ཡིག་ཆ་ཁག་ལས་འབོར་གྱིན་པའི་དཔའ་བོ་བཀྲ་བྷེ་ལགས།

སྦྲ་རིགས་ཐོགས་མེད། ལོ་རྒྱུས་ཤིག་ལ་མཚོན་ན་ལོ་ཚིགས་དང་གྲངས་ཀ་སོགས་ནི་ཧ་ཅང་གལ་ཆེ་བའི་ལོ་རྒྱུས་དངོས་དོན་ར་སྤྲོད་ཀྱི་ལྡེ་མིག་ཡིན། དེ་བཞིན་རང་རེ་བོད་ཀྱི་རང་ལུས་མེ་བསྲེག་གི་ཞི་རྒོལ་འཐབ་རྩོད་འདིར་མཚོན་ནའང་གཞུང་འབྲེལ་ཡིན་མིན་ཚང་མས་ཐུན་མོང་གི་གྲངས་ཀ་གསལ་བོ་ཞིག་གཞི་རྩར་བཞག་ནས་ལོ་རྒྱུས་ཡིག་ཚགས་སུ་ཉར་དགོས་པ་ཧ་ཅང་གལ་ཆེན་པོ་རེད། མི་ཞིག་ལ་མཚོན་ན་རང་ཉིད་ཀྱི་ལུས་པོར་མེ་རུ་བསྒྲོན་ནས་མི་རིགས་འཐབ་རྩོད་ཆེད་དུ་བློས་གཏོང་བྱེད་པ་ནི་མི་བུ་སྤྱིར་བཏང་བ་ཞིག་གིས་བསམ་ཡང་མི་ཕོད་པ་ཞིག་རེད།

དེར་བརྟེན། རྒྱལ་གཅེས་དཔའ་བོ་ཕོ་མོ་དེ་དག་གི་ལོ་རྒྱུས་དང༌། ཁྱིམ་ཚང་གནས་སྟངས་ཁོང་ཚོའི་འདྲ་པར་སོགས་ངེས་པར་དུ་ཞིབ་ཚགས་པོའི་ཐོག་ནས་ཉར་ཚགས་བྱེད་དགོས་པ་གལ་ཆེན་པོ་རེད། མ་འོངས་པར་ཏན་ཏན་འདིའི་སྐོར་ལ་ཆེད་ལས་ཞིབ་འཇུག་མཁན་མང་བོ་འབྱུང་སྲིད། དེ་བཞིན་རང་ལུས་མེ་རུ་བསྒྲོན་མཁན་རྒྱལ་གཅེས་དཔའ་བོ་དཔའ་མོ་ཡང་དཔའ་བོ་ཐུབ་བསྟབ་དངོས་གྲུབ་ནས་ཉེ་ཆར་གྱི་དཔའ་བོ་སྤྲུལ་སྐུ་བསོད་བྷོ་བར་དུ་བརྩིས་ན་ཁྱོན་ རྒྱལ་གཅེས་དཔའ་བོ་བཅུ་བདུན་དང༌། ཡང་རྒྱལ་གཅེས་དཔའ་བོ་བཀྲ་བྷེ་ནས་བརྩིས་ན་བཅུ་དྲུག།

དེ་བཞིན་དཔའ་བོ་བློ་བཟང་ཕུན་ཚོགས་ནས་བརྩིས་ན་བཅོ་ལྔ་བཅས་ཡིན་པའང་ངེས་པར་དུ་བརྗེད་མི་རུང༌། གནས་ཚུལ་འདིའི་སྐོར་ལ་འཇར་མན་གྱི་གསར་འགོད་པ་ཞིག་གིས་ཀྱང་གསན་ཚུལ་ཞིག་སྤེལ་འདུག་ལ་བོད་ཀྱི་བུད་མེད་རྩོམ་པ་བོ་འོད་ཟེར་གྱིས་ཀྱང་བོད་ཀྱི་གཞུང་འབྲེལ་ཡིག་ཆ་ཁ་ཤས་སུ་དཔའ་བོ་བཀྲ་བྷེ་ལགས་ཀྱི་མཚན་འཁོད་མེད་པ་གསལ་བཤད་དང་འབོད་སྐུལ་བྱས་འདུག

ཉེ་ཆར་རྡོར་གདན་དུས་དབང་གི་སྐབས་སུ་ཡང་བཀའ་ཤག་གིས་དཔའ་བོ་དཔའ་མོ་དག་གི་མཚན་བགྲང་སྐབས་ཀྱང་བཀྲ་བྷེ་ལགས་ཀྱི་མཚན་འཁོད་གནང་མི་འདུག ཉེ་ལམ་གྱི་འཐབ་རྩོད་གཞན་གྱི་གསར་ལམ་ཁག་ཏུ་གྲངས་ཀ་ཁག་མཐོ་ནས་མཐོ་རུ་གཏོང་བཞིན་པའི་སྐབས་སུ་ང་ཚོས་རང་ཉིད་ཀྱི་དངོས་ཡོད་གྲངས་ཀ་ཁག་ཉུང་དུ་གཏོང་དགོས་དོན་མི་འདུག་ཨང༌། འདི་དག་ཤོག་ངོས་ཀྱི་མིང་ཚིག་ཁ་ཤས་ཀྱི་མང་ཉུང་ཙམ་མ་ཡིན་པར་མ་འོངས་པར་ལོ་རྒྱུས་དང་འབྲེལ་བའི་གལ་གནད་ཧ་ཅང་ཆེ་བར་མཐོང་ངོ།།

ད་དུང་དེ་ལས་ཀྱང་ཞིབ་ཚགས་སུ་བཏང་ན། རྒྱལ་གཅེས་དཔའ་བོ་དང་དཔའ་མོ་དག་གི་འདས་གསོན་དང་གནས་དུས་འཁོད་པ་འདི། ཆབ་མདོ་ཤེས་རབ་ཀྱི་ངོ་དེབ་ནས་འདིར་འདྲེན་བཀོད་ཞུས་པ་ཡིན།

༢༠༽ ༢༠༡༢།༠༡།༠༨། སྤྲུལ་སྐུ་བསོད་ནམས་དབང་རྒྱལ། འདས། ལོ།༤༢། བོད་མགོ་ལོག

༡༩༽ ༢༠༡༢།༠༡།༠༦། གྲྭ་ཟུར་བསྟན་ཉི། འདས། ལོ།༢༠། བོད་རྔ་བ།

༡༨༽ ༢༠༡༢།༠༡།༠༦། གྲྭ་ཚུལ་ཁྲིམས། འདས། ལོ།༢༠། བོད་རྔ་བ།

༡༧༽ ༢༠༡༡།༡༢།༠༡། གྲྭ་ཟུར་བསྟན་འཛིན་ཕུན་ཚོགས། འདས། ལོ།༤༦། བོད་ཆབ་མདོ།

༡༦༽ ༢༠༡༡།༡༡།༡༠། གྲྭ་བོད་ཕྲུག །གསོན། ལོ།༤༥། བལ་ཡུལ་མཆོད་རྟེན།

༡༥༽ ༢༠༡༡།༡༡།༠༤། ཤེས་རབ་བམ་མིག་དམར། གསོན། ལོ།༢༦། རྒྱ་གར་ལྡི་ལི།

༡༤༽ ༢༠༡༡།༡༡།༠༣། ཨ་ནེ་དཔལ་ལྡན་ཆོས་བཟང༌། འདས། ལོ།༣༥། བོད་དཀར་མཛེས།

༡༣༽ ༢༠༡༡།༡༠།༢༥། གྲྭ་ཟླ་བ་ཚེ་རིང༌། གསོན། ལོ།༣༨། བོད་དཀར་མཛེས།

༡༢༽ ༢༠༡༡།༡༠།༡༧། ཨ་ནེ་བསྟན་འཛིན་དབང་མོ། འདས། ལོ།༢༠། བོད་རྔ་བ།

༡༡༽ ༢༠༡༡།༡༠།༡༥། གྲྭ་ཟུར་ནོར་བུ་དགྲ་འདུལ། འདས། ལོ།༡༩། བོད་རྔ་བ།

༡༠༽ ༢༠༡༡།༡༠།༠༧། གྲྭ་ཟུར་མཁའ་དབྱིངས། འདས། ལོ།༡༨། བོད་རྔ་བ།

༩༽ ༢༠༡༡།༡༠།༠༧། གྲྭ་ཟུར་ཆོས་འཕེལ། འདས། ལོ།༡༩། བོད་རྔ་བ།

༨༽ ༢༠༡༡།༡༠།༠༣། གྲྭ་སྐལ་བཟང་དབང་ཕྱུག །གསོན། ལོ།༡༨། བོད་རྔ་བ།

༧༽ ༢༠༡༡།༠༩།༢༦། གྲྭ་བློ་བཟང་སྐལ་བཟང༌། གསོན། ལོ།༡༩། བོད་རྔ་བ།

༦༽ ༢༠༡༡།༠༩།༢༦། གྲྭ་བློ་བཟང་དཀོན་མཆོག །གསོན། ལོ།༡༨། བོད་རྔ་བ།

༥༽ ༢༠༡༡།༠༨།༡༥། གྲྭ་ཚེ་དབང་ནོར་བུ། འདས། ལོ།༢༩། བོད་དཀར་མཛེས།

༤༽ ༢༠༡༡།༠༣།༡༦། གྲྭ་ཕུན་ཚོགས། འདས། ལོ།༢༡། བོད་རྔ་བ།

༣༽ ༢༠༠༩།༠༢།༢༧། གྲྭ་བཀྲ་བྷེ། གསོན། ལོ།༢༠། བོད་རྔ་བ།

༢༽ ༢༠༠༦།༡༡།༠༣། ལྷག་པ་ཚེ་རིང༌། གསོན། ལོ།༢༣། རྒྱ་གར་བྷིང་ལོ།

༡༽ ༡༩༩༨།༠༤།༢༧། ཐུབ་བསྟན་དངོས་གྲུབ། འདས། ལོ།༦༠། རྒྱ་གར་ལྡི་ལི།

དེ་ནི་རླབས་ཆེན་གྱི་མེ་ལྕེ་ཞིག་རེད།

སྦྲ་རིགས་ཐོགས་མེད༌།

དེ་ནི་མེ་ལྕེ་ཞིག་རེད།

འོན་ཀྱང༌། དེ་ནི་གདུག་རྩུབ་དང་ཧམ་སེམས་ཀྱི་མེ་ལྕེ་ཞིག་གཏན་ནས་མ་རེད།

དེ་ནི་ལྷག་བསམ་དང་སྙིང་སྟོབས་ཟུང་གིས་སྤར་བའི་མེ་ལྕེ་ཞིག་རེད།

དེ་ནི་མི་རིགས་དང་རྒྱལ་ཁབ་ཤིག་གི་ཆེད་དུ་འབར་བའི་མེ་ལྕེ་ཞིག་རེད།

དེ་ནི་རང་དབང་དང་འདྲ་མཉམ་ལ་རྒྱང་འབོད་བྱེད་པའི་མེ་ལྕེ་ཞིག་རེད།

དེ་ནི་རང་དོན་ཡོད་ཚད་བློས་བཏང་བའི་རླབས་ཆེན་གྱི་མེ་ལྕེ་ཞིག་རེད།

དེ་ནི་རིག་གཞུང་ཞིག་གི་རྒུད་པ་སྐྱོབ་པའི་ཕུགས་བསམ་གྱི་མེ་ལྕེ་ཞིག་རེད།

དེ་ནི་ཁྱད་འཕགས་ཀྱི་སྐྱེས་བུ་ཞིག་རང་ཡུལ་དུ་འབོད་པའི་མེ་ལྕེ་ཞིག་རེད།

དེ་ནི་འགྱུར་མེད་ཡིད་ཆེས་ཀྱིས་འཁྱུད་པའི་དད་པའི་མེ་ལྕེ་ཞིག་རེད།

དེ་ནི་ལོ་རྒྱུས་ཀྱི་བདེན་པ་བརྡར་བའི་དཔང་རྟགས་ཀྱི་མེ་ལྕེ་ཞིག་རེད།

དེ་ནི་མེ་ལྕེ་ཞིག་རེད།

འོན་ཀྱང༌། དེ་ནི་སྡར་མ་དང་འུ་ཐུག་པའི་མེ་ལྕེ་ཞིག་གཏན་ནས་མིན།

དེ་ནི་གཞན་གྱི་བཙན་གནོན་ལ་མགོ་བོ་མི་སྒུར་བའི་ཆོད་སེམས་ཀྱི་མེ་ལྕེ་ཞིག་རེད།

དེ་ནི་མ་འོངས་བར་རེ་བཞག་ཆེ་བའི་ཕུགས་བསམ་གྱི་མེ་ལྕེ་ཞིག་རེད།

དེ་ནི་གཞན་དོན་ཁུར་དུ་འཁྱེར་བའི་སྙིང་སྟོབས་ཁོ་ནའི་མེ་ལྕེ་ཞིག་རེད།

དེ་ནི་གཞན་གྱི་སྡུག་བསྔལ་རང་གིས་ལེན་པའི་བྱང་སེམས་ཀྱི་མེ་ལྕེ་ཞིག་རེད།

དེ་ནི་གཞན་གྱི་ནོར་འཁྲུལ་ལ་གསལ་འདེབས་བྱེད་པའི་མེ་ལྕེ་ཞིག་རེད།

དེ་ནི་གང་གིས་ཀྱང་བསྐྲུན་ཏུ་མེད་པའི་བདེན་པའི་མེ་ལྕེ་ཞིག་རེད།

དེ་ནི་སྨྲ་བསམ་བརྗོད་ལས་འདས་པའི་དྭངས་གཙང་གི་མེ་ལྕེ་ཞིག་རེད།

དེ་ནི་འཛམ་གླིང་ལོ་རྒྱུས་ཀྱིས་འབོར་ཐབས་བྲལ་བའི་ཞི་བའི་མེ་ལྕེ་ཞིག་རེད།

དེ་ནི་སྨྲག་རུམ་གྱི་ཁ་གཏད་དུ་འབར་བའི་འོད་སྣང་གི་མེ་ལྕེ་ཞིག་རེད།

དེ་ནི་སྨྲ་བརྗོད་ཁྲི་འབུམ་ཁུར་བའི་གསལ་བཤད་ཀྱི་མེ་ལྕེ་ཞིག་རེད།

དེ་ནི་སྙུག་ཁ་གཅིག་གིས་ནམ་ཡང་བརྗོད་ཐབས་བྲལ་བའི་མེ་ལྕེ་ཞིག་རེད།

༡༢,༠༡,༢༠༡༢ བོད་ཀྱི་རླབས་ཆེན་དཔའ་བོ་ཕོ་མོ་རྣམས་རྗེས་སུ་དྲན་བཞིན་བྲིས།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:



བརྗོད་གཞི་གཞན་ཁག་ལ་གཟིགས།