རྒྱུ་དག་མེད་པའི་སྤྱི་འཐུས། བོད་མི་མང་ལ་སེམས་གསོ་བྱ་རྒྱུ་ཡིན།

གཞུང་འབྲེལ་ལས་འགུལ་གྱི་སྔ་རྗེས་དྲན་དྲན་དུ་ཡོད་ཐོག ཚེས་༢༩ ཉིན་གཞི་ནས་སེ་ར་ཆོས་སྒར་དུ་འབྱོར་ཏེ་དེ་མ་ཐག་རྩིས་འཕྲུལ་ལ་ལག་པ་འཆང་བ་ཡིན། གཞུང་འབྲེལ་ལས་འགུལ་འདིའི་རྒྱབ་མདུན་གླེང་བ་ནི་རི་རབ་སྟོང་གིས་གནོན་མི་ཐུབ་པའི་ཚོར་སྣང་དང་གཏམ་ཚོགས་ཤིག་གདའ། སྤྱིའི་ཆ་ནས་ད་རེས་བཀའ་སྤྱི་མཉམ་རུབ་ཀྱི་གཞུང་འབྲེལ་ལས་འགུལ་དེ་ཧ་ལས་པའི་ཡག་པོ་བྱུང་ཡང༌། སྐབས་དེར་ལཱི་བྷི་ཡཱ་རྒྱལ་ཁབ་ཀྱི་འགོ་གཙོ་དྲག་གཉེར་བ་གྷ་ཌཱ་ཧྤི་བསད་པའི་རོ་ལམ་དེ་ནས་བོད་ཀྱི་གསར་འགྱུར་ལ་བར་ཆད་ཕོག་པ་རེད། འོན་ཀྱང་བསམ་ཐོག་ཏུ་འབྱོར་བ་དང་གནད་དུ་འཁེལ་བ། ལྷིང་འཇགས་ལྡན་པ་སྟེ། བསམ་གནད་ལྷིང་གསུམ་གྱི་གཞུང་འབྲེལ་བོད་དོན་ལས་འགུལ་ཆེན་མོར། བོད་པའི་ཁྱིམ་ཚང་ནས་འཚར་བསྐྱེད་བྱུང་བའི་སྤྱི་འཐུས་བདུན་གྱི་སྣང་ཆུང་བཏང་བའི་སྐོར་བོད་མི་མང་ལ་སེམས་གསོ་བྱ་རྒྱུ་ཡིན། རྣོ་པོ་དང་ཐིག་པོ། གཟིར་བ་སྟེ། རྣོ་ཐིག་གཟིར་གསུམ་ལྡན་པའི་སྲིད་བྱུས་ཀྱི་མཚོན་ཁ་ནང་དུ་བསྐོར་ཏེ་གྲིབ་མའི་འོག་ནས་ཉི་དྲོད་རག་ཐབས་བྱས་པའི་སྤྱི་འཐུས་རྣམས་ངེས་པར་དུ་ངོ་ཤེས་དགོས་ལ། ཁོང་ཚོས་རྐུབ་སྟེགས་སྲུང་ཆེད་དུ་མགྲིན་པ་ཡན་ཆད་ཀྱི་སྐད་ཆ་ལ་ངེས་པར་དུ་དོ་སྣང་དང་དོགས་ཟོན་བྱ་དགོས།

ཁྲམ་པ་དེ་དག་གིས་བསླུ་བྲིད་དང་རྣམ་འགྱུར། གྲུ་མོ་ཡན་ཆད་ཀྱི་ལག་གཡུག་བྱེད་སྲིད་ཀྱང་ནམ་ཡང་མགོ་བོ་འཁོར་མི་རུང༌། ཕ་མ་ཤི་ཡང་མྱ་ངན་མེད་པའི་བུ་རྒྱུད་ནི་གཉེན་ཉེ་ཙམ་མ་ཟད། སྡེ་མི་སེར་གྱིས་ཀྱང་མཐོང་འདོད་ཡོད་པ་མ་རེད། མི་རིགས་དང་དཔའ་བོར་དུངས་སེམས་མེད་པའི་སྤྱི་འཐུས་ལ་བོད་མི་རྒན་གཞོན་བར་གསུམ་གྱི་སེམས་ཐག་རིང་པོ་ཡོད་པ་སྨྲོས་མེད་དང༌། གནས་ཚུལ་ལ་བརྟེན་ནས་ཡག་ཉེས་འགྲེལ་བཤད་བྱེད་པ་མ་གཏོགས་གདོང་རིས་ལ་བརྟེན་ནས་ལྕི་ཡང་འབྱེད་པ་ནི་སྔ་ས་ནས་ཞེན་པ་ལོག་ཟིན་པ་ཡིན། དེར་བརྟེན་རྒོལ་འཐབ་ར་བའི་རྩ་འཛུགས་འདིའང་འཆར་གཞིའི་སྐྱ་ཐིག་མ་དེད་པར་བསམ་གནད་ལྷིང་གསུམ་གྱི་གདུང་སེམས་མཉམ་བསྐྱེད་ལ་གཡོལ་ཐབས་བྱས་པ་འདི་ཁོ་ནའི་གནད་དོན་ལ་ཐུག་ཡོད།

སྐབས་དེའི་སྤྱི་འཐུས་ཀྱི་ལས་བགོས་ཁག་ལ་གཟིགས་དང༌། སྡེ་ཚན་དང་པོ། ཚོགས་གཙོ་སྦྲེལ་པོས་སྣེ་ཁྲིད་པའི་གཞུང་ཚབ་དང་རྒྱ་གར་དཔོན་རིགས་ཁག་ལ་མཇལ་འཕྲད་གནང་མཁན་ཀ་སྡེའི་ཚོགས་ཆུང་ནང༌། ཚོགས་གཙོ་སྤེན་པ་ཚེ་རིང་མཆོག་གིས་དབུ་ཁྲིད་པའི་སྤྱི་འཐུས་སྒྲོལ་མ་ཚེ་རིང་དང༌། སྤྱི་འཐུས་ཟླ་བ་ཕུན་སྐྱིད། སྤྱི་འཐུས་མཁྱེན་རབ་རྒྱ་མཚོ། སྤྱི་འཐུས་སྨོན་ལམ་མཐར་ཕྱིན། ཁ་སྡེའི་ཚོགས་ཆུང་ནང༌། ཚོགས་གཞོན་བསོད་ནམས་བསྟན་འཕེལ་མཆོག་གིས་དབུ་ཁྲིད་པའི་སྤྱི་འཐུས་ཀརྨ་ཆོས་འཕེལ་དང༌། སྤྱི་འཐུས་ཨ་ཀྲུག་ཚེ་བརྟན། སྤྱི་འཐུས་དབྱངས་ཅན་སྒྲོན་དཀར། སྡེ་ཚན་གཉིས་པ། རྒྱ་གར་དཔོན་རིགས་ཁག་ལ་མཇལ་བཅར་གོ་སྒྲིག་ཚོགས་ཆུང༌། འགན་འཁུར་བ་སྤྱི་འཐུས་ཡེ་ཤེས་ཕུན་ཚོགས་དང༌། སྤྱི་འཐུས་ཡེ་ཤེས་སྒྲོལ་མ། སྤྱི་འཐུས་བསོད་ནམས་རྒྱལ་མཚན། སྡེ་ཚན་གསུམ་པ། ལས་འགུལ་སྤེལ་ཡུལ་དང་འབྲེལ་བའི་གོ་སྒྲི་ཚོགས་ཆུང༌། འགན་འཁུར་བ་སྤྱི་འཐུས་ཆོས་སྐྱོང་དབང་ཕྱུག་དང༌། སྤྱི་འཐུས་ཚུལ་ཁྲིམས་བསྟན་འཛིན། སྤྱི་འཐུས་རྒྱ་རི་བུ་ཕྲུག། སྤྱི་འཐུས་རོང་པོ་བློ་བཟང་སྙན་གྲགས། སྤྱི་འཐུས་ཆོས་གྲགས་རྒྱ་མཚོ། སྤྱི་འཐུས་བསྟན་འཛིན་ཟླ་སྒྲོན། སྤྱི་འཐུས་སྒྲོལ་དཀར་སྐྱབས། སྤྱི་འཐུས་འཇམ་དབྱངས་བཟོད་པ། སྡེ་ཚན་བཞི་པ། དངུལ་རྩིས་བདག་གཉེར་དང་བཞུགས་གནས་ཞལ་ལག་བཅས་ཀྱི་གོ་སྒྲིག་ཚོགས་ཆུང༌། འགན་འཁུར་བ་སྤྱི་འཐུས་ཀརྨ་ཡེ་ཤེས་དང༌། སྤྱི་འཐུས་ཟླ་བ་ཚེ་རིང༌། སྤྱི་འཐུས་སྒྲོན་དཀར་ལྷ་མོ། སྤྱི་འཐུས་རྒྱ་རིགས་ཐར། སྤྱི་འཐུས་སྐལ་བཟང་དགྲ་འདུལ། སྤྱི་འཐུས་ཚེ་རིང་གཡུ་སྒྲོན། སྤྱི་འཐུས་འཇིགས་མེད་འབྱུང་གནས། སྡེ་ཚན་ལྔ་པ། གསར་འགོད་འབྲེལ་མཐུད་ཚོགས་ཆུང༌། འགན་འཁུར་བ་སྤྱི་འཐུས་དབུ་དཀར་གཡུ་སྒྲོན། སྤྱི་འཐུས་ཐུབ་བསྟན་ལུང་རིགས། སྤྱི་འཐུས་སྐལ་བཟང་རྒྱལ་མཚན། སྤྱི་འཐུས་བུ་མོ་ཚེ་རིང༌། སྡེ་ཚན་དྲུག་པ། གནས་ཚུལ་མཁོ་སྒྲུབ་ཚོགས་ཆུང༌། འགན་འཁུར་བ་སྤྱི་འཐུས་རྨོག་རུ་བསྟན་པ། སྤྱི་འཐུས་གསེར་རྟ་ཚུལ་ཁྲིམས། སྡེ་ཚན་བདུན་པ། ཡིག་ཆ་དང་འཕྲེད་དར་གོ་སྒྲིག་ཚོགས་ཆུང༌། འགན་འཁུར་བ་སྤྱི་འཐུས་པདྨ་འབྱུང་གནས། སྤྱི་འཐུས་ནོར་བུ་ཚེ་རིང་བཅས་དངོས་སུ་ལས་བགོས་བརྒྱབ་པའི་ནང་སྤྱི་འཐུས་སུམ་ཅུ་སོ་ལྔ་ཡོད་ཀྱང་དེའི་ནང་ནས། དགེ་ལུགས་སྤྱི་འཐུས་རོང་པོ་བློ་བཟང་སྙན་གྲགས་དང༌། མདོ་སྟོད་སྤྱི་འཐུས་ཚུལ་ཁྲིམས་བསྟན་འཛིན་གཉིས་ལྡི་ལིར་གདུང་སེམས་མཉམ་བསྐྱེད་ཀྱི་ལས་འགུལ་ནང་ཡོང་མེད་པ་རེད།

ཡུ་རོབ་སོགས་ཕྱི་རྒྱལ་ཁག་གི་སྤྱི་འཐུས་རྣམས་ཕྱོགས་སོ་སོར་འགན་འཁུར་ལེན་རྒྱུ་ལས་དངོས་སུ་ལྡི་ལིར་ཕེབས་མི་དགོས་པའི་བཀའ་མོལ་སྤྱི་འཐུས་ལྷན་ཚོགས་སུ་སྔ་ས་ནས་བྱུང་ཡོད་འདུག་ལ། ཡུ་རོབ་སོགས་ཀྱི་སྤྱི་འཐུས་བཞི་ཕུད། མདོ་སྟོད་སྤྱི་འཐུས་གཡུང་དྲུང་རྒྱལ་མཚན་དང༌། མདོ་སྟོད་སྤྱི་འཐུས་དཀོན་མཆོག་ཆོས་སྒྲོན། བཀའ་བརྒྱུད་སྤྱི་འཐུས་བསྟན་པ་ཡར་འཕེལ། མདོ་སྟོད་སྤྱི་འཐུས་གངས་ལྷ་མོ། བོན་པོའི་སྤྱི་འཐུས་རྣམ་དག་ཙུག་ཕུད། བཅས་སྤྱི་འཐུས་ལྔ་གཞུང་འབྲེལ་ལས་འགུལ་གྱི་སྤྱི་འཐུས་ལས་བགོས་ནང་ཚུད་མེད་པ་མ་ཟད། ལྡི་ལིར་གདུང་སེམས་མཉམ་སྐྱེད་ཀྱི་མི་མང་ལས་འགུལ་ནང་དུའང་ཞུགས་མེད། དབུང་གཙང་སྤྱི་འཐུས་སྒྲོལ་མ་ཚེ་རིང་གིས་ལྡི་ལིར་ཚོགས་གཙོ་སྤེན་པ་ཚེ་རིང་མཆོག་ལ་དགོངས་པ་ཞུས་པའི་ལན་དུ། ད་ཐེངས་དགོངས་པ་ཞུ་ངེས་ཀྱིས་ཞུ་ཆོག་ཆོག་དང་གནང་ངེས་ཀྱིས་གནང་ཆོག་ཆོག་ཡོད་མ་རེད། ཅེས་གསུང་ལན་སྐྱོན་སྟངས་ལ་གཞིགས་ན། སྐབས་འདིའི་གཞུང་འབྲེལ་ལས་འགུལ་ལ་དགོངས་ཞུ་གཏོང་ས་མེད་པ་འདྲ། དེས་ན་གོང་ཞུའི་སྤྱི་འཐུས་ལྔ་པོ་སྤྱི་འཐུས་ལས་བགོས་རེའུ་མིག་ནང་ག་རེ་བྱས་ནས་མ་ཚུད་པ་རེད། ཅེས་པའི་དྲི་བ་དེ་རང་བཞིན་གྱིས་སླེབས་སོང༌།

ཕྱོགས་བཞུགས་སྤྱི་འཐུས་རྣམས། ལས་འགུལ་ནང་དུས་ཐོག་མཉམ་ཞུགས་དགོས་པའི་བརྡ་ཐོ་བཏང་ཡང། ང་རྩ་བ་ནས་ཡོང་ཐུབ་ས་མ་རེད་ཅེས་ཐད་ཀར་ལན་འདེབས་བྱེད་མཁན་གྱི་སྤྱི་འཐུས་རེ་གཉིས་ཡོད་པ་ཚོགས་གཙོ་སྦྲེལ་པོས་མ་མཁྱེན་པ་ཡོང་མི་ཤེས། ལས་བགོས་ཀྱི་རེའུ་མིག་ནང་ཚུད་མིན་ལ་མ་ལྟོས་པར། སྒེར་གྱི་ལས་དོན་ཆེ་རུང་ཆུང་རུང༌། སྒོ་འགྲམ་གྱི་ལས་འགུལ་དུ་མཉམ་ཞུགས་བྱས་མིན་ཇི་ལྟར་ཡང།  ལས་འགུལ་ནང་འདུག་ཟེར་བ་ཙམ་གྱིས་གཞུང་འབྲེལ་གྱི་ཛ་དྲག་གདུང་སེམས་མཉམ་སྐྱེད་ལ་ཁུར་མཉམ་ལེན་མ་བྱས་པའི་ནག་ཉེས་བསུབ་མི་ཐུབ། སྒོ་འགྲམ་གྱི་ལས་འགུལ་ནང་མཉམ་ཞུགས་བྱས་པར་ཐུགས་རྗེ་ཆེ་ཞུ་མི་ཐུབ་ཀྱང་གདོང་པ་བཀབ་ནས་བསྡད་པའི་སྤྱི་འཐུས་གསུམ་དང་གཏན་ནས་མི་འདྲ། དཔེར་ན། མདོ་སྟོད་སྤྱི་འཐུས་གངས་ལྷ་མོ་ལྟབུ་རྐང་པ་ཆག་ནས་རང་རྐྱང་གིས་འགྲོ་མི་ཐུབ་པར་གྱུར་ཡོད་ཀྱང་འཁར་རྒྱུག་ཐོགས་ཏེ་བཞུགས་སྒར་གྱི་གཞུང་འབྲེལ་ཟས་བཅད་ལས་འགུལ་ནང་མཉམ་ཞུགས་གནང་སྟེ། གཞུང་སྒེར་གཉིས་ཀའི་མང་ཚོགས་ཀྱིས་ཡིད་མོས་ཆེན་པོ་བྱས་ཡོད་པ་རེད།

མདོ་སྟོད་སྤྱི་འཐུས་དཀོན་མཆོག་ཆོས་སྒྲོན་དང༌། མདོ་སྟོད་སྤྱི་འཐུས་ཚུལ་ཁྲིམས་བསྟན་འཛིན། མདོ་སྟོད་སྤྱི་འཐུས་གཡུང་དྲུང་རྒྱལ་མཚན། དགེ་ལུགས་སྤྱི་འཐུས་རོང་པོ་བློ་བཟང་སྙན་གྲགས། བཀའ་བརྒྱུད་སྤྱི་འཐུས་བསྟན་པ་ཡར་འཕེལ། མདོ་སྟོད་སྤྱི་འཐུས་གངས་ལྷ་མོ། བོན་པོའི་སྤྱི་འཐུས་རྣམ་དག་ཙུག་ཕུད་བཅས་ཀྱི་སྤྱི་འཐུས་བདུན། བཀའ་སྤྱིའི་ཐོག་མའི་འཆར་གཞི་ལྟར་ལྡི་ལིར་གཞུང་འབྲེལ་གདུང་སེམས་མཉམ་བསྐྱེད་ཀྱི་ལས་འགུལ་ནང་མཉམ་ཞུགས་བྱས་མེད་པ་མ་ཟད། དེའི་ཁྲོད་ནས་སྤྱི་འཐུས་མང་པོ་ཞིག་གིས་ཕྱོགས་སོ་སོའི་ལས་འགུལ་ནང༌། མཉམ་ཞུགས་བྱས་མ་སོང་ཞེས་ཁ་བརྡུང་མ་ཕོག་པའི་ཐབས་ཤེས་འཐེན་རུང༌། དེའི་ནང་ནས་མདོ་སྟོད་སྤྱི་འཐུས་དཀོན་མཆོག་ཆོས་སྒྲོན་དང༌། མདོ་སྟོད་སྤྱི་འཐུས་གཡུང་དྲུང་རྒྱལ་མཚན། བཀའ་བརྒྱུད་སྤྱི་འཐུས་བསྟན་པ་ཡར་འཕེལ་གསུམ་གྱིས་བོད་ཀྱི་རྒྱལ་གཅེས་དཔའ་བོའི་རླབས་ཆེན་གྱི་སྡོང་པོ་མང་པོ་ས་འགྱེལ་ཡང་འགྱོད་པ་བྱས་པའི་མངོན་རྟགས་གསལ་པོ་མེད་པས་མ་ཚད། གདོང་བཀབ་ནས་གཡོལ་ཐབས་བྱས་པ་རེད།

ནག་ཉེས་ཅན་གྱི་སྤྱི་འཐུས་འདི་དག་གི་ནང་མདོ་སྟོད་སྤྱི་འཐུས་ཀྱིས་བརྒྱ་ཆ་མཐོ་པོ་ཟིན་པ་དང་ཕྲན་རང་ཉིད་ཀྱང་མདོ་སྟོད་པ་ཞིག་ཡིན་པའི་ཆ་ནས་སྐད་ཆ་འདི་བཤད་ན་འཚམས་པོ་འདུག་ལ། མདོ་སྟོད་མང་ཚོགས་ཀྱིས་ཁ་གྲག་རན་པ་རེད། བོད་ནང་གི་མདོ་སྟོད་སྨད་ཀྱི་རྒྱལ་གཅེས་དཔའ་བོ་ཚོའི་མཛད་རྗེས་ལ་མདོ་སྟོད་སྨད་ཀྱི་སྤྱི་འཐུས་ཚོས་འགན་འཁུར་ཇི་ཙམ་ཡོད་མེད་ཀྱི་དྲི་བ་དེའང་ཉིན་རེ་ནས་ཉིན་རེར་ཁ་གྲངས་ཇེ་མང་དང་རྣམ་པ་ཇེ་ཆེར་གྱུར་ཡོད། གནད་དོན་འདི་རྗེས་མའི་གྲོགས་ཚོགས་ནང་གླེང་སློང་ངེས་པར་དུ་བྱེད་དགོས་པ་དང༌། གལ་སྲིད་སྣང་མེད་དུ་བཞག་ན་མ་འོངས་པར་སྤྱོད་ངན་ངོམ་འཕྱར་བྱེད་པའི་ནག་རིས་ཁྱི་ལ་འཛུམ་དྲུག་རྒྱས་སྲིད་དེ། འབྱུང་འགྱུར་བོད་ཀྱི་གཞུང་འབྲེལ་ལས་འགུལ་གྱི་འགག་རྡོ་ཆེན་པོ་ཞིག་ཏུ་འགྱུར་ཉེན་ཆེ་བས། དེ་ཡང་དགྲ་དགའ་གཉེན་སྡུག་གི་ལས་ཀ་གཉིས་པ་ཞིག་མ་རེད་པས།  ཁོང་ཚོས་གྲོས་ཚོགས་ཀྱི་ཞབས་བཀྱག་ཐོག་ནས་བོད་མི་མང་གི་མིག་ཆུ་ལ་ཆར་པ་ཆུ་གྲོགས་ལྟབུ་བྱས་པ་ནི། སོས་ཐབས་མེད་པའི་རྨ་ཁ་ཞིག་དང་འཇགས་ཐབས་མེད་པའི་སྙིང་ནད་ཅིག་ཅི་ལ་མིན།

ལྷག་པར་ད་རེས་ཀྱི་ཁོ་ཚོས་བྱེད་སྟངས་འདིས་སྐབས་བཅུ་བཞི་པའི་སྤྱི་འཐུས་ལོ་ལྔའི་རིང་གི་ངོ་དོན་མི་མཚུངས་པའི་ལས་ཀ་དེ་ཚོ། སྐབས་བཅོ་ལྔ་པའི་སྤྱི་འཐུས་ཀྱི་རྐུབ་བཀྱག་མིག་ལམ་དུ་འཁོར་བའི་ལས་ཀ་རྐྱང་རྐྱང་ཡིན་པ་དང༌། སྐབས་འདིའི་སྤྱི་འཐུས་ཀྱི་འོས་བསྡུའི་ལས་རིམ་ཁྲོད་ནས་ཀྱང་ཁྱབ་ཁོངས་མི་མང་རྣམས་དངུལ་དང་ཀླད་པ་གཉིས་ཀས་བསླུ་ཁྲིད་བྱས་ཡོད་པའི་རྟགས་མཚན་གསལ་པོ་བསྟན་པ་རེད། མི་མང་གི་ངོས་ནས་བརྒྱ་བདམས་སྟོང་བསྒྲུགས་བྱས་པ་དང༌། དགྲ་ཡིས་བརྩམས་པའི་བྱུས་ངན་གྱི་རྩ་བ་གཉེན་ལ་ཐུག་པའི་དབང་དུ་བཏང་ཡང་ཧ་ལས་ཧོན་འཐོར་བ་དང༌། རྦད་དེ་སེམས་ཤུགས་ཆགས་དགོས་པའི་གནས་ལུགས་ཤིག་ཡིན་མི་སྲིད། ཅི་སྟེ་སྟག་དམར་ཡག་འདྲ་བའི་སྣེ་འཛིན་པ་ཞིག་ཡིན་པའི་འགྲེལ་བཤད་བརྒྱབ་ཀྱང༌། ངོ་གདོང་ལ་ཁྱི་སྤུ་ཟུག་པའི་རྣམ་བཤད་གཉིས་ནམ་ཡང་དོ་མི་མཉམ། གང་ལྟར་གནད་དོན་འདི་བརྒྱལ་བའི་སྒང་ལ་རྡོག་བརྫིས་དང་མུ་གེའི་ཐོག་ཏུ་ཟླ་ལྷག་ཅིག་ཆགས་པ་ནི་གསལ་པོ་བཟོ་མི་དགོས་པའི་གནས་སྟངས་ཤིག་ཡིན།

སྤྱི་འཐུས་འགའ་ཞིག་གིས་ལྡི་ལིར་གཞུང་འབྲེལ་ལས་འགུལ་ནང་མཉམ་ཞུགས་བྱས་པ་ཡིན་ན། སོ་སོའི་རྣམ་དཔྱོད་སྟོན་སའི་གོ་སྐབས་མི་རག་གི་ཟེར། ཕྱོགས་སོ་སོར་ཨུ་ཚུགས་ཀྱིས་ཕེབས་ཏེ་ལས་འགུལ་ནང་མཉམ་ཞུགས་ཀྱི་རྣམ་པ་ཙམ་བསྟན་པ་ནི། སྐབས་རྗེས་མའི་སྤྱི་འཐུས་ཀྱི་སྡིངས་ཆར་གོམ་གང་ཉེ་རུ་གཏོང་བའི་དམིགས་ཡུལ་བཅངས་པ་ཁོ་ན་ལས་མ་འདས། ཟེར་བའི་སྐད་ཆ་ཞིག་སྤྱི་ཚོགས་ནང་ཁྱབ་བཞིན་ཡོད་པ་རེད། བློ་ཉེ་སྤྱི་འཐུས་ཤིག་གིས། ཞེ་ཐག་པ་ནས་སྣང་བ་འགྲོ་ཡི་ཡོད་མེད་གང་ལྟར་མི་མང་ས་ལ་རྣམ་འགྱུར་དང་འབྲེལ་བ་ཡག་པོ་འཇོག་དགོས་པ་དེ་ཧ་ལས་པའི་གལ་ཆེན་པོ་རེད། ལྟོས་དང་དཔེ་ལྟ་ས་མང་པོ་ཡོད་པ་རེད་ཅེས་ནན་ཏན་བྱས་ནས་བཤད་མྱོང༌། ད་རེས་ཀྱི་ལས་འགུལ་སྐབས་ཚིག་དུམ་དེའི་ནང་དོན་གཞི་ནས་བསམ་བློའི་ནང་ལྷང་ངེར་བུད་སོང༌།

དངོས་སུ་ལས་འགུལ་ནང་མཉམ་ཞུགས་གནང་བའི་སྤྱི་འཐུས་སུམ་ཅུ་སོ་གསུམ་གྱིས། སྐབས་དེའི་སྤྱི་དོན་མཛད་འཕྲིན་དང་མཛད་ཁུར་ལ་མང་ཚོགས་ཀྱི་སྙིང་ནས་བསྔགས་བརྗོད་དང་ཡི་རངས་ཐོབ་ཡོད། ཁོང་ཚོས་འགན་འཁུར་ཇི་ཙམ་བླངས་པ་ང་ཚོ་དང་ལས་འགུལ་ནང་མཉམ་ཞུགས་བྱས་པའི་གཞི་རིམ་མང་ཚོགས་ཡན་ཆད་ཀྱིས་གསལ་པོ་མཐོང་ཡོད་པ་རེད། ལྷག་པར་དུ་མདོ་སྟོད་སྤྱི་འཐུས་ཆོས་སྐྱོང་དབང་ཕྱུག་ལགས་དང་དབུས་གཙང་སྤྱི་འཐུས་ཡེ་ཤེས་ཕུན་ཚོགས་ལགས་རྣམ་གཉིས་ཀྱིས་བོད་སྐད་དང་དབྱིན་སྐད། ཧིན་སྐད་གསུམ་གྱི་ཐོག་དམིགས་བསལ་ཁྱད་ཆོས་དང་རྣམ་དཔྱོད་བསྟན་ནས། གཏམ་བཤད་སྡིངས་ཆའི་ཐོག་མི་རབས་གསར་རྙིང་གཉིས་ཀྱི་གཟི་བརྗིད་རྒྱལ་སྤྱིའི་སྟེང་ངོམ་ཐུབ་པ་བྱུང་ཡོད།

ད་ཐེངས་ཀྱི་ལས་འགུལ་ནང་ལོ་རྒན་བརྒྱད་ཅུ་བརྒལ་བའི་བགྲེས་སོང་དང་ན་ཚོད་མ་ཟིན་པའི་བྱིས་པ་ལོ་དྲུག་ཡན་ཆད་ཀྱང་ས་ཐག་རིང་མིན་ལ་མ་ལྟོས་པར་མཉམ་ཞུགས་ཐུབ་སོང༌། རེ་འགས། ཉིས་སྟོང་བདུན་ལོར་མི་མང་བཞི་ཁྲི་བརྒལ་བ་མཉམ་ཞུགས་ཀྱི་ཞི་རྒོལ་ཆེན་མོའི་སྣེ་ཁྲིད་པ་སྒོ་དྲུག་སྐལ་བཟང་བླ་ཆད་མྱོང་བ་ལྟར། ཐེངས་འདིའི་བཀའ་བློན་ཁྲི་པའང་ཉྭ་ཁུམ་སོང་བ་མ་རེད་དམ། ཟེར་བའི་སྐད་ཆའི་རྒྱབ་ལྗོངས་ཀྱི་ཁུངས་གསལ་པོ་མི་ཤེས་མོད། མི་མང་ལས་འགུལ་འདི་གལ་ཆེའི་དོན་ཆེན་ལ་སོང༌། བཀའ་བློན་ཁྲི་པ་ཚེས་༡༩ ཉིན་གནམ་གྲུའི་དཀའ་ངལ་གྱིས་ལྡི་ལིར་ཕེབས་མ་ཐུབ་པའི་དབང་དུ་བཏང་ཡང༌། ཚེས་༢༠ ཉིན་ལྡི་ལིའི་གཞུང་འབྲེལ་ལས་འགུལ་ལས་རྡོ་རྗེ་གླིང་སློབ་གྲཱའི་མཛད་སྒོ་གལ་ཆེན་བརྩིས་པ་དང༌། རྡོ་རྗེ་གླིང་དུ་ཕེབས་ཐུབ་པ་ལ་ལྡི་ལིར་ཕེབས་མ་ཐུབ་པའི་གནས་ཚུལ་དེ་འགྲེལ་བཤད་རྒྱག་ཁག་པོ་ཆགས་ཡོད་པ་རེད།

སྐབས་དེའི་ཆོས་རིག་བཀའ་བློན་གྱི་གསུང་བཤད་དེ་གོ་རྒྱུ་ཚོར་རྒྱུ་ཡོད་མེད་ཇི་ལྟར་ཡང་སྤྱི་འཐུས་ཚོགས་གཞོན་གྱི་གསུང་བཤད་དེའང་ཡུལ་སྐད་ཀྱིས་དབང་གིས། གསུང་བཤད་ཀྱི་ནང་དོན་ཆ་ཚང་པ་ཞིག་གོ་མཁན་མང་མཐར་ཡང་མི་སུམ་ཅུ་བཞི་བཅུ་ལས་བྱུང་མེད་པ་འདྲ། སྤྱི་འཐུས་ཚོགས་གཙོ་མཆོག་གི་གསུང་བཤད་དང་སྒྲོབ་གཟུགས་ཀྱི་རྣམ་འགྱུར་དེ་དག་གིས། ལས་འགུལ་བ་འགོ་འཇུག་བར་གསུམ་ནས་འཛུམ་དམུལ་དམུལ་ངང་ངོ་གདོང་གི་རྔུལ་ནག་ཕྱི་བཞིན་འདུག་ལ། རྒྱ་གར་གྱི་ཡུལ་མི་དང་རྒྱ་གར་གྱི་ཆེས་མཐོའི་གཏམ་བཤད་པ་རྣམ་པས་ཀྱང་ཡ་མཚན་མཚན་དང་འདྲོགས་རིས་རིས་གནང་སོང༌། མི་རྣམས་སེམས་ཤུགས་འཕར་བཞིན་པ་དང་ལྷག་པར་དུ་ལྡི་ལིའི་གཞུང་འབྲེལ་ལས་འགུལ་འདི། སྐབས་དེའི་གཞུང་འབྲེལ་ལས་འགུལ་གྱི་ལྟེ་བ་ཡིན་དུས། ཁྱབ་བསྒྲགས་དང་དོ་སྣང༌། རྒྱ་ནག་དང་རྒྱལ་སྤྱི་སོགས་གང་ཅིའི་ཐད་ནས། བཀའ་བློན་ཁྲི་པ་དངོས་སུ་ཕེབས་ཏེ་གསུང་བཤད་དང་སྣེ་ཁྲིད་གནང་བ་ཡིན་ན། གཞན་དང་མི་འདྲ་བའི་ནུས་ཤུགས་ཐོན་རྒྱུ་མ་ཟད། རྡ་སའི་ལུང་ཁུག་དང་མི་འདྲ་བར་ལས་འགུལ་བ་སུམ་སྟོང་ལྷག་ཕྱོགས་སོ་སོར་ཕེབས་ཚེ་སྐབས་དེའི་མྱོང་ཚོར་དང་འགྲེལ་བཤད་རྣམས་རང་བཞིན་གྱིས་མི་འདྲ་བ་ཆགས་པ་དང༌། མ་འོངས་པར་ཡང་ལས་འགུལ་འདིའི་རིགས་སྤེལ་སྐབས་མི་མང་བསྡུ་སྐོང་སོགས་ལས་འགུལ་གྱི་སྤུས་ཚད་ལ་ཁྱད་པར་ཆེན་པོ་འགྲོ་ངེས་ཡིན་པ་རེད།

ཡང་གཅིག་ཐལ་སོང་སྟེ། ཚེས་༢༢ ཉིན་གྲོས་ཚོགས་ཀྱི་འཐུས་མི་སུམ་ཅུ་ལྷག་དུས་གཅིག་ཏུ་ལྡི་ལི་མ་ཇཱུ་ཏྲི་ལིའི་ཁྲོམ་གཞུང་དུ་སྤུངས་སོང་ལ། མངར་ཇ་ཤེལ་ཕོར་ཕྱེད་ཀ་རེ་ཕྱག་ཏུ་བསྣམས་བཞིན་ཡར་ཕེབས་མར་ཕེབས་དང་འཛུམ་ཡལ་ཡལ། ཧ་ཆ་རེ་བརྒྱབ་པ་ནི་སྐུ་ངོ་ཞིག་གི་གསུང་དང་འདྲ་ཐབས་མི་འདུག མ་ཇཱུ་ཏྲི་ལའི་ཁྲོམ་གཞུང་མཐོ་གང་པོ་དེ་རྦད་དེ་འགྱུར་ལྡོག་ཕྱིན་པ་དང་ཆབས་ཅིག ཉིས་སྟོང་དགུ་ལོའི་རྡ་སའི་ལུང་ཁུག་གི་གྲོས་ཚོགས་ཀྱི་ཟིང་ཆ་དང༌། ཉིས་སྟོང་བཅུ་ལོའི་ཞབས་སྟེགས་འཕྲོག་རེས་ཀྱི་འཐབ་རྩོད་སོགས་རྣམ་རྟོག་སྣ་ཚོགས་པའི་ས་རྡུལ་དྲག་ཆར་བབས་ཀྱང་སྣང་བ་དཀར་པོ་དཀར་རྐྱང་ལ་དྲི་མས་མ་གོས་པའི་ཐབས་ཤེས་མང་དུ་བཏང་བ་ཡིན། གྲིབ་མའི་འོག་ནས་ཉི་མ་འདས་ཐབས་བྱས་པའི་ངན་བྱུས་རིམ་པ་དང་པོ་ངོ་སྤྲོད་དང་ས་བོན་ཙམ་ལས་མུ་མཐུད་དེ་ཆར་པར་རེ་བབ་ན། སྟོན་འབྲས་བདག་གཟུང་ལ་གྲ་སྒྲིག་འཐུས་ཚང་ལྡན་ཡོད།

Shareསྤྱི་ཚོགས་དྲ་གནས་ཁག་ཏུ་ཁྱབ་སྤེལ།

ཁྱེད་ཀྱི་བསམ་ཚུལ་བྲིས།

ཁྱེད་ཀྱི་མིང༌།:
བརྗོད་གཞི།:
བསམ་ཚུལ།:
བསམ་ཚུལ། (6)
6 ༠༢༢༠༡༢༢༡༣༨
མདོ་སྟོ་སྤྱི་མཐུས་བརྒྱ་ཆ་མང་ཤོས་མ་རེད། དགེ་ལུགས་དང་། བགའ་བརྒྱུད། བེན་པོ་བཅས་ཀྱི་སྤྱི་མཐུས་བརྒྱ་ཆ་མང་ཤོས་རེད་ཤག་བརྒྱ་ཆ་ལྔ་བཅུ་བཟིན་འདུག
5 ༠༢༢༠༡༢༢༡༣༧
མདོ་སྟོ་སྤྱི་མཐུས་བརྒྱ་ཆ་མང་ཤོས་མ་རེད། དགེ་ལུགས་དང་། བགའ་བརྒྱུད། བེན་པོ་བཅས་ཀྱི་སྤྱི་མཐུས་བརྒྱ་ཆ་མང་ཤོས་རེད་ཤག་བརྒྱ་ཆ་ལྔ་བཅུ་བཟིན་འདུག
4 ༠༢༢༠༡༡༠༦༠༧
ཕྱི་ནང་མེད་པ་རྫུན་གྱི་འཁོར་ལོ་བསྐོར་མཁན་གྱི་སེར་སྨད་བློ་དགས་བོད་མི་ནང་ཁུལ་འཁྲུགས་ཐབས་ཀྱི་རྫུན་ཀྱི་གྱི་འཁོར་ལོ་ཞྀག་བསྐོར་འདུག་ཀྱང་ནུས་པ་ཐོན་མེད་པ་གྲགས། ད་དུང་དེ་འདྲ་ཇི་དགོས་ཁྱེད་ཀྱིས་གཟིགས་ཏེ་གྲུབ་འབྲས་ཐོན་པ་འདྲ་བྱང་ན་ད་ཡོན་དེ་སྔ་ལས་མང་བ་ཆར་པ་འབེབ་ངེས་ཡིན། དངུལ་ལ་དགའ་ན་ཁྱེད་རང་བྱེད་སྟངས་དེ་ནོར་མི་འདུག
3 ༠༨༢༠༡༡༡༩༢༤
བསམ་ཚུལ་སྒོ་འབྱེ་སོང་། ངོས་རང་ནི་དགྲ་ལྷས་རེ་བ་རྒྱག་པ་བཞིན་མ་ཡིན་པར་སྤྱི་མཐུས་ཆོས་སྐྱོང་དབང་ཕྱུག་དང་ཨ་ཅརྱ་ཡེ་ཤེས་དབང་ཕྱུག་ལྟ་བུ་བོད་མི་རིགས་ཀྱི་ནང་ནས་གང་མང་ཐོན་ཐུབ་ན་གང་འདྲ་དགའ་བ་ལ། སྤྱི་མཐུས་བདུན་པོ་དེ་དག་ལ་འགྲེལ་བཤད་རྒྱག་རོགས་ཟེར་བ་ཡིན་ན་འདྲ་ཆག་ཆག་རེ་རེ་བཤད་རྒྱུ་ཡོད་རེད། ཐོག་མ་ཉིད་ནས་གྲ་འགྲིག་བྱེད་ཡོད་རེད། ད་ཐེངས་ཀྱི་བློ་དགས་དཔྱད་རྩོམ་ཟེར་ནའང་འདྲ་དགག་རྩོམ་ཟེར་ནའང་འདྲ། གང་ལྟར་དོགས་སློང་ཡག་པོ་བྱེད་འདུག ཁྱེད་རང་ལ་སྐྱོན་བརྗོད་ཀྱི་རྩོམ་འདྲ་མིན་སྤེལ་སྲིད་པ་རེད། ཡིན་ན་ཡང་སྐྱོན་བརྗོད་ལ་གདོང་ལེན་བྱེད་ཐུབ་ན་སྒམ་པོ་ཡིན་པའི་རྟགས་མཚན་རེད། ཅེས་གསལ་འདེབས་ཀྱི་ཚུལ་དུ་ཞུ་རྒྱུ་ཡིན། དཔེར་ན། འཇམ་དབྱངས་ནོར་བུ་ལ་མིག་དཔེ་ལྟོས་རོགས།
ད་རིང་ཁ་རྩང་བཙན་བྱོལ་དུ་བོད་ཡིག་འདྲ་ཐ་རེ་ཐོ་རེ་ཤེས་མཁན་ཁ་ཤས་ཀྱིས་རྩོམ་པ་པོ་ཡིན་ན་གཅིག་ཡིན་ཁུལ་བྱས་ཏེ་ཤར་ཁུག་གི་ཟློས་གར་གྱི་རྗེས་སུ་རྒྱུགས་ནས་བཙལ་བྱོལ་བཀའ་ཤག་མིང་ཙམ་མེད་པར་བཟོ་རྒྱུའི་འཆར་འགོད་བྱེད་བཞིན་འདུག དགྲ་ལྷ་ཁྱོད་ཀྱིས་ཀྱང་སྤྱི་འཐུས་བདུན་པོ་མ་ཕེབས་པའི་རྒྱུ་མཚན་ལ་དོགས་འདྲི་འདི་ལྟར་བྱས་སྟངས་ལ་བལྟས་ན་བཙན་བྱོལ་གྲོས་ཚོགས་མགོ་རྟིང་སློག་རྒྱུའི་འཆར་འགོད་བྱེད་ཀྱི་ཡོད་པ་འདྲ། ཨེ་རེད། སྐུ་རྩེད་ཞུ་པ་ཡིན་ད།
བཀྲིས་བདེ་ལེགས།
བློ་དགའ་ལགས་ཀྱི་གསུངས་པ་འདི་དོགས་སློང་ལྟ་བུ་ཡག་པོ་བྲིས་འདུག འོན་ཀྱང་མི་བདུན་པོ་དེ་དག་ལས་འགུལ་ནང་ཕེབས་མ་དགོས་པ་དང་། ཕེབས་མ་ཐུབ་པ། ཕེབས་འདོད་མེད་པ་གང་ཡིན་ཁ་གསལ་མེད་ཙང་དེའི་ཐོག་རྒྱུས་ཡོད་ཅིག་ནས་གསལ་བཤད་མདོར་བསྡུས་ཤིག་གནང་ཐུབ་ན་ཕན་ཐོག་ཡོང་བར་འདུག

ཆོས་སྐྱོང་དབང་ཕྱུག་ཁོང་ཤེས་ཡོན་དང་དྲང་ཚུགས་ལྡན་པའི་མི་ཞིག་ཡིན་པ་ངོས་འཛིན་ཞུ་བཞིན་ཡོད། སྤྱི་བོད་རིགས་ནང་དང་སྒེར་མདོ་སྟོད་ནང་ཁོང་ལྟ་བུ་ཤེས་ཡོན་དང་དྲང་ཚུགས་ལྡན་པ་མང་ཙམ་བྱུང་ན་དགའ་བ་ལ།



བརྗོད་གཞི་གཞན་ཁག་ལ་གཟིགས།