིན་ཤུགས་ཇེ་ཆེར་བཏང་བ་དང༌། དྲག་གནོན་གྱི་ལས་འགུལ་དེ་དགཐོག་མར་དགོན་སྡེ་ཁག་གི་ནང་དང༌། ད་ཆ་མང་ཚོགས་ཀྱི་ཐོག་ལ་ལག་བསྟར་བྱེད་བཞིན་ཡོད། དེར་བརྟེན་དེང་སྐབས་བོད་ནང་འཇིགས་སྐུལ་དང༌། བཙན་ཤེད། དངངས་སྐྲག་བཅས་ཀྱི་གནས་སྟངས་འགའ་ཤས་ནི་དེ་སྔའི་རིག་གནས་གསར་བརྗེའི་དུས་སྐབས་བསྐྱར་ལོག་བྱས་པ་ལྟ་བུའི་གནས་སུ་གྱར་ཡོད།

བོད་ནང་འགྲོ་བ་མིའི་ཐོབ་ཐང་བརྡལ་བཤིག་ཁྱབ་བརྡལ་བཏང་བ་འདི་ནི་གཞན་དང་མི་འདྲ་བའི་དམིགས་བསལ་གྱི་གནས་ཚུལ་ཞིག་ཡིན་པ་སྟེ། བོད་

མི་ཚོའི་སོ་སོའི་མི་རིགས་དང༌། རང་གཞན་ཀུན་ལ་ཕན་པའི་རང་བཞིན་ལྡན་པའི་རིག་གཞུང་གཅེས་ཉར་བྱེད་པའི་བྱ་སྤྱོད་འགོག་ཐབས་སུ་དམིགས་ཏེ་གནོན་རྡུང་བྱེད་ཀྱི་ཡོད་པ་རེད། དེ་ནི་དབང་འཛིན་པ་ཚོས་མི་རིགས་དང༌། རིག་གཞུང་དབྱེ་འབྱེད་ཀྱི་ལམ་ལུགས་ལག་ལེན་བསྟར་བའི་ངན་འབྲས་དང་འབྲེལ་བ་གཏིང་ཟབ་ཡོད་པའི་གནད་དོན་ཞིག་ཡིན། དེར་བརྟེན་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་གཏོང་བ་ལ། ཕྱིའི་དཔལ་འབྱོར་ཡར་རྒྱས་ཕྲན་བུ་ཡོད་པས་མི་ཕན་པར་བོད་ཀྱི་གཞི་རྩའི་དཀའ་ངལ་རྣམས་སེལ་ཐབས་བྱེད་དགོས། བོད་ནང་བློ་ཕམ་གྱི་གནས་ཚུལ་དེ་དག་གིས་བོད་མི་རྣམས་ལ་ཕན་ཐོགས་མེད་པ་སྨོས་ཅི། རྒྱ་ནག་གཞུང་ལའང་ཕན་ཐོགས་མེད་པ་ཤིན་ཏུ་གསལ་པོ་ཡིན། དེ་ལྟར་མུ་མཐུད་གནས་པ་ཡིན་ན་བོད་མིའི་སྡུག་བསྔལ་སེལ་མི་ཐུབ་ལ། རྒྱ་ནག་གི་འགོ་ཁྲིད་ཚོས་གལ་ཆེར་བརྩི་བའི་བརྟན་ལྷིང་དང༌། གཅིག་གྱུར་ལའང་གནོད་སྐྱོན་ཡོང་ངེས་དང༌། རྒྱ་ནག་གི་འགོ་ཁྲིད་ཚོས་རྒྱལ་སྤྱིའི་ཐོག་རྒྱ་ནག་རང་ཉིད་ཀྱི་སྙན་གྲགས་ཐད་བསམ་བློ་ཤུགས་ཆེ་གཏོང་གི་ཡོད་པ་བཞིན། བོད་ཀྱི་དཀའ་རྙོག་འདི་དག་གཙང་སེལ་བྱེད་མ་ཐུབ་ན་རྒྱ་ནག་གི་སྙན་གྲགས་ལ་གནོད་སྐྱོན་མུ་མཐུད་ཡོང་རྒྱུ་ཡིན། བོད་ཀྱི་དཀའ་རྙོག་འདི་སེལ་ཐུབ་པ་བྱུང་ན་ཧོང་ཀོང་དང༌། ཐེ་ཝན་གཏོགས་པའི་རྒྱལ་སྤྱིའི་ཐོག་རྒྱ་ནག་ལ་མཐོང་དང་ཡིད་ཆེས་ཆེ་རུ་འགྲོ་རྒྱུར་ཕན་ཐོགས་ཡོང་ངེས་ཡིན།

ཕན་ཚུན་གཉིས་མོས་ཡོང་ཐབས་སུ་ངོས་ནས་རང་བཙན་རྩོད་ཀྱི་མེད་པའི་བསམ་ཚུལ་གསལ་པོ་ཡིན། ངོས་ནས་དེ་སྔ་ཐེངས་མང་བརྗོད་པ་ལྟར་ངས་འབད་བརྩོན་བྱེད་དོན་ནི་བོད་མི་རིགས་དང༌། དེའི་ཐུན་མོང་མ་ཡིན་པའི་ཆོས་དང་རིག་གཞུང༌། སྐད་ཡིག གོམས་སྲོལ་བཅས་རང་གཞན་ལ་ཕན་ཐོགས་ཡོད་པ་རྣམས་ཉམས་པ་སོར་ཆུད་མི་ཉམས་གོང་འཕེལ་གཏོང་ཐུབ་པའི་ཆེད་དུ་དོན་དམ་པའི་རང་སྲིད་རང་སྐྱོང་གི་ཐོབ་ཐང་དགོས་པ་འདི་ཡིན། དེ་ཡོང་བ་ལ་བོད་མི་ཚོར་སྤྱི་ཚོགས་དང༌། དཔལ་འབྱོར། རིག་གཞུང་སོགས་འཕེལ་རྒྱས་གཏོང་བའི་ནང་གི་སྲིད་དབང་ཆ་ཚང་བ་ཞིག་མེད་ཐབས་མེད་པ་ནི་འདས་པའི་ལོ་བཅུ་ཕྲག་འགའ་ཤས་ཀྱི་ཉམས་མྱོང་ནས་གསལ་པོར་བསྟན་ཡོད། ངོས་ནས་རྒྱ་ནག་གི་འགོ་ཁྲིད་ཚོས་དེ་དག་ལ་གཞི་རྩའི་དགག་བྱ་ཡོད་པར་ངོས་འཛིན་བྱེད་ཀྱི་མེད། གང་ཡིན་ཟེར་ན། རྒྱ་ནག་གི་འགོ་ཁྲིད་རིམ་པས། རྒྱ་མི་བོད་དུ་ཡོང་བའི་རྒྱུ་མཚན་གཙོ་བོ་བོད་མིར་བདེ་སྐྱིདབསྐྲུན་རྒྱུ་དང༌། བོད་ཡར་རྒྱས་གཏོང་རྒྱུའི་ཆེད་དུ་ཡིན་ཞེས་བརྗོད་ཀྱི་ཡོད་པར་བརྟེན་རྒྱ་ནག་གི་འགོ་ཁྲིད་ཚོས་ང་ཚོ་དང་ཞི་བའི་གྲོས་མོལ་གྱི་ལས་དོན་འགོ་འཛུགས་བྱེད་མི་ཐུབ་པའི་རྒྱུ་མཚན་གང་ཡང་མེད། གལ་ཆེར་བརྩི་བའི་རྩ་དོན་བརྟན་ལྷིང་དང༌། གཅིག་གྱུར་ཞེས་པའི་དགོས་འདུན་ཡང་དེའི་ཐོག་ནས་བསྒྲུབ་ཐུབ་པ་ཡོང་རྒྱུ་ཡིན། ངོས་ནས་དེ་རིང་གི་གོ་སྐབས་འདི་བཟུང་སྟེ་རྒྱ་ནག་གཞུང་གི་དབུ་ཁྲིད་རྣམ་པ་ཚོར་ངོས་ཀྱིས་བཏོན་པའི་གྲོས་འཆར་ཁག་ལ་དོན་དམ་གྱི་དགོངས་བཞེས་གནང་རོགས་ཞེས་ཡང་བསྐྱར་འབོད་སྐུལ་ཞུ་རྒྱུ་ཡིན། གྲོས་མོལ་ལ་བརྟེན་ནས་བོད་ཀྱི་གནད་དོན་འདི་དྲང་བདེན་དང༌། བློ་རིག་དངས་གསལ་གྱི་སྒོ་ནས་སེལ་རྒྱུར་འདོད་མོས་ཡོད་ཚེ་དཀའ་རྙོག་སེལ་རྒྱུའི་ཐབས་ལམ་བཟང་པོ་ཞིག་རྙེད་ངེས་ཡིན་པར་ད་དུང་ཡིད་ཆེས་བྱེད་བཞིན་ཡོད།

ང་ཚོས་དངོས་ཐོག་བདེན་འཚོལ་དང༌། བློ་བརྟན་བབ་བརླིང་གི་སྒོ་ནས་ད་ལྟ་ཕན་གྱི་གནས་སྟངས་ལ་ཞིབ་འཇུག་གིས་ཉམས་མྱོང་ནས་བསླབ་བྱ་བླངས་ཏེ་བློ་གྲོས་དང་སྙིང་སྟོབས་ལ་བརྟེན་ནས་ཕུགས་རྒྱང་རིང་པོའི་ཁེ་ཕན་སྒྲུབ་དགོས་པའི་དུས་ལ་སླེབས་ཡོད། གྲོས་མོལ་བྱེད་པའི་རྩ་དོན་ནི༑ བོད་རྒྱའི་དབར་མཛའ་མཐུན་གཉིས་ཕན་དང༌། བརྟན་ལྷིང་གཅིག་གྱུར། རང་དབང་དང༌། མང་གཙོ། རང་སྐྱོང་བཅས་ཀྱི་ཐོག་ནས་བོད་མི་རིགས་དང༌། དེའི་རིག་གཞུང༌། ཁོར་ཡུག་བཅས་སྐྱོན་མེད་འཛིན་སྐྱོང་བྱེད་ཐབས་སྐོར་ཡིན། རྒྱ་ནག་གཞུང་གིས་རྩ་དོན་དེ་དག་སྣང་ཆུང་མངོན་མེད་དུ་བཏང་སྟེ་ང་ཚོས་བོད་ཀྱི་སྤྱི་ཚོགས་རྙིང་པ་སླར་གསོ་དང༌། ཏཱ་ལའི་བླ་མའི་ཐོབ་ཐང་རྩོད་གླེང་བྱེད་ལུགས་བརྗོད་བཞིན་ཡོད། ཏཱ་ལའི་བླ་མས་གཞུང་འཛིན་བྱེད་པའི་སྲོལ་ལུགས་གནས་དང་མི་གནས་བོད་མི་མང་ཚོགས་ནས་ཐག་གཅོད་བྱེད་རྒྱུ་༡༩༦༩ལོར་གསལ་བསྒྲགས་ཟིན་པ་དང༌། ངོས་རང་སྒེར་གྱི་གནས་ཚུལ་ནི་༡༩༩༢ ལོར་གསལ་བསྒྲགས་ཇི་ལྟར་བགྱིས་པ་བཞིན་གཞིས་བྱེས་མཉམ་འཛོམས་བྱུང་མཚམས་ངོས་ནས་ཆབ་སྲིད་འགོ་འཁྲིད་ཀྱི་མིང་ཁུར་འགན་ལེན་མི་བྱེད་པ་ཡོངས་བསྒྲགས་ཐག་གཅོད་ཟིན་པ་ཡིན། སྤྱི་ཚོགས་རྙིང་པ་བསྐྱར་གསོ་ཟེར་བ་ནི་གཞིས་བྱེས་བོད་མི་སྤྱི་བོ་གནམ་བསྟན་སུ་ཞིག་གི་རྨི་ལམ་དུ་ཡང་མེད་པ་ཞིག་ཡིན་རུང༌། རྒྱ་ནག་གཞུང་གིས་འདི་སྐོར་གཞི་མེད་བསྙོན་འཛུགས་འཁྱོག་བཤད་བྱེད་པ་འདི་ལ་བློ་ཕམ་ཡོད། གནས་ཚུལ་འདི་རིགས་མཛའ་མཐུན་གྲོས་མོལ་ཡོང་རྒྱུར་ཕན་མེད་གནོད་རྐྱེན་འབྱུང་གཞིར་བརྟེན་སླད་འདི་རིགས་མི་ཡོང་བའི་རེ་བ་ཡོད།

རྒྱལ་ཁབ་ཁག་གི་སྲིད་གཞུང་དང༌། གྲོས་ཚོགས། གཞུང་འབྲེལ་མིན་པའི་ཚོགས་པ་དང༌། བོད་དོན་རྒྱབ་སྐྱོར་ཚོགས་པ། མི་སྒེར་བཅས་མང་པོ་ཞིག་ནས་བོད་ནང་གི་ཛ་དྲག་གནས་ཚུལ་ལ་བློ་འཚབ་ཆེན་པོ་གནང་སྟེ་རྒྱ་ནག་གཞུང་ལ་བོད་དོན་དཀའ་རྙོག་ཞི་བའི་གྲོས་མོལ་ལ་བརྟེན་ནས་སེལ་ཐབས་བྱེད་དགོས་པའི་སྐུལ་ལྕག་གནང་བར་ངོས་ནས་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་ཨ་རིའི་གཞུང་ནས་བོད་རྒྱ་ཕྱོགས་གཉིས་བར་གྲོས་མོལ་ཡོང་ཐབས་སུ་དམིགས་བསལ་སྐུ་ཚབ་བསྐོ་གཞག་གནང་སྟེ་ཕན་ཚུན་འབྲེལ་མཐུད་ཡོང་རྒྱུའི་མིག་དཔེ་གསར་གཏོད་གནང་བ་དང༌། ཡོ་རོབ་གྲོས་ཚོགས་དང༌། ཨོ་སོ་ཊ་ལི་ཡའི་གྲོས་ཚོགས་གཉིས་ནས་ཀྱང་གོང་མཚུངས་འབྲེལ་མཐུད་སྐུ་ཚབ་བསྐོ་གཞག་བྱེད་དགོས་པའི་འབོད་སྐུལ་གནང་ཡོད། རྒྱལ་སྤྱིའི་ཁྲིམས་དོན་ལྷན་ཚོགས་ནས་ན་ནིང་ལོ་མཇུག་ཏུ་བོད་སྐོར་འགྲོ་བ་མིའི་ཐོབ་ཐང་དང༌། ཁྲིམས་ཀྱི་འགྲོ་ལུགས་ཞེས་པའི་སྙན་དེབ་ཅིག་བཏོན་ཡོད། དེ་དག་ནི་དུས་ལ་བབས་པ་དང༌། སེམས་འགུལ་ཐེབས་པའི་གནས་ཚུལ་ཞིག་ཡིན། དེས་མ་ཚད་རྒྱ་ནག་ནང་དང༌། ཕྱི་རྒྱལ་ཁག་ཏུ་ཡོད་པའི་རྒྱ་རིགས་མང་པོས་ཀྱང་བོད་མི་མང་གི་སྡུག་བསྔལ་དང༌། གཞི་རྩའི་ཐོབ་ཐང་ལ་གདུང་སེམས་མཉམ་བསྐྱེད་དང༌། ངོས་ཀྱི་དབུ་མའི་ལམ་གྱི་གྲོས་འཆར་ལ་རྒྱབ་སྐྱོར་ཇེ་ཆེར་འགྲོ་བཞིན་ཡོད་པ་འདི་དག་ང་ཚོ་བོད་མི་རྣམས་སེམས་ཤུགས་གོང་དུ་འཕེལ་བ་དང༌། སེམས་འགུལ་ཐེབས་པའི་དམིགས་བསལ་སྐུལ་ལྕག་ཆེན་པོ་ཞིག་ཡིན།

འདི་ལོ་རྒྱ་གར་རང་དབང་རང་བཙན་བྱུང་ནས་མི་ལོ་ལྔ་བཅུ་སོང་བའི་དུས་དྲན་བྱེད་པའི་སྐབས་འདིར། ངས་བོད་མི་མང་གི་ཚབ་བྱས་ཏེ་རྒྱ་གར་གཞུང་དང༌། མི་མང་ལ་འཚམས་འདྲི་དང་བཀྲ་ཤིས་བདེ་ལེགས་ཞུ་བ་དང་ཆབས་ཅིག བོད་མི་བཙན་བྱོལ་བ་ཕལ་ཆེ་བའི་ཕ་ཡུལ་གཉིས་པར་གྱུར་པའི་བཀའ་དྲིན་ཚད་མེད་གནང་བ་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། རྒྱ་གར་ནི་ང་ཚོ་བོད་མི་བཙན་བྱོལ་བའི་གནས་ཡུལ་བརྟན་པོ་ཞིག་ཡིན་པས་མ་ཚད། ཡུལ་འདིའི་གནའ་དུས་ཀྱི་གྲུབ་མཐའ་འཚེ་མེད་ཞི་བའི་ལྟ་བ་དང༌། གཏིང་ཟབ་པའི་མང་གཙོའི་ལམ་ལུགས་དེ་དག་གིས་ང་ཚོར་བློ་སྐྱེད་དང༌། ལམ་སྟོན་བཟང་པོ་ཐོབ་ཡོད། རྒྱ་གར་གཞུང་ལ་བོད་དོན་དཀའ་རྙོག་ཞི་བདེའི་ལམ་ནས་སེལ་བའི་ཆེད་དུ་དོན་ཕན་ལྡན་པའི་འགན་ཁུར་བཞེས་རྒྱུའི་འོས་བབས་ཡོད། ངོས་ཀྱི་དབུ་མའི་ལམ་ཕྱོགས་འདི་དག་རྒྱ་གར་གཞུང་གིས་བོད་དང་རྒྱ་ནག་ལ་འཛིན་པའི་གཞི་རྩའི་སྲིད་བྱུས་དང་མཐུན་གྱི་ཡོད་པས། རྒྱ་གར་གཞུང་ནས་བོད་རྒྱའི་བར་ཞི་མོལ་ཡོང་བའི་ཐབས་ཤེས་གནང་མི་ཐུབ་པའི་རྒྱུ་མཚན་གང་ཡང་མེད། བོད་ནང་ཞི་བདེ་དང༌། ལྷིང་འཇགས་མ་བྱུང་ཚེ་རྒྱ་དཀར་ནག་གཉིས་བར་ཡིད་ཆེས་བློས་འགེལ་ཐུབ་པའི་འབྲེལ་བ་གཏིང་ཟབ་ཅིག་ཡོང་རྒྱུ་ཧ་ཅང་དཀའ་བ་ཡིན།

ང་ཚོའི་འཐབ་རྩོད་ཀྱི་ལམ་ཕྱོགས་འགྱོད་པ་མེད་པ་ཞིག་ཡོང་ཐབས་སུ་ངོས་ནས་མང་མོས་འོས་བསྡུ་བྱ་རྒྱུའི་བསམ་འཆར་བཏོན་པ་དེ་སྐོར་ན་ནིང་བཙན་བྱོལ་དུ་ཡོད་པའི་བོད་མི་དང༌། དེ་བཞིན་བོད་ནང་གི་མི་མང་གི་བསམ་འཆར་གང་ཐུབ་བསྡུ་ལེན་བྱས་པ་དང༌། ཁོང་ཚོའི་བསམ་འཆར་ཇི་ལྟར་བྱུང་བའི་ནང་ནས་མང་མོས་གཞི་རྩར་བཞག་སྟེ་བོད་མི་མང་སྤྱི་འཐུས་གྲོས་ཚོགས་ཀྱི་ཐོག་ནས་གྲོས་ཆོད་བཞག་པ་དེའི་ནང་མང་མོས་འོས་བསྡུའི་ཐོག་ནས་ཐག་གཅོད་བྱ་རྒྱུ་ཕྱིར་འཐེན་ཡོང་བ་དང༌། ངོས་ནས་གང་དགེའི་ཐག་གཅོད་བྱེད་དགོས་ཞེས་འཁོད་འདུག མི་མང་ནས་ངོས་ལ་རེ་བ་དང༌། ཡིད་ཆེས་བློས་འགེལ་དེ་ལྟ་བུ་བྱས་པ་ལ་ཐུགས་རྗེ་ཆེ་བརྗོད་རྒྱུ་ཡིན།

བོད་དོན་དཀའ་རྙོག་སེལ་ཐབས་སུ་དབུ་མའི་ལམ་འདི་དངོས་ཡོད་གནས་ཚུལ་དང་མཐུན་ཞིང༌། ལག་ལེན་འཁེལ་ཐུབ་པ་ཞིག་ཡིན་པར་ངོས་ནས་ངོས་འཛིན་བྱེད་ཀྱི་ཡོད། ལམ་ཕྱོགས་འདིའི་ཐོག་ནས་བོད་མི་རིགས་ལ་མེད་དུ་མི་རུང་བའི་ཐོབ་ཐང་ཁག་ཡོང་བ་དང༌། རྒྱ་ནག་གིས་གལ་ཆེར་ལྟ་བའི་གཅིག་གྱུར་དང་བརྟན་ལྷིང་ལའང་ཕན་ཐོགས་ཡོང་ངེས་ཡིན་པར་བརྟེན། ངོས་ནས་ལམ་ཕྱོགས་འདིའི་ཐོག་ནས་མུ་མཐུད་རྒྱ་ནག་གི་འགོ་ཁྲིད་ཚོར་འབྲེལ་མཐུད་ཐུབ་པའི་འབད་བརྩོན་བྱ་རྒྱུ་ཡིན། ང་ཚོའི་རང་དབང་གི་དོན་དུ་རང་སྲོག་བློས་གཏོང་བྱེད་མཁན་གྱི་བོད་མི་དཔའ་བོ་ཕོ་མོ་རྣམས་ལ་གུས་འདུད་དང༌། བོད་མིའི་སྡུག་བསྔལ་གང་མྱུར་སེལ་ཐུབ་པ་དང༌། འགྲོ་བ་ཀུན་ལ་བདེ་སྐྱིད་ཡོང་བའི་སྨོན་ལམ་བཅས།།   །།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།