རྩོམ་ཡིག

དཔེ་ཀློག་གི་གལ་ཆེའི་རང་བཞིན་གླེང་བ།

དབུ་རུ་དོན་འདུར།༼ལྷ་ས༽

དང་པོ། དཔེ་ཀློག་དང་ང་ཚོ།
ཀོར་ཅིས་དཔེ་ཆ་ནི་མིའི་རིགས་ཡར་རྒྱས་གོང་འཕེལ་དུ་འགྲོ་བའི་ཐེམ་སྐས་རེད་ཅེས་གསུངས་པ་ལྟར་དཔེ་ཀློག་ནི་ཐེམ་སྐས་རེ་རེ་བཞིན་འཛེགས་ནས་དར་རྒྱས་གོང་འཕེལ་གྱི་ལམ་བུར་བསྙེགས་པ་དང་མཚུངས།
རླབས་ཆེན་གྱི་མི་སྣ་མང་པོ་ཞིག་དཔེ་ཆ་ཀློག་ནས་བྱུང་བ་དང༌། དར་རྒྱས་ཆེ་བའི་རྒྱལ་ཁབ་མང་པོ་ཞིག་ཀྱང་དཔེ་ཀློག་ལ་དགའ་བའི་སྤྱི་དམངས་ཚོས་སྐྲུན་པར་བསམ། དེར་བརྟེན། དཔེ་ཀློག་ནི་རྒྱལ་ཁབ་དང་མི་རིགས། ཁྱིམ་ཚང་དང་རང་ཉིད་སུའི་ཕྱོགས་ནས་བསམ་ཀྱང་གལ་འགངས་ཤིན་ཏུ་ཆེ།

རྒྱལ་ཁབ་མང་པོ་ཞིག་དང་མི་རིགས་མང་པོ་ཞིག་གིས་དཔེ་ཀློག་གི་གལ་ཆེའི་དོན་སྙིང་ལ་བསམ་ནས་དཔེ་ཀློག་གི་དམིགས་བསལ་ཉིན་མོ་བཙུགས་ཡོད་པ་དང༌། ལས་བྱེད་དང་ཞིང་པ། ཚོང་པ་སོགས་ཀྱི་དབྱེ་བ་མེད་པར་དཔེ་ཀློག་ལ་བློ་ཁ་ཕྱོགས་ནས་ཡོད། ང་ཚོ་བོད་དུ་ཡང་རྒྱལ་ཁབ་ཀྱིས་ཞིང་པའི་དཔེ་ཁང་བཙུགས་པ་དང༌། བྱིས་པའི་དཔེ་དེབ་མང་པོ་ཡིག་བསྒྱུར་དང་རྩོམ་འབྲི་བྱས་ནས་སློབ་གྲྭ་ཚང་མར་དཔེ་དེབ་ཁང་བཙུགས་ནས་ཡོད།
འོན་ཀྱང་དོན་དངོས་མང་ཚོགས་ཀྱིས་དཔེ་ཆ་ལ་དོ་སྣང་མེད་པ་དང༌། དཔེ་ཀློག་གི་གོམས་གཤིས་བཟང་པོ་མེད་པའི་རྐྱེན་གྱིས་བཙུགས་པའི་དཔེ་ཁང་དེ་དག་ཀྱང་དོན་སྙིང་གིས་སྟོང་ནས་ཡོད། ལྷག་པར་དུ་ཞལ་འདོན་རིགས་ལ་མ་གཏོགས་དགོས་པ་མེད་པར་ལྟ་བའི་ཀླད་རྙིང་མཁྲེགས་བཟུང་གི་ལྟ་བས་རང་ཙམ་མ་ཟད་བུ་ཕྲུག་ལའང་དཔེ་ཀློག་གི་གོམས་གཤིས་ཆགས་པར་ཤུགས་རྐྱེན་ངན་པ་ཐེབས་ནས་འདུག

ང་ཚོའི་མི་རིགས་འདི་མ་གཞི་རིག་གནས་ལ་དགའ་བའི་མི་རིགས་ཤིག་དང༌། རང་ཉིད་ཁྱད་འཕགས་སུ་འདོད་པའི་མི་རིགས་ཤིག་རེད་སྙམ་ཡང་དཔེ་ཀློག་ལ་མ་གོམས་པ་དེས་ད་ཆ་ཚང་མས་རྡོག་རྩ་གཅིག་ཏུ་སྒྲིལ་ནས་དད་པ་བྱེད་ཡུལ་གྱི་སངས་རྒྱས་ཆོས་ལུགས་དེ་ཡང་ཕྱི་ཚུལ་ཙམ་ལས་མི་ཤེས་པའི་ཚད་ལ་ལྷུང་ཡོད། བྱམས་སྙིང་རྗེ་བྱང་ཆུབ་ཀྱི་སེམས་ཞེས་པ་གང་རེད། འགྲོ་བ་རིགས་དྲུག་ཟེར་བ་སུ་དང་གང་རེད། མ་ཎི་ཡིག་དྲུག་གི་གོ་དོན་གང་ཡིན། ཡོན་ཆབ་དང་མཆོད་མེ། ཆོས་མཇལ་སོགས་ཀྱང་ང་ཚོ་དང་རྟག་ཏུ་འབྲེལ་ཡང་དོན་སྙིང་ངོ་མ་ཤེས་མཁན་ནི་ཤིན་ཏུ་ཉུང༌།

ང་ཚོས་མེས་པོ་དཔའ་རབས་དང༌། རང་ཉིད་འཇོན་རབས་ཀྱི་གཏམ་རྒྱུད་རྣ་བར་སྙན་ཡང་དཔེ་ཀློག་ལ་མ་གོམས་པ་དེས། ད་ལྟའི་སྤྱི་ཚོགས་ཀྱི་སྣང་ཚུལ་སྣ་ཚོགས་ལ་དོ་སྣང་བྱུང་གིན་མེད། སློབ་གསོ་དང་མི་འབོར། ལས་རིགས་ལག་རྩལ་སྣ་ཚོགས་སོགས་ལ་དེ་བས་ཀྱང་བློ་ཁ་རྨོངས། རང་གི་དོན་དག་གལ་ཆེན་སྒྲུབ་ས་རྫོང་མཁར་དང་གྲོང་ཁྱེར་དུ་ཡིན་ཡང་དེའི་ཁྲོད་དུ་ཞུགས་ནས་ཇ་ཁང་ལེགས་པོ་ཞིག་ཀྱང་གཉེར་མ་ཐུབ་པ་དེས་ང་ཚོའི་མདུན་ལམ་ལ་ཉེན་ཁ་ཚབས་ཆེན་བཟོ་བ་ཡང་རྩ་བ་ནས་ཚོར་གིན་མེད་པ་རེད།

ཇ་ཁང་དང་ཟ་ཁང༌། ཚོང་ཁང་དང་མགྲོན་ཁང༌། འཁོར་རིགས་ཉམས་བཟོ་དང་གློག་སྐུད་མཐུད་བཟོ། ཆུ་འགྲོ་ཞིག་བཟོ་སོགས་རྒྱུན་ལྡན་འཚོ་བའི་ཐད་འའབྲེལ་དུ་ཡོད་པའི་བྱ་བ་ཆུང་ངུ་མང་པོ་ཞིག་གི་མདུན་དུ་ང་ཚོས་མ་ཎི་ལག་ཏུ་བཟུང་ནས་མི་རིགས་གཞན་གྱི་ལག་རྩལ་མི་སྣ་ཁོ་ན་ལ་བརྟེན་ཏེ་སྡོད་དགོས་པ་དེ་ཡང་གཙོ་བོ་དཔེ་ཀློག་ལ་མ་འཇུག་པས་རེད།
དཔེ་ཀློག་ལ་མ་གོམས་པའི་མི་རིགས་འདིས་སངས་རྒྱས་ཆོས་ལུགས་བྱིན་རླབས་ཀྱི་རྟེན་དུ་བཟུང་ནས་དངོས་གྲུབ་ལ་སྒུག་པ་དང༌། མིག་མདུན་གྱི་འགྲོ་ལམ་ཡོད་ཚད་ལས་དབང་གིས་བཀོད་སྒྲིག་ཁོ་ན་ལ་བསམ་ནས་བསྡད་པས་ད་ཆ་ང་ཚོའི་ཕ་ཡུལ་དུ་དངོས་གྲུབ་ཁོ་ན་ལྷ་བཞིན་སྒོམ་པའི་དད་ལྡན་གྱི་ཁྱུ་ཚོ་ཞིག་དང༌། དབུལ་སྐྱོར་ཁོ་ན་རྣམ་གྲངས་ཀྱི་སྐལ་དུ་འདོད་པའི་ལས་མེད་ཀྱི་མི་ཁྱུ་འགའ་ལས་ཅི་ཡང་མེད་པ་འདྲ།
གཉིས་པ། ང་ཚོའི་གནས་ལུགས་དང་དཔེ་ཀློག
གནས་ལུགས་མང་པོ་ཞིག་མི་རིགས་སོ་སོའི་རྩོམ་པ་པོའི་སྨྱུག་ཁ་ནས་ལུས་ཏེ་རྩོམ་དེབ་ཏུ་གྲུབ་པ་དང༌། རྩོམ་དེབ་དེ་དག་ལ་ལྟ་ཀློག་བྱས་ནས་རིགས་སོ་སོའི་མི་དམངས་ཀྱི་བློ་ཁ་ཕྱེ་བཞིན་ཡོད་པ་ནི་རྩོམ་པ་པོས་དཔེ་དེབ་འབྲི་བའི་དམིགས་ཡུལ་དང༌། ཀློག་པ་པོས་དཔེ་དེབ་ཀློག་པའི་དགོས་པ་གལ་ཆེན་དེ་རེད། ང་ཚོ་བོད་ལ་མཚོན་ན་ཡང་ཆོས་སྲིད་ལུགས་གཉིས་ཀྱི་དཔེ་དེབ་གྲངས་ལས་འདས་པ་ཡོད་པ་དང༌། ནང་དོན་དུས་རབས་ཀྱི་དགོས་མཁོ་དང་འཚམས་པའི་དཔེ་དེབ་ལེགས་པོ་མེད་པ་ཡང་མ་རེད། གཙོ་བོ་དཔེ་ཀློག་ལ་མི་དགའ་ཞིང་ལྷག་པར་དུ་བོད་ཡིག་དཔེ་དེབ་ལ་ཀློག་པའི་སྤྱི་དམངས་ཚད་ལྡན་ཞིག་མེད་པས་གནས་ལུགས་ལས་ལྡོག་པ་དང༌། རྒྱུ་མཚན་མི་ཤེས་པའི་ལབ་བརྡོལ་དང་ལྟ་སྟངས་ཀྱིས་ཚང་མ་རྨོངས་ནས་འདུག

ངས་དེ་རིང་ལམ་ཁ་ནས་བུ་མོ་ཞིག་རྫོང་ལ་འགྲོ་མཁན་བླུག་པ་ཡིན། ལམ་བར་དུ་ངས་བུ་མོ་དེར་ལས་ཀ་གང་ལ་འགྲོ་གི་ཡོད་ཅེས་དྲིས་པར་ང་ལ་ལས་ཀ་མེད། ཇ་ཁང་གི་ཇ་བླུག་མཁན་ཡིན་ཞེས་པའི་ལན་འགལ་ཟླར་འགྱུར་བ་ཞིག་བཏབ་བྱུང༌། སླར་ཡང་ངས་ལས་ཀ་མེད་ན་ཇ་བླུག་མཁན་ཡིན་ཞེས་པ་གང་རེད་ཅེས་ལྡོག་འདྲི་བྱས་པར་མོ་རང་ལན་འདེབས་མི་ཤེས་པར་ལུས་སོང༌།
ང་ཚོ་ལ་ལས་རིགས་ཀྱི་ཐད་ནས་དམིགས་ཡུལ་གཉིས་རང་ལས་མེད་དེ་རབ་ཡིན་ན་སློབ་གྲྭ་ཐོན་ནས་རྒྱལ་ཁབ་ཀྱི་ལས་བྱེད་པ་ཆགས་པ་བྱེད་རྒྱུ་དང༌། མ་བྱུང་ན་ཞིང་འབྲོག་ལས་རིགས་གཉེར་ནས་ཁྱིམ་ཚང་སྐྱོང་རྒྱུ་དེ་རེད། དགོས་མཁོ་ཆེ་བའི་ལས་རིགས་མང་པོ་ཞིག་གི་མདུན་དུ་ང་ཚོ་ལྐུགས་པ་ནང་བཞིན་སྡོད་དགོས་པ་དེ་ཡང་མཐར་གཏུགས་ན་ལྟ་སྟངས་དེ་རིགས་ལ་རག་ལས་པ་དང༌། ཇ་ཁང་དང་ཟ་ཁང་༌། ཚོང་ཁང་མགྲོན་ཁང༌། ལྷམ་འཚེམ་མཁན་སོགས་ཀྱང་ལས་རིགས་དེ་དག་ལ་བརྟེན་ནས་རང་གི་ངལ་རྩོལ་འབྲས་བུ་ཟ་མཁན་ཡ་རབས་ཚུལ་ལྡན་གྱི་སྤྱི་དམངས་ཡིན་པའི་དོན་དངོས་ཙམ་ཡང་ཤེས་ཀྱི་མེད།

དེ་རིང་སླར་ཡང་ང་ལ་མགོ་ན་དགོས་པའི་ལན་ཞིག་ཐོབ་བྱུང༌། སྤྱི་ཞབས་པའི་ཡིག་རྒྱུགས་མ་ལོན་པའི་སློབ་མ་གཉིས་ཀྱིས་རྫོང་མཁར་དུ་ཇ་ཁང་ཞིག་བཟུང་འདོད་ཡོད་ཀྱང་དེའི་ཕ་མས་སློབ་ཆེན་གྱི་ལག་འཁྱེར་ཉར་ནས་ཇ་ཁང་བཟུང་ན་ངོ་ཚ་དགོས་པ་ཞིག་རེད་ཟེར་ནས་མོས་མཐུན་མ་བྱས་སྟབས་ད་ཆ་ཁོ་གཉིས་སང་ལོ་ཡི་ཡིག་རྒྱུགས་སྒུག་ནས་གཞན་གྱི་གཉེར་བའི་མགྲོན་ཁང་ཞིག་ཏུ་ཞབས་ཞུ་བྱས་ནས་བསྡད་ཡོད།
རང་ཉིད་ཀྱི་སྦྱིན་བདག་ངོ་མ་བྱས་ནས་ཇ་ཁང་རེ་བཟུང་ཏེ་སློབ་ཆེན་བར་དུ་སོང་བའི་ཤེས་བྱ་སྣ་རེ་རང་གི་ལས་ཀའི་ཐབས་ཤེས་སུ་སྤྱད་ན་ཇ་ཁང་ལེགས་པོ་ཞིག་གཉེར་ཐུབ་རྒྱུར་ཐེ་ཚོམ་མེད་པ་དང༌། ཇ་ཁང་ལེགས་པོ་ཞིག་གཉེར་ཐུབ་ན་རང་གི་འཚོ་རྟེན་འགན་ལེན་ཐུབ་པས་གཞན་ལ་བརྟེན་པ་ལས་ལེགས་པ་མེད་དམ། མ་ཟད་ཇ་ཁང་བཟུང་བ་དེ་ཡང་ལས་རིགས་ཤིག་གཉེར་བ་ཙམ་ལས་ངོ་ཚ་དགོས་པའི་རྒྱུ་མཚན་ཅི་ལ་ཡོད།

དེ་རིང་ཇ་ཁང་ནང་དུ་མི་མང་པོ་ཞིག་བསྡུས་ནས་མགྲོ་གླེང་འཁྲུག་པོ་ཞིག་བྱེད་ཀྱི་འདུག་ཀྱང་མཇུག་འབྲས་ནི་འདས་ཟིན་པའི་མཁས་དབང་དགེ་ཆོས་དང་དོན་གྲུབ་རྒྱལ། ད་ལྟར་འཚོ་བཞུགས་སུ་ཡོད་པའི་རྩོམ་པ་པོ་ཞོགས་དུང་དང༌། སྒོ་ཤེས་རབ་རྒྱ་མཚཽ། ར་སེ་དཀོན་མཆོག་རྒྱ་མཚོ་སོགས་མི་རིགས་ཀྱི་རྐང་འདྲེན་དང༌། འབྲེལ་བ་བྱེད་མི་རུང་བའི་ཚད་དུ་བཟུང་ནས་དམའ་འབེབས་བྱེད་ཀྱི་འདུག ངས་ཁྱེད་རྣམ་པའི་མཁྱེན་རྒྱ་དེ་ལྟར་ཆེ་བས་ཁོང་རྣམ་པའི་གསུང་རྩོམ་ཡོད་ཚད་ལྟ་ཀློག་བྱས་པ་ཡིན་གྱི་རེད་ཅེས་བཤད་པར་ཚང་མས་ང་ཚོ་བོད་ལ་དཔེ་དེབ་ཀློག་འདོད་ན་ཚད་ལྡན་གྱི་མཁས་པས་མཛད་པའི་པོ་ཏི་རི་རབ་དང་མཉམ་པ་འདུག་པས་ཁོ་ཚོའི་དཔེ་རུལ་དག་ཀློག་མ་མྱོང་ལ་ཀློག་འདོད་ཀྱང་མེད་ཅེས་བཤད་ཀྱི་འདུག ངས་སླར་ཡང་འོ་ན་ཁོ་ཚོ་དེ་ལྟ་བུའི་ནག་ཅན་ཡིན་པ་ག་ནས་ཤེས་བྱུང་ཞེས་དྲིས་པར་ལ་ལས་གཡོལ་ནས་ང་ཡང་དེ་ལྟ་བུ་ཡིན་པའི་ཤུགས་བསྟན་རྣམ་འགྱུར་སྟོན་པ་དང༌། རེ་འགས་ལྟ་དགོས་དོན་མེད། ཤེས་ཤེས་པ་རེད་ཟེར་བའི་བྱིས་པའི་འཁོན་ལན་འདྲ་བ་ཞིག་བཏབ་ནས་རང་རང་སར་གྱེས་སོང༌།
བསམ་གཞིགས་ཀྱི་རྒྱ་ལ་ཚུད་པའི་ང་རང་གཅིག་པུ་དེ་གར་མིག་མཆི་མས་ཁེངས་ནས་སྡོད་དགོས་བྱུང་བ་དང༌། ཁོ་ཚོ་རེ་རེ་བཞིན་གྱི་བྲིས་པའི་བོད་མི་རིགས་ལ་བསམ་པའི་སྐད་ཆའི་མར་ལོ་དེ་དག་ད་དུང་ཡང་བོད་མི་ཀླད་མེད་ཚོའི་སྣང་བར་མི་འགྲོ་བས་ནམ་ཞིག་གཉིད་ལས་སད་སྲིད་དམ་སྙམ་པའི་ཤུགས་རིང་ནར་ནར་དུ་ལུས། ང་ཚོའི་མི་རིགས་འདི་སྙིང་རྗེ་ཆེ་ཞིང་ཆེ་ཞིང་མནའ་ལ་བརྩི་བ། ལ་རྒྱ་ཟབ་པ་ཞིག་རེད་ཟེར་ཡང་རང་ཉིད་དང་འབྲེལ་བ་བྱེད་མྱོང་མེད་ལ་དཔེ་དེབ་ཀྱང་ཀློག་མ་མྱོང་བའི་མཁས་པ་མང་པོ་ཞིག་ལ་དེ་ལྟ་བུའི་སྡང་ཟུག་བྱེད་དོན་གང་ཡིན་ནམ། ངས་ཀྱང་ཁྱོད་ཚོས་ནོར་བ་དང་ཁོ་ཚོས་འགྲིག་འདུག་ཞེས་ཤོད་མི་སྲིད། གཙོ་བོ་དེ་སྔ་ནས་བཤད་པ་ལྟར་རྩོམ་པ་པོ་ལ་དཔྱད་བརྗོད་བྱས་ན་རྩོམ་པ་པོས་བྲིས་པའི་རྩོམ་ཡིག་ཀློག་དགོས་པ་དང༌། རྩོམ་པ་པོའི་དོན་དངོས་ལོ་རྒྱུས་སོགས་རོབ་ཙམ་ཤེས་དགོས་ངེས། གལ་ཏེ་དཔེ་དེབ་ལ་དཔྱད་བརྗོད་བྱས་ན་དཔེ་དེབ་དེའི་ནང་དོན་ནས་ཆོས་ཕྱོགས་ལ་བཤད་པ་ཡིན་དང་ཡང་ན་སྲིད་ཕྱོགས་ལ་བཤད་པ་ཡིན་མིན་དབྱེ་བ་ཕྱེ་ནས་ཁ་ཕྱོགས་གཞིར་བཟུང་གདེང་འཇོག་གནང་དགོས། དཔེར་ན་སྲིད་ཕྱོགས་ལ་བཤད་ཀྱི་ཡོད་ན་དེས་སངས་རྒྱས་ཆོས་ལུགས་ལ་གནོད་རབས་དང་མི་ལེགས་ཚུལ་གསུངས་མི་རུང་ལ་གལ་ཏེ་ཆོས་ཕྱོགས་ནས་ཡིན་ན་སྲིད་ཕྱོགས་ལ་གནོད་རབས་དང་མི་ལེགས་ཚུལ་གྱི་བསམ་འཆར་འདོན་ག་ལ་རུང༌། དེར་བརྟེན་ང་ཚོས་རྨོངས་ཚོད་ཀྱིས་གཞན་ལ་ཞྭ་མོ་སྣ་ཚོགས་གཡོགས་པ་ལས་དྲང་པོའི་ལམ་དུ་ཞུགས་ན་ལུགས་དང་མཐུན།

སྤྱི་ཚོགས་ཀྱི་གྲུ་ཟུར་གང་ས་ནས་དེ་དང་དེ་ལྟ་བུའི་ཡ་ང་དགོས་པའི་ལྟ་སྟངས་མང་པོ་ཞིག་མཐོང་དུས་ཡིད་སྐྱོ་ཞིང་སེམས་སྡུག་པ་དང༌། སླར་ཡང་དེ་དག་ལ་ཁ་གཏད་དུ་ལངས་ནས་ངང་རྒྱུད་རིང་པོས་གནས་ལུགས་བགྲངསམཁན་མེ་ལྕེ་ལྟ་བུའི་མི་སྣ་དག་མཐོང་དུས་རེ་བ་ཞིག་ཀྱང་སེམས་ཀྱི་ཟབ་ས་ལ་འཁྲུངས་བྱུང༌།
དེ་ལྟར་ཡིན་མིན་ལ་བསམ་གཞིགས་གནང་མཁན་སུ་ཞིག་ཡིན་ཡང་དཔེ་དེབ་ལྟ་ཀློག་བྱེད་རྒྱུར་དགའ་བོ་དགོས་པ་དང༌། གཞན་ལ་མ་བཤད་པའི་སྔོན་དུ་བདེན་རྫུན་བརྟག་ནས་བྱེད་རྒྱུ་དེ་གལ་ཆེན་རེད། ལྷག་པར་དུ་བོད་ཡིག་དཔེ་དེབ་ཀྱི་པར་གྲངས་ཉུང་ལ་མཐུག་པོ་མེད་ཀྱང་མ་བྲིན་པའི་དོན་ལ་བསམ་ན་དེ་བས་ཀྱང་དཔེ་ཀློག་ནི་ང་ཚོའི་མི་རིགས་ལ་མཚོན་ནས་བཤད་ན་ཉག་ཕྲ་བའི་དུས་ལ་སླེབས་ཤིང༌། རྩོམ་པ་པོས་གནད་ལུགས་དང་བདེན་དོན་གྱི་ཕྱུག་པའི་སྐད་ཆ་རྩ་ཆེན་གང་ལྟ་བུ་ཞིག་ཡིན་ཀྱང་དགོས་མེད་དུ་འགྱུར་འགྲོ་བའི་དབང་གིས་ཚང་མས་དུས་ཁོམ་ཡོད་ཚད་དཔེ་ཀློག་ལ་བརྩོན་པའི་འབོད་སྐུལ་ཞུའོ།།

བསམ་ཚུལ། (1)
 

ཕུན་དབང་རྒྱལ་ཚོང་པ་ཡིན་མིན་དང་ཁོང་ལ་གདེང་འཇོག་བྱེད་པ།

ངེད་ཀྱི་དབུ་མའི་ལམ་གྱི་འཐབ་གྲོགས་རྒན་པ་སྐུ་གཤེགས་པར་མྱ་ངན་ཞུ་ཚིག་ཐུང་ངུ། ཤར་ཕྱོགས་ཁུག་རྟ།
༄༅། ། རྣམ་དཔྱོད་མེ་ལྟར་འབར་བའི་དཔའ་བོ་དང་མཁས་དབང། བོད་མིའི་ཉེ་རབས་ལོ་རྒྱུས་ཁྲོད་ཀྱི་ཆབ་སྲིད་པ་གྲགས་ཅན། དབུ་མའི་ལམ་གྱི་གཞུང་ལུགས་སྨྲ་བ་པོ་དང། དེའི་ཉམས་ལེན་པ། དབུ་མའི་ལམ་གྱི་ཆེས་བཀུར་བར་འོས་པ་དང་སློབ་སྦྱོང་བྱེད་འོས་པའི་ངེད་ཀྱི་འཐབ་གྲོགས་རྒན་པ། བོད་མི་རིགས་ཀྱི་སྣོད་བཅུད་གཉིས་ཀ་གཡང་སར་གནས་པའི་སྐབས་འདིར་དེ་སྐྱོབ་པའི་ཁ་ཡོད་ལག་ཡོད་ཀྱི་ཐབས་ལམ་ཚང་ལ་མ་ནོར་བས་རྒྱུད་གཏམས་ཤིང། རྒྱལ་སྤྱིའི་དཔལ་འབྱོར་ཁྲོམ་རྭའི་བཀའ་བཀོད་འོག་གི་སྲིད་དོན་ནམ་མཁའ་འགྲིམས་ལ་བྱ་རྒྱལ་ཁྱུང་ཆེན་ཡིན་ཡང་དམན་སར་འགོད་པ། མདོར་ན་བོད་མིའི་ཉེ་རབས་ལོ་རྒྱུས་ཀྱི་སྲོག་འཛིན་མི་སྣ་དང། བོད་མི་རིགས་ཀྱི་འདས་མ་ད་གསུམ་གྱི་བྱུང་རབས་ཐུགས་ལ་གསལ་བོར་ཆུད་ཅིང།

   

དག་ཡིག་གསར་བསྒྲིགས་བེད་སྤྱོད་གཏོང་སྐབས།

དག་ཡིག་གསར་བསྒྲིགས་བེད་སྤྱོད་གཏོང་སྐབས་གཟབ་དགོས་སའི་གནད་དོན་འགའ།

སྤྲོ་ཚིགས་ཆོས་གྲགས།

ཉེ་བའི་དུས་རབས་ཕྱེད་ལྷག་རིང་བོད་ཕྱི་ནང་གི་ཤེས་ལྡན་མི་སྣ་ཚོས་རང་མི་རིགས་ཀྱི་སྐད་ཡིག་སྲུང་སྐྱོབ་དང་དར་སྤེལ་ཐད་ཕྱག་ལས་གནང་བའི་ཁྲོད། ཆེས་རྨང་གཞིར་གྱུར་པའི་ལས་དོན་གལ་ཆེན་ཞིག་ནི་ཚིག་མཛོད་རྩོམ་སྒྲིག་དང་དཔར་སྐྲུན་གྱི་བྱ་བ་དེ་རེད། བོད་ལ་ཚིག་མཛོད་རིག་པའི་ཁྱད་ཆོས་འཛོམས་པའི་དེང་རབས་ཀྱི་ཚིག་མཛོད་ཚད་ལྡན་ཞིག་ད་དུང་དཀོན་མོད། བཙན་པོའི་རྒྱལ་རབས་སྐབས་རྩོམ་སྒྲིག་གནང་བའི་བྱེ་བྲག་རྟོགས་བྱེད་ཆེ་འབྲིང་བོད་ཀྱི་ཚིག་མཛོད་ཐོག་མར་བརྩིས་ནའང་། བོད་ལ་ཚིག་མཛོད་བྱུང་ནས་མི་ལོ་ཆིག་སྟོང་ལྷག་ཕྱིན་ཡོད། བོད་ཡིག་གི་དེང་རབས་ཚིག་མཛོད་རྩོམ་སྒྲིག་གི་འཕེལ་རིམ་ནང་དག་ཡིག་གསར་བསྒྲིགས་ནི་ཀུན་གྱིས་མཐོང་ཆེན་བྱེད་ཅིང་། ཚིག་མཛོད་རིག་པའི་ཁྱད་ཆོས་གང་འཚམ་འཛོམས་ཡོད་པའི་སྐད་ཡིག་ཚིག་མཛོད་ཅིག་རེད།

བསམ་ཚུལ། (2)
   

རྒྱ་ཡི་ཡིག་ཚང་དུ་འཁོད་པའི་བོད་དང་འབྲེལ་བའི་ལོ་རྒྱུས།

ཀྲུང་གོའི་བོད་རིག་པ་དཔེ་སྐྲུན་ཁང་བོད་ཡིག་རྩོམ་སྒྲིག་ཁང་གི་ཞུས་ཆུང་ལོ་ཙྭ་བ་འཇམ་དབྱངས་དར་རྒྱས་ཀྱིས་བསྒྱུར་ཅིང་མཆན་བཏབ་པའི༼རྒྱའི་ཡིག་ཚང་དུ་འཁོད་པའི་བོད་དང་འབྲེལ་བའི་ལོ་རྒྱུས༽(དེབ1—3)ཞེས་པ་ཉེ་ལམ་ཀྲུང་གོའི་བོད་རིག་པ་དཔེ་སྐྲུན་ཁང་ནས་པར་དུ་བསྐྲུན།
འཇམ་དབྱངས་དར་རྒྱས་ལགས་ནས་མི་ལོ་དུ་མའི་སྔ་རོལ་ནས་རྒྱའི་ལོ་རྒྱུས་ཡིག་ཚང་དུ་བཀོད་པའི་བོད་དང་འབྲེལ་བའི་དཔྱད་གཞིའི་ཡིག་རིགས་རྣམས་བོད་ཡིག་ཏུ་སྒྱུར་འགོ་བརྩམས་ཤིང་།ཁོང་གིས་བོད་ཡིག་ཏུ་བསྒྱུར་བའི་དེབ་འདི་གསུམ་ནི་རྒྱའི་གནའ་བོའི་ལོ་རྒྱུས་དེབ་ཐེར《སྲིད་སྐྱོང་མེ་ལོང》དང་།《ཧན་རྒྱལ་རབས་ཀྱི་ལོ་རྒྱུས》《ཧན་རྒྱལ་རབས་ཤར་མའི་ལོ་རྒྱུས》《ཅིན་རྒྱལ་རབས་ཀྱི་ལོ་རྒྱུས》རྒྱལ་རབས་ལྷོ་མ་དང་བྱང་མའི་དུས་ཀྱི《སུང་རྒྱལ་རབས་ཀྱི་ལོ་རྒྱུས》《ཆི་རྒྱལ་རབས་ལྷོ་མའི་ལོ་རྒྱུས》《ལིའང་རྒྱལ་རབས་ཀྱི་ལོ་རྒྱུས》《ཝེ་རྒྱལ་རབས་ཀྱི་ལོ་རྒྱུས》《ཆི་རྒྱལ་རབས་བྱང་མའི་ལོ་རྒྱུས》《ཀྲོའུ་རྒྱལ་རབས་ཀྱི་ལོ་རྒྱུས》《སུའེ་རྒྱལ་རབས་ཀྱི་ལོ་རྒྱུས》《རྒྱལ་རབས་བྱང་མའི་ལོ་རྒྱུས》《ཐང་གི་ལམ་སྲོལ་གནད་བསྡུས》《ཐང་ཡིག་རྙིང་མ》《ཐང་ཡིག་གསར་མ》《རྒྱལ་རབས་ལྔའི་ལོ་རྒྱུས་རྙིང་མ》《རྒྱལ་རབས་ལྔའི་ལོ་རྒྱུས་གསར་མ》《ལིའོ་རྒྱལ་རབས་ཀྱི་ལོ་རྒྱུས》《ཅིན་རྒྱལ་རབས་ཀྱི་ལོ་རྒྱུས》《སུང་རྒྱལ་རབས་ཀྱི་ལོ་རྒྱུས》བཅས་སུ་རྒྱས་བསྡུས་ཅི་རིགས་སུ་འཁོད་པའི་བོད་བཙན་པོའི་རྒྱལ་རབས་དང་།བོད་ཀྱི་རྒྱལ་ཕྲན། བོད་དང་རིགས་རྒྱུད་ཀྱི་ཐད་ནས་འབྲེལ་བ་ལྡན་པའི་ཚོ་པ་ཁག་གི་སྐོར་ཏེ།ནུབ་ཆཱང་། ཏི། ཏང་ཞང་།(ལྡོང) ཐན་ཁྲང་།(ལྡོང་ཕྲོམ) འ་ཞ། སུམ་པ། པའེ་ལན། ཞང་ཞུང་། བུད་མེད་རྒྱལ་ཁབ་ཤར་མ། བུད་མེད་རྒྱལ་ཁབ་ནུབ་མ།ཧྥུ་རྒྱལ་ཁབ། བྲུ་ཤ། སེ་རིབ། ཀྲང་ཆིའུ་པ། མི་ཉག་རྒྱལ་རབས། ཙོང་ཁའི་རྒྱལ་རབས། ཏེན། ཁྱུང་ཏུའུ།ཙོ་ཏུའུ། རན་མང་། པའེ་མ་ཏི་ལ་སོགས་པའི་སྐོར་བདམས་ནས་བསྒྱུར་བ་དང་འབྲེལ་དགོས་ངེས་ཀྱི་མཆན་བཏབ་པ་ཞིག་ཡིན། བོད་འགྱུར་དུ་མ་ཡིག་གི་དོན་དང་མཐུན་པ་དང་། མ་རྩོམ་གྱི་སྐད་ཆའི་ཁྱད་གཤིས་སམ་འགྲོས་དང་ཉེ་ཙམ་ཡོང་བའི་རྨང་གཞིའི་ཐོགབོད་ཀྱི་བརྡ་སྤྲོད་སྟངས་དང་ཚིག་གི་སྦྱོར་བ་འགོད་ལུགས་དང་མཐུན་ཞིང་། ཀློག་བདེ་ཞིང་གོ་སླ་བའི་ཐད་ལ་དོ་སྣང་ཅི་ཐུབ་བྱས་ཡོད་པ་དང་།མ་ཡིག་ཏུ་བྱུང་བའི་ས་མིང་དང་། སྲིད་ཀྱི་སྒྲིག་གཞི། ཁྲི་ལོ། གོ་ཐོབ། མི་རིགས་དང་རྒྱལ་ཁབ་ཀྱི་མིང་སོགས་ལ་མཆན་མང་པོ་བཏབ་ཡོད་པས།བོད་ཀྱི་ལོ་རྒྱུས་ལ་ཞིབ་འཇུག་བྱེད་མཁན་དང་། བོད་ཀྱི་ལོ་རྒྱུས་ལ་སྤྲོ་སྣང་ཡོད་པའི་ཀློག་མཁན་དཀྱུས་མ་ཚང་མར་ཀློག་བདེ་པོ་བཟོས་ཡོད་ཅིང་།བོད་ཀྱི་ལོ་རྒྱུས་སློབ་ཁྲིད་དང་ཞིབ་འཇུག་ཐད་ཟུར་ལྟའི་རིན་ཐང་དང་དཔྱད་གཞིའི་རིན་ཐང་ཆེན་པོ་ལྡན།ཁོང་གིས་བསྒྱུར་བའི་ལོ་རྒྱུས་ཀྱི་འགྱུར་མའི་དེབ་བཞི་པའང་ད་ལྟ་འགྲུབ་ཉེར་ཡོད་ཅིང་། སང་ལོ་ཀློག་མཁན་གྱི་སྤྱན་ལམ་དུ་བསྟར་ཐུབ་པའི་རེ་བ་བཅངས་ཡོད།
ཀྲུང་གོའི་བོད་རིག་པ་དཔེ་སྐྲུན་ཁང་གིས་༢༠༡༣ལོའི་ཟླ༡༢ཚེས༡༨ཉིན། དྲ་གོགས་ཞིག་གི་སྐད་ཕྲིན་ལས་བཤུས་པ་ཡིན། དེབ་འདིའི་ནང་དོན་ག་འདྲ་ཡིན་མིན་མི་ཤེས་སོ།

   

གསར་གནས་དེ་ལས་མང་བ།

ཤོག་ངོས། 5 ནས། 31