སྙན་རྩོམ་ཚན་པ་འགའ།

མཐའ་མའི་བསྐྱར་བཅོས། (༣༠༡༩༩༩༠༨༠༠) འབྲི་མཁན། བེ་རི་འཇིགས་མེད་དབང་རྒྱལ། ༡༡༢༠༠༩༢༡༣༤

ཁྱི་རྒན། 

ཁ་རྩང༌།

ཁྱོད་ཀྱིས་མགོ་ཐོག་ལ་རྭ་ཅོ་བཙུགས་ནས་འགྲོ་དུས།

ཀུན་གྱིས་ཁྱོད་རང་ཤ་བ་རེད་ཅེས་གླེང༌།

དེ་རིང༌།

ཁྱོད་ཀྱིས་རྐུབ་ཤ་ལ་རྩམ་སྐྱ་བྱུགས་ནས་འགྲོ་དུས།

ཀུན་གྱིས་ཁྱོད་རང་དགོ་བ་རེད་ཅེས་གླེང༌།

སང་ཉིན།

ཁྱོད་ཀྱིས་རྔ་མ་ཕྲ་བོ་དེ་སྒྱིད་ཁུག་ལ་སྦས་ནས་འགྲོ་དུས།

ཀུན་གྱིས་ཁྱོད་རང་ཁྱི་རྒན་ཞིག་ཡིན་པ་ར་ཕྲོད།

༢༠༠0།༢།༢།བྲིས།

ཁྱོད་དང་ང༌།

ན་ནིང༌།

ཁྱོད་ཀྱིས་ངའི་མགོ་ཐོག་ལ།

རྐང་པ་བརྫིས་ནས་ཕེབས་སོང༌།

ད་ལོ།

ཁྱོད་ཀྱིས་ངའི་སྒལ་པ་ལ།

གཅིན་སྐྱག་བཏང་ནས་ཆས་སོང༌།

སང་གནངས།

ཁྱོད་ཀྱིས་ངའི་རྐུབ་ཤ་ལ།

ལྕེ་བལྡགས་བྱས་ནས་རྒྱུགས་ཤིག

གསོན་ཤུགས་མེད་པའི་སྙིང༌།

ཉི་འོད་ལ་དུང་ནས་མཁའ་དབྱིངས་ལ་རྒྱང་བལྟས་བྱས།

ཉི་འོད་་༌།

སྤྲིན་གསེབ་ནས་ཤར་ཞིང་སྤྲིན་གསེབ་ནས་ཡིབ།

སྙིང་ཁོང་གི་ཚ་རླབས་དང་རེ་སྒུག་གི་མེ་ལྕེ་འདྲེས།

རང་བྱུང་གི་འཕོ་འགྱུར་འདི་སྐྱེ་དངོས་མིན་པའི་བུད་ཤིང་ཞིག

སྙིང་ཁམས་ཀྱི་གསོན་ཤུགས་ཡོད་ཚད་མེ་ལ་ཐིམ།

ཟླ་འོད་ལ་དུང་ནས་མཚན་མོ་ལ་རེ་སྒུག་བྱས།

ཟླ་འོད་་༌།

ཡར་ངོའི་འཕེལ་ཁ་དང་མར་ངོའི་གྲིབ་ཁའི་བར་ནས་ནུབ་ཕྱོགས་སུ་ལྷུང༌།

སྙིང་ཁོང་གི་གྲང་རླབས་དང་འཆར་ཡན་གྱི་ཆུ་འཁྱག་འདྲེས།

རང་བྱུང་གི་ཆོ་འཕྲུལ་འདི་འབྱུང་བ་མིན་པའི་འཁྱག་རོམ་ཞིག

སྙིང་ཁམས་ཀྱི་གསོན་ཤུགས་ཡོད་ཚད་ཆུ་ལ་ཐིམ།

ཁྱོད་རང་ལ་དུང་ནས་ཁྲོམ་གསེབ་ལ་རྒྱང་བལྟས་བྱས།

ཁྱོད་རང་་་༌།

མི་ཚོགས་གསེབ་ནས་ཡིབས་ཏེ་མི་ཚོགས་གསེབ་ཏུ་བརླགས།

སྙིང་ཁོང་གི་བརྩེ་མདངས་དང་རེ་ཞགས་ཀྱི་སྟོང་མདང་འདྲེས།

སེམས་ངོགས་ནས་འཕྱུར་བའི་འཚུབ་མ་འདི་རང་བྱུང་མིན་པའི་རླུང་ཡན་ཞིག

སྙིང་ཁམས་ཀྱི་གསོན་ཤུགས་ཡོད་ཚད་རླུང་ལ་ཐིམ།

ཆང་དང་ལས་དབང༌།

ཆང་ཁང་དུ་འགྲིམས་འདོད་མེད་ཀྱང༌།

ཆང་མའི་ཟུར་མིག་དེ་བཙན་དྲགས་སོང༌།

ཆང་གིས་བཟི་འདོད་མེད་ཀྱང༌།

ཆང་ཕབ་ཀྱི་ནུས་ཤུགས་དེ་ཆེ་དྲགས་སོང༌།

སླུ་བྲིད་ལ་དགའ་མཁན་སུ་ཡང་མེད་ཀྱང༌།

སླུ་བྲིད་དང་མི་འགྲོགས་མཁན་སུ་ཡང་མེད།

ང་ལྐུགས་དྲགས་པ་དེ་སླུ་བྲིད་ཡིན་ལ།

ཁྱོད་སྤྱང་དྲགས་པ་དེའང་སླུ་བྲིད་ཡིན།

ཁ་བ་དང་ཚ་བ་ལ་ཁྱད་པར་ཡོད་ན།

རང་ཡུལ་དང་མི་ཡུལ་ལ་ཁྱད་པར་ལོས་ཡོད།

ང་ཚོའི་བེམ་གཟུགས་འདི་སླུ་བྲིད་འོག་ཡོད་ཀྱང༌།

ཁ་བ་དང་ཚ་བའི་རེག་བྱ་ཤེས་དགོས།

ཀྱེ་གྲོགས་པོ་ལགས།

ཁྱོད་ཀྱིས་ལས་དབང་དང་སླུ་བྲིད་ཀྱི་སྡོམ་ཚིག་ཨེ་ཤེས།

རང་ཡུལ་དང་མི་ཡུལ་གྱི་མཚན་ཉིད་ཨེ་མཁྱེན།

སྤྱང་དྲགས་ནས་རྒྱ་དང་ཆིངས་ཡིག་བཞག།

ལྐུགས་དྲགས་ནས་མི་ཚེ་མི་ཡུལ་སྐྱེལ།

ཀྱེ་གྲོགས་པོ་ལགས།

ད་དུང་འཐུངས་ཤིག

ར་བཟི་བའི་མིག་ལམ་ན་མཛེས་མའི་ཞིང་ཁམས་ཡོད།

ར་བཟི་བའི་སེམས་ཁམས་ན་དག་ཞིང་གི་འཇིག་རྟེན་ཡོད།

ར་བཟི་བ་འདི་ཁྱོད་དང་ང་ཡི་ལས་དབང་ཡིན།

ར་བཟི་བ་ནི་མི་ཡུལ་གྱི་འཇིག་རྟེན་ཉུལ་བའི་རམ་འདེགས་ཀྱང་ཡིན།

ལྡི་ལི་པོ་ཏཱ་ལའི་མགྲོན་ཁང་དུ། སྤྱི་ལོ་༢༠༠༡

ཟླ་༥ ཚེས་༢༦ ལ་བྲིས།

ང་བཟི་མེད།

འཇིག་རྟེན་གྱི་གྲུ་ག་ཡོངས་རྫོགས་ཆང་གིས་གང་འདུག

ངའི་རྐང་འོག་གི་ལམ་སྣེ་དེ་ཡང་ཆང་ཁང་ལ་ཟུག་འདུག

མ་གཞི་ང་རང་ཆང་གི་ཞིང་ཁམས་ལ་སླེབས་པ་འདྲ།

ཆང་རྒྱག་རྒད་པོ་ཚོས་ང་ལ་མིག་བརྡ་འཕེན།

ཁོང་ཚོས་ཆང་རག་ནི་སྐྱེས་པ་ཕོ་ཡི་ཚེ་སྲོག་ཡིན་ཟེར།

ཆང་མ་ཚོས་ང་ལ་ཟུར་མིག་བལྟས།

ཁོ་མོ་ཚོས། ཆང་རག་ནི་མཛེས་མ་འགུགས་པའི་ལྕགས་ཀྱུ་ཡིན་ཟེར།

ཚེ་སྲོག་དང་ལྕགས་ཀྱུ་ལ་རེག་མ་མྱོང་བའི་ང༌།

ང་ཡང་སྙིང་འཇིག་རྟེན་འདིར་འཚོ་དགོས་དོན་གང་ཡིན་ནམ།

ཚེ་སྲོག་ལ་རིན་ཐང་མེད་ན།

འཇིག་རྟེན་འདིར་འཚོ་དགོས་དོན་གང༌།

མཛེས་མ་ལ་རིན་ཐང་མེད་ན།

ལྕགས་ཀྱུ་ལ་ཞེན་ཆགས་དགོས་དོན་གང༌།

ཆང་རྒྱགས་ཚོས་ང་ལ་ཁྲེལ་དགོད་བྱས་བྱུང༌།

ཆང་མ་ཚོས། ང་ལ་སྐྱེས་པ་ཕོ་ཡི་རིན་ཐང་མི་འདུག་ཟེར།

གང་ལྟར། རིན་ཐང་མེད་པ་དེ་ངའི་རིན་ཐང་ཡིན།

ཆང་མ་ཚོ།

ང་ད་དུང་བཟི་མེད།

ང་ད་དུང་ཆང་གིས་བཟི་མེད།

༢༠༠༡།༥།༢༦ པོ་ཏཱ་ལའི་མགྲོན་ཁང་དུ་བྲིས།